Шрифт

▲

Богослужебные тексты для домашнего употребления

Дни памяти святых

Последование Всеношного бдения в день памяти великомученицы Екатерины. Для домашнего (келейного) совершения

Оглавление

ВСЕНО́ЩНОЕ БДЕ́НИЕ

ВЕЛИ́КАЯ ВЕЧЕ́РНЯ

Моли́твами святы́х оте́ц на́ших, Го́споди Иису́се Христе́, Бо́же наш, поми́луй нас. Ами́нь.

Сла́ва Тебе́, Бо́же наш, сла́ва Тебе́.

Царю́ Небе́сный, Уте́шителю, Ду́ше и́стины, И́же везде́ сый и вся исполня́яй, Сокро́вище благи́х и жи́зни Пода́телю, прииди́ и всели́ся в ны, и очи́сти ны от вся́кия скве́рны, и спаси́, Бла́же, ду́ши на́ша.

Святы́й Бо́же, Святы́й Кре́пкий, Святы́й Безсме́ртный, поми́луй нас. (Трижды.)

Сла́ва Отцу́ и Сы́ну и Свято́му Ду́ху, и ны́не и при́сно и во ве́ки веко́в. Ами́нь.

Пресвята́я Тро́ице, поми́луй нас; Го́споди, очи́сти грехи́ на́ша; Влады́ко, прости́ беззако́ния на́ша; Святы́й, посети́ и исцели́ не́мощи на́ша, и́мене Твоего́ ра́ди.

Го́споди, поми́луй, (трижды). Сла́ва, и ны́не:

О́тче наш, И́же еси́ на Небесе́х, да святи́тся и́мя Твое́, да прии́дет Ца́рствие Твое́, да бу́дет во́ля Твоя́, я́ко на Небеси́ и на земли́. Хлеб наш насу́щный да́ждь нам днесь; и оста́ви нам до́лги на́ша, я́коже и мы оставля́ем должнико́м на́шим; и не введи́ нас во искуше́ние, но изба́ви нас от лука́ваго.

Таже, Го́споди, поми́луй, (12), Сла́ва, и ны́не:

Прииди́те, поклони́мся Царе́ви на́шему Бо́гу.

Прииди́те, поклони́мся и припаде́м Христу́, Царе́ви на́шему Бо́гу.

Прииди́те, поклони́мся и припаде́м Самому́ Христу́, Царе́ви и Бо́гу на́шему.

Псалом 103:

Поется часть псалма:

Благослови́, душе́ моя́, Го́спода. / Благослове́н еси́, Го́споди. / Го́споди, Бо́же мой, возвели́чился еси́ зело́. / Благослове́н еси́, Го́споди. / Во испове́дание и в велеле́поту обле́клся еси́. / Благослове́н еси́, Го́споди. / Посреде́ гор про́йдут во́ды. / Ди́вна дела́ Твоя́, Го́споди. / Вся прему́дростию сотвори́л еси́. / Сла́ва Ти, Го́споди, сотвори́вшему вся.

Или читается псалом полностью:

Благослови́, душе́ моя́, Го́спода. Го́споди, Бо́же мой, возвели́чился еси́ зело́. Во испове́дание и в велеле́поту обле́клся еси́. Одея́йся све́том, я́ко ри́зою, простира́яй не́бо, я́ко ко́жу. Покрыва́яй вода́ми превы́спренняя Своя́, полага́яй о́блаки на восхожде́ние Свое́, ходя́й на крилу́ ве́треню. Творя́й А́нгелы Своя́ ду́хи и слуги́ Своя́ пла́мень о́гненный. Основа́яй зе́млю на тве́рди ея́, не преклони́тся в век ве́ка. Бе́здна, я́ко ри́за, одея́ние ея́, на гора́х ста́нут во́ды, от запреще́ния Твоего́ побе́гнут, от гла́са гро́ма Твоего́ убоя́тся. Восхо́дят го́ры и нисхо́дят поля́ в ме́сто, е́же основа́л еси́ им. Преде́л положи́л еси́, eго́же не пре́йдут, ниже́ обратя́тся покры́ти зе́млю. Посыла́яй исто́чники в де́брех, посреде́ гор про́йдут во́ды. Напая́ют вся зве́ри се́льныя, ждут она́гри в жа́жду свою́. На ты́х пти́цы небе́сныя привита́ют, от среды́ ка́мения дадя́т глас. Напая́яй го́ры от превы́спренних Свои́х, от плода́ дел Твои́х насы́тится земля́. Прозяба́яй траву́ ското́м, и злак на слу́жбу челове́ком, извести́ хлеб от земли́. И вино́ весели́т се́рдце челове́ка, ума́стити лице́ еле́ем, и хлеб се́рдце челове́ка укрепи́т. Насы́тятся древа́ польска́я, ке́дри Лива́нстии, и́хже еси́ насади́л. Та́мо пти́цы вогнездя́тся, ероди́ево жили́ще предводи́тельствует и́ми. Го́ры высо́кия еле́нем, ка́мень прибе́жище за́яцем. Сотвори́л есть луну́ во времена́, со́лнце позна́ за́пад свой. Положи́л еси́ тму, и бысть нощь, в не́йже про́йдут вси зве́рие дубра́внии. Ски́мни рыка́ющии, восхи́тити и взыска́ти от Бо́га пи́щу себе́. Возсия́ со́лнце и собра́шася и в ло́жах свои́х ля́гут. Изы́дет челове́к на де́ло свое́ и на де́лание свое́ до ве́чера. Я́ко возвели́чишася дела́ Твоя́, Го́споди, вся прему́дростию сотвори́л еси́, испо́лнися земля́ тва́ри Твоея́. Сие́ мо́ре вели́кое и простра́нное, та́мо га́ди, и́мже несть числа́, живо́тная ма́лая с вели́кими, та́мо корабли́ препла́вают, змий сей, eго́же созда́л еси руга́тися eму́. Вся к Тебе́ ча́ют, да́ти пи́щу им во бла́го вре́мя. Да́вшу Тебе́ им соберу́т, отве́рзшу Тебе́ ру́ку вся́ческая испо́лнятся бла́гости, отвра́щшу же Тебе́ лице́, возмяту́тся, отъи́меши дух их, и исче́знут, и в персть свою́ возвратя́тся. По́слеши Ду́ха Твоего́, и сози́ждутся, и обнови́ши лице́ земли́. Бу́ди сла́ва Госпо́дня во ве́ки, возвесели́тся Госпо́дь о де́лех Свои́х, призира́яй на зе́млю, и творя́й ю́ трясти́ся, прикаса́яйся гора́м, и дымя́тся. Воспою́ Го́сподеви в животе́ мое́м, пою́ Бо́гу моему́, до́ндеже есмь, да услади́тся Ему́ бесе́да моя́, аз же возвеселю́ся о Го́споде. Да исче́знут гре́шницы от земли́, и беззако́нницы, я́коже не бы́ти им. Благослови́, душе́ моя́, Го́спода.

Со́лнце позна́ за́пад свой. Положи́л еси́ тму, и бысть нощь. Я́ко возвели́чишася дела́ Твоя́, Го́споди, вся прему́дростию сотвори́л еси́.

Сла́ва, и ны́не: Аллилу́иа, аллилу́иа, аллилу́иа, сла́ва Тебе́ Бо́же. Трижды.

Блаже́н муж:

Блаже́н муж, и́же не и́де на сове́т нечести́вых.

Аллилу́иа, аллилу́иа, аллилу́иа.

Я́ко весть Госпо́дь путь пра́ведных, и путь нечести́вых поги́бнет.

Аллилу́иа, аллилу́иа, аллилу́иа.

Рабо́тайте Го́сподеви со стра́хом и ра́дуйтеся Ему́ с тре́петом.

Аллилу́иа, аллилу́иа, аллилу́иа.

Блаже́ни вси наде́ющиися Нань.

Аллилу́иа, аллилу́иа, аллилу́иа.

Воскресни́, Го́споди, спаси́ мя, Бо́же мой.

Аллилу́иа, аллилу́иа, аллилу́иа.

Госпо́дне есть спасе́ние, и на лю́дех Твои́х благослове́ние Твое́.

Аллилу́иа, аллилу́иа, аллилу́иа.

Сла́ва Отцу́ и Сы́ну и Свято́му Духу.

Аллилу́иа, аллилу́иа, аллилу́иа.

И ны́не и при́сно и во ве́ки веко́в. Ами́нь.

Аллилу́иа, аллилу́иа, аллилу́иа.

Аллилу́иа, аллилу́иа, аллилу́иа, сла́ва Тебе́ Бо́же. (Три́жды)

Го́споди, воззва́х, глас 1:

Го́споди, воззва́х к Тебе́, услы́ши мя./ Услы́ши мя, Го́споди./ Го́споди, воззва́х к Тебе́, услы́ши мя:/ вонми́ гла́су моле́ния моего́,/ внегда́ воззва́ти ми к Тебе́.// Услы́ши мя, Го́споди.

Да испра́вится моли́тва моя́,/ я́ко кади́ло пред Тобо́ю,/ воздея́ние руку́ мое́ю/ – же́ртва вече́рняя.// Услы́ши мя, Го́споди.

Стихи́ры пра́здника, глас 1:

Стих: А́ще беззако́ния на́зриши, Го́споди, Го́споди, кто постои́т? Я́ко у Тебе́ очище́ние есть.

Дне́сь красу́ется гра́д Александри́я, / пелены́ твоя́, му́ченице, / в Боже́ственнем хра́ме твое́м име́я прему́дро. / Те́мже и мы́ благоче́стно пра́зднуем, / Екатери́но, па́мять твою́ честну́ю: / моли́ся о чту́щих тя́.

