Каноны и акафисты на каждый день седмицы

Канон умилительный ко Господу нашему Иисусу Христу

Канон, глас 2-й

Песнь 1

Ирмос: Во глубине́ постла́ иногда́ фараони́тское всево́инство преоруже́нная си́ла, вопло́щшееся же Сло́во всезло́бный грех потреби́ло есть: препросла́вленный Госпо́дь, сла́вно бо просла́вися.

Припев: Иису́се Сладча́йший, спаси́́ мя.

или: Го́споди Иису́се Христе́́, Сы́не Бо́жий, поми́луй мя гре́шнаго.

Иису́се Сладча́йший Христе́, Иису́се долготерпели́ве, души́ моея́ я́звы исцели́, Иису́се, и услади́ се́рдце мое́, Многоми́лостиве, молю́ся, Иису́се Спа́се мой, да велича́ю Тя, спаса́емый.

Припев: Иису́се Сладча́йший, спаси́́ мя.

Иису́се Сладча́йший Христе́, Иису́се, отве́рзи покая́ния ми дверь, человеколю́бче Иису́се, и приими́ мя, Тебе́ припа́дающа и те́пле прося́ща, Иису́се Спа́се мой, согре́шений проще́ния.

Слава: Иису́се Сладча́йший Христе́, Иису́се, исхити́ мя из руки́ льсти́ваго велиа́ра, Иису́се, и сотвори́ десна́го предстоя́теля сла́вы Твоея́, Иису́се Спа́се мой, ча́сти шу́ия мя избавля́яй.

И ныне: Иису́са ро́ждшая Бо́га, Влады́чице, моли́ о непотре́бных рабе́х, Пречи́стая, я́ко да му́ки моли́твами Твои́ми изба́вимся, Нескве́рная, оскверне́ннии, сла́вы присносу́щныя наслажда́ющеся.

Песнь 3

Ирмос: На ка́мени мя ве́ры утверди́в, разшири́л еси́ уста́ моя́ на враги́ моя́. Возвесели́ бо ся дух мой, внегда́ пе́ти: несть свят, я́коже Бог наш, и несть пра́веден па́че Тебе́, Го́споди.

Припев: Иису́се Сладча́йший, спаси́́ мя.

Услы́ши, человеколю́бче Иису́се мой, раба́ Твоего́, вопию́ща во умиле́нии, и изба́ви мя, Иису́се, осужде́ния и му́ки, еди́не долготерпели́ве, Иису́се Сладча́йший многоми́лостиве.

Припев: Иису́се Сладча́йший, спаси́́ мя.

Подъими́ раба́ Твоего́, Иису́се мой, припа́дающа со слеза́ми, Иису́се мой, и спаси́́, Иису́се мой, ка́ющагося мя и гее́нны, Влады́ко, изба́ви, Иису́се Сладча́йший многоми́лостиве.

Слава: Вре́мя, Иису́се мой, е́же дал ми еси́, во стра́сти ижди́х, Иису́се мой. Те́мже, Иису́се мой, не отве́ржи мя, но воззови́, молю́ся, Влады́ко Иису́се Сладча́йший, и спаси́́.

И ныне: Де́во, ро́ждшая Иису́са моего́, моли́ изба́вити мя гее́нны, еди́но предста́тельство оскорбля́емых, Богоблагода́тная, и сподо́би мя жи́зни, Всенепоро́чная, нестаре́ющияся.

Го́споди, поми́луй. (Трижды.)

Седален, глас 1-й

Спа́се мой Иису́се, блу́днаго спасы́й, Спа́се мой Иису́се, прие́мый блудни́цу, и мене́ ны́не поми́луй, Иису́се многоми́лостиве, спаси́, уще́дри, о Иису́се благоде́телю, я́коже, Благоутро́бне, Манасси́ю, Иису́се мой, я́ко Еди́н человеколю́бец.

Слава, И ныне: Моли́твы Свои́х раб приими́, Богоро́дице, и изба́ви ны от вся́кия беды́, я́ко ро́ждшая Христа́ Спа́са, изба́вителя душ на́ших.

