22 июня.

Канон второй преподобному Кириллу, игумену Белоезерскому.

Молитвы предначинательные

Моли́твами святы́х оте́ц на́ших, Го́споди Иису́се Христе́, Бо́же наш, поми́луй нас, ами́нь.

Сла́ва Тебе́, Бо́же наш, сла́ва Тебе́.

Царю́ Небе́сный, Уте́шителю, Ду́ше и́стины, И́же везде́ сый и вся исполня́яй, Сокро́вище благи́х и жи́зни Пода́телю, прииди́ и всели́ся в ны, и очи́сти ны от вся́кия скве́рны, и спаси́, Бла́же, ду́ши на́ша.

Святы́й Бо́же, Святы́й Кре́пкий, Святы́й Безсме́ртный, поми́луй нас. Трижды.

Сла́ва Отцу́ и Сы́ну и Свято́му Ду́ху, и ны́не и при́сно и во ве́ки веко́в. Ами́нь.

Пресвята́я Тро́ице, поми́луй нас; Го́споди, очи́сти грехи́ на́ша; Влады́ко, прости́ беззако́ния на́ша; Святы́й, посети́ и исцели́ не́мощи на́ша, и́мене Твоего́ ра́ди.

Го́споди, поми́луй, трижды.

Сла́ва Отцу́ и Сы́ну и Свято́му Ду́ху, и ны́не и при́сно и во ве́ки веко́в. Ами́нь.

О́тче наш, И́же еси́ на Небесе́х, да святи́тся и́мя Твое́, да прии́дет Ца́рствие Твое́, да бу́дет во́ля Твоя́, я́ко на Небеси́ и на земли́. Хлеб наш насу́щный да́ждь нам днесь; и оста́ви нам до́лги на́ша, я́коже и мы оставля́ем должнико́м на́шим; и не введи́ нас во искуше́ние, но изба́ви нас от лука́ваго.

Го́споди, поми́луй, 12,

Прииди́те, поклони́мся Царе́ви на́шему Бо́гу.

Прииди́те, поклони́мся и припаде́м Христу́, Царе́ви на́шему Бо́гу.

Прииди́те, поклони́мся и припаде́м Самому́ Христу́, Царе́ви и Бо́гу на́шему.

Псалом 50:

Поми́луй мя, Бо́же, по вели́цей ми́лости Твое́й, и по мно́жеству щедро́т Твои́х очи́сти беззако́ние мое́. Наипа́че омы́й мя от беззако́ния моего́, и от греха́ моего́ очи́сти мя; я́ко беззако́ние мое́ аз зна́ю, и грех мой предо мно́ю есть вы́ну. Тебе́ Еди́ному согреши́х и лука́вое пред Тобо́ю сотвори́х, я́ко да оправди́шися во словесе́х Твои́х, и победи́ши внегда́ суди́ти Ти. Се бо, в беззако́ниях зача́т есмь, и во гресе́х роди́ мя ма́ти моя́. Се бо, и́стину возлюби́л еси́; безве́стная и та́йная прему́дрости Твоея́ яви́л ми еси́. Окропи́ши мя иссо́пом, и очи́щуся; омы́еши мя, и па́че сне́га убелю́ся. Слу́ху моему́ да́си ра́дость и весе́лие; возра́дуются ко́сти смире́нныя. Отврати́ лице́ Твое́ от грех мои́х и вся беззако́ния моя́ очи́сти. Се́рдце чи́сто сози́жди во мне, Бо́же, и дух прав обнови́ во утро́бе мое́й. Не отве́ржи мене́ от лица́ Твоего́ и Ду́ха Твоего́ Свята́го не отыми́ от мене́. Возда́ждь ми ра́дость спасе́ния Твоего́ и Ду́хом Влады́чним утверди́ мя. Научу́ беззако́ныя путе́м Твои́м, и нечести́вии к Тебе́ обратя́тся. Изба́ви мя от крове́й, Бо́же, Бо́же спасе́ния моего́; возра́дуется язы́к мой пра́вде Твое́й. Го́споди, устне́ мои́ отве́рзеши, и уста́ моя́ возвестя́т хвалу́ Твою́. Я́ко а́ще бы восхоте́л еси́ же́ртвы, дал бых у́бо: всесожже́ния не благоволи́ши. Же́ртва Бо́гу дух сокруше́н; се́рдце сокруше́нно и смире́нно Бог не уничижи́т. Ублажи́, Го́споди, благоволе́нием Твои́м Сио́на, и да сози́ждутся сте́ны Иерусали́мския. Тогда́ благоволи́ши же́ртву пра́вды, возноше́ние и всесожега́емая; тогда́ возложа́т на oлта́рь Твой тельцы́.

