15 декабря

Канон великомученице Миропии Хиосской

Молитвы предначинательные

Моли́твами святы́х оте́ц на́ших, Го́споди Иису́се Христе́, Бо́же наш, поми́луй нас, ами́нь.

Сла́ва Тебе́, Бо́же наш, сла́ва Тебе́.

Царю́ Небе́сный, Уте́шителю, Ду́ше и́стины, И́же везде́ сый и вся исполня́яй, Сокро́вище благи́х и жи́зни Пода́телю, прииди́ и всели́ся в ны, и очи́сти ны от вся́кия скве́рны, и спаси́, Бла́же, ду́ши на́ша.

Святы́й Бо́же, Святы́й Кре́пкий, Святы́й Безсме́ртный, поми́луй нас. Трижды.

Сла́ва Отцу́ и Сы́ну и Свято́му Ду́ху, и ны́не и при́сно и во ве́ки веко́в. Ами́нь.

Пресвята́я Тро́ице, поми́луй нас; Го́споди, очи́сти грехи́ на́ша; Влады́ко, прости́ беззако́ния на́ша; Святы́й, посети́ и исцели́ не́мощи на́ша, и́мене Твоего́ ра́ди.

Го́споди, поми́луй, трижды.

Сла́ва Отцу́ и Сы́ну и Свято́му Ду́ху, и ны́не и при́сно и во ве́ки веко́в. Ами́нь.

О́тче наш, И́же еси́ на Небесе́х, да святи́тся и́мя Твое́, да прии́дет Ца́рствие Твое́, да бу́дет во́ля Твоя́, я́ко на Небеси́ и на земли́. Хлеб наш насу́щный да́ждь нам днесь; и оста́ви нам до́лги на́ша, я́коже и мы оставля́ем должнико́м на́шим; и не введи́ нас во искуше́ние, но изба́ви нас от лука́ваго.

Го́споди, поми́луй, 12,

Прииди́те, поклони́мся Царе́ви на́шему Бо́гу.

Прииди́те, поклони́мся и припаде́м Христу́, Царе́ви на́шему Бо́гу.

Прииди́те, поклони́мся и припаде́м Самому́ Христу́, Царе́ви и Бо́гу на́шему.

Псалом 50:

Поми́луй мя, Бо́же, по вели́цей ми́лости Твое́й, и по мно́жеству щедро́т Твои́х очи́сти беззако́ние мое́. Наипа́че омы́й мя от беззако́ния моего́, и от греха́ моего́ очи́сти мя; я́ко беззако́ние мое́ аз зна́ю, и грех мой предо мно́ю есть вы́ну. Тебе́ Еди́ному согреши́х и лука́вое пред Тобо́ю сотвори́х, я́ко да оправди́шися во словесе́х Твои́х, и победи́ши внегда́ суди́ти Ти. Се бо, в беззако́ниях зача́т есмь, и во гресе́х роди́ мя ма́ти моя́. Се бо, и́стину возлюби́л еси́; безве́стная и та́йная прему́дрости Твоея́ яви́л ми еси́. Окропи́ши мя иссо́пом, и очи́щуся; омы́еши мя, и па́че сне́га убелю́ся. Слу́ху моему́ да́си ра́дость и весе́лие; возра́дуются ко́сти смире́нныя. Отврати́ лице́ Твое́ от грех мои́х и вся беззако́ния моя́ очи́сти. Се́рдце чи́сто сози́жди во мне, Бо́же, и дух прав обнови́ во утро́бе мое́й. Не отве́ржи мене́ от лица́ Твоего́ и Ду́ха Твоего́ Свята́го не отыми́ от мене́. Возда́ждь ми ра́дость спасе́ния Твоего́ и Ду́хом Влады́чним утверди́ мя. Научу́ беззако́ныя путе́м Твои́м, и нечести́вии к Тебе́ обратя́тся. Изба́ви мя от крове́й, Бо́же, Бо́же спасе́ния моего́; возра́дуется язы́к мой пра́вде Твое́й. Го́споди, устне́ мои́ отве́рзеши, и уста́ моя́ возвестя́т хвалу́ Твою́. Я́ко а́ще бы восхоте́л еси́ же́ртвы, дал бых у́бо: всесожже́ния не благоволи́ши. Же́ртва Бо́гу дух сокруше́н; се́рдце сокруше́нно и смире́нно Бог не уничижи́т. Ублажи́, Го́споди, благоволе́нием Твои́м Сио́на, и да сози́ждутся сте́ны Иерусали́мския. Тогда́ благоволи́ши же́ртву пра́вды, возноше́ние и всесожега́емая; тогда́ возложа́т на oлта́рь Твой тельцы́.

