Канон Пресвятой Богородице, глас 7.

Тропарь, глас 7:

Я́ко на́шего воскресе́ния сокро́вище, / на Тя наде́ющияся, Всепе́тая, / от ро́ва и глубины́ прегреше́ний возведи́; / Ты бо пови́нныя греху́ спасла́ еси́, / ро́ждшая Спасе́ние на́ше. / Я́же пре́жде рождества́ Де́ва, и в рождестве́ Де́ва, / и по рождестве́ па́ки пребыва́еши Де́ва.

Кано́н Пресвяте́й Богоро́дице: творе́ние Ио́сифово. Гла́с 7:

Пе́снь 1

Ирмо́с: Ма́нием Твои́м на земны́й о́браз преложи́ся, пре́жде удоборазлива́емое водно́е естество́, Го́споди: те́мже немо́кренно пешеше́ствовав Изра́иль, пое́т Тебе́ пе́снь побе́дную.

Припев: Пресвятая Богородице, спаси нас.

Пою́щыя, Богоро́дице, вели́чия Твоя́ любо́вию, Твоя́ снабди́ лю́ди, и от вре́да изба́ви: Ты́ бо все́х еси́ Предста́тельница и Наста́вница, Чи́стая, и утвержде́ние.

Во́ду безсме́ртия ро́ждши, Де́во, исцеле́ния во́ды на́м пода́ждь, вся́ смертоно́сныя стра́сти ду́ш на́ших и теле́с омыва́ющи.

Слава: Честно́е, Влады́чице Богора́дованная, селе́ние яви́лася еси́ поче́тшаго естество́ пра́отца: те́мже Тя́, Чи́стая, мо́лим, вся́каго безче́стия страсте́й изба́ви на́с.

И ныне: Со́лнце пра́вды ро́ждши ми́рови, тьму́ отжени́ от воспева́ющих Тя́ ве́рою, Отрокови́це, во светоза́рнем Твое́м се́м и святе́м хра́ме, Всенепоро́чная.

Пе́снь 3

Ирмо́с: В нача́ле небеса́, всеси́льным Сло́вом Твои́м утвержде́й, Го́споди Спа́се, и вседе́тельным и Бо́жиим Ду́хом, всю́ си́лу и́х: на недви́жимем мя́ ка́мени испове́дания Твоего́ утверди́.

Да́ждь рабо́м Твои́м, Чи́стая, спаси́тельная проше́ния, в Боже́ственнем Твое́м се́м хра́ме, в не́мже исто́чник чуде́с показа́ла еси́: источа́я при́сно наи́тием Боже́ственным, и ве́чнаго изба́ви муче́ния.

Ми́лостей бе́здну Христа́ па́че вины́ и сло́ва, да́теля все́х благи́х ро́ждши, Чи́стая, Боже́ственный хра́м Тво́й се́й показу́еши вои́стинну, осене́нием твои́м Боже́ственным, вся́ческих страсте́й очище́ние.

Слава: Благослове́н пло́д Твоего́ чре́ва, Де́во Богоро́дице, все́х ра́досте: ра́дость бо всему́ ми́ру родила́ еси́, и весе́лие вои́стинну, Человеколю́бца, разгна́вши печа́ль грехо́вную, Богоневе́сто.

И ныне: Ковче́же мы́сленный, я́же нетле́нную ма́нну ро́ждшая ми́ру вои́стинну, посреде́ на́с, Де́во, прииди́ в ча́с се́й, и вся́кия на́с измени́ скве́рны, чи́сте Тебе́ ублажа́ющих.

Седален, глас 7.

Под кpов Твой, Влады́чице, / вси земноpо́днии пpибега́юще, вопие́м Ти: / Богоpо́дице, упова́ние на́ше, / изба́ви ны от безме́pных пpегpеше́ний, / и спаси́ ду́ши на́ша.

Пе́снь 4

Ирмо́с: О́тча не́дра не оста́вль, и соше́д на зе́млю, Христе́ Бо́же, та́йну услы́шах смотре́ния Твоего́, и просла́вих Тя́, Еди́не Человеколю́бче.

Тя́ Авваку́м го́ру дре́вле возгласи́в, Пречи́стая Богоро́дице, доброде́тельми приосене́нную, все́х, Влады́чице, осеня́ющую, от опале́ния зло́бы нача́льнаго борца́.

Моле́ние Го́споду принеси́, воплоще́нному из Твои́х, Влады́чице, пречи́стых крове́й, спасти́ лю́ди Твоя́ вся́каго вре́да, Тебе́ по до́лгу блажа́щыя.

Слава: Твоя́ пресла́вная сия́ богоблагода́тная Це́рковь бы́сть во исцеле́ние ду́ш же и теле́с: уставля́ет бо вся́ку боле́знь, и очища́ет от страсте́й ве́рно Тебе́ блажа́щыя.

