Шрифт

13 октября.

Канон святому священномученику Григорию, просветителю Великия Армении.

Святому священномученику Григорию, просветителю Великия Армении
Молитвы предначинательные

Моли́твами святы́х оте́ц на́ших, Го́споди Иису́се Христе́, Бо́же наш, поми́луй нас, ами́нь.

Сла́ва Тебе́, Бо́же наш, сла́ва Тебе́.

Царю́ Небе́сный, Уте́шителю, Ду́ше и́стины, И́же везде́ сый и вся исполня́яй, Сокро́вище благи́х и жи́зни Пода́телю, прииди́ и всели́ся в ны, и очи́сти ны от вся́кия скве́рны, и спаси́, Бла́же, ду́ши на́ша.

Святы́й Бо́же, Святы́й Кре́пкий, Святы́й Безсме́ртный, поми́луй нас. Трижды.

Сла́ва Отцу́ и Сы́ну и Свято́му Ду́ху, и ны́не и при́сно и во ве́ки веко́в. Ами́нь.

Пресвята́я Тро́ице, поми́луй нас; Го́споди, очи́сти грехи́ на́ша; Влады́ко, прости́ беззако́ния на́ша; Святы́й, посети́ и исцели́ не́мощи на́ша, и́мене Твоего́ ра́ди.

Го́споди, поми́луй, трижды.

Сла́ва Отцу́ и Сы́ну и Свято́му Ду́ху, и ны́не и при́сно и во ве́ки веко́в. Ами́нь.

О́тче наш, И́же еси́ на Небесе́х, да святи́тся и́мя Твое́, да прии́дет Ца́рствие Твое́, да бу́дет во́ля Твоя́, я́ко на Небеси́ и на земли́. Хлеб наш насу́щный да́ждь нам днесь; и оста́ви нам до́лги на́ша, я́коже и мы оставля́ем должнико́м на́шим; и не введи́ нас во искуше́ние, но изба́ви нас от лука́ваго.

Го́споди, поми́луй, 12,

Прииди́те, поклони́мся Царе́ви на́шему Бо́гу.

Прииди́те, поклони́мся и припаде́м Христу́, Царе́ви на́шему Бо́гу.

Прииди́те, поклони́мся и припаде́м Самому́ Христу́, Царе́ви и Бо́гу на́шему.

Псалом 50:

Поми́луй мя, Бо́же, по вели́цей ми́лости Твое́й, и по мно́жеству щедро́т Твои́х очи́сти беззако́ние мое́. Наипа́че омы́й мя от беззако́ния моего́, и от греха́ моего́ очи́сти мя; я́ко беззако́ние мое́ аз зна́ю, и грех мой предо мно́ю есть вы́ну. Тебе́ Еди́ному согреши́х и лука́вое пред Тобо́ю сотвори́х, я́ко да оправди́шися во словесе́х Твои́х, и победи́ши внегда́ суди́ти Ти. Се бо, в беззако́ниях зача́т есмь, и во гресе́х роди́ мя ма́ти моя́. Се бо, и́стину возлюби́л еси́; безве́стная и та́йная прему́дрости Твоея́ яви́л ми еси́. Окропи́ши мя иссо́пом, и очи́щуся; омы́еши мя, и па́че сне́га убелю́ся. Слу́ху моему́ да́си ра́дость и весе́лие; возра́дуются ко́сти смире́нныя. Отврати́ лице́ Твое́ от грех мои́х и вся беззако́ния моя́ очи́сти. Се́рдце чи́сто сози́жди во мне, Бо́же, и дух прав обнови́ во утро́бе мое́й. Не отве́ржи мене́ от лица́ Твоего́ и Ду́ха Твоего́ Свята́го не отыми́ от мене́. Возда́ждь ми ра́дость спасе́ния Твоего́ и Ду́хом Влады́чним утверди́ мя. Научу́ беззако́ныя путе́м Твои́м, и нечести́вии к Тебе́ обратя́тся. Изба́ви мя от крове́й, Бо́же, Бо́же спасе́ния моего́; возра́дуется язы́к мой пра́вде Твое́й. Го́споди, устне́ мои́ отве́рзеши, и уста́ моя́ возвестя́т хвалу́ Твою́. Я́ко а́ще бы восхоте́л еси́ же́ртвы, дал бых у́бо: всесожже́ния не благоволи́ши. Же́ртва Бо́гу дух сокруше́н; се́рдце сокруше́нно и смире́нно Бог не уничижи́т. Ублажи́, Го́споди, благоволе́нием Твои́м Сио́на, и да сози́ждутся сте́ны Иерусали́мския. Тогда́ благоволи́ши же́ртву пра́вды, возноше́ние и всесожега́емая; тогда́ возложа́т на oлта́рь Твой тельцы́.

