10 декабря

Канон первый иконе Пресвятой Богородицы Знамение Новгородская

Тропа́рь, гла́с 4:

Яко необори́мую сте́ну и исто́чник чуде́с стяжа́вше Тя́ раби́ Твои́, Богоро́дице Пречи́стая, сопроти́вных ополче́ния низлага́ем. Те́мже мо́лим Тя́: ми́р гра́ду Твоему́ да́руй и душа́м на́шим ве́лию ми́лость.

Кано́н пе́рвый, Гла́с 6.

Пе́снь 1.

Ирмос: Волно́ю морско́ю скры́вшаго дре́вле, гони́теля мучи́теля — под земле́ю скры́ша спасе́нных о́троцы; но мы́ я́ко отрокови́цы, Го́сподеви пои́м, сла́вно бо просла́вися.

Припев: Пресвята́я Богоро́дице, спаси́ на́с.

Да ра́дуется ра́достию Боже́ственною мно́жество Нова́града дне́сь, зря́ще те́плую Засту́пницу, стра́нну побе́ду да́рующу на проти́вныя, и да пое́т Боже́ственными пе́сньми.

Сла́ва Отцу́ и Сы́ну и Свято́му Ду́ху:

Якоже ле́ствицу превысоку́, зри́м дне́сь ико́ну Твою́, Де́во Всенепоро́чная, ю́же сопроти́внии зря́ще, коне́чней слепоте́ преда́шася, мы́ же, к не́й ве́рне взира́юще, от бе́д избавля́емся.

И ны́не и при́сно и во ве́ки веко́в. Ами́нь.

В рождестве́ тли́ не прии́мши, тле́ния все́х на́с, Де́во, измени́, печа́ли уставля́ющи Ма́терним премене́нием, Богора́дованная.

Пе́снь 3.

Ирмос: Тобо́ю, Христе́, небеса́ утвержда́ема вся́, Сло́во Бо́жие и Си́ла, испове́дуют сла́ву неизрече́нну и вседе́тельныя руки́ Твоея́ сотворе́ние, не́сть бо пресвя́т, ра́зве Тебе́, Го́споди..

Припев: Пресвята́я Богоро́дице, спаси́ на́с.

Яко зве́ри, устреми́вшеся на ста́до Твое́, Пречи́стая, но Ты́ те́х че́люсти сокруши́ и си́х не́мощны до конца́ показа́.

Сла́ва Отцу́ и Сы́ну и Свято́му Ду́ху:

Общаго Па́стыря, Влады́ку Христа́ ро́ждши, Де́во Неискусобра́чная, Тому́ моли́ся настоя́щаго гне́ва изба́вити на́с и проти́вных обстоя́ния, Влады́чице.

И ны́не и при́сно и во ве́ки веко́в. Ами́нь.

Ми́лостивая, Ми́лостиваго ро́ждши Спа́са, ви́ждь озлобле́ние и воздыха́ние люде́й Твои́х, ускори́, Пречи́стая, и уще́дри ны́.

Седа́лен, гла́с 8.

Яже дре́вле проро́ки пропове́дася, две́рь небе́сная, неопали́мая купина́, све́щник многосве́тлый, злата́я кади́льница, ру́чка и же́зл пресла́вно дне́сь чу́дному святи́телю явля́ется, наро́дом дерза́ти повелева́ет и ди́вную побе́ду показу́ет. Те́мже благода́рная То́й возопии́м: Де́во Богороди́тельнице, моли́ Христа́ Бо́га грехо́в оставле́ние дарова́ти на́м, Тебе́ бо и́мамы наде́жду, раби́ Твои́.

Пе́снь 4.

Ирмос: Удиви́ся Тво́й ра́зум от мене́, услы́шавшу пресла́вная веле́ния смотре́ния Твоего́, укрепи́ся же возлюбле́нием Твоего́ схожде́ния: Ты́ бо моея́ нищеты́ не отве́рглся еси́.