Тропа́рь, гла́с 1:

Доброму́ченице Миропи́е и Христа́ неве́сто нетле́нная, ны́не Ему́же предстои́ши, прекра́сная, ра́ны нося́щи пло́ти, я́ко ка́мни све́тлы и светообра́зны, и в крова́вую порфи́ру, я́ко цари́ца, облече́нная, пресла́вная, умоли́ Его́ за ны́, я́же с любо́вию восхваля́ющия хвалы́ побе́дными и пе́сньми твою́ боже́ственную стра́сть.

Велича́ние:

Велича́ем тя́, страстоте́рпице Христо́ва Миропи́е, и чте́м честно́е страда́ние твое́, е́же за Христа́ претерпе́ла еси́.

Кано́н, гла́с 1.

Пе́снь 1.

Ирмо́с: Пе́снь побе́дную пои́м вси́ Бо́гу, сотво́ршему ди́вная чудеса́ мы́шцею высо́кою и спа́сшему Изра́иля, я́ко просла́вися.

Припев: Святая великомученице Миропия, моли Бога о нас.

Смра́ден и ме́рзок а́з сы́й, Миропи́е имени́тая, чи́стую и непоро́чную тя́, благоуха́ние Христо́во, прославля́ти дерза́ю, но ты́ мя́ прости́.

Припев: Святая великомученице Миропия, моли Бога о нас.

Возлю́бленными пе́сньми твою́ воспева́ти стра́сть, по́двиги благода́ть мне́ от высо́т святы́х ниспосли́ твои́ми моли́твами, благода́тная.

Сла́ва Отцу́ и Сы́ну и Свято́му Ду́ху:

Храня́щи непоро́чность по о́бразу Бо́жию и подо́бию, от о́трочества сподо́бися о́бщница страсте́м Христо́вым ста́ти, сла́вная.

И ны́не и при́сно и во ве́ки веко́в. Ами́нь.

Богоро́дичен: Све́т носи́вшая во чре́ве, Изба́вителя моего́, тмы́ мя́ изба́ви и му́к, Пречи́стая, ве́чных, та́ко, спасе́нный, воспою́ вели́чествие Твое́.

Пе́снь 3.

Ирмо́с: Да утверди́тся се́рдце мое́ в во́ли Твое́й, Христе́ Бо́же, Иже над вода́ми не́бо утвержде́й второ́е и основа́вый на вода́х зе́млю, Всеси́льне.

Припев: Святая великомученице Миропия, моли Бога о нас.

К боже́ственному гро́бу приступи́вши Ермио́нии, Миропи́е честна́я, источи́ от него́ Боже́ственное ми́ро и от того́ и́мя взя́, е́же су́ще имени́тое.

Припев: Святая великомученице Миропия, моли Бога о нас.

Гоне́нию одержа́вшу всю́ Аси́ю, ты́, ну́ждена бы́вши неми́лостивно оста́вити Ефе́с, ма́терне оте́чество обрела́ еси́, Хио́с, прибе́жище.

Припев: Святая великомученице Миропия, моли Бога о нас.

Моли́тве при́сно прилежа́щи воздержа́нием, и трезве́нием велему́дрым омраче́ние страсте́й умертви́, и Христу́ бы́сть ми́ро жития́ чи́ста.

Сла́ва Отцу́ и Сы́ну и Свято́му Ду́ху:

Боже́ственною любо́вию и рачи́тельством, о страстоте́рпице Миропи́е честна́я, погуби́ стра́х и оста́нки Иси́дора исхи́ти.

