Канон святителю Николаю Чудотворцу, глас 8.

Тропарь, глас 4:

Пра́вило ве́ры и о́браз кро́тости, / воздержа́ния учи́теля / яви́ тя ста́ду твоему́ / Я́же веще́й И́стина. / Сего́ ра́ди стяжа́л еси́ смире́нием высо́кая, / нището́ю бога́тая, / о́тче священнонача́льниче Нико́лае, / моли́ Христа́ Бо́га, / спасти́ся душа́м на́шим.

Кано́н свято́му чудотво́рцу Никола́ю. Гла́с 8:

Пе́снь 1

Ирмо́с: Посе́ченый несеко́маго пресече́, и ви́де со́лнце зе́млю, ю́же не ви́де: лю́таго врага́ вода́ потопи́, и непроходи́мое про́йде Изра́иль: пе́снь же воспева́шеся, Го́сподеви пои́м, сла́вно бо просла́вися.

Припев: Святителю отче Николае, моли Бога о нас.

С ли́ки вы́шних си́л, Царю́ все́х блаже́нне предстоя́й, на́с на земли́ при́сно призыва́ющих тя́, вся́каго искуше́ния зла́го, Нико́лае, спаса́й, разреше́ния прося́ прегреше́ний на́ших.

И́же тобо́ю предста́телем обога́щшиися, Нико́лае, во дни́ же и в нощи́ ве́рою тебе́ взыва́ем: ны́не предвари́ ны вельми́ бе́дствующыя бесо́вскими лука́выми наве́ты, и тлетво́рных челове́к: я́ко да тишину́ получи́вше, восхваля́ем тя́.

Слава: Кре́пкими жи́лами моли́тв твои́х, Нико́лае, удави́ти на́с тща́щихся коне́чному удавле́нию преда́ждь, избавля́я на́с от те́х лука́ваго наве́та, во хвале́нии зову́щыя: Го́сподеви пои́м, сла́вно бо просла́вися.

И ныне, Богородичен: Зако́нов есте́ственных кроме́, родила́ еси́ Бо́га и Законода́вца, челове́ка бы́вша. Того́, я́ко Бла́га, моли́, Всенепоро́чная, на́ша беззако́ния презре́ти, вопию́щих всегда́: Го́сподеви пои́м, сла́вно бо просла́вися.

Пе́снь 3

Ирмо́с: Ты́ еси́ утвержде́ние притека́ющих к Тебе́, Го́споди: Ты́ еси́ све́т омраче́нных, и пое́т Тя́ ду́х мо́й.

Да тя́ почита́ем, да пое́м тя́ всегда́, пода́ждь на́м ру́ку по́мощи, святи́телю Нико́лае.

Успи́, Нико́лае, твои́ми неусыпа́ющими моли́твами, я́же на ны́ востаю́щыя напа́сти, мо́лим тя́.

Слава: Всего́ мя страстьми́ напа́ствуема, и искуше́ний лука́вых челове́к, хода́тайством твои́м, свя́те Нико́лае, изба́ви.

И ныне, Богородичен: Разреше́ние грехо́в, Чи́стая, дарова́ти ми́, моли́ Изба́вителя, и жите́йских лю́тых напа́стей.

Седален, глас 8.

Возше́д на высоту́ доброде́телей / и Боже́ственными отту́ду, о́тче, озари́вся сия́нии чуде́с, / пресве́тел вои́стинну яви́лся еси́ мирови па́стырь, / нам в напа́стех сый предста́тель непобеди́мь; / те́мже, пресла́вно врага́ победи́в, лжу отгна́л еси́ / и челове́ки спасл еси́ от сме́рти, Нико́лае, / моли́ Христа́ Бо́га грехо́в оставле́ние дарова́ти / чту́щим любо́вию святу́ю па́мять твою́.

Пе́снь 4

Ирмо́с: Услы́шах, Го́споди, смотре́ния Твоего́ та́инство, разуме́х дела́ Твоя́, и просла́вих Твое́ Божество́.

От мно́жества прегреше́ний мои́х, во мно́гия впа́даю безчи́сленныя ско́рби: потщи́ся, свя́те Нико́лае, помощи́ ми, благода́телю подо́бяся.

