Канон в Светлую Пятницу - иконе Божией Матери Живоносный Источник.

Моли́твами святы́х оте́ц на́ших, Го́споди Иису́се Христе́, Бо́же наш, поми́луй нас. Ами́нь.

И тропарь, глас 5, трижды:

Христо́с воскре́се из ме́ртвых, / сме́ртию смерть попра́в / и су́щим во гробе́х живо́т дарова́в.

Пасхальное начало:

Первый стих: Да воскре́снет Бог, / и расточа́тся врази́ Его́.

И на кийждо стих поем тропарь: Христо́с воскре́се из ме́ртвых, / сме́ртию смерть попра́в / и су́щим во гробе́х живо́т дарова́в. (единожды).

Вторый стих: Я́ко исчеза́ет дым, / да исче́знут.

Христо́с воскре́се: (единожды).

Третий стих: Та́ко да поги́бнут гре́шницы от Лица́ Бо́жия, / а пра́ведницы да возвеселя́тся.

Христо́с воскре́се: (единожды).

Четвертый стих: Сей день, его́же сотвори́ Госпо́дь, / возра́дуемся и возвесели́мся в онь.

Христо́с воскре́се: (единожды).

Слава: Христо́с воскре́се: (единожды).

И ныне: Христо́с воскре́се: (единожды).

Таже вышшим гласом: Христо́с воскре́се из ме́ртвых, / сме́ртию смерть попра́в / и су́щим во гробе́х живо́т дарова́в.

Тропарь Божией Матери пред иконой Ее «Живоносный Источник» глас 4

Почерпе́м, челове́цы,/ цельбы́ душа́м и те́лом моли́твою,/ Река́ бо всем предтече́т – Пречи́стая Цари́ца Богоро́дица,/ источа́ющи нам чу́дную во́ду/ и измыва́ющи серде́ц че́рности,/ грехо́вныя стру́пы очища́ющи,/ ду́ши же освяща́ющи ве́рных// Боже́ственною благода́тию.

Канон, глас 1.

Песнь 1.

Ирмос: Воскресе́ния день, / просветимся, людие. / Пасха, Госпо́дня Па́сха, / от сме́рти бо к жизни, / и от земли́ к небеси, / Христос Бог нас преведе, / победную поющия.

Припев: Пресвятая Богородице, спаси нас

Ны́не источи́ ми Де́во Богоро́дице исто́чниче, благода́ть даю́щи Сло́ва, я́ко да воспою́ тя исто́чник, вре́ющий живо́т и благода́ть ве́рным: ты́ бо ипоста́сное сло́во источи́ла еси́.

Врачевство́ па́че естества́, хра́м Тво́й Честна́я, явля́ется все́м Отрокови́це: от сме́рти бо я́вныя притека́ющыя ве́рныя я́ве возставля́ет, и все́м незави́стную то́чит сла́дость.

Слава: Излива́еши с небесе́ неистощи́мо благода́ти вои́стинну еди́на: слепе́юща бо твори́ши взира́ти к све́ту, бла́том но́вым, возгласи́вши свы́ше па́че смы́сла Лео́нови.

И ныне: О́бщее любоче́стие челове́чества Честна́я, ра́дуйся Мари́е, ра́дуйся: все́х бо Творе́ц на Тя́, я́коже ка́пля сни́де я́вственно, исто́чник тя́ безсме́ртен показа́в Богоневе́стная.

Песнь 3.

Ирмос: Приидите, пиво пием новое, / не от камене неплодна чудодеемое, / но нетления источник / из гроба одождивша Христа́, / в Немже утверждаемся.

Све́тлый тя́ святы́й хра́м Влады́ки все́х Отрокови́це ве́м, и нетле́ния исто́чник, во́ду излива́ющ Христа́, от него́же напая́емся.

От Твоея́ благода́ти Влады́чице исто́чниче, Самоде́ржцу дае́ши исхо́дов происхожде́ние содержи́мо лю́те, ка́мене подстоя́ние стра́шное, водо́ю разреши́вшееся.

Слава: Тече́т благода́ть незави́стная от Тебе́, Богоро́дице Де́во, оби́льно точа́щая, хроми́и ска́чут о Тебе́, прокаже́нных очища́ется мно́жество, и де́мони угнета́ются.

