Преподобноисповеднице Российской xx века

Тропарь, глас 5:

Христа́ Го́спода Иису́са ве́рная учени́це, / Це́ркве Росси́йския избра́нная а́гнице, / преподо́бная ма́ти (имярек), / ле́гкое и́го и я́звы Госпо́дни любо́вию нося́щи, / ле́ствицею доброде́телей и испове́дания ве́ры / к Нему́ я́ко Небе́сному Жениху́ востекла́ еси́, // Его́же моли́ сохрани́ти в благоче́стии лю́ди Росси́йския и спасти́ ду́ши на́ша.

Кондак, глас 4:

Я́ко крин благоуха́нный, / посреде́ пусты́ни безбо́жия / в земне́м оте́честве твое́м процвела́ еси́, / преподо́бная ма́ти (имярек), / и по́двиги воздержа́ния испове́данием ве́ры украси́вши, / востекла́ еси́ к Небе́сному Жениху́ Христу́, // и́же увенча́ тя красото́ю сла́вы нетле́нныя.

Величание

Велича́ем тя, / преподобноиспове́днице (имярек), / и чтим святу́ю па́мять твою́: / ты бо мо́лиши за нас // Христа́ Бо́га на́шего.

Молитва

О всехва́льная преподобноиспове́днице (имярек), кро́ткая Христо́ва а́гнице, земли́ Росси́йския цве́те благоуха́нный, избра́нная, непоро́чная и до́брая в жена́х! Ты благо́е и́го за́поведей Госпо́дних терпели́во подъе́мше и я́звы Его́ преподо́бием нося́щи, любо́вию после́довала еси́ Христу́: во дни же гоне́ний на Це́рковь Ру́сскую му́жественне во испове́дании правосла́вныя ве́ры пребыла́ еси́, и житие́ мона́шеское по́двигом страда́ния увенча́вши, в черто́г Небе́снаго Жениха́ возшла́ еси́. Те́мже мо́лим тя, сла́вная в жена́х испове́днице: моли́ це́ркви на́шей в ми́ре и благоде́нствии пребыва́ти, стране́ же Росси́йстей непоколеби́мей в правосла́вии и ми́ре сохрани́тися и всех враго́в сокруши́ти: ве́рным, по́двиг и́ночества восприи́мшим, во благоче́стии и послуша́нии укрепи́тися, в ре́вности по Бо́зе не оскудева́ти и неро́потным, бо́дренным и благода́рным всегда́ бы́ти: нам же любо́вию тя почита́ющим, испроси́ вре́мя на покая́ние, тве́рдость во испове́дании ве́ры и́стинныя, заступле́ние от ко́зней вра́жиих и на стра́шнем суде́ предстоя́ние одесну́ю Го́спода на́шего Иису́са Христа́, Ему́же со Отце́м и Святы́м Ду́хом подоба́ет вся́кая сла́ва, честь и поклоне́ние, ны́не и при́сно, и во ве́ки веко́в. Ами́нь.