24 декабря

Канон преподобному Никону Сухому, Печерскому

Молитвы предначинательные

Моли́твами святы́х оте́ц на́ших, Го́споди Иису́се Христе́, Бо́же наш, поми́луй нас, ами́нь.

Сла́ва Тебе́, Бо́же наш, сла́ва Тебе́.

Царю́ Небе́сный, Уте́шителю, Ду́ше и́стины, И́же везде́ сый и вся исполня́яй, Сокро́вище благи́х и жи́зни Пода́телю, прииди́ и всели́ся в ны, и очи́сти ны от вся́кия скве́рны, и спаси́, Бла́же, ду́ши на́ша.

Святы́й Бо́же, Святы́й Кре́пкий, Святы́й Безсме́ртный, поми́луй нас. Трижды.

Сла́ва Отцу́ и Сы́ну и Свято́му Ду́ху, и ны́не и при́сно и во ве́ки веко́в. Ами́нь.

Пресвята́я Тро́ице, поми́луй нас; Го́споди, очи́сти грехи́ на́ша; Влады́ко, прости́ беззако́ния на́ша; Святы́й, посети́ и исцели́ не́мощи на́ша, и́мене Твоего́ ра́ди.

Го́споди, поми́луй, трижды.

Сла́ва Отцу́ и Сы́ну и Свято́му Ду́ху, и ны́не и при́сно и во ве́ки веко́в. Ами́нь.

О́тче наш, И́же еси́ на Небесе́х, да святи́тся и́мя Твое́, да прии́дет Ца́рствие Твое́, да бу́дет во́ля Твоя́, я́ко на Небеси́ и на земли́. Хлеб наш насу́щный да́ждь нам днесь; и оста́ви нам до́лги на́ша, я́коже и мы оставля́ем должнико́м на́шим; и не введи́ нас во искуше́ние, но изба́ви нас от лука́ваго.

Го́споди, поми́луй, 12,

Прииди́те, поклони́мся Царе́ви на́шему Бо́гу.

Прииди́те, поклони́мся и припаде́м Христу́, Царе́ви на́шему Бо́гу.

Прииди́те, поклони́мся и припаде́м Самому́ Христу́, Царе́ви и Бо́гу на́шему.

Псалом 50:

Поми́луй мя, Бо́же, по вели́цей ми́лости Твое́й, и по мно́жеству щедро́т Твои́х очи́сти беззако́ние мое́. Наипа́че омы́й мя от беззако́ния моего́, и от греха́ моего́ очи́сти мя; я́ко беззако́ние мое́ аз зна́ю, и грех мой предо мно́ю есть вы́ну. Тебе́ Еди́ному согреши́х и лука́вое пред Тобо́ю сотвори́х, я́ко да оправди́шися во словесе́х Твои́х, и победи́ши внегда́ суди́ти Ти. Се бо, в беззако́ниях зача́т есмь, и во гресе́х роди́ мя ма́ти моя́. Се бо, и́стину возлюби́л еси́; безве́стная и та́йная прему́дрости Твоея́ яви́л ми еси́. Окропи́ши мя иссо́пом, и очи́щуся; омы́еши мя, и па́че сне́га убелю́ся. Слу́ху моему́ да́си ра́дость и весе́лие; возра́дуются ко́сти смире́нныя. Отврати́ лице́ Твое́ от грех мои́х и вся беззако́ния моя́ очи́сти. Се́рдце чи́сто сози́жди во мне, Бо́же, и дух прав обнови́ во утро́бе мое́й. Не отве́ржи мене́ от лица́ Твоего́ и Ду́ха Твоего́ Свята́го не отыми́ от мене́. Возда́ждь ми ра́дость спасе́ния Твоего́ и Ду́хом Влады́чним утверди́ мя. Научу́ беззако́ныя путе́м Твои́м, и нечести́вии к Тебе́ обратя́тся. Изба́ви мя от крове́й, Бо́же, Бо́же спасе́ния моего́; возра́дуется язы́к мой пра́вде Твое́й. Го́споди, устне́ мои́ отве́рзеши, и уста́ моя́ возвестя́т хвалу́ Твою́. Я́ко а́ще бы восхоте́л еси́ же́ртвы, дал бых у́бо: всесожже́ния не благоволи́ши. Же́ртва Бо́гу дух сокруше́н; се́рдце сокруше́нно и смире́нно Бог не уничижи́т. Ублажи́, Го́споди, благоволе́нием Твои́м Сио́на, и да сози́ждутся сте́ны Иерусали́мския. Тогда́ благоволи́ши же́ртву пра́вды, возноше́ние и всесожега́емая; тогда́ возложа́т на oлта́рь Твой тельцы́.