Тропа́рь, гла́с 4:

И нра́вом прича́стник, и престо́лом наме́стник апо́столом бы́в, дея́ние обре́л еси́, богодухнове́нне, в виде́ния восхо́д; сего́ ра́ди сло́во и́стины исправля́я, и ве́ры ра́ди пострада́л еси́ да́же до кро́ве, священному́чениче Григо́рие, моли́ Христа́ Бо́га спасти́ся душа́м на́шим.

Канон свята́го. Гла́с 4.

Пе́снь 1.

Ирмос: Триста́ты кре́пкия, Рожде́йся от Де́вы, безстра́стия во глубине́, души́ трича́стное потопи́, молю́ся, да Тебе́, я́ко в тимпа́не, во умерщвле́нии телесе́ побе́дное воспою́ пе́ние.

Припев: Священномучениче Григорие, моли́ Бо́га о нас.

Тро́ице честне́й предстоя́ венцено́сец, я́ко бо́др па́стырь, я́ко му́ченик свяще́нен, свяще́нными твои́ми моли́твами успи́ страсте́й мои́х мра́чная привиде́ния хва́лящему тя́, блаже́нне Григо́рие.

Припев: Священномучениче Григорие, моли́ Бо́га о нас.

Незаходи́мый свети́льник, иера́рх вели́кий, многострада́льный па́стырь, подвиго́в искуше́ние, Арме́нии хвала́ дне́сь на пе́ние ве́рныя призва́: соше́дшеся, того́ ублажи́м.

Сла́ва Отцу́ и Сы́ну и Свято́му Ду́ху:

Во́д живо́тных Ду́ха, блаже́нне, напо́лнился еси́, я́ко река́ Еде́ма у́мнаго исходя́щая, лице́ напая́я церко́вное и изсуша́я пучи́ну идолонеи́стовства, Григо́рие.

И ны́не и при́сно и во ве́ки веко́в. Ами́нь.

Богородичен: Жены́, Кресто́м от Тебе́ Вопло́щшагося укрепля́емы, Чи́стая, пострада́ша кре́пко и Тому́ приведе́ны бы́ша во сле́д Тебе́, Де́вы, де́вства блиста́ньми и му́ченическими кровьми́ сия́юще.

Пе́снь 3.

Ирмос: Яко непло́ды роди́ от язы́к Це́рковь, и мно́гое в ча́дех изнемо́же со́нмище, чу́дному Бо́гу на́шему возопии́м: Свя́т еси́, Го́споди.

Припев: Священномучениче Григорие, моли́ Бо́га о нас.

Ра́нами подвиго́в твои́х зу́бы сокруши́л еси́ льво́в, и излия́ньми крове́й де́монскую кро́вь погубля́я, и́дольская же из ко́рене низвраща́еши ка́пища, досточу́дне.

Припев: Священномучениче Григорие, моли́ Бо́га о нас.

Ни лю́тых наляца́ния, ни го́рькия му́ки, ни мра́чнейшаго ро́ва затворе́ние долговре́менное тво́й адама́нтский преврати́ша по́мысл, му́чениче досточу́дне.

