8 декабря

Канон иной равноапостольнаго Климента, архиепископа Охридскаго, просветителя Болгарскаго, чудотворца

Молитвы предначинательные

Моли́твами святы́х оте́ц на́ших, Го́споди Иису́се Христе́, Бо́же наш, поми́луй нас, ами́нь.

Сла́ва Тебе́, Бо́же наш, сла́ва Тебе́.

Царю́ Небе́сный, Уте́шителю, Ду́ше и́стины, И́же везде́ сый и вся исполня́яй, Сокро́вище благи́х и жи́зни Пода́телю, прииди́ и всели́ся в ны, и очи́сти ны от вся́кия скве́рны, и спаси́, Бла́же, ду́ши на́ша.

Святы́й Бо́же, Святы́й Кре́пкий, Святы́й Безсме́ртный, поми́луй нас. Трижды.

Сла́ва Отцу́ и Сы́ну и Свято́му Ду́ху, и ны́не и при́сно и во ве́ки веко́в. Ами́нь.

Пресвята́я Тро́ице, поми́луй нас; Го́споди, очи́сти грехи́ на́ша; Влады́ко, прости́ беззако́ния на́ша; Святы́й, посети́ и исцели́ не́мощи на́ша, и́мене Твоего́ ра́ди.

Го́споди, поми́луй, трижды.

Сла́ва Отцу́ и Сы́ну и Свято́му Ду́ху, и ны́не и при́сно и во ве́ки веко́в. Ами́нь.

О́тче наш, И́же еси́ на Небесе́х, да святи́тся и́мя Твое́, да прии́дет Ца́рствие Твое́, да бу́дет во́ля Твоя́, я́ко на Небеси́ и на земли́. Хлеб наш насу́щный да́ждь нам днесь; и оста́ви нам до́лги на́ша, я́коже и мы оставля́ем должнико́м на́шим; и не введи́ нас во искуше́ние, но изба́ви нас от лука́ваго.

Го́споди, поми́луй, 12,

Прииди́те, поклони́мся Царе́ви на́шему Бо́гу.

Прииди́те, поклони́мся и припаде́м Христу́, Царе́ви на́шему Бо́гу.

Прииди́те, поклони́мся и припаде́м Самому́ Христу́, Царе́ви и Бо́гу на́шему.

Псалом 50:

Поми́луй мя, Бо́же, по вели́цей ми́лости Твое́й, и по мно́жеству щедро́т Твои́х очи́сти беззако́ние мое́. Наипа́че омы́й мя от беззако́ния моего́, и от греха́ моего́ очи́сти мя; я́ко беззако́ние мое́ аз зна́ю, и грех мой предо мно́ю есть вы́ну. Тебе́ Еди́ному согреши́х и лука́вое пред Тобо́ю сотвори́х, я́ко да оправди́шися во словесе́х Твои́х, и победи́ши внегда́ суди́ти Ти. Се бо, в беззако́ниях зача́т есмь, и во гресе́х роди́ мя ма́ти моя́. Се бо, и́стину возлюби́л еси́; безве́стная и та́йная прему́дрости Твоея́ яви́л ми еси́. Окропи́ши мя иссо́пом, и очи́щуся; омы́еши мя, и па́че сне́га убелю́ся. Слу́ху моему́ да́си ра́дость и весе́лие; возра́дуются ко́сти смире́нныя. Отврати́ лице́ Твое́ от грех мои́х и вся беззако́ния моя́ очи́сти. Се́рдце чи́сто сози́жди во мне, Бо́же, и дух прав обнови́ во утро́бе мое́й. Не отве́ржи мене́ от лица́ Твоего́ и Ду́ха Твоего́ Свята́го не отыми́ от мене́. Возда́ждь ми ра́дость спасе́ния Твоего́ и Ду́хом Влады́чним утверди́ мя. Научу́ беззако́ныя путе́м Твои́м, и нечести́вии к Тебе́ обратя́тся. Изба́ви мя от крове́й, Бо́же, Бо́же спасе́ния моего́; возра́дуется язы́к мой пра́вде Твое́й. Го́споди, устне́ мои́ отве́рзеши, и уста́ моя́ возвестя́т хвалу́ Твою́. Я́ко а́ще бы восхоте́л еси́ же́ртвы, дал бых у́бо: всесожже́ния не благоволи́ши. Же́ртва Бо́гу дух сокруше́н; се́рдце сокруше́нно и смире́нно Бог не уничижи́т. Ублажи́, Го́споди, благоволе́нием Твои́м Сио́на, и да сози́ждутся сте́ны Иерусали́мския. Тогда́ благоволи́ши же́ртву пра́вды, возноше́ние и всесожега́емая; тогда́ возложа́т на oлта́рь Твой тельцы́.

