Каноны. 17 апреля.

Канон преподобному Георгию, иже в Малеи.

Молитвы предначинательные

Моли́твами святы́х оте́ц на́ших, Го́споди Иису́се Христе́, Бо́же наш, поми́луй нас, ами́нь.

Сла́ва Тебе́, Бо́же наш, сла́ва Тебе́.

Царю́ Небе́сный, Уте́шителю, Ду́ше и́стины, И́же везде́ сый и вся исполня́яй, Сокро́вище благи́х и жи́зни Пода́телю, прииди́ и всели́ся в ны, и очи́сти ны от вся́кия скве́рны, и спаси́, Бла́же, ду́ши на́ша.

Святы́й Бо́же, Святы́й Кре́пкий, Святы́й Безсме́ртный, поми́луй нас. Трижды.

Сла́ва Отцу́ и Сы́ну и Свято́му Ду́ху, и ны́не и при́сно и во ве́ки веко́в. Ами́нь.

Пресвята́я Тро́ице, поми́луй нас; Го́споди, очи́сти грехи́ на́ша; Влады́ко, прости́ беззако́ния на́ша; Святы́й, посети́ и исцели́ не́мощи на́ша, и́мене Твоего́ ра́ди.

Го́споди, поми́луй, трижды.

Сла́ва Отцу́ и Сы́ну и Свято́му Ду́ху, и ны́не и при́сно и во ве́ки веко́в. Ами́нь.

О́тче наш, И́же еси́ на Небесе́х, да святи́тся и́мя Твое́, да прии́дет Ца́рствие Твое́, да бу́дет во́ля Твоя́, я́ко на Небеси́ и на земли́. Хлеб наш насу́щный да́ждь нам днесь; и оста́ви нам до́лги на́ша, я́коже и мы оставля́ем должнико́м на́шим; и не введи́ нас во искуше́ние, но изба́ви нас от лука́ваго.

Го́споди, поми́луй, 12,

Прииди́те, поклони́мся Царе́ви на́шему Бо́гу.

Прииди́те, поклони́мся и припаде́м Христу́, Царе́ви на́шему Бо́гу.

Прииди́те, поклони́мся и припаде́м Самому́ Христу́, Царе́ви и Бо́гу на́шему.

Псалом 50:

Поми́луй мя, Бо́же, по вели́цей ми́лости Твое́й, и по мно́жеству щедро́т Твои́х очи́сти беззако́ние мое́. Наипа́че омы́й мя от беззако́ния моего́, и от греха́ моего́ очи́сти мя; я́ко беззако́ние мое́ аз зна́ю, и грех мой предо мно́ю есть вы́ну. Тебе́ Еди́ному согреши́х и лука́вое пред Тобо́ю сотвори́х, я́ко да оправди́шися во словесе́х Твои́х, и победи́ши внегда́ суди́ти Ти. Се бо, в беззако́ниях зача́т есмь, и во гресе́х роди́ мя ма́ти моя́. Се бо, и́стину возлюби́л еси́; безве́стная и та́йная прему́дрости Твоея́ яви́л ми еси́. Окропи́ши мя иссо́пом, и очи́щуся; омы́еши мя, и па́че сне́га убелю́ся. Слу́ху моему́ да́си ра́дость и весе́лие; возра́дуются ко́сти смире́нныя. Отврати́ лице́ Твое́ от грех мои́х и вся беззако́ния моя́ очи́сти. Се́рдце чи́сто сози́жди во мне, Бо́же, и дух прав обнови́ во утро́бе мое́й. Не отве́ржи мене́ от лица́ Твоего́ и Ду́ха Твоего́ Свята́го не отыми́ от мене́. Возда́ждь ми ра́дость спасе́ния Твоего́ и Ду́хом Влады́чним утверди́ мя. Научу́ беззако́ныя путе́м Твои́м, и нечести́вии к Тебе́ обратя́тся. Изба́ви мя от крове́й, Бо́же, Бо́же спасе́ния моего́; возра́дуется язы́к мой пра́вде Твое́й. Го́споди, устне́ мои́ отве́рзеши, и уста́ моя́ возвестя́т хвалу́ Твою́. Я́ко а́ще бы восхоте́л еси́ же́ртвы, дал бых у́бо: всесожже́ния не благоволи́ши. Же́ртва Бо́гу дух сокруше́н; се́рдце сокруше́нно и смире́нно Бог не уничижи́т. Ублажи́, Го́споди, благоволе́нием Твои́м Сио́на, и да сози́ждутся сте́ны Иерусали́мския. Тогда́ благоволи́ши же́ртву пра́вды, возноше́ние и всесожега́емая; тогда́ возложа́т на oлта́рь Твой тельцы́.

