Канон Пресвятой Богородице перед иконой «Умягчение злых сердец» («Семистрельная»)

Тропарь Пресвятой Богородице пред иконой Ея «Умягчение злых сердец» («Семистрельной»), глас 5

Умягчи́ на́ша зла́я сеpдца́, Богоpо́дице,/ и на́пасти ненави́дящих нас угаси́/ и вся́кую тесноту́ души́ на́шея pазpеши́,/ на Твой бо святы́й о́бpаз взиpа́юще,/ Твои́м состpада́нием и милосе́pдованием о нас умиля́емся/ и pа́ны Твоя́ лобыза́ем,/ стpел же на́ших, Тя теpза́ющих, ужаса́емся./ Не даждь нам, Ма́ти Благосе́pдная,/ в жестосе́pдии на́шем и от жестосе́pдия бли́жних поги́бнути,// Ты бо еси́ вои́стину злых сеpде́ц умягче́ние.

Канон, глас 4.

Пе́снь 1.

Ирмос: Отве́рзу уста́ моя́, и напо́лнятся Ду́ха, и сло́во отры́гну Цари́це Ма́тери, и явлю́ся, све́тло торжеству́я, и воспою́, ра́дуяся, Тоя́ чудеса́.

Припев: Пресвята́я Госпоже́ Богоро́дице, услы́ши моли́тву ра́б Твои́х, моля́щихся Тебе́.

Го́споди Бо́же мо́й, да́руй ми́ язы́к и отве́рзи мне́ устне́ к похвале́нию Ма́ти Твоея́, и Ея́ о́бразу пе́снь принести́ кра́сную, си́це вопию́ще: умягчи́ злы́х сердца́, Влады́чице.

Припев: Пресвята́я Госпоже́ Богоро́дице, услы́ши моли́тву ра́б Твои́х, моля́щихся Тебе́.

Спасе́ние мое́ и прибе́жище еси́, Влады́чице, покро́в дарова́ла еси́ Свое́ю честно́ю ико́ною, е́й же предстоя́т вси́ лю́дие, прося́ще по́мощи, и Тебе́ вопие́м: умягчи́ злы́х челове́к сердца́, Влады́чице. Мари́е, Пречи́стая Де́во Богоро́дице, посли́ ми благода́ть воспе́ти Тя́ и Твое́й ико́не честне́й поклоня́тися, вопию́ще: умягчи́ злы́х сердца́, Влады́чице.

Сла́ва: Клеветы́ и наве́ты упраздни́ и от вся́кия зло́бы спаси́, бу́ди, Влады́чице, заступле́ние, Свое́ю чу́дною ико́ною соблюди́ вопию́щих: умягчи́ злы́х сердца́, Влады́чице.

И ны́не: Тя́ Бо́г показа́ на́м Засту́пницу и в ско́рбех Помо́щницу и дарова́ на́м Твою́ честну́ю ико́ну на прославле́ние все́м и на исцеле́ние вопию́щим: умягчи́ злы́х сердца́, Влады́чице, сыно́в.

Пе́снь 3.

Ирмос: Твоя́ песносло́вцы, Богоро́дице, живы́й и незави́стный исто́чниче, ли́к себе́ совоку́пльшия духо́вно утверди́, в Боже́ственней Твое́й сла́ве венце́в сла́вы сподо́би.

Припев: Пресвята́я Госпоже́ Богоро́дице, услы́ши моли́тву ра́б Твои́х, моля́щихся Тебе́.

Ра́дуйся, непосты́дная Храни́тельнице; ра́дуйся, Богоро́дице, и́же и мы́ ра́дуемся о Твое́й чу́дней ико́не, кра́сящеся, вопие́м: ра́дуйся, умягче́ние злы́х серде́ц, Богоро́дице.

Припев: Пресвята́я Госпоже́ Богоро́дице, услы́ши моли́тву ра́б Твои́х, моля́щихся Тебе́.

Вои́стинну честна́я ико́на дарова́ся христоимени́тым лю́дем на прогна́ние духо́в нечи́стых и на здра́вие все́м, тре́бующим по́мощи от не́я, вопию́щим: ра́дуйся, умягче́ние злы́х серде́ц, Богоро́дице.