Себе́ самого́ пла́чуся погиба́юща, живы́й в ле́ности, моли́твами твои́ми, Нико́лае, к покая́нию руководи́ мя.

Слава: И́же три́ ю́ношы избавле́й, о́тче Нико́лае, умре́ти хотя́щыя, вся́кия мя́ изба́ви тесноты́, и ве́чнаго осужде́ния.

И ныне, Богородичен: Де́лати ми́ ра́зумы небе́сныя, Пречи́стая, укрепи́ мя, и души́ моея́ направля́ющи к живо́тным вхо́дом движе́ния.

Пе́снь 5

Ирмо́с: У́тренююще вопие́м Ти́, Го́споди, спаси́ ны: Ты́ бо еси́ Бо́г на́ш: ра́зве Тебе́ ино́го не ве́мы.

Укрепи́ на́с моли́твами твои́ми, богоблаже́нне Нико́лае, соблюда́ти повеле́ния Христа́, еди́наго Бо́га на́шего.

В Ми́рех пожи́в, Нико́лае, благоуха́ния Боже́ственнаго на́с испо́лни, благоче́стно воспева́ющих тя́.

Слава: Уще́дри на́с моли́твами твои́ми, святи́телю, Бо́га всеще́драго умоля́я, Нико́лае, да изба́вимся бе́д и скорбе́й.

И ныне, Богородичен: Во́д живото́чных испо́лнена су́щи, Отрокови́це, все́х на́с напо́й, благочестному́дренне пою́щыя Тя́.

Пе́снь 6

Ирмо́с: Моли́тву пролию́ ко Го́споду, и Тому́ возвещу́ печа́ли моя́: я́ко зо́л душа́ моя́ испо́лнися, и живо́т мо́й а́ду прибли́жися, и молю́ся я́ко Ио́на: от тли́, Бо́же, возведи́ мя.

Ра́й се́рдце твое́ яви́ся, Нико́лае, жи́зни дре́во посреде́ име́я, Изба́вителя Христа́: Его́же моли́ непреста́нно, рая́ сотвори́ти жи́тели вся́ ны́, те́плым засту́пником тобо́ю обога́щшыяся.

В ле́ности жи́знь мою́ прехожду́, и безбоя́зненно согреша́ю, окая́нный: и та́мо неотрица́емое суди́ще помышля́я, стра́хом содержи́мь е́смь: уще́дри мя́, Бо́же, Никола́а моли́твами, я́ко благоутро́бен.

Слава: Внеза́пу находя́щую ми́ бу́рю искуше́ний многообра́зных, за мно́жество мои́х согреше́ний, вопию́: не оста́ви мене́, блаже́нне, без заступле́ния, но простри́ ми я́ко ми́лостив по́мощи ру́ку, и спаси́ мя.

И ныне, Богородичен: Пала́та высо́каго Царя́, и огнеобра́зный была́ еси́ престо́л, Де́во, Херуви́м превы́шши, и Серафи́м, па́че ума́ бы́вшая. Те́мже Тя́ вся́кое дыха́ние сла́вит, я́ко Ма́терь Зижди́теля.

Кондак, глас 3:

В Ми́рех, свя́те, священноде́йствитель показа́лся еси́, / Христо́во бо, преподо́бне, Ева́нгелие испо́лнив, / положи́л еси́ ду́шу твою́ о лю́дех твои́х / и спасл еси́ непови́нныя от сме́рти. / Сего́ ра́ди освяти́лся еси́, / я́ко вели́кий таи́нник Бо́жия благода́ти.

Икос:

Воспои́м ны́не святи́теля пе́сньми, / ми́рским лю́дем па́стыря и учи́теля, / да моли́твами его́ просвети́мся: / се бо яви́ся чист весь, нетле́нен ду́хом, / Христу́ принося́ же́ртву непоро́чну, чи́сту, Бо́гу благоприя́тну, / я́ко святи́тель, очище́н и душе́ю и те́лом, / те́мже сый и́стинно Це́ркве предста́тель и побо́рник сея́, / я́ко вели́кий таи́нник Бо́жия благода́ти.

Пе́снь 7

Ирмо́с: О́троцы евре́йстии в пещи́ попра́ша пла́мень дерзнове́нно, и на ро́су о́гнь преложи́ша, вопию́ще: благослове́н еси́, Го́споди Бо́же во ве́ки.

