Песнопения Четверга 2-ой седмицы по Пасхе

В Среду вечера

Тропа́рь, гла́с 7:

Запеча́тану гро́бу, живо́т от гро́ба возсия́л еси́ Христе́ Бо́же, и две́рем заключе́нным, ученико́м предста́л еси́, все́х Воскресе́ние: Ду́х Пра́вый те́ми обновля́я на́м, по вели́цей Твое́й ми́лости.

Конда́к, гла́с 8:

Любопы́тною десни́цею, жизнопода́тельная Твоя́ ре́бра Фома́ испыта́ Христе́ Бо́же: созаключе́нным бо две́рем я́ко вше́л еси́, с про́чими апо́столы вопия́ше Тебе́: Госпо́дь еси́ и Бо́г мо́й.

Стихи́ры, гла́с 2.

Не́др не оста́вль Оте́ческих, яви́лся еси́ на земли́ плотоно́сец, за благоутро́бие Христе́, стра́сть же и сме́рть прии́м, воскре́сл еси́ тридне́вен: две́рем заключе́нным вну́трь вше́л еси́, я́ко всеси́лен. Те́мже ребро́ Твое́ Боже́ственное ра́дуяся Фома́ осяза́в, Го́спода и Зижди́теля Тя́ просла́ви.

Гвоздьми́ пригвозди́лся еси́ на Кресте́, копие́м в ре́бра прободе́н еси́, же́лчи вкуси́л еси́ Христе́, сме́рть претерпе́л еси́, во гро́бе положе́н бы́в я́ко ме́ртв, я́ко Бо́г же сокруши́л еси́ у́зы а́довы, и совоскреси́л еси́ я́же от ве́ка ме́ртвыя. Те́мже печа́ти не разруши́в, Твои́м ученико́м яви́лся еси́, Твое́ Воскресе́ние уверя́я.

Па́сха настоя́щий пра́здник: Па́сха та́йная: Па́сха Боже́ственная: Па́сха спаси́тельная: Па́сха к безсме́ртной жи́зни преводя́щая на́с: Па́сха вся́кую ско́рбь оте́млющая от среды́: Па́сха весе́лую благода́ть даю́щая ученико́м. те́мже Фома́ вопия́ше: Госпо́дь Бо́г мо́й еси́, плени́вый а́дова ца́рствия.

Сла́ва, и ны́не: гла́с 4:

О пресла́внаго чудесе́! Неве́рие ве́ру изве́стную роди́: ре́кл бо Фома́: а́ще не ви́жду, не иму́ ве́ры. Осяза́в же ре́бра, богосло́вит воплоти́вшагося, того́жде Сы́на Бо́жия позна́, я́ко пострада́вша пло́тию: пропове́да воскре́сшаго Бо́га, и возопи́ све́тлым гла́сом: Госпо́дь мо́й и Бо́г мо́й, сла́ва Тебе́.

Стихи́ры, гла́с 1:

Стра́стию Твое́ю Христе́, от страсте́й свободи́хомся, и Воскресе́нием Твои́м из истле́ния изба́вихомся: Го́споди сла́ва Тебе́.

Апо́стольская всесли́чная цевни́ца, Святы́м Ду́хом дви́жимая, безсту́дных бесо́в тре́бища упраздни́ла е́сть: и еди́наго Го́спода пропове́давши, язы́ки изба́ви от пре́лести и́дольския, и поклоня́тися научи́ Тро́ице Единосу́щней.

Всехва́льнии му́ченицы, ва́с ни земля́ потаи́ла е́сть, но не́бо прия́т: отверзо́шася ва́м ра́йская врата́, и вну́трь бы́вше дре́ва живо́тнаго наслажда́етеся: Христо́ви моли́теся, дарова́ти душа́м на́шым ми́р и ве́лию ми́лость.

Сла́ва, и ны́не, гла́с 4:

О пресла́внаго чудесе́! огню́ трава́ косну́вшаяся спасе́ся: вложи́в бо Фома́ во о́гненная ре́бра ру́ку Иису́са Христа́ Бо́га, не опали́ся осяза́нием. Души́ бо злове́рство преложи́ на благове́рие, те́пле возопи́ от глубины́ душе́вныя: Влады́ка ты́ мо́й еси́ и Бо́г, из ме́ртвых воскресы́й, сла́ва Тебе́.

В Четверг утра

Тропа́рь, гла́с 7:

Запеча́тану гро́бу, живо́т от гро́ба возсия́л еси́ Христе́ Бо́же, и две́рем заключе́нным, ученико́м предста́л еси́, все́х Воскресе́ние: Ду́х Пра́вый те́ми обновля́я на́м, по вели́цей Твое́й ми́лости.

Конда́к, гла́с 8:

Любопы́тною десни́цею, жизнопода́тельная Твоя́ ре́бра Фома́ испыта́ Христе́ Бо́же: созаключе́нным бо две́рем я́ко вше́л еси́, с про́чими апо́столы вопия́ше Тебе́: Госпо́дь еси́ и Бо́г мо́й.

