Канон Небесным Силам Безплотным (Архангелам и Ангелам), глас 4.

Тропарь , глас 4:

Небе́сных во́инств Архистрати́зи, / мо́лим вас при́сно мы, недосто́йнии, / да ва́шими моли́́твами оградите́ нас / кро́вом крил невеще́ственныя ва́шея сла́вы, / сохраня́юще ны, припа́дающия приле́жно и вопию́щия: / от бед изба́вите ны, / я́ко чинонача́льницы Вы́шних сил.

Кано́н безпло́тным святы́м А́нгелом. Гла́с 4.

Пе́снь 1

Ирмо́с: Триста́ты кре́пкия, Рожде́йся от Де́вы, безстра́стия во глубине́, души́ трича́стное потопи́, молю́ся, да Тебе́ я́ко в тимпа́не, во умерщвле́нии телесе́ побе́дное воспою́ пе́ние.

Запев: Вси Небеснии Силы безплотнии, молите Бога о нас.

Я́ко у́ми чи́стии, А́нгели, Вели́кому и Пе́рвому предстоя́ще Уму́, и Боже́ственнаго сия́ния насыща́еми, луче́ю мя́ ва́шею озари́те, пою́ще всевино́внаго Сло́ва пресла́внии. [Два́жды.]

Слава: Отню́д к Бо́гу прекло́ньшеся любо́вию, и Боже́ственными добро́тами вообража́еми я́ве, о Арха́нгели сла́внии, стоя́нием приле́жным обстоите́, зову́ще побе́дную пе́снь Зижди́телю.

И ныне, Богоро́дичен: Я́же Еди́на во чре́ве прие́мши Сло́во, Его́же а́нгельская во́инства сла́вят при́сно, ду́шу мою́ озари́, реша́щи грехо́вное мра́чное зломышле́ние Всенепоро́чная, и просвеща́ющи ра́зумом Рождества́ Твоего́.

Пе́снь 3

Ирмо́с: С высоты́ снизше́л еси́ во́лею на зе́млю, превы́ше вся́каго нача́ла, и смире́нное возне́сл еси́ из а́да преиспо́дняго естество́ челове́ческое: не́сть бо свя́т па́че Тебе́, Человеколю́бче.

И́же преми́рными ли́ки воспева́емый Христе́, чи́ном те́х ве́рных составле́ния воспева́ти богому́дренно сотвори́, Cло́ве: не́сть бо свя́т па́че тебе́, Человеколю́бче. [Два́жды.]

Слава: Любо́вию те́плою, привяза́нием рачи́тельным причаща́ющеся пе́рвому исто́чнику служи́тельне предстоите́, пою́ще немо́лчно, еди́но существо́ Божества́ безнача́льнаго, Боже́ственнии Арха́нгели.

И ныне, Богоро́дичен: Е́вину дре́внюю кля́тву, Христа́ ро́ждши, Ма́ти Чи́стая, пресве́тло разреши́ла еси́, все́х венча́ющаго благослове́ньми: не́сть бо, Пречи́стая, ра́зве Тебе́ Помо́щницы.

Седален, глас 8.

Небе́сных нача́льницы и первостоя́телие высокопресто́льных и стра́шных / Боже́ственныя сла́вы Михаи́ле и Гаврии́ле Архистрати́зи, / А́нгелов чинонача́льницы, со всеми Безпло́тными, / о служи́телие Влады́чни! / О ми́ре непреста́нно моля́щеся, / испроси́те оставле́ние прегреше́ных на́ми, / и ми́лость, и благода́ть обрести́ в день су́дный.

Слава, и ныне, Богородичен: Богоблагода́тная, Чи́стая, Благослове́нная, / благоутро́бия ра́ди ще́дрот из Тебе́ Ро́ждшагося / с вы́шними Си́лами, и Арха́нгелы, и всеми Безпло́тными моли́ непреста́нно / пода́ти нам пре́жде конца́ ми́лостивно проще́ние грехо́в / и жития́ исправле́ние, я́ко да обря́щем ми́лость.

Пе́снь 4

Ирмо́с: Седя́й в сла́ве на престо́ле Божества́, во о́блаце ле́гце прии́де Иису́с Пребоже́ственный, нетле́нною дла́нию, и спасе́ зову́щыя: сла́ва, Христе́, си́ле Твое́й.

