Канон Пресвятой Богородице, глас 2.

Тропарь, глас 2:

Вся, па́че смы́сла, / вся пресла́вная Твоя́, Богоро́дице, та́инства, / чистоте́ запеча́танной и де́вству храни́му, / Ма́ти позна́лася еси́ нело́жна, / Бо́га ро́ждши И́стиннаго; / Того́ моли́ спасти́ся душа́м на́шим.

Кано́н Пресвяте́й Богоро́дице. Гла́с 2.

Ирмо́с: Гряди́те, лю́дие, пои́м пе́снь Христу́ Бо́гу, разде́льшему мо́ре, и наста́вльшему лю́ди, я́же изведе́ из рабо́ты еги́петския, я́ко просла́вися.

Припев: Пресвятая Богородице, спаси нас.

Вси́ ве́рнии прииди́те, согла́сно воспои́м Богоро́дицу: Та́ бо Христа́ родила́ е́сть па́че ума́ челове́ча, и непреста́нно мо́лит спасти́ все́х на́с.

И́же о́браз О́тчи Ипоста́си, из Тебе́ прия́т смеше́ние, Богороди́тельнице, и истле́вший о́браз просла́ви, и сего́ но́ва сотвори́.

Слава: Херуви́м честне́йши су́щи, и небе́сных кру́г превы́шши была́ еси́: Бо́га бо па́че ума́ во утро́бе Твое́й безстра́стно вмести́ла еси́.

И ныне: Избавле́ние на́ших грехо́в родила́ еси́ благода́теля Го́спода, измени́вши ме́ртвость пра́отца Ада́ма, возвела́ еси́ естество́ к небе́сным.

Пе́снь 3

Ирмо́с: Утверди́ на́с в Тебе́, Го́споди, дре́вом умерщве́й гре́х, и стра́х Тво́й всади́ в сердца́ на́с пою́щих Тя́.

Злату́ю я́ко вои́стинну кади́льницу, и ру́чку ма́нны, и Бо́жию го́ру, и пала́ту красну́ Боже́ственную, Тя́, Де́во, имену́ем.

Це́рковь и свяще́нное жили́ще Сло́ва су́щи, Богоро́дице: согреше́ний очисти́лище, Пречи́стая, бу́ди ми́, Присноде́во.

Слава: Ни язы́к земноро́дных, ни у́м безпло́тных возмо́жет Рождество́ Твое́ сказа́ти: вы́ше естества́ бо и смы́сла, Богоро́дице, Зижди́теля родила́ еси́.

И ныне: Утвержде́ние бу́ди и прибе́жище, и покро́в, Де́во Богороди́тельнице, ве́рою к Тебе́ прибега́ющым, и Бо́жию Тя́ Ма́терь провозвеща́ющым.

Седален, глас 2.

О чудесе́ но́ваго всех дре́вних чуде́с! / Кто бо позна́ Ма́терь, без му́жа ро́ждшую / и на руку́ нося́щую всю тварь Содержа́щаго; / Бо́жие есть изволе́ние Ро́ждшееся. / Его́же я́ко Младе́нца Пречи́стая, / Твои́ма рука́ма носи́вшая, / и ма́тернее дерзнове́ние к Нему́ иму́щая, / не преста́й моля́щи о чту́щих Тя, / уще́дрити и спасти́ ду́ши на́ша.

Пе́снь 4

Ирмо́с: Прише́л еси́ от Де́вы, не хода́тай, ни А́нгел, но Са́м Го́споди вопло́щься, и спа́сл еси́ всего́ мя челове́ка. Те́м зову́ Ти: сла́ва си́ле Твое́й, Го́споди.

Ка́плю ми́ умиле́ния одожди́, Влады́чице, взима́ющи вся́к се́рдца моего́ зно́й, и помышле́ния моего́ му́тныя пото́ки уставля́ющи.

Ору́жием мя́ сласте́й уя́звлена, и лежа́ща ура́нена, Пречи́стая, не пре́зри, но исцели́ копие́м и кро́вию распя́таго Сы́на Твоего́ и Бо́га на́шего.

Слава: Обогати́вши влады́чеством всю́ тва́рь, лю́те мя́ обнища́вша благода́тию Боже́ственною уще́дри: я́ко да велича́ю Тя́, я́ко благу́ю мою́ Предста́тельницу, Всенепоро́чная.