И ныне: Все́м дае́ши исцеле́ние ве́рным, царе́м, простце́м, ни́щым, князе́м, убо́гим, бога́тым о́бще, во́ду излива́яй исто́чниче разли́чное исцеле́ние.

Кондак Пасхи, глас 8:

А́ще и во гроб снизше́л еси́, Безсме́ртне, / но а́дову разруши́л еси́ си́лу, / и воскре́сл еси́, я́ко победитель, Христе́ Бо́же, / жена́м мироно́сицам веща́вый: ра́дуйтеся, / и Твои́м апо́столом мир да́руяй, / па́дшим подая́й воскресе́ние.

Седален, глас 8:

Приснотеку́щий исто́чник, и живо́тный, источа́яй струя́ боже́ственный то́к, согла́сно восхва́лим благода́ти прося́ще: на ки́йждо бо де́нь источа́ет исцеле́ния, я́ко ре́к тече́ния показу́яй мале́йшая. Те́мже по до́лгу приступа́юще с любо́вию, ве́рно почерпе́м от исто́чника неисчерпа́емое здра́вие, вои́стинну безсме́ртное, ороша́ющее ве́рно благочести́вых сердца́: устна́ми возопии́м, Ты́ еси́ ве́рных утеше́ние.

Песнь 4.

Ирмос: На Боже́ственней стражи / богоглаголивый Аввакум / да ста́нет с на́ми и пока́жет / светоно́сна А́нгела / ясно глаголюща: / днесь спасение миру, / яко воскресе Христос, / яко всесилен.

Па́че песка́ вои́стинну, и ка́плий дожде́вных, бы́ша Богоро́дице мно́жества, исто́чника де́л Твои́х, непреста́нно теку́щая на всю́ зе́млю бога́тно, и вся́каго боля́ща лю́те ско́ро исцеля́ющая.

На стесне́нный жены́ от карки́на сосе́ц, вода́ возлива́ется Де́во, исто́чника Твоего́ Влады́чице, и а́бие преста́ша стра́сти смертоно́сныя струе́ю, и карки́н про́сто изы́ти позна́.

Недомы́слимое в Тебе́, и па́че естества́ соде́янное е́сть я́вственно Богоро́дице: вода́ бо быва́ет исто́чника Твоего́ исцеле́ние, неду́гом смертоно́сным проти́вное, его́же естество́ я́ве никогда́же ве́дяше.

При́сно умерщвля́ет мя́ вра́г сла́стными прило́ги, Влады́чице исто́чниче Богоро́дице, не пре́зри, предвари́ ско́рая по́моще: сего́ же се́тей мя́ изба́ви, да воспою́ Тя при́сно многопе́тую.

Песнь 5.

Ирмос: У́тренюем утреннюю глубоку, / и вместо мира песнь принесем Владыце, / и Христа́ узрим / правды Солнце, / всем жизнь возсияюща.

Глаго́ланная Де́во Отрокови́це, исто́чника Твоего́ вои́стинну чудеса́, ужаса́ют челове́ков помышле́ние: па́че бо естества́ су́ть, вся́ ве́рныя освяща́ющая.

Повествова́ руно́, ма́нна и Силоа́м, и ка́мень точа́щь, Соломо́нов притво́р, благода́ть Твою́, Иорда́нския во́ды, и исто́чник самаряны́ни.

Ка́пли Твоя́ Отрокови́це Де́во, я́же исто́чника, и ме́ртваго оживи́ша, па́че сло́ва соде́янное и смы́сла: вся́ бо Твоя́ Всечи́стая, сло́во побежда́ют челове́ческое.

Стра́сти моя́ Отрокови́це исцели́, кровотече́ния исто́чник изсуша́ющи, и лю́тое пла́мене возжже́ние, и здра́вия преложе́ние, исхо́дов сою́з, и чревотече́ние.

Песнь 6.

Ирмос: Снизше́л еси́ в преиспо́дняя земли́, / и сокруши́л еси́ вереи́ ве́чныя, / содержа́щия свя́занныя, Христе́, / и тридне́вен, я́ко от ки́та Ио́на, / воскре́сл еси́ от гро́ба.

