7 декабря

Канон мученику Меркурию Смоленскому, новому чудотворцу

Молитвы предначинательные

Моли́твами святы́х оте́ц на́ших, Го́споди Иису́се Христе́, Бо́же наш, поми́луй нас, ами́нь.

Сла́ва Тебе́, Бо́же наш, сла́ва Тебе́.

Царю́ Небе́сный, Уте́шителю, Ду́ше и́стины, И́же везде́ сый и вся исполня́яй, Сокро́вище благи́х и жи́зни Пода́телю, прииди́ и всели́ся в ны, и очи́сти ны от вся́кия скве́рны, и спаси́, Бла́же, ду́ши на́ша.

Святы́й Бо́же, Святы́й Кре́пкий, Святы́й Безсме́ртный, поми́луй нас. Трижды.

Сла́ва Отцу́ и Сы́ну и Свято́му Ду́ху, и ны́не и при́сно и во ве́ки веко́в. Ами́нь.

Пресвята́я Тро́ице, поми́луй нас; Го́споди, очи́сти грехи́ на́ша; Влады́ко, прости́ беззако́ния на́ша; Святы́й, посети́ и исцели́ не́мощи на́ша, и́мене Твоего́ ра́ди.

Го́споди, поми́луй, трижды.

Сла́ва Отцу́ и Сы́ну и Свято́му Ду́ху, и ны́не и при́сно и во ве́ки веко́в. Ами́нь.

О́тче наш, И́же еси́ на Небесе́х, да святи́тся и́мя Твое́, да прии́дет Ца́рствие Твое́, да бу́дет во́ля Твоя́, я́ко на Небеси́ и на земли́. Хлеб наш насу́щный да́ждь нам днесь; и оста́ви нам до́лги на́ша, я́коже и мы оставля́ем должнико́м на́шим; и не введи́ нас во искуше́ние, но изба́ви нас от лука́ваго.

Го́споди, поми́луй, 12,

Прииди́те, поклони́мся Царе́ви на́шему Бо́гу.

Прииди́те, поклони́мся и припаде́м Христу́, Царе́ви на́шему Бо́гу.

Прииди́те, поклони́мся и припаде́м Самому́ Христу́, Царе́ви и Бо́гу на́шему.

Псалом 50:

Поми́луй мя, Бо́же, по вели́цей ми́лости Твое́й, и по мно́жеству щедро́т Твои́х очи́сти беззако́ние мое́. Наипа́че омы́й мя от беззако́ния моего́, и от греха́ моего́ очи́сти мя; я́ко беззако́ние мое́ аз зна́ю, и грех мой предо мно́ю есть вы́ну. Тебе́ Еди́ному согреши́х и лука́вое пред Тобо́ю сотвори́х, я́ко да оправди́шися во словесе́х Твои́х, и победи́ши внегда́ суди́ти Ти. Се бо, в беззако́ниях зача́т есмь, и во гресе́х роди́ мя ма́ти моя́. Се бо, и́стину возлюби́л еси́; безве́стная и та́йная прему́дрости Твоея́ яви́л ми еси́. Окропи́ши мя иссо́пом, и очи́щуся; омы́еши мя, и па́че сне́га убелю́ся. Слу́ху моему́ да́си ра́дость и весе́лие; возра́дуются ко́сти смире́нныя. Отврати́ лице́ Твое́ от грех мои́х и вся беззако́ния моя́ очи́сти. Се́рдце чи́сто сози́жди во мне, Бо́же, и дух прав обнови́ во утро́бе мое́й. Не отве́ржи мене́ от лица́ Твоего́ и Ду́ха Твоего́ Свята́го не отыми́ от мене́. Возда́ждь ми ра́дость спасе́ния Твоего́ и Ду́хом Влады́чним утверди́ мя. Научу́ беззако́ныя путе́м Твои́м, и нечести́вии к Тебе́ обратя́тся. Изба́ви мя от крове́й, Бо́же, Бо́же спасе́ния моего́; возра́дуется язы́к мой пра́вде Твое́й. Го́споди, устне́ мои́ отве́рзеши, и уста́ моя́ возвестя́т хвалу́ Твою́. Я́ко а́ще бы восхоте́л еси́ же́ртвы, дал бых у́бо: всесожже́ния не благоволи́ши. Же́ртва Бо́гу дух сокруше́н; се́рдце сокруше́нно и смире́нно Бог не уничижи́т. Ублажи́, Го́споди, благоволе́нием Твои́м Сио́на, и да сози́ждутся сте́ны Иерусали́мския. Тогда́ благоволи́ши же́ртву пра́вды, возноше́ние и всесожега́емая; тогда́ возложа́т на oлта́рь Твой тельцы́.