И ныне: Посеще́нием Твои́м, Де́во, спаси́ те́плым и честны́м, все́х с любо́вию прибега́ющих, Влады́чице, к Твоему́ заступле́нию, посеща́й и дава́й я́же к жи́зни проше́ния.

Пе́снь 5

Ирмо́с: Но́щь несветла́ неве́рным, Христе́, ве́рным же просвеще́ние в сла́дости слове́с Твои́х: сего́ ра́ди к Тебе́ у́тренюю, и воспева́ю твое́ Божество́.

Отягче́нных сно́м грехо́вным, Чи́стая, бо́дры творя́щи, оба́че же в пречестне́м хра́ме Твое́м, Твое́ю бо́дренною Боже́ственною моли́твою на́с уще́дри, Богоневе́сто.

Да́ждь, Чи́стая, все́м на́м ру́ку по́мощи к Тебе́ прибега́ющым, и отмы́й вся́кия зло́бы скве́рну, и боле́зни очи́сти моли́твами Твои́ми.

Слава: Я́же Бо́га заче́нши во утро́бе деви́честей, и ро́ждши, Богоро́дице Пречи́стая, Тя́ пою́щих изба́ви вся́каго ве́чнаго осужде́ния.

И ныне: В хра́м Тво́й ве́рою приходя́щих ду́шы обновля́ются обетша́вшыя грехми́, и по до́лгу Тя́ вси́, Пренепоро́чная, сла́вят.

Пе́снь 6

Ирмо́с: Ио́на из чре́ва а́дова вопия́ше: возведи́ от тли́ живо́т мо́й. Мы́ же Тебе́ вопие́м: Всеси́льне Спа́се, поми́луй на́с.

Еди́на на́м спасе́ния источи́ла еси́ во́ду, Еди́на Чи́стая, распале́ние пре́лести изсуши́вши, ороша́еши ра́зум и́стинный рабо́м Твои́м.

Одушевле́нный Бо́га на́шего гра́де, ста́до Твое́ от безбо́жных ва́рвар, тру́са же и ну́жди, и вся́ческаго искуше́ния свободи́.

Слава: Я́звы ду́ш на́ших, Богоро́дице, отжени́, моли́тв Твои́х окропле́нием, и теле́сныя неду́ги: да Боже́ственными гла́сы воспева́ем Тя́.

И ныне: Я́же разреши́вшая от боле́зней, Де́во, Е́ву, Рождество́м Твои́м Пречи́стым, Отрокови́це, разреши́ ми боле́зни стра́стныя души́ же и телесе́.

Кондак, глас 6:

Предстáтельство христиа́н непосты́дное, / ходáтайство ко Творцу́ непрело́жное, / не пре́зри гре́шных моле́ний глáсы, / но предвари́, я́ко Благáя, на по́мощь нас, / ве́рно зову́щих Ти; / ускори́ на моли́тву, и потщи́ся на умоле́ние, / предстáтельствующи при́сно, Богоро́дице, чту́щих Тя.

Икос:

Простри́ дла́ни Твоя́, и́миже всех Влады́ку я́ко Младе́нца прия́ла еси́ за мно́жество бла́гости, / не оста́ви нас, всегда́ наде́ющихся на Тя, бо́дренною Твое́ю моли́твою, / и неисче́тною просты́нею уще́дри нас, / и пода́ждь душа́м на́шим милосе́рдие Твое́, во ве́ки источа́ющи, / Тебе́ бо и́мамы гре́шнии Засту́пницу от находя́щих на ны бед и зол. / Но я́ко иму́щи милосе́рдия щедро́ты, / ускори́ на моли́тву и потщи́ся на умоле́ние, / предста́тельствующи при́сно, Богоро́дице, чту́щих Тя.

Пе́снь 7

Ирмо́с: Пе́щь о́троцы огнепа́льну дре́вле росоточа́щу показа́ша, Еди́наго Бо́га воспева́юще, и глаго́люще: превозноси́мый отце́в Бо́г и препросла́влен.

О́гнь ро́ждшая Боже́ственный, Де́во, хвра́стныя попали́ стра́сти воспева́ющих Тя́, Всепе́тая, и све́том озари́ покая́ния все́х, мо́лимся.

Нетле́нная Отрокови́це, от тли́ на́с изба́ви: Бо́жия пала́то одушевле́нная, хра́мы на́с покажи́ Боже́ственнаго ду́ха, в Це́ркви Твое́й непреста́нно ве́рою пою́щих Тя́.

Слава: Струи́ излива́еши исцеле́ний все́м, исто́чник бо жи́зни родила́ еси́: и те́плою, Богоро́дице, моли́твою Твое́ю, сие́ Твое́ ста́до очи́сти от скве́рны, Богоневе́сто.

И ныне: О́бразы вси́ Боже́ственнаго Твоего́ Рождества́, Боже́ственнии проро́цы ви́девше, ра́достно воспева́ху, вопию́ще: препе́тый отце́в Бо́же благослове́н еси́.

