Канон святителю Николаю Чудотворцу, глас 5.

Тропарь, глас 4:

Пра́вило ве́ры и о́браз кро́тости, / воздержа́ния учи́теля / яви́ тя ста́ду твоему́ / Я́же веще́й И́стина. / Сего́ ра́ди стяжа́л еси́ смире́нием высо́кая, / нището́ю бога́тая, / о́тче священнонача́льниче Нико́лае, / моли́ Христа́ Бо́га, / спасти́ся душа́м на́шим.

Кано́н, и́же во святы́х отцу́ на́шему Никола́ю Чудотво́рцу. Творе́ние Ио́сифово, [его́же краегране́сие: Пя́тое принесу́ тебе́, Нико́лае, пе́ние.] Гла́с 5:

Пе́снь 1

Ирмо́с: Коня́ и вса́дника в мо́ре Чермно́е, сокруша́яй бра́ни мы́шцею высо́кою, Христо́с истрясе́: Изра́иля же спасе́, побе́дную пе́снь пою́ща.

Припев: Святителю отче Николае, моли Бога о нас.

Ве́рою и любо́вию, О́тче, присво́ився Бо́гови, всесвята́я Сего́ испо́лнил еси́ хоте́ния: И́мже по всему́ свя́т бы́л еси́, святи́телю му́дре Нико́лае.

Иму́ще тя́ предста́теля к Ще́дрому, и́же напа́стьми и печа́льми одержи́мии, к тебе́ прибега́ем: да́руй ру́ку спаса́ющую на́с от вся́кия тесноты́.

Слава: Ми́ряном святи́теля Христо́с пома́за тя́, благово́нием чуде́с на́с облагоуха́юща. Те́мже мо́лим тя́, Нико́лае, злово́ния грехо́внаго изба́вити на́с.

И ныне, Богородичен: Дре́вле проро́ческий Тя́ ли́к пронарече́ го́ру Боже́ственную, Де́во, и две́рь непроходи́мую. Те́мже мо́лимся Ти́: покая́ния две́ри Боже́ственныя, Отрокови́це, отве́рзи на́м.

Пе́снь 3

Ирмо́с: Водрузи́вый на ничесо́мже зе́млю повеле́нием Твои́м, и пове́сивый неодержи́мо тяготе́ющую, на недви́жимем Христе́, ка́мени за́поведей Твои́х, Це́рковь Твою́ утверди́, Еди́не Бла́же и Человеколю́бче.

Стре́лы лука́ваго притупи́л еси́, преподо́бне, противле́нием Боже́ственных твои́х трудо́в: но Твои́ми моли́твами, прему́дре, от того́ злоде́йствия и наси́лия соблюди́ неврежде́нны, Тебе́ воспева́ющыя, вели́кий Нико́лае.

Житие́ а́нгельское на земли́ показа́в, ны́не со А́нгелы при́сно предстои́ши престо́лу Тро́ическому, свяще́нне, на́ших согреше́ний и напа́стей разреше́ния прося́, О́тче первосвяти́телю Нико́лае.

Слава: Ума́ моего́ омраче́ние все́ отжени́, Нико́лае, твои́ми светоно́сными моли́твами, ути́ши бу́рю страсте́й, упра́ви мя́, о́тче, к безстра́стия приста́нищу, молю́ся, я́ко да во хвале́нии сла́влю тя́.

И ныне, Богородичен: Предстоя́щи одесну́ю Христа́, я́ко Цари́ца, ря́сны златы́ми Богообра́дованная оде́яна вои́стинну, на́м Ца́рствие Небе́сное моли́твами Твои́ми, Отрокови́це, исхода́тай, Всенепоро́чная.

Седален, глас 8.

Возше́д на высоту́ доброде́телей / и Боже́ственными отту́ду, о́тче, озари́вся сия́нии чуде́с, / пресве́тел вои́стинну яви́лся еси́ мирови па́стырь, / нам в напа́стех сый предста́тель непобеди́мь; / те́мже, пресла́вно врага́ победи́в, лжу отгна́л еси́ / и челове́ки спасл еси́ от сме́рти, Нико́лае, / моли́ Христа́ Бо́га грехо́в оставле́ние дарова́ти / чту́щим любо́вию святу́ю па́мять твою́.

Пе́снь 4

Ирмо́с: Боже́ственное Твое́ разуме́в истоща́ние, прозорли́во Авваку́м, Христе́, со тре́петом вопия́ше Тебе́: во спасе́ние люде́й Твои́х спасти́ пома́занныя Твоя́ прише́л еси́.

Мимотеку́щими измени́л еси́ бу́дущая, и́хже прича́стники и на́с святы́ми твои́ми моли́твами сотвори́, Нико́лае, и искуше́ния вся́каго избавля́я жите́йскаго.