Источи́л еси́ струи́ уче́ний, ересе́й изсуша́я пото́ки, и ве́рных ду́шы напоя́ющий бога́тно, священноде́йственниче Нико́лае: сего́ ра́ди тя́ почита́ем.

Укрепи́лся еси́ си́лою Тро́ическою возмога́емь, куми́ры ле́стныя погуби́ти, те́мже ве́рно молю́ся ти́, о́тче: ума́ моего́ и́долы стра́стныя отжени́.

Слава: Ми́рянов, преподо́бне, первопресто́льник бы́в, по сме́рти источа́еши Боже́ственное ми́ро, злосмра́дныя на́шя отгоня́я неду́ги, Нико́лае всеблаже́нне, ве́рно к тебе́ приступа́ющым.

И ныне, Богородичен: Укроти́ла еси́ тече́ние сме́ртное, безсме́ртнаго Бо́га ро́ждшая: Его́же моли́, Чи́стая, стра́сти умертви́ти смире́ннаго моего́ телесе́, и жи́зни мя́ сподо́бити.

Пе́снь 8

Ирмо́с: Богоглаго́ливии о́троцы в пещи́, со огне́м пла́мень попира́юще, поя́ху: благослови́те дела́ Госпо́дня Го́спода.

Просвеще́н сы́й, богому́дре святи́телю, светоза́рными луча́ми трисо́лнечнаго Божества́, страсте́й мои́х тьму́ моли́твами твои́ми разори́, Нико́лае.

И́же воево́ды три́ избавле́й от сме́рти, прише́ствием стра́шным твои́м, священнотаи́нниче Нико́лае, от вся́каго смертоно́снаго вре́да и на́с изба́ви.

Слава: Коле́блющыяся бесо́вскими искуше́нии, и от оби́дящих челове́к, твои́ми моли́твами утверди́ на́с, и невре́дны спаси́, всеблаже́нне Нико́лае.

И ныне, Богородичен: Мольбу́ принеси́ Го́сподеви, уще́дрити и спасти́ ве́рою к Тебе́ притека́ющыя, Пресвята́я Де́во, челове́ком помо́щнице.

Пе́снь 9

Ирмо́с: Вои́стинну Богоро́дицу Тя́ испове́дуем, спасе́ннии Тобо́ю, Де́во Чи́стая, с безпло́тными ли́ки Тя́ велича́юще.

Я́ко изба́витель в ско́рби ве́рою тя́ моля́щым, изба́ви мя́ зло́бы вся́кия, Нико́лае, блага́го моля́ Бо́га и Го́спода.

Сы́й с небе́сными ны́не ликостоя́ньми, святе́йший о́тче Нико́лае, блага́го умоли́ Бо́га, спасти́ на́с.

Слава: Су́д при две́рех, блюди́ душе́ моя́, и Судии́ Бо́гу возопи́й: Никола́а моли́твами спаси́ мя, Го́споди.

И ныне, Богородичен: Све́та су́щи прия́телище, Де́во, просвети́ омраче́нную страстьми́ ду́шу мою́: я́ко да ве́рою и любо́вию при́сно сла́влю Тя́.

Молитва

О всесвяты́й Нико́лае, уго́дниче преизря́дный Госпо́день, те́плый наш засту́пниче, и везде́ в ско́рбех ско́рый помо́щниче! Помози́ мне, гре́шному и уны́лому, в настоя́щем житии́, умоли́ Го́спода Бо́га дарова́ти ми оставле́ние всех мои́х грехо́в, ели́ко согреши́х от ю́ности моея́, во всем житии́ мое́м, де́лом, сло́вом, помышле́нием и все́ми мои́ми чу́вствы; и во исхо́де души́ моея́ помози́ ми, окая́нному, умоли́ Го́спода Бо́га, всея́ тва́ри Соде́теля, изба́вити мя возду́шных мыта́рств и ве́чнаго муче́ния; да всегда́ прославля́ю Отца́, и Сы́на, и Свята́го Ду́ха, и твое́ ми́лостивное предста́тельство, ны́не и при́сно и во ве́ки веко́в, ами́нь.