[В среду и пятницу:

Слава, И ныне: И́же Твое́ заступле́ние стяжа́вше, Пречи́стая, Твои́ми моли́твами от бед избавля́емся, и Кресто́м Сы́на Твоего́ всегда́ сохраня́еми, по до́лгу Тя вси благоче́стно велича́ем.]

Песнь 4

Ирмос: Прише́л еси́ от Де́вы, не хода́тай, ни А́нгел, но Сам, Го́споди, вопло́щся, и спасл еси́ всего́ мя челове́ка. Тем зову́ Ти: сла́ва си́ле Твое́й, Го́споди.

Припев: Иису́се Сладча́йший, спаси́́ мя.

Исцели́, Иису́се мой, души́ моея́ я́звы, Иису́се мой, молю́ся, и руки́ мя исхити́, Иису́се мой благоутро́бне, душетле́ннаго велиа́ра, и спаси́.

Припев: Иису́се Сладча́йший, спаси́́ мя.

Согреши́х, Иису́се мой Сладча́йший, благоутро́бне; Иису́се мой, спаси́ мя, прибега́ющаго к покро́ву Твоему́, Иису́се долготерпели́ве, и Ца́рствия Твоего́ мя сподо́би.

Слава: Никто́же согреши́, Иису́се мой, я́коже согреши́х аз, окая́нный, но припа́даю моля́ся, Иису́се мой, спаси́ мя и жи́зни, Иису́се мой, насле́дие ми да́руй.

И ныне: Всепе́тая, Иису́са ро́ждшая Го́спода, Того́ моли́ изба́вити му́ки вся, пою́щия Тя, и Богоро́дицу вои́стинну имену́ющия.

Песнь 5

Ирмос: Просвеще́ние во тме лежа́щих, спасе́ние отча́янных, Христе́ Спа́се мой, к Тебе́ у́тренюю, Царю́ ми́ра, просвети́ мя сия́нием Твои́м: ино́го бо ра́зве Тебе́ бо́га не зна́ю.

Припев: Иису́се Сладча́йший, спаси́́ мя.

Ты просвеще́ние, Иису́се мой, ума́ моего́, Ты спасе́ние отчая́нныя души́ моея́, Спа́се, Ты, Иису́се мой, му́ки изба́ви и гее́нны мя, зову́ща: спаси́, Иису́се мой Христе́, мя окая́ннаго.

Припев: Иису́се Сладча́йший, спаси́́ мя.

Всеконе́чно, Иису́се мой, ко стра́сти безче́стия низве́ржен ны́не зову́: Ты, Иису́се мой, по́мощи ми ру́ку низпосла́в, исто́ргни зову́ща: спаси́, Иису́се мой Христе́, мя окая́ннаго.

Слава: Оскверне́н ум, Иису́се мой, обнося́, взыва́ю Ти: очи́сти мя от скве́рны прегреше́ний и изба́ви мя во глубины́ зло́бы от неве́дения низпопо́лзшагося, Спа́се Иису́се мой, и спаси́ мя, молю́ся.

И ныне: Иису́са ро́ждшая, Отрокови́це Богороди́тельнице, Того́ умоли́ спасти́ вся правосла́вныя, мона́хи и мирски́я, и гее́нны изба́вити зову́щия: ра́зве Тебе предста́тельства тве́рдаго не зна́ем.

Песнь 6

Ирмос: В бе́здне грехо́вней валя́яся, неизсле́дную милосе́рдия Твоего́ призыва́ю бе́здну: от тли, Бо́же, мя возведи́.

Припев: Иису́се Сладча́йший, спаси́́ мя.

Иису́се мой Христе́ многоми́лостиве, испове́дающася приими́ мя, Влады́ко, о Иису́се, и спаси́ мя, и от тли, Иису́се, мя исхити́.

Припев: Иису́се Сладча́йший, спаси́́ мя.

Иису́се мой, никто́же бысть ин блудни́к, я́коже аз, стра́стный, о Иису́се человеколю́бче: но Ты, Иису́се, мя спаси́.

Слава: Иису́се мой, блудни́цу и блу́днаго, и Манасси́ю и мытаря́ преидо́х, о Иису́се мой, страстьми́, и разбо́йника, Иису́се, и ниневи́тяны.