Словеса́ сло́ва, я́ко вои́стинну исто́чника, воспева́ем Тя́ Чи́стая: прему́дрости бо глубину́ я́ко па́че сло́ва ражда́еши, пове́сивша на возду́се тече́ния, и зе́млю на воде́.

Подшла́ еси́ ле́ствиц несе́ние, оте́млющее сокруше́ние и́же та́мо живопи́сцов, о всесвяты́й исто́чниче! спаса́яй лю́ди от тру́са до́му па́дшыя.

Утро́бы неродя́щыя непло́дством пре́жде, разреша́еши я́ве, исто́чника Твоего́ струя́ми: и́бо я́ко роди́вшая Влады́ку все́х. и рожде́ния подае́ши.

Ни сло́во, ни у́м, ниже́ язы́к Твое́ возмо́гут Чи́стая Рождество́ похвали́ти, но немощству́ют в Тебе́, и облича́ется филосо́фов че́стность, и ри́торов красота́.

Кондак, глас 8:

От неистощи́мыя Ты́, исто́чниче богоблагода́тный, подае́ши ми́, точа́щи во́ды Твоея́ благода́ти, приснотеку́щий па́че сло́ва: я́ко бо Сло́во ро́ждшая па́че смы́сла, молю́ Ти ся, ороси́ мя благода́тию, да зову́ Ти: ра́дуйся, водо́ спаси́тельная.

Икос:

Нескве́рная Богоро́дице, ро́ждшая Сло́во О́тчее, пре́жде ве́к нетле́нно ро́ждшееся, разшири́ моя́ уста́, Чи́стая, спривнося́щи мя́ к Твоему́ похвале́нию, я́ко да восхвалю́ Тя, зовы́й исто́чнику Твоему́ сия́: ра́дуйся, исто́чниче ра́дости непреста́емыя: ра́дуйся, то́че добро́ты неизрече́нныя. ра́дуйся, неду́гов разли́чных разреше́ние: ра́дуйся страсте́й вся́ких потопле́ние. Ра́дуйся струе́ светови́днейшая, здра́вы творя́щая ве́рныя: ра́дуйся водо́ благода́тнейшая неду́гующым многоразли́чно. Ра́дуйся ча́ше ма́нны живото́чныя: ра́дуйся ба́не и не́ктарю богоизлия́нный. Ра́дуйся водо́, прему́дрости неве́дение оте́млющая: ра́дуйся растворе́ние се́рдца, пи́щу боже́ственную излива́ющее. Ра́дуйся приста́нище неможе́ния источа́ющая: ра́дуйся пла́мень неду́гования угаша́ющая. Ра́дуйся водо́ спаси́тельная.

Таже глаголем:

Воскресе́ние Христово видевше, / поклонимся Святому Господу Иисусу, / единому безгрешному, / Кресту Твоему покланяемся, Христе́, / и святое Воскресе́ние Твое́ поем и славим: / Ты бо еси́ Бог наш, / разве Тебе́ иного не знаем, / имя Твое́ именуем. / Приидите вси вернии, / поклонимся Святому Христову Воскресе́нию: / се бо прииде Крестом радость всему миру. / Всегда благословяще Господа, / поем Воскресе́ние Его́: / распятие бо претерпев, / смертию смерть разруши. [Трижды.]

Воскрес Иисус от гроба, / якоже прорече, / даде нам живот вечный / и велию милость. [Трижды.]

Песнь 7.

Ирмос: О́троки от пещи избавивый, / быв Человек, / страждет яко смертен, / и страстию смертное, / в нетления облачит благолепие, / Един благословен / отцев Бог, и препрославлен.

Почерпи́те неду́гующии исцеле́ния: Всечи́стая бо то́чит от боже́ственнаго исто́чника сла́дость и́стинную, пото́к сла́дости вои́стинну вре́ющий, те́мже и ве́рою то́ки незави́стныя поче́рпем вси́.

Удивля́ют слы́шащыя Влады́чице, стра́нная Твоя́ чудеса́, вся́ ве́рныя: немы́я бо и глухи́я, я́ко благоглаго́ливыя показу́ет вода́ Твоя́, стра́ждущыя же лю́те врачу́ет, и исцеле́ние да́рует.