Тропа́рь, гла́с 1:

Яко кри́н, в пусты́ни Дави́дски процве́л еси́, о́тче Кири́лле, злостра́стия те́рние искореня́я, и собра́л еси́ в не́й учени́к мно́жество, стра́хом Бо́жиим и уче́нием твои́м наставля́емых, и́хже и до конца́, я́ко чадолюби́вый оте́ц, не оста́вил еси́, посеща́я, да вси́ вопие́м: сла́ва Да́вшему ти́ кре́пость, сла́ва Венча́вшему тя́, сла́ва Де́йствующему тобо́ю все́м исцеле́ния.

Други́й кано́н, гла́с 8.

Пе́снь 1.

Ирмос: Во́ду проше́д, я́ко су́шу, и еги́петскаго зла́ избежа́в, изра́ильтянин вопия́ше: Изба́вителю и Бо́гу на́шему пои́м.

Припев: Преподо́бне о́тче Кири́лле, моли́ Бо́га о нас.

Яко вели́ко вои́стинну дерзнове́ние стяжа́в, преподо́бне, к Бо́гу, сбытию́ зри́тель сподо́бился еси́ бы́ти и непло́дная ложесна́ многопло́дна моли́твами твои́ми показа́л еси́.

Припев: Преподо́бне о́тче Кири́лле, моли́ Бо́га о нас.

На воде́ поко́я и на зла́це воздержа́ния, о́тче, учени́к твои́х стада́ му́дре упа́сл еси́ и, ны́не с на́ми неви́димо водворя́яся, моли́ о чту́щих па́мять твою́.

Сла́ва Отцу́ и Сы́ну и Свято́му Ду́ху:

Ум тво́й к Бо́гу любо́вию впери́в, тле́нными нетле́нная искупи́л еси́. Те́мже вся́ка душа́, спаса́ема тобо́ю, тя́ прославля́ет.

И ны́не и при́сно и во ве́ки веко́в. Ами́нь.

Богородичен: Ма́нием вся́ Содержа́й из Тебе́ па́че сло́ва ражда́ется, Ма́ти Чи́стая, преподо́бныя венча́вый, ве́рно Тебе́ сла́вящия, Ма́терь Бо́жию.

Пе́снь 3.

Ирмос: Ты́ еси́ утвержде́ние притека́ющих к Тебе́, Го́споди, Ты́ еси́ Све́т омраче́нных, и пое́т Тя́ ду́х мо́й.

Припев: Преподо́бне о́тче Кири́лле, моли́ Бо́га о нас.

Волна́м, преподо́бне, и́менем Госпо́дним запрети́в и е́зеро укроти́в, лю́ди от потопле́ния спа́сл еси́ моли́твами твои́ми, Кири́лле блаже́нне.

Припев: Преподо́бне о́тче Кири́лле, моли́ Бо́га о нас.

Жела́нием, е́же к Бо́гу, и Того́ любо́вию па́че огня́ распала́емь, о́тче, целому́дренно в преподо́бии и пра́вде пожи́л еси́, преподо́бне Кири́лле.

Сла́ва Отцу́ и Сы́ну и Свято́му Ду́ху:

Те́ло твое́ посто́м и моли́твами, о́тче, удручи́л еси́ и сего́ ра́ди наслажда́ешися ве́чнаго блаже́нства, иде́же святы́х собо́ри и преподо́бных ли́цы веселя́тся.

И ны́не и при́сно и во ве́ки веко́в. Ами́нь.

Богородичен: Боговиде́нием просвеща́емь, проро́к явле́нно зри́т го́ру Бо́жию благослове́нную, земны́х украше́ние, еди́ну Всепе́тую.

Седа́лен, гла́с 4.

Приспе́ пра́здник честна́го твоего́ успе́ния, блаже́нне Кири́лле, просвеща́я все́х пра́зднующих па́мять твою́ све́тло и Христа́ непреста́нно пе́сньми всегда́ сла́вящих.

Сла́ва, и ны́не, Богородичен:

Иже на престо́ле херуви́мстем седя́й и в не́дрех Отчих водворя́яся я́ко на престо́ле святе́м седи́т Свое́м, Влады́чице, в не́дрех Твои́х; вопло́щся бо Бо́г вои́стинну, воцари́ся над все́ми язы́ки, и разу́мно ны́не пои́м Ему́, Его́же умоли́ спасти́ся рабо́м Твои́м.