Тропа́рь, гла́с 4:

Словесы́ наста́вил еси́ язы́ки в ве́ру Христо́ву, / де́лы же возвы́сил еси́ себе́ к боже́ственней жи́зни, / святи́телю Кли́менте равноапо́стольне, / чудесы́ сия́я приступа́ющим к тебе́ ве́рно / и зна́меньми озаря́я Це́рковь пресла́вно, / сего́ ра́ди честну́ю твою́ па́мять сла́вим.

Ин тропа́рь, гла́с то́йже:

Яко труба́ арха́нгела Бо́жия / оглаша́еши наро́д бо́лгарский на вся́ ве́ки / и к чудеси́ пресла́вному утвержде́ния люде́й твои́х в Правосла́вии / прилага́еши неиждива́емо чудеса́ ве́лия да́же доны́не. / Те́мже с любо́вию почита́ем присночестну́ю па́мять твою́, / святи́телю Кли́менте равноапо́стольне, / и мо́лим: моли́ся о душа́х на́ших.

Кано́н святи́телю иной, гла́с 4.

Пе́снь 1.

Ирмос: Триста́ты кре́пкия, Рожде́йся от Де́вы, безстра́стия во глубине́, души́ трича́стное потопи́, молю́ся, да Тебе́, я́ко в тимпа́не, во умерщвле́нии телесе́ побе́дное воспою́ пе́ние.

Припев: Святителю отче Клименте, моли Бога о нас.

Невеще́ственным просвеще́нием светя́ся и житие́ чи́стое произволя́я, жи́тельством доброде́тельным собесе́дник Ангелом и све́т ве́рным бы́л еси́, блаже́нне.

Припев: Святителю отче Клименте, моли Бога о нас.

Показа́л еси́ лю́дем стези́ благоче́стия, заблу́ждшим в путе́х поги́бели пре́лестию сатани́нскою. Те́мже тя́ я́ко богоглаго́льника и Госпо́дня апо́стола пе́сньми сла́вим, приснопа́мятне.

Припев: Святителю отче Клименте, моли Бога о нас.

Тимофе́я я́сно подража́я, вме́сто Па́вла, всея́ земли́ просвети́теля, пропове́дником ве́ры Мефо́дию и Кири́ллу после́довал еси́. Сего́ ра́ди с ни́ми просла́вился еси́, богому́дре.

Сла́ва Отцу́ и Сы́ну и Свято́му Ду́ху:

Возлюби́л еси́ Бо́га от всего́ се́рдца и ми́ра кра́сных отве́рглся еси́ всеце́ло. Сего́ ра́ди молю́ тя: плотски́я рабо́ты моли́твами твои́ми измени́ мя, я́ко злосе́рдие к Бо́гу ражда́ющия.

И ны́не и при́сно и во ве́ки веко́в. Ами́нь.

Богоро́дичен: Соблюда́ти честны́я за́поведи Спа́са укрепи́ мя Твои́ми те́плыми заступле́нии, Пречи́стая, я́ко да любо́вию Тя́ сла́влю, в рождестве́ сла́ву де́вства невреди́му соблю́дшую.

Пе́снь 3.

Ирмос: Не му́дростию, и си́лою, и бога́тством хва́лимся, но Тобо́ю, Отчею Ипоста́сною Му́дростию, Христе́: не́сть бо свя́т, па́че Тебе́, Человеколю́бче.