Стих: И́мене ра́ди Твоего́ потерпе́х Тя, Го́споди, потерпе́ душа́ моя́ в сло́во Твое́, упова́ душа́ моя́ на Го́спода.

Стих: От стра́жи у́тренния до но́щи, от стра́жи у́тренния да упова́ет Изра́иль на Го́спода.

Екатери́ны па́мять ны́не пра́зднуим: / та́ бо и́стинно вся́ вра́жия си́лы / и сло́вом же и де́лом низложи́ кре́пко / и ри́торское противле́ние. / Но моли́твами ея́ изба́ви ны́, Бо́же, / от безбо́жных вра́г.

Стих: Я́ко у Го́спода ми́лость, и мно́гое у Него́ избавле́ние, и Той изба́вит Изра́иля от всех беззако́ний eго́.

Стих: Хвали́те Го́спода вси язы́цы, похвали́те Его́ вси лю́дие.

Ра́дуйся, всесла́вная му́ченице Екатери́но честна́я: / Сина́йская бо гора́, / в не́йже ви́де купину́ Моисе́й неопали́му, / в то́й Христо́с богоуго́дное те́ло твое́, / ны́не преложи́в, храни́т / да́же до вре́мене втора́го прише́ствия Своего́.

Стих: Я́ко утверди́ся ми́лость Его́ на нас, и и́стина Госпо́дня пребыва́ет во век.

Глас 2: Сла́ва Отцу́ и Сы́ну и Свято́му Ду́ху.

Ра́достно к торжеству́ богому́дрыя му́ченицы Екатери́ны стеце́мся, о мучениколю́бцы! И ту́ю похвала́ми, я́ко цве́ты, увязе́м, — ра́дуйся, — вопию́ще е́й, — я́же буесло́вных ри́торов свирепоу́стие обличи́вши, яко ненаказа́ния испо́лненных, и ты́я к ве́ре Боже́ственней руково́дствовавши; ра́дуйся, я́же те́ло многоплете́нным му́кам вда́вши любве́ ра́ди Творца́ твоего́, и не низложи́вшися, я́ко отрокови́ца неги́блема; ра́дуйся, я́же го́рняя пребыва́лища, возме́здие боле́зней насле́довавши, и сла́вы ве́чныя наслажда́ешися. Ея́же жела́юще, песнопе́вцы твои́, наде́жды да не отпаде́м.

Глас 8: И ны́не и при́сно и во ве́ки веко́в. Ами́нь.

По рождестве́ Твое́м, Богоневе́сто Влады́чице, пришла́ eси́ в хра́м Госпо́день воспита́тися во свята́я святы́х, я́ко освяще́нна; тогда́ и Гаврии́л по́слан бы́сть к Тебе́, Всенепоро́чней, пи́щу Тебе́ принося́. Небе́сная вся удиви́шася, зря́ще Ду́ха Свята́го, в Тя все́льшася. Те́мже, Пречи́стая и Нескве́рная, я́же на небеси́ и на земли́ сла́вима, Ма́ти Бо́жия, спаси́ ро́д на́ш.

Све́те Тихи́й:

Све́те Ти́хий святы́я сла́вы Безсме́ртнаго Отца́ Небе́снаго, Свята́го, Блаже́ннаго, Иису́се Христе́! Прише́дше на за́пад со́лнца, ви́девше свет вече́рний, пое́м Отца́, Сы́на и Свята́го Ду́ха, Бо́га. Досто́ин еси́ во вся времена́ пет бы́ти гла́сы преподо́бными, Сы́не Бо́жий, живо́т дая́й; те́мже мир Тя сла́вит.

1. Проро́чества Иса́иина чте́ние

Та́ко глаго́лет Госпо́дь: вси́ язы́цы собра́шася вку́пе, и соберу́тся кня́зи от ни́х, кто́ возвести́т сия́ в ни́х? Или́ я́же от нача́ла, кто́ слы́шана сотвори́т ва́м? Да приведу́т свиде́тели своя́ и оправдя́тся, и да услы́шат, и да реку́т и́стину. Бу́дите Ми́ свиде́тели, и Аз Свиде́тель, глаго́лет Госпо́дь Бо́г, и отрок, его́же избра́х, да позна́ете и ве́руете Ми́, и разуме́ете, я́ко Аз е́смь; пре́жде Мене́ не бы́сть и́н бо́г, и по Мне́ не бу́дет. Аз е́смь Бо́г, и не́сть ра́зве Мене́ спаса́яй. Аз возвести́х и спасо́х, уничижи́х, и не бе́ в ва́с чу́ждий. Вы́ Мне́ свиде́тели, и Аз Госпо́дь Бо́г. И еще́ от нача́ла Аз е́смь, и не́сть от ру́к Мои́х избавля́яй; сотворю́, и кто́ отврати́т то? Си́це глаго́лет Госпо́дь Бо́г, избавля́яй ва́с Святы́й Изра́илев.

2. Прему́дрости Соломо́новы чте́ние

Пра́ведных ду́ши в руце́ Бо́жией, и не прико́снется и́х му́ка. Непщева́ни бы́ша во очесе́х безу́мных умре́ти, и вмени́ся озлобле́ние исхо́д и́х, и е́же от на́с ше́ствие сокруше́ние; они́ же су́ть в ми́ре. Ибо пред лице́м челове́ческим а́ще и му́ку прии́мут, упова́ние и́х безсме́ртия испо́лнено. И вма́ле нака́зани бы́вше, вели́кими благоде́тельствовани бу́дут, я́ко Бо́г искуси́ я́ и обре́те и́х досто́йны Себе́. Яко зла́то в горни́ле, искуси́ и́х и, я́ко всепло́дие же́ртвенное, прия́т я́. И во вре́мя посеще́ния и́х возсия́ют и, я́ко и́скры по сте́блию, потеку́т: су́дят язы́ком и облада́ют людьми́, и воцари́тся Госпо́дь в ни́х во ве́ки. Наде́ющиися На́нь разуме́ют и́стину и ве́рнии в любви́ пребу́дут Ему́, я́ко благода́ть и ми́лость в преподо́бных Его́ и посеще́ние во избра́нных Его́.

3. Прему́дрости Соломо́новы чте́ние

Пра́ведницы во ве́ки живу́т, и в Го́споде мзда́ и́х, и попече́ние и́х у Вы́шняго. Сего́ ра́ди прии́мут ца́рствие благоле́пия и вене́ц добро́ты от руки́ Госпо́дни, зане́ десни́цею покры́ет я́ и мы́шцею защити́т и́х. Прии́мет всеору́жие — рве́ние свое́ и вооружи́т тва́рь в ме́сть враго́м. Облече́тся в броня́ пра́вды и возложи́т шле́м — су́д нелицеме́рен. Прии́мет щи́т непобеди́мый — преподо́бие, поостри́т же напра́сный гне́в — во ору́жие, спобо́рет же с ни́м ми́р на безу́мныя. По́йдут праволу́чныя стре́лы мо́лниины и, я́ко от благокру́гла лу́ка облако́в, на наме́рение полетя́т, и от каменоме́тныя я́рости испо́лнь паду́т гра́ды. Вознегоду́ет на ни́х вода́ морска́я, ре́ки же потопя́т я́ на́гло. Сопроти́в ста́нет и́м ду́х си́лы и, я́ко ви́хор, разве́ет и́х, и опустоши́т всю́ зе́млю беззако́ние, и злоде́йство преврати́т престо́лы си́льных. Слы́шите у́бо, ца́рие, и разуме́йте, навы́кните, судии́ конце́в земли́. Внуши́те держа́щии мно́жества и гордя́щиися о наро́дех язы́ков, я́ко дана́ е́сть от Го́спода держа́ва ва́м и си́ла от Вы́шняго.

Сподо́би, Го́споди:

Сподо́би, Го́споди, в ве́чер сей без греха́ сохрани́тися нам. Благослове́н еси́, Го́споди, Бо́же оте́ц на́ших, и хва́льно и просла́влено и́мя Твое́ во ве́ки. Ами́нь.

Бу́ди, Го́споди, ми́лость Твоя́ на нас, я́коже упова́хом на Тя. Благослове́н еси́, Го́споди, научи́ мя оправда́нием Твои́м. Благослове́н еси́, Влады́ко, вразуми́ мя оправда́нием Твои́м. Благослове́н еси́, Святы́й, просвети́ мя оправда́нии Твои́ми.

Го́споди, ми́лость Твоя́ во век, дел руку́ Твое́ю не пре́зри. Тебе́ подоба́ет хвала́, Тебе́ подоба́ет пе́ние, Тебе́ сла́ва подоба́ет. Отцу́ и Сы́ну и Свято́му Ду́ху, ны́не и при́сно и во ве́ки веко́в. Ами́нь.

На лити́и стихи́ры, гла́с 1.

Глас 3: Страда́льческое торжество́, ве́рнии, богому́дренне соверша́емо, ви́дяще, чу́дному в сове́тех Бо́гу на́шему, благода́рственное песнопе́ние воспои́м: неви́димую бо держа́ву проти́вныя си́лы, в же́нстем естестве́ победи́, и Боже́ственную Свою́ си́лу в не́мощи соверши́в доброму́ченицы; тоя́ моли́твами спаса́ет ду́ши на́ша.