Тропарь, глас 8:

В тебе́, о́тче, изве́стно спасе́ся, е́же по о́бразу:/ прии́м бо крест, после́довал еси́ Христу́,/ и де́я учи́л еси́ презира́ти у́бо плоть, прехо́дит бо,/ прилежа́ти же о души́, ве́щи безсме́ртней.// Те́мже и со А́нгелы сра́дуется, преподо́бне Гео́ргие, дух твой.

Стихи́ры свята́го Гео́ргия, гла́с 1.

Воздержа́нием стра́сти, о́тче Гео́ргие, / по́мыслу порабо́тил еси́, / безстра́стия бы́в красе́н, преблаже́нне, сосу́д, / вмести́телен живо́тным сия́нием, / и потреби́тель де́монов, / и страсте́й вра́чь досточу́дне.

Чи́стая мирополо́жница Боже́ственнаго Ду́ха, / чуде́с исто́чник, / мона́шествующих сто́лп, / кро́ткий и кро́ткаго Христа́ подо́бник, / земны́й Ангел и небе́сный челове́к бы́в, / да восхва́лится ны́не Гео́ргий.

В безмо́лвное приста́нище / устреми́в душе́вный кора́бль, / жите́йских мяте́жей, / я́ко от во́лн морски́х, отбе́г, / и́же к Бо́гу манове́ньми от земли́ возлете́л еси́ / и яви́лся еси́, с пло́тию Ангелом подо́бен.

Сла́ва, и ны́не, Богородичен:

Яко по́мощь Ты́ еси́ безпомо́щных челове́ков, / я́ко наде́жда еси́ все́х ненаде́жных / и реши́ло, Богоро́дице, лю́тых, / Помо́щница ми́ бу́ди, / от гре́х и бе́д, я́ко Ми́лостива, / избавля́ющи мя́, Пречи́стая.

Кано́н, гла́с 2.

Пе́снь 1.

Ирмос: Гряди́те лю́дие, пои́м пе́снь Христу́ Бо́гу, разде́льшему мо́ре и наста́вльшему лю́ди, я́же изведе́ из рабо́ты еги́петския, я́ко просла́вися.

Припев: Преподобне отче Георгие, моли́ Бо́га о нас.

Трисия́нною Богонача́льною све́тлостию просвеще́н, преподо́бне, ми́р оста́вил еси́ и страсте́й мглу́ и житие́м светле́йшим, о́тче, украси́лся еси́.

Припев: Преподобне отче Георгие, моли́ Бо́га о нас.

Наста́влен бы́в боже́ственным промышле́нием, Гео́ргие, к небеси́ веду́щую стезю́ ше́ствовал еси́, помо́щника стяжа́в еди́наго Благоде́теля и Всеще́драго.

Сла́ва Отцу́ и Сы́ну и Свято́му Ду́ху:

Бо́гом, блаже́нне, я́ве управля́емь, сынотворе́ния благода́тию освяща́емь, соверши́л еси́, о́тче, преподо́бно и пра́ведно жи́тельство.

И ны́не и при́сно и во ве́ки веко́в. Ами́нь.

Богородичен: Твои́м утвержде́нием и заступле́нием обога́щшеся, Богоро́дицу, Пречи́стая, испове́дающе Тя́, от треволне́ния жите́йскаго, Всенепоро́чная Де́во, спаса́емся.

Пе́снь 3.

Ирмос: Утверди́ на́с в Тебе́, Го́споди, дре́вом умерщвле́й гре́х, и стра́х Тво́й всади́ в сердца́ на́с, пою́щих Тя́.

Припев: Преподобне отче Георгие, моли́ Бо́га о нас.

Житие́ твое́ све́тло и сло́во, со́лию боже́ственною в Ду́се растворе́но, показа́ся, Гео́ргие, земледе́лания боже́ственнаго боже́ственный са́д.

Сла́ва Отцу́ и Сы́ну и Свято́му Ду́ху:

Сы́н Бо́жий ты́ креще́нием бы́ти, всеблаже́нне, сподо́блен, оте́ческое насле́дил еси́ сокро́вище, жития́ чистото́ю.

