Песнопения во вторник Четвертой (Крестопоклонной) седмицы Великого поста

Молитвы предначинательные

Моли́твами святы́х оте́ц на́ших, Го́споди Иису́се Христе́, Бо́же наш, поми́луй нас, ами́нь.

Сла́ва Тебе́, Бо́же наш, сла́ва Тебе́.

Царю́ Небе́сный, Уте́шителю, Ду́ше и́стины, И́же везде́ сый и вся исполня́яй, Сокро́вище благи́х и жи́зни Пода́телю, прииди́ и всели́ся в ны, и очи́сти ны от вся́кия скве́рны, и спаси́, Бла́же, ду́ши на́ша.

Святы́й Бо́же, Святы́й Кре́пкий, Святы́й Безсме́ртный, поми́луй нас. Трижды.

Сла́ва Отцу́ и Сы́ну и Свято́му Ду́ху, и ны́не и при́сно и во ве́ки веко́в. Ами́нь.

Пресвята́я Тро́ице, поми́луй нас; Го́споди, очи́сти грехи́ на́ша; Влады́ко, прости́ беззако́ния на́ша; Святы́й, посети́ и исцели́ не́мощи на́ша, и́мене Твоего́ ра́ди.

Го́споди, поми́луй, трижды.

Сла́ва Отцу́ и Сы́ну и Свято́му Ду́ху, и ны́не и при́сно и во ве́ки веко́в. Ами́нь.

О́тче наш, И́же еси́ на Небесе́х, да святи́тся и́мя Твое́, да прии́дет Ца́рствие Твое́, да бу́дет во́ля Твоя́, я́ко на Небеси́ и на земли́. Хлеб наш насу́щный да́ждь нам днесь; и оста́ви нам до́лги на́ша, я́коже и мы оставля́ем должнико́м на́шим; и не введи́ нас во искуше́ние, но изба́ви нас от лука́ваго.

Го́споди, поми́луй, 12,

Прииди́те, поклони́мся Царе́ви на́шему Бо́гу.

Прииди́те, поклони́мся и припаде́м Христу́, Царе́ви на́шему Бо́гу.

Прииди́те, поклони́мся и припаде́м Самому́ Христу́, Царе́ви и Бо́гу на́шему.

Псалом 50:

Поми́луй мя, Бо́же, по вели́цей ми́лости Твое́й, и по мно́жеству щедро́т Твои́х очи́сти беззако́ние мое́. Наипа́че омы́й мя от беззако́ния моего́, и от греха́ моего́ очи́сти мя; я́ко беззако́ние мое́ аз зна́ю, и грех мой предо мно́ю есть вы́ну. Тебе́ Еди́ному согреши́х и лука́вое пред Тобо́ю сотвори́х, я́ко да оправди́шися во словесе́х Твои́х, и победи́ши внегда́ суди́ти Ти. Се бо, в беззако́ниях зача́т есмь, и во гресе́х роди́ мя ма́ти моя́. Се бо, и́стину возлюби́л еси́; безве́стная и та́йная прему́дрости Твоея́ яви́л ми еси́. Окропи́ши мя иссо́пом, и очи́щуся; омы́еши мя, и па́че сне́га убелю́ся. Слу́ху моему́ да́си ра́дость и весе́лие; возра́дуются ко́сти смире́нныя. Отврати́ лице́ Твое́ от грех мои́х и вся беззако́ния моя́ очи́сти. Се́рдце чи́сто сози́жди во мне, Бо́же, и дух прав обнови́ во утро́бе мое́й. Не отве́ржи мене́ от лица́ Твоего́ и Ду́ха Твоего́ Свята́го не отыми́ от мене́. Возда́ждь ми ра́дость спасе́ния Твоего́ и Ду́хом Влады́чним утверди́ мя. Научу́ беззако́ныя путе́м Твои́м, и нечести́вии к Тебе́ обратя́тся. Изба́ви мя от крове́й, Бо́же, Бо́же спасе́ния моего́; возра́дуется язы́к мой пра́вде Твое́й. Го́споди, устне́ мои́ отве́рзеши, и уста́ моя́ возвестя́т хвалу́ Твою́. Я́ко а́ще бы восхоте́л еси́ же́ртвы, дал бых у́бо: всесожже́ния не благоволи́ши. Же́ртва Бо́гу дух сокруше́н; се́рдце сокруше́нно и смире́нно Бог не уничижи́т. Ублажи́, Го́споди, благоволе́нием Твои́м Сио́на, и да сози́ждутся сте́ны Иерусали́мския. Тогда́ благоволи́ши же́ртву пра́вды, возноше́ние и всесожега́емая; тогда́ возложа́т на oлта́рь Твой тельцы́.