Истины ча́шу от свои́х крове́й страда́льческих всехва́льная му́ченица Христо́ва, Екатери́но, раствори́вши и сию́ всегда́ предлага́ющи Це́ркви, в не́йже церко́вныя пито́мцы, му́дрости гла́сом созыва́ет, глаго́лющи: почерпи́те пи́во Воскресе́ния свиде́тельное, неве́рных прогони́тельное, и страсте́й чисти́тельное, благочести́вым же душа́м храни́тельно, Спа́су зову́ще: напои́вый на́с пото́ком сла́дости Ду́ха, спаси́ ду́ши на́ша.

Иже Кро́вию Христо́вою ду́ши запеча́тавше в де́нь избавле́ния, кро́вь святу́ю, от му́ченическаго исто́чника востека́ющую на́м, с весе́лием духо́вным проро́чески почерпе́м, живото́чных страсте́й Спа́совых, и присносу́щныя сла́вы образова́тельну. Те́мже Ему́ возопии́м: прославля́яйся во святы́х Твои́х, Го́споди, пресла́вныя Твоея́ страстоте́рпицы моли́твами, спаси́ ду́ши на́ша.

Сла́ва, гла́с 6 Страда́льческим ше́ствовавши путе́м, мучи́тельскаго избежа́ла еси́ сове́та, Екатери́но, всечестна́я: я́ко де́ва, у́бо мудра́, свешу́ нося́щи вошла́ еси́ во дворы́ Го́спода твоего́; я́ко му́ченица му́жеством, благода́ть прия́ла еси́ исцели́ти плотски́я стра́сти. Но и на́с, воспева́ющих тя́, душе́вных боле́зней изба́ви, я́же к Бо́гу мольба́ми твои́ми.

И ны́не, богоро́дичен, глас 5: Возсия́ де́нь ра́достен и пра́здник всече́стен: дне́сь бо я́же пре́жде Рождества́ и по Рождестве́ Де́ва пребы́вши, в хра́м Госпо́день приво́дится, и ра́дуется Заха́рия ста́рец, роди́тель Предте́чев, и вопие́т ве́село: прибли́жися, Предста́тельница скорбя́щих, в хра́м святы́й, я́ко Свята́, освяти́тися во оби́телище Всецаря́. Да весели́тся Иоаки́м пра́oтец, и Анна да ра́дуется, я́ко принесо́ша Бо́гу я́ко триле́тствующую Юницу непоро́чную Влады́чицу. Ма́тeри, сра́дуйтеся, де́вы, взыгра́йте, и непло́ды, сликовству́йте, я́ко отве́рзе на́м небе́сное Ца́рство пронарече́нная Всецари́ца, ра́дуйтеся, лю́дие, и весели́теся.

Го́споди, поми́луй. (40 раз)

Стихи́ры на стихо́вне:

Стихиры, гла́с 4:

Мучи́тельскому шата́нию / и на́глому суровству́, / по́мыслом сопроти́вльшися мужему́дренно, / бу́дущих предви́дящи / наслажде́ние, богому́дренная, / пребыва́ющее при́сно во ве́ки неподви́жимо, / е́же и получи́ла еси́, / от земли́ преста́вльшися к черто́гам небе́сным, / и ли́ку неразори́мому, сла́вная.

Сти́х: Ди́вен Бо́г во святы́х Свои́х, / Бо́г Изра́илев.

Ца́рствия благоле́пие / и добро́ту кра́сную ви́дети сподо́билася еси́, / Жениха́ твоего́ Христа́, / укра́шена ра́нами тве́рдаго твоего́ страда́ния, / и Исто́чнику благи́х / досто́йно прибли́жилася еси́. / Отону́дуже боже́ственнаго весе́лия пло́д / бога́тно прия́ла еси́, блаже́нная, / и безсме́ртную сла́ву.

Сти́х: В це́рквах благослови́те Бо́га, / Го́спода от исто́чник Изра́илевых.

Ни и́го рабо́тное, / ни сла́бость же́нская, / ни гла́д, ни ра́ны запя́ша ти́, / му́ченичестей тве́рдости уподо́битися, всесла́вная, / усе́рдием души́ му́ки претерпе́ла еси́. / Отону́дуже получи́ла еси́ небе́сный черто́г, / и венце́м благода́ти украси́лася еси́, / предстоя́щи Зижди́телю твоему́.

Слава, гла́с 2:

Житие́ невеще́ственно навы́кши, суди́ще безбо́жное дости́гши, ста́ла еси́, победоно́сице Екатери́но честна́я, цветонося́щи Бо́жию све́тлость, и, Боже́ственною мо́щию оде́яна, повеле́нию мучи́телеву поруга́лася еси́ и ри́торов утоли́ла еси́ буесло́вныяре́чи, многострада́льная.

И ны́не, Богоро́дичен глас 8:

Дави́д провозглаша́ше Тебе́, Пречи́стая, прови́дя освяще́ние вхо́да Твоего́ в храм, в не́мже концы́, днесь пра́зднующе, славосло́вят Тя, Всепе́тая: я́же бо пре́жде Рождества́ Де́ва и по Рождестве́ пребы́вши нетле́нна, Ма́ти Сло́ва Жи́зни. Днесь в хра́ме Заха́рия весели́тся, восприе́м Тя, Влады́чице, и свята́я святы́х ра́дуются, подъе́мши Тя, исто́чника жи́зни на́шея. Те́мже и мы псало́мски вопие́м Ти: о нас моли́ Сы́на Твоего́ и Бо́га на́шего дарова́ти нам ве́лию ми́лость.

Моли́тва свята́го Симео́на Богоприи́мца:

Ны́не отпуща́еши раба́ Твоего́, Влады́ко,/ по глаго́лу Твоему́, с ми́ром;/ я́ко ви́деста о́чи мои́ спасе́ние Твое́,/ е́же еси́ угото́вал пред лице́м всех люде́й,/ свет во открове́ние язы́ков,// и сла́ву люде́й Твои́х Изра́иля.

Святы́й Бо́же, Святы́й Кре́пкий, Святы́й Безсме́ртный, поми́луй нас. (Три́жды)

Сла́ва Отцу́ и Сы́ну и Свято́му Ду́ху, и ны́не и при́сно и во ве́ки веко́в. Ами́нь.

Го́споди, поми́луй. (Три́жды)

Сла́ва Отцу́ и Сы́ну и Свято́му Ду́ху, и ны́не и при́сно и во ве́ки веко́в. Ами́нь.

Тропа́рь, глас 4:

Доброде́тельми, я́ко луча́ми со́лнечными, просвети́ла еси́ неве́рныя мудрецы́. И, я́коже пресве́тлая луна́ ходя́щим в нощи́, неве́рия тму́ отгна́ла еси́ и цари́цу уве́рила еси́, вку́пе же и мучи́теля обличи́ла еси́, богозва́нная неве́сто, блаже́нная Екатери́но, жела́нием востекла́ еси́ в небе́сный черто́г к прекра́сному Жениху́, Христу́, и от Него́ ца́рским венце́м венча́лася еси́: Ему́же, со Ангелы предстоя́щи, за ны́ моли́ся, творя́щия пречестну́ю па́мять твою́. (Дважды)

Песнь Пресвятей Богородице:

Богоро́дице Де́во, ра́дуйся, / Благода́тная Мари́е, Госпо́дь с Тобо́ю; / благослове́на Ты в жена́х / и благослове́н Плод чре́ва Твоего́, / я́ко Спа́са родила́ еси́ душ на́ших. (Единожды)

Бу́ди И́мя Госпо́дне благослове́но от ны́не и до ве́ка. (Три́жды)

Псало́м 33:

Благословлю́ Го́спода на вся́кое вре́мя,/ вы́ну хвала́ Его́ во усте́х мои́х./ О Го́споде похва́лится душа́ моя́,/ да услы́шат кро́тцыи, и возвеселя́тся./ Возвели́чите Го́спода со мно́ю,/ и вознесе́м И́мя Его́ вку́пе./ Взыска́х Го́спода, и услы́ша мя,/ и от все́х скорбе́й мои́х изба́ви мя./ Приступи́те к Нему́, и просвети́теся,/ и ли́ца ва́ша не постыдя́тся./ Сей ни́щий воззва́, и Госпо́дь услы́ша и́,/ и от все́х скорбе́й его́ спасе́ и́./ Ополчи́тся а́нгел Госпо́день о́крест боя́щихся Его́,/ и изба́вит их./ Вкуси́те и ви́дите, я́ко благ Госпо́дь:/ блаже́н муж, и́же упова́ет Нань./ Бо́йтеся Го́спода, вси́ святи́и Его́,/ я́ко несть лише́ния боя́щимся Его́./ Бога́тии обнища́ша и взалка́ша:/ взыска́ющии же Го́спода// не лиша́тся вся́каго бла́га.

У́ТРЕНЯ.

Шестопса́лмие:

Сла́ва в вы́шних Бо́гу, и на земли́ мир, в челове́цех благоволе́ние. (Три́жды)

Го́споди, устне́ мои́ отве́рзеши, и уста́ моя́ возвестя́т хвалу́ Твою́. (Два́жды)

Псалом 3:

Го́споди, что ся умно́жиша стужа́ющии ми́? Мно́зи востаю́т на мя, мно́зи глаго́лют души́ мое́й: несть спасе́ния eму́ в Бо́зе eго́. Ты же, Го́споди, Засту́пник мой еси́, сла́ва моя́ и вознося́й главу́ мою́. Гла́сом мои́м ко Го́споду воззва́х, и услы́ша мя от горы́ святы́я Своея́. Аз усну́х, и спах, воста́х, я́ко Госпо́дь засту́пит мя. Не убою́ся от тем люде́й, о́крест напа́дающих на мя. Воскресни́, Го́споди, спаси́ мя, Бо́же мой, я́ко Ты порази́л еси́ вся вражду́ющыя ми всу́е: зу́бы гре́шников сокруши́л еси́. Госпо́дне есть спасе́ние, и на лю́дех Твои́х благослове́ние Твое́.

