Богородичник - каноны Божией Матери на каждый день.

Глас 2. Суббота.

Богородичен, глас 2.

Вся па́че смы́сла, / вся пресла́вная Твоя́, Богоро́дице, та́инства, / чистоте́ запеча́танной и де́вству храни́му, / Ма́ти позна́лася еси́ нело́жна, / Бо́га ро́ждши И́стиннаго. / Того́ моли́ спасти́ся душа́м на́шим.

Слава и ныне, глас тойже:

Ма́ти Свята́я неизрече́ннаго Све́та, / а́нгельскими Тя пе́сньми почита́юще, / благоче́стно велича́ем.

Канон Пресвятей Богородице

Егоже и от оклеветания, в печалех и напастех сущии да поют

Песнь 1

Ирмос: Во глубине́ постла́ иногда́, фараони́тское всево́инство преоруже́нная си́ла, вопло́щшееся же Сло́во всезло́бный грех потреби́ло есть: препросла́вленный Госпо́дь, сла́вно бо просла́вися.

Припев: Пресвята́я Богоро́дице, спаси́ нас.

Яже всем удо́бь послу́шная в ско́рби и в печа́ли помога́ющая, Богоро́дице Блага́я, благода́ть пода́ждь пе́ти Тя дерза́ющим, Влады́чице, скорбя́щих ра́досте.

Многобога́тную благода́ть стяжа́вши, Влады́чице, дерзнове́нною Твое́ю моли́твою, пресла́вно изми́ мя от напа́стей, убо́гаго раба́ Твоего́, скорбя́щих ра́досте.

Слава: От враг ви́димых и неви́димых изба́ви, мо́лимся, к Тебе́ прибега́ющих Богоро́дице, и разори́ всяк сове́т борю́щих нас.

И ныне: Отыми́ поноше́ние челове́ческое и клеветы́ наве́тник от мене́, Богоро́дице, молю́ Тя: да усе́рдно сла́влю Го́спода, Его́же пита́ла еси́.

Песнь 3

Ирмос: Утверди́ нас в Тебе́, Го́споди, дре́вом умерщве́й грех, и страх Твой всади́ в сердца́ нас пою́щих Тя.

Враго́в наве́ты разори́ су́етныя, Всепе́тая Богоро́дице: не оскуде́й моли́твами Твои́ми, снабдя́щи нас, восхваля́ющих Тя.

При́зри, Чи́стая, ми́лостивным Твои́м о́ком, и изба́ви мя вся́каго наве́та ви́димых и неви́димых враго́в, ослепи́вши зени́цы оче́с их.

Слава: Зло́е нападе́ние враго́в, я́ко огнь паля́щее, и́щущих всегда́ погуби́ти нас, Де́во, росо́ю моли́тв Твои́х угаси́.

И ныне: Неугаси́мая лампа́до, заря́ присносия́тельная, но́щию мя скорбе́й одержи́ма, просвети́ моли́твами Твои́ми, ро́ждшая Со́лнце сла́вы, Христа́.

Песнь 4

Ирмос: Услы́шах, Го́споди, глас Твой, его́же ре́кл еси́, глас вопию́щаго в пусты́ни, я́ко возгреме́л еси́ над вода́ми мно́гими, Твоему́ свиде́тельствуяй Сы́ну, весь быв соше́дшаго Ду́ха, возопи́: Ты еси́ Христо́с, Бо́жия му́дрость и си́ла.

Спасе́ния Тя мост, моли́тву неусы́пну, заступле́ние тве́рдо мо́лим: умилосе́рдися и виждь на́шу нестерпи́мую печа́ль, боле́зни, ско́рби, стра́сти, и благопреме́нно посети́, Ма́ти Бо́жия, ра́дость ско́рую подаю́щи.