Тропа́рь, гла́с 4:

Му́ченик Тво́й, Го́споди, Мерку́рий во страда́нии свое́м вене́ц прия́т нетле́нный от Тебе́, Бо́га на́шего: име́яй бо кре́пость Твою́, мучи́телей низложи́, сокруши́ и де́монов немощны́я де́рзости. Того́ моли́твами спаси́ ду́ши на́ша.

Тропарь мученика Меркурия Смоленского, глас 2

Возсияв, яко звезда многосветлая,/ в соборней церкви пред пречистым и чудотворным образом Пречистей Богородицы,/ за Нюже и за град Смоленск пострада,/ многокозненнаго и богомерзкаго царя Батыя устраши,/ и сильнаго исполина победи, и люди удиви,/ душу свою, многострадальне Меркурие, за благочестие положи,/ яко Захариина и Авелева ясно вопиет твоя кровь ко Господу./ И ныне молися за души наша.

Кано́н свята́го, гла́с 8.

Пе́снь 1.

Ирмос: Посе́ченый несеко́маго пресече́, и ви́де со́лнце зе́млю, ю́же не ви́де, лю́таго врага́ вода́ потопи́, и непроходи́мое про́йде Изра́иль. Пе́снь же воспева́шеся: Го́сподеви пои́м, сла́вно бо просла́вися.

Припев: Святый мучениче Меркурие, моли Бога о нас.

От вы́шних повеле́ний, свя́те, во́инствуеши, с вы́шними ли́ки предстои́ши благи́х Исто́чнику и ра́дости Боже́ственнаго наслажде́ния, приснопа́мятне, наслажда́ешися, сохраня́й тве́рде гра́д, в не́мже соверша́ют, сла́вне, па́мять твою́, Го́сподеви пою́ще: сла́вно бо просла́вися.

Припев: Святый мучениче Меркурие, моли Бога о нас.

По́двиг тво́й ре́вности свиде́тельствова, му́дре, си́лою укрепля́емь Христо́вою, и проти́в ра́тник исхо́диши, и, ра́дуяся, претерпе́л еси́ главы́ твоея́ отсече́ние, и вопия́ше сла́вно повеле́нием ея́.

Сла́ва Отцу́ и Сы́ну и Свято́му Ду́ху:

Стра́ж гра́ду яви́лся еси́, и мучи́теля я́ве укроти́л еси́, и боле́зненное от ни́х виде́ние, веселя́ся, претерпе́л еси́, Мерку́рие, вопия́ и моля́ся к Посла́вшей тя́: Го́сподеви пои́м, сла́вно бо просла́вися.

И ны́не и при́сно и во ве́ки веко́в. Ами́нь.

Богоро́дичен: Якоже и в Кесари́и равноименова́нное тебе́ прие́млеши су́ще зва́ние, та́кожде и зде́ изво́ли благочести́вая Цари́ца, посыла́ет тя́, Мерку́рие, Богоро́дица, му́чениче. К То́й помоли́ся о мне́, окая́ннем, ми́лостива обрести́ на стра́шнем суде́ Сы́на Ея́.

Пе́снь 3.

Ирмос: Утверже́й в нача́ле небеса́ ра́зумом и зе́млю на вода́х основа́вый, на ка́мени мя́, Христе́, за́поведей Твои́х утверди́, я́ко не́сть свя́т, па́че Тебе́, еди́не Человеколю́бче.

Припев: Святый мучениче Меркурие, моли Бога о нас.