Во вторник на Утрени

Седален Триоди, глас 8:

Воздержа́нием просвети́вше ду́шы на́шя, Кресту́ поклони́мся спаси́тельному, на не́мже Христо́с пригвозди́ся, и возопии́м ему́: ра́дуйся, постя́щихся сла́досте, и изве́стная по́моще. Ра́дуйся губи́телю страсте́й, бесо́м сопротивобо́рче. Ра́дуйся Дре́во блаже́нное.

Сла́ва Отцу́ и Сы́ну и Свято́му Ду́ху.

Воздержа́нием просвети́вше ду́шы на́шя, Кресту́ поклони́мся спаси́тельному, на не́мже Христо́с пригвозди́ся, и возопии́м ему́: ра́дуйся, постя́щихся сла́досте, и изве́стная по́моще. Ра́дуйся губи́телю страсте́й, бесо́м сопротивобо́рче. Ра́дуйся Дре́во блаже́нное.

И ны́не и при́сно и во ве́ки веко́в. Ами́нь.

Непоколеби́мое утвержде́ние ве́ры, и честно́е дарова́ние ду́ш на́ших, Богоро́дицу в пе́снех велича́ем ве́рнии: ра́дуйся, ка́мень жи́зни во чре́ве Твое́м вмести́вшая. Ра́дуйся конце́в упова́ние, оскорбля́емых засту́пница. Ра́дуйся, Неве́сто Неневе́стная.

Седален Триоди, глас 8:

Я́коже жи́знь тва́ри, Тво́й Кре́ст предлежа́щий вселе́нная целу́ет, Го́споди, и покланя́ющися зове́т Ти́: того́ де́йством в ми́ре глубо́це пою́щыя, и воспева́ющыя Тя́ воздержа́нием соблюди́, Многоми́лостиве.

Сла́ва Отцу́ и Сы́ну и Свято́му Ду́ху.

Я́коже жи́знь тва́ри, Тво́й Кре́ст предлежа́щий вселе́нная целу́ет, Го́споди, и покланя́ющися зове́т Ти́: того́ де́йством в ми́ре глубо́це пою́щыя, и воспева́ющыя Тя́ воздержа́нием соблюди́, Многоми́лостиве.

И ны́не и при́сно и во ве́ки веко́в. Ами́нь.

Ра́дуйся, а́нгелом ра́дость ми́ра прии́мшая. Ра́дуйся, ро́ждшая Творца́ Твоего́ и Го́спода. Ра́дуйся, сподо́бльшая бы́ти Ма́ти Бо́жия.

На стиховне стихиры, глас 8:

Велехва́льнаго фарисе́а, от возноше́ния помышля́ющи душе́ моя́ осужде́ние, и смиренному́драго мытаря́ испове́данием прегреше́ний позна́вши оправда́ние, о́ваго у́бо отложи́ти потщи́ся о доброде́тели дерзнове́ние: о́ваго же прия́ти, я́же согреши́ла еси́, испове́дание. воздви́гнися несмири́тельную себе́ припложа́ющи, меростра́стием высоту́, от Христа́ иму́щаго ве́лию ми́лость.

Стих: Испо́лнихомся зау́тра ми́лости Твоея, Го́споди, и возра́довахомся, и возвесели́хомся, во вся дни на́ша возвесели́хомся, за дни в ня́же смири́л ны еси́, ле́та в ня́же ви́дехом зла́я. И при́зри на рабы́ Тво́я, и на дела́ Твоя́, и наста́ви сы́ны их.

