Богослужебные чтения 16 июня 2026 года

Послание к римляном, зачало 95

Бра́тие, ве́мы, я́ко зако́н духо́вен есть, аз же пло́тян есмь, про́дан под грех. Е́же бо содева́ю, не разуме́ю, не е́же бо хощу́, сие́ творю́, но е́же ненави́жду, то соде́ловаю. А́ще ли, е́же не хощу́, сие́ творю́, хвалю́ зако́н я́ко добр, ны́не же не ктому́ аз сие́ содева́ю, но живы́й во мне грех. Вем бо, я́ко не живе́т во мне, си́речь во пло́ти мое́й, до́брое: е́же бо хоте́ти прилежи́т ми, а е́же соде́яти до́брое, не обрета́ю. Не е́же бо хощу́ до́брое, творю́, но е́же не хощу́ зло́е, сие́ содева́ю. А́ще ли, е́же не хощу́ аз, сие́ творю́, уже́ не аз сие́ творю́, но живы́й во мне грех. Обрета́ю у́бо зако́н, хотя́щу ми твори́ти до́брое, я́ко мне зло́е прилежи́т. Соуслажда́юся бо зако́ну Бо́жию по вну́треннему челове́ку. Ви́жду же ин зако́н во у́дех мои́х, проти́ву вою́ющь зако́ну ума́ моего́ и пленя́ющь мя зако́ном грехо́вным, су́щим во у́дех мои́х. Окая́нен аз челове́к, кто мя изба́вит от те́ла сме́рти сея́? Благодарю́ Бо́га моего́ Иису́с Христо́м Го́сподем на́шим. Те́мже у́бо сам аз умо́м мои́м рабо́таю зако́ну Бо́жию, пло́тию же зако́ну грехо́вному. Ни еди́но у́бо ны́не осужде́ние су́щым о Христе́ Иису́се не по пло́ти ходя́щым, но по ду́ху. Зако́н бо ду́ха жи́зни о Христе́ Иису́се свободи́л мя есть от зако́на грехо́внаго и сме́рти.

Евангелие от Матфеа, зачало 35

Рече́ Госпо́дь Свои́м ученико́м: не стяжи́те зла́та, ни сребра́, ни ме́ди при поясе́х ва́ших, ни пи́ры на пути́, ни двою́ ри́зу, ни сапо́г, ни жезл, досто́ин бо есть де́латель мзды своея́. Во́ньже а́ще коли́ждо град или́ весь вни́дете, испыта́йте, кто в нем досто́ин есть, и ту пребу́дите, до́ндеже изы́дете. Входя́ще же в дом целу́йте его́, глаго́люще: мир до́му сему́, и а́ще у́бо бу́дет дом досто́ин, прии́дет мир ваш нань, а́ще ли же не бу́дет досто́ин, мир ваш к вам возврати́тся. И и́же а́ще не прии́мет вас, ниже́ послу́шает слове́с ва́ших, исходя́ще из до́му или́ из гра́да того́, оттряси́те прах ног ва́ших. Ами́нь, глаго́лю вам, отра́днее бу́дет земли́ Содо́мстей и Гомо́ррстей в день су́дный, не́же гра́ду тому́.