28 августа.

Канон Софии, Премудрости Божии, яже в Великом Новгороде поется

Молитвы предначинательные

Моли́твами святы́х оте́ц на́ших, Го́споди Иису́се Христе́, Бо́же наш, поми́луй нас, ами́нь.

Сла́ва Тебе́, Бо́же наш, сла́ва Тебе́.

Царю́ Небе́сный, Уте́шителю, Ду́ше и́стины, И́же везде́ сый и вся исполня́яй, Сокро́вище благи́х и жи́зни Пода́телю, прииди́ и всели́ся в ны, и очи́сти ны от вся́кия скве́рны, и спаси́, Бла́же, ду́ши на́ша.

Святы́й Бо́же, Святы́й Кре́пкий, Святы́й Безсме́ртный, поми́луй нас. Трижды.

Сла́ва Отцу́ и Сы́ну и Свято́му Ду́ху, и ны́не и при́сно и во ве́ки веко́в. Ами́нь.

Пресвята́я Тро́ице, поми́луй нас; Го́споди, очи́сти грехи́ на́ша; Влады́ко, прости́ беззако́ния на́ша; Святы́й, посети́ и исцели́ не́мощи на́ша, и́мене Твоего́ ра́ди.

Го́споди, поми́луй, трижды.

Сла́ва Отцу́ и Сы́ну и Свято́му Ду́ху, и ны́не и при́сно и во ве́ки веко́в. Ами́нь.

О́тче наш, И́же еси́ на Небесе́х, да святи́тся и́мя Твое́, да прии́дет Ца́рствие Твое́, да бу́дет во́ля Твоя́, я́ко на Небеси́ и на земли́. Хлеб наш насу́щный да́ждь нам днесь; и оста́ви нам до́лги на́ша, я́коже и мы оставля́ем должнико́м на́шим; и не введи́ нас во искуше́ние, но изба́ви нас от лука́ваго.

Го́споди, поми́луй, 12,

Прииди́те, поклони́мся Царе́ви на́шему Бо́гу.

Прииди́те, поклони́мся и припаде́м Христу́, Царе́ви на́шему Бо́гу.

Прииди́те, поклони́мся и припаде́м Самому́ Христу́, Царе́ви и Бо́гу на́шему.

Псалом 50:

Поми́луй мя, Бо́же, по вели́цей ми́лости Твое́й, и по мно́жеству щедро́т Твои́х очи́сти беззако́ние мое́. Наипа́че омы́й мя от беззако́ния моего́, и от греха́ моего́ очи́сти мя; я́ко беззако́ние мое́ аз зна́ю, и грех мой предо мно́ю есть вы́ну. Тебе́ Еди́ному согреши́х и лука́вое пред Тобо́ю сотвори́х, я́ко да оправди́шися во словесе́х Твои́х, и победи́ши внегда́ суди́ти Ти. Се бо, в беззако́ниях зача́т есмь, и во гресе́х роди́ мя ма́ти моя́. Се бо, и́стину возлюби́л еси́; безве́стная и та́йная прему́дрости Твоея́ яви́л ми еси́. Окропи́ши мя иссо́пом, и очи́щуся; омы́еши мя, и па́че сне́га убелю́ся. Слу́ху моему́ да́си ра́дость и весе́лие; возра́дуются ко́сти смире́нныя. Отврати́ лице́ Твое́ от грех мои́х и вся беззако́ния моя́ очи́сти. Се́рдце чи́сто сози́жди во мне, Бо́же, и дух прав обнови́ во утро́бе мое́й. Не отве́ржи мене́ от лица́ Твоего́ и Ду́ха Твоего́ Свята́го не отыми́ от мене́. Возда́ждь ми ра́дость спасе́ния Твоего́ и Ду́хом Влады́чним утверди́ мя. Научу́ беззако́ныя путе́м Твои́м, и нечести́вии к Тебе́ обратя́тся. Изба́ви мя от крове́й, Бо́же, Бо́же спасе́ния моего́; возра́дуется язы́к мой пра́вде Твое́й. Го́споди, устне́ мои́ отве́рзеши, и уста́ моя́ возвестя́т хвалу́ Твою́. Я́ко а́ще бы восхоте́л еси́ же́ртвы, дал бых у́бо: всесожже́ния не благоволи́ши. Же́ртва Бо́гу дух сокруше́н; се́рдце сокруше́нно и смире́нно Бог не уничижи́т. Ублажи́, Го́споди, благоволе́нием Твои́м Сио́на, и да сози́ждутся сте́ны Иерусали́мския. Тогда́ благоволи́ши же́ртву пра́вды, возноше́ние и всесожега́емая; тогда́ возложа́т на oлта́рь Твой тельцы́.