Не неприча́стни есмы́, Влады́чице, Твоего́ заступле́ния в ско́рбех: те́мже и ны́не нам помози́ вско́ре, лю́те обурева́емым ру́ку простира́ющи, Чи́стая: бу́ди ми́лостива боле́знем на́шим, Ма́ти Бо́жия, ра́дость ско́рую подаю́щи.

Слава: Не упова́ша, Влады́чице, на Тя беззако́ннующии, но упова́ша на язы́к велере́чив, на язы́к челове́чь, при́сно зави́стно излия́вшийся, непра́ведно пролия́ти кровь и́скренняго, рыка́юще: Ты же, Чи́стая, че́люсти их сокруши́.

И ныне: Смири́, Влады́чице, враго́в вознесе́нную вы́ю велере́чующих, сове́ты и злонра́вия, и сердца́ поуча́ющаяся злым на мя по вся дни: кре́пость же и побе́ду пода́ждь призыва́ющим Тя, Ма́ти Бо́жия, ра́дость ско́рую подаю́щи.

Песнь 5

Ирмос: Угль Иса́ии проявле́йся, Со́лнце из де́вственныя утро́бы возсия́, во тьме заблу́ждшим, Богоразу́мия просвеще́ние да́руя.

Моли́твеннице нело́жная, упова́ние христиа́н, обра́дованная, приими́ мольбы́ от нас, приле́жно призыва́ющих и моля́щихся Тебе́.

Исто́чник Тя жи́зни су́щи, Чи́стая, безсме́ртия источа́ющий во́ды, земноро́днии позна́вше, ублажа́ем.

Слава: Вооружи́ся на ны лука́вно враг, язы́ком, я́коже мече́м, погуби́ти хотя́: но Твое́ю, Богороди́тельнице, кре́постию предвари́.

И ныне: Пучи́ну, Чи́стая, заступле́нию кто изочте́т си́лы Твоея́? Те́мже нас су́щих в нужде́ ско́ро предвари́.

Песнь 6

Ирмос: В бе́здне грехо́вней валя́яся, неизсле́дную милосе́рдия Твоего́ призыва́ю бе́здну: от тли, Бо́же, мя возведи́.

Целому́дрия су́щи хода́таица, призыва́ющим Тя ны́не яви́ся и от вся́ких изба́ви напа́стей и бед, Богоневе́сто.

Злоде́йства вра́жия разори́ и клеветы́ непра́ведныя уста́ви, благослове́нная Пречи́стая, избавля́ющи непови́нныя от ско́рби.

Слава: Лю́тыми грехи́ окруже́ни и напа́стными беда́ми потопля́еми, под боже́ственный покро́в Твой прибега́ем, Ма́ти Христа́ Бо́га.

И ныне: Неискусому́жно ро́ждши Го́спода, яви́ся по Рождестве́ па́ки де́вствующи: О пресла́внаго чудесе́, в Тебе́ соде́ланнаго, Богоневе́сто!

Таже: Го́споди поми́луй, трижды. Слава, и ны́не

Седален, глас 2:

Моле́ние те́плое и стена́ необори́мая, ми́лости исто́чниче, ми́рови прибе́жище, приле́жно вопие́м Ти: Богоро́дице Влады́чице, предвари́ и от бед изба́ви нас, Еди́на вско́ре предста́тельствующая.

Песнь 7

Ирмос: Да пресла́вное Рождество́ Твое́, Христе́, е́же от Де́вы, прообрази́ши я́ве, неопали́мы в пещи́ о́троки сохрани́л еси́, пе́сньми пою́щия Тебе́: отце́в Бо́же, благослове́н еси́.

От благоутро́бия Твоего́, Де́во Чи́стая! реши́ши бо безме́рныя печа́ли и напа́сти призыва́ющим в ну́жде и обстоя́нии: те́мже и ны́не помози́, Благослове́нная, Тя восхваля́ющим.

Покажи́ ско́рое Твое́ заступле́ние, покажи́, я́ко мо́жеши, я́ко Ма́ти Бо́гу, призыва́ем Тя от се́рдца, со слеза́ми припа́дающе, скорбь укроти́ и боле́знь рабо́в Твои́х вско́ре.