Припев: Святителю отче Клименте, моли Бога о нас.

Му́дростию слове́с твои́х ве́ру уясни́л еси́ и научи́л еси́ лю́ди, в пре́лесть многобо́жия уклони́вшияся, Тро́ицу чествова́ти Еди́ную.

Припев: Святителю отче Клименте, моли Бога о нас.

Си́лою Ду́ха Уте́шителя загради́в ху́льныя на Него́ уста́, и ересе́й нача́льники, кре́пко зауши́в, посрами́л еси́.

Припев: Святителю отче Клименте, моли Бога о нас.

Непоро́чным житие́м Бо́гу послужи́в, блаже́нне о́тче, я́коже дре́вний Ааро́н, всепло́дие прине́сл еси́, о ста́де твое́м моля́ся.

Сла́ва Отцу́ и Сы́ну и Свято́му Ду́ху:

Ка́пли сле́зныя не́сть во мне́ ко омове́нию душе́вных скве́рн, ты́ у́бо омы́й мя́ моли́твами твои́ми, струю́ покая́ния мне́ источа́я.

И ны́не и при́сно и во ве́ки веко́в. Ами́нь.

Богоро́дичен: Ту́чная горо́, Юже Дави́д предзря́ше Ду́хом, молю́ Тя́ приле́жно, Влады́чице, обрати́ мя, заблу́ждшаго в гора́х отча́яния.

Седа́лен, гла́с 8. Подо́бен: Прему́дрость и Сло́во.

Похвала́ми согла́сно почти́м / святи́теля вели́каго, / напои́вшаго все́х словесы́ кни́жными / и ве́сь ми́р слове́нский просвети́вшаго заря́ми духо́вными. / Те́м, соше́дшеся, досто́йно просла́вим святы́я по́двиги его́ / и к нему́ возопии́м: / Кли́менте сла́вне, / моли́ Христа́ Бо́га / грехо́в оставле́ние дарова́ти / чту́щим любо́вию святу́ю па́мять твою́. [Два́жды.]

Пе́снь 4.

Ирмос: Седя́й в сла́ве на престо́ле Божества́ во о́блаце ле́гце, при́иде Иису́с Пребоже́ственный, Нетле́нною Дла́нию и спасе́ зову́щия: сла́ва, Христе́, си́ле Твое́й.

Припев: Святителю отче Клименте, моли Бога о нас.

Честна́я мирополо́жница святы́х моще́й твои́х де́моны прогоня́ет, стра́сти изцеля́ет неизце́льныя и многообра́зных избавля́ет обстоя́ний притека́ющия. Те́мже ве́рно тя́ сла́вим.

Припев: Святителю отче Клименте, моли Бога о нас.

И уме́рша тя́ почита́ем я́ко жи́ва, блаже́нне, неги́блемыя бо жи́зни но́сиши де́йство, я́ко чуде́с благода́ть прие́м, те́мже зове́м: сла́ва Облагодати́вшему тя́.

Припев: Святителю отче Клименте, моли Бога о нас.

Исто́чник изцеле́ний опису́ет еди́наго изцеле́ния де́йство на вся́кое ле́то, Кли́ментова же ра́ка неизче́тная мно́жества неду́гов вся́ческих прогоня́ет всегда́.

Сла́ва Отцу́ и Сы́ну и Свято́му Ду́ху:

Помышле́ньми согреша́ю всегда́, и словесы́, и дея́ньми, те́мже удали́хся от лица́ Твоего́, Го́споди. Но, обрати́в, спаси́ мя я́ко блу́днаго, непреста́нными Твоего́ святи́теля моли́твами.

И ны́не и при́сно и во ве́ки веко́в. Ами́нь.

Богоро́дичен: Непрело́жна Влады́ку родила́ еси́ пло́тию, Де́во, спасти́ восхоте́вшаго челове́ка. Те́мже к блу́дному житию́ отвраще́нна мя́ к покая́нию обрати́ предста́тельствы Твои́ми.