Тропа́рь, гла́с 4:

Ве́лия и неизрече́нная Прему́дрости Бо́жии си́ла, Софи́я Преимени́тая, пречестны́й хра́ме, огнезра́чный престо́ле Христа́ Бо́га на́шего: в Тя́ бо всели́ся неизрече́нно Сло́во Бо́жие, и пло́ть бы́сть, Неви́димый яви́ся, и Неприкоснове́нный из Тебе́ изы́де, и с челове́ки поживе́, врага́ уловля́я и челове́ки от кля́твы дре́вния свобожда́я. Мо́лимтися, Влады́чице, отягче́нных на́с во гресе́х лю́тых поми́ловати и спасти́ ду́ши на́ша. И я́ко чадолюби́вая и милосе́рдая Цари́ца, при́зри на лю́ди Твоя́, и умилосе́рдися, заступи́ от напа́стей и скорбе́й лю́тых, и гра́ды на́ша невреди́мы сохрани́, иде́же ны́не и́мя Твое́ пресвято́е боголе́пно сла́вится.

Кано́н Софи́и, Прему́дрости Бо́жии, гла́с 4.

Пе́снь 1.

Ирмо́с: Неизрече́нным веле́нием пешехо́дца прия́л еси́ и непроходи́мое мо́ре изсуши́л еси́, изра́ильтеския лю́ди, обраще́нныя от Еги́пта, спа́сл еси́, исхо́дную пе́снь пою́ Тебе́, Го́споди.

Запе́в: Прему́дрость Бо́жия, Софи́я Преимени́тая, спаси́ ны гре́шныя рабы́ Твоя́.

Аз прему́дрость всели́х, рече́ при́точник от лица́ Госпо́дня, Мо́й сове́т и утвержде́ние, е́же е́сть Единоро́дный Сы́н и Сло́во Бо́жие. Аз, рече́, лю́бящия Мя́ люблю́, а взыска́ющии Мене́ обря́щут благода́ть.

Запе́в: Прему́дрость Бо́жия, Софи́я Преимени́тая, спаси́ ны гре́шныя рабы́ Твоя́.

Бо́г прему́дростию Свое́ю зе́млю основа́, угото́ва же небеса́ му́дростию, положи́ о́блак во одея́ние, и соста́вив све́т у́тренний, вра́тницы же а́довы, тоя́ ви́девше, убоя́шася.

Сла́ва Отцу́ и Сы́ну и Свято́му Ду́ху:

Все́м се́рдцем взы́щем прему́дрость Бо́жию, от Пречи́стыя Де́вы в пло́ть прише́дшую, да не по́ткнутся но́ги на́ша, и не убои́мся стра́шнаго, наше́дшаго на ны́, устремле́ния нечести́вых.

И ны́не и при́сно и во ве́ки веко́в. Ами́нь.

Богоро́дичен: Досто́йно, я́ко одушевле́нное Тя́ Не́бо, прия́ша небе́сная, Пречи́стая, Боже́ственная селе́ния, и предста́, све́тло укра́шена, я́ко Неве́ста Всенепоро́чная, Царю́ и Бо́гу.

Пе́снь 3.

Ирмо́с: Утвержда́яй гро́м и созида́яй ду́х, утверди́ мене́, Го́споди, да Тя́ пою́ и́стинно и творю́ во́лю Твою́, я́ко не́сть свя́т, я́ко Ты́, Бо́же на́ш.

Запе́в: Прему́дрость Бо́жия, Софи́я Преимени́тая, спаси́ ны гре́шныя рабы́ Твоя́.

