Богослужебные чтения 25 января 2026 года

Евангелие от Иоанна, зачало 67

Во вре́мя о́но, яви́ся Иису́с ученико́м Свои́м, воста́в от ме́ртвых. И глаго́ла Си́мону Петру́: Си́моне Ио́нин, лю́биши ли Мя па́че сих? Глаго́ла Ему́: ей, Го́споди, Ты ве́си, я́ко люблю́ Тя. Глаго́ла ему́: паси́ а́гнцы Моя́. Глаго́ла ему́ па́ки второ́е: Си́моне Ио́нин, лю́биши ли Мя? Глаго́ла ему́: ей, Го́споди, Ты ве́си, я́ко люблю́ Тя. Глаго́ла ему́: паси́ о́вцы Моя́. Глаго́ла ему́ тре́тие: Си́моне Ио́нин, лю́биши ли Мя? Оскорбе́ же Петр, я́ко рече́ ему́ тре́тие, лю́биши ли Мя; и глаго́ла Ему́: Го́споди, Ты вся ве́си, Ты ве́си, я́ко люблю́ Тя. Глаго́ла ему́ Иису́с: паси́ о́вцы Моя́. Ами́нь, ами́нь, глаго́лю тебе́, егда́ бе юн, поя́сашеся сам, и хожда́ше, а́може хотя́ше, егда́ же состаре́ешися и возде́жеши ру́це твои́, и ин тя поя́шет, и веде́т, а́може не хо́щеши. Сие́ же рече́, назна́менуя, ко́ею сме́ртию просла́вит Бо́га. И сия́ рек, глаго́ла ему́: иди́ по Мне. Обра́щься же Петр, ви́де ученика́, его́же любля́ше Иису́с, во след иду́ща, и́же и возлеже́ на ве́чери на пе́рси Его́, и рече́: Го́споди, кто есть предая́й Тя? Сего́ ви́дев Петр, глаго́ла Иису́сови: Го́споди, сей же что? Глаго́ла ему́ Иису́с: а́ще хощу́, да той пребыва́ет, до́ндеже прииду́, что к тебе́? Ты по Мне гряди́. Изы́де же сло́во се в бра́тию, я́ко учени́к той не у́мрет, и не рече́ ему́ Иису́с, я́ко не у́мрет, но а́ще хощу́ тому́ пребыва́ти, до́ндеже прииду́, что к тебе́? Сей есть учени́к свиде́тельствуяй о сих, и́же и написа́ сия́, и вем, я́ко и́стинно есть свиде́тельство его́. Суть же и и́на мно́га, я́же сотвори́ Иису́с, я́же а́ще по еди́ному пи́сана быва́ют, ни самому́ мню всему́ ми́ру вмести́ти пи́шемых книг. Ами́нь.

Послание ко ефесеем, зачало 224Б

Бра́тие, еди́ному кому́ждо нас даде́ся благода́ть по ме́ре дарова́ния Христо́ва. Те́мже глаго́лет: возше́д на высоту́, плени́л еси́ плен, и даде́ дая́ния челове́ком. А е́же взы́де, что есть, то́чию я́ко и сни́де пре́жде в до́льнейшыя страны́ земли́? Сше́дый, Той есть и возше́дый превы́ше всех небе́с, да испо́лнит вся́ческая. И Той дал есть о́вы у́бо Апо́столы, о́вы же проро́ки, о́вы же Благове́стники, о́вы же па́стыри и учи́тели, к соверше́нию святы́х, в де́ло служе́ния, в созида́ние Те́ла Христо́ва, до́ндеже дости́гнем вси во едине́ние ве́ры и позна́ния Сы́на Бо́жия, в му́жа соверше́нна, в ме́ру во́зраста исполне́ния Христо́ва.

Евангелие от Матфеа, зачало 8

Во вре́мя о́но, слы́шав Иису́с, я́ко Иоа́нн пре́дан бысть, оты́де в Галиле́ю, и оста́вль Назаре́т, прише́д всели́ся в Капернау́м в помо́рие, в преде́лех Завуло́них и Неффали́млих. Да сбу́дется рече́нное Иса́ием проро́ком, глаго́лющим: земля́ Завуло́ня и земля́ Неффали́мля, путь мо́ря об он пол Иорда́на, Галиле́а язы́к, лю́дие седя́щии во тме ви́деша свет ве́лий, и седя́щым в стране́ и се́ни сме́ртней, свет возсия́ им. Отто́ле нача́т Иису́с пропове́дати и глаго́лати: пока́йтеся, прибли́жися бо Ца́рство Небе́сное.

Послание к Тимофею первое, зачало 285Б

Ча́до Тимофе́е, ве́рно сло́во и вся́каго прия́тия досто́йно. На сие́ бо и тружда́емся и поноша́еми есмы́, я́ко упова́хом на Бо́га жи́ва, И́же есть Спаси́тель всем челове́ком, па́че же ве́рным. Завещава́й сия́ и учи́. Никто́же о ю́ности твое́й да неради́т, но о́браз бу́ди ве́рным сло́вом, житие́м, любо́вию, ду́хом, ве́рою, чистото́ю. До́ндеже прииду́, внемли́ чте́нию, утеше́нию, уче́нию. Не неради́ о свое́м дарова́нии живу́щем в тебе́, е́же дано́ тебе́ бысть проро́чеством с возложе́нием рук свяще́нничества. В сих поуча́йся, в сих пребыва́й, в сих разумева́й, да преспе́яние твое́ явле́но бу́дет во всех.

Евангелие от Луки, зачало 94

Во вре́мя о́но, прии́де Иису́с во Иерихо́н. И се муж нарица́емый Закхе́й, и сей бе ста́рей мытаре́м, и той бе бога́т. И иска́ше ви́дети Иису́са, кто есть, и не можа́ше от наро́да, я́ко во́зрастом мал бе. И предите́к, возле́зе на я́годичину, да ви́дит, я́ко туде́ хотя́ше мину́ти. И я́ко прии́де на ме́сто, воззре́в Иису́с ви́дев его́ и рече́ к нему́: Закхе́е, потща́вся сле́зи, днесь бо в дому́ твое́м подоба́ет Ми бы́ти. И потща́вся сле́зе и прия́т Его́ ра́дуяся. И ви́девше вси ропта́ху, глаго́люще, я́ко ко гре́шну му́жу вни́де вита́ти. Став же Закхе́й рече́ ко Го́споду: се пол име́ния моего́, Го́споди, дам ни́щым, и а́ще кого́ чим оби́дех, возвращу́ четвери́цею. Рече́ же к нему́ Иису́с, я́ко днесь спасе́ние до́му сему́ бысть, зане́ и сей сын Авраа́мль есть. Прии́де бо Сын Челове́чь взыска́ти и спасти́ поги́бшаго.