И ны́не и при́сно и во ве́ки веко́в. Ами́нь.

Богородичен: Утвержде́ние бу́ди, и прибе́жище, и покро́в, Де́во Богороди́тельнице, ве́рою к Тебе́ прибега́ющим и Бо́жию Тя́ Ма́терь пропове́дающим.

Пе́снь 4.

Ирмос: Услы́шах, Го́споди, слу́х Твоего́ смотре́ния, и просла́вих Тя́, Еди́не Человеколю́бче.

Припев: Преподобне отче Георгие, моли́ Бо́га о нас.

Испещре́н добро́тами доброде́тели и нра́вы светоно́сными, к Бо́гу возлете́л еси́, о́тче Гео́ргие.

Припев: Преподобне отче Георгие, моли́ Бо́га о нас.

Теку́щих, о́тче Гео́ргие, смуще́ния убежа́л еси́, к тишине́ боголюбе́зным житие́м претворя́яся.

Припев: Преподобне отче Георгие, моли́ Бо́га о нас.

Беззако́ния пото́цы твою́ ду́шу не возмого́ша смути́ти, сла́дости бо пото́цы тебе́ напои́ша.

Сла́ва Отцу́ и Сы́ну и Свято́му Ду́ху:

Боже́ственным поуче́нием, прему́дре, всегда́ внима́я, непостоя́нная помышле́ния отри́нул еси́, о́тче Гео́ргие.

И ны́не и при́сно и во ве́ки веко́в. Ами́нь.

Богородичен: Песносло́вяще, Чи́стая, во утро́бе Твое́й Воплоще́ннаго, и Тя́ славосло́вим, я́ко Богома́терь.

Пе́снь 5

Ирмос: Све́та Пода́телю и веко́в Тво́рче, Го́споди, во све́те Твои́х повеле́ний наста́ви на́с: ра́зве бо Тебе́, ино́го Бо́га не зна́ем.

Припев: Преподобне отче Георгие, моли́ Бо́га о нас.

Блаже́нство и безсме́ртную жи́знь получи́л еси́, о́тче му́дре, боже́ственными восхо́ды сходя́, всеблаже́нне, наде́ждею, любо́вию и ве́рою укрепля́емь.

Припев: Преподобне отче Георгие, моли́ Бо́га о нас.

Украша́яся смире́нием благосты́нным, преподо́бне, к высоте́ я́ве возне́слся еси́ доброде́телей, богому́дре, земледе́лания боже́ственнаго бы́в гумно́.

Сла́ва Отцу́ и Сы́ну и Свято́му Ду́ху:

Те́ла истоща́ние воздержа́нием опа́сно показа́л еси́ и чи́сто се́рдце стяжа́л еси́, и́мже сподо́бился еси́ ви́дети, о́тче, все́ми Неви́димаго.

И ны́не и при́сно и во ве́ки веко́в. Ами́нь.

Богородичен: Яко непости́жное и неудобозри́мое все́м, Влады́чице, е́же па́че ума́ та́инство, Отрокови́це, Боже́ственнаго рождества́ Твоего́: су́щаго бо вои́стинну Бо́га на́м родила́ еси́.

Пе́снь 6.

Ирмос: В бе́здне грехо́вней валя́яся, неизсле́дную милосе́рдия Твоего́ призыва́ю бе́здну: от тли́, Бо́же, мя́ возведи́.

Припев: Преподобне отче Георгие, моли́ Бо́га о нас.

Лука́вых духо́в отгони́тель те́пл яви́лся еси́, пресла́вне о́тче Гео́ргие, Свята́го Ду́ха соде́йством я́ве укрепля́емь.

Припев: Преподобне отче Георгие, моли́ Бо́га о нас.

Безстра́стия украше́н дарова́нием, целому́дрия ри́зою, Гео́ргие, пресве́тло оде́ялся еси́, страсте́й отгна́в смуще́ние.

Сла́ва Отцу́ и Сы́ну и Свято́му Ду́ху:

Пла́менное ору́жие преше́л еси́, му́дре, и ра́йския сла́дости сподо́бился еси́, кре́стным, Гео́ргие, обложе́н ору́жием непобеди́мым.

И ны́не и при́сно и во ве́ки веко́в. Ами́нь.