И ны́не и при́сно и во ве́ки веко́в. Ами́нь.

Богоро́дичен: Безпло́днаго помышле́ния моего́ безпло́дие вся́чески изгони́ и плодови́тое доброде́тельми души́ мое́й яви́, Всесвята́я Богоро́дице, ве́рных Помо́щнице.

Седа́лен, гла́с 4. Подо́бен: Яви́лся еси́ дне́сь.

Ра́н я́звами украше́нная и кро́вию свое́ю очервле́нная, разу́мно в сла́ве предста́ла еси́ Боже́ственному Христа́ престо́лу, Миропи́е сла́вная.[Два́жды.]

Сла́ва, и ны́не, Богоро́дичен:

Ра́дуйся, Престо́ле о́гненный Царя́ и Свети́льниче златы́й Све́та Бо́жияго, ду́ши и помышле́ния освеща́ющи воспева́ющих Тя́, Де́во Всепе́тая.

Пе́снь 4.

Ирмо́с: Ду́хом прови́дя, проро́че Авваку́ме, Словесе́ воплоще́ние, пропове́дал еси́, вопия́: внегда́ прибли́житися ле́том — позна́ешися, внегда́ приити́ вре́мени — пока́жешися. Сла́ва си́ле Твое́й, Го́споди!

Припев: Святая великомученице Миропия, моли Бога о нас.

Ве́лие твое́ дея́ние и зело́ ди́вное: ка́ко, посреде́ стра́ж дости́гнувши те́ла, взяла́ еси́ сие́, Миропи́е крепкоду́шная, и не зна́ша бы́вшее храня́щии.

Припев: Святая великомученице Миропия, моли Бога о нас.

В любви́ пребы́вши, Миропи́е чу́дная, боже́ственное те́ло прия́ рука́ма, пе́сньми благослови́, просла́ви Бо́жий да́р, Иси́дора те́ло, и, с ве́рою обнима́ющи сие́, ума́сти.

Сла́ва Отцу́ и Сы́ну и Свято́му Ду́ху:

Погре́бши с че́стию те́ло честно́е, ра́довашеся, я́ко иму́щи Боже́ственное сокро́вище, но, уве́давши иска́ние мучи́теля, хотя́щаго изнури́ти тя́, веща́ла еси́ испыта́ющим, не убоя́вшися сме́рти.

И ны́не и при́сно и во ве́ки веко́в. Ами́нь.

Богоро́дичен: Де́во Пресвята́я, Неоскверне́нная Ски́ние, оскверне́нна грехи́ очи́сти мя́ ны́не щедро́т Твои́х ка́плями чисте́йшими и да́ждь ми́ ру́ку по́мощи, да воспою́ сла́ву Тебе́, Чи́стая, Благослове́нная.

Пе́снь 5

Ирмо́с: Тво́й ми́р да́ждь на́м, Сы́не Бо́жий: ино́го бо, ра́зве Тебе́, Бо́га не зна́ем, и́мя Твое́ имену́ем, я́ко Бо́г живы́х и ме́ртвых еси́.

Припев: Святая великомученице Миропия, моли Бога о нас.

Му́жеским смы́слом, благо́ю душе́ю ста́ла еси́, Миропи́е всечу́дная, пред мучи́телем го́рдым и рекла́ еси́, я́ко те́ло хотя́щи укра́сти.

Припев: Святая великомученице Миропия, моли Бога о нас.

О, чудесе́, ка́ко не устраши́ся вельми́ го́рдаго и безми́лостиваго мучи́теля, и посрамле́ния, и лю́тости, и я́рости, чу́дная Миропи́е, но избра́ла еси́ благодерзнове́ние.

Сла́ва Отцу́ и Сы́ну и Свято́му Ду́ху:

Ка́ко дерзну́вшая решти́ о злы́х, глаго́лала еси́ му́жески о окая́нствии и безче́стии, Миропи́е, твои́ми словесы́ дерзнове́ния.

И ны́не и при́сно и во ве́ки веко́в. Ами́нь.

