Канон Господу нашему Иисусу Христу, глас 7.

Тропарь, глас 7:

Уврачу́й души́ моея́ стра́сти неисце́льныя, Боже́ственная Тро́ице: и исхити́ мя гее́нны, и искуше́ний, я́же во еди́ном Божестве́ сла́вимая благоче́стно: и ве́чнующее ми́ Ца́рство да́руй.

Кано́н покая́нен ко Го́споду на́шему Иису́су Христу́. Творе́ние Ио́сифово, гла́с 7:

Пе́снь 1

Ирмо́с: Сокруши́вшему бра́ни мы́шцею Свое́ю, и вса́дники триста́ты погрузи́вшему, пои́м Ему́, я́ко Изба́вителю на́шему Бо́гу, я́ко просла́вися.

Припев: Помилуй мя Боже, помилуй мя.

Всегда́ согреша́ю, и не бою́ся, Тебе́, Христе́, долготерпе́нием и́щущаго моего́ покая́ния: да́ждь ми́ по́мысл обраще́ния я́ко бла́г, и не пре́зри мене́. (Дважды)

Слава: Грехи́ ко грехо́м прилага́яй, Христе́, при́сно ника́коже престаю́ а́з окая́нный, Еди́не Бла́же безгре́шне, уще́дри и спаси́ мя.

И ныне, Богородичен: Мно́гими грехи́ озло́бленную ду́шу мою́, Богороди́тельнице Де́во, исцели́: я́ко да во гла́сех благодаре́ния, приле́жно всегда́ сла́влю Тя́.

Пе́снь 3

Ирмо́с: Небеса́ утверди́вый сло́вом, и земно́е основа́ние укрепи́вый на вода́х мно́гих, утверди́ мо́й у́м, в во́лю Твою́, Человеколю́бче.

И́же презира́яй челове́ков грехи́, мно́гаго ра́ди, Христе́, человеколю́бия, пре́зри, Еди́не Спа́се, мно́гая моя́ зла́я: да Тя́ сла́влю, Преблага́го. (Дважды)

Слава: Да плотска́я хоте́ния сотворю́, Твоя́ хоте́ния, Христе́, презре́в безсо́вестный, и бою́ся пла́меннаго томле́ния, Сло́ве, от него́же мя́ изба́ви.

И ныне, Богородичен: Две́рь Бо́жию прови́де Тя́ проро́к, е́юже са́м про́йде еди́н, я́коже ве́сть, Де́во Пречи́стая. Те́мже молю́ся Ти́, покая́ния две́ри Сама́ ми отве́рзи.

Стихира, глас 7

Я́ко непло́дную смоко́вницу не посецы́ мене́, Спа́се, гре́шнаго: но на мно́га ле́та проще́ние ми́ да́руй, напая́я ду́шу мою́ слеза́ми покая́ния, да пло́д принесу́ Ти ми́лостыни.

Пе́снь 4

Ирмо́с: Плотско́е прише́ствие Твое́, Христе́, уверя́я проро́к Авваку́м взыва́ше: сла́ва си́ле Твое́й, Го́споди.

Устрани́хся от пути́, к жи́зни веду́щаго мя́, и в ро́в злы́х впадо́х: Спа́се, не пре́зри мене́. (Дважды)

Слава: Сле́зныя ми́ то́ки низпосли́, Влады́ко Сло́ве Бо́жий: да отмы́ю мно́гих согреше́ний мои́х тиме́ния.

И ныне, Богородичен: Воплоти́ся от крове́й Твои́х чи́стых Госпо́дь, покая́ние челове́ком да́руя все́м, Отрокови́це, хода́тайством твои́м.

Пе́снь 5

Ирмо́с: Разгна́вый но́щь стра́стную, возсия́й ми́ све́т у́мный, началоро́дную тьму́ отгна́в бе́здны, и первозда́нный све́т возсия́вый ми́ру, Соде́телю все́х.

Изба́ви мя́, Сло́ве, пра́веднаго Твоего́ гне́ва, егда́ су́диши земли́: и от мно́гих согреше́ний покая́нием очи́щ, хра́м мя́ покажи́ Твоея́ бла́гости, Еди́не Соде́телю все́х. (Дважды)

Слава: От зе́льныя мглы́ страсте́й ослепи́хся умо́м, и не ве́м, что́ де́лаю, онечу́вствився се́рдцем: обрати́ мя, Христе́, и покая́ние ми́ да́руй чисти́тельное скве́рн.

И ныне, Богородичен: Я́же со́лнца о́блаче све́тлый, возсия́й ми́ све́т мы́сленный и́стиннаго покая́ния, и отжени́ тьму́ лука́вых помышле́ний: да ве́рою пою́ Тя, я́ко спасе́ние ве́рных.

Пе́снь 6

Ирмо́с: Во глубину́ грехо́вную впа́дся, Бла́же, я́ко Ио́на от ки́та вопию́ Ти: возведи́ от тли́ живо́т мо́й, и спаси́ мя, Человеколю́бче.

Но́в блудни́к яви́хся, скве́рно жи́в на земли́, и сластны́м стремле́нием подклони́хся: обрати́ мя, Христе́ Бо́же мо́й, и спаси́ мя я́ко Человеколю́бец. (Дважды)

Слава: Возстени́, о душе́ моя́, да изба́вишися стена́ния: прослези́ся, я́ко да сле́з непреста́нных не прии́меши иску́са та́мо в боле́зни, ни еди́ныя же иму́щих по́льзы.