Велехва́льнаго фарисе́а, от возноше́ния помышля́ющи душе́ моя́ осужде́ние, и смиренному́драго мытаря́ испове́данием прегреше́ний позна́вши оправда́ние, о́ваго у́бо отложи́ти потщи́ся о доброде́тели дерзнове́ние: о́ваго же прия́ти, я́же согреши́ла еси́, испове́дание. воздви́гнися несмири́тельную себе́ припложа́ющи, меростра́стием высоту́, от Христа́ иму́щаго ве́лию ми́лость.

Стих: И бу́ди све́тлость Го́спода Бо́га на́шего на нас, и дела́ рук на́ших испра́ви на нас, и де́ло рук на́ших испра́ви.

Мученичен: Вельми́ подвиза́стеся святи́и, му́ки от беззако́нных претерпе́вше до́блественно, Христа́ испове́дающе пред царьми́: и па́ки преста́вившеся от жития́, си́лы де́йствуете в ми́ре, и неду́жныя от страсте́й и́х исцеля́ете святи́и, моли́те спасти́ся душа́м на́шым.

Сла́ва Отцу́ и Сы́ну и Свято́му Ду́ху, и ны́не и при́сно и во ве́ки веко́в. Ами́нь.

Богородичен: Кро́в Тво́й Богоро́дице Де́во, врачевство́ е́сть духо́вное: во́нь бо прибега́юще, душе́вных боле́зней избавля́емся.

Тропарь:

В хра́ме стоя́ще сла́вы Твоея́, на небеси́ стоя́ти мним, Богоро́дице, Дверь Небе́сная, отве́рзи нам две́ри милости Твоея́.

Во вторник на Вечерне

Стихиры Триоди, глас 6:

Посреде́ земли́ претерпе́л еси́ Кре́ст и стра́сть Ще́дре, все́м безстра́стие и избавле́ние подая́, преполове́нием дне́сь посто́в: сего́ ра́ди вси́ в поклоне́ние того́ предлага́ем, и ра́достно облобыза́ем, ви́дети Твоя́ стра́сти, и живоно́сное Воскресе́ние, просвеще́ни боже́ственными доброде́тельми, Сло́ве Бо́жий, да сподо́бимся вси́, еди́не Многоми́лостиве.

Стих: И́мене ради Твоего́ потерпе́х Тя, Го́споди, потерпе́ душа́ моя́ в сло́во Твое́, упова́ душа́ моя́ на Го́спода.

Ме́ртв бы́л еси́ на Кресте́ просте́рт, и копие́м прободе́н, и же́лчию долготерпели́ве напая́емь, Ме́ррския во́ды Влады́ко, руко́ю Моисе́овою в сла́дость преложи́вый. Те́мже молю́ся Тебе́ и прошу́: стра́сти горча́йшыя от мы́сли моея́ отжени́, и покая́ния ме́дом у́м мо́й услади́в, покло́нника мя́ покажи́ честны́я стра́сти Твоея́.

Стих: От стра́жи у́тренния до но́щи, от стра́жи у́тренния, да упова́ет Изра́иль на Го́спода.

Глас 1: Его́же дре́вле Моисе́й прообра́ж дла́ньма свои́ма, побежда́ше Амали́ка, вели́кий Кре́ст дне́сь, пред очи́ма на́шима зря́ще лю́дие предлежи́мый стра́шно, прико́снемся чистото́ю, умо́м же и устна́ма: на не́м бо Христо́с вознесе́ся умертви́вый сме́рть. И таковы́я благода́ти вси́ сподо́бившеся, пе́сньми Богодухнове́нными все́х Спа́са песносло́вяще, мо́лимся дости́гнути и са́мое спаси́тельное Воскресе́ние.

Стих: Я́ко у Го́спода ми́лость, и мно́гое у Него́ избавле́ние, и Той изба́вит Изра́иля от всех беззако́ний его́.

Глас 4: Прииди́те поклони́мся жи́зни на́шея хода́таю, явле́нному дре́ву дне́сь, Христа́ Бо́га на́шего Кресту́, и́мже сме́рть уязви́ся, и Воскресе́ние на́м па́дшым обнови́ся я́ве, изба́вившему зову́ще: на́с ра́ди во́лею пострада́вый, да спасе́ши вся́ческая, Бо́же на́ш, сла́ва Тебе́.