Тропа́рь, гла́с 8:

Бо́га Блага́го возлюби́в, и́ноческое прия́л еси́ житие́ и, до́бре в не́м подвиза́вся, плене́н бы́л еси́ по́ловцы, и́миже мно́го му́чимь, крепкоду́шне Ни́коне, благода́тию Христо́вою свободи́лся еси́ от ни́х неви́димо, и ны́не во све́те пребыва́я непристу́пнем, моли́ спасти́ся на́м, твою́ па́мять почита́ющим.

Кано́н свято́му, гла́с 4.

Пе́снь 1.

Ирмос: Воспою́ Тебе́, Го́споди Бо́же мо́й, я́ко изве́л еси́ лю́ди из рабо́ты еги́петския, покры́л же еси́ колесни́цы фарао́новы и си́лу.

Припев: Преподобне отче Никоне, моли Бога о нас.

Воспе́ти ми́ всечестну́ю па́мять преподо́бнаго Твоего́ спосо́бствуй, Го́споди Бо́же мо́й, и песносло́вии почти́ти Ни́кона сла́внаго, посли́ Паракли́та Пресвята́го, да, бо́дростию препоя́сан, пе́снь Тебе́ принесу́, подаю́щему все́м си́лу.

Припев: Преподобне отче Никоне, моли Бога о нас.

Кто́ тя́ досто́йно восхва́лит, о́тче блаже́ннейший, от ю́ности возлюби́вшаго Го́спода своего́ и Тому́ во́льною нището́ю после́довавшего да́же до сме́рти? Те́м ны́не, живы́й со Ангелы, моли́ и на́м посла́ти к терпе́нию си́лу.

Сла́ва Отцу́ и Сы́ну и Свято́му Ду́ху:

Тму́ и мра́к любостра́стнаго ми́ра любо́вию ко Христу́ пыла́ющею непреткнове́нно преше́д и све́тлости Ангельскаго о́браза приче́тся, а́ки вне́ пло́ти бы́л еси́, сего́ ра́ди пое́ши Пода́вшему ти́ си́лу.

И ны́не и при́сно и во ве́ки веко́в. Ами́нь.

Богоро́дичен: Тму́, ослепи́вшую страстьми́ мы́сленныя ми́ о́чи, молю́ся, прожени́, Чи́стая Де́во: Ты́ бо еси́ светоприе́мная свеща́ во тме́ су́щим, огне́м возжже́нная невеще́ственным, и наставля́еши на ра́зум Боже́ственный пою́щих: ра́дуйся, Свети́ло Незаходи́маго Све́та.

Пе́снь 3.

Ирмос: Яко непло́ды, роди́ от язы́к Це́рковь, и мно́гое в ча́дех изнемо́же со́нмище, чу́дному Бо́гу на́шему возопии́м: Свя́т еси́, Го́споди.

Припев: Преподобне отче Никоне, моли Бога о нас.

Яко непло́ды ра́дуется, прие́мшая во утро́бе, та́ко весели́тся Пече́рская гора́, стяжа́вшая тя́ свети́льника преподо́бным, и с и́ноческими чи́нми пое́т: Свя́т еси́, Го́споди.

Припев: Преподобне отче Никоне, моли Бога о нас.

Пе́рвым отце́м подража́я, ра́достию кре́ст возложи́в на ра́мо, Ни́коне сла́вне, того́ великоду́шне носи́л еси́ да́же до сме́рти, любве́ ра́ди Го́спода своего́, Ему́же пое́ши ны́не: Свя́т еси́, Го́споди.

Сла́ва Отцу́ и Сы́ну и Свято́му Ду́ху:

Кре́пкия ве́ры щито́м воору́жся, ше́л еси́ в пле́н, преподо́бне, и плени́ти хотя́щаго врага́ та́мо в развраще́ние великоду́шием связа́л еси́, наступи́в ного́ю, укрепля́ющему же тя́ Бо́гу воспе́л еси́: Свя́т еси́, Го́споди.