Сла́ва: О́блак светоза́рный показа́ся Твоя́ честна́я ико́на, па́че со́лнца сия́юща и все́м лучу́ простира́юща, от боле́зней и скорбе́й избавля́юща и злы́х отрева́юща, те́мже вси́ зове́м е́й: ра́дуйся, умягче́ние злы́х серде́ц, Влады́чице.

И ны́не: Я́ко да Твои́ми моли́твами избавля́емся, Богоро́дице Де́во, спаси́, славосло́вим Предста́тельницу, и Твое́й честне́й ико́не покланя́емся, и мо́лим Тя́ по Бо́зе, я́ко Ма́терь Бо́жию: вопию́щих умягчи́ злы́х сердца́, Богоро́дице.

Спаси́ от бе́д рабы́ Твоя́, Богоро́дице, я́ко вси́ по Бо́зе к Тебе́ прибега́ем, я́ко неруши́мей стене́ и предста́тельству.

Тропа́рь, гла́с 2:

Моле́ние те́плое и стена́ необори́мая, ми́лости исто́чниче, ми́рови прибе́жище, приле́жно вопие́м Ти́: Богоро́дице Влады́чице, предвари́ и от бе́д изба́ви на́с, Еди́на вско́ре предста́тельствующая.

Пе́снь 4.

Ирмос: Неизсле́дный Бо́жий сове́т, е́же от Де́вы воплоще́ния Тебе́, Вы́шняго, проро́к Авваку́м усмотря́я, зовя́ше: сла́ва си́ле Твое́й, Го́споди,

Припев: Пресвята́я Госпоже́ Богоро́дице, услы́ши моли́тву ра́б Твои́х, моля́щихся Тебе́.

Непосты́дную предста́тельницу на́м дарова́, ико́ну Ма́тери Своея́, и́же Ея́ зря́ще, весели́мся и уми́льно зове́м: помози́, Влады́чице, все́м, и от все́х злы́х спаси́, и Ца́рствию Небе́сному сподо́би.

Припев: Пресвята́я Госпоже́ Богоро́дице, услы́ши моли́тву ра́б Твои́х, моля́щихся Тебе́.

Тобо́ю вси́ спаса́емся и от нахожде́ний диа́вольских свобожда́емся. Тя́ Бо́г показа́ на́м Засту́пницу и Твою́ честну́ю ико́ну на́м дарова́, Е́й же вопие́м: Влады́чице, помози́, и от все́х злы́х челове́к спаси́, и Ца́рствию сподо́би.

Сла́ва: Не умолчи́м, Влады́чице, чудеса́ Твоя́, я́ко Свое́ю честно́ю ико́ною все́х спаса́еши и стра́ждущих от бед избавля́еши, неду́жным цельбы́ подае́ши, и на́с от все́х злы́х спаси́ и Ца́рствию Небе́сному сподо́би.

И ны́не: Пе́ние от недосто́йных ра́б приими́, Ма́ти Христа́ Бо́га, и не отри́ни мене́ от Своего́ Пречи́стаго Лица́, но спаси́ от злы́х все́х и Ца́рствию Небе́сному сподо́би.

Пе́снь 5.

Ирмос: Ужасо́шася вся́ческая о Боже́ственней сла́ве Твое́й: Ты́ бо, Неискусобра́чная Де́во, име́ла еси́ во утро́бе над все́ми Бо́га и родила́ еси́ безле́тнаго Сы́на, все́м воспева́ющим Тя́ ми́р подава́ющая.

Припев: Пресвята́я Госпоже́ Богоро́дице, услы́ши моли́тву ра́б Твои́х, моля́щихся Тебе́.

Удивля́юся умо́м, ужаса́юся душе́ю и ве́сь трепе́щу, но наде́юся на ми́лость благоутро́бия Твоего́, Чи́стая, и вопию́ от се́рдца: я́ко Бо́га ро́ждшая еси́, Того́ моли́ от злы́х спасти́ ду́шу мою́.

