Богородичник - каноны Божией Матери на каждый день.

Глас 7. Пятница.

Богородичен, глас 7.

Распе́ншагося за ны Христа́ Бо́га / и разруши́вшаго сме́рти держа́ву / непреста́нно моли́, Богоро́дице Де́во, / да спасе́т ду́ши на́ша.

Слава и ныне, глас тойже:

Изба́ви, Богоро́дице, от содержа́щих нас грехо́в, / я́ко ина́го упова́ния, ве́рнии, не и́мамы, ра́зве Тебе́ / и от Тебе́ ро́ждшагося Бо́га.

Канон Пресвятей Богородице

Песнь 1

Ирмос: Ма́нием Твои́м на земны́й о́браз преложи́ся пре́жде удоборазлива́емое водно́е естество́, Го́споди: те́мже немо́кренно пешеше́ствовав Изра́иль, пое́т Тебе́ песнь побе́дну.

Припев: Пресвята́я Богоро́дице, спаси́ нас.

Влады́чице Богоро́дице, и́же на Тя упова́ние и́мущия и к Тебе́ притека́ющия, бед же и скорбе́й изба́ви, и паде́ния, и ве́чнаго пла́мене, и му́ки.

Росо́ю милосе́рдия Твоего́, Де́во Чи́стая, пла́мень погаси́ мои́х паде́ний, я́ко да не ко искуше́нию прииду́ вся́каго осужде́ния и огня́ бу́дущаго.

Слава: Одожди́ ми, Де́во, ка́пли Твоего́ милосе́рдия, сласте́й зно́ем всегда́ изсуша́ему, я́ко да непреста́нно сла́влю от Тебе́ ро́ждшагося Бо́га и Спа́са на́шего.

И ныне: Водо́ю напо́й Твоея́ моли́твы, Де́во, ду́шу мою́, разгоре́вшуюся печа́льным зно́ем, я́ко да Боже́ственнаго весе́лия от Тебе́ Ро́ждшемуся плоды́ принесу́.

Песнь 3

Ирмос: В нача́ле небеса́ всеси́льным сло́вом Твои́м утвержде́й, Го́споди Спа́се, и вседе́тельным и Бо́жиим Ду́хом всю си́лу их: на недви́жимем мя ка́мени испове́дания Твоего́ утверди́.

Тя молю́, Де́во, спасе́ние души́ мое́й и очище́ние пода́ждь, и благода́ть незави́стну, я́ко сильна́ и бла́га, и я́ко человеколюби́ва Отрокови́ца, и жи́зни нетле́нныя сподо́би.

Нело́жное спасе́ние и Предста́тельнице мира, ро́ждшая Зижди́теля, Чи́стая Де́во, от бед изба́ви воспева́ющих Тя ве́рно, и напа́стей жития́, и ве́чнаго осужде́ния.

Слава: Мо́лимся приле́жно щедро́там Твои́м, Отрокови́це, не пре́зри рабы́ смире́нныя: но я́ко Блага́я, ми́лостивным Твои́м о́ком при́зри, и томи́тельства нереши́маго диа́воля нас изба́ви.

И ныне: Ны́не зе́льством печа́ли объя́т есмь, Де́во, кре́пость мою́ всю разсла́бив, и весь на земли́ ниц лежу́. Но вопию́ Ти от души́: Ты воздви́гни мя па́ки и утеше́нием Твои́м укрепи́.

Песнь 4

Ирмос: Отча не́дра не оста́вль, и соше́д на зе́млю, Христе́ Бо́же, та́йну услы́шах смотре́ния Твоего́ и просла́вих Тя, Еди́не Человеколю́бче.

Ма́ти Бо́жия, изба́ви мя от тли и льсти́ваго томи́теля зми́я, при́сно мя обходя́щаго и запина́ющаго по Бо́зе стопы́ моя́.

Мы́сленныя Две́ри жизни́, покая́ния ми две́ри отве́рзи: я́ко ны́не ко отча́янным две́рем прибли́жихся, окая́нный, от мно́гих согреше́ний.

Слава: Кал страсте́й и сласте́й оттря́сши до́бре милосе́рдием Твои́м, Пресвята́я, чи́ста покажи́, и оде́ждею облецы́ мя светови́дною благода́тию.

И ныне: Скве́рну души́ и нечистоту́ телесе́ моего́ очи́стивши, Чи́стая, благоприя́тными мольба́ми Твои́ми, чи́ста предста́ви воспева́ти при́сно Тебе́ и сла́вити.

Песнь 5

Ирмос: Нощь несветла́ неве́рным, Христе́, ве́рным же просвеще́ние в сла́дости слове́с Твои́х: сего́ ра́ди к Тебе́ у́тренюю и воспева́ю Твое́ Божество́.