И ны́не и при́сно и во ве́ки веко́в. Ами́нь.

Богоро́дичен: Кре́постию страсте́й востаю́щаго на мя́ врага́ не моги́й одоле́ти, к Тебе́ прибега́ю, Ма́ти Бо́жия, помози́ ми, Ты́ бо еси́ сто́лп кре́пкий, ору́жие на бра́ни и непреобори́мая Воево́да.

Седа́лен, гла́с 8:

Ни́ву души́ своея́ хотя́ возде́лати, кре́ст, а́ки яре́м, во́льнаго терпе́ния возложи́л еси́ на ся́, и си́м, а́ки ра́лом, возде́лал еси́ непло́дствующую страсте́й зе́млю, се́яв слеза́ми, мета́ющи се́мя по́стнических трудо́в, из ни́хже ны́не ра́достныя пожина́еши рукоя́ти, предстоя́ Христу́ Бо́гу, Его́же моли́, Ни́коне сла́вне, я́ко при́сно сы́й моли́твенник о блажа́щих любо́вию святу́ю па́мять твою́.

Сла́ва, и ны́не, Богоро́дичен:

Ра́дуйся, неора́нная Ни́во, возрасти́вшая Кла́с несе́янный, из Него́же хле́б спаси́тельный ми́ру сотвори́ся, си́м напита́й ду́ши любо́вию чту́щих непоро́чное зача́тие Твое́, Чи́стая Де́во.

Пе́снь 4.

Ирмос: Любве́ ра́ди, Ще́дре, Твоего́ о́браза на Кресте́ Твое́м ста́л еси́, и раста́яшася язы́цы: Ты́ бо еси́, Человеколю́бче, кре́пость моя́ и хвале́ние.

Припев: Преподобне отче Никоне, моли Бога о нас.

Любо́вь твоя́ бы́сть, о́тче, крепка́ к Бо́гу, за Него́же страда́ти от неве́рных жела́я, ника́коже искупле́н бы́ти восхоте́л еси́, возлюби́в бо возлюби́вшаго тя́ Го́спода, и на Того́ наде́яся, взыва́л еси́: Свя́т еси́, Го́споди.

Припев: Преподобне отче Никоне, моли Бога о нас.

Наказа́ние Госпо́дне прие́мь любе́зно, сла́дце искуше́ние боле́зней преше́л еси́, блаже́нне, глаго́ля с Дави́дом: блаже́н челове́к, его́же нака́жеши, Го́споди, те́м и зову́ Ти́: сла́ва си́ле Твое́й, Го́споди.

Сла́ва Отцу́ и Сы́ну и Свято́му Ду́ху:

На бу́дущая взира́я, настоя́щия боле́зни ни во что́ же вмени́л еси́, Ни́коне чу́дне, а́ще и о́гнь, и мра́з, и желе́зо прирази́шася тебе́, но вся́ сия́ истаева́ху, ты́ же, а́ки адама́нт кре́пкий, пребы́л, реки́й: Свя́т еси́, Го́споди.

И ны́не и при́сно и во ве́ки веко́в. Ами́нь.

Богоро́дичен: На бу́дущая не взира́я, прильпе́ земли́ душа́ моя́ и уподо́бихся ското́м несмы́сленным, но Ты́, Чи́стая Де́во, отве́рзи ми́ мы́сленныя о́чи и удиви́ ми́лость Твою́ на мне́, да, разуме́я, вопию́: свята́ еси́ и ди́вна в пра́вду.

Пе́снь 5

Ирмос: Ты́, Го́споди мо́й, Све́т в ми́р прише́л еси́, Све́т Святы́й, обраща́яй из мра́чна неве́дения, ве́рою воспева́ющия Тя́.

Припев: Преподобне отче Никоне, моли Бога о нас.

Ты́, о́тче, вся́чески от неве́рных озлобля́емь, неради́л еси́ о се́м, но, благода́рственная возсыла́я Бо́гу, глаго́лал еси́: спаси́ мя, Бо́же, я́ко внидо́ша во́ды до души́ моея́, Ты́ бо Еди́н еси́, изводя́й окова́нныя му́жеством, ве́рою воспева́ющия Тя́.

Припев: Преподобне отче Никоне, моли Бога о нас.