Припев: Пресвята́я Госпоже́ Богоро́дице, услы́ши моли́тву ра́б Твои́х, моля́щихся Тебе́.

Прииди́те, вси́ ве́рнии, воспое́м Пречи́стую Де́ву Мари́ю и честно́му Ея́ о́бразу поклони́мся, вопию́ще от се́рдца: ра́дуйся, Гаврии́лово благове́щение; ра́дуйся, Царя́ Христа́ восприе́мши, и на руку́ Свое́ю держа́, я́ко со́лнце. Того́ моли́, Чи́стая, от злы́х спасти́ ду́шу мою́.

Сла́ва: Ублажи́м Ма́терь Бо́жию Боже́ственными пе́сньми, иде́же сла́вится Пречестно́е и́мя, ту́ бесо́вская кре́пость разруша́ется, не мо́гут терпе́ти си́лы Ея́, отбега́ют. Мы́ же о Не́й весели́мся и вопие́м Е́й: моли́ Сы́на Своего́ от злы́х ду́шу мою́ изба́вити.

И ны́не: К Преблагослове́нней Де́ве Богоро́дице, лю́дие вси́, припаде́м и моли́тву принесе́м, да умо́лит Сы́на Своего́, Христа́ Бо́га на́шего, от злы́х спасти́ся все́м.

Пе́снь 6.

Ирмос: Боже́ственное сие́ и всечестно́е соверша́юще пра́зднество, Богому́дрии, Богома́тере, прииди́те, рука́ми воспле́щим, от Нея́ ро́ждшагося Бо́га сла́вим.

Припев: Пресвята́я Госпоже́ Богоро́дице, услы́ши моли́тву ра́б Твои́х, моля́щихся Тебе́.

Боже́ственный Твоея́ ико́ны свято́е явле́ние, я́ко со́лнце, возсия́ в сердца́х, луча́ всечестна́я просвеща́ет све́том Свои́м все́х, вопию́щих Е́й: ра́дуйся, Блага́я на́ша Предста́тельнице и ско́рая Помо́щнице, славосло́вящих Тя́, Пречи́стая, поми́луй все́х.

Припев: Пресвята́я Госпоже́ Богоро́дице, услы́ши моли́тву ра́б Твои́х, моля́щихся Тебе́.

Правове́рно чту́щих Тя́, Цари́цу все́х Бо́га, и Твое́й чу́дней ико́не святе́й любе́зно покланя́емся, вопию́ще: о Бо́жия Ма́ти, спаси́ от клеветы́ злы́х челове́к, и изба́ви мя́ славосло́вящаго Тя́, и поми́луй.

Сла́ва: Боже́ственней Твое́й ико́не покланя́емся, Богоро́дице Де́во, прося́ще от Тебе́ вели́кия ми́лости, да́руй рабо́м Свои́м, Еди́на Чи́стая, от вся́кия зло́бы изба́ви и славосло́вящих Тя́, Пречи́стую, поми́луй.

И ны́не: О Ма́ти Го́спода, моего́ Творца́, Ты́ родила́ еси́ все́х Царя́ Христа́, Того́ моли́, Чи́стая и Преблаже́нная, изба́вити ду́ши на́ша, славосло́вящих Тя́, Пречи́стую, поми́луй.

Конда́к, гла́с 6:

О́ко се́рдца моего́ смуща́ют, и злы́й сове́т разоря́ет мя́, си́х сокруши́, Де́во Чи́стая, и не пре́зри мое́ воздыха́ние, и супоста́ты на на́с умягчи́, Преблагослове́нная Влады́чице.

И́кос:

Ра́дуйся, Престо́ле огнеобра́зный Бо́жий; ра́дуйся, Отрокови́це, седа́лище Ца́рское, ло́же преиспе́щренное по́сланное, златопорфи́рный черто́же, ри́за цветолу́чная, украше́нный о́бразе, молниено́сное ору́жие, свети́льниче многосве́тлый, ра́дуйся, Богоро́дице, двенадесятосте́нный гра́де и две́рь златокова́нная; ра́дуйся, пала́то светообра́зная, позлаще́нная трапе́зо, Богоукраше́нная се́нь; ра́дуйся, Голуби́це Чи́стая; ра́дуйся, я́ко от злы́х челове́к спаса́еши, Преблагослове́нная Влады́чице.