Сла́ва Отцу́ и Сы́ну и Свято́му Ду́ху:

Дрема́ния твои́м очесе́м, му́чениче, не да́л еси́, до́ндеже дрема́нием злы́м одержи́мыя злочести́во сы́ны дне́ показа́л еси́, зову́щия: свя́т еси́, Го́споди.

И ны́не и при́сно и во ве́ки веко́в. Ами́нь.

Богородичен: Девома́терь Тя́, Отрокови́це, Рипсими́я му́ченица ве́дущи еди́ну, восхоте́ Твои́м добро́там и Христу́ во сле́д приведе́ся, страстьми́ светя́щися.

Седа́лен, гла́с 4.

Пресве́тлыми сия́ньми, иера́рше, озари́в твою́ ду́шу светоно́сно, доброде́тельми просвети́л еси́ лице́ земли́, име́я в се́рдце твое́м Христа́; просвеща́еши же, я́ко со́лнце незаходи́мое, язы́ков собо́ры, му́ченическими добро́тами на́с удобря́я, Григо́рие всему́дре.

Сла́ва, и ны́не, Богородичен:

Грехолюби́в сы́й, молю́ Тя, Безгре́шнаго Бо́га ро́ждшую, взе́млющаго гре́х ми́ра, Пречи́стая, многогре́шную ду́шу мою́ уще́дрити и грехи́ моя́ мно́гия очи́стити, гре́шных бо Ты́ еси́ очище́ние и спасе́ние ве́рных и защище́ние.

КрестоБогородичен:

Из Безнача́льнаго Отца́ рожде́ннаго, в после́дняя времена́ пло́тию Ро́ждшая, на Кресте́ Тя́ ви́сяща зря́щи, Христе́, — увы́ Мне́, любе́знейший Иису́се! — вопия́ше, — ка́ко сла́вимый, я́ко Бо́г, от Ангел, от беззако́нных ны́не челове́к, Сы́не, хотя́ распина́ешися? Пою́ Тя, Долготерпели́ве.

Пе́снь 4.

Ирмос: Седя́й в сла́ве на Престо́ле Божества́, во о́блаце ле́гце прии́де Иису́с Пребоже́ственный нетле́нною дла́нию и спасе́ зову́щия: сла́ва, Христе́, си́ле Твое́й.

Припев: Священномучениче Григорие, моли́ Бо́га о нас.

На обзо́рную тя́ высоту́ муче́ния возведе́ высо́кий в сла́ве Госпо́дь вы́шний, сла́вне, Его́же Стра́сти, ра́дуяся, изобрази́л еси́, священному́чениче: сла́ва, — вопия́, — си́ле Твое́й.

Припев: Священномучениче Григорие, моли́ Бо́га о нас.

Губя́щаго безбо́жнаго врага́ всю́ зе́млю Арме́нскую Боже́ственною си́лою низложи́л еси́ и, я́ко заря́ просия́в, просвети́л еси́ во тме́ лежа́щия, му́дре, су́етства.

Сла́ва Отцу́ и Сы́ну и Свято́му Ду́ху:

Многосугу́бно Созда́телю тво́й тала́нт прине́сл еси́, спа́сшихся боже́ственными твои́ми уче́нии, Григо́рие, и от Него́ нестаре́ющийся жре́бий прия́л еси́, Ца́рство, е́же на небесе́х, и све́тлость.

И ны́не и при́сно и во ве́ки веко́в. Ами́нь.

Богородичен: Яко добру́, я́ко избра́нну Тя́ и я́ко красну́ возлюби́ша отрокови́цы де́вы, с Рипсими́ею страда́вшия, Девома́ти Мари́е, и во сле́д Тебе́ приведо́шася Сы́ну Твоему́, ра́дующеся.

Пе́снь 5

Ирмос: Просвеще́ние Твое́, Го́споди, низпосли́ на́м и от мглы́ прегреше́ний разреши́ ны, Бла́же, Тво́й ми́р да́руяй.