Богоро́дичен: Умоли́, Его́же родила́ еси́, Де́во, спасти́ ве́рою Тебе́ вопию́щих: ра́дуйся, Де́во Всеблаже́нная, ра́дуйся, Благослове́нная, всему́ ми́ру заступле́ние.

Пе́снь 6.

Ирмо́с: Проро́ка Ио́ну подража́я, вопию́: живо́т мо́й, Бла́же, свободи́ из тли́ и спаси́ мя, Спа́се ми́ра, зову́ща: сла́ва Тебе́.

Припев: Святая великомученице Миропия, моли Бога о нас.

Дерзнове́ние твое́ мно́гое преступи́ пои́стине и превзы́де вся́ческая словесы́ хи́трыми, Миропи́е достохва́льная.

Припев: Святая великомученице Миропия, моли Бога о нас.

Ка́ко возмогла́ еси́ изглаго́лати и пропове́дати мно́го и извеща́ти чу́дно любо́вь твою́ ко Христу́, всехва́льная, ея́же ра́ди сме́рть прия́вши.

Сла́ва Отцу́ и Сы́ну и Свято́му Ду́ху:

Хра́брость, Миропи́е достохва́льная, души́ твоея́, словеса́ мно́зи, дерзнове́ние лука́вое разруши́, мучи́теля, му́ченице, уничижи́.

И ны́не и при́сно и во ве́ки веко́в. Ами́нь.

Богоро́дичен: Благоволе́нием Отца́ воплоти́ся Сы́н Ду́хом Бо́жиим во чре́ве Твое́м, Чи́стая, спаси́ на́с, Бо́га Ро́ждшая.

Конда́к, гла́с 3. Подо́бен: Де́ва дне́сь.

По и́мени, о страстоте́рпице Миропи́е, ми́ро источа́еши благода́ти чуде́с и пасе́ши все́х, подоба́ющих и взыска́ющих и ве́рою и доброде́телию прибега́ющих к ра́це твое́й пречестне́й, я́же держи́т пра́х тво́й.

Икос:

Яко неве́ста Христу́ жития́ ра́ди чисте́йшая и стра́сти ра́ди светле́йшая, прекрасноде́во Миропи́е достосла́вная, чуде́с благода́ть источа́еши, я́ко ми́ро, и пасе́ши все́х, с ве́рою и любо́вию к пречестне́й ра́це твое́й приходя́щих, пребыва́ет бо в не́й Свята́го Ду́ха благода́ть, я́ко держи́т свяще́нный пра́х тво́й.

Пе́снь 7.

Ирмо́с: Пе́щь, Спа́се, ороша́шеся, о́троцы же, лику́юще, поя́ху: отце́в Бо́же, благослове́н еси́.

Припев: Святая великомученице Миропия, моли Бога о нас.

Повеле́вшу дреко́льми му́чити посрамле́ну мучи́телю те́ло твое́, прия́ го́рькия и боле́зненныя ра́ны.

Припев: Святая великомученице Миропия, моли Бога о нас.

Те́ло твое́ я́звами похвали́ся, струя́ми кро́ви пора́довася, но любо́вию Христо́вою претерпе́ла еси́ вся́ му́жески.

Сла́ва Отцу́ и Сы́ну и Свято́му Ду́ху:

Кро́вию очерви́ оде́жду деви́ческу, всехва́льная, и неве́стою приведе́ся ко Христу́, Царю́ всего́ ми́ра.

И ны́не и при́сно и во ве́ки веко́в. Ами́нь.

Богоро́дичен: Тя́ ве́даю, Богоневе́сто, Со́лнце сла́вы ро́ждшую, просвети́вшее но́чь мои́х согреше́ний.

Пе́снь 8.

Ирмо́с: Его́же ужаса́ются Ангели и вся́ во́инства, я́ко Творца́ и Го́спода, по́йте, свяще́нницы, просла́вите, о́троцы, благослови́те, лю́дие, и превозноси́те во вся́ ве́ки.

Припев: Святая великомученице Миропия, моли Бога о нас.

Посрами́ла еси́ у́м зве́ря лю́таго, повеле́вшаго тя́ на сту́д за власы́ влещи́ по гра́ду.

Припев: Святая великомученице Миропия, моли Бога о нас.