Пе́снь 7.

Ирмос: Не послужи́ша тва́ри Богому́дрии па́че Созда́вшаго, но, о́гненное преще́ние му́жески попра́вше, ра́довахуся, пою́ще: препе́тый отце́в Госпо́дь и Бо́г, благослове́н еси́.

Припев: Пресвята́я Госпоже́ Богоро́дице, услы́ши моли́тву ра́б Твои́х, моля́щихся Тебе́.

Не и́мамы ины́я Засту́пницы, то́кмо Тебе́, Всенепоро́чная, да Тя́ вси́ я́ко Предста́тельницу воспева́ем, и уми́льно а́з зову́: Чи́стая, от все́х злы́х спаси́ мя́.

Припев: Пресвята́я Госпоже́ Богоро́дице, услы́ши моли́тву ра́б Твои́х, моля́щихся Тебе́.

На моле́ние мое́ умилосе́рдися, и ра́дость вме́сто печа́ли да́руй, Влады́чице, и от клеветы́ злы́х изба́ви мя́, да вопию́ Ти́: от все́х злы́х спаси́ мя́.

Сла́ва: Пречи́стыя и воспе́тыя Богома́тере ико́ны принесе́м пе́снь, похвала́ми вопие́м: моли́ся, Чи́стая, к ро́ждшемуся из Тебе́ Сы́ну и Бо́гу, от все́х злы́х спасти́ мя́.

И ны́не: Богозра́чная на земли́ па́че все́х родо́в яви́ся, Чи́стая Богоотрокови́це, спаси́ все́х, чту́щих де́нь пра́зднества Твоего́, Богоро́дице Де́во, от все́х злы́х спаси́ мя́.

Пе́снь 8.

Ирмос: О́троки благочести́выя в пещи́ Рождество́ Богоро́дичо спасло́ е́сть; тогда́ у́бо образу́емое, ны́не же де́йствуемое, вселе́нную всю́ воздвиза́ет пе́ти Тебе́: Го́спода по́йте, дела́, и превозноси́те Его́ во вся́ ве́ки.

Припев: Пресвята́я Госпоже́ Богоро́дице, услы́ши моли́тву ра́б Твои́х, моля́щихся Тебе́.

Отрокови́це Предо́брая, яви́ся луносия́тельная, Чи́стая, утро́ба Твоя́ породи́ Изба́вителя, Его́же моли́ сохрани́тися на́м от прило́га диа́вольскаго, Тя́ бо чту́щим, Засту́пницу, и Твое́й ико́не кла́няемся, вопию́ще со слеза́ми: Де́во Богоро́дице, чту́щих Тя́, Многопе́тую, во ве́ки сохрани́.

Припев: Пресвята́я Госпоже́ Богоро́дице, услы́ши моли́тву ра́б Твои́х, моля́щихся Тебе́.

Взира́ю на Боже́ственный о́браз Тво́й, и чту́ Влады́чню Бо́жию Ма́терь, и взира́ю на подо́бие Пречи́стаго Ея́ лица́ зра́к, покланя́юся и вопию́: Де́во Богоро́дице, чту́щих Тя́, Многопе́тую, во ве́ки сохрани́.

Сла́ва: Пала́то Сло́ва, одушевле́нная Це́рковь, Престо́ле огнеобра́зный, раю́ слове́сный, мы́сленный виногра́д, гре́зн нося́ще, Христа́, на руку́, Чи́стая, приклони́ у́хо Твое́ и услы́ши моли́тву раба́ Твоего́, Де́во Богоро́дице: чту́щих Тя́, Многопе́тую, во ве́ки сохрани́.

И ны́не: Тебе́ от се́рдца возложи́х пе́снь, спаси́, Де́во Чи́стая, и моли́ся о ми́ре, ве́си, я́ко на тя́ упова́ние с Бо́гом возлага́ем и вопие́м: Де́во Богоро́дице, чту́щих Тя́, Всепе́тую, во ве́ки сохрани́.