Слава: Уста́ челове́ком я́ко львом лю́тым, гро́ба тяжча́йше отверзо́шася, го́рько поглоти́ти мя: но Ты, Богоро́дице, яви́ся наде́жда ненаде́ющимся и низложи́ кре́пость их, Благослове́нная.

И ныне: Да у́зрят врази́ и постыдя́тся, да разуме́ют и ви́дят Твою́, е́же по нам сопроти́в борю́щую си́лу, и в про́пасть преиспо́днюю низложи́ их, Благослове́нная, наде́ждо ненаде́ющихся.

Песнь 8

Ирмос: Пещь иногда́ о́гненная в Вавило́не де́йства разделя́ше, Бо́жиим веле́нием халде́и опаля́ющая, ве́рныя же ороша́ющая, пою́щия: благослови́те, вся дела́ Госпо́дня, Го́спода.

Прибе́жище на́ше и ми́ру ра́дование, Богороди́тельнице, умилосе́рдитися потщи́ся, и спе́шно благода́ть Твою́ пода́ждь нам оскорбле́нным, и заступи́, Блага́я, Твоя́ рабы́.

Сове́т су́етен совеща́ша лю́те на ны безбо́жных со́нмища, я́коже пре́жде Ахитофе́л. Но вопи́ем: Твои́ми моли́твами сей разори́, низло́жши сих кре́пость, Богоро́дице.

Слава: Призыва́ющих Тя, Богоро́дице, от души́ нело́жно, во всяко́й ско́рби и в боле́знех разли́чных, и беда́х лю́тых, спе́шно услы́ши, Влады́чице, сих избавля́ющи при́сно моли́твами Твои́ми.

И ныне: Да и́мя Твое́, Богоро́дице, на земли́ славосло́вится, Иже из Тебе́ возсия́в, гре́шником держа́вную наде́жду и сте́ну Тя дарова́: Тобо́ю бо вся́кое дыха́ние к Бо́гу притека́ет.

Песнь 9

Ирмос: Недоуме́ет всяк язы́к благохвали́ти по достоя́нию, изумева́ет же ум и преми́рный пе́ти Тя, Богоро́дице: оба́че Блага́я су́щи, ве́ру приими́, я́ко любо́вь ве́си боже́ственную на́шу, Ты бо христиа́н еси́ предста́тельница, Тя велича́ем.

Да загради́тся всяк язы́к, лука́вым поуча́яйся: да молча́т устна́ льсти́вая и уста́ непра́ведно глаго́лющая на пра́веднаго беззако́ние, горды́нею и за́вистию вражде́бною вку́пе, Богоро́дицы моли́твою, и святы́х Христо́вых.

Иже в моли́твах бо́друю, Чи́стую Богоро́дицу призыва́ем вси боле́знию и ско́рбию одержи́ми, взыва́юще: Влады́чице Чи́стая, ско́ро изба́ви от одержа́щих боле́зней рабы́ Твоя́ при́сно, я́ко по Бо́зе засту́пницы ины́я не и́мамы.

Слава: Отча́явшихся ве́лие прибе́жище, обурева́емых ти́хое приста́нище Ты еси́, Богоро́дице. Те́мже и мы притека́ем, взыва́юще: да не постыди́мся, Ма́ти и́стиннаго Живота́, но да благодаря́ще усе́рдно Тя велича́ем.

И ныне: Приими́, Отрокови́це Пречи́стая, боже́ственную песнь, воздава́ющи благода́ть на Тя наде́ющимся, и мир испроси́ Це́рквам при́сно посла́ти, да христиа́нский всяк язы́к Тя велича́ет.