Ми́ряном первопресто́льник бы́в, Нико́лае, вся́ чу́вствия се́рдца моего́ ми́ром облагоуха́й, свя́те, и стра́сти злосмра́дныя от сего́, моли́твами твои́ми отгоня́й всегда́.

Слава: Сокруши́ вра́жия ко́зни ви́димыя, и неви́димыя, Нико́лае, всегда́ борю́щыя ны́ на́шя враги́ в безконе́чную па́губу посли́.

И ныне, Богородичен: Свята́я Богоро́дице, помози́ ми, сла́достьми вы́ну потопля́ему теле́сными, и на одре́ уны́ния при́сно слежа́щу и стеня́щу.

Пе́снь 5

Ирмо́с: Одея́йся све́том я́ко ри́зою, к Тебе́ у́тренюю, и Тебе́ зову́: ду́шу мою́ просвети́ омраче́нную, Христе́, я́ко еди́н Благоутро́бен.

Куми́ры сокруши́л еси́ и́дольския, свя́те, и сове́ты безде́льны ерети́чествующих показа́л еси́, Нико́лае, и ведо́мыя на сме́рть изба́вил еси́.

У́треневав ко Го́споду измла́да, преподо́бне, и та́мо су́щими светоли́тии ве́сь просвети́лся еси́. Те́мже молю́ся: души́ моея́ о́блаки разжени́.

Слава: Тебе́ мо́лим, о́тче Нико́лае, в ча́с се́й посреде́ бу́ди все́х призыва́ющих тя́, и я́же ко спасе́нию даруй на́м проше́ния.

И ныне, Богородичен: Непости́жимый умо́м, Богоблагода́тная, обдержа́ние Тя́, плотоно́сец бы́в, прия́т челове́ки, избавля́я от одержа́щих скорбе́й.

Пе́снь 6

Ирмо́с: Неи́стовствующееся бу́рею душетле́нною, Влады́ко Христе́, страсте́й мо́ре укроти́, и от тли́ возведи́ мя, я́ко Благоутро́бен.

Ми́лостива соде́лай Влады́ку, твои́ми моли́твами, все́м чту́щым тя́, Нико́лае, я́ко да на́ших прегреше́ний разреше́ние да́рует.

Неду́г изба́ви и собла́зн жите́йских, напа́стей же и скорбе́й, Нико́лае, тя́ моли́твенника ко Го́споду стяжа́вших.

Слава: Врача́ тя́ изя́щна Влады́ка показа́ Христо́с: те́мже неду́ги исцели́, благоче́стно к тебе́ приступа́ющих, Нико́лае.

И ныне, Богородичен: Роди́тельница безму́жная, Богома́ти была́ еси́, Чи́стая. Сего́ ра́ди ве́рою молю́ Тя́: души́ моея́ уны́ния разжени́.

Кондак, глас 3:

В Ми́рех, свя́те, священноде́йствитель показа́лся еси́, / Христо́во бо, преподо́бне, Ева́нгелие испо́лнив, / положи́л еси́ ду́шу твою́ о лю́дех твои́х / и спасл еси́ непови́нныя от сме́рти. / Сего́ ра́ди освяти́лся еси́, / я́ко вели́кий таи́нник Бо́жия благода́ти.

Икос:

Воспои́м ны́не святи́теля пе́сньми, / ми́рским лю́дем па́стыря и учи́теля, / да моли́твами его́ просвети́мся: / се бо яви́ся чист весь, нетле́нен ду́хом, / Христу́ принося́ же́ртву непоро́чну, чи́сту, Бо́гу благоприя́тну, / я́ко святи́тель, очище́н и душе́ю и те́лом, / те́мже сый и́стинно Це́ркве предста́тель и побо́рник сея́, / я́ко вели́кий таи́нник Бо́жия благода́ти.

Пе́снь 7

Ирмо́с: Превозноси́мый отце́в Госпо́дь, пла́мень угаси́, о́троки ороси́ согла́сно пою́щыя: Бо́же, благослове́н еси́.

Ве́сь возложи́вся Бо́гу, Нико́лае, всего́ мя спаси́, жите́йскими страстьми́ окая́нно всегда́ впа́дающа, богому́дре.

Свети́ло Богоза́рнейшее, ума́ моего́ озари́, страсте́й мра́ком при́сно помрача́ема, и дава́й благообра́зно ходи́ти в житии́.

Слава: Вся́кая отверза́емая на мя́, Нико́лае, уста́ лука́вая, твои́ми моли́твами загради́: и изба́ви мя́ ви́димых вра́г и неви́димых.