Припев: Пресвята́я Богоро́дице, спаси́ на́с.

Почита́ющий Тя́ гра́д, Пречи́стая, и по до́лгу сла́вящий, огражда́й от безбо́жных, Чи́стая, иноплеме́нник, Ты́ бо тому́, Пречи́стая, бога́тство неотъе́млемо еси́, покро́в же и сла́ва.

Сла́ва Отцу́ и Сы́ну и Свято́му Ду́ху:

Мня́щиися, я́коже дре́вле Иерихо́н, разори́ти гра́д Тво́й, Пречи́стая Ма́ти Сло́ва, са́ми коне́чней поги́бели преда́шася си́лою из Тебе́ Воплоще́ннаго, Влады́чице.

И ны́не и при́сно и во ве́ки веко́в. Ами́нь.

При́зри, Чи́стая, спаси́ пою́щия Тя́, потреби́тися хотя́ща от сопроти́вных, те́мже наше́дшаго преще́ния изба́ви, Богороди́тельнице.

Пе́снь 5

Ирмос: Сою́зом любве́ связу́еми, апо́столи, влады́чествующему все́ми себе́ Христу́ возло́жше, кра́сны но́ги очища́ху, благовеству́юще все́м ми́р.

Припев: Пресвята́я Богоро́дице, спаси́ на́с.

Те́плая засту́пница к Тебе́ прибега́ющим и ненаде́ющимся наде́жда, ви́ждь озлобле́ние люде́й Твои́х и пода́ждь по́мощь, Пречи́стая.

Сла́ва Отцу́ и Сы́ну и Свято́му Ду́ху:

Яже о́гнь ро́ждшая Боже́ственный, Де́во, проти́вных, Пречи́стая, моли́твою Твое́ю огне́м попали́, я́ко Ма́ти су́щи Зижди́теля, Всепе́тая.

И ны́не и при́сно и во ве́ки веко́в. Ами́нь.

Чи́стая Богоневе́сто, недоуме́нныя лю́ди уще́дри Ма́терними Твои́ми мольба́ми и я́же на ны́ проти́вных обстоя́ния разори́ вско́ре моли́твами Твои́ми.

Пе́снь 6.

Ирмос: Ят бы́сть, но не удержа́н в пе́рсех ки́товых Ио́на: Тво́й бо о́браз нося́, Страда́вшаго, и погребе́нию да́вшагося, я́ко от черто́га от зве́ря изы́де. Приглаша́ше же кустоди́и: храня́щии су́етная и ло́жная, ми́лость сию́ оста́вили есте́.

Припев: Пресвята́я Богоро́дице, спаси́ на́с.

Изба́ви ра́тных наше́ствия рабы́ Твоя́, Пречи́стая, и не преда́ждь до конца́ поги́бнути насле́дию Твоему́, Всепе́тая, но си́лою из Тебе́ Рожде́ннаго проти́вныя низложи́.

Сла́ва Отцу́ и Сы́ну и Свято́му Ду́ху:

Многосогре́шших Тебе́ не пре́зри, но приими́ мольбу́ Ма́тере Твоея́ о на́с, Ще́дре, да не похва́лятся сопроти́внии, — где́ е́сть Бо́г и́х? — глаго́люще, но да разуме́ют вси́, я́ко Ты́, Изба́витель, с на́ми еси́.

И ны́не и при́сно и во ве́ки веко́в. Ами́нь.

Ны́не по́мощи прии́де вре́мя, ны́не премене́ния потре́ба, Чи́стая. Моли́ся Сы́ну Твоему́ и Бо́гу, я́ко да уще́дрит согреши́вшия и належа́щаго гне́ва изба́вит.

Конда́к, гла́с 4. Подо́бен: Яви́лся еси́ дне́сь.

Честна́го о́браза Твоего́ зна́мение пра́зднующе лю́дие Твои́, Богороди́тельнице, и́мже ди́вную побе́ду на сопроти́вных гра́ду Твоему́ дарова́ла еси́. Те́мже Тебе́ ве́рою взыва́ем: ра́дуйся, Де́во, христиа́н похвало́.