Госпо́дь бу́дет на все́х путе́х на́ших, и утверди́т но́ги на́ша, да не по́ткнемся, а́ще стя́жем прему́дрость Его́, и обы́мет на́с и да́ст глава́м на́шим вене́ц благослове́н.

Запе́в: Прему́дрость Бо́жия, Софи́я Преимени́тая, спаси́ ны гре́шныя рабы́ Твоя́.

Да́р бла́г дае́т на́м Софи́я, Прему́дрость Бо́жия, и путе́м пра́вым тещи́ наставля́ет на́с, а́ще тече́м путе́м те́м, не запне́мся и сохраня́ем себе́ в живо́т ве́чный.

Сла́ва Отцу́ и Сы́ну и Свято́му Ду́ху:

Егда́ же уны́ем, да взы́щем Прему́дрость Бо́жию, Софи́ю имену́емую, и да́ст на́м весе́лие и ра́дость, и сохрани́т на́с от вся́кия неприя́зни, и пока́жет на́м пу́ть живо́тный.

И ны́не и при́сно и во ве́ки веко́в. Ами́нь.

Богоро́дичен: Ли́к богосло́вов от коне́ц, свы́ше же Ангел мно́жества к Сио́ну идя́ху, всеси́льным манове́нием, достодо́лжно, Влады́чице, Твоему́ погребе́нию служа́ще, и вку́пе лику́юще, и надгро́бную пе́снь пою́ще: ра́дуйся Неве́сто Приноде́вая.

Ипакои́, гла́с 8:

Блажи́м Тя́, вси́ ро́ди, Богоро́дице Де́во, в Тя́ бо Невмести́мый Христо́с Бо́г на́ш, вмести́тися благоволи́. Блаже́ни есмы́ и мы́, предста́тельство Тя́ иму́ще: де́нь бо и но́щь мо́лишися о на́с, и ски́птры ца́рствия Твои́ми моли́твами утвержда́ются. Те́м, воспева́юще, вопие́м Ти́: ра́дуйся, Благода́тная, Госпо́дь с Тобо́ю.

Пе́снь 4.

Ирмо́с: Услы́шах Твое́, Христе́, смотре́ние пресла́вное, я́ко безсме́ртен сы́й Бо́г, уподо́бися сме́ртным челове́ком и пребы́сть, е́же бе́, и того́ ра́ди Твою́ сла́влю си́лу.

Запе́в: Прему́дрость Бо́жия, Софи́я Преимени́тая, спаси́ ны гре́шныя рабы́ Твоя́.

Жены́ не́кия прему́дрость Бо́жию взыска́ша и во сле́д Тоя́ идо́ша, блудни́цы же целому́дренны бы́ша, и тму́ во све́т претвори́ша, и мучи́телей посрами́ша, и живо́т ве́чный насле́доваша.

Запе́в: Прему́дрость Бо́жия, Софи́я Преимени́тая, спаси́ ны гре́шныя рабы́ Твоя́.

Зело́ люби́ма е́сть прему́дрость Бо́жия, е́же е́сть смотре́ния та́инство все́м челове́ком, е́йже ничто́же то́чно е́сть под небесе́м, да сохраня́ем ту́, я́ко зе́ницу о́ка, и упоко́ит на́с в де́нь Су́дный.

Сла́ва Отцу́ и Сы́ну и Свято́му Ду́ху:

Иже неизрече́нною му́дростию сло́вом соста́вивый вся́ческая Бо́г, ея́ же по смотре́нию Софи́ю именова́, да пропове́мы ту́ на кра́ех высо́ких и тоя́ ра́ди обря́щем благода́ть и ми́лость в де́нь Су́дный.

И ны́не и при́сно и во ве́ки веко́в. Ами́нь.

Богоро́дичен: В преставле́нии Твое́м, Ма́ти Бо́жия, простра́ннейшее те́ло Твое́ и богоприя́тное, Ангельская во́инства свяще́нными кри́лы, тре́петом и ра́достию покрыва́ху, и си́це вопия́ху: ра́дуйся Неве́сто Неневе́стная.