Возво́диши от пе́щи скорбе́й, ороша́ющи вода́ми от стра́ннаго исто́чника, приступа́ющыя к Тебе́ Чи́стая: карки́нския бо ра́ны свобожда́ется челове́к, прокаже́нна же исцеля́еши, и распале́ние угаси́ла еси́.

Ю́ноши и отрокови́цы Влады́чицу, и вси́ челове́цы ве́рою от души́ восхва́лим све́тло: сокруше́ния бо гное́виц, и вре́ды лука́вых, и ото́ки, и разсла́бленнаго исцели́.

Песнь 8.

Ирмос: Сей нарече́нный и святы́й день, / Еди́н суббо́т Царь и Госпо́дь, / пра́здников пра́здник / и торжество́ есть торже́ств, / во́ньже благослови́м Христа́ во ве́ки.

Боже́ственную исто́чник и честну́ю во́ду излива́ет Тво́й Де́во: водны́х бо тече́ние вспяща́ет зело́, призыва́нием боже́ственным благода́ти. те́мже тя́ почита́ем, исто́чниче, во ве́ки.

Вси́ честну́ю живото́чную во́ду воспои́м му́дренне: злодыха́ния бо то́к по страна́м уставля́ет, и свобо́дное твори́т происхожде́ние. Оле Твои́х чуде́с, Чи́стая Богороди́тельнице!

Ка́я, Всепе́тая, восхва́лят уста́ Рождества́ Твоего́ стра́нное? Но и у́м ки́й бы чуде́с исто́чник изсле́довал, и сло́во изглаго́лало? не́сть естеству́ кре́пость, Твои́м чуди́тися.

Вся́ о Тебе́ сме́рти держа́ва разори́ся внеза́пу, о Цари́це и Госпоже́: и́бо Царя́ Безсме́ртнаго, живо́т Ты́ источи́ла еси́, во́ду, ма́нну, Христа́ во ве́ки.

Песнь 9.

Ирмос: Свети́ся, свети́ся, / но́вый Иерусали́ме, / сла́ва бо Госпо́дня / на тебе́ возсия́. / Лику́й ны́не / и весели́ся, Сио́не. / Ты же, Чи́стая, красу́йся, Богоро́дице, / о воста́нии Рождества́ Твоего́.

Во́ды вся́ превосхо́дит, Отрокови́це Чи́стая, исто́чника Твоего́ вода́, я́ве да́рующая свобожде́ние неду́гов лю́тых, и душа́м вся́кое здра́вие, я́ко па́че естества́ излива́емая.

Реши́тель неду́гов но́вый се́ Силоа́м, исто́чника Твоего́ Де́во, зри́м вси́: о́чи бо прие́млет огня́, вси́ же здра́вие при́сно к животу́ прие́млем.

Здра́вия и́щущии притецы́те ко исто́чнику: Отрокови́ца бо Де́ва жи́тельствует при воде́. Лику́й и весели́ся ве́рных мно́жество си́це, я́коже подоба́ет: и́же бо прии́дет к хра́му, воздая́ние проше́ний прие́млет.

Возвы́сися исто́чника Твоего́ вода́ вы́ше небе́с, и земли́ бе́здны то́ки претече́: сия́ е́сть пи́ща души́, питие́ ве́рных, ме́д из ка́мене, и ма́нны раздая́ние.

Весели́ши Де́во царя́ преесте́ственне, источа́ющи благода́ть от исто́чника присносу́щную, сему́ подава́ющи на враги́ кре́пость, побе́ды при́сно, здра́вие и ми́р, и проше́ний исполне́ние.

Ексапостиларий Источнику:

Исто́чник еси́ вои́стинну воды́ живы́я, Влады́чице: измыва́еши у́бо неду́ги ду́ш и теле́с лю́тыя, прикоснове́нием Твои́м еди́ным то́кмо, во́ду спасе́ния Христа́ излива́ющи.