Аз усну́х, и спах, воста́х, я́ко Госпо́дь засту́пит мя.

Псалом 37:

Го́споди, да не я́ростию Твое́ю обличи́ши мене́, ниже́ гне́вом Твои́м нака́жеши мене́. Я́ко стре́лы Твоя́ унзо́ша во мне, и утверди́л еси́ на мне ру́ку Твою́. Несть исцеле́ния в пло́ти мое́й от лица́ гне́ва Твоего́, несть ми́ра в косте́х мои́х от лица́ грех мои́х. Я́ко беззако́ния моя́ превзыдо́ша главу́ мою́, я́ко бре́мя тя́жкое отяготе́ша на мне. Возсмерде́ша и согни́ша ра́ны моя́ от лица́ безу́мия моего́. Пострада́х и сляко́хся до конца́, весь день се́туя хожда́х. Я́ко ля́двия моя́ напо́лнишася поруга́ний, и несть исцеле́ния в пло́ти мое́й. Озло́блен бых и смири́хся до зела́, рыка́х от воздыха́ния се́рдца моего́. Го́споди, пред Тобо́ю все жела́ние мое́ и воздыха́ние мое́ от Тебе́ не утаи́ся. Се́рдце мое́ смяте́ся, оста́ви мя си́ла моя́, и свет о́чию мое́ю, и той несть со мно́ю. Дру́зи мои́ и и́скреннии мои́ пря́мо мне прибли́жишася и ста́ша, и бли́жнии мои́ отдале́че мене́ ста́ша и нужда́хуся и́щущии ду́шу мою́, и и́щущии зла́я мне глаго́лаху су́етная и льсти́вным весь день поуча́хуся. Аз же я́ко глух не слы́шах и я́ко нем не отверза́яй уст свои́х. И бых я́ко челове́к не слы́шай и не имы́й во усте́х свои́х обличе́ния. Я́ко на Тя, Го́споди, упова́х, Ты услы́шиши, Го́споди Бо́же мой. Я́ко рех: да не когда́ пора́дуют ми ся врази́ мои́: и внегда́ подвижа́тися нога́м мои́м, на мя велере́чеваша. Я́ко аз на ра́ны гото́в, и боле́знь моя́ предо мно́ю есть вы́ну. Я́ко беззако́ние мое́ аз возвещу́ и попеку́ся о гресе́ мое́м. Врази́ же мои́ живу́т и укрепи́шася па́че мене́, и умно́жишася ненави́дящии мя без пра́вды. Воздаю́щии ми зла́я возблага́я оболга́ху мя, зане́ гоня́х благосты́ню. Не оста́ви мене́, Го́споди Бо́же мой, не отступи́ от Мене́. Вонми́ в по́мощь мою́, Го́споди спасе́ния моего́.

Не оста́ви мене́, Го́споди Бо́же мой, не отступи́ от Мене́. Вонми́ в по́мощь мою́, Го́споди спасе́ния моего́.

Псалом 62:

Бо́же, Бо́же мой, к Тебе́ у́тренюю, возжада́ Тебе́ душа́ моя́, коль мно́жицею Тебе́ плоть моя́, в земли́ пу́сте и непрохо́дне, и безво́дне. Та́ко во святе́м яви́хся Тебе́, ви́дети си́лу Твою́ и сла́ву Твою́. Я́ко лу́чши ми́лость Твоя́ па́че живо́т, устне́ мои́ похвали́те Тя. Та́ко благословлю́ Тя в животе́ мое́м, о и́мени Твое́м воздежу́ ру́це мои́. Я́ко от ту́ка и ма́сти да испо́лнится душа́ моя́, и устна́ма ра́дости восхва́лят Тя уста́ моя́. А́ще помина́х Тя на посте́ли мое́й, на у́тренних поуча́хся в Тя. Я́ко был еси́ Помо́щник мой, и в кро́ве крилу́ Твое́ю возра́дуюся. Прильпе́ душа́ моя́ по Тебе́, мене́ же прия́т десни́ца Твоя́. Ти́и же всу́е иска́ша ду́шу мою́, вни́дут в преиспо́дняя земли́, предадя́тся в ру́ки ору́жия, ча́сти ли́совом бу́дут. Царь же возвесели́тся о Бо́зе, похва́лится всяк клены́йся Им, я́ко загради́шася уста́ глаго́лющих непра́ведная.

На у́тренних поуча́хся в Тя. Я́ко был еси́ Помо́щник мой, и в кро́ве крилу́ Твое́ю возра́дуюся. Прильпе́ душа́ моя́ по Тебе́, мене́ же прия́т десни́ца Твоя́.

Сла́ва Отцу́ и Сы́ну и Свято́му Ду́ху, и ны́не и при́сно и во ве́ки веко́в. Ами́нь.

Аллилу́иа, аллилу́иа, аллилу́иа, сла́ва Тебе́ Бо́же. (Три́жды)

Го́споди поми́луй. (Три́жды)

Сла́ва Отцу́ и Сы́ну и Свято́му Ду́ху, и ны́не и при́сно и во ве́ки веко́в. Ами́нь.

Псалом 87:

Го́споди Бо́же спасе́ния моего́, во дни воззва́х, и в нощи́ пред Тобо́ю. Да вни́дет пред Тя моли́тва моя́: приклони́ у́хо Твое́ к моле́нию моему́, я́ко испо́лнися зол душа́ моя́, и живо́т мой аду прибли́жися. Привмене́н бых с низходя́щими в ров, бых я́ко челове́к без по́мощи, в ме́ртвых свобо́дь, я́ко я́звеннии спя́щии во гро́бе, и́хже не помяну́л еси́ ктому́, и ти́и от руки́ Твоея́ отринове́ни бы́ша. Положи́ша мя в ро́ве преиспо́днем, в те́мных и се́ни сме́ртней. На мне утверди́ся я́рость Твоя́, и вся во́лны Твоя́ наве́л еси́ на мя. Уда́лил еси́ зна́емых мои́х от Мене́, положи́ша мя ме́рзость себе́: пре́дан бых и не исхожда́х. О́чи мои́ изнемого́сте от нищеты́, воззва́х к Тебе́, Го́споди, весь день, возде́х к Тебе́ ру́це мои́. Еда́ ме́ртвыми твори́ши чудеса́? Или́ вра́чеве воскреся́т, и испове́дятся Тебе́? Еда́ пове́сть кто во гро́бе ми́лость Твою́, и и́стину Твою́ в поги́бели? Еда́ позна́на бу́дут во тьме чудеса́ Твоя́, и пра́вда Твоя́ в земли́ забве́нней? И аз к Тебе́, Го́споди, воззва́х и у́тро моли́тва моя́ предвари́т Тя. Вску́ю, Го́споди, отре́еши ду́шу мою́, отвраща́еши лице́ Твое́ от Мене́? Нищ есмь аз, и в труде́х от ю́ности моея́; возне́с же ся, смири́хся, и изнемого́х. На мне преидо́ша гне́ви Твои́, устраше́ния Твоя́ возмути́ша мя, обыдо́ша мя я́ко вода́, весь день одержа́ша мя вку́пе. Уда́лил еси́ от Мене́ дру́га и и́скренняго, и зна́емых мои́х от страсте́й.

Го́споди Бо́же спасе́ния моего́, во дни воззва́х, и в нощи́ пред Тобо́ю. Да вни́дет пред Тя моли́тва моя́: приклони́ у́хо Твое́ к моле́нию моему́.

Псалом 102:

Благослови́, душе́ моя́, Го́спода, и вся вну́тренняя моя́ и́мя свя́тое Его́. Благослови́, душе́ моя́, Го́спода, и не забыва́й всех воздая́ний Его́, очища́ющаго вся беззако́ния твоя́, исцеля́ющаго вся неду́ги твоя́, избавля́ющаго от истле́ния живо́т твой, венча́ющаго тя ми́лостию и щедро́тами, исполня́ющаго во благи́х жела́ние твое́: обнови́тся я́ко о́рля ю́ность твоя́. Творя́й ми́лостыни Госпо́дь, и судьбу́ всем оби́димым. Сказа́ пути́ Своя́ Моисе́ови, сыново́м Изра́илевым хоте́ния Своя́: Щедр и Ми́лостив Госпо́дь, Долготерпели́в и Многоми́лостив. Не до конца́ прогне́вается, ниже́ во век вражду́ет, не по беззако́нием на́шым сотвори́л есть нам, ниже́ по грехо́м на́шым возда́л есть нам. Я́ко по высоте́ небе́сней от земли́, утверди́л есть Госпо́дь ми́лость Свою́ на боя́щихся Его́. Ели́ко отстоя́т восто́цы от за́пад, уда́лил есть от нас беззако́ния на́ша. Я́коже ще́дрит оте́ц сы́ны, уще́дри Госпо́дь боя́щихся Его́. Я́ко Той позна́ созда́ние на́ше, помяну́, я́ко персть есмы́. Челове́к, я́ко трава́ дни́е eго́, я́ко цвет се́льный, та́ко оцвете́т, я́ко дух про́йде в нем, и не бу́дет, и не позна́ет ктому́ ме́ста своего́. Ми́лость же Госпо́дня от ве́ка и до ве́ка на боя́щихся Его́, и пра́вда Его́ на сыне́х сыно́в, храня́щих заве́т Его́, и по́мнящих за́поведи Его́ твори́ти я́. Госпо́дь на Небеси́ угото́ва Престо́л Свой, и Ца́рство Его́ все́ми облада́ет. Благослови́те Го́спода вси А́нгели Его́, си́льнии кре́постию, творя́щии сло́во Его́, услы́шати глас слове́с Его́. Благослови́те Го́спода вся Си́лы Его́, слуги́ Его́, творя́щии во́лю Его́. Благослови́те Го́спода вся дела́ Его́, на вся́ком ме́сте влады́чества Его́, благослови́, душе́ моя́, Го́спода.