Пе́снь 5

Ирмо́с: Ре́вность прии́мет лю́ди ненака́занныя, законопресту́пныя евре́и, и о́гнь поя́ст супоста́ты Твоя́ Христе́, я́ко Тя́, Воскре́сша, лестца́ именова́ша.

Запе́в: Прему́дрость Бо́жия, Софи́я Преимени́тая, спаси́ ны гре́шныя рабы́ Твоя́.

Концы́ вселе́нныя, и вся́, я́же на не́й, и не́бо небесе́м Прему́дрость основа́, та́ бо все́х на́с созда́, то́ю ца́рие ца́рствуют, и си́льнии де́ржат зе́млю, и му́дрии пи́шут пра́вду.

Запе́в: Прему́дрость Бо́жия, Софи́я Преимени́тая, спаси́ ны гре́шныя рабы́ Твоя́.

Лю́дие земни́и, почти́те Прему́дрость Бо́жию, Софи́ю имену́емую, да во ве́ки ца́рствуете и жи́ви бу́дете, сия́ бо на́м исправля́ет пу́ть спасе́ния, не чтя́щии же тоя́ во дне́ а́да обрета́ются.

Сла́ва Отцу́ и Сы́ну и Свято́му Ду́ху:

Ме́рило ле́стно — ме́рзость пред Го́сподем, прему́дрости рачи́тель глаго́лет, ме́рило же пра́ведное прия́тно Ему́ е́сть, уста́ же благочести́вых поуча́тся прему́дрости.

И ны́не и при́сно и во ве́ки веко́в. Ами́нь.

Богоро́дичен: Сосу́д подоба́ше избра́нный, пе́нием Ти́ ве́сь удивля́емь, Деви́це, исхо́ден, ве́сь освяще́н Бо́гови, все́м богоприя́тен, и се́й и́стинно явля́емый, Богоро́дице Всепе́тая.

Пе́снь 6.

Ирмо́с: В пучи́не жите́йстей дея́ний мои́х, снидо́х во а́д, но, я́ко от ки́та Ио́на, та́ко вопию́: из глубины́ зо́л возведи́ мя, молю́ся, Сы́не Бо́жий и Сло́ве.

Запе́в: Прему́дрость Бо́жия, Софи́я Преимени́тая, спаси́ ны гре́шныя рабы́ Твоя́.

Нача́ток прему́дрости — стяжа́ти ве́ру несумне́нную, да то́ю насле́дим блага́я; не дади́м сна́ очи́ма и взы́щем Прему́дрость Бо́жию, не уклоня́яся ни на де́сно, ни на шу́ее, да спасе́мся, а́ки се́рна от тене́т.

Запе́в: Прему́дрость Бо́жия, Софи́я Преимени́тая, спаси́ ны гре́шныя рабы́ Твоя́.

Очи на́ши да зря́т к прему́дрости Бо́жия Ма́тере, в Ню́же неизрече́нно Бо́г Сло́во всели́ся, и от Тоя́ пло́ть заимова́в, недомы́сленно роди́ся; дне́сь апо́стольский ли́к Тоя́ погребе́нию по возду́ху стека́ется, исхо́дную пе́снь пою́ще: благослове́н из Тебе́ рожде́йся Бо́г на́ш.

Сла́ва Отцу́ и Сы́ну и Свято́му Ду́ху:

Почти́м, лю́дие, Прему́дрость Бо́жию, Софи́ю имену́емую, да обы́мет на́с, плени́цу грехо́в на́ших разруши́т, и да́ст глава́м на́шим вене́ц, и то́ю, я́ко любоде́льная пчела́, потщи́мся и сла́вими все́ми бу́дем.

И ны́не и при́сно и во ве́ки веко́в. Ами́нь.

Богоро́дичен: Жи́зни бы́вши хра́м, жи́знь присносу́щную улучи́ла еси́: сме́ртию бо к животу́ премину́ла еси́, Яже Жи́знь ро́ждши воипоста́сную, те́м вопие́м Ти: из глубины́ зо́л возведи́ ны, мо́лимтися Влады́чице Всепе́тая.