И ныне, Богородичен: Из Тебе́ на́м возсия́ невече́рнее Со́лнце, о́блаче всесве́тлый, Христо́с Бо́г на́ш, просвеща́я и́же во тьме́ неве́дения, Богоро́дице.

Пе́снь 8

Ирмо́с: Тебе́, Вседе́телю, в пещи́ о́троцы, всеми́рный ли́к спле́тше поя́ху: дела́ вся́кая Го́спода по́йте и превозноси́те во вся́ ве́ки.

В ми́рех первосвяти́тель бы́в вели́кий, души́ моея́, Нико́лае, чу́вствия ми́ром облагоуха́й: я́ко да избе́гну страсте́й злово́ния, и Уте́шителеву прииму́ благода́ть.

Уста́вил еси́ прему́дре твоего́ свята́го язы́ка струя́ми, струи́ А́риевы ху́льныя. Те́мже вопию́ ти: то́ки страсте́й мои́х изсуши́ моли́твами твои́ми, Нико́лае всеблаже́нне.

Изба́ви на́с согреше́ний моли́твами твои́ми, де́монскаго озлобле́ния, язы́ческаго плене́ния, и все́х челове́к лука́внейшаго зла́го вре́да, да тя́ я́ко изба́вителя на́шего восхваля́ем.

Слава: Тро́ичен: И́же Тро́ически единонача́лие непреста́нно ве́рою сла́вяще, возопии́м: О́тче, и Сло́ве, и Всесвяты́й Ду́ше, песносло́вим Тя́ во вся́ ве́ки

И ныне, Богородичен: В пло́ть на́с ра́ди из Тебе́ Бо́г обле́кся, чи́стую Тебе́ всенепоро́чную, всему́ ро́ду на́шему Боже́ственную показа́ Де́во предста́тельницу. Те́мже Тя́ ве́рнии велегла́сно воспева́ем.

Пе́снь 9

Ирмо́с: Иса́ие лику́й, Де́ва име́ во чре́ве, и роди́ Сы́на Емману́ила, Бо́га же и челове́ка, Восто́к и́мя Ему́: его́же велича́юще, Де́ву ублажа́ем.

Святи́тель Боже́ствен бы́в, вся́ за́поведи сохрани́л еси́ Xристо́вы: те́мже ве́рным храни́тель Боже́ственный бы́л еси́, о́тче Нико́лае, соблюда́й те́х от вся́ких напа́стей и озлобле́ния.

Я́коже иногда́ препита́л еси́ гра́д тво́й изнемога́ющ гла́дом, я́ко до́бр па́стырь, преподо́бне: та́кожде и ны́не препита́й ду́шу мою́ хле́бом разу́мным, о́тче Нико́лае, тя́ засту́пника бла́га стяжа́вшаго.

Тя́ вели́кое со́лнце, на высоте́ лежа́щее при́сно Це́ркве Христо́вы, преподо́бне па́стырю, ве́рно мо́лим тя́: светоно́сными блиста́ньми све́та, глубо́кую тьму́ отжени́ греха́ ду́ш на́ших.

Слава: Прибли́жися, я́коже пи́шется, де́нь стра́шный прише́ствия Христо́ва. Подви́гнися, душе́, отри́ни ле́ность, и усе́рдно Христу́ возопи́й: спаси́ мя, Го́споди, Никола́а Твоего́ моле́нием.

И ныне, Богородичен: Све́тел Тя́ све́щник проро́к прови́дяше, Пречи́стая, свещу́ разу́мную, нося́щую Христа́, И́мже просвети́хомся, и́же во тьме́ лежа́щии и страсте́х, Тя́ ублажа́ем, Богоро́дице Присноде́во.

Молитва

О всесвяты́й Нико́лае, уго́дниче преизря́дный Госпо́день, те́плый наш засту́пниче, и везде́ в ско́рбех ско́рый помо́щниче! Помози́ мне, гре́шному и уны́лому, в настоя́щем житии́, умоли́ Го́спода Бо́га дарова́ти ми оставле́ние всех мои́х грехо́в, ели́ко согреши́х от ю́ности моея́, во всем житии́ мое́м, де́лом, сло́вом, помышле́нием и все́ми мои́ми чу́вствы; и во исхо́де души́ моея́ помози́ ми, окая́нному, умоли́ Го́спода Бо́га, всея́ тва́ри Соде́теля, изба́вити мя возду́шных мыта́рств и ве́чнаго муче́ния; да всегда́ прославля́ю Отца́, и Сы́на, и Свята́го Ду́ха, и твое́ ми́лостивное предста́тельство, ны́не и при́сно и во ве́ки веко́в, ами́нь.