Богослужебные чтения 11 марта 2024 года

Соборное послание Иоаннова третие, зачало 76

Ста́рец Га́иеви возлю́бленному, его́же аз люблю́ вои́стинну. Возлю́бленне, па́че во всех молю́ся о тебе́ спе́ятися тебе́, здра́вствовати, я́коже спе́ется ти душа́. Возра́довахся зело́, прише́дшым бра́тиям и свиде́тельствующым твою́ и́стину, я́коже ты во и́стине хо́диши. Бо́льши сея́ не и́мам ра́дости, да слы́шу моя́ ча́да во и́стине ходя́ща. Возлю́бленне, ве́рно твори́ши, е́же а́ще де́лаеши в бра́тию и в стра́нныя, и́же свиде́тельствоваша о твое́й любви́ пред це́рковию. И́хже предпосла́в досто́йно Бо́гу, до́бре твори́ши. О и́мени бо Его́ изыдо́ша, ничто́же прие́млюще от язы́к. Мы у́бо до́лжни есмы́ приима́ти таковы́х, да поспе́шницы бу́дем и́стине. Писа́х це́ркви, но первстволю́бец их Диотрефи́с не прие́млет нас. Сего́ ра́ди, а́ще прииду́, воспомяну́ ему́ дела́, я́же твори́т, словесы́ лука́выми укоря́я нас, и недово́лен быва́я о сих, ни сам прие́млет бра́тию, и хотя́щым возбраня́ет, и от це́ркве изго́нит. Возлю́бленне, не уподобля́йся зло́му, но благо́му. Благотворя́й от Бо́га есть, а злотворя́й не ви́де Бо́га. Дими́триеви свиде́тельствовася от всех и от са́мыя и́стины, и мы же свиде́тельствуем, и ве́сте, я́ко свиде́тельство на́ше и́стинно есть. Мно́га име́х писа́ти, но не хощу́ черни́лом и тро́стию писа́ти тебе́, упова́ю же а́бие ви́дети тя и усты́ ко усто́м глаго́лати. Мир тебе́. Целу́ют тя дру́зи, целу́й дру́ги по и́мени. Ами́нь.