От младе́нства вво́инился еси́ Христу́, ро́д и бога́тство оте́чества оста́вль, и ве́сь разжига́емь Боже́ственною любо́вию, и от Того́ Ро́ждшия, сла́вне, стра́ж гра́ду Ея́ посла́лся еси́.

Припев: Святый мучениче Меркурие, моли Бога о нас.

Воспое́м Го́спода и с ро́ждшею Его́ Богома́терию, пода́вшаго стра́жа тве́рда гра́ду на́шему, во́ина до́бляго Мерку́рия и чуде́с испо́лненнаго.

Сла́ва Отцу́ и Сы́ну и Свято́му Ду́ху:

Десни́цею укрепля́емь Влады́чнею, вра́жие па́губное наше́ствие победи́л еси́, я́ко до́бр страда́лец, богому́дре, за хра́м Богоро́дицы и за благове́рие.

И ны́не и при́сно и во ве́ки веко́в. Ами́нь.

Богоро́дичен: О, Го́спода моего́ Ма́ти! Ты́ наде́жда отча́янных и помо́щница все́м гре́шником! Не пре́зри, ми́лостивая Цари́це, мене́, окая́ннаго лю́те и пребезме́рно согреши́вшаго, па́че челове́ческаго естества́.

Седа́лен Мерку́рия, гла́с 4. Подо́бен: Ско́ро предвари́.

Ри́млянин ро́дом сы́й, но ве́рою благове́рною огражде́н, а не полуве́рием боля́й, но уго́дник Бо́гу бы́сть и Того́ Ро́ждшей. Льсти́ваго ра́тника посрами́, исполи́на с сы́ном порази́, и вене́чник Христо́в яви́ся, и сла́вы ра́достныя причасти́ся. Сего́ ра́ди свяще́нную его́ па́мять пра́зднуем ны́не.

Сла́ва, и ны́не, Богоро́дичен:

Дании́л Тя́ го́ру ве́лию нарече́, и́н же́зл и катапета́сму, Иезеки́иль же две́рь, е́юже про́йде Христо́с Бо́г, Богоро́дице, не пре́зри, Ми́лостивая, но приими́ мои́х скве́рных окая́нных усте́н моле́ние и ту́не покажи́, Госпоже́, Твою́ ми́лость на мне́, многогре́шнем.

Пе́снь 4.

Ирмос: Услы́шах, Го́споди, слу́х Тво́й и убоя́хся, я́ко неизрече́нным сове́том, Бо́г сы́й присносу́щный от Де́вы проше́л еси́, вопло́щся. Сла́ва снизхожде́нию Твоему́, Христе́, сла́ва си́ле Твое́й.

Припев: Святый мучениче Меркурие, моли Бога о нас.

Якоже и во свое́м оте́честве присво́ился еси́ любе́зне Зижди́телю, и све́тлый вене́ц от Него́ восприя́л еси́, и во́инствовал еси́ по благове́рии, я́ко непобеди́мь, свя́те Мерку́рие, помоли́ся, от Него́же получи́л еси́ дерзнове́ние, о мне́, окая́ннем, да получу́ ми́лость.

Припев: Святый мучениче Меркурие, моли Бога о нас.

Истка́ себе́ порфи́ру благоче́стия па́че оте́ц свои́х, в ню́же обо́лкся, и во́ин кре́пок показа́ся, и ме́ртвости совлече́ ри́зу неве́рия, и поя́ше: сла́ва си́ле Твое́й, Го́споди.

Сла́ва Отцу́ и Сы́ну и Свято́му Ду́ху:

Да́же до кро́ве ста́в, подвиза́лся еси́, побежда́я проти́вныя ра́тники, победоно́сец показа́лся еси́ и вы́шния сла́вы сподо́бився, Мерку́рие.

И ны́не и при́сно и во ве́ки веко́в. Ами́нь.

Богоро́дичен: Якоже до́ждь на руно́ сни́де, та́коже в Твою́ пречи́стую утро́бу Сло́во спаси́тельное сни́де, Присноде́во, Ты́ же, Богоро́дице, я́ко ту́ча, изсуши́ мно́гих мои́х зо́л бре́мя.