Богородичен: На Тя́ упова́ние возложи́х, Ма́ти Присноде́во, спасе́ния моего́, и Тя́ предста́тельницу полага́ю жи́зни моея́ тве́рду и непоколеби́му.

Седа́лен, гла́с 3.

Красне́йшаго Христа́ возжеле́л еси́ и теле́сныя стра́сти возненави́дел еси́, Ангельски на земли́, Гео́ргие, пожи́в. Те́мже свято́е твое́ пра́зднуем успе́ние и облобыза́ем ра́ку моще́й твои́х, из нея́же на́м то́чиши исцеле́ния, о́тче, любо́вию чту́щим тя́.

Пе́снь 7.

Ирмос: Образу злато́му на по́ле Деи́ре служи́му, трие́ Твои́ о́троцы небрего́ша безбо́жнаго веле́ния, посреде́ же огня́ вве́ржени, ороша́еми, поя́ху: благослове́н еси, Бо́же оте́ц на́ших.

Припев: Преподобне отче Георгие, моли́ Бо́га о нас.

Укрепи́в ду́шу си́лою Христо́вою, о́тче Гео́ргие, Того́ держа́вою отгна́л еси́ тебе́ ненави́дящих полки́, сия́ Кресто́м устраши́в, и́мже соблюда́емь пе́л еси́: благослове́н еси́, Го́споди, Бо́же оте́ц на́ших.

Припев: Преподобне отче Георгие, моли́ Бо́га о нас.

Блаже́н еси́, и добро́ тебе́ бу́дет ны́не, преблаже́ннейше, восприе́млющу боле́зней твои́х и подвиго́в воздая́ние и со Ангелы вопию́щу Го́сподеви, Гео́ргие: благослове́н еси́, Го́споди, Бо́же оте́ц на́ших.

Сла́ва Отцу́ и Сы́ну и Свято́му Ду́ху:

Бы́л еси́ све́тло жили́ще Христо́во, престо́л чу́вствия, о́тче, бы́в и му́дрости, святы́ни испо́лнен, ве́рою же и благода́тию сия́я, и зовы́й, Гео́ргие: благослове́н еси́, Бо́же оте́ц на́ших.

И ны́не и при́сно и во ве́ки веко́в. Ами́нь.

Богородичен: Све́щник Све́та, и о́блак све́тел, и свяще́ния ме́сто показа́лася еси́, Неискусобра́чная, святы́х бо Свято́е Сло́во прия́ла еси́ несказа́нно, Его́же пою́ще, вопие́м Ти́: благослове́нна Бо́га пло́тию ро́ждшая.

Пе́снь 8.

Ирмос: В пе́щь о́гненную ко отроко́м евре́йским снизше́дшаго, и пла́мень в ро́су прело́жшаго Бо́га, по́йте, дела́, я́ко Го́спода, и превозноси́те во вся́ ве́ки.

Припев: Преподобне отче Георгие, моли́ Бо́га о нас.

К неразори́мей жи́зни, к неувяда́ющей сла́дости, о́тче, преста́вился еси́ к присносу́щней сла́ве и к невече́рнему Све́ту: Бо́жие бо показа́лся еси́ де́лание, Его́же превозно́сим во ве́ки.

Припев: Преподобне отче Георгие, моли́ Бо́га о нас.

Яко ра́б Христо́в, я́ко слуга́ ве́рен и строи́тель Того́ та́ин, я́ко непреле́стен путево́ждь, бы́л еси́, Гео́ргие прему́дре, стра́сти врачу́я ду́ш же и теле́с.

Сла́ва Отцу́ и Сы́ну и Свято́му Ду́ху:

По́лн поще́ния пло́д к гумну́ Христо́ву, о́тче, прине́слся еси́, я́коже зре́л гро́зд, небе́сными точи́лы, преблаже́нне, изгне́лся еси́, умиле́ния вино́ источа́еши на́м в твое́й па́мяти.

И ны́не и при́сно и во ве́ки веко́в. Ами́нь.

Богородичен: Чре́ва Твоего́ Пло́д нетле́нныя мне́ жи́зни вино́вен яви́ся и сла́дости присносу́щныя, Богороди́тельнице Чи́стая. Те́мже Ти́ зову́, веселя́ся, арха́нгелов гла́с: ра́дуйся, Де́во.