Икос:

Разреши́ тму́ мои́х согреше́ний, во уме́ мое́м лежа́щую, и Твои́м мя́ све́том просвети́, Де́во, я́ко да возмогу́ Тебе́ похвалу́ принести́, Юже Оте́ц восхвали́, и Ду́х Святы́й осени́, Сы́н же и Сло́во Бо́жие, всели́вся и нетле́нно от пречи́стою Твое́ю боку́ проше́д, с челове́ки поживе́. Те́мже мы́, гре́шнии и недосто́йнии раби́ Твои́, дне́сь соверша́юще свяще́нное торжество́ зна́мения, бы́вшаго честно́ю ико́ною Твое́ю, е́юже пресла́вную побе́ду на проти́вныя гра́ду Твоему́ дарова́ла еси́, и, от все́х чуде́с испо́лнившеся, вме́сто благово́нных арома́т, ели́ко возмо́жно на́м, земны́м, похва́льная Тебе́ прино́сим, глаго́люще: ра́дуйся, Богоро́дице, ра́досте Ангелов и челове́ков; ра́дуйся, тве́рдая наде́жда и покро́ве гра́ду Твоему́; ра́дуйся, я́ко проти́вныя си́лою Твое́ю низлага́ем; ра́дуйся, у́мнаго Со́лнца Ма́ти, ве́рныя просвеща́ющаго, неве́рныя же помрача́ющаго; ра́дуйся, Де́во, христиа́н похвало́.

Пе́снь 7.

Ирмос: Неизрече́нное чу́до: в пещи́ Изба́вивый преподо́бныя о́троки из пла́мене, во гро́бе ме́ртв бездыха́нен полага́ется, во спасе́ние на́с пою́щих: Изба́вителю Бо́же, благослове́н еси́.

Припев: Пресвята́я Богоро́дице, спаси́ на́с.

Вои́стину сокро́вище че́стно гра́ду Твоему́, ико́на Твоя́, Пречи́стая, дарова́ся, ю́же и са́ми зря́ще, чудеси́ удивля́емся и Сы́ну Твоему́ вопие́м: Изба́вителю Бо́же, благослове́н еси́.

Сла́ва Отцу́ и Сы́ну и Свято́му Ду́ху:

Якоже иногда́ ниневи́тяны покая́ния ра́ди пощади́л еси́, Сло́ве Бо́жий, про́поведию Ио́ны проро́ка, та́кожде и зде́ показа́л еси́ о́бразом Пречи́стыя Твоея́ Ма́тере, Христе́, вопию́щим: Изба́вителю Бо́же, благослове́н еси́.

И ны́не и при́сно и во ве́ки веко́в. Ами́нь.

Хра́м Тя́ Бо́жий, Влады́чице, ве́дуще, во святе́м хра́ме Твое́м ру́ки на́ша возно́сим на моли́тву: ви́ждь озлобле́ние на́ше и пода́ждь на́м по́мощь.

Пе́снь 8.

Ирмос: Ужасни́ся, боя́йся, не́бо, и да подви́жатся основа́ния земли́: се́ бо в мертвеце́х вменя́ется в вы́шних Живы́й, и во гро́б ма́л странноприе́млется. Его́же о́троцы благослови́те, свяще́нницы воспо́йте, лю́дие превозноси́те во вся́ ве́ки.

Припев: Пресвята́я Богоро́дице, спаси́ на́с.

Собезнача́льное Сло́во Отчее, Де́во Пречи́стая, нетле́нно родила́ еси́ и от сосцу́ пита́ла еси́. Того́ моли́, Богороди́тельнице, от обстоя́ния вра́жия спасти́ пою́щия Тя́ и превознося́щия во ве́ки.