Конда́к, гла́с 4:

Притеце́м, правосла́внии лю́дие, и ви́дим чудотво́рную ико́ну Прему́дрости Бо́жия, Пречи́стыя Его́ Богома́тере: сия́ бо светолу́чно сия́ет в пречестне́м хра́ме свое́м и сердца́ весели́т, приходя́щих с ве́рою и взира́ющих со стра́хом и благогове́нием на пречи́стую сию́ ико́ну, помышля́юще в сердца́х на́ших, я́ко вои́стинну Ма́ти Бо́жия е́сть на упова́ние бо ве́рным воображе́ние огнезра́чное Ея́ зри́м, и покланя́емся, я́ко и́стинному Ея́ и пренепоро́чному де́вству в рождестве́ и по рождестве́. И па́ки у́бо мо́лим, и, припа́дающе, лобыза́ем пречестну́ю о́ную ико́ну, и велегла́сно вопие́м: О, милосе́рдая Влады́чице! спаси́ рабы́ Твоя́ от нападе́ния вра́жия, и от нахожде́ния иноплеме́ннича, и междоусо́бныя бра́ни, я́ко Ты́ еси́ все́х благи́х Пода́тельница, и Покрови́тельница притека́ющим к Тебе́ с ве́рою.

Икос:

Утверди́ у́м мо́й бла́г и помышле́ние, Бо́же Отче Вседержи́телю, и́бо Засту́пницу ми́рови, Пренепоро́чную Неве́сту Де́ву, воспе́ти дерза́ю, Ея́же де́вственную ду́шу Це́рковь Твою́ Боже́ственную наре́кл еси́, и, воплоще́ния ра́ди Сло́ва Твоего́, Софи́ю, Прему́дрость Бо́жию, именова́л еси́, и в Тоя́ и́мя царю́ Иустиниа́ну це́рковь созда́ти повеле́л еси́, и пребоже́ственному Кири́ллу фило́софу во явле́нии деви́цу избра́нну, и́менем Софи́ю, си́речь му́дрость Бо́жию, дарова́л еси́. Зра́к лица́ Ея́ огневи́ден вообрази́л еси́, от Нея́ же изы́де о́гнь Божества́ Твоего́, си́речь Единоро́дный Сы́н Тво́й, попаля́я стра́сти на́ша теле́сныя [тле́нныя]. Криле́ же То́й, я́ко безпло́тным небе́сным си́лам, дарова́л еси́. Вене́ц же ца́рский на главу́ Ея́ возложи́л еси́ и в десни́цу Ея́ ски́петр вда́л еси́. В шу́йце же Ея́ недове́домая сокрове́нная та́йна, ея́же непости́жно ве́дати и Ангелом. Торо́цы во ушесе́х Ея́ — житие́ Ангельское, и поко́ище Свята́го Ду́ха Твоего́ явля́еши; препоя́сание чре́сл Ея́ — старе́йшинство святи́тельства; но́зе же имя́ше на ка́мени, е́же на не́м утверди́ Це́рковь Твою́. Образ же Христа́ Твоего́ над главо́ю Тоя́ — преклоне́ние небесе́м и смотре́ния плотска́го та́инство явля́еши, я́коже е́сть Сы́н пре́жде ве́к Твоего́ Отча сия́ния, То́йже и под ле́ты от Пренепоро́чныя Де́вы без се́мене роди́ся, по всему́ Тоя́ подо́бию приобщи́ся. Сего́ ра́ди вопие́м вси́, я́ко Та́ е́сть вои́стинну Прему́дрость Бо́жия, прия́телище и Се́нь небе́сная, и все́х благи́х Пода́тельница, и Покрови́тельница притека́ющим к Не́й с ве́рою и прося́щим ве́лия ми́лости.

Пе́снь 7.

Ирмо́с: Юноши три́ в Вавило́не, веле́ние мучи́телево на бу́йство преложи́ша, и посреде́ пла́мене вве́ржени, ороша́еми, поя́ху: благослове́н еси́, Го́споди, Бо́же оте́ц на́ших.