Песнь 9

Ирмос: От Бо́га Бо́га Сло́ва, неизрече́нною му́дростию прише́дшаго обнови́ти Ада́ма, я́дию в тле́ние па́дшаго лю́те, от Святы́я Де́вы неизрече́нно воплоти́вшагося на́с ра́ди, ве́рнии, единому́дренно пе́сньми велича́ем.

Припев: Преподобне отче Георгие, моли́ Бо́га о нас.

Укрепля́емь ве́рою и Христо́вою си́лою, всеблаже́нне, огражде́н тве́рдо, се́ти де́монския разори́л еси́ и, си́х ловле́ний и кова́рств все́х отбе́г, Влады́це все́х предстои́ши, ра́дуяся.

Припев: Преподобне отче Георгие, моли́ Бо́га о нас.

Все́ жела́ние твое́, блаже́нне, к Бо́гу пренося́ и Боже́ственныя наслажда́яся добро́ты, ея́же вся́ко естество́ жела́ет, виде́нием, и дея́нием, и жития́ све́тлостию себе́ украси́л еси́, о́тче, те́мже тя́ ублажа́ем.

Сла́ва Отцу́ и Сы́ну и Свято́му Ду́ху:

О на́с, ве́рою твою́ па́мять соверша́ющих, Христа́ моля́ приле́жно, о́тче, не преста́й, спасти́ся на́м напа́стей, и треволне́ния, и бу́ри, и бе́д и страсте́й, и ми́р ми́ру дарова́ти, преблаже́нне.

И ны́не и при́сно и во ве́ки веко́в. Ами́нь.

Богородичен: Вопло́щшееся Сло́во, е́же пре́жде без пло́ти су́ще, я́ко Бо́г е́сть от Бо́га, родила́ еси́, еди́на Всепе́тая, на обновле́ние и спасе́ние все́х земноро́дных, те́мже, ве́рнии, Тя́ вси́ пе́сньми велича́ем.

Молитва

О свяще́нная главо́, преподо́бне о́тче, преблаже́нне а́вво Георгие, не забу́ди убо́гих твои́х до конца́, но помина́й нас всегда́ во святы́х и благоприя́тных моли́твах к Бо́гу: помяни́ ста́до твое́, е́же сам упа́сл еси́, и не забу́ди посеща́ти чад твои́х моли́ за ны, о́тче свяще́нный, за де́ти твоя́ духо́вныя, я́ко име́яй дерзнове́ние к Небе́сному Царю́: не премолчи́ за ны ко Го́споду, и не пре́зри нас, ве́рою и любо́вию чту́щих тя: помина́й нас недосто́йных у Престо́ла Вседержи́телева, и не преста́й моля́ся о нас ко Христу́ Бо́гу, и́бо дана́ тебе́ бысть благода́ть за ны моли́тися. Не мним бо тя су́ща ме́ртва: а́ще бо те́лом и преста́вился еси́ от нас, но и по сме́рти жив сый пребыва́еши, не отступа́й от нас ду́хом, сохраня́я нас от стрел вра́жиих и вся́кия пре́лести бесо́вския и ко́зней диа́вольских, па́стырю наш до́брый. А́ще бо и моще́й твои́х ра́ка пред очи́ма на́шима ви́дима есть всегда́, но свята́я твоя́ ду́ша со а́нгельскими во́инствы, со безпло́тными ли́ки, с небе́сными си́лами, у престо́ла Вседержи́телева предстоя́щи, досто́йно весели́тся, ве́дуще у́бо тя вои́стину и по сме́рти жи́ва су́ща, тебе́ припа́даем и тебе́ мо́лимся: моли́ся о нас Всеси́льному Бо́гу, о по́льзе душ на́ших, и испроси́ нам вре́мя на покая́ние, да невозбра́нно пре́йдем от земли́ на Не́бо, от мыта́рств же го́рьких, бесо́в возду́шных князе́й и от ве́чныя му́ки да изба́вимся, и Небе́снаго Ца́рствия насле́дницы да бу́дем со все́ми пра́ведными, от ве́ка угоди́вшими Го́споду на́шему Иису́су Христу́: Ему́ же подоба́ет вся́кая сла́ва, честь и поклоне́ние, со Безнача́льным Его́ Отце́м, и с Пресвяты́м и Благи́м и Животворя́щим Его́ Ду́хом, ны́не и при́сно, и во ве́ки веко́в. Ами́нь.