На вся́ком ме́сте влады́чества Его́, благослови́, душе́ моя́, Го́спода.

Псалом 142:

Го́споди, услы́ши моли́тву мою́, внуши́ моле́ние мое́ во и́стине Твое́й, услы́ши мя в пра́вде Твое́й и не вни́ди в суд с рабо́м Твои́м, я́ко не оправди́тся пред Тобо́ю всяк живы́й. Я́ко погна́ враг ду́шу мою́, смири́л есть в зе́млю живо́т мой, посади́л мя есть в те́мных, я́ко ме́ртвыя ве́ка. И уны́ во мне дух мой, во мне смяте́ся се́рдце мое́. Помяну́х дни дре́вния, поучи́хся во всех де́лех Твои́х, в творе́ниих руку́ Твое́ю поуча́хся. Возде́х к Тебе́ ру́це мои́, душа́ моя́, я́ко земля́ безво́дная Тебе́. Ско́ро услы́ши мя, Го́споди, исчезе́ дух мой, не отврати́ лица́ Твоего́ от Мене́, и уподо́блюся низходя́щым в ров. Слы́шану сотвори́ мне зау́тра ми́лость Твою́, я́ко на Тя упова́х. Скажи́ мне, Го́споди, путь во́ньже пойду́, я́ко к Тебе́ взях ду́шу мою́. Изми́ мя от враг мои́х, Го́споди, к Тебе́ прибего́х. Научи́ мя твори́ти во́лю Твою́, я́ко Ты еси́ Бог мой. Дух Твой Благи́й наста́вит мя на зе́млю пра́ву. И́мене Твоего́ ра́ди, Го́споди, живи́ши мя, пра́вдою Твое́ю изведе́ши от печа́ли ду́шу мою́. И ми́лостию Твое́ю потреби́ши враги́ моя́ и погуби́ши вся стужа́ющыя души́ мое́й, я́ко аз раб Твой есмь.

Услы́ши мя, Го́споди, в пра́вде Твое́й и не вни́ди в суд с рабо́м Твои́м.

Дух Твой Благи́й наста́вит мя на зе́млю пра́ву.

Сла́ва Отцу́ и Сы́ну и Свято́му Ду́ху, и ны́не и при́сно и во ве́ки веко́в. Ами́нь.

Аллилу́иа, аллилу́иа, аллилу́иа, сла́ва Тебе́ Бо́же. (Три́жды)

Тропа́рь глас 4:

Сла́ва Отцу́ и Сы́ну и Свято́му Ду́ху.

Тропа́рь глас 4:

Агница Твоя́, Иису́се, Екатери́на, зове́т ве́лиим гла́сом: Тебе́, Женише́ мо́й, люблю́, и Тебе́ и́щущи, страда́льчествую, и сраспина́юся, и спогреба́юся креще́нию Твоему́, и стражду́ Тебе́ ра́ди, я́ко да ца́рствую в Тебе́, и умира́ю за Тя́, да и живу́ с Тобо́ю; но, я́ко же́ртву непоро́чную, приими́ мя, с любо́вию поже́ршуюся Тебе́. Тоя́ моли́твами, я́ко Ми́лостив, спаси́ ду́ши на́ша.

И ны́не и при́сно и во ве́ки веко́в. Ами́нь.

Глас 4: Дне́сь благоволе́ния Бо́жия предображе́ние и челове́ков спасе́ния пропове́дание в хра́ме Бо́жии я́сно Де́ва явля́ется и Христа́ всем предвозвеща́ет. Той и мы велегла́сно возопии́м: ра́дуйся, смотре́ния Зижди́телева исполне́ние.

Здесь читается кафизма, положенная по дню, или сразу седальны:

Го́споди, поми́луй. (Три́жды)

Седален, глас 5:

Благоче́стно порабо́тившися Вседержи́телю, злочести́вому же мучи́телю не порабо́тилася еси́, честна́я, но претерпе́ла еси́ тве́рдо те́мное заключе́ние, и ра́н разжже́ние, и преста́вилася еси́ к Бо́гу, богому́драя му́ченице, Екатери́но, моли́ся о на́с, соверша́ющих па́мять твою́.

Сла́ва Отцу́ и Сы́ну и Свято́му Ду́ху. И ны́не и при́сно и во ве́ки веко́в. Ами́нь.

Глас 1: Восхвали́те, де́вы, ма́тери, пра́зднуйте, лю́дие, славосло́вите, свяще́нницы, благослови́те Пречи́стую Ма́терь Бо́жию: пло́тию бо младе́нствующи, пре́жде во хра́м принесе́ся, я́ко хра́м Бо́жий святе́йший. Те́мже пра́здник духо́вный соверша́юще, воспои́м Ю, я́ко Предста́тельницу ро́да челове́ческаго.

Седален, глас 1:

Муче́ний о́гнь, Ду́ха росо́ю погаси́ла еси́, честна́я, и к Све́ту преста́вилася еси́ боже́ственному и невеще́ственному, и по кончи́не блаже́нней источа́еши исцеле́ний ка́пли, Екатери́но, уставля́ющи разжже́ние страсте́й си́лою духо́вною.

Сла́ва Отцу́ и Сы́ну и Свято́му Ду́ху. И ны́не и при́сно и во ве́ки веко́в. Ами́нь.

Глас 1: Свята́я святы́х Богоро́дице су́щи, досто́йно приведе́ся жи́ти во свята́я, я́ко одушевле́н Госпо́день киво́т и Свята́го Ду́ха и́стинно вмести́лище Боже́ственное, Де́во Ма́ти: те́мже всели́ся в Тя́, Иже Отцу́ Единоро́дный и Свято́му Ду́ху соесте́ственный, Тво́й Сы́н неискусому́жно, обоготвори́в все́ челове́чество.

Полиеле́й:

Хвали́те И́мя Госпо́дне, хвали́те, раби́ Го́спода.

Аллилу́иа, аллилу́иа, аллилу́иа.

Благослове́н Госпо́дь от Сио́на, живы́й во Иерусали́ме.

Аллилу́иа, аллилу́иа, аллилу́иа.

Испове́дайтеся Го́сподеви, я́ко Благ, я́ко в век ми́лость Его́.

Аллилу́иа, аллилу́иа, аллилу́иа.

Испове́дайтеся Бо́гу Небе́сному, я́ко в век ми́лость Его́.

Аллилу́иа, аллилу́иа, аллилу́иа.

Велича́ние:

Велича́ем тя́, страстоте́рпице Христо́ва Екатери́но, и чте́м честно́е страда́ние твое́, е́же за Христа́ претерпе́ла еси́.

Сла́ва Отцу́ и Сы́ну и Свято́му Ду́ху и ны́не и при́сно и во ве́ки веко́в. Ами́нь.

Аллилу́иа, аллилу́иа, аллилу́иа,// сла́ва Тебе́, Бо́же. (Трижды)

Седа́льны:

Глас 4:

Прише́дшую Христу́ во́лею, и украси́вшую доброде́тельми се́рдце, благоле́пно воспои́м, Екатери́но, ве́рных мно́жество: та́ бо посрами́ мучи́тельскую де́рзость, и просия́вши я́ко со́лнце посреде́ беззако́нник, по кончи́не яви́ся земны́м подтвержде́ние боже́ственное, вку́пе и держа́ва.

Глас 8: Сла́ва Отцу́ и Сы́ну и Свято́му Ду́ху и ны́не и при́сно и во ве́ки веко́в. Ами́нь.

Да ра́дуется Дави́д песнопи́сец, и да ликовству́ет Иоаки́м со Анною, я́ко пло́д святы́й из ни́х произы́де, Мари́я светоно́сная, Боже́ственная свеща́, и ра́дуется, входя́щи в хра́м, Юже и, зря́, благослови́ Варахи́ин сы́н и, ра́дуяся, взыва́ше: ра́дуйся, Чу́до всеми́рное.

Степе́нна, глас 4:

От ю́ности моея́/ мно́зи бо́рют мя стра́сти,/ но Сам мя заступи́// и спаси́, Спа́се мой.

Ненави́дящии Сио́на,/ посрами́теся от Го́спода,/ я́ко трава́ бо огне́м// бу́дете изсо́хше.

Сла́ва Отцу́ и Сы́ну и Свято́му Ду́ху и ны́не и при́сно и во ве́ки веко́в. Ами́нь.

Святы́м Ду́хом/ вся́ка душа́ живи́тся,/ и чистото́ю возвыша́ется,// светле́ется Тро́йческим еди́нством, священнота́йне.

Го́споди, поми́луй. (Три́жды)

От Ма́рка Свята́го Ева́нгелия чте́ние

Сла́ва, Тебе́, Го́споди, сла́ва Тебе́.