Пе́снь 4.

Ирмос: Услы́шах, Го́споди, смотре́ния Твоего́ та́инство, разуме́х дела́ Твоя́ и просла́вих Твое́ Божество́.

Припев: Преподо́бне о́тче Кири́лле, моли́ Бо́га о нас.

Бо́дренными моли́твами, о́тче, и сле́зными пото́ки Це́рковь ве́рных напои́л еси́, блаже́нне Кири́лле.

Припев: Преподо́бне о́тче Кири́лле, моли́ Бо́га о нас.

Еже на земли́ вре́менное житие́ твое́ в безмо́лвии мно́зе пожи́л еси́, Христу́ поя́: сла́ва си́ле Твое́й, Го́споди.

Сла́ва Отцу́ и Сы́ну и Свято́му Ду́ху:

От млада́го во́зраста в воздержа́нии, о́тче, пре́был еси́, пло́д мно́г доброде́тели Бо́гу, преподо́бне, прине́сл еси́ и сего́ ра́ди от Него́ просла́вился еси́.

И ны́не и при́сно и во ве́ки веко́в. Ами́нь.

Богородичен: Всели́вся в Тя́ Невмести́мый и, вмести́вся, показа́ Тя́ небе́с ши́ршу, Де́во, те́мже Тя́ ублажа́ем.

Пе́снь 5

Ирмос: Вску́ю мя́ отри́нул еси́ от лица́ Твоего́, Све́те незаходи́мый, и покры́ла мя́ е́сть чужда́я тма́ окая́ннаго? Но обрати́ мя, и к све́ту за́поведей Твои́х пути́ моя́ напра́ви, молю́ся.

Припев: Преподо́бне о́тче Кири́лле, моли́ Бо́га о нас.

Пото́ки сле́зными, о́тче, страсте́й пучи́ну изсуши́л еси́, и в зе́млю обетова́ния преше́л еси́, и та́мо ра́йское житие́ прия́л еси́, е́же угото́ва Бо́г лю́бящим Его́.

Сла́ва Отцу́ и Сы́ну и Свято́му Ду́ху:

Христа́, тобо́ю слепы́м да́рующая здра́вие, о́тче, моли́, и мне́ о́чи душе́вныя просвети́ти, до́ндеже не обря́щет мя́ негото́ва но́щь глубо́кая и тма́ отча́яния, молю́ся.

И ны́не и при́сно и во ве́ки веко́в. Ами́нь.

Богородичен: Украси́лася еси́ де́вства пречи́стыми добро́тами и пе́рвый Евы покры́ла еси́ сту́д злообра́зный, Христа́ ро́ждши, одея́ние безсме́ртия да́рующаго Тебе́ чту́щим.

Пе́снь 6.

Ирмос: Очи́сти мя́, Спа́се, мно́га бо беззако́ния моя́, и из глубины́ зо́л возведи́, молю́ся, к Тебе́ бо возопи́х, и услы́ши мя́, Бо́же спасе́ния моего́.

Припев: Преподо́бне о́тче Кири́лле, моли́ Бо́га о нас.

В пусты́ни безмо́лвия водвори́лся еси́, преподо́бне, и отту́ду к небе́сному гра́ду преше́л еси́, иде́же Бо́гу угоди́вших жили́ща, с ни́миже о на́с, блаже́нне, моли́ся.

Припев: Преподо́бне о́тче Кири́лле, моли́ Бо́га о нас.

Чи́сто житие́ твое́ от ю́ности име́л еси́, блаже́нне, и того́ ра́ди Пречи́стыя Бо́жия Ма́тере изря́дный служи́тель бы́л еси́, и прече́стен хра́м То́й воздви́гл еси́, в не́мже Госпо́дь сла́вится.

Сла́ва Отцу́ и Сы́ну и Свято́му Ду́ху:

От страсте́й тиме́ния чи́ста тя́ обре́т, всели́ся в тя́ Ду́х Пресвяты́й, те́м и чуде́с дарова́ния тебе́ да́рует еди́н во святы́х прославля́емый Бо́г на́ш.

И ны́не и при́сно и во ве́ки веко́в. Ами́нь.

Богородичен: Зачала́ еси́ вои́стинну Боже́ственное Сло́во во утро́бе Твое́й и Сие́ па́че естества́, Всенепоро́чная, родила́ еси́, Его́же моли́ от бе́д все́м изба́витися, рабо́м Твои́м.

Конда́к, гла́с 8.