Терпе́ние твое́, преблаже́нне, смути́ плени́вшаго тя́ по́ловчанина, сего́ ра́ди три́ ле́та пребы́сть, му́ча тя́ на вся́к де́нь, озлобля́ющи гла́дом, жа́ждою, сту́дению и ва́ром, но ты́, свя́те, наде́жду име́л на Бо́га, я́ко То́й избавля́ет ве́рою воспева́ющия Его́.

Сла́ва Отцу́ и Сы́ну и Свято́му Ду́ху:

Струи́ крове́й твои́х, подре́зания лы́стов и и́ныя му́ки ви́дя, вра́г мы́сленный наусти́ по́ловчанина, и́же слы́ша иму́щее тебе́ бы́ти свобожде́ние свы́ше, тя́жкия вери́ги возложи́ти на тя́, но ты́, о́тче, псало́мски взыва́л еси́: Бо́же, в по́мощь мою́ вонми́, Ты́ бо Еди́н еси́, спаса́яй ве́рою воспева́ющия Тя́.

И ны́не и при́сно и во ве́ки веко́в. Ами́нь.

Богоро́дичен: Струя́ми по́мощи Твоея́, Богоневе́стная Де́во, потопи́ неви́димыя враги́, влеку́щия вери́гами страсте́й ду́шу мою́ во а́дову про́пасть, да, свобо́дь сы́й от си́х, вопию́ Ти́: ра́дуйся, Мо́ре, потопи́вшее мы́сленнаго фарао́на.

Пе́снь 6.

Ирмос: Возопи́, прообразу́я погребе́ние тридне́вное, проро́к Ио́на, в ки́те моля́ся: от тли́ изба́ви мя́, Иису́се, Царю́ си́л.

Припев: Преподобне отче Никоне, моли Бога о нас.

Желе́зо скорбе́й пронза́ше ду́шу твою́, Ни́коне сла́вне, до́ндеже Евстра́тий му́ченик даде́ извеще́ние свобожде́ния, по́сланнаго ти́ вско́ре от Бо́га, к Нему́же взыва́л еси́: на Тя́, Го́споди, упова́х, пра́вдою Твое́ю изба́ви мя́, Иису́се, Царю́ си́л.

Сла́ва Отцу́ и Сы́ну и Свято́му Ду́ху:

Яко Авваку́ма, неви́димо восхи́ти тя́ Вы́шняго десни́ца, стрегу́щии же тя́ удиви́шася, гла́с свы́ше слы́шаще, и постыде́шася, неве́дуще Бо́га, я́ко То́й еди́н е́сть Ца́рь си́л.

И ны́не и при́сно и во ве́ки веко́в. Ами́нь.

Богоро́дичен: Изба́вительнице кре́пкая, изба́ви мя́ от ру́к сопроти́вных, се́ бо понре́т глава́ моя́ в про́пасть и не изы́ду от а́довых закле́п ве́чных, а́ще не Ты́ ми́ да́си по́мощь, су́щи Ма́ти Царя́ си́л.

Конда́к, гла́с 6:

Первому́ченику подо́бяся, о мучи́теле твое́м моли́лся еси́ и, изба́вив того́ от сме́рти, приве́л еси́ ко Христу́, преподобному́чениче Ни́коне сла́вне, те́мже, с первострада́льцем зря́ Христа́ одесну́ю Отца́, моли́ся о на́с, да не пребу́дем вне́ черто́га Христо́ва.

Пе́снь 7.

Ирмос: Авраа́мстии иногда́ в Вавило́не о́троцы пе́щный пла́мень попра́ша, пе́сньми взыва́юще: оте́ц на́ших Бо́же, благослове́н еси́.

Припев: Преподобне отче Никоне, моли Бога о нас.

Стра́шнаго обще́ния Та́ин вре́мени су́щу в це́ркви, си́лою Бо́жиею восхище́н от пле́на, ста́л еси́ среди́ бра́тии, Ни́коне сла́вне и вси́, узре́вше у́зы твоя́ и кро́вь, ка́плющую от лы́стов, возде́ша ру́це о свобожде́нии твое́м, глаго́люще: Бо́же, благослове́н еси́.

Припев: Преподобне отче Никоне, моли Бога о нас.