Во вре́мя о́но, по Иису́се идя́ху наро́ди мно́зи и угнета́ху Его́. И жена́ не́кая су́щи в точе́нии кро́ве лет двана́десяте, и мно́го пострада́вши от мног враче́в, и изда́вши своя́ вся, и ни еди́ныя по́льзы обре́тши, но па́че в го́ршее прише́дши, слы́шавши о Иису́се прише́дши в наро́де созади́, прикосну́ся ри́зе Его́. Глаго́лаше бо, я́ко, а́ще прикосну́ся ри́зам Его́, спасе́на бу́ду. И а́бие изся́кну исто́чник кро́ве ея́, и разуме́ те́лом, я́ко изцеле́ от ра́ны. И а́бие Иису́с разуме́ в Себе́ си́лу изше́дшую от Него́, и обра́щься в наро́де, глаго́лаше: кто прикосну́ся ри́зам Мои́м? И глаго́лаху Ему́ ученицы́ Его́: ви́диши наро́д угнета́ющ Тя, и глаго́леши, кто ся прикосну́ Мне? И обгля́даше ви́дети сотво́ршую сие́. Жена́ же убоя́вшися и трепе́щущи, ве́дящи, е́же бысть ей, прии́де и припаде́ к Нему́ и рече́ Ему́ всю и́стину. Он же рече́ ей: дщи, ве́ра твоя́ спасе́ тя. Иди́ в ми́ре и бу́ди цела́ от ра́ны твоея́.

Сла́ва, Тебе́, Го́споди, сла́ва Тебе́.

Псало́м 50:

Поми́луй мя, Бо́же, по вели́цей ми́лости Твое́й, и по мно́жеству щедро́т Твои́х очи́сти беззако́ние мое́. Наипа́че омы́й мя от беззако́ния моего́, и от греха́ моего́ очи́сти мя. Я́ко беззако́ние мое́ аз зна́ю и грех мой предо мно́ю есть вы́ну. Тебе́ Еди́ному согреши́х, и лука́вое пред Тобо́ю сотвори́х, я́ко да оправди́шися во словесе́х Твои́х и победи́ши, внегда́ суди́ти Ти. Се бо в беззако́ниих зача́т есмь, и во гресе́х роди́ мя ма́ти моя́. Се бо и́стину возлюби́л еси́, безве́стная и та́йная прему́дрости Твоея́ яви́л ми еси́. Окропи́ши мя иссо́пом, и очи́щуся, омы́еши мя, и па́че сне́га убелю́ся. Слу́ху моему́ да́си ра́дость и весе́лие, возра́дуются ко́сти смире́нныя. Отврати́ лице́ Твое́ от грех мои́х, и вся беззако́ния моя́ очи́сти. Се́рдце чи́сто сози́жди во мне, Бо́же, и дух прав обнови́ во утро́бе мое́й. Не отве́ржи мене́ от лица́ Твоего́, и Ду́ха Твоего́ Свята́го не отыми́ от мене́. Возда́ждь ми ра́дость спасе́ния Твоего́, и Ду́хом Влады́чним утверди́ мя. Научу́ беззако́нныя путе́м Твои́м, и нечести́вии к Тебе́ обратя́тся. Изба́ви мя от крове́й, Бо́же, Бо́же спасе́ния моего́, возра́дуется язы́к мой пра́вде Твое́й. Го́споди, устне́ мои́ отве́рзеши, и уста́ моя́ возвестя́т хвалу́ Твою́. Я́ко а́ще бы восхоте́л еси́ же́ртвы, дал бых у́бо, всесожже́ния не благоволи́ши. Же́ртва Бо́гу дух сокруше́н, се́рдце сокруше́нно и смире́нно Бог не уничижи́т. Ублажи́, Го́споди, благоволе́нием Твои́м Сио́на, и да сози́ждутся сте́ны Иерусали́мския, тогда́ благоволи́ши же́ртву пра́вды, возноше́ние и всесожега́емая: тогда́ возложа́т на олта́рь Твой тельцы́.

Глас 6:

Сла́ва Отцу́ и Сы́ну и Свято́му Ду́ху./ Моли́твами великомученицы Екатерины, / Ми́лостиве, очи́сти / мно́жества согреше́ний на́ших.

И ны́не и при́сно и во ве́ки веко́в. Ами́нь./ Моли́твами Богоро́дицы, / Ми́лостиве, очи́сти / мно́жества согреше́ний на́ших.

Поми́луй мя, Бо́же,/ по вели́цей ми́лости Твое́й,/ и по мно́жеству щедро́т Твои́х// очи́сти беззако́ние мое́.

Стихи́ра, глас 2

Го́споди, поми́луй. (12 раз)

Кано́н му́ченицы, гла́с 8.

Пе́снь 1.

Ирмо́с: Колесницегони́теля фарао́ня погрузи́ чудотворя́й иногда́ Моисе́йский же́зл, крестообра́зно порази́в и раздели́в мо́ре, Изра́иля же беглеца́, пешехо́дца спасе́, пе́снь Бо́гови воспева́юща.

Припев: Святая великомученица Екатерина, моли Бога о нас.

Екатери́ны, всему́дрыя му́ченицы, моли́твами, Христе́, мра́чное о́ко души́ моея́ просвети́, зарю́ ми́ дая́, Влады́ко, Твоего́ светоли́тия, душетле́нных паде́ний мои́х ве́сь мра́к потребля́ющую.

Направля́ема Влады́ки, всему́драя, Боже́ственными повеле́нии и Того́ любо́вию пали́ма, потекла́ еси́, к подвиго́м тща́щися, и мучи́телей ра́зумы, Екатери́но, устраши́ла еси́ сло́вом, и му́дростию, и благода́тию.

Управля́ема дла́нию, сла́вная, кре́пкою Христо́вою, и́дольския бу́ри избе́гла еси́, му́ченице, немо́кренно преплы́вши креста́ ве́трилом и Боже́ственными ве́тры Ду́ха, пе́снь Бо́гу воспева́ющи.

Ра́дующися де́вственными добро́тами, Екатери́но му́драя, и Боже́ственное зна́ние с небесе́ иму́щи, лжеиме́ннаго зна́ния благодерзнове́нно и му́жественно предста́тели посрами́ла еси́, ты́я держа́вне победи́вши.

Богоро́дичен: Иже Богоро́дицу Тя́ пропове́дает, Пречи́стая, вся́кия е́реси отринове́ние и́мать: пло́ть бо бы́вша, неизме́нно родила́ еси́ превы́шша вся́кия, Богороди́тельнице, тва́ри Сло́во Бо́жие Присносу́щное.

Пе́снь 3.

Ирмо́с: Утверже́й в нача́ле небеса́ ра́зумом и зе́млю на вода́х основа́вый, на ка́мени мя́, Христе́, за́поведей Твои́х утверди́, я́ко не́сть свя́т, па́че Тебе́, еди́не Человеколю́бче.

Во́льными твои́ми стремле́ньми вошла́ еси́ ко страда́нию, во́лею Христа́ подража́ющи и победи́вши све́тло тмы́ мироде́ржца, венцено́сица яви́лася еси́, Екатери́но богоприя́тная.

Кре́постию ума́ обличи́ла еси́ мучи́тели, безбо́жия в глубине́ валя́ющияся, ри́торствующи я́ве богозна́ния догма́ты, Бо́жиею му́дростию му́ченица уясня́ема всехва́льная.

Равнобо́жие во у́ши Евине пошепта́вый, от отрокови́цы млады́я ны́не попира́ется, ору́жием бо Креста́ огради́вшися, посрами́ Екатери́на му́ченица безме́рно того́ хва́лящася.

Богоро́дичен: Умерщвле́нный мо́й у́м жи́зни де́йством из Тебе́ я́вльшияся ми́ру воздви́гни, я́звы и стру́пы истребля́ющи грехо́вныя, еди́на Богороди́тельнице Всенепоро́чная.

Седа́лен святы́я, гла́с 4. Подо́бен: Вознесы́йся.

Жениха́ твоего́, Христа́, возлюби́вши, свещу́ твою́ све́тло угото́вльши, доброде́тельми просия́вши, сла́вная. Те́мже вошла́ еси́ с Ни́м в черто́г и, вене́ц страда́ния от Него́ прие́мши, от бе́д изба́ви на́с, соверша́ющих, Екатери́но, па́мять твою́.

Пе́снь 4.

Ирмо́с: Ты́ моя́ кре́пость, Го́споди, Ты́ моя́ и си́ла, Ты́ мо́й Бо́г, Ты́ мое́ ра́дование, не оста́вль не́дра Отча, и на́шу нищету́ посети́в. Те́м с проро́ком Авваку́мом зову́ Ти: си́ле Твое́й сла́ва, Человеколю́бче.

Страда́льческое, Екатери́но, противле́ние показа́ла еси́, му́ченице приснопа́мятная, вражде́бнику зело́ терпели́вно противля́ющися и того́ попра́вши нога́ми кра́сными Креста́ си́лою, страстоно́сице, му́чеников похвала́.

Неве́ста Христо́ва, Екатери́но всеблаже́нная, яви́лася еси́, Боже́ственныя красоты́ светови́дными луча́ми просвеща́ема и добро́тою сия́ющи. Те́мже и, веселя́щися, песнопое́ши Влады́це: си́ле Твое́й сла́ва, Человеколю́бче.

Мучи́тельскую горды́ню низложи́ла еси́ и Боже́ственным сло́вом му́дрости твоея́ я́ко от глубины́ ле́стнаго демоногове́ния прельща́емыя исхи́тила еси́, уча́щи зва́ти Христу́ песнопою́щия: си́ле Твое́й сла́ва, Человеколю́бче.

Благосла́вное и светоно́сное торжество́ сла́вныя па́мяти твоея́, всехва́льная, кре́пко де́рзость вра́жию попра́вши, я́ко со́лнце, возсия́, в не́мже велегла́сно Влады́це вопие́м: си́ле Твое́й сла́ва, Человеколю́бче.