Яко преоби́дев тле́нная и до́лу влеку́щая мудрова́ния, о́тче, к вы́шнему тече́нию ра́достно устреми́лся еси́, и та́мо со святы́ми Пресвяте́й Тро́ице предстоя́, моли́ от вра́г сохрани́тися ста́ду твоему́, я́ко да, свято́е твое́ успе́ние пра́зднующе, вопие́м: ра́дуйся, преблаже́нне Кири́лле, о́тче на́ш.

Икос:

Аще и челове́к, о́тче, бы́л еси́ по естеству́, но па́че челове́ка житие́ соверши́л еси́: вся́ бо, я́же в ми́ре сла́дкая и кра́сная, преоби́дев, после́довал еси́ Христу́. Те́мже и от все́х слы́шиши: ра́дуйся, я́ко, Пречи́стою наставля́емь, пусты́ню дости́гл еси́; ра́дуйся, я́ко в то́й прече́стен хра́м Бо́жии Ма́тери воздви́гнувый; ра́дуйся, я́ко в не́м Бо́г прославля́ется; ра́дуйся, собра́вый та́мо учени́к мно́жество; ра́дуйся, я́ко с те́ми приле́жно Го́сподеви рабо́тал еси́; ра́дуйся, удиви́вый Ангелы житие́м твои́м; ра́дуйся, я́ко тобо́ю челове́цы по́льзовашася; ра́дуйся, и́же чудесы́ все́х удиви́вый; ра́дуйся, преше́дый от земны́х на небе́сная; ра́дуйся, я́ко, Тро́ице предстоя́, о на́с мо́лишися; ра́дуйся, исто́чниче чуде́с неисчерпа́емый; ра́дуйся, ве́рных пле́нник изба́вителю; ра́дуйся, преблаже́нне Кири́лле, о́тче на́ш.

Пе́снь 7.

Ирмос: От Иуде́и доше́дше, о́троцы, в Вавило́не иногда́, ве́рою Тро́ическою пла́мень пе́щный попра́ша, пою́ще: отце́в Бо́же, благослове́н еси́.

Припев: Преподо́бне о́тче Кири́лле, моли́ Бо́га о нас.

От мирска́го треволне́ния избе́г, преподо́бне, в ти́хое приста́нище дости́гл еси́ небе́снаго пребыва́ния, вопия́: оте́ц на́ших Бо́же, благослове́н еси́.

Припев: Преподо́бне о́тче Кири́лле, моли́ Бо́га о нас.

В пусты́ню, я́коже дре́вний Анто́ний, всели́лся еси́ и в не́й вели́каго Ефре́ма слеза́ми и посто́м подража́л еси́, Христу́ поя́: благослове́н еси́, Го́споди Бо́же оте́ц на́ших.

Сла́ва Отцу́ и Сы́ну и Свято́му Ду́ху:

Вся́кими, о́тче, о́бразы и́же с тобо́ю ученики́ направля́л еси́ по стезя́м пра́вым путе́й твои́х ходи́ти и с тобо́ю Христу́ пе́ти: оте́ц на́ших Бо́же, благослове́н еси́.

И ны́не и при́сно и во ве́ки веко́в. Ами́нь.

Богородичен: Го́ру Тя́ проро́к Дании́л Боже́ственным Ду́хом прорече́, Де́во, из нея́же ка́мень — Христо́с без руки́ отсече́ся и сокруше́ние соде́ла истука́нней пре́лести.

Пе́снь 8.

Ирмос: Царя́ Небе́снаго, Его́же пою́т во́и Ангельстии, хвали́те и превозноси́те во вся́ ве́ки.

Припев: Преподо́бне о́тче Кири́лле, моли́ Бо́га о нас.

Бу́дущаго ра́ди жития́ на небесе́х на земли́ ми́ру умертви́лся еси́, о́тче. Сего́ ра́ди жи́в Бо́гу предстоя́, вопие́ши: Тя́ превозно́сим, Го́спода, во ве́ки.

Припев: Преподо́бне о́тче Кири́лле, моли́ Бо́га о нас.

Све́том Тро́ическим, о́тче, просвеща́емь, твою́ жи́знь благоче́стно сконча́л еси́ и по́стных собо́ры приве́л еси́ Христу́ вопи́ти: Тя́ превозно́сим, Го́спода, во ве́ки.

Сла́ва Отцу́ и Сы́ну и Свято́му Ду́ху:

С небе́сными во́инствы всегда́, преподо́бне, Тро́ицу несозда́нную, неразде́льное Божество́ славосло́виши, блаже́нне, и превозно́сиши во ве́ки.

