Богослужебные чтения 11 января 2024 года

Соборное послание Иаковле, зачало 56

Возлю́бленнии, повини́теся Бо́гу, проти́витеся же диа́волу, и бежи́т от вас. Прибли́житеся Бо́гу, и прибли́жится вам; очи́стите ру́це, гре́шницы, испра́вите сердца́ ва́ша, двоеду́шнии. Постражди́те и слези́те и пла́читеся, смех ваш в плачь да обрати́тся, и ра́дость в се́тование. Смири́теся пред Го́сподем, и вознесе́т вы. Не оклевета́йте друг дру́га, бра́тие, оклевета́яй бо бра́та, или́ осужда́яй бра́та своего́, оклевета́ет зако́н и осужда́ет зако́н. А́ще ли зако́н осужда́еши, не́си творе́ц зако́на, но судия́. Еди́н есть Законополо́жник и Судия́, моги́й спасти́ и погуби́ти, ты же кто еси́ осужда́яй дру́га? Слы́шите ны́не, глаго́лющии: днесь или́ у́тре по́йдем во он град, и сотвори́м ту ле́то еди́но, и ку́плю де́ем и приобре́тение. И́же не ве́сте, что у́тре случи́тся. Ка́я бо жизнь ва́ша, па́ра бо есть, я́же вма́ле явля́ется, пото́м же исчеза́ет. Вме́сто е́же бы глаго́лати вам: а́ще Госпо́дь восхо́щет, и жи́ви бу́дем, и сотвори́м сие́ или́ о́но. Ны́не же хва́литеся в горды́нях ва́ших: вся́ка хвала́ такова́ зла есть. Ве́дущему у́бо добро́ твори́ти, и не творя́щему, грех ему́ есть. Прииди́те ны́не, бога́тии, пла́читеся и рыда́йте о лю́тых ско́рбех ва́ших гряду́щих на вы. Бога́тство ва́ше изгни́, и ри́зы ва́ша мо́лие поядо́ша. Зла́то ва́ше и сребро́ изоржа́ве, и ржа их в послушество́ на вас бу́дет, и снесть пло́ти ва́ша а́ки огнь, его́же сниска́сте в после́дния дни. Се мзда де́лателей де́лавших ни́вы ва́ша, удержа́ная от вас, вопие́т, и вопие́ния жа́вших во у́ши Го́спода Савао́фа внидо́ша. Возвесели́стеся на земли́, и наслади́стеся, упита́сте сердца́ ва́ша а́ки в день заколе́ния. Осуди́сте, уби́сте Пра́веднаго, не проти́вится вам. Долготерпи́те у́бо, бра́тие моя́, до прише́ствия Госпо́дня. Се земледе́лец ждет честна́го плода́ от земли́, долготерпя́ о нем, до́ндеже прии́мет дождь ран и по́зден. Долготерпи́те у́бо и вы, утверди́те сердца́ ва́ша, я́ко прише́ствие Госпо́дне прибли́жися. Не воздыха́йте друг на дру́га, бра́тие, да не осужде́ни бу́дете; се Судия́ пред две́рьми стои́т.

Евангелие от Марка, зачало 52

Во вре́мя о́но, прии́де Иису́с во Иерусали́м. И в це́ркви ходя́щу Ему́, приидо́ша к Нему́ архиере́е, и кни́жницы, и ста́рцы. И глаго́лаша Ему́: ко́ею о́бластию сия́ твори́ши? И кто Ти о́бласть сию́ даде́, да сия́ твори́ши? Иису́с же отвеща́в рече́ им: вопрошу́ вы и Аз сло́во еди́но, и отвеща́йте Ми, и реку́ вам, ко́ею о́бластию сия́ творю́. Креще́ние Иоа́нново с небесе́ ли бе, или́ от челове́к? Отвеща́йте Ми. И мы́сляху в себе́, глаго́люще: а́ще рече́м, с небесе́, рече́т: почто́ у́бо не ве́ровасте ему́? Но а́ще рече́м, от челове́к: боя́хуся люде́й, вси бо име́яху Иоа́нна, я́ко вои́стинну проро́к бе. И отвеща́вше глаго́лаша Иису́сови: не ве́мы. И отвеща́в Иису́с глаго́ла им: ни Аз глаго́лю вам, ко́ею о́бластию сия́ творю́.

Послание к коринфяном второе, зачало 180

Бра́тие, Христо́с за вся у́мре, да живу́щии не ктому́ себе́ живу́т, но уме́ршему за них и воскре́сшему. Те́мже и мы отны́не ни еди́наго ве́мы по пло́ти, а́ще же и разуме́хом по пло́ти Христа́, но ны́не ктому́ не разуме́ем. Те́мже а́ще ка́я о Христе́, нова́ тварь: дре́вняя мимоидо́ша, се бы́ша вся нова́. Вся́ческая же от Бо́га, примири́вшаго нас Себе́ Иису́с Христо́м и да́вшаго нам служе́ние примире́ния. Зане́ Бог бе во Христе́ мир примиря́я Себе́, не вменя́я им согреше́ний их и положи́в в нас сло́во примире́ния. По Христе́ у́бо мо́лим, я́ко Бо́гу моля́щу на́ми, мо́лимся у́бо по Христе́, примири́теся с Бо́гом. Не ве́девшаго бо греха́ по нас грех сотвори́, да мы бу́дем пра́вда Бо́жия о Нем.

Евангелие от Матфеа, зачало 4

Отше́дшим волхво́м, се А́нгел Госпо́день во сне яви́ся Ио́сифу, глаго́ля: воста́в, поими́ Отроча́ и Ма́терь Его́, и бежи́ во Еги́пет, и бу́ди та́мо, до́ндеже реку́ ти, хо́щет бо И́род иска́ти Отроча́те, да погуби́т Е́. Он же, воста́в, поя́т Отроча́ и Ма́терь Его́ но́щию и оты́де во Еги́пет. И бе та́мо до уме́ртвия И́родова, да сбу́дется рече́нное от Го́спода проро́ком, глаго́лющим: от Еги́пта воззва́х Сы́на Моего́. Тогда́ И́род, ви́дев, я́ко пору́ган бысть от волхво́в, разгне́вася зело́ и посла́в, изби́ вся де́ти, су́щия в Вифлее́ме и во всех преде́лех его́, от двою́ ле́ту и нижа́йше по вре́мени, е́же изве́стно испыта́ от волхво́в. Тогда́ сбы́стся рече́нное Иереми́ем проро́ком, глаго́лющим: глас в Ра́ме слы́шан бысть, плачь, и рыда́ние, и вопль мног. Рахи́ль пла́чущися чад свои́х и не хотя́ше уте́шитися, я́ко не суть. Уме́ршу же И́роду, се А́нгел Госпо́день во сне яви́ся Ио́сифу во Еги́пте, глаго́ля: воста́в, поими́ Отроча́ и Ма́терь Его́ и иди́ в зе́млю Изра́илеву, изомро́ша бо и́щущии ду́шу Отроча́те. Он же воста́в, поя́т Отроча́ и Ма́терь Его́ и прии́де в зе́млю Изра́илеву. Слы́шав же, я́ко Архела́й ца́рствует во Иуде́и вме́сто И́рода, отца́ своего́, убоя́ся та́мо ити́. Весть же прие́мь во сне, оты́де в преде́лы Галиле́йския. И прише́д, всели́ся во гра́де, нарица́емем Назаре́т. Я́ко да сбу́дется рече́нное проро́ки, я́ко Назоре́й нарече́тся.