Сла́ва Отцу́ и Сы́ну и Свято́му Ду́ху:

Его́же прови́де на престо́ле превзя́тем Иса́ия, Сего́ в ложесна́х, Де́во, вмести́ла еси́ и нетле́нно родила́ еси́. Его́же моли́ спасти́ся рабо́м Твои́м, пою́щим: де́ти, благослови́те, свяще́ннии, по́йте и превозноси́те Его́ во ве́ки.

И ны́не и при́сно и во ве́ки веко́в. Ами́нь.

Еди́на су́щи Блага́я, Преблаго́е Сло́во моли́ приле́жно настоя́щаго гне́ва рабо́м Твои́м изба́вится, несомне́нною ве́рою Сы́ну Твоему́ пою́щим: де́ти, благослови́те, свяще́ннии, по́йте и превозноси́те Его́ во ве́ки.

Песнь 9

Ирмос: Стра́нствия Влады́чня и безсме́ртныя трапе́зы на го́рнем ме́сте высо́кими умы́, ве́рнии, прииди́те наслади́мся, возше́дша Сло́ва, от Сло́ва научи́вшеся, Его́же велича́ем.

Припев: Пресвята́я Богоро́дице, спаси́ на́с.

Милосе́рдым о́ком свы́ше при́зри на гра́д и лю́ди Твоя́, Пречи́стая, ины́я бо по́мощи не и́мамы, то́кмо Тебе́, Всенепоро́чная, да Тя́ вси́, Ма́терь Бо́жию, непреста́нно велича́ем.

Сла́ва Отцу́ и Сы́ну и Свято́му Ду́ху:

Еди́на, ро́ждшая Сло́во воплоще́нное, Де́во Всепе́тая, приснотеку́щий исто́чник исцеле́ний излива́еши ве́рою притека́ющим хра́му Твоему́, Пречи́стая.

И ны́не и при́сно и во ве́ки веко́в. Ами́нь.

Се́, раби́ Твои́, вопие́м Ти́, Ма́ти Бо́жия: обы́чныя ми́лости Твоя́ на гра́д и лю́ди Твоя́ ми́лостивно показу́ющи, проти́вных обстоя́ний на́с измени́, да Тя́ вси́ непреста́нно велича́ем.

Свети́лен.

Возжеле́в Твоея́ добро́ты Иису́с, Пречи́стая, в Тя́ всели́ся и Тебе́ засту́пницу гра́ду Твоему́ Сло́во Бо́жие дарова́, его́же сохраня́й заступле́нием Твои́м при́сно, я́ко да Тя́ ублажа́ем, Пренепоро́чная Отрокови́це.

Молитва Пресвятей Богородице в честь иконы Ея «Знамение» Новгородская

О Пресвятая и Преблагословенная Мати Сладчайшаго Господа нашего Иисуса Христа! Припадаем и поклоняемся Тебе пред святою чудотворною иконою Твоею, воспоминающе дивное знамение Твоего заступления, великому Новуграду от нея явленное во дни ратнаго на сей град нашествия. Смиренно молим Тя, Всесильная рода нашего Заступнице: якоже древле отцем нашим на помощь ускорила еси, тако и ныне нас, немощных и грешных, сподоби Твоего Матерняго заступления и благопопечения. Спаси и сохрани, Владычице, под покровом милости Твоея Церковь Святую, град Твой (обитель Твою), всю страну нашу православную и всех нас, припадающих к Тебе с верою и любовию умиленно просящих со слезами Твоего заступления. Ей, Госпоже Всемилостивая! Умилосердися на ны, обуреваемыя грехи многими, простри ко Христу Господу Богоприемнеи руце Твои и предстательствуй за нас пред благостию Его, просящи нам прощения прегрешений наших, благочестнаго мирнаго жития, благия христианския кончины и добраго ответа на Страшнем Суде Его, да, спасаеми всесильными Твоими к Нему молитвами, блаженство райское унаследуем и со всеми святыми воспоем Пречестное и Великолепое Имя Достопоклоняемыя Троицы, Отца и Сына и Святаго Духа, и Твое велие к нам милосердие, во веки веков. Аминь.