Иже пе́рвее име́ тя, о́тче, в пле́не, се́ то́й последи́ узре́в тя́ свобо́дна десни́цею Вы́шняго среди́ бра́тии, умили́вся и крести́вся, плени́ себе́ в послуша́ние Христо́во, зовы́й: Бо́же, благослове́н еси́.

Сла́ва Отцу́ и Сы́ну и Свято́му Ду́ху:

Блаже́нни пле́нницы, иму́ще тя́ спле́нника, му́дре, тобо́ю бо от неду́га свобожде́ни, от ру́к нечести́вых избего́ша, и испо́лнися рече́нное в Писа́нии: мно́го мо́жет моли́тва пра́веднаго поспешеству́ема.

И ны́не и при́сно и во ве́ки веко́в. Ами́нь.

Богоро́дичен: Плене́н сы́й от враго́в мы́сленных и свя́зан вери́гами страсте́й от лю́таго велиа́ра, к Тебе́ вопию́, Неискусобра́чная Ма́ти: исхи́ти мя́ от си́х, да, свобо́дь сы́й, воззову́: ра́дуйся, Ро́ждшая Свободи́теля плене́нным.

Пе́снь 8.

Ирмос: Изба́вителю все́х Всеси́льне, посреде́ пла́мене благоче́ствовавшия, снизше́д, ороси́л еси́ и научи́л еси́ пе́ти: вся́ дела́, благослови́те, по́йте Го́спода.

Припев: Преподобне отче Никоне, моли Бога о нас.

Изба́вителя все́х и Спа́са своего́ нося́й незло́бие, не убоя́лся еси́, о́тче, мучи́теля, распя́ти тя́ хотя́ща, но, благи́м за зло́е воздава́я, исцели́л еси́ его́, в боле́зни лежа́ща, да и то́й, обра́щся, благослови́т Го́спода, и превозно́сит во ве́ки.

Припев: Преподобне отче Никоне, моли Бога о нас.

В скуде́льном те́ла твоего́ сосу́де, ко́ль мно́гое чте́м бы́ти сокро́вище чудотворе́ния, блаже́нне, и сла́вим Небе́снаго Отца́, да́вшаго ти́ сицева́я на по́льзу на́шу, си́м и на́с испра́ви, мо́лим тя́, да тобо́ю пресла́вная Де́ющаго воспое́м и превозно́сим во ве́ки.

Сла́ва Отцу́ и Сы́ну и Свято́му Ду́ху:

Ста́л еси́ проти́ву ми́ру и пло́ти, и обоя́ связа́в, покори́л еси́ ду́ху, те́мже, к вы́шнему ми́ру возше́д, ра́дуешися, и со Ангелы пое́ши, и превозно́сиши Го́спода во ве́ки.

И ны́не и при́сно и во ве́ки веко́в. Ами́нь.

Богоро́дичен: Предста́ни на́м в по́мощь, ско́ро призыва́ющим Тя́, Пречи́стая Де́во, и укрепи́ ны́, проти́ву ми́ра и пло́ти на ду́ха похотству́ющия, се́ бо приво́дим Ти́ Ни́кона сла́внаго в моли́тву, его́же ра́ди да́ждь на́м во све́те святы́х превозноси́ти Тя́ во ве́ки.

Песнь 9

Ирмос: Ева у́бо неду́гом преслуша́ния кля́тву всели́ла е́сть, Ты́ же, Де́во Богоро́дице, прозябе́нием чревоноше́ния ми́рови благослове́ние процвела́ еси́. Те́м Тя́ вси́ велича́ем.

Припев: Преподобне отче Никоне, моли Бога о нас.

Евин неду́г в души́ свое́й исцели́ти хотя́ще, собра́ся по́лк доблему́дрых оте́ц на горе́ Пече́рской, от ни́хже Ни́кон сла́вный, я́ко звезда́, просия́ и луча́ми свои́х моли́тв просвеща́ет на́с, те́мже его́ велича́ем.

Припев: Преподобне отче Никоне, моли Бога о нас.

Све́том мы́сленным озари́лся еси́, и́же пе́рвее отверже́нием страсте́й отврати́л еси́ о́чи твои́ не ви́дети суеты́, те́мже Поста́вльшаго рабу́ Своему́ сло́во Свое́ в стра́х Сво́й, Христа́ велича́ем.