Запе́в: Прему́дрость Бо́жия, Софи́я Преимени́тая, спаси́ ны гре́шныя рабы́ Твоя́.

Рука́ избра́нных удержи́т прему́дрость Бо́жию, лу́чши бо е́сть сребра́ и зла́та, и на версе́х сте́н пропове́дуется, и во врате́х си́льных приседи́т, и, дерза́ющи, глаго́лет: ра́дуйтеся со мно́ю, взыску́ющии мене́.

Запе́в: Прему́дрость Бо́жия, Софи́я Преимени́тая, спаси́ ны гре́шныя рабы́ Твоя́.

Сла́ву прему́дростию Бо́жиею насле́дова, та́ бо е́сть долгота́ жития́, и ле́та жи́зни да́рует, и ми́р прилага́ет, вся́ блага́я исправля́ет, и пу́ть жи́зни сохраня́ет на́м.

Сла́ва Отцу́ и Сы́ну и Свято́му Ду́ху:

Творя́й пра́вду насле́дит прему́дрость Бо́жию, Софи́ю именова́нную, я́ко бла́га сосца́ ея́ па́че вина́ и воня́ ми́ра ея́ па́че все́х арома́т. Взы́щем ту́, и во сле́д ея́ тече́м, да су́д и пра́вду да́рует на́м.

И ны́не и при́сно и во ве́ки веко́в. Ами́нь.

Богоро́дичен: Всесвяще́нное преставле́ние боже́ственныя Твоея́ и нетле́нныя Ма́тере, преми́рныя вы́шних си́л совокупи́ чи́ны, весели́тися с су́щими на земли́, Тебе́ пою́щими: благослове́н еси́, Го́споди, Бо́же оте́ц на́ших.

Пе́снь 8.

Ирмо́с: Вся́ческая, Влады́ко, прему́дростию Твое́ю соста́вил еси́, зе́млю же па́ки водрузи́л еси́, я́коже ве́си, глубине́ восхо́д утверди́л еси́ на вода́х безме́рных. Те́м вси́ вопие́м, воспева́юще: благослови́те, дела́ Госпо́дня, непреста́нно Го́спода.

Запе́в: Прему́дрость Бо́жия, Софи́я Преимени́тая, спаси́ ны гре́шныя рабы́ Твоя́.

Софи́я, Прему́дрость Бо́жия имену́емая, Саме́м Го́сподем нарече́нная, царю́ Иустиниа́ну в созда́нии чу́днаго хра́ма, Ангелом открове́нная, те́мже Тебе́ вопие́м, воспева́юще: благослови́те, вся́ дела́ Госпо́дня, непреста́нно Го́спода во вся́ ве́ки.

Запе́в: Прему́дрость Бо́жия, Софи́я Преимени́тая, спаси́ ны гре́шныя рабы́ Твоя́.

Изра́илю повеле́ Госпо́дь в Сило́ме ски́нию поткну́ти и ту́ че́стно храни́ти, кольми́ па́че честне́йшими одушевле́нная ски́ния, не Веселеи́лом сотворе́нная, но Саме́м Бо́гом учине́нная и Софи́я нарече́нная, в Ню́же Са́м Бо́г Сло́во всели́ся; благослови́те, вся́ дела́ Госпо́дня, непреста́нно Го́спода.

Сла́ва Отцу́ и Сы́ну и Свято́му Ду́ху:

Мы́сленный виногра́д хра́м Софи́и, Прему́дрости Бо́жии, си́речь чре́во Пресвяты́я Богома́тере, от него́же изы́де Огнь Боже́ственный, пожига́яй на́ши душетле́нныя стра́сти; благослови́те, вся́ дела́ Госпо́дня, непреста́нно Го́спода.

И ны́не и при́сно и во ве́ки веко́в. Ами́нь.

Богоро́дичен: О, вы́ше ума́ чуде́с Присноде́вы же и Богома́тере! Во гро́б бо все́льшися, показа́ ра́й, ему́же предстоя́ще дне́сь, ра́дующеся, пое́м и си́це глаго́лем: благослови́те, вся́ дела́ Госпо́дня, непреста́нно Го́спода.

