Шрифт

▲

Богослужебные тексты для домашнего употребления

Дни памяти святых

Последование Всеношного бдения в день памяти святителя Германа Казанского. Для домашнего (келейного) совершения

Оглавление

ВСЕНО́ЩНОЕ БДЕ́НИЕ

ВЕЛИ́КАЯ ВЕЧЕ́РНЯ

Моли́твами святы́х оте́ц на́ших, Го́споди Иису́се Христе́, Бо́же наш, поми́луй нас. Ами́нь.

Сла́ва Тебе́, Бо́же наш, сла́ва Тебе́.

Царю́ Небе́сный, Уте́шителю, Ду́ше и́стины, И́же везде́ сый и вся исполня́яй, Сокро́вище благи́х и жи́зни Пода́телю, прииди́ и всели́ся в ны, и очи́сти ны от вся́кия скве́рны, и спаси́, Бла́же, ду́ши на́ша.

Святы́й Бо́же, Святы́й Кре́пкий, Святы́й Безсме́ртный, поми́луй нас. (Трижды.)

Сла́ва Отцу́ и Сы́ну и Свято́му Ду́ху, и ны́не и при́сно и во ве́ки веко́в. Ами́нь.

Пресвята́я Тро́ице, поми́луй нас; Го́споди, очи́сти грехи́ на́ша; Влады́ко, прости́ беззако́ния на́ша; Святы́й, посети́ и исцели́ не́мощи на́ша, и́мене Твоего́ ра́ди.

Го́споди, поми́луй, (трижды). Сла́ва, и ны́не:

О́тче наш, И́же еси́ на Небесе́х, да святи́тся и́мя Твое́, да прии́дет Ца́рствие Твое́, да бу́дет во