Непостижи́мою си́лою от небытия́ приве́л еси́ небе́сныя умы́, сло́ве Бо́жий пресу́щественный, и неизрече́нною Твое́ю сла́вою украси́л еси́, зову́щыя: сла́ва, Христе́, си́ле Твое́й.

Управля́еми вы́шния си́лы ду́хом, и брозда́ми его́, и Боже́ственными заря́ми облиста́еми, неотпа́дающыя чи́ны насле́доваша, еди́но чту́ще все́х нача́ло и Божество́.

Слава: Лица́ Твоего́ добро́ту кра́сную зре́ти, сподо́бишася служи́тельныя Твоя́ све́тлости, и отону́ду разуме́ния восприе́млюще, Тебе́ вопию́т: сла́ва, Христе́, си́ле Твое́й.

И ныне, Богоро́дичен: Цари́ца Де́во, злато́ю оде́ждою укра́шена, Сы́ну Царю́ ны́не предстои́т, Я́же без сравне́ния а́нгел превы́шши, зову́щих: сла́ва, Христе́, си́ле Твое́й.

Пе́снь 5

Ирмо́с: Ны́не воста́ну, проро́чески рече́ Бо́г, ны́не просла́влюся, ны́не вознесу́ся, па́дшаго прие́м от Де́вы, и к Све́ту у́мному вознося́й Моего́ Божества́.

Тре́петно сла́вят Херуви́ми, и Серафи́ми, со Престо́лы, и Боже́ственнии Арха́нгели, и Госпо́дьствия, и Си́лы, и Нача́ла, и вла́сти со А́нгелы, честно́е еди́но и тро́ическое Божество́. [Два́жды.]

Слава: Яви́шася А́нгели светови́дно сия́юще, Христе́, Твое́ Воскре́сение пропове́дающе в ми́ре преподо́бным жена́м, и враго́в Твои́х сотряса́юще у́м блиста́ньми Твоего́ Божества́.

И ныне, Богоро́дичен: Ны́не сохрани́ ополче́ние арха́нгельскими Це́рковь Твою́, Тебе́ сла́вящую правосла́вными гла́сы, и́же от Де́вы неизрече́нно рожде́йся, и челове́ки от тли́ избавля́яй.

Пе́снь 6

Ирмо́с: Приидо́х во глубины́ морски́я, и потопи́ла мя́ е́сть бу́ря мно́гих грехо́в: но я́ко Бо́г из глубины́ возведи́ живо́т мо́й, Многоми́лостиве.

О́крест Влады́ки предстоя́ще а́нгельская во́инства, и чи́сте наслажда́ющеся сия́нием нача́ла све́тлаго, просвети́те ве́рою ва́с пою́щих. [Два́жды.]

Слава: Прему́дростию Твое́ю сотвори́вый А́нгельския ли́ки, Госпо́дьствия же и Си́лы, и Серафи́мы, я́ко Влады́ка показа́л еси́, хвала́ми Тя́ чту́щыя.

И ныне, Богоро́дичен: Я́ко на престо́лех превознесе́нных, Христе́, почива́яй, и вся́ческая Боже́ственным про́мыслом соблюда́яй, на руку́ деви́ческую Влады́ко почи́л еси́.

Кондак, глас 2:

Архистрати́зи Бо́жии, / служи́телие Боже́ственныя сла́вы, / А́нгелов нача́льницы и челове́ков наста́вницы, / поле́зное нам проси́те и ве́лию ми́лость, / я́ко Безпло́тных Архистрати́зи.

Икос:

Рекл еси́, Человеколю́бче, в писа́ниих Твои́х / мно́жеству ра́доватися А́нгелов на Небеси́ / о челове́це еди́ном ка́ющемся, Безсме́ртне. / Те́мже мы, и́же в беззако́ниих, Безгре́шне, / еди́не Сердцеве́дче, / Тя моли́ти всегда́ дерза́ем, я́ко Благоутро́бнаго, / уще́дрити и низпосла́ти недосто́йным умиле́ние, Влады́ко, / подая́й нам проще́ние: / о всех бо нас мо́лятся Тебе́ Безпло́тных Архистрати́зи.