Богоро́дичен: Ны́не кре́пость низложи́ отмета́ющихся о́браза, Отрокови́це, поклоне́ния Тебе́, Чи́стыя, и па́че ума́ из Тебе́ воплоще́ннаго и ми́р ве́сь просве́щшаго, и все́х святы́х, ве́рою же чту́щия Тя́ просвети́, еди́на Всепе́тая.

Пе́снь 5

Ирмо́с: Вску́ю мя́ отри́нул еси́ от лица́ Твоего́, Све́те незаходи́мый, и покры́ла мя́ е́сть чужда́я тма́ окая́ннаго? Но обрати́ мя, и к све́ту за́поведей Твои́х пути́ моя́ напра́ви, молю́ся.

Любо́вию огнепали́ма, му́ченице всесла́вная, Влады́ки твоего́ и и́щущи Того́ недомы́сленную добро́ту ви́дети, самово́льным нра́вом ра́нам себе́ вдала́ еси́, де́вства сия́ющи благода́тьми.

Страстьми́ свяще́ннейшими, отрокови́це доброде́во, украси́вши тебе́ саму́ю благоле́пно, возшла́ еси́ к небе́сному Христо́ву черто́гу и ны́не све́тло твоему́ Жениху́, веселя́щися, сочта́лася еси́, всеблаже́нная.

Отрокови́ца всесве́тлая яви́лася еси́, возлюби́вши Еди́наго Жела́емаго, и, во сле́д Того́ крепча́йшее тече́ние соверши́вши, в воню́ мѵ́ра твоего́ у́мнаго истоще́ннаго, вопия́ла еси́: теку́, Женише́ мо́й.

Богоро́дичен: Истинную Богоро́дицу Тя́ вси́ позна́вше, Пречи́стая Влады́чице, из Тебе́ ро́ждшагося Бо́га Сло́ва ве́дяще, пропове́даем во дву́ существа́х, хоте́ниих самовла́стных познава́ема, Ма́ти Богоневе́стная.

Пе́снь 6.

Ирмо́с: Бе́здна грехо́в и прегреше́ний бу́ря мя́ смуща́ет и во глубину́ ну́жднаго ре́ет мя́ отча́яния, но Твою́ кре́пкую ру́ку мне́ простри́, я́ко Петро́ви, о Упра́вителю! и спаси́.

Всю́ тя́, добро́тою сия́ющу, де́вства заре́ю, му́ченическими же, отрокови́це, обагре́ну кровьми́, ви́дев, благо́е Сло́во и пречи́стое в черто́зех небе́сных тя́ всели́.

Возмогла́ еси́ Кресто́м мучи́телей разреши́ти держа́ву, и мирски́я му́дрости обличи́вши суету́, богодохнове́ннаго уче́ния точа́щи догма́ты, велему́дренная Екатери́но приснопа́мятная.

Ле́стию пе́рвее Ада́ма ра́йския сла́дости изгна́вшаго, ра́н боле́зни кре́пко терпя́щи, низложи́ла еси́ на зе́млю, му́ченице всесла́вная, и венцы́ Ца́рствия венча́лася еси́.

Богоро́дичен: Ми́лостива мне́ Судию́ и Сы́на Твоего́, Богоро́дице Де́во, Твои́ми мольба́ми бы́ти в де́нь суда́, Изба́вителя же лю́тых, Ма́ти, сотвори́, к Тебе́ бо еди́ной наде́жды возлага́ю.

Конда́к святы́я, гла́с 2. Подо́бен: Вы́шних ища́.

Ли́к честны́й боже́ственне, мучениколю́бцы, воздви́гните ны́не, почита́юще всему́друю Екатери́ну, сия́ бо в три́знищи Христа́ пропове́да и зми́я попра́, ри́торов ра́зумы укроти́вши.

Икос:

От Бо́га му́дрость прии́мши изде́тства, му́ченице, и вне́шнюю до́бре му́дрость всю́ извы́че, позна́вши у́бо от тоя́ стихи́й движе́ние же и творе́ние по сло́ву, и сия́ из нача́ла сло́вом Сотво́ршаго, Тому́ благодаре́ние в нощи́ и во дни́ приноша́ше, и́долы низложи́вши и си́м несмы́сленно служа́щия ри́торов ра́зумы укроти́вши.

Пе́снь 7.

Ирмо́с: Бо́жия снизхожде́ния о́гнь устыде́ся в Вавило́не иногда́. Сего́ ра́ди о́троцы в пещи́, ра́дованною ного́ю, я́ко во цве́тнице, лику́юще, поя́ху: благослове́н еси́, Бо́же оте́ц на́ших.

Му́чеников хвала́, благоче́стия учи́тельница была́ еси́, све́тлому твоему́ Жениху́ му́чеников мно́жество приве́дши, Христу́. С ни́миже зове́ши, всехва́льная, пою́щи: благослове́н Бо́г оте́ц на́ших.

Сло́во твое́ прему́дрое ко спасе́нию мно́ги исхи́ти от идолонеи́стовства и светоно́сны яви́ му́ченики, велегла́сно с тобо́ю взыва́ющия: благослове́н Бо́г оте́ц на́ших.

Отрокови́ца, в сле́д Тебе́ иду́щи, Тебе́ приведе́ся, мече́м посе́чена, Твою́ подража́ющи стра́сть пречи́стую и Тебе́, Зижди́телю, вопию́щи и глаго́лющи: благослове́н Бо́г оте́ц на́ших.

Богоро́дичен: Святы́х Святы́й, в Тебе́ свя́то всели́вся, Чи́стая Богоро́дице Де́во, воплоще́н, из Тебе́ ражда́ется, за е́же спасти́ ве́рою зову́щия: благослове́н Бо́г оте́ц на́ших.

Пе́снь 8.

Ирмо́с: Седмери́цею пе́щь халде́йский мучи́тель богочести́вым неи́стовно разжже́, си́лою же лу́чшею спасе́ны сия́ ви́дев, Творцу́ и Изба́вителю вопия́ше: о́троцы, благослови́те, свяще́нницы, воспо́йте, лю́дие, превозноси́те во вся́ ве́ки.

Твои́ми уче́нии цари́ца, ве́рующи, притече́ ко благоче́стию, и кре́пко претерпе́вши боле́зней чу́вство, и Ца́рствия небе́снаго непрее́мнаго я́вственно сподо́бися, вопию́щи Влады́це: свяще́нницы, благослови́те, лю́дие, превозноси́те во вся́ ве́ки.

С му́ченики да бу́дут ве́рных проше́ния, страстоте́рпица бо Христу́ предстои́т, прося́щи лу́чшая и спасе́ния хода́тайственная всесвяту́ю и честну́ю ея́ па́мять усе́рдно соверша́ющим и ве́рно песнопою́щим: лю́дие, превозноси́те Христа́ во ве́ки.

Отве́рз, прие́млет тя́ Жени́х, всему́драя, две́ри ра́йския, и в черто́зе всесве́тлем обита́ти сотвори́, Ца́рствия прича́стницу я́ко соо́бщницу страсте́й явля́ет. Ему́же ны́не предстоя́щи, царе́ва дщи́, све́тло укра́шена, на́с не забу́ди.

Ухищре́нными глаго́лы искуша́ше мучи́тель, и уветливосло́вии, лю́тый, льстя́, разсла́бити твою́ кре́пость наде́явся, сла́вная, но уневе́ститися Христу́ хотя́щи, вопия́ла еси́ Влады́це: свяще́нницы, воспо́йте, лю́дие, превозноси́те Христа́ во ве́ки.

Богоро́дичен: Свяще́ннейши была́ еси́, Богоро́дице Всенепоро́чная, преми́рнаго Ангелов чи́на: си́х бо родила́ еси́ Соде́теля и Го́спода от де́вственныя и неискусобра́чныя утро́бы, во дву́х существа́х неслия́нно и невра́щно, во еди́ной же Ипоста́си Бо́га воплоще́нна.

На 9-й песни поем песнь Пресвятыя Богородицы:

Вели́чит душа́ Моя́ Го́спода и возра́довася дух Мой о Бо́зе Спа́се Мое́м.

К коемуждо стиху припеваем: Честне́йшую Херуви́м / и сла́внейшую без сравне́ния Серафи́м, / без истле́ния Бо́га Сло́ва ро́ждшую, / су́щую Богоро́дицу, Тя велича́ем.

Я́ко призре́ на смире́ние рабы́ Своея́, се бо, от ны́не ублажа́т Мя вси ро́ди.

Честне́йшую Херуви́м / и сла́внейшую без сравне́ния Серафи́м, / без истле́ния Бо́га Сло́ва ро́ждшую, / су́щую Богоро́дицу, Тя велича́ем.

Я́ко сотвори́ Мне вели́чие Си́льный, и свя́то и́мя Его́, и ми́лость Его́ в ро́ды родо́в боя́щимся Его́.

Сотвори́ держа́ву мы́шцею Свое́ю, расточи́ го́рдыя мы́слию се́рдца их.

Низложи́ си́льныя со престо́л, и вознесе́ смире́нныя, а́лчущия испо́лни благ, и богатя́щияся отпусти́ тщи.

Восприя́т Изра́иля о́трока Своего́, помяну́ти ми́лости, я́коже глаго́ла ко отце́м на́шим, Авраа́му и се́мени его́ да́же до ве́ка.

Песнь 9

Ирмо́с: Ужасе́ся о се́м не́бо, и земли́ удиви́шася концы́, я́ко Бо́г яви́ся челове́ком пло́тски и чре́во Твое́ бы́сть простра́ннейшее небе́с. Те́м Тя́, Богоро́дицу, Ангелов и челове́к чинонача́лия велича́ют.