Преблага́го Сло́ва, Де́во Всенепоро́чная, моли́ спасти́ся нам: и́бо засту́пницу Тя стяжа́хом и в ну́ждах по́мощь кре́пку.

Не преда́ждь враго́м мя, Чи́стая, мою́ па́губу зело́ и́щущим грехо́в мои́х ра́ди: но милосе́рдием Твои́м от сих вре́да исхити́.

Слава: Ве́дуще Тя Бо́га всех, Христе́, и всех Творца́, на Тя Еди́наго возложи́хом спасе́ния упова́ние, нас ра́ди вочелове́чшагося.

И ныне: Ра́дуйся, о́блаче Чи́стая, во́ду живо́тну источа́ющий, ра́дуйся, Де́во, му́чеников утвержде́ние и апо́столов, ра́дуйся, честно́е славосло́вие, Пренепоро́чная.

Песнь 6

Ирмос: Пла́вающаго в молве́ жите́йских попече́ний, с корабле́м потопля́ема грехи́ и душетле́нному зве́рю примета́ема, я́ко Ио́на, Христе́, вопию́ Ти: из смертоно́сныя глубины́ возведи́ мя.

Благоле́пия и красоты́ добро́ту, ю́же име́х Креще́нием, погуби́х, Влады́чице, де́я неподо́бная: Ты же те́плым Твои́м предста́тельством сию́ пода́ждь ве́рно чту́щим Тя.

Страда́ния и одержа́ния ну́жднаго и печа́ли изба́ви мя, Богоро́дице, утеше́ние ми Твое́ подаю́щи: ины́я бо не и́мам засту́пницы, ра́зве Тебе́, Всенепоро́чная, аз раб Твой.

Слава: Изба́вителя ро́ждшая, Благода́теля и Спа́са, кре́пость и́маши и мо́жеши ели́ко хо́щеши твори́ти, Пренепоро́чная. Те́мже Тя мо́лим, твои́ раби́: изба́ви нас страстны́я молвы́.

И ныне: Тя о́блак ле́гок дре́вле зрит, просвеща́емь Ду́хом, проро́к Иса́иа, на не́мже се́де сла́вы Госпо́дь, прии́де и низложи́ еги́петския вся истука́нныя, Де́во Ма́ти Пречи́стая.

Таже: Го́споди поми́луй, трижды. Слава, и ны́не

Седален, глас 7:

Изба́ви огня́ ве́чнующаго покланя́ющихся Рождеству́ Твоему́: Тя бо Христо́с показа́ засту́пницу нам, пою́щим Тя.

Песнь 7

Ирмос: Пещь о́троцы огнепа́льну дре́вле росоточа́щу показа́ша, Еди́наго Бо́га воспева́юще и глаго́люще: превозноси́мый отце́в Бог и препросла́влен.

Грехо́в одержи́т мя мно́жество и ко тле́нию низво́дит мя па́губы и отчая́ния: Богоро́дице, предвари́ и пода́ждь ми по́мощь спаси́тельную.

Изба́ви мя вся́каго вра́жия злоде́йства, и искуше́ний и ско́рби, и в тишине́ и ми́ре сохрани́ ду́шу мою́, Пречи́стая: я́ко да ра́дуяся, пою́ си́лу Твою́.

Слава: Осужде́ние прови́дя дело́м мои́м лука́вым, окая́нный, взыва́ю Ти из глубины́ се́рдца моего́, Пречи́стая: Ты ми бу́ди, Влады́чице, заступле́ние и спаси́ мя.

И ныне: С му́ченики, со а́нгелы и со апо́столы, Всенепоро́чная, Твоего́ Сы́на и Го́спода моли́ спасти́ рабы́ Твоя́ от напа́стей и бед и печа́лей.

Песнь 8

Ирмос: В пещи́ о́троки подража́юще, духо́вную ро́су прие́мшии, ве́рою зове́м: благослови́те, дела́ Госпо́дня, Го́спода.

Бу́ди ми по́мощь, Де́во Пресвята́я, к Тебе́ прибега́ющему и вопию́щему с ве́рою: поми́луй, Чи́стая, и пре́жде конца́ очище́ние согреше́ний даждь ми: и в час кончи́ны пода́ждь спасе́ние, и по кончи́не поко́й да́руй.

Ужас одержи́т мя лют, егда́ помышля́ю стра́шное испыта́ние и Судию́ Неумоли́маго соде́явшим лука́вая, якова́ же вои́стинну ю́же аз окая́нный соде́ях, и му́ки о́ныя конца́ не иму́щия: Влады́чице ми́ра, бу́ди ми спасе́ние.

Слава: Иже земноро́дных вино́вна спасе́нию, о ве́рных побо́рнице, гре́шников очище́ние! О исто́чниче всего́ добра́ и пода́телю благи́х, Богороди́тельнице Чи́стая! Ты ми душе́вная боле́зни исцели́ и источи́ благода́ть ве́чную, и сла́ву и весе́лие.

