Богослужебные чтения 9 января 2026 года

Соборное послание Иаковле, зачало 52

Бра́тие, не на лица́ зря́ще име́йте ве́ру Го́спода на́шего Иису́са Христа́ сла́вы. А́ще бо вни́дет в со́нмище ва́ше муж, злат пе́рстень нося́, в ри́зе све́тле, вни́дет же и нищь в ху́де оде́жде, и воззрите́ на нося́щаго ри́зу све́тлу, и рече́те ему́: ты ся́ди зде до́бре; и ни́щему рече́те: ты ста́ни та́мо, или́ ся́ди зде на подно́жии мое́м; и не разсмотри́сте в себе́, и бы́сте судии́ помышле́ний злых. Слы́шите, бра́тие моя́ возлю́бленная, не Бог ли избра́ ни́щыя ми́ра сего́ бога́ты в ве́ре и насле́дники Ца́рствия, е́же обеща́ лю́бящым Его́? Вы же укори́сте ни́щаго. Не бога́тии ли наси́луют вам, и ти́и влеку́т вы на суди́ща? Не ти́и ли ху́лят до́брое и́мя нарече́нное на вас? А́ще у́бо зако́н соверша́ете ца́рский, по Писа́нию: возлю́биши и́скренняго своего́ я́коже себе́ сама́го, до́бре творите́. А́ще же на лица́ зрите́, то грех содева́ете, облича́еми от зако́на я́коже престу́пницы. И́же бо весь зако́н соблюде́т, согреши́т же во еди́ном, бысть всем пови́нен. Реки́й бо, не прелюбы́ сотвори́ши, рекл есть, и не убие́ши. А́ще же не прелюбы́ сотвори́ши, убие́ши же, был еси́ престу́пник зако́на. Та́ко глаго́лите и та́ко твори́те, я́ко зако́ном свобо́дным хотя́ще суд прия́ти. Суд бо без ми́лости не сотво́ршему ми́лости, и хва́лится ми́лость на суде́.

Евангелие от Марка, зачало 53

Рече́ Госпо́дь при́тчу сию́: виногра́д насади́ челове́к, и огради́ опло́том, и ископа́ точи́ло, и созда́ столп, и предаде́ его́ тяжа́телем, и оты́де. И посла́ к тяжа́телем во вре́мя раба́, да от тяжа́тель прии́мет от плода́ виногра́да. Они́ же е́мше его́ би́ша и посла́ша тощ. И па́ки посла́ к ним друга́го раба́, и того́ ка́мением би́вше, проби́ша главу́ ему́ и посла́ша безче́стна. И па́ки ино́го посла́, и того́ уби́ша, и мно́ги и́ны, о́вы у́бо бию́ще, о́вы же убива́юще. Еще́ у́бо еди́наго сы́на име́ возлю́бленнаго своего́, посла́ и того́ к ним последи́, глаго́ля, я́ко усрамя́тся сы́на моего́. Они́ же тяжа́теле ре́ша к себе́, я́ко сей есть насле́дник, прииди́те, убие́м его́, и на́ше бу́дет насле́дствие. И е́мше его́ уби́ша и изверго́ша его́ вон из виногра́да. Что у́бо сотвори́т госпо́дь виногра́да? Прии́дет и погуби́т тяжа́тели и даст виногра́д ине́м. Ни Писа́ния ли сего́ чли есте́: ка́мень, его́же не в ряду́ сотвори́ша зи́ждущии, сей бысть во главу́ у́гла, от Го́спода бысть сей, и есть ди́вно во о́чию на́шею? И иска́ху Его́ я́ти, и убоя́шася наро́да, разуме́ша бо, я́ко к ним при́тчу рече́, и оста́вльше Его́ отидо́ша.