Стих: Хвали́те Го́спода вси язы́цы, похвали́те Его вси лю́дие.

Держа́ва необори́мая христиа́ном на́м даде́ся Кре́ст Тво́й Спа́се на́ш, и́мже иноплеме́нных язы́ков побежда́ются мно́жества, и ми́р Це́ркви Твое́й Христе́ осеня́ет, правосла́вящей до́бре. Его́же ны́не целу́юще, Тебе́ те́пле взыва́ем: ча́сти сподо́би и на́с святы́х Твои́х.

Стих: Я́ко утверди́ся ми́лость Его на нас, и и́стина Госпо́дня пребыва́ет во век.

Слеза́ми очи́стивше душе́вная чу́вства, и посто́м очи́стившеся, прииди́те поклони́мся Кре́стному дре́ву, и́мже упраждня́ются душетле́нныя пло́ти воздержа́нием взыгра́ния, распе́ншемуся зову́ще: Твоего́ Спа́се, сподо́би тридне́внаго воста́ния поклони́тися сия́нию.

Глас 8 Сла́ва Отцу́ и Сы́ну и Свято́му Ду́ху, и ны́не и при́сно и во ве́ки веко́в. Ами́нь.

Дне́сь Влады́ка тва́ри, и Госпо́дь сла́вы, на Кресте́ пригвожда́ется, и в ре́бра пробода́ется, же́лчи и о́цта вкуша́ет, сла́дость церко́вная. венце́м от те́рния облага́ется, покрыва́яй не́бо о́блаки: оде́ждею облачи́тся поруга́ния, и зауша́ется бре́нною руко́ю, руко́ю созда́вый челове́ка: по плеще́ма бие́н быва́ет, одева́яй не́бо о́блаки. Заплева́ния и ра́ны прие́млет, поноше́ния и зауше́ния. И вся́ терпи́т мене́ ра́ди осужде́ннаго, Изба́витель мо́й и Бо́г, да спасе́т ми́р от пре́лести я́ко благоутро́бен.

Стихиры, глас 3:

Побежда́я мытаря́ прегреше́ньми, не ревну́ю покая́нию: фарисе́ова же не стяжа́в исправле́ния, подража́ю возноше́ние. Но Твоего́ смире́ния превосхожде́нием Христе́ Бо́же, бесо́вское высокому́дрие на Кресте́ низложи́вый пе́рваго у́бо лука́вства, после́дняго же безу́мия отчужди́ мя, обои́х благо́е предложе́ние в души́ мое́й утверди́в, и спаси́ мя.

Стих: К Тебе́ возведо́х о́чи мои, Живу́щему на небеси́. Се я́ко о́чи раб в руку́ госпо́дий своих, я́ко о́чи рабы́ни в руку́ госпожи́ своея́: та́ко о́чи на́ши ко Го́споду Бо́гу на́шему, до́ндеже уще́дрит ны.

Побежда́я мытаря́ прегреше́ньми, не ревну́ю покая́нию: фарисе́ова же не стяжа́в исправле́ния, подража́ю возноше́ние. Но Твоего́ смире́ния превосхожде́нием Христе́ Бо́же, бесо́вское высокому́дрие на Кресте́ низложи́вый пе́рваго у́бо лука́вства, после́дняго же безу́мия отчужди́ мя, обои́х благо́е предложе́ние в души́ мое́й утверди́в, и спаси́ мя.

Стих: Поми́луй нас, Го́споди, поми́луй нас, я́ко по мно́гу испо́лнихомся уничиже́ния: наипа́че напо́лнися душа́ на́ша поноше́ния гобзу́ющих и уничиже́ния го́рдых.

Мученичен: Проро́цы и апо́столи Христо́вы, и му́ченицы, научи́ша пе́ти Тро́ицу Единосу́щную, и просвети́ша язы́ки заблу́ждшыя, и о́бщники а́нгелов сотвори́ша сы́ны челове́ческия.