Пе́снь 8

Ирмо́с: Еди́наго Безнача́льнаго Царя́ сла́вы, Его́же благословя́т небе́сныя си́лы, и трепе́щут чи́ни а́нгельстии, по́йте, свяще́нницы, лю́дие превозноси́те Его́ во ве́ки.

Чуде́с бе́здну источа́ющи ми́ру, Всепе́тая, страсте́й на́ших струю́ изсуши́, и оставле́ния ро́су источи́ на́м, ве́рою несумне́нною почита́ющым Тя́, Де́во.

Из Тебе́ Со́лнце пра́ведное возсия́, во тьме́ страсте́й седя́щым, Тебе́ све́т соде́ла, Всепе́тая Чи́стая: те́мже Тя́ по до́лгу пои́м, Богоро́дице.

Слава: Це́рковь всесве́тлая Бо́жия бы́вши, собира́ющыяся во святе́м Хра́ме Твое́м рабы́ Твоя́, ду́ха жили́ща покажи́, Чи́стая, Тебе́ славосло́вящыя во вся́ ве́ки.

И ныне: Све́том Твоего́ Рождества́ вселе́нную чудоле́пно просвети́ла еси́, Богоро́дице, и́стиннаго Бо́га на руку́ Твое́ю носи́вши, просвеща́ющаго при́сно ве́рою зову́щыя: вся́ дела́ Госпо́дня Го́спода по́йте, и превозноси́те Его́ во ве́ки.

Пе́снь 9

Ирмо́с: Нетле́ния искуше́нием ро́ждшая, и Всехитрецу́ Сло́ву пло́ть взаимода́вшая, Ма́ти неискусому́жная, Де́во Богоро́дице, Прия́телище Нестерпи́маго. Село́ Невмести́маго Зижди́теля Твоего́, Тя́ велича́ем.

Свяще́ннейши вы́шних си́л яви́лася еси́, Творца́ бо все́х поро́ждши, Ма́ти Неискусому́жная свята́я Богоро́дице: те́мже Тя́ со А́нгелы сла́вим, непреста́нно воспева́юще вели́чия Твоя́.

Я́ко просвеща́емь заря́ми Боже́ственнаго Ду́ха, го́ру, Де́во, зри́т Тя́ дре́вле присе́нную свяще́ннейший проро́к, Богоро́дице. Те́мже Тя́ со А́нгелы земни́и ублажа́ем, я́коже прорекла́ еси́, Богоблаже́нная.

Ру́чка яви́лася еси́ ма́нну Боже́ственную нося́щи, ле́ствица ви́дена была́ еси́ челове́ки от земли́ возводя́щи, еди́на неискусому́жная Де́во Богоро́дице. Те́мже Тя́ соше́дшеся ве́рнии славосло́вим по до́лгу, Богора́дованная.

Слава: Бы́вшая Божества́ Отрокови́це селе́ние, бы́вша мя́ разбо́йников душетле́нных верте́п, и де́лателище вся́каго беззако́ния, ба́нею мя́ сле́з омы́вши, Боже́ственнаго Ду́ха жили́ще яви́.

И ныне: Све́т ро́ждшая еди́на предве́чный, ве́чныя мя́ тьмы́ изба́ви, Влады́чице, и просвети́, Де́во, ду́шу мою́, страстьми́ жития́ всю́ омраче́нную, да любо́вию при́сно сла́влю Тя́.

Молитва

Пречистая Владычице Богородице, Царица Небесе и земли, высшая Ангел и Архангел и всея твари Честнейшая, чистая Дево Марие, миру Благая помощнице, всех христиан поможение и утверждение, и всем во всяких нуждах избавление! Призри ныне, О, Всемилостивая Госпоже, на рабы Твоя, умиленною душею и сокрушенным сердцем Тебе молящыяся, со слезами к Тебе припадающыя и Пречистому и Цельбоносному образу Твоему поклоняющыяся, Твоея же помощи и заступления в скорбех и напастех своих просящыя. Буди за нас ходатаица к Сыну Твоему, Христу Богу нашему: мы бо грешнии не имамы иныя помощницы разве Тебе, Владычице. Ты еси наша надежда и упование, Ты еси заступница и предстательница наша, Ты обидимым защищение, печальным утешение, скорбящым радование, сирым прибежище, вдовам хранительница, девам слава, слезящым веселие, больным посещение, немощным исцеление, грешным спасение. Сего ради, О, Богомати, к Тебе прибегаем, и на Твой Святый образ взирающе, с любовию покланяемся Тебе с предвечным на руку Твоею держимым Младенцем, Господем нашим Иисусом Христом, и молебное пение приносим, вопиюще: помилуй ны, Мати Божия, и прошения наша исполни во благо, вся бо возможна суть ходатайству Твоему к Сыну Твоему и Богу нашему, Емуже подобает всякая слава, честь и поклонение и благодарение, со Безначальным Его Отцем и со Присносущным Его Духом, ныне и присно и во веки веков. Аминь.