Пе́снь 5

Ирмос: Вску́ю мя́ отри́нул еси́ от лица́ Твоего́, Све́те незаходи́мый, и покры́ла мя́ е́сть чужда́я тма́ окая́ннаго? Но обрати́ мя, и к све́ту за́поведей Твои́х пути́ моя́ напра́ви, молю́ся.

Припев: Святый мучениче Меркурие, моли Бога о нас.

Распросте́р ру́це протя́г злы́й ва́рварин, хотя́ внеза́пу наити́ на гра́д и хра́м Богоро́дицы, ты́ же, неосла́бно просте́р твоя́ со ору́жием святы́я ру́ки, изше́л еси́, и победи́л еси́ проти́вника, и отту́ду венча́лся еси́.

Припев: Святый мучениче Меркурие, моли Бога о нас.

Иже со́лнцу и огню́ служа́, прии́де, ты́ же, свя́те, Христу́ и Того́ Ма́тери служа́, изше́л еси́, и того́ си́лу пресе́кл еси́, и гра́д свободи́л еси́, и са́м от Христа́ просла́вился еси́.

Сла́ва Отцу́ и Сы́ну и Свято́му Ду́ху:

Прича́стник страсте́й Влады́чних яви́ся Мерку́рий, и сла́вы Того́ прио́бщник бы́в, и Того́ Боже́ственную све́тлость насле́дова.

И ны́не и при́сно и во ве́ки веко́в. Ами́нь.

Богоро́дичен: Умертви́, о Де́во, живу́щий во мне́ гре́х, Жи́знь ро́ждшая и Умертви́вшаго сме́рть.

Пе́снь 6.

Ирмос: Моли́тву пролию́ ко Го́споду и Тому́ возвещу́ печа́ли моя́, я́ко зо́л душа́ моя́ испо́лнися и живо́т мо́й а́ду прибли́жися, и молю́ся, я́ко Ио́на: от тли́, Бо́же, возведи́ мя.

Припев: Святый мучениче Меркурие, моли Бога о нас.

Вжиля́ше тя́ присносу́щное от высоты́, Мерку́рие, зва́ние всеви́дящее, и слуга́ церко́вный, му́дре, уве́ри тя́, я́коже Ангел, повелева́ше ти́ дерза́ти и ника́коже устраши́тися ва́рварска наше́ствия.

Припев: Святый мучениче Меркурие, моли Бога о нас.

Умерщвле́н бы́сть зми́й вселука́вый, и не сбы́стся злохи́трие его́, но нога́ми попра́ся кра́сными до́бляго во́ина и ору́жника Христо́ва Мерку́рия, вше́д бо, победи́ пога́нина.

Сла́ва Отцу́ и Сы́ну и Свято́му Ду́ху:

Всесоверше́нно Влады́це прине́сл еси́ серде́чное изволе́ние, му́чениче, и того́ ра́ди изше́л еси́ проти́во ра́ти пога́нских си́л, и победи́тель ве́лий показа́лся еси́, и ны́не на небеси́ предстои́ши, Мерку́рие.

И ны́не и при́сно и во ве́ки веко́в. Ами́нь.

Богоро́дичен: Зача́тие неизрече́нно, рождество́ неизглаго́ланно, Отрокови́це, я́ко Бо́га ражда́еши пло́тию. Уми́лостивися о мне́ окая́ннем, да улучу́ и а́з, лише́нный, заступле́ние Твое́.

Конда́к, гла́с 4:

Яви́ся во бране́х непобеди́мь во́ин, от ри́млян ро́дом, сыновство́ име́ гра́да Смоле́нска, я́ко бо си́х ра́ди нарече́ся, я́ко от Богоро́дицы стра́ж кре́пок посла́ся гра́ду, пе́сньми Мерку́рия ублажи́м, пра́зднующе ве́село па́мять его́, я́ко да изба́вит гра́д на́ш от беды́ ра́тник.