Песнь 9

Ирмо́с: Сокрове́нное Бо́жие неизрече́нное в Тебе́ соверша́ется я́вственное та́инство, Де́во Пречи́стая, и́бо Бо́г из Тебе́ воплоти́ся за милосе́рдие, Те́мже Тя́ я́ко Богоро́дицу велича́ем.

Запе́в: Прему́дрость Бо́жия, Софи́я Преимени́тая, спаси́ ны гре́шныя рабы́ Твоя́.

Егда́ же недоумева́шеся ца́рь, в ко́е и́мя сози́ждет це́рковь Бо́жию, тогда́ яви́ся Ангел о́троку, стрегу́щему ору́дия, во о́бразе ка́женика, глаго́ля: клену́тися во и́мя Софи́и, Прему́дрости Бо́жии, в Ея́же и́мя це́рковь сия́ зи́ждется.

Запе́в: Прему́дрость Бо́жия, Софи́я Преимени́тая, спаси́ ны гре́шныя рабы́ Твоя́.

Он же, уве́дев явле́ние, ра́достен бе́ зело́, и на соверше́ние избра́нныя це́ркви Бо́жии тща́тельно каса́ется, и сея́ ра́ди вины́ венце́м прему́дрости облага́ется и во благоче́стии пе́рвый ца́рь нарица́ется.

Сла́ва Отцу́ и Сы́ну и Свято́му Ду́ху:

На́шего ра́ди спасе́ния Единоро́дный Сы́н и Сло́во Бо́жие хра́м Себе́ созда́ в пречестне́м чре́ве Де́вы Мари́и, и Ту́ Софи́ю именова́, Прему́дрость Бо́жию, е́же е́сть де́вственных душа́, те́мже Тя́ я́ко Богоро́дицу велича́ем.

И ны́не и при́сно и во ве́ки веко́в. Ами́нь.

Богоро́дичен: Приими́ от на́с пе́снь исхо́дную, Ма́ти жива́го Бо́га, и светоно́сною Твое́ю и Боже́ственною осени́ благода́тию, Императору — победительная, христолюби́вым лю́дем — ми́р, грехо́в оставле́ние — пою́щим и душа́м спасе́ние подаю́щи; те́мже Тя́ я́ко Богоро́дицу велича́ем.

Моли́тва к Софи́и, Прему́дрости Бо́жии.

Непостижи́мая и Всепе́тая Прему́дрость Бо́жия, Софи́я Преимени́тая, де́вственных душа́, си́речь Единоро́дный Сы́н, Сло́во Бо́жие, приими́ моле́бное сие́ пе́ние от недосто́йных и скве́рных у́ст на́ших. Аще и пи́сана су́ть: не красна́ пе́снь во усте́х гре́шничих, оба́че же разбо́йник еди́ным сло́вом спасе́ся, мыта́рь воздыха́нием оправда́ся и ханане́ина дще́рь ма́терним проше́нием исцели́ся, поне́же Ты́, Го́споди, Бла́г и Человеколюби́в, гряду́щаго в ми́р просвеща́еши, и грехи́ гре́шником отпуща́еши, и ра́зумом неразу́мных наполня́еши, и бу́ияго умудря́еши, и жа́ждущия благи́х слове́с ду́ши уче́нием Твои́м, я́ко самаряны́ню водо́ю живо́ю, напая́еши, блудника́ целому́дренна устроя́еши, разбо́йнику ра́й отверза́еши, зане́ Ты́ еси́ все́х благи́х Пода́тель, и Вразуми́тель, и животу́ Храни́тель, Христе́ Бо́же на́ш, и Тебе́ сла́ву и хвалу́, че́сть и благодаре́ние и славословле́ние возсыла́ем и поклоне́ние твори́м со Безнача́льным Твои́м Отце́м, и со Пресвяты́м и Благи́м и Животворя́щим Твои́м Ду́хом, и со Пресвято́ю и Пренепоро́чною Твое́ю Ма́терию, Влады́чицею на́шею Богоро́дицею и Присноде́вою Мари́ею, ны́не, и при́сно, и во ве́ки веко́в. Ами́нь.