И ныне: Иису́са Христа́ моего́ ро́ждшая, Пречи́стая Де́во, еди́на нескве́рная, оскверне́на су́ща мя моли́тв Твои́х иссо́пом ны́не очи́сти.

Го́споди, поми́луй. (Трижды.) Слава, И ныне:

Кондак, глас 6-й

Иису́се Спа́се, очи́сти и спаси́ мя, я́коже иногда́ блудни́цу, разбо́йника же и блу́днаго, и мене́ ны́не поми́луй, Всеще́дре и Благосе́рде Го́споди, и му́ки изба́ви мя, молит́вами Пречи́стыя Твоея́ и Всепе́тыя Ма́тере.

Икос

Земна́я и вре́менная возлюби́х, ве́чных благ лиши́хся, Христе́ Иису́се, Еди́не человеколю́бче, гре́шников не отсека́емая наде́жда, но ми́лость ка́ющимся пролия́, и мене́ ны́не ка́ющася не пре́зри, Иису́се, разуме́ю бо разбо́йника испове́данием спасе́на, и мытаря́ ми́лостию очи́щена, та́ко и блудни́цу помышля́ю пла́кавшуся, я́ко всем сих положи́л еси́ о́бразы покая́ния. Прети́ши бо ми́лостивне, и милосе́рдуеши. Те́пле ка́ющася ви́диши, и проти́ву тече́ши я́ко Оте́ц. А́ще у́бо восхо́щеши, мо́щен бо еси́ и моя́ отпусти́ти грехи́, и́миже по креще́ннем обе́те оскверни́хся, но чистоту́ я́ко Бог пода́ждь ми, моли́твами Пречи́стая Твоея́ и Всепе́тыя Ма́тере.

Песнь 7

Ирмос: О́бразу злато́му на по́ле Деи́ре служи́му, трие́ Твои́ о́троцы небрего́ша безбо́жнаго веле́ния, посреде́ же огня́ вве́ржени, ороша́еми поя́ху: благослове́н еси́, Бо́же оте́ц на́ших.

Припев: Иису́се Сладча́йший, спаси́́ мя.

Христе́ Иису́се, никто́же согреши́ на земли́ от ве́ка, о Иису́се мой, я́коже согреши́х аз, окая́нный и блу́дный. Те́мже, Иису́се мой, вопию́ Ти: пою́ща мя уще́дри, благослове́н еси́, Бо́же оте́ц на́ших.

Припев: Иису́се Сладча́йший, спаси́́ мя.

Христе́ Иису́се, ко стра́ху Твоему́, вопию́, пригвозди́ мя, о Иису́се мой, и окорми́ ны́не ко приста́нищу благооти́шному, я́ко да, Иису́се мой ще́дре, пою́ Ти спаса́емый: благослове́н еси́, Бо́же оте́ц на́ших.

Слава: Христе́ Иису́се, тма́ми обеща́х Тебе́, стра́стный, о Иису́се мой, покая́ние, но солга́х окая́нный. Те́мже, Иису́се мой, вопию́ Ти: нечу́вственне пребыва́ющую ду́шу мою́ просвети́, Христе́, отце́в Бо́же благослове́н еси́.

И ныне: Христа́ Иису́са ро́ждшая стра́нно и па́че естества́, Того́ моли́, Всенепоро́чная, я́же чрез естество́ моя́ прегреше́ния вся прости́ти ми, Отрокови́це, да зову́ спаса́емь: благослове́на еси́, Бо́га пло́тию ро́ждшая.

Песнь 8

Ирмос: В пещь о́гненную ко отроко́м евре́йским снизше́дшаго и пла́мень в ро́су прело́жшаго Бо́га, по́йте, дела́, я́ко Го́спода, и превозноси́те во вся ве́ки.

Припев: Иису́се Сладча́йший, спаси́́ мя.

Тя, Иису́се мой, молю́: я́коже блудни́цу, Иису́се мой, изба́вил еси́ мно́гих согреше́ний, та́ко и мене́, Иису́се Христе́ мой, изба́ви, и очи́сти оскверне́нную ду́шу мою́, Иису́се мой.

Припев: Иису́се Сладча́йший, спаси́́ мя.