Преста́вилася еси́ к черто́гом светови́дным, неве́стными укра́шена у́тварьми, де́вственную иму́щи свещу́ в твое́й десни́це, в друго́й же держа́щи отсе́ченную твою́ главу́. И ны́не, предстоя́щи Христу́, твоему́ Жениху́, Тя́ пою́щия сохрани́.

Прия́та бы́сть твоя́, богому́драя, моли́тва, ве́рою бо твое́ имену́ющия и́мя, честна́я, спаса́ет Влады́ка от искуше́ний и благоздра́вие подае́т, неду́гов избавля́я всеразли́чных, душе́вных же и теле́сных. Те́м тя́, веселя́щеся, Екатери́но, ублажа́ем.

Приста́ла еси́ ти́хому приста́нищу ны́не, благоопря́тно же и легко́ мо́ре мирско́е, му́ченице, преплы́вши треволне́ний, не искуси́вшися, всему́драя, бога́тство многоразли́чное Христу́ принося́щи, де́во, мно́жество му́ченик, Екатери́но всеблаже́нная.

В черто́зех небе́сных ны́не вну́трь с де́вственных ли́ки ликовству́ющи, му́ченическими озаря́ема луча́ми, Екатери́но всему́драя, разреши́ паде́ний мои́х плени́цы, усе́рдно моля́щи все́х Благоде́теля, за Его́же кро́вь твою́ излия́ла еси́.

Богоро́дичен: Яви́лася еси́, о Де́во Ма́ти Бо́жия! па́че естества́ ро́ждши в телеси́ благо́е Сло́во, Его́же от се́рдца Своего́ Оте́ц отры́гне пре́жде все́х веко́в, я́ко бла́г, Его́же ны́не и теле́с превы́шша разумева́ем, а́ще и в те́ло облече́ся.

Свети́лен святы́я. Подо́бен: Ду́хом во святи́лищи.

Возжиля́ема мудрова́нием же́н, о де́во Екатери́но всечестна́я, страстоте́рпцев сла́во, филосо́фов хи́трость о Бо́зе обличи́ла еси́, я́ко буесло́вие су́щу и ба́снь, всенепоро́чную и́стинно Ма́терь Бо́жию спомо́щницу стяжа́вши.

Хвали́тны псалмы́, глас 4:

Вся́кое дыха́ние да хва́лит Го́спода./ Хвали́те Го́спода с небе́с,/ хвали́те Его́ в вы́шних.// Тебе́ подоба́ет песнь Бо́гу.

Хвали́те Его́ вси а́нгели Его́,/ хвали́те Его́ вся си́лы Его́.// Тебе́ подоба́ет песнь Бо́гу.

Сти́хиры, глас 4:

Стих: Сотвори́ти в них суд напи́сан/ сла́ва сия́ бу́дет всем преподо́бным Его́.

Па́мять всесвяще́нную, / Екатери́но всехва́льная, / честна́го твоего́ страда́ния соверша́юще, / сла́вим во гла́сех непреста́нных / дарова́вшаго терпе́ние тебе́ тве́рдое, / и победоно́сну тя́ показа́вшаго, / и сло́во тебе́ пода́вшаго, устраша́ющаго ри́торы, / Иису́са Человеколю́бца, / и Спа́са, и Го́спода.

Стих: Хвали́те Его́ на си́лах Его́,/ хвали́те Его́ по мно́жеству вели́чествия Его́.

Стих: Хвали́те Его́ в тимпа́не и ли́це,/ хвали́те Его́ во стру́нах и орга́не.

Му́ченице самово́льная, / Екатери́но всесла́вная, яви́лася еси́, / мучи́теля благомо́щно обличи́вши / и лю́тое неи́стовство многобо́жия / богозна́ния сия́нием низлага́ющи / и Боже́ственною благода́тию. / Отону́дуже, и я́ко му́ченицу, / и я́ко де́ву непоро́чну, Христо́с венча́, / Спа́с ду́ш на́ших.

Стих: Хвали́те Его́ в кимва́лех доброгла́сных, хвали́те Его́ в кимва́лех восклица́ния. / Вся́кое дыха́ние да хва́лит Го́спода.

Благода́ть Ду́ха, / Екатери́но всесла́вная, / отверзе́нием у́ст прия́ла еси́, / очи́стивши тебе́ саму́ю житие́м, / и по́мыслом терпели́вным / мучи́телей го́рдость попра́ла еси́, / и добро́тою теле́сною / душе́вную красоту́ богому́дренне предпочла́ еси́, / страда́льцев удобре́ние.

Глас 2: Сла́ва Отцу́ и Сы́ну и Свято́му Ду́ху

Житие́ невеще́ственно навы́кши, суди́ще безбо́жное дости́гши, ста́ла еси́, победоно́сице, Екатери́но честна́я, цветонося́щи Бо́жию све́тлость и Боже́ственною мо́щию оде́яна, повеле́нию мучи́телеву поруга́лася еси́ и ри́торов утоли́ла еси́ буесло́вны яре́чи, многострада́льная.

Глас 6: И ны́не и при́сно и во ве́ки веко́в. Ами́нь.

Дне́сь собо́ри ве́рных, соше́дшеся, духо́вне да торжеству́им и Богоoтрокови́цу Де́ву и Богоро́дицу, в хра́м Госпо́день приводи́му, благоче́стно восхва́лим, предъизбра́нну от все́х родо́в, во оби́телище все́х Царя́ Христа́ и Бо́га: де́вы, свещи́ нося́ще, предъиди́те, Присноде́вы чту́ще честно́е происхожде́ние, ма́тeри, печа́ль всю́ отложи́вше, ра́достно спосле́дствуйте Ма́тери Бо́га быва́ющей и ра́дости ми́ра Хода́таице. Вси́ у́бо ра́достно, е́же — ра́дуйся, — со Ангелом возопии́м Обра́дованней, при́сно моля́щейся о душа́х на́ших.

Славосло́вие вели́кое:

Сла́ва в вы́шних Бо́гу, и на земли́ мир, в челове́цех благоволе́ние. Хва́лим Тя, благослови́м Тя, кла́няем Ти ся, славосло́вим Тя, благодари́м Тя, вели́кия ра́ди сла́вы Твоея́. Го́споди Царю́ Небе́сный, Бо́же О́тче Вседержи́телю, Го́споди, Сы́не Единоро́дный, Иису́се Христе́, и Святы́й Ду́ше. Го́споди Бо́же, А́гнче Бо́жий, Сы́не Оте́чь, взе́мляй грех ми́ра, поми́луй нас; взе́мляй грехи́ ми́ра, приими́ моли́тву на́шу; седя́й одесну́ю Отца́, поми́луй нас. Я́ко Ты еси́ еди́н Свят, Ты еси́ еди́н Госпо́дь, Иису́с Христо́с, в сла́ву Бо́га Отца́. Ами́нь.

На всяк день благословлю́ Тя, и восхвалю́ И́мя Твое́ во ве́ки, и в век ве́ка.

Сподо́би, Го́споди, в день сей без греха́ сохрани́тися нам. Благослове́н еси́, Го́споди, Бо́же оте́ц на́ших, и хва́льно и просла́влено И́мя Твое́ во ве́ки. Ами́нь.

Бу́ди, Го́споди, ми́лость Твоя́ на нас, я́коже упова́хом на Тя.

Благослове́н еси́, Го́споди, научи́ мя оправда́нием Твои́м. (Три́жды)

Го́споди, прибе́жище был еси́ нам в род и род. Аз рех: Го́споди, поми́луй мя, исцели́ ду́шу мою́, я́ко согреши́х Тебе́. Го́споди, к Тебе́ прибего́х, научи́ мя твори́ти во́лю Твою́, я́ко Ты еси́ Бог мой: я́ко у Тебе́ исто́чник живота́, во све́те Твое́м у́зрим свет. Проба́ви ми́лость Твою́ ве́дущим Тя.

Святы́й Бо́же, Святы́й Кре́пкий, Святы́й Безсме́ртный, поми́луй нас. (Три́жды)

Сла́ва Отцу́ и Сы́ну и Свято́му Ду́ху и ны́не и при́сно и во ве́ки веко́в. Ами́нь.

Святы́й Безсме́ртный, поми́луй нас.

Святы́й Бо́же, Святы́й Кре́пкий, Святы́й Безсме́ртный, поми́луй нас.

Тропа́рь, глас 4:

Утверди́, Бо́же, святу́ю правосла́вную ве́ру, правосла́вных христиа́н во век ве́ка.

Честне́йшую Херуви́м и Сла́внейшую без сравне́ния Серафи́м, без истле́ния Бо́га Сло́ва ро́ждшую, су́щую Богоро́дицу, Тя велича́ем.

Сла́ва, и ны́не. Го́споди, поми́луй. (Три́жды) Благослови́.

Господи Иисусе Христе, Сыне Божий, моли́твами Пречи́стыя Своея́ Ма́тере, великомученицы Екатерины, преподобных и богоносных отец наших и всех святы́х, поми́луй и спаси нас я́ко Благ и Челове́колюбец.

Многоле́тие:

Вели́каго Господи́на и Отца́ на́шего Кири́лла,/ Святе́йшаго Патри́арха Моско́вского и всея́ Руси́,/ и Господи́на на́шего (Высоко-) Преосвяще́ннейшаго (имярек),/ (архи-)епи́скопа (митрополита (титул)),/ богохрани́мую страну́ на́шу Росси́йскую,/ и вся правосла́вныя христи́аны,// Го́споди, сохрани́ их на мно́гая ле́та.