Пе́снь 7

Ирмо́с: Ю́ноши три́ в Вавило́не, веле́ние мучи́телево на бу́йство прело́жше, посреде́ пла́мене вопия́ху: благослове́н еси́ Го́споди Бо́же оте́ц на́ших.

Свиде́тели соде́янным иму́ще мы́сленныя А́нгелы, избере́м чи́стое житие́ душе́ моя́, вопию́ще: благослове́н еси́ Го́споди Бо́же оте́ц на́ших. [Два́жды.]

Слава: У́глем очище́нный, престо́лу Твоему́ предстоя́щыя зри́т серафи́мы, Боже́ственный вопия́ Иса́иа: благослове́н еси́ Го́споди Бо́же оте́ц на́ших.

И ныне, Богоро́дичен: Чи́ны все́х безпло́тных, Де́во, я́ве превосхо́диши, я́ко Творца́ ро́ждши и Го́спода: благослове́н, Пречи́стая, пло́д Твоего́ чре́ва.

Пе́снь 8

Ирмо́с: Изба́вителю все́х, Всеси́льне, посреде́ пла́мене благоче́ствовавшыя, снизше́д ороси́л еси́, и научи́л еси́ пе́ти: вся́ дела́ благослови́те, по́йте Го́спода.

Я́ко сы́й живо́т безсме́ртный, безсме́ртному животу́ причаща́тися зижди́тельне сотвори́л еси́ А́нгелы, и научи́л еси́ пе́ти: благослови́те, по́йте Го́спода. [Два́жды.]

Слава: Мы́сленно обстоя́ще Тя́ Арха́нгели, непреста́нными гла́сы воспева́ют, боголе́пно чту́ще Тя́ я́ко Влады́ку все́х: благослови́те, по́йте Го́спода.

И ныне, Богоро́дичен: Зако́ннии о́брази прообража́ху Тя́, Всеблаже́нная, ро́ждшую Бо́га, ве́щи пло́тстей соединя́ема, пре́жде невеще́ственна су́ща Боже́ственным естество́м: благослови́м, Де́во, Рождество́ Твое́.

Пе́снь 9

Ирмо́с: Сокрове́нное Бо́жие неизрече́нное в Тебе́ соверша́ется, я́вственное та́инство, Де́во Пречи́стая: и́бо Бо́г из Тебе́ воплоти́ся за милосе́рдие. Те́мже Тя́, я́ко Богоро́дицу велича́ем.

И́же ума́ роди́теля, и предложи́теля Сы́ну и Ду́ху пою́ще А́нгели, ны́не к на́м Боже́ственныя благода́ти подая́ния, приле́жно прие́мше посыла́ти усе́рдствуйте. [Два́жды.]

Слава: Красно́ удобря́еми нетле́ния да́ром и благода́тию, Боже́ственнии Арха́нгели, Тебе́ Исто́чника Христе́ присносу́щна нетле́ния, пою́ще я́ко Благода́теля велича́ют.

И ныне, Богоро́дичен: Неве́стник воплоще́ния неизрече́ннаго, и черто́г одушевле́нный, и ковче́г зако́на благода́ти Тя́, Богома́ти, ве́рнии све́мы: те́мже Тя́ непреста́нно велича́ем.

Молитва Небесным Силам Безплотным

О, Святии Безплотнии силы: Серафимы, Херувимы, Престолы и Власти, Господствия, Силы и Начала, Архангелы и Ангелы, любовию ко Господу и Творцу непрестанно горящии, и всем нам спастися хотящии, у Престола Вседержителя предстоящии и непрестанно трисвятую песнь Ему вопиющии, ради явления любви Божией и милосердия неизреченнаго к людем посылаимии и благую и всесовершенную волю Его творящии. Воззрите милостивно на нас грешных и не возгнушайтесь сквернами нашими, но умолите Господа Иисуса Христа, да не погибнем в пучине беззаконий наших, но в тихое пристанище спасения приидем. Покрыйте нас невещественныма крилома вашима от всех враг видимых и невидимых, да сподобимся и мы воспевати Всеблагаго Христа Бога нашего, Ему же подобает слава со Безначальным Его Отцем и Святым Духом во веки веков. Аминь.