Евангелие от Луки, зачало 96

Во вре́мя о́но, я́ко прибли́жися Иису́с в Вифсфаги́ю и Вифа́нию, к горе́ нарица́емей Елео́н, посла́ два учени́к Свои́х, глаго́ля: иди́те в пря́мную весь, и в ню́же входя́ща обря́щета жребя́ привя́зано, на не́же никто́же николи́же от челове́к все́де, отре́шша е́ приведи́та. И а́ще кто вы вопроша́ет: почто́ отреша́ета? Си́це рцы́та ему́, я́ко Госпо́дь его́ тре́бует. Ше́дша же по́сланная обрето́ста, я́коже рече́ и́ма. Отреша́ющема же и́ма жребя́, реко́ша госпо́дие его́ к ни́ма: что отреша́ета жребя́? О́на же реко́ста, я́ко Госпо́дь его́ тре́бует. И приведо́ста е́ ко Иису́сови, и возве́ргше ри́зы своя́ на жребя́, всади́ша Иису́са. Иду́щу же Ему́, постила́ху ри́зы своя́ по пути́. Приближа́ющу же ся Ему́ уже́ а́бие к низхожде́нию го́ре Елео́нстей, нача́ша все мно́жество учени́к ра́дующеся хвали́ти Бо́га гла́сом ве́лиим о всех си́лах, я́же ви́деша, глаго́люще: благослове́н гряды́й Царь во и́мя Госпо́дне, мир на небеси́ и сла́ва в вы́шних. И не́цыи фарисе́е от наро́да ре́ша к Нему́: Учи́телю, запрети́ ученико́м Твои́м. И отвеща́в рече́ им: глаго́лю вам, я́ко а́ще си́и умолча́т, ка́мение возопие́т. Прии́де же день опресно́к, во́ньже подо́бно бе вре́мя жре́ти па́сху, и посла́ Петра́ и Иоа́нна, рек: ше́дша угото́вайта нам па́сху, да я́мы. О́на же реко́ста Ему́: где хо́щеши угото́ваем? Он же рече́ и́м: се восходя́щема ва́ма во град, сря́щет вы челове́к в скуде́льнице во́ду нося́, по нем иде́та в дом, во́ньже вхо́дит, и рце́та до́му влады́це: глаго́лет тебе́ Учи́тель, где есть оби́тель, иде́же па́сху со ученики́ Мои́ми снем? И той ва́ма пока́жет го́рницу ве́лию по́стлану, ту угото́вайта. Ше́дша же обрето́ста, я́коже рече́ и́ма, и угото́васта па́сху. И егда́ бысть час, возлеже́, и обана́десяте Апо́стола с Ним, и рече́ к ним: жела́нием возжеле́х сию́ па́сху я́сти с ва́ми, пре́жде да́же не прииму́ мук. Глаго́лю бо вам, я́ко отсе́ле не и́мам я́сти от него́, до́ндеже сконча́ются во Ца́рствии Бо́жии. И прии́м ча́шу, хвалу́ возда́в, рече́: приими́те сию́, и раздели́те себе́. Глаго́лю бо вам, я́ко не и́мам пи́ти от плода́ ло́знаго, до́ндеже Ца́рствие Бо́жие прии́дет. И прии́м хлеб, хвалу́ возда́в, преломи́ и даде́ им, глаго́ля: сие́ есть те́ло Мое́, е́же за вы дае́мо, сие́ твори́те в Мое́ воспомина́ние. Та́кожде же и ча́шу по ве́чери, глаго́ля: сия́ ча́ша Но́вый Заве́т Мое́ю кро́вию, я́же за вы пролива́ется. Оба́че се рука́ предаю́щаго Мя со Мно́ю есть на трапе́зе, и Сын у́бо Челове́ческий и́дет по рече́нному, оба́че го́ре челове́ку тому́, и́мже предае́тся. И ти́и нача́ша иска́ти в себе́, кото́рый у́бо от них хотя́й сие́ сотвори́ти. Бысть же и пря в них, кий мни́тся их бы́ти бо́лий. Он же рече́ им: ца́рие язы́к госпо́дствуют и́ми, и облада́ющии и́ми благода́теле нарица́ются, вы же не та́ко, но бо́лий в вас, да бу́дет я́ко мний, и ста́рей, я́ко служа́й. Кто бо бо́лий, возлежа́й ли, или́ служа́й? Не возлежа́й ли? Аз же посреде́ вас есмь я́ко служа́й. Вы же есте́ пребы́вше со Мно́ю в напа́стех Мои́х, и Аз завещава́ю вам, я́коже завеща́ Мне Оте́ц Мой, Ца́рство, да я́сте и пие́те на трапе́зе Мое́й во Ца́рствии Мое́м, и ся́дете на престо́лех, судя́ще обемана́десяте коле́нома Изра́илевыма. Рече́ же Госпо́дь: Си́моне, Си́моне, се сатана́ про́сит вас, дабы́ се́ял, я́ко пшени́цу, Аз же моли́хся о тебе́, да не оскуде́ет ве́ра твоя́, и ты не́когда обра́щься утверди́ бра́тию твою́. Он же рече́ Ему́: Го́споди, с Тобо́ю гото́в есмь и в темни́цу и в смерть ити́. Он же рече́: глаго́лю ти, Пе́тре, не возгласи́т пе́тель днесь, до́ндеже трикра́ты отве́ржешися Мене́ не ве́дети. И рече́ им: егда́ посла́х вы без влага́лища и без ме́ха и без сапо́г, еда́ что лише́ни бы́сте? Они́ же ре́ша: ничесо́же. Рече́ же им: но ны́не и́же и́мать влага́лище, да во́змет, та́кожде и мех, а и́же не и́мать, да прода́ст ри́зу свою́, и ку́пит нож. Глаго́лю бо вам, я́ко еще́ пи́саное се подоба́ет, да сконча́ется о Мне, е́же и со беззако́нными вмени́ся. И́бо е́же о Мне, кончи́ну и́мать. Они́ же ре́ша: Го́споди, се ножа́ зде два. Он же рече́ им: дово́льно есть. И изше́д и́де по обы́чаю в гору́ Елео́нскую, по Нем же идо́ша ученицы́ Его́.