Припев: Священномучениче Григорие, моли́ Бо́га о нас.

Крестоявле́нно ви́дел еси́ зна́мение я́ве, све́том сия́ющее и разруша́ющее но́щь и́дольскую, све́та же ча́да ве́рныя соде́ловающее.

Припев: Священномучениче Григорие, моли́ Бо́га о нас.

В до́льнейшем тя́ ро́ве спасе́ Христо́с Бо́г, со зверьми́ су́ща ле́тным измене́нием, хотя́ща све́том Боже́ственнаго Сло́ва просвеща́ти безу́мныя.

Сла́ва Отцу́ и Сы́ну и Свято́му Ду́ху:

Му́ченически подвиза́вся, венча́лся еси́ я́ко победи́тель, пома́зався же мѵ́ром архиере́йства, пома́зал еси́ лю́ди, злосмра́дныя льсти́ изба́вив, Григо́рие.

И ны́не и при́сно и во ве́ки веко́в. Ами́нь.

Богородичен: Воню́ ощути́вше мѵ́ра де́вы, из Тебе́, Чи́стая Де́во, возсия́вшаго Сло́ва, страда́льческими по́двиги Тому́ благоугоди́ша, ра́дующеся.

Пе́снь 6.

Ирмос: Возопи́, прообразу́я погребе́ние тридне́вное, проро́к Ио́на, в ки́те моля́ся: от тли́ изба́ви мя́, Иису́се, Царю́ си́л.

Припев: Священномучениче Григорие, моли́ Бо́га о нас.

Слове́с твои́х си́лою тре́бища разори́шася, и де́монстии низложи́шася нетве́рдии куми́ры, и ве́рных сердца́ боже́ственным утверди́шася раче́нием.

Припев: Священномучениче Григорие, моли́ Бо́га о нас.

Тирида́та, я́коже ве́пря свя́заннаго, приве́л еси́ я́ко а́гня Го́споду, пре́жде бы́вша во́лка свире́паго, за вели́кое бога́тство благоутро́бия Бо́жия ны́не спаса́ема.

Сла́ва Отцу́ и Сы́ну и Свято́му Ду́ху:

Показа́л еси́ заблу́ждшим стезю́ Боже́ственную, неле́стными поуче́нии, иера́рше, соверши́в я́ко па́стырь, Па́стыря и́стиннаго подража́я, Григо́рие.

И ны́не и при́сно и во ве́ки веко́в. Ами́нь.

Богородичен: Распина́ема от Тебе́, Богоро́дице, Вопло́щшагося я́ко уве́де Рипсими́я, Тому́ сраспя́тся, я́ко а́гница Па́стырю, я́ко же́ртва Бо́гу непоро́чная.

Конда́к, гла́с 2.

Благосла́внаго и священнонача́льника вси́, я́ко страда́льца и́стины, дне́сь ве́рнии в пе́снех и песнопе́ниих восхва́лим, бо́драго па́стыря и учи́теля Григо́рия, всеми́рнаго свети́льника и побо́рника, Христу́ бо мо́лится, е́же спасти́ся на́м.

Икос:

Сего́ вели́каго во страстоте́рпцех, свети́льника боже́ственнаго, Арме́нии ве́рна па́стыря и учи́теля в пе́снех восхва́лим и пе́нии боже́ственными главу́ его́ венча́ем, и́бо тму́ безбо́жия и́дольскаго погуби́, с ни́миже и де́монское де́йство все́ умертви́. Те́м труды́ претерпе́в кре́пким по́мыслом и благода́тию, Христу́ ны́не мо́лится, е́же спасти́ся на́м.

Пе́снь 7.

Ирмос: Авраа́мстии иногда́ в Вавило́не о́троцы пе́щный пла́мень попра́ша, пе́сньми взыва́юще: оте́ц на́ших Бо́же, благослове́н еси́.