И ны́не и при́сно и во ве́ки веко́в. Ами́нь.

Богородичен: Во утро́бе Твое́й пе́рвейша Тебе́ заче́нши, Богома́ти, Чи́стая Де́во, родила́ еси́ несказа́нно Бо́га и Царя́, Его́же превозно́сим во ве́ки.

Песнь 9

Ирмос: Чи́стую сла́вно почти́м, лю́дие, Богоро́дицу, о́гнь Божества́ прии́мшую во чре́ве неопа́льно, пе́сньми велича́ем.

Припев: Преподо́бне о́тче Кири́лле, моли́ Бо́га о нас.

Потреби́ страстна́я двиза́ния ума́ моего́, Христе́, и ле́ность уны́ния отжени́, в пра́вый пу́ть Тво́й ходи́ти наста́ви моли́твами уго́дника Твоего́ Кири́лла, да я́ко Благоде́теля велича́ю Тя́.

Припев: Преподо́бне о́тче Кири́лле, моли́ Бо́га о нас.

Певце́м, тебе́ пою́щим, о́тче, и во хвале́нии сла́вящим, пода́ждь свы́ше спасе́ние и избавле́ние, да ктому́ тебе́ мно́жае в пе́снех велича́ют.

Сла́ва Отцу́ и Сы́ну и Свято́му Ду́ху:

Руко́ю мое́ю недосто́йною приноси́мое тебе́ с трудо́м от усе́рдия хвале́ние приими́, богоблаже́нне Кири́лле, и хода́тай к Бо́гу бу́ди ми́, молю́ся, изба́вити мя́ та́мошняго муче́ния, да непреста́нно в пе́снех велича́ю тя́.

И ны́не и при́сно и во ве́ки веко́в. Ами́нь.

Богородичен: В Тя́ всели́вся, Пренепоро́чная, пе́рвее родонача́льным злообра́зно запе́ншаго человекоуби́йцу низложи́, роди́вся, и все́х на́с спасе́.

Свети́лен.

Пречестну́ю и свяще́нную па́мять твою́ соверша́ющих, преподо́бне Кири́лле, и мно́гия труды́ твоя́ пою́щих, не преста́й, моля́ Изба́вителя от напа́стей избавля́ти на́с и селе́нию святы́х сподо́бити.

Сла́ва, и ны́не, Богородичен:

Почита́ют Рождество́ Твое́ безпло́тных чи́ни, ра́дости бо земны́я Ты́ еди́на испо́лнила еси́. Те́мже Тя́, Всенепоро́чная, ве́рнии, сла́вим, пе́сньми славосло́вяще: Све́т бо су́щим во тме́ возсия́ла еси́ и Со́лнце незаходя́щее.

Молитва преподобному Кириллу, игумену Белоезерскому, чудотворцу

О, священная главо, преподобне и Богоносне Отче Кирилле! Припадаем к тебе с верою и любовию, и просим тя, небеснаго Заступника нашего: яви велие милосердие твое нам, смиренным и грешным, и пролей теплыя молитвы твои о нас ко Господу Богу. Свойственно есть тебе благосердие, святче Божий, ибо живущу ти на земли, едино бысть у тебе попечение, еже спасати от погибели греховны души человеческий, и вся твоя жизнь святая бысть зерцалом добрых дел, о нихже прославляшеся в тебе Отец Небесный, к Немуже велие дерзновение стяжав, испроси нам у благости Его: веру праву, благочестие нелицемерное, покаяние истинное, братолюбие совершенное и преуспеяние во всех благих делех. Исходатайствуй нам здравие душевное и телесное, земли плодоносие, воздуха благорастворение, мирное и безмятежное житие, непостыдную христианскую кончину и добрый ответ на страшнем Суде Христовом. Сохрани Церковь Святую и Державу Российскую от браней и нестроений. Огради обитель твою честную от всякаго зла, и вся правоверныя люди, к тебе приходящыя и мощем твоим покланяющиеся, осени небесным твоим благословением, и вся прошения их во благо исполни. Ей, Отче, не презри молитв наших, со умилением тебе возносимых, но буди о нас теплый предстатель ко Господу, и сподоби нас помощию твоею святою спасение вечное получити, и Царствие Небесное унаследовати, да славословим великия щедроты и неизреченныя милости Отца и Сына и Святаго Духа, в Троице покланяемаго Бога, и твое Отеческое заступление, во веки веков, аминь.