Деяния святых Апостол, зачало 17

Во дни о́ны, Стефа́н испо́лнь ве́ры и си́лы творя́ше зна́мения и чудеса́ ве́лия в лю́дех. Воста́ша же не́цыи от со́нма глаго́лемаго Ливерти́нска и Кирине́йска и Алекса́ндрска, и и́же от Килики́и и Аси́и, стяза́ющеся со Стефа́ном. И не можа́ху проти́ву ста́ти прему́дрости и Ду́ху, И́мже глаго́лаше. Тогда́ подусти́ша му́жы глаго́лющыя, я́ко слы́шахом его́ глаго́люща глаго́лы ху́льныя на Моисе́а и на Бо́га. Сподвиго́ша же лю́ди и ста́рцы и кни́жники, и напа́дше восхи́тиша его́ и приведо́ша на со́нмище, поста́виша же свиде́тели ло́жны глаго́лющыя, я́ко челове́к сей не престае́т глаго́лы ху́льныя глаго́ля на ме́сто свято́е сие́ и зако́н. Слы́шахом бо его́ глаго́люща, я́ко Иису́с Назоре́й сей разори́т ме́сто сие́ и измени́т обы́чаи, я́же предаде́ нам Моисе́й. И воззре́вше нань вси седя́щии в со́нмищи, ви́деша лице́ его́ я́ко лице́ А́нгела. Рече́ же архиере́й: а́ще у́бо сия́ та́ко суть? Он же рече́: му́жие бра́тие и отцы́, послу́шайте. Бог сла́вы яви́ся отцу́ на́шему Авраа́му су́щу в Месопота́мии, пре́жде да́же не всели́тися ему́ в Харра́нь, и рече́ к нему́: изы́ди от земли́ твоея́ и от ро́да твоего́ и от до́му отца́ твоего́, и прииди́ в зе́млю, ю́же а́ще ти покажу́. Тогда́ изше́д от земли́ Халде́йския, всели́ся в Харра́нь, и отту́ду, по уме́ртвии отца́ его́, пресели́ его́ в зе́млю сию́, на не́йже вы ны́не живете́, и не даде́ ему́ насле́дия в ней, ниже́ стопы́ но́гу. Соломо́н же созда́ Ему́ храм. Но Вы́шний не в рукотворе́нных це́рквах живе́т, я́коже проро́к глаго́лет: Не́бо Мне престо́л есть, земля́ же подно́жие нога́ма Мои́ма. Кий храм сози́ждете Ми, глаго́лет Госпо́дь, или́ ко́е ме́сто поко́ищу Моему́? Не рука́ ли Моя́ сотвори́ сия́ вся? Жестоковы́йнии и необре́заннии се́рдцы и ушесы́, вы при́сно Ду́ху Свято́му проти́витеся, я́коже отцы́ ва́ши, та́ко и вы. Кого́ от проро́к не изгна́ша отцы́ ва́ши? И уби́ша предвозвести́вшыя о прише́ствии Пра́веднаго, Его́же вы ны́не преда́теле и уби́йцы бы́сте, и́же прия́сте зако́н устрое́нием А́нгельским и не сохрани́сте. Слы́шаще же сия́, распыха́хуся сердцы́ свои́ми и скрежета́ху зубы́ нань. Стефа́н же сый испо́лнь Ду́ха Свя́та, воззре́в на не́бо, ви́де сла́ву Бо́жию и Иису́са стоя́ща одесну́ю Бо́га, и рече́: се ви́жу небеса́ отве́рста и Сы́на Челове́ча одесну́ю стоя́ща Бо́га. Возопи́вше же гла́сом ве́лиим, затыка́ху у́ши свои́ и устреми́шася единоду́шно нань, и изве́дше вне гра́да, ка́мением побива́ху его́, и свиде́телие сне́мше ри́зы своя́ положи́ша при ногу́ ю́ноши нарица́емаго Са́вла, и ка́мением побива́ху Стефа́на, моля́щася и глаго́люща: Го́споди Иису́се приими́ дух мой. Прекло́нь же коле́на, возопи́ гла́сом ве́лиим: Го́споди, не поста́ви им греха́ сего́. И сия́ рек у́спе.

Евангелие от Матфеа, зачало 87

Рече́ Госпо́дь при́тчу сию́: челове́к не́кий бе домови́т, и́же насади́ виногра́д, и опло́том огради́ его́, и ископа́ в нем точи́ло, и созда́ столп, и вдаст и де́лателем, и оты́де. Егда́ же прибли́жися вре́мя плодо́в, посла́ рабы́ своя́ к де́лателем прия́ти плоды́ его́, и е́мше де́лателе рабы́ его́, о́ваго у́бо би́ша, о́ваго же уби́ша, о́ваго же ка́мением поби́ша. Па́ки посла́ и́ны рабы́ мно́жайшя пе́рвых, и сотвори́ша им та́коже. Последи́ же посла́ к ним сы́на своего́, глаго́ля: усрамя́тся сы́на моего́. Де́лателе же ви́девше сы́на, ре́ша в себе́: сей есть насле́дник, прииди́те, убие́м его́ и удержи́м достоя́ние его́. И е́мше его́ изведо́ша вон из виногра́да и уби́ша. Егда́ у́бо прии́дет господи́н виногра́да, что сотвори́т де́лателем тем? Глаго́лаша Ему́: злых зле погуби́т их, и виногра́д преда́ст ины́м де́лателем, и́же воздадя́т ему́ плоды́ во времена́ своя́. Глаго́ла им Иису́с: не́сте ли чли николи́же в Писа́ниих, ка́мень, его́же не в ряду́ сотвори́ша зи́ждущии, сей бысть во главу́ у́гла? От Го́спода бысть сие́, и есть ди́вно во о́чию ва́шею.