Преклони́вся, Иису́се, безслове́сными сластьми́, безслове́сен яви́хся и ското́м вои́стинну, Иису́се мой, стра́стно окая́нный уподо́бихся; те́мже, Иису́се, безслове́сия мя изба́ви.

Слава: Впад, о Иису́се, в душетле́нныя разбо́йники, обнажи́хся оде́жды, Иису́се мой, боготка́нныя ны́не, и лежу́ ра́нами уя́звлен; еле́й, Христе́ мой, возле́й на мя и вино́.

И ныне: Иису́са моего́ и Бо́га носи́вшая Христа́ несказа́нно, Богоро́дице Мари́е, Того́ моли́ при́сно от бед спасти́ся рабо́м Твои́м, и певце́м Твоим, Неискусому́жная Де́во.

Песнь 9

Ирмос: От Бо́га Бо́га Сло́ва, неизрече́нною му́дростию прише́дшаго обнови́ти Ада́ма, я́дию в тле́ние па́дшаго лю́те, от Святы́я Де́вы неизрече́нно воплоти́вшагося нас ра́ди, ве́рнии единому́дренно пе́сньми велича́ем.

Припев: Иису́се Сладча́йший, спаси́́ мя.

Манасси́ю, Иису́се мой, мытаря́, блудни́цу, блу́днаго, ще́дре Иису́се, и разбо́йника преидо́х, Иису́се мой, в де́лех сту́дных и безме́стных, Иису́се; но Ты, Иису́се мой, предвари́в, мя спаси́.

Припев: Иису́се Сладча́йший, спаси́́ мя.

От Ада́ма, Иису́се мой, согреши́вшия вся, пре́жде зако́на и в зако́не, Иису́се, и по зако́не, окая́нный, и благода́ти, Иису́се мой, победи́х страстьми́ окая́нно; но Ты, Иису́се мой, судьба́ми Твои́ми спаси́ мя.

Слава: Да не отлуче́н бу́ду, Иису́се мой, неизрече́нныя Твоея́ сла́вы, да не улучу́ ча́сти, Иису́се, шу́ия, Сладча́йший Иису́се; но Ты мя десны́м овца́м Твои́м, Христе́ Иису́се мой, сочета́в упоко́й, я́ко благоутро́бен.

И ныне: Иису́са, Богоро́дице, Его́же носи́ла еси́, еди́на неискусому́жная Де́во Мари́е, Того́, Чи́стая, уми́лостиви, я́ко Сы́на Твоего́ и Зижди́теля, изба́вити притека́ющия к Тебе́ искуше́ний и бед, и огня́ бу́дущаго.

Молитва ко Господу нашему Иисусу Христу

Влады́ко Го́споди Иису́се Христе́ Бо́же наш, Иже неизрече́ннаго ра́ди Твоего́ человеколю́бия на коне́ц веко́в в плоть оболки́йся от Присноде́вы Мари́и, сла́вим о нас Твое́ спаси́тельное промышле́ние раби́ Твои́, Влады́ко; песносло́вим Тя, я́ко Тебе́ ра́ди Отца́ позна́хом; благослови́м Тя, Его́же ра́ди и Дух Святы́й в мир прии́де, поклоня́емся Твое́й по пло́ти Пречи́стей Ма́тери, такове́й стра́шней та́йне послужи́вшей; восхваля́ем Твоя́ А́нгельская ликостоя́ния, я́ко воспева́тели и служи́тели Твоего́ вели́чествия; ублажа́ем Предте́чу Иоа́нна, Тебе́ крести́вшаго, Го́споди; почита́ем и провозвести́вшия Тя проро́ки, прославля́ем апо́столы Твоя́ святы́я; торжеству́ем же и му́ченики, свяще́нники же Твоя́ сла́вим; поклоня́емся преподо́бным Твои́м, и вся Твоя́ пра́ведники пе́стунствуем. Такова́го и толи́каго мно́гаго и неизрече́ннаго ли́ка Боже́ственнаго в моли́тву приво́дим Тебе́, всеще́дрому Бо́гу, раби́ Твои́, и сего́ ра́ди про́сим на́шим согреше́нием проще́ние, е́же да́руй нам всех Твои́х Ра́ди святы́х, изря́днее же святы́х Твои́х щедро́т, я́ко благослове́н еси́ во ве́ки. Ами́нь.