Богослужебные чтения 4 марта 2024 года

Соборное послание Иоаннова первое, зачало 71

Де́ти, после́дняя годи́на есть. И я́коже слы́шасте, я́ко анти́христ гряде́т, и ны́не анти́христи мно́зи бы́ша, от сего́ разумева́ем, я́ко после́дний час есть. От нас изыдо́ша, но не бе́ша от нас, а́ще бы от нас бы́ли, пребы́ли у́бо бы́ша с на́ми, но да явя́тся, я́ко не суть вси от нас. И вы пома́зание и́мате от Свята́го, и ве́сте вся. Не писа́х вам, я́ко не ве́сте и́стины, но я́ко ве́сте ю́ и я́ко вся́ка лжа от и́стины несть. Кто есть лжи́вый, то́чию отмета́яйся, я́ко Иису́с несть Христо́с? Сей есть анти́христ, отмета́яйся Отца́ и Сы́на. Всяк отмета́яйся Сы́на, ни Отца́ и́мать, а испове́даяй Сы́на, и Отца́ и́мать. Вы у́бо е́же слы́шасте испе́рва, в вас да пребыва́ет, и а́ще в вас пребу́дет, е́же испе́рва слы́шасте, и вы в Сы́не и Отце́ пребу́дете. И сие́ есть обетова́ние, е́же Сам обеща́ нам, живо́т ве́чный. Сия́ писа́х вам о льстя́щих вас. И вы е́же пома́зание е́же прия́сте от Него́, в вас пребыва́ет, и не тре́буете, да кто учи́т вы, но я́ко то са́мо пома́зание учи́т вы о всем, и и́стинно есть, и несть ло́жно, и я́коже научи́ вас, пребыва́йте в нем. И ны́не ча́дца, пребыва́йте в Нем, да егда́ яви́тся, и́мамы дерзнове́ние и не посрами́мся от Него́ в прише́ствии Его́. А́ще ве́сте, я́ко пра́ведник есть, разуме́йте, я́ко всяк творя́й пра́вду от Него́ роди́ся. Ви́дите, какову́ любо́вь дал есть Оте́ц нам, да ча́да Бо́жия нарече́мся, и есмы́. Сего́ ра́ди мир не зна́ет нас, зане́ не позна́ Его́. Возлю́бленнии, ны́не ча́да Бо́жия есмы́, и не у яви́ся, что бу́дем: ве́мы же, я́ко егда́ яви́тся, подо́бни Ему́ бу́дем, и у́зрим Его́, я́коже есть. И всяк име́яй наде́жду сию́ Нань, очища́ет себе́, я́коже Он чист есть. Всяк творя́й грех, и беззако́ние твори́т, и грех есть беззако́ние. И ве́сте, я́ко Он яви́ся, да грехи́ на́ша во́змет, и греха́ в Нем несть. Всяк, и́же в Нем пребыва́яй, не согреша́ет, всяк согреша́яй не ви́де Его́, ни позна́ Его́. Ча́дца, никто́же да льстит вас. Творя́й пра́вду пра́ведник есть, я́коже Он пра́веден есть. Творя́й грех от диа́вола есть, я́ко испе́рва диа́вол согреша́ет. Сего́ ра́ди яви́ся Сын Бо́жий да разруши́т дела́ диа́воля. Всяк рожде́нный от Бо́га греха́ не твори́т, я́ко се́мя Его́ в нем пребыва́ет, и не мо́жет согреша́ти, я́ко от Бо́га рожде́н есть. Сего́ ра́ди явле́на суть ча́да Бо́жия и ча́да диа́воля.

Евангелие от Марка, зачало 49

Во вре́мя о́но, прибли́жися Иису́с во Иерусали́м, и прии́де в Вифсфаги́ю и Вифа́нию, к горе́ Елео́нстей, посла́ два от учени́к Свои́х и глаго́ла и́ма: иди́та в весь, я́же есть пря́мо ва́ма, и а́бие входя́ща в ню, обря́щета жребя́ привя́зано, на не́же никто́же от челове́к все́де, отре́шша е́, приведи́та. И а́ще кто ва́ма рече́т: что твори́та сие́? Рцы́та, я́ко Госпо́дь тре́бует е́, и а́бие по́слет е́ се́мо. Идо́ста же, и обрето́ста жребя́ привя́зано при две́рех вне на распу́тии, и отреши́ста е́. И не́цыи от стоя́щих ту глаго́лаху и́ма: что де́ета отреша́юща жребя́? Она́ же ре́ста им, я́коже запове́да и́ма Иису́с, и оста́виша я́. И приведо́ста жребя́ ко Иису́сови, и возложи́ша на не ри́зы своя́, и все́де на не. Мно́зи же ри́зы своя́ постла́ша по пути́, друзи́и же ва́иа ре́заху от дре́вия и постила́ху по пути́. И предходя́щии и вслед гряду́щии вопия́ху, глаго́люще: оса́нна, благослове́н Гряды́й во и́мя Госпо́дне, благослове́но гряду́щее ца́рство во и́мя Го́спода отца́ на́шего Дави́да, оса́нна в вы́шних. И вни́де во Иерусали́м Иису́с и в це́рковь, и согля́дав вся, по́зде уже́ су́щу часу́, изы́де в Вифа́нию со обемана́десяте.