Пе́снь 5

Ирмос: Нечести́вии не у́зрят сла́вы Твоея́, Христе́, но мы́ Тя́, Единоро́дне, Оте́ческия сла́вы Сия́ние Божества́, от но́щи у́тренююще, воспева́ем Тя́, Человеколю́бче.

Припев: Святителю отче Клименте, моли Бога о нас.

Си́лою Ду́ха про́поведь твою́ посе́ял еси́ в слу́хи лю́бящих суету́, о́тче, и многопло́дный кла́с благочестия собра́л еси́.

Припев: Святителю отче Клименте, моли Бога о нас.

Умерщвле́ние изволя́я носи́ти Христо́во во пло́ти твое́й всегда́, жи́ва Сего́ в тебе́ име́л еси́, по Па́влу, Иже тя́ в зе́млю живы́х всели́.

Припев: Святителю отче Клименте, моли Бога о нас.

Гла́сы твои́х ра́б прие́мля, пребога́те, изба́ви на́с от вся́ких боле́зней, и обстоя́ний, и осужде́ния бу́дущаго моли́твами твои́ми.

Сла́ва Отцу́ и Сы́ну и Свято́му Ду́ху:

Изцеле́ний река́ сы́й, ди́вне, мои́х губи́тельных страсте́й тече́ние изсуши́ твои́ми моли́твами и сле́зными тече́нии ду́шу мою́ очи́сти.

И ны́не и при́сно и во ве́ки веко́в. Ами́нь.

Богоро́дичен: Ма́тернее приве́тствие с де́вством на Тебе́ сочета́ся, Чи́стая, Зижди́теля бо родила́ еси́ па́че разуме́ния. Те́мже, Матереде́ву Тя́ разуме́юще, сла́вим.

Пе́снь 6.

Ирмос: Пожру́ Ти со гла́сом хвале́ния, Го́споди, Це́рковь вопие́т Ти́, от бесо́вския кро́ве очи́щшися, ра́ди ми́лости от ре́бр Твои́х исте́кшею кро́вию.

Припев: Святителю отче Клименте, моли Бога о нас.

Восте́кл еси́, я́коже звезда́, осиява́я концы́ бо́лгарския и к све́ту богопозна́ния возставля́я стра́стне во тме́ неве́дения спя́щия.

Припев: Святителю отче Клименте, моли Бога о нас.

Нама́сти еле́ем твои́х заступле́ний главы́ окружа́ющих честну́ю ра́ку моще́й твои́х и почита́ющих честна́я твоя́ исправле́ния.

Припев: Святителю отче Клименте, моли Бога о нас.

Погуби́л еси́ ерети́ческое злоче́стие, на Ду́ха в высоту́ взе́млющее хуле́ние, держа́ву же благочести́вых догма́т укрепи́л еси́.

Сла́ва Отцу́ и Сы́ну и Свято́му Ду́ху:

Покажи́ мя превы́шша злоде́йства злосе́рдных, и́маши бо дерзнове́ние к Влады́це, святи́телю вели́кий, и бу́ди ми́ крепча́йшее прибе́жище.

И ны́не и при́сно и во ве́ки веко́в. Ами́нь.

Богоро́дичен: Ми́лостива соде́лай Сы́на Твоего́, Богома́ти, благоче́стно Тя́, Богоро́дицу, испове́дающим и пода́ждь на́м ми́лости Твоя́ пребога́тыя.

Конда́к святи́теля, гла́с 3. Подо́бен: Де́ва дне́сь.

Хра́м тво́й, свя́те, / врачевство́ духо́вное / пресла́вно показу́ется / ве́рно приступа́ющим: / все́х бо разли́чных боле́зней избавля́ет, / стра́сти же ду́ш вся́ческия усыпа́ет. / Сего́ ра́ди тя́, всеблаже́нне, / те́пла предста́теля имену́ем.