Молитва Пресвятой Богородице в честь иконы Ее «Живоносный Источник»

О, Пресвята́я Де́во, Ма́ти Го́спода на́шего Иису́са Христа́! Ты́ еси́ Ма́ти и покрови́тельница все́х к Тебе́ прибега́ющих, при́зри с благосе́рдием на моли́твы гре́шных и смире́нных ча́д Твои́х. Ты́, имену́емая Живоно́сный Исто́чник благода́тных врачева́ний, исцели́ боле́зни стра́ждущих и умоли́ Сы́на Твоего́, Го́спода на́шего Иису́са Христа́, да низпо́слет и все́м притека́ющим к Тебе́ здра́вие душе́вное и теле́сное и, прости́в на́м во́льная и нево́льная согреше́ния на́ша, да́рует на́м вся́ я́же к ве́чней и вре́менней жи́зни потре́бная. Ты́ еси́ все́х скорбя́щих ра́дость, услы́ши на́с, ско́рбных; Ты́ еси́ утоле́ние печа́ли, утоли́ и на́шу печа́ль; Ты́ еси́ взыска́ние поги́бших, не попусти́ и на́м поги́бнути в бе́здне грехо́в на́ших, но всегда́ избавля́й на́с от вся́ких скорбе́й и напа́стей и вся́каго зла́го обстоя́ния. Е́й, Цари́це на́ша преблага́я, наде́ждо на́ша несокруши́мая и засту́пнице необори́мая, не отврати́ лица́ Твоего́ от на́с за мно́жество прегреше́ний на́ших, но простри́ на́м ру́це Ма́терняго милосе́рдия Твоего́ и сотвори́ с на́ми зна́мение ми́лости Твоея́ во бла́го: яви́ на́м по́мощь Твою́ и благопоспеши́ во вся́ком де́ле благо́м. От вся́каго же начина́ния грехо́внаго и помышле́ния лука́ваго отврати́ на́с, да всегда́ сла́вим пречестно́е и́мя Твое́, велича́юще Бо́га Отца́ и Сы́на Единоро́днаго Го́спода Иису́са Христа́ и Животворя́щаго Свята́го Ду́ха со все́ми святы́ми во ве́ки веко́в. Ами́нь.

Молитва иная

О, Пресвята́я Де́во, Всеми́лостивая Госпоже́ Влады́чице Богоро́дице, Живоно́сный Исто́чник Твой, целе́бные да́ры на здра́вие душ и теле́с на́ших и на спасе́ние ми́ру точа́щий, подала́ еси́ нам, те́мже благода́рни су́ще усе́рдно мо́лим Тя, Цари́це Пресвята́я: моли́ Сы́на Твоего́ и Бо́га на́шего да́ти нам оставле́ние прегреше́ний и вся́кой душе́ скорбя́щей и озло́бленней ми́лость и утеше́ние, и от бед, скорбе́й и боле́зней свобожде́ние. Пода́ждь, Госпоже́, (храму сему и) сим лю́дем покрове́ние (и святе́й оби́тели сей соблюде́ние), гра́ду сохране́ние, стране́ на́шей от напа́стей избавле́ние и огражде́ние, да ми́рное зде поживе́м житие́, и в бу́дущем ве́це сподо́бимся ви́дети Тебе́, Засту́пницу на́шу, во сла́ве Ца́рствия Сы́на Твоего́ и Бо́га на́шего, Ему́же сла́ва и держа́ва со Отце́м и Пресвяты́м Ду́хом во ве́ки веко́в. Ами́нь.

Честне́йшую Херуви́м / и сла́внейшую без сравне́ния Серафи́м, / без истле́ния Бо́га Сло́ва ро́ждшую, / су́щую Богоро́дицу, Тя велича́ем.

Сла́ва Отцу́ и Сы́ну и Свято́му Ду́ху, и ны́не и при́сно и во ве́ки веко́в. Ами́нь.

Господи, помилуй (трижды).

Моли́твами святы́х оте́ц на́ших, Го́споди Иису́се Христе́, Бо́же наш, поми́луй нас. Ами́нь.

И паки глаголем подобне: Христо́с воскре́се из ме́ртвых, / сме́ртию смерть попра́в / и су́щим во гробе́х живо́т дарова́в. (Трижды.)

И нам дарова́ живо́т ве́чный, / покланя́емся Его́ / тридне́вному Воскресе́нию.