И ныне: Прохлади́ мя́, Де́во, покая́нием, и одожди́ се́рдце мое́ изсо́хшее зно́ем страсте́й, излива́ющи на мя́ еле́й и целе́ние ми́лости Твоея́.

Пе́снь 5

Ирмо́с: Све́та Пода́телю и веко́в Тво́рче, Го́споди, во све́те Твои́х повеле́ний наста́ви на́с: ра́зве бо Тебе́, ино́го Бо́га не зна́ем.

Воплоще́нна из Тебе́, Богороди́тельнице, ве́рнии позна́хом, без се́мене Сы́на ро́ждшася, Бо́га и́стинна, и Челове́ка естество́м. Те́мже Тя́ сла́вим.

Под кро́в Тво́й, Пречи́стая, и заступле́ние ве́рнии всегда́ прибега́юще ве́рою, Тебе́ ра́ди Де́во, избавля́емся вся́каго лю́таго обстоя́ния.

Слава: Изба́ви на́с искуше́ний, и от бу́ри помышле́ний, Пречи́стая, вся́каго гне́ва, и вся́каго греха́, гла́да же и губи́тельства, и ве́чнаго, Де́во, муче́ния.

И ныне: Предста́тельнице на́ша, спасе́ние и упова́ние, Влады́чице, христиа́н су́щи, спаса́й любо́вию Тя́ при́сно ве́рно воспева́ющих, Де́во Всепе́тая.

Пе́снь 6

Ирмо́с: В бе́здне грехо́вней валя́яся, неизсле́дную милосе́рдия Твоего́ призыва́ю бе́здну: от тли́, Бо́же, мя́ возведи́.

И́же во́лею вся́ соде́лавый, изво́ли во чре́во Неискусобра́чныя всели́тися: и и́же тле́нием боля́щыя, нетле́нием обогати́л е́сть, я́ко Милосе́рд.

Превы́шши Вы́шних Си́л, и святе́йши еси́, Пренепоро́чная, па́че естества́ вмести́вши, невмести́мое Сло́во во чре́во твое́.

Слава: На пути́ мя жите́йстем заблужда́юща, и в безпу́тие ча́сто впа́дающа грехо́вное, к стези́ покая́ния, Влады́чице, наста́ви мя́.

И ныне: Не пре́зри, Чи́стая, мольбы́ на́шя, на Тя́ возло́жших наде́жду ра́б Твои́х: прибе́жище бо, Влады́чице, и душа́м очисти́лище ты́ еси́.

Кондак, глас 6:

Предстáтельство христиа́н непосты́дное, / ходáтайство ко Творцу́ непрело́жное, / не пре́зри гре́шных моле́ний глáсы, / но предвари́, я́ко Благáя, на по́мощь нас, / ве́рно зову́щих Ти; / ускори́ на моли́тву, и потщи́ся на умоле́ние, / предстáтельствующи при́сно, Богоро́дице, чту́щих Тя.

Икос:

Простри́ дла́ни Твоя́, и́миже всех Влады́ку я́ко Младе́нца прия́ла еси́ за мно́жество бла́гости, / не оста́ви нас, всегда́ наде́ющихся на Тя, бо́дренною Твое́ю моли́твою, / и неисче́тною просты́нею уще́дри нас, / и пода́ждь душа́м на́шим милосе́рдие Твое́, во ве́ки источа́ющи, / Тебе́ бо и́мамы гре́шнии Засту́пницу от находя́щих на ны бед и зол. / Но я́ко иму́щи милосе́рдия щедро́ты, / ускори́ на моли́тву и потщи́ся на умоле́ние, / предста́тельствующи при́сно, Богоро́дице, чту́щих Тя.

Пе́снь 7

Ирмо́с: Богопроти́вное веле́ние беззако́ннующаго мучи́теля, высо́к пла́мень вознесло́ е́сть: Христо́с же простре́ богочести́вым отроко́м ро́су духо́вную, Сы́й Благослове́н и Препросла́влен.