Икос:

Воспои́м вси́ ны́не бо́лгарских люде́й иера́рха, благогове́йно приступа́юще в хра́ме его́, и боже́ственную ра́ку моще́й его́ целу́им, к нему́ глаго́люще: о́тче богому́дре, ты́ еси́ па́стырь на́ш и учи́тель, ты́ гра́д и ро́д тво́й соблюда́ти не оскудева́й, на твоя́ бо приле́жныя моли́твы упова́юще, тя́, всеблаже́нне, те́пла предста́теля имену́ем.

Пе́снь 7.

Ирмос: Спасы́й во огни́ авраа́мския Твоя́ о́троки и халде́и уби́в, я́же Пра́вда пра́ведно уловля́ше, препе́тый Го́споди, Бо́же оте́ц на́ших, благослове́н еси́.

Припев: Святителю отче Клименте, моли Бога о нас.

От ве́ждей твои́х дрема́ние отря́сл еси́, бо́дрствуя в моли́твах, и неусы́пною стра́жею дале́че от па́ствы твоея́ губи́тели отгна́л еси́, вопия́: Бо́же оте́ц на́ших, благослове́н еси́.

Припев: Святителю отче Клименте, моли Бога о нас.

Апо́столов ли́к украша́еши я́ко све́тлый богоглаго́льник, страстоте́рпцев мно́жество восполня́еши я́ко без кро́ве му́ченик, свяще́нников собра́ние составля́еши я́ко знамено́сный святи́тель, вопия́: Бо́же оте́ц на́ших, благослове́н еси́.

Припев: Святителю отче Клименте, моли Бога о нас.

Не скры́ся от тебе́ и детовожде́ние младе́нцев, но и сия́ о́бразом письме́н соверша́л еси́, к благоче́стию вопию́щия: Бо́же оте́ц на́ших, благослове́н еси́.

Сла́ва Отцу́ и Сы́ну и Свято́му Ду́ху:

Лю́тыми страстьми́ неи́стовствующую ду́шу мою́, треблаже́нне, благи́ми дея́ньми лозу́ покажи́, до́брыя розги́ иму́щую и плоды́ нося́щую, вопию́щи: Бо́же оте́ц на́ших, благослове́н еси́.

И ны́не и при́сно и во ве́ки веко́в. Ами́нь.

Богоро́дичен: Сове́та вели́каго Ангела роди́ Отрокови́ца, Его́же я́ко Ангелов Творца́ и челове́ков Спаси́теля сла́вим, глаго́люще: Бо́же оте́ц на́ших, благослове́н еси́.

Пе́снь 8.

Ирмос: Ру́це распросте́р, Дании́л, льво́в зия́ния в ро́ве затче́; о́гненную же си́лу угаси́ша, доброде́телию препоя́савшеся, благоче́стия рачи́тели, о́троцы, взыва́юще: благослови́те, вся́ дела́ Госпо́дня, Го́спода.

Припев: Святителю отче Клименте, моли Бога о нас.

Пригвозди́в себе́ к па́че ума́ благи́м и презре́в ви́димая, вы́шше си́л твою́ жи́знь соблю́л еси́ и яви́лся еси́ честны́й сосу́д Ду́ха, воспева́я: благослови́те, вся́ дела́ Госпо́дня, Го́спода.

Припев: Святителю отче Клименте, моли Бога о нас.

Воды́ живы́я вожделе́в, я́ко еле́нь жа́ждущий, и напи́вся, исто́чник неистощи́мый бы́л еси́ догма́тов боже́ственных и чуде́с ужа́сных вопию́щим: благослови́те, вся́ дела́ Госпо́дня, Го́спода.

Сла́ва Отцу́ и Сы́ну и Свято́му Ду́ху:

Приста́нище бу́ди мне́, вла́ющемуся в пучи́не жите́йстей, и утиши́ искуше́ний свире́пыя во́лны призыва́ющему тя́, предста́теля, и воспева́ющему: благослови́те, вся́ дела́ Госпо́дня, Го́спода.

И ны́не и при́сно и во ве́ки веко́в. Ами́нь.

Богоро́дичен: Заре́ю те́плых Твои́х моле́ний просвети́ потемне́нную страстьми́ мою́ ду́шу, Благода́тная, и све́том покая́ния сы́на мя́ покажи́ Све́та Умнаго, вопию́ща: благослови́те, вся́ дела́ Госпо́дня, Го́спода.