И ныне: Дар от нас Яже дана́ еси́, Влады́чице, я́ко от нача́ла естества́, мольбы́ на́ша, Пречи́стая, приими́ да́ры красны́, воздаю́щи нам Твою́ по́мощь: я́ко да непреста́нно из Тебе́ Ро́ждшагося пое́м и превозно́сим во ве́ки.

Песнь 9

Ирмос: Ма́ти Бо́жия и Де́ва, ро́ждшая и де́вствующая па́ки, не естества́ де́ло, но Бо́жия снизхожде́ния: тем я́ко Еди́ну, Бо́жиих чуде́с сподо́бльшуюся, Тя при́сно велича́ем.

Под Твой кров, Де́во, ны́не прибего́х, от мно́жества прегреше́ний обурева́емаго и погиба́ющаго спаси́ мя, Яже Спа́са и Зижди́теля ро́ждши, и ве́чнаго изба́ви осужде́ния.

Творца́ и Бо́га и Го́спода, от Твои́х вопло́щшагося пречи́стых крове́й, о нас, Чи́стая, моли́, уще́дрити милосе́рдием Твои́м лю́ди отча́янныя.

Слава: Огня́ негаси́маго изба́ви мя и тьмы вне́шния, и пла́ча ве́чнаго, осужде́нию су́ща досто́йна, о Пресвята́я, Чи́стая Богоро́дице, хода́тайством Твои́м те́плым к Бо́гу.

И ныне: Под Твое́ю, Богоро́дице, благода́тию сохраня́емь, не снеде́н пребыва́ю прило́ги сопроти́вных враг: те́мже я́ко утвержде́ние Боже́ственно и степе́нь, воспева́ю и покланя́юся, и велича́ю Тя.

Молитва ко Пресвятой Богородице

Ца­ри́це моя́ пребла­га́я, Наде́ждо моя́ Бо­го­ро́­ди­це, Прия́телище си́рых, и стра́нных Предста́тельнице, скорбя́щих Ра́досте, оби́димых Покрови́тельнице! Зри́ши мою́ беду́, зри́ши мою́ скорбь, помози́ ми я́ко не́мощну, окорми́ мя я́ко стра́нна. Оби́ду мою́ ве́си, разреши́ ту, я́ко во́лиши: я́ко не и́мам ины́я по́мощи ра́зве Тебе́, ни ины́я Предста́тельницы, ни бла­ги́я Уте́шительницы, то́кмо Тебе́, о Бо­гома́­ти; я́ко да сохрани́ши мя и покры́еши во ве́ки веко́в. Ами́нь.

Молитва Богородице в Пятницу:

Тебе предаю в защищение живот мой и по Бозе всю надежду спасения моего на Тя возлагаю, Владычице Дево Богородице. Молю Тя, раб Твой, не презри мя многия грехи имущаго, но виждь скорбь мою о сем и недоумение и подаждь ми ослабу и утешение, да не до конца погибну. Простри десницу Твою, Чистая, изми мя от тимения дел моих и ростави на чистую пажить заповедей Христа, Царя и Бога моего, да творю я присно, Тобою укрепляем. От грехов моих лютых избави мя, Владычице, и покаяние спасительно мне ниспосли, к Твоему Сыну и Богу Матерним ходатайством Твоим. Свет неизреченный возсиявшая, просвети мою тьму душевную, от грехов ей прибывшую. Радосте моя, избави мя от обышедших мя невидимых врагов: грехи бо мои мнози и тяжки суть, врази мои люты зело, смерть близ, совесть моя мя обличает, геенна огненная устрашает,червь неусыпаемый, скрежет зубный, тартара тьма кромешняя в трепет мя приводят, ибо ожидают мя прияти, злых дел моих ради. Увы мне! Что сотворю тогда и к кому прибегну, да спасена будет душа моя! К тебе единей, сладкая Марие Богородице, услаждающая на Тя уповающим горесть смерти и избавляющая взывающих к Тебе от лютыя геенны. Ты и мне помози, Всеблагая, не имущему тогда иныя помощи, токмо Тебе, Всепетая. Спаси мя от ужасов смертнаго часа и лютости тогда бесовския, спаси мя от власти духов злобных на мытарствах воздушных по смерти; яви, молюся Ти, яви ми тогда пресветлое лице Твое, Владычице, и не остави мя безпомощнаго. О милосердная Мати! Преклонися на милость ко мне, лишенному милости от дел моих, и умоли, Его же родила еси плотию, Христа, Спасителя и Бога нашего, нас ради на кресте пречистую Кровь Свою излиявшаго, да и аз причастник буду заслуг Его крестных пред Отцем Его Богом, и их ради получу грехов прощение и вечное спасение, и прославлю неизреченное милосердие Твое, Богородице, и Твое милостивое предстательство в безконечныя веки. Аминь.