Молитва ко Пресвятой Богородице

Ца­ри́це моя́ пребла­га́я, Наде́ждо моя́ Бо­го­ро́­ди­це, Прия́телище си́рых, и стра́нных Предста́тельнице, скорбя́щих Ра́досте, оби́димых Покрови́тельнице! Зри́ши мою́ беду́, зри́ши мою́ скорбь, помози́ ми я́ко не́мощну, окорми́ мя я́ко стра́нна. Оби́ду мою́ ве́си, разреши́ ту, я́ко во́лиши: я́ко не и́мам ины́я по́мощи ра́зве Тебе́, ни ины́я Предста́тельницы, ни бла­ги́я Уте́шительницы, то́кмо Тебе́, о Бо­гома́­ти; я́ко да сохрани́ши мя и покры́еши во ве́ки веко́в. Ами́нь.

Молитва Богородице в Субботу:

Радуйся, Дево Богородице, пристанище и предстательство убогия души моея, надежда сладкая спасения моего! Радуйся, радость от Ангела приемшая в благовещении имеющаго воплотитися от Тебе Бога Слова! Радуйся, всех Зиждителя в Твоих ложеснах носившая! Радуйся, Бога плотию рождшая, миру Спасителя! Радуйся, в рождестве девство нетленно сохранившая! Радуйся, от волхвов дары приемшая и поклонение их от Тебе Рождшемуся видевшая, и пастырей преславная о Нем словеса слышавшая и в сердце Твоем слагавшая! Радуйся, Отрока Иисуса, Сына Твоего и Бога, во храме, среди законоучителей, обретшая радостно! Радуйся, болезни лютыя во страдании крестном, распятии и смерти Сына Твоего, пресладкаго Иисуса, испытавшая, воскресением же Его тридневным обрадованная светло! Радуйся, вознесение Сына Твоего и Бога со ученики Его во славе небесней видевшая! Радуйся, от него ниспосланнаго Духа Святаго, в горнице Сионстей в виде огненных языков нисшедшаго, со ученики Господни приемшая! Радуйся, на земле Особый Молитвенный Покров Пресвятой Богородицы ангельски пожившая! Радуйся, чистотою и святынею вся ангельския чины и всех святых лики превосходящая! Радуйся, возвеличенная славою, пришествием к Тебе Сына Твоего и Бога! Радуйся, Того святым рукам душу Твою радостно предавшая! Радуйся, славно превознесенная Твоим на небеса с телом восшествием! Радуйся, по преставлении Твоем боговидцем апостолом в третий день явившаяся! Радуйся, на небесех от Отца и Сына и Духа Святаго диадемою вечнаго царствия увенчанная! Радуйся, от всех небесных сил приснопеваемая! Радуйся, близ престола Пресвятыя Троицы, на престоле славы возседящая! Радуйся, Бога с человеки примирения виновнице! Радуйся, небесными и земными господствующая Царице! Радуйся, яко ничтоже невозможно есть Твоему ходатайству! Радуйся, яко вси верно, к Тебе притекающий спасаются! Радуйся, яко Тобою скорбящий утешение, болящий исцеление, бедствующий благовременную помощь получают! Молю убо Тя, обрадованная Владычице, потреби и во мне печаль греховную и даждь ми радость спасения, даждь ми слезы утешительныя, умиление всегдашнее, покаяние истинное и исправление совершенное. Не возгнушайся мене, Владычице, но прийми милостиво сии гласы радостныя, мною, убогим, Тебе приносимыя, и предстани ми в помощь во время безпомощия моего, в час страшный оный, егда разлучитися имать душа моя от окаяннаго моего тела; тогда, молю, предстани ми в помощь и избави мя, повиннаго во гресех, наказания за них вечнаго, да не явлюся радование бесом и пища геенне огненней. Ей, Владычице моя, не попусти узрети души моей страшнаго и грознаго прещения и истязания демонскаго, грешником уготованнаго, но предвари и спаси мя, раба Твоего, в час оный ужасный, да славлю Тя во веки, едина надежде моя и Ходатаице спасения моего. Аминь.