Песнь 9

Ирмос: Ка́мень нерукосе́чный от несеко́мыя горы́, Тебе́, Де́во, краеуго́льный отсече́ся — Христо́с, совокупи́вый разстоя́щаяся естества́. Те́м, веселя́щеся, Тя́, Богоро́дице, велича́ем.

Припев: Святителю отче Клименте, моли Бога о нас.

Глаго́лы живота́ ве́чнаго вложи́в освяще́нному твоему́ ста́ду, треблаже́нне, и соверши́в е́ догма́тами благоче́стия, восте́кл еси́ в небе́сная селе́ния.

Припев: Святителю отче Клименте, моли Бога о нас.

Да лу́чшия сла́вы в вы́шних сподо́бишися, житие́ на земли́ показа́л еси́ вся́каго рабостра́стия свобо́дное. Те́мже и насле́дие име́л еси́ свобо́дныя митропо́лии.

Припев: Святителю отче Клименте, моли Бога о нас.

Горе́ тя́ Це́рковь перворо́дных весели́т, треблаже́нне, до́ле же тя́ прославля́ет чуде́с благода́ть, ю́же ти́ Бо́г дарова́, прославля́емый всегда́ во святы́х Свои́х.

Сла́ва Отцу́ и Сы́ну и Свято́му Ду́ху:

Тя́, Христо́ва иера́рха, свети́льника церко́внаго почита́юще, Кли́менте богоно́се, гла́сы пе́сненными мо́лим: не пре́зри, преподо́бне, ра́б твои́х моли́твы.

И ны́не и при́сно и во ве́ки веко́в. Ами́нь.

Богоро́дичен: Усты́, душе́ю и се́рдцем Тя́, Богоро́дицу, испове́дающих, Де́во, от бе́д изба́ви и вся́кия ско́рби, я́ко иму́щи дерзнове́ние ко из Тебе́ ро́ждшемуся Го́споду.

Свети́лен, гла́с 3. Подо́бен: Не́бо звезда́ми.

Якоже со́лнце, просвети́вый / Це́рковь твою́, му́дре, / чудеса́ источа́еши / во всю́ вселе́нную, / Кли́менте свяще́нне, / архиере́йская сла́во.

Молитва

О пречестна́я и свяще́нная главо́ и благода́ти Свята́го Ду́ха испо́лненная, Спа́сово со Отце́м обита́лище, вели́кий архиере́е, те́плый наш засту́пниче, святи́телю Кли́менте, предстоя́ у Престо́ла всех Царя́ и наслажда́яся све́та единосу́щныя Тро́ицы и херуви́мски со А́нгелы возглаша́я песнь трисвяту́ю, вели́кое же и неизсле́дованное дерзнове́ние име́я ко всеми́лостивому Влады́це, моли́ спасти́ся па́ствы Христо́вы лю́дем, благостоя́ние святы́х церкве́й утверди́: архиере́и благоле́пием святи́тельства украси́, мона́шествующыя к по́двигом до́браго тече́ния укрепи́, ца́рствующий град и вся гра́ды и страны до́бре сохрани́, и ве́ру святу́ю непоро́чну соблюсти́ умоли́, мир весь предста́тельством твои́м умири́, от гла́да и па́губы изба́ви ны, и от нападе́ния иноплеме́нных сохрани́, ста́рыя уте́ши, ю́ныя наста́ви, безу́мныя умудри́, вдови́цы поми́луй, си́роты заступи́, младе́нцы возрасти́, пле́нных возврати́, немощству́ющыя и моля́щияся тебе́ от всех напа́стей и бед хода́тайством твои́м свободи́: моли́ о нас Всеще́драго и Человеколюби́ваго Христа́ Бо́га на́шего, да и в день Стра́шнаго Прише́ствия Его́ от шу́ияго стоя́ния изба́вит нас, и ра́дости святы́х прича́стники сотвори́т со все́ми святы́ми во ве́ки веко́в. Ами́нь.