Икос:

Горды́ню низложи́в льсти́ваго мучи́теля, на правосла́вие вознося́щагося нечести́ваго, и до конца́ сего́ лю́таго зми́я главу́ отсе́кл еси́, свя́те Мерку́рие, и пу́ста его́ сотво́рь, и па́мять его́ с шу́мом бы́сть: ты́ бо исхо́диши на предгра́дие еди́н бра́тися с ты́сящами безбо́жных ва́рвар. Яко бо от высоты́ име́я повеле́ние, наде́жду и упова́ние от Самы́я Госпожи́ и Богоро́дицы, заступа́ющия и помога́ющия тебе́. Тоя́ же посо́бием непобеди́мым и ра́тника злоко́зненнаго кре́пко удави́л еси́, и мно́жество си́л его́ победи́л еси́, и сама́го мучи́теля посрами́л еси́. Те́мже, кре́пкий Христо́в во́ине, зове́м ти́ ра́достно и ве́село пра́зднуем па́мять твою́: я́ко да изба́виши гра́д на́ш от беды́ ра́тник.

Пе́снь 7.

Ирмос: Отроцы евре́йстии в пещи́ попра́ша пла́мень дерзнове́нно и на ро́су о́гнь преложи́ша, вопию́ще: благослове́н еси́, Го́споди Бо́же, во ве́ки.

Припев: Святый мучениче Меркурие, моли Бога о нас.

Све́том вы́шняго сия́ния озаря́емь, до́блий во́ине, воспева́ющия ны́не па́мять твою́ просвети́, пою́щия: благослове́н Бо́г оте́ц на́ших.

Припев: Святый мучениче Меркурие, моли Бога о нас.

Воспева́л еси́ все́х Благоде́теля, распаля́яся, и, изше́д на побежде́ние ра́тников, огня́ ре́вностию, блаже́нне, жего́мь, и поя́: благослове́н еси́, Го́споди Бо́же оте́ц на́ших.

Припев: Святый мучениче Меркурие, моли Бога о нас.

В кро́ви проти́ву ста́л еси́ беззако́нных ополче́ния, свя́те, ка́мению и огню́ кла́няющихся. Ты́ же, к Ка́мени — Христу́ вопия́, си́х победи́л еси́, поя́: благослове́н еси́, Го́споди Бо́же оте́ц на́ших.

Сла́ва Отцу́ и Сы́ну и Свято́му Ду́ху:

Зе́млю обагри́в, блаже́нне Мерку́рие, кро́вию твое́ю, Влады́ки Человеколю́бца жела́я о́бщник Того́ бы́ти, поя́: благослове́н еси́, Го́споди Бо́же оте́ц на́ших.

И ны́не и при́сно и во ве́ки веко́в. Ами́нь.

Богоро́дичен: Чи́ни Ангельстии удивля́ются та́инства Твоего́ глубине́, Богоро́дице, Бо́г бо, из Тебе́ воплоще́н, яви́ся, Его́же похва́лим: Бо́же, благослове́н еси́.

Пе́снь 8.

Ирмос: Седмери́цею пе́щь халде́йский мучи́тель богочести́вым неи́стовно разжже́, си́лою же лу́чшею спасе́ны сия́ ви́дев, Творцу́ и Изба́вителю вопия́ше: о́троцы, благослови́те, свяще́нницы, воспо́йте, лю́дие, превозноси́те во вся́ ве́ки.

Припев: Святый мучениче Меркурие, моли Бога о нас.

Благоче́стно и му́дренно по́двиг тво́й, сла́вне, соверши́л еси́ и доблему́дренно враги́ твоя́ победи́л еси́, я́ко бо дарова́ся тебе́, свя́тче, побе́да небе́сная. Те́мже воспе́л еси́: свяще́нницы, воспо́йте, лю́дие, превозноси́те Го́спода во ве́ки.

Сла́ва Отцу́ и Сы́ну и Свято́му Ду́ху:

Сконча́вся, свя́те, от исполи́на, Мерку́рие, мече́м бо отсече́ главу́ твою́, и отту́ду получи́л еси́ жела́емаго тобо́ю венца́ и зе́млю кро́вию от твои́х уде́с истече́нием напои́л еси́, поя́: свяще́нницы, воспо́йте, лю́дие, превозноси́те Го́спода во ве́ки.