Песнь 9.

Ирмос: Вся́к земноро́дный да взыгра́ется, Ду́хом просвеща́емь, да торжеству́ет же Безпло́тных умо́в естество́, почита́ющее свяще́нное торжество́ Богома́тере, и да вопие́т: ра́дуйся, Всеблаже́нная Богоро́дице, Чи́стая Присноде́во.

Припев: Пресвята́я Госпоже́ Богоро́дице, услы́ши моли́тву ра́б Твои́х, моля́щихся Тебе́.

Вся́к во́зраст к похвале́нию да подви́жится Де́вы Богоро́дицы и честно́му Ея́ о́бразу вся́к да покло́нится, мы́ же, ве́рнии, воспое́м и́стинную Де́ву, Ма́терь Христо́ву, си́це реку́ще: о Де́во Богоро́дице, сокруши́ стре́лы вра́жия и умягчи́ злы́х сердца́, Тя́ бо вси́ по до́лгу велича́ем.

Припев: Пресвята́я Госпоже́ Богоро́дице, услы́ши моли́тву ра́б Твои́х, моля́щихся Тебе́.

Вознеси́, Богороди́тельнице, ро́г благове́рных люде́й на́ших и пода́ждь на враги́ по́мощь, иноплеме́нных шата́ния низложи́, Богороди́тельнице Пречи́стая, невоева́ны вся́ гра́ды сохрани́ и соблюди́ и вся́ стра́ны христиа́нския сохрани́, в ни́х же и́мя Твое́ велича́ется и ве́рою от все́х сла́вится, да Тя́ вси́, Ма́терь Бо́жию, по до́лгу велича́ем.

Припев: Пресвята́я Госпоже́ Богоро́дице, услы́ши моли́тву ра́б Твои́х, моля́щихся Тебе́.

Восхва́лит Тя́ Не́бо и земля́, вся́ оте́чествия язы́к, и вси́ рука́ми да воспле́щут Ма́тери Госпо́дни и о́бразу Ея́, А́нгелом гове́йному, да покло́нятся, с на́ми вопию́ще: сла́ва мно́жеству щедро́т Твои́х, Еди́на Человеколюби́вая, Тя́ вси́ по до́лгу велича́ем.

Сла́ва: Па́дшим воста́ние и уныва́ющим ра́дование, заблу́ждшим Наста́вница, боля́щим посеще́ние и исцеле́ние, гре́шным спасе́ние, во бра́нех побе́да и все́м христиа́ном нело́жная Храни́тельница и умягче́ние злы́х серде́ц, Де́во Богоро́дице, те́мже Тя́ вси́ по до́лгу велича́ем.

И ны́не: Приими́ пе́снь исхо́дную, Ма́ти Жива́го Бо́га, и спаси́ все́х, ве́рно покланя́ющихся свято́му Твоему́ о́бразу и чудотво́рней ико́не и вопию́щих Тебе́, Богороди́тельнице: моли́ся, Пречи́стая, Сы́ну Своему́, поми́ловатися на́м от все́х злы́х.

Молитва Пресвятой Богородице пред иконой Ея «Умягчение злых сердец» («Семистрельной»)

О, Многоско́рбная Ма́ти Бо́жия, превы́шшая всех дще́рей земли́ по чистоте́ Свое́й и по мно́жеству страда́ний, Тобо́ю на земли́ пренесе́нных! Приими́ многоболе́зненная воздыха́ния на́ша и сохрани́ нас под кро́вом Твоея́ ми́лости, ина́го бо прибе́жища и те́плаго предста́тельства, ра́зве Тебе́, не ве́мы, но, я́ко дерзнове́ние иму́щи к И́же от Тебе́ Рожде́нному, помози́ и спаси́ ны моли́твами Свои́ми, да непреткнове́нно дости́гнем Ца́рствия Небе́снаго, иде́же со все́ми святы́ми бу́дем воспева́ти хвалу́ в Тро́ице Еди́ному Бо́гу, всегда́, ны́не, и при́сно, и во ве́ки веко́в. Ами́нь.