Глас 5: Сла́ва Отцу́ и Сы́ну и Свято́му Ду́ху, и ны́не и при́сно и во ве́ки веко́в. Ами́нь.

Богородичен: Зря́щи Тя́ тва́рь вся́ на Кресте́ на́га ви́сяща, Соде́теля и Зижди́теля все́х, изменя́шеся стра́хом и рыда́ше: со́лнце же све́т омрачи́, и земля́ колеба́шеся, ка́мение же разседа́шеся, и хра́ма све́тлость раздира́шеся, ме́ртвии воста́ша от гробо́в, и а́нгельския си́лы ужасо́шася глаго́люще: о чудесе́! судия́ су́дится, и стра́ждет хотя́ за спасе́ние ми́ра, и обновле́ние.

Тропари во глас 4:

Богоро́дице Де́во, ра́дуйся, Благода́тная Мари́е, Госпо́дь с Тобо́ю: благослове́на Ты в жена́х, и благослове́н Плод чре́ва Твоего́, я́ко Спа́са родила́ еси́ душ на́ших. (Поклон великий.)

Сла́ва Отцу́ и Сы́ну и Свято́му Ду́ху.

Крести́телю Христо́в, всех нас помяни́, да изба́вимся от беззако́ний на́ших: тебе́ бо даде́ся благода́ть моли́тися за ны. (Поклон великий.)

И ны́не и при́сно и во ве́ки веко́в. Ами́нь.

Моли́те за ны, святи́и апо́столи, святи́и вси, да изба́вимся от бед и скорбе́й, вас бо те́плыя предста́тели ко Спа́су стяжа́хом. (Поклон великий.)

Под Твое́ благоутро́бие прибега́ем, Богоро́дице, моле́ния на́ша не пре́зри во обстоя́нии: но от бед изба́ви ны, еди́на Чи́стая, еди́на Благослове́нная. (Без поклона.)

Тропарь на поклонение Кресту, глас 6:

Кресту́ Твоему́ покланя́емся, Влады́ко, / и свято́е Воскресе́ние Твое́ сла́вим. [Трижды.]

Окончание

Молитва Ефрема Сирина

Господи, помилуй. (12 раз.)

Го́споди и Влады́ко живота́ моего́, дух пра́здности, уны́ния, любонача́лия, и праздносло́вия не даждь ми. (Поклон земной.)

Дух же целому́дрия, смиренному́дрия, терпе́ния, и любве́, да́руй ми рабу́ Твоему́. (Поклон земной.)

Ей, Го́споди Царю́, да́руй ми зре́ти моя́ прегреше́ния, и не осужда́ти бра́та моего́, я́ко благослове́н еси́ во ве́ки веко́в, ами́нь. (Поклон земной.)

Таже малых 12, глаголюще на кийждо поклон: Бо́же, очи́сти мя гре́шнаго.

И паки молитву всю:

Го́споди и Влады́ко живота́ моего́, дух пра́здности, уны́ния, любонача́лия, и праздносло́вия не даждь ми. Дух же целому́дрия, смиренному́дрия, терпе́ния, и любве́, да́руй ми рабу́ Твоему́. Ей, Го́споди Царю́, да́руй ми зре́ти моя́ прегреше́ния, и не осужда́ти бра́та моего́, я́ко благослове́н еси́ во ве́ки веко́в, ами́нь. (И поклон един великий.)

Досто́йно есть я́ко вои́стинну блажи́ти Тя, Богоро́дицу, Присноблаже́нную и Пренепоро́чную и Ма́терь Бо́га на́шего. Честне́йшую Херуви́м и сла́внейшую без сравне́ния Серафи́м, без истле́ния Бо́га Сло́ва ро́ждшую, су́щую Богоро́дицу Тя велича́ем.

Сла́ва, и ны́не:

Го́споди, поми́луй, трижды.

И отпуст.

Го́споди, Иису́се Христе́, Сы́не Бо́жий, моли́тв ра́ди Пречи́стыя Твоея́ Ма́тере, силою Честнаго и Животворящего Креста, преподо́бных и богоно́сных оте́ц на́ших и всех святы́х, спаси́ и помилуй мя, гре́шнаго.