Припев: Священномучениче Григорие, моли́ Бо́га о нас.

Многови́дныя му́ки претерпе́в, му́чениче, мно́гия от му́к свободи́л еси́ и бу́дущия печа́ли, вопия́: оте́ц на́ших Бо́же, благослове́н еси́.

Припев: Священномучениче Григорие, моли́ Бо́га о нас.

До́м себе́ Тро́ицы соверши́в, блаже́нне, хра́мы и́дольския разори́л еси́, хра́мы же воздви́гл еси́ Всеви́дцу Сло́ву, лю́дем на спасе́ние.

Сла́ва Отцу́ и Сы́ну и Свято́му Ду́ху:

Священноде́латель яви́лся еси́, тебе́ сама́го же́ртву пре́жде те́пле прине́сл еси́ Влады́це твоему́, Ему́же жря́ пото́м, благочести́вым дае́ши душа́м во спасе́ние.

И ны́не и при́сно и во ве́ки веко́в. Ами́нь.

Богородичен: Му́ченическими венцы́ укра́шены, отрокови́цы из Де́вы возсия́вшему Бо́гу приведо́шася, песнопе́сненно вопию́ще: Христе́, благослове́н еси́.

Пе́снь 8.

Ирмос: Изба́вителю все́х Всеси́льне, посреде́ пла́мене благоче́ствовавшия, снизше́д, ороси́л еси́ и научи́л еси́ пе́ти: вся́ дела́, благослови́те, по́йте Го́спода.

Припев: Священномучениче Григорие, моли́ Бо́га о нас.

Пострада́в зако́нно, посрами́л еси́ беззако́нныя враги́ крепча́йше, священнослужи́телю Григо́рие, и Бо́гу приве́л еси́ мно́жество пою́щих: вся́кая дела́, благослови́те, Госпо́дня, Го́спода.

Припев: Священномучениче Григорие, моли́ Бо́га о нас.

Возде́лав непло́дную ни́ву, насе́ял еси́ слове́сная се́мена, во сто́ пожа́в слове́сных кла́сов благопло́дие, Де́лателю ду́ш угобзи́вшее.

Сла́ва Отцу́ и Сы́ну и Свято́му Ду́ху:

Блиста́ньми слове́с твои́х просвети́л еси́ и мно́гия тмы́ приве́л еси́, на́с ра́ди во́лею Претерпе́вшему Стра́сти, Ему́же песнопое́м: благослови́те, вся́ дела́ Госпо́дня, Го́спода.

И ны́не и при́сно и во ве́ки веко́в. Ами́нь.

Богородичен: Ни мно́жества му́к убоя́вшися, ни плотски́м сласте́м повину́вшися, от Де́вы Го́спода су́ща испове́да, вопию́щи, Рипсими́я: благослови́те, вся́ дела́ Госпо́дня, Го́спода.

Песнь 9

Ирмос: Ева у́бо неду́гом преслуша́ния кля́тву всели́ла е́сть, Ты́ же, Де́во Богоро́дице, прозябе́нием чревоноше́ния ми́рови благослове́ние процвела́ еси́. Те́м Тя́ вси́ велича́ем.

Припев: Священномучениче Григорие, моли́ Бо́га о нас.

Си́лою вжиля́емь Христо́вою, претерпе́л еси́ му́к боле́зни, и ка́пища погуби́л еси́ де́монская, и хра́мы и́дольския раскопа́л еси́, лю́ди же, су́щия в неве́дении, просвети́л еси́, священному́чениче всече́стне.

Припев: Священномучениче Григорие, моли́ Бо́га о нас.

Яко у́тро, возсия́ на́м па́мять твоя́, благода́тей зарю́ нося́щи, ты́ бо све́та яви́лся еси́ прия́телище Боже́ственнаго и к Све́ту возше́л еси́ невече́рнему, бога́тно озаря́емь светоли́тии Боже́ственными, преподо́бне.

Припев: Священномучениче Григорие, моли́ Бо́га о нас.