Уязви́вше те́ло твое́ неми́лостивно и повле́кше тя́ за власы́, де́во, сме́рти бли́з оста́виша Миропи́ю в темни́це.

Сла́ва Отцу́ и Сы́ну и Свято́му Ду́ху:

Но́щию моли́вшуся тебе́ те́пле в темни́це, све́т ве́лий возсия́, и Ангели све́тлии предста́ша внеза́пу, и возлю́бленный Иси́дор рече́: ми́р тебе́, Миропи́е.

И ны́не и при́сно и во ве́ки веко́в. Ами́нь.

Богоро́дичен: Воздви́гше лежа́щаго мя́ в глубине́ зо́л, ны́не борю́щих мя́ вра́г побори́, изыми́ от нечи́стых сласте́й ду́шу, Чи́стая, не оста́ви, но уще́дри и спаси́.

Песнь 9

Ирмо́с: Светоно́сный о́блак, в о́ньже все́х Влады́ка, я́ко до́ждь с небесе́ на руно́, сни́де и воплоти́ся на́с ра́ди, бы́в Челове́к, Безнача́льный, велича́ем вси́ я́ко Ма́терь Бо́га на́шего Чи́стую.

Припев: Святая великомученице Миропия, моли Бога о нас.

Светле́йшую ду́шу твою́ Ангельстии ли́ки ку́пно с Иси́дором сла́вным в ми́ре взя́вше, вознесо́ша тя́ на небеса́ я́ко блаже́нну ко Христу́ Жениху́, Иже повеле́л сие́ де́вам в черто́зе разу́мнем.

Припев: Святая великомученице Миропия, моли Бога о нас.

Истиннаго нетле́ния светле́йшую лампа́ду иму́щи в руце́ и вене́ц кра́сен, в багря́ную оде́жду та́йную, окра́шенную кро́вию твое́ю, страстоте́рпице, све́тло облече́нная, ца́рствуеши со Христо́м.

Сла́ва Отцу́ и Сы́ну и Свято́му Ду́ху:

Язв боле́зни, и держа́ние вла́с, и вре́д главе́, и кро́ви проли́тие, и телесе́ всего́ свяще́нныя ра́ны принесе́ ко Христу́ в моли́тве за вся́, чту́щих тя́ ве́рно.

И ны́не и при́сно и во ве́ки веко́в. Ами́нь.

Богоро́дичен: Грехолю́бец сы́й, в небреже́нии пребыва́ю, и су́да, Чи́стая, безме́зднаго страшу́ся, на не́мже сохрани́ Твои́ми святы́ми моли́твами, Богоневе́сто, и ублажи́ неосужде́нну предста́ти.

Ексапостила́рий.

Претерпе́ла еси́ муче́ния пу́ть богому́дрый вельми́ горя́щею душе́ю и ны́не всели́лася на небеса́, в нетле́нныя черто́зи, де́во му́ченице Миропи́е.

Молитва

О свята́я великомученице Миропие. По́двигом до́брым подвиза́вшися на земли́, восприя́ла еси́ на Небесе́х вене́ц пра́вды, его́же угото́вал есть Госпо́дь всем лю́бящим Его́. Те́мже ра́дуемся о пресла́внем сконча́нии жи́тельства твоего́ и чтим святу́ю па́мять твою́. Ты же, предстоя́щи Престо́лу Бо́жию, приими́ моле́ния на́ша и ко всеми́лостивому Бо́гу принеси́, о е́же прости́ти нам вся́кое прегреше́ние и помощи́ нам ста́ти проти́ву ко́знем диа́вольским, да изба́вльшеся от скорбе́й, боле́зней, бед и напа́стей и вся́каго зла, благоче́стно и пра́ведно поживе́м в ны́нешнем ве́це и сподо́бимся предста́тельством твои́м, а́ще и недосто́йни есмы́, ви́дети блага́я на земли́ живы́х, сла́вяще еди́наго во святы́х Свои́х сла́вимаго Бо́га, Отца́ и Сы́на и Свята́го Ду́ха, ны́не и при́сно и во ве́ки веко́в. Ами́нь.