И ныне, Богородичен: Из глубины́ мя ле́ности безме́рных зо́л возведи́, Блага́я, я́же бе́здну благоутро́бия ро́ждши, исто́чник ми́ сле́з, Присноде́во, да́руй.

Седален, глас 7

Стру́пы моего́ се́рдца неисце́льныя, Го́споди, уврачу́й, я́ко Еди́н Вра́чь ду́ш же и теле́с: и ступа́ти ми́ пра́во всегда́ поспе́й во спаси́тельныя пути́.

Пе́снь 7

Ирмо́с: Су́щым в пещи́ отроко́м Твои́м, Спасе́, не прикосну́ся, ниже́ стужи́ о́гнь. Тогда́ трие́ я́ко еди́неми усты́ поя́ху, и благословля́ху глаго́люще: благослове́н еси́ Бо́же оте́ц на́ших.

В стра́сти безче́стия впадо́х, ското́м, Спа́се, уподо́бихся, и омрачи́вся не ви́жду жда́ния Твоего́ сло́ве, долготерпели́внаго: обраще́ния ми вре́мя да́руй. И спаси́ мя. (Дважды)

Слава: В ле́ности житие́ мое́ сконча́х, де́я я́же не ле́ть е́сть твори́ти, и се́ ны́не про́чее ко врато́м приближа́юся а́довым, не прие́мля чу́вства: не пре́зри мя́, Христе́, и́же еди́н сы́й бла́г.

И ныне, Богородичен: Сви́ток но́в проро́к Тебе́ предви́дев, в не́мже написа́ся сло́во О́тчее. Те́мже, Чи́стая, молю́ся: в кни́зе мне́ живы́х написа́тися моли́, мно́гих мои́х зо́л разоря́ющи написа́ние.

Пе́снь 8

Ирмо́с: А́нгельми немо́лчно в вы́шних сла́вимаго Бо́га, небеса́ небе́с, земля́ и го́ры и хо́лми, и глубина́, и ве́сь ро́д челове́ческий, пе́сньми того́ я́ко Созда́теля и Изба́вителя благослови́те.

Преизъоби́льно наслади́вся вредя́щих сласте́й, умовре́дно несмы́сленный а́з, преидо́х вся́каго гре́шника: име́яй благоутро́бия премно́жество, пода́ждь ми́ очище́ние прегреше́ний. (Дважды)

Слава: Ны́не при две́рех Жени́х, свещу́ украси́, душе́, еле́ем напоя́ющи сию́ милосе́рдия, и вся́кими до́брыми де́лы: пре́жде да́же не затвори́тся две́рь, потщи́ся со Христо́м вни́ти в ра́дости неизрече́нней.

И ныне, Богородичен: Богоро́дице, изве́стное предста́тельство, и наде́жда христиа́н, в де́нь стра́шный предста́ни ми́ прегреши́вшему мно́го: и изба́ви гее́нны стра́шныя, овца́м мя́ десны́м сочетава́ющи.

Пе́снь 9

Ирмо́с: Безсе́меннаго Рождества́ зача́тие кто́ ска́жет от челове́к? нетле́ннаго Рождества́ рожде́нию кто́ не почуди́тся от земноро́дных? те́м Тя́ племена́ земна́я, Богоро́дице, велича́ем.

Да насле́дим бу́дущая блага́я, воспла́чем, воздохне́м, умо́лим Христа́, до́ндеже вре́мя и́мамы ве́рнии, покая́ния и моле́ния. (Дважды)

Слава: Я́ко ханане́а зову́ Ти: поми́луй мя́, Христе́, я́коже дре́вле нича́щую испра́ви мя́, Иису́се: и спаси́ мя, Спа́се, я́ко Петра́, грехи́ погружа́емаго.

И ныне, Богородичен: Обле́кся в мя́ Госпо́дь, из Тебе́ про́йде, Пречи́стая: Того́ у́бо моли́, оде́ждею мя́ просвети́ти све́та, Де́во, совле́кшаго мя́ ны́не страсте́й вре́тища тяжча́йшаго.

Молитва

Ненави́дящих и оби́дящих нас прости́, Го́споди, Человеколю́бче. Благотворя́щим благосотвори́. Бра́тиям и сро́дником на́шим да́руй я́же ко спасе́нию проше́ния и жизнь ве́чную. В не́мощех су́щия посети́ и исцеле́ние да́руй. И́же в мо́ри упра́ви. С путеше́ствующими спутеше́ствуй. Служа́щим и ми́лующим нас, грехо́в оставле́ние да́руй. Запове́давших нам, недосто́йным, моли́тися о них, поми́луй по вели́цей Твое́й ми́лости. Помяни́, Го́споди, пре́жде усо́пшия отцы́ и бра́тию на́шу, и упоко́й я́, иде́же присеща́ет свет лица́ Твоего́. Помяни́, Го́споди, бра́тий на́ших плене́нных и изба́ви я́ от вся́каго обстоя́ния. Помяни́, Го́споди, плодонося́щих и доброде́лающих во святы́х Твои́х це́рквах, и даждь им я́же ко спасе́нию проше́ния и жизнь ве́чную. Помяни́, Го́споди, и нас, смире́нных и гре́шных и недосто́йных раб Твои́х, и просвети́ наш ум све́том ра́зума Твоего́, и наста́ви нас на стезю́ за́поведей Твои́х. Моли́твами Пречи́стыя Влады́чицы на́шея Богоро́дицы и Присноде́вы Мари́и и всех Твои́х святы́х. Я́ко благослове́н еси́ во ве́ки веко́в. Ами́нь.