Сла́ва Отцу́ и Сы́ну и Свято́му Ду́ху:

Тро́ичен: Ди́вна дела́ Твоя́, Несозда́нная Тро́ице, и сла́вишися во святы́х Свои́х, Бо́же Изра́илев, мольба́ми уго́дника Твоего́ Ни́кона удиви́ и на на́с благода́ть Твою́, отвраще́нием от де́л неподо́бных, да Тя́ вы́ну велича́ем.

И ны́не и при́сно и во ве́ки веко́в. Ами́нь.

Богоро́дичен: Ди́вна дела́ смотре́ния Своего́ сотвори́ на Тебе́ Вы́шний, Безневе́стная Де́во, и велича́ют Тя́, блажа́ще от ро́да в ро́д, вся́ земноро́дных коле́на; мольба́ми преподо́бных Пече́рских да́ждь на́м, да и мы́ Тя́ во ве́ки велича́ем.

Свети́лен:

Воздержа́нием кре́пким и муче́нием от неве́рных блюду́щаго пяты́ твоея́ зми́я уби́л еси́, о́тче, по кончи́не свое́й вене́ц сугу́бый до́блестей твои́х прия́л еси́, и ны́не, живы́й на небеси́, я́ко преподо́бным сла́ва и му́чеником сы́й похвала́, моли́ся о на́с, да и мы́ прича́стницы сла́вы твоея́ бу́дем, Ни́коне му́дре.

Сла́ва, и ны́не, Богоро́дичен:

Невоздержа́нием во тму́ все́льшийся ро́д на́ш Рождество́м Твои́м приве́дшая к све́ту, на́с невоздержа́ния изба́ви и к све́ту за́поведей Сы́на Твоего́ наста́ви, да пое́м Ти́, Богоро́дице: ра́дуйся, воздержа́ния неувяда́емый ве́нче.

Молитва

О свяще́нная главо́, преподо́бне о́тче, преблаже́нне а́вво Никоне, не забу́ди убо́гих твои́х до конца́, но помина́й нас всегда́ во святы́х и благоприя́тных моли́твах к Бо́гу: помяни́ ста́до твое́, е́же сам упа́сл еси́, и не забу́ди посеща́ти чад твои́х моли́ за ны, о́тче свяще́нный, за де́ти твоя́ духо́вныя, я́ко име́яй дерзнове́ние к Небе́сному Царю́: не премолчи́ за ны ко Го́споду, и не пре́зри нас, ве́рою и любо́вию чту́щих тя: помина́й нас недосто́йных у Престо́ла Вседержи́телева, и не преста́й моля́ся о нас ко Христу́ Бо́гу, и́бо дана́ тебе́ бысть благода́ть за ны моли́тися. Не мним бо тя су́ща ме́ртва: а́ще бо те́лом и преста́вился еси́ от нас, но и по сме́рти жив сый пребыва́еши, не отступа́й от нас ду́хом, сохраня́я нас от стрел вра́жиих и вся́кия пре́лести бесо́вския и ко́зней диа́вольских, па́стырю наш до́брый. А́ще бо и моще́й твои́х ра́ка пред очи́ма на́шима ви́дима есть всегда́, но свята́я твоя́ ду́ша со а́нгельскими во́инствы, со безпло́тными ли́ки, с небе́сными си́лами, у престо́ла Вседержи́телева предстоя́щи, досто́йно весели́тся, ве́дуще у́бо тя вои́стину и по сме́рти жи́ва су́ща, тебе́ припа́даем и тебе́ мо́лимся: моли́ся о нас Всеси́льному Бо́гу, о по́льзе душ на́ших, и испроси́ нам вре́мя на покая́ние, да невозбра́нно пре́йдем от земли́ на Не́бо, от мыта́рств же го́рьких, бесо́в возду́шных князе́й и от ве́чныя му́ки да изба́вимся, и Небе́снаго Ца́рствия насле́дницы да бу́дем со все́ми пра́ведными, от ве́ка угоди́вшими Го́споду на́шему Иису́су Христу́: Ему́ же подоба́ет вся́кая сла́ва, честь и поклоне́ние, со Безнача́льным Его́ Отце́м, и с Пресвяты́м и Благи́м и Животворя́щим Его́ Ду́хом, ны́не и при́сно, и во ве́ки веко́в. Ами́нь.