Седа́лен воскре́сен, гла́с 1:

На Кресте́ пригвозди́лся еси́ Животе́ все́х, и в ме́ртвых вмени́лся еси́, безсме́ртный Го́споди: воскре́сл еси́ тридне́вен Спа́се, совоздви́г Ада́ма от тле́ния. Сего́ ра́ди си́лы небе́сныя вопия́ху Тебе́ жизнода́вче: сла́ва Боже́ственной стра́сти Твое́й Христе́: сла́ва Воскресе́нию Твоему́: сла́ва снизхожде́нию Твоему́, еди́не Человеколю́бче.

Сти́х: Во всю́ зе́млю изы́де веща́ние и́х и в концы вселенныя глаголы и́х.

Прему́дрии вселе́нныя ловцы́, от Бо́га прие́мше ми́лостивное, моли́теся и ны́не о на́с вопию́щих: Го́споди, спаси́ лю́ди Твоя́, и гра́д Тво́й, и от содержа́щих лю́тых свободи́ апо́столми ду́шы на́шя.

Сти́х: Ди́вен Бо́г во святы́х Свои́х, Бо́г Изра́илев.

Му́ченики Христо́вы мо́лим вси́, ти́и бо о на́шем спасе́нии про́сят, и вси́ присту́пим к ни́м с ве́рою. Си́и источа́ют исцеле́ний благода́ть, си́и полки́ отгоня́ют де́монския, я́ко храни́телие ве́ры.

Сла́ва, и ны́не: богоро́дичен:

Проро́цы Тя́ я́вственно предвозвести́ша Отрокови́це Ма́терь Бо́жию, и апо́столи боже́ственнии в ми́ре пропове́даша, мы́ ве́ровахом. Те́мже вси́ благочестному́дренно почита́юще воспева́ем Тя́, и Богоро́дицу госпо́дьственно при́сно имену́ем.

Седа́лен, гла́с 1.

Ви́дев Моя́ ре́бра, не неве́руй Ми́ бо́лее, Сло́во Фоме́ неве́рующему вопия́ше, пе́рстом Мя́ осяжи́, и руко́ю испыта́й: и уве́дев Мои́х я́зв зна́мения, ми́рови пропове́ждь живоно́сное Мое́ сие́ е́же из гро́ба Воскресе́ние.

Стихи́ры, Гла́с 1:

Боголе́пное твое́ снизхожде́ние сла́вяще, пое́м Тя́ Христе́, роди́лся еси́ от Де́вы, и неразлуче́н бы́л еси́ от Отца́, пострада́л еси́ я́ко Челове́к, и во́лею претерпе́л еси́ кре́ст, воскре́сл еси́ от гро́ба, я́ко от черто́га произше́д, да спасе́ши ми́р, Го́споди сла́ва Тебе́.

Петра́ и Па́вла, согла́сно восхва́лим, Луку́, Матфе́а, Ма́рка, Иоа́нна, Андре́а, Фому́, Варфоломе́а, Си́мона Канани́та, Иа́кова, Фили́ппа: и все́ собра́ние ученико́в досто́йно да благопохва́лим.

Ра́дуйтеся му́ченицы о Го́споде, я́ко по́двигом до́брым подвиза́стеся, сопроти́вистеся царе́м, и мучи́тели победи́сте, огня́ и меча́ не убоя́стеся, звере́м ди́виим снеда́ющым телеса́ ва́ша, Христу́ со а́нгелы пе́ние возсыла́юще, я́же от небе́с венцы́ прия́сте, проси́те ми́р ми́рови дарова́ти, и душа́м на́шым ве́лию ми́лость.

Сла́ва, и ны́не: гла́с 4:

О пресла́внаго чудесе́! Иоа́нн на пе́рси Сло́ва возлеже́, Фома́ же ре́бра осяза́ти сподо́бися. Но о́в у́бо отону́ду стра́шно, богосло́вия глубо́кое извлече́ смотре́ние: о́в же сподо́бися тайноучи́ти на́с, представля́ет показа́ние я́сно воста́ния Его́, вопия́: Госпо́дь мо́й и Бо́г мо́й, сла́ва Тебе́.

Стихи́ры гла́с 2.

Печа́ль страсте́й, и помышле́ний бу́ря, дале́че да отжене́тся, и та́ко процвете́т весна́ ве́ры.

Сти́х: Во всю́ зе́млю изы́де веща́ние и́х, и в концы́ вселе́нныя глаго́лы и́х.

Яви́лся еси́ Спа́се, свяще́нным Твои́м апо́столом, две́рем заключе́нным, те́ми обновля́я на́м Боже́ственный Ду́х дне́сь.

Сти́х: Небеса́ пове́дают сла́ву Бо́жию, творе́ние же руку́ Его́ возвеща́ет тве́рдь.

Ны́не Тя́ Всецарю́, ви́девше не очи́ма, но серде́чною любо́вию, Бо́га ве́ровавше пе́сньми велича́ем.

Сла́ва И ны́не: гла́с 6:

По дне́х осми́х воста́ния Твоего́, Иису́се Царю́, единоро́дный Сло́ве О́тчий, яви́лся еси́ ученико́м Твои́м, заключе́нным две́рем, ми́р Тво́й подая́. И неве́рующему ученику́ зна́мения показа́л еси́: прииди́, и осяжи́ ру́це и но́зе, и нетле́нная Моя́ ре́бра. Он же ве́ровав, вопия́ше Тебе́: Госпо́дь мо́й и Бо́г мо́й, сла́ва Тебе́.