Собесе́дник яви́лся еси́ проро́ков, му́чеников же и апо́столов купножи́тель, архиере́ев и преподо́бных, Ангелов и арха́нгелов равноста́тен, с ни́миже о на́с, чту́щих тя́, о́тче, моли́ Человеколю́бца.

Сла́ва Отцу́ и Сы́ну и Свято́му Ду́ху:

До́блествоваша жены́ честны́я, испаде́ние Евино исправля́юще, претерпе́ша боле́зней треволне́ние, вельми́ на высоту́ хва́лящагося нога́ми красне́йшими сокруши́ша, и́хже досто́йно ублажа́ем.

И ны́не и при́сно и во ве́ки веко́в. Ами́нь.

Богородичен: Све́том лица́ из Тебе́ Возсия́вшаго озари́вшися, Присноде́во, любо́вию неудержа́нною, Рипсими́я Стра́сти Его́ и Сме́рть свое́ю пло́тию изобрази́, те́мже с Тобо́ю, Влады́чице, ны́не весели́тся.

Свети́лен.

В ро́ве вре́менно затворе́на со зверьми́ Григо́рия похва́лим сла́внаго, премени́вша ди́вия ве́пря мучи́теля Тирида́та и огласи́вша сло́во все́й земли́ просвеще́ния.

Богородичен:

Честне́йши еси́ все́х тва́рей, Богоро́дице, Христа́ поро́ждшая, Того́ у́бо моли́ сохрани́тися ма́лей се́й па́стве Твое́й невреди́мей от вся́каго наве́та проти́внаго.

Молитва

О, святы́й уго́дниче Бо́жий Григо́рие, по́двигом до́брым подвиза́вся на земли́, восприя́л еси́ на Небесе́х вене́ц пра́вды, его́же угото́вал еси́ Госпо́дь всем лю́бящим Его́; те́мже взира́юще на святы́й твой о́браз, ра́дуемся о пресла́внем сконча́нии жи́тельства твоего́ и чтим святу́ю па́мять твою́. Ты же, предстоя́ Престо́лу Бо́жию, приими́ моле́ния на́ша и ко Всеми́лостивому Бо́гу принеси́, о е́же прости́ти нам вся́кое прегреше́ние и по́мощи нам ста́ти проти́ву ко́знем диа́вольским, да изба́вльшеся от скорбе́й, боле́зней, бед и напа́стей и вся́каго зла, благоче́стно и пра́ведно поживе́м в ны́нешнем ве́це и сподо́бимся предста́тельством твои́м, а́ще и недосто́йни есмы́, ви́дети блага́я на земли́ живы́х, сла́вяще Еди́наго во святы́х Свои́х сла́вимаго Бо́га, Отца́ и Сы́на и Свята́го Ду́ха, ны́не и во ве́ки веко́в. Ами́нь.

Окончание

По прочтении канона и молитвы, чти:

Досто́йно есть я́ко вои́стинну блажи́ти Тя, Богоро́дицу, Присноблаже́нную и Пренепоро́чную и Ма́терь Бо́га на́шего. Честне́йшую Херуви́м и сла́внейшую без сравне́ния Серафи́м, без истле́ния Бо́га Сло́ва ро́ждшую, су́щую Богоро́дицу Тя велича́ем.

Таже: Сла́ва Отцу́ и Сы́ну и Свято́му Ду́ху, и ны́не и при́сно и во ве́ки веко́в. Ами́нь:

Го́споди, поми́луй, трижды.

И отпуст.

Го́споди, Иису́се Христе́, Сы́не Бо́жий, моли́тв ра́ди Пречи́стыя Твоея́ Ма́тере, преподо́бных и богоно́сных оте́ц на́ших, святаго (имя святого, емуже читался канон) и всех святы́х, спаси́ и помилуй мя, гре́шнаго, яко Благ и Человеколюбец.

Святому священномученику Григорию, просветителю Великия Армении