И ны́не и при́сно и во ве́ки веко́в. Ами́нь.

Богоро́дичен: Яко на́шего существа́ поновле́ние, Пречи́стая, вси́ вино́вну, ве́рнии, пое́м Тя́: Бо́га бо па́че сло́ва родила́ еси́, еди́на па́че земноро́дных. Твои́м благоутро́бием и на́с озари́, пою́щих Тя́.

Песнь 9

Ирмос: Ужасе́ся о се́м не́бо, и земли́ удиви́шася концы́, я́ко Бо́г яви́ся челове́ком пло́тски и чре́во Твое́ бы́сть простра́ннейшее небе́с. Те́м Тя́, Богоро́дицу, Ангелов и челове́к чинонача́лия велича́ют.

Припев: Святый мучениче Меркурие, моли Бога о нас.

Гно́еве му́ченчестии благово́ние ны́не испуща́ют благода́тное, смра́дныя на́ша стра́сти исцелева́ют, источа́ют бо святы́я и́х мо́щи целе́бныя во́ды и напоя́ют ду́ши пою́щих те́х чудодея́ние.

Припев: Святый мучениче Меркурие, моли Бога о нас.

Яко вели́ка столпа́ и тве́рдо забра́ло дарова́ тя Христо́с, Мерку́рие, гра́ду сему́, иде́же ны́не то́чиши чуде́с струю́ и помога́еши побе́дою на пога́ныя.

Сла́ва Отцу́ и Сы́ну и Свято́му Ду́ху:

Спомо́щника име́яху вси́ гра́ждане, страстоте́рпче Христо́в до́блественный, копие́ и щи́т тво́й вы́ну вели́кое посо́бие иму́ще, тя́ велича́ют, Христа́ Бо́га сла́вяще, венча́вшаго тя́.

И ны́не и при́сно и во ве́ки веко́в. Ами́нь.

Богоро́дичен: Просвети́, две́ре Све́та, омраче́нную ду́шу мою́ страстьми́ и лука́выми по́мыслы очерне́вшую и бе́дствующую, и изба́ви искуше́ний, и бе́д, и скорбе́й, да сла́влю Тя́, упова́ние ве́рных и утвержде́ние.

Свети́лен. Подо́бен: Ду́хом во святи́лищи.

Жениху́ свещу́ соблю́л еси́, жестоку́ стезю́ ше́ствовал еси́, в Боже́ственныя стези́ вше́д, и к простра́нству ра́йскому чи́стою пло́тию дости́гл еси́, и све́тло от Святы́я Тро́ицы венча́лся еси́; чту́щия тя́ помяни́, свя́те Мерку́рие.

Молитва

О святы́й уго́дниче Бо́жий, му́чениче Меркурие! По́двигом до́брым подвиза́вся на земли́, восприя́л еси́ на Небесе́х вене́ц пра́вды, его́же угото́вал есть Госпо́дь всем лю́бящим Его́. Те́мже взира́юще на святы́й твой о́браз, ра́дуемся о пресла́внем сконча́нии жи́тельства твоего́ и чтим святу́ю па́мять твою́. Ты же, предстоя́ Престо́лу Бо́жию, приими́ моле́ния на́ша и ко Всеми́лостивому Бо́гу принеси́, о е́же прости́ти нам вся́кое прегреше́ние и помощи́ нам ста́ти проти́ву ко́знем диа́вольским, да изба́вльшеся от скорбе́й, боле́зней, бед и напа́стей и вся́каго зла, благоче́стно и пра́ведно поживе́м в ны́нешнем ве́це и сподо́бимся предста́тельством твои́м, а́ще и недосто́йни есмы́, ви́дети блага́я на земли́ живы́х, сла́вяще Еди́наго во святы́х Свои́х сла́вимаго Бо́га, Отца́ и Сы́на и Свята́го Ду́ха, ны́не и во ве́ки веко́в. Ами́нь.