Кре́пость моя́ и пе́ние и спасе́ние, и изве́стное заступле́ние, и стена́ необори́мая: су́щи, Влады́чице, борю́щыя мя́ де́моны побори́, при́сно и́щущыя умертви́ти мя́. (Дважды)

Слава: Бо́га вопло́щши от де́вственных Твои́х крове́й, обожи́вшаго Де́во челове́чество: те́мже мя́ страстьми́ оскверне́ннаго, и истле́вша вра́жиими ко́зньми, изба́ви моли́твами Твои́ми.

И ныне: Пе́щь прообража́ше Твое́ Рождество́, Всенепоро́чная: о́троки бо не опали́, я́коже ни утро́бу Твою́ о́гнь непостоя́нный. Те́мже мо́лим Тя́: рабы́ Твоя́ огня́ ве́чнаго изба́ви.

Пе́снь 8

Ирмо́с: Дре́вле ороси́вшаго евре́йския о́троки в пла́мени, и опали́вшаго Го́спода халде́и пресла́вно в не́м, воспое́м глаго́люще: благослови́те и превозноси́те Его́ во ве́ки.

Жи́во и незави́стно спасе́ние на́м земноро́дным, нескве́рная А́гница, я́же породила́ еси А́гнца Бо́жия, не пре́зри мене́ зову́ща: благослови́те вся́ дела́ Госпо́дня Го́спода.

Боже́ственное Твое́, Пречи́стая, Рождество́ обнови́ на́с, и все́х ча́да показа́ и сы́ны дне́ и све́та, и спа́сшеся взыва́ем: благослови́те вся́ дела́ Госпо́дня Го́спода.

Слава: Живу́ю во́ду породила́ еси́, Чи́стая, от ложе́сн деви́ческих, и оставле́ние источи́ла еси́ от исто́чника исцеле́ний ве́рным. Те́мже вси́ зове́м: благослови́те вся́ дела́ Госпо́дня Го́спода.

И ныне: Гро́зд зре́лый жи́зни Ты́ возрасти́ла еси́, Чи́стая: лоза́ бо еси́ услажда́ющи зе́млю благи́ми, ю́же пою́ще зове́м: благослови́те вся́ дела́ Госпо́дня Го́спода.

Пе́снь 9

Ирмо́с: От Бо́га Бо́га Сло́ва, неизрече́нною му́дростию, прише́дшаго обнови́ти Ада́ма, я́дию в тле́ние па́дшаго лю́те, от Святы́я Де́вы неизрече́нно воплоти́вшагося на́с ра́ди, ве́рнии единому́дренно пе́сньми велича́ем.

Человеколю́бия мя́ Боже́ственнаго сподо́би, Отрокови́це, Я́ же Еди́на Человеколю́бца Бо́га, пло́ть от Тебе́ заимова́вша, неизглаго́ланно ро́ждши, изба́ви мя́ бу́дущаго пла́мене, и му́ки вся́кия, любо́вию Тебе́ сла́вящаго. (Дважды)

Слава: Я́ко тве́рдую предста́тельницу, я́ко упова́ние и сте́ну, и наде́жду, и покро́в тве́рд, и необори́мое утвержде́ние, и небу́рное приста́нище, еди́ну кре́пкое прибе́жище стяжа́вше Тя́ вси́, спаса́емся, Всепе́тая.

И ныне: Све́т ро́ждшая Боже́ственный, мно́гими помрачи́вшееся страсте́й наведе́ньми, и помышле́ньми чужда́го, се́рдце мое́ просвети́, Отрокови́це, ка́плю подаю́щи ми́ при́сно, от скве́рн греха́ Де́во, очища́ющую мя́.

Молитва

О, Пресвятая Владычице Богородице, небесе и земли Царице! Призри на ны, грешныя и недостойныя рабы Твоя, и умоли Сына Твоего Христа Бога нашего, да оградит ны свыше силою Своею, еже навсегда сохраненым быти от всех искушений вражиих и прелестей бесовских. Ты, о Всемилостивая Госпоже Дево Богородице, покрый ны всеблагим Твоим покровом. Спасай убо, о Пресвятая Дево Богородительнице, весь род христианский, и вся с верою приходящия и поклоняющияся Тебе, славящия же Пречистую Троицу, Отца и Сына и Святаго Духа, и Твое милостивное со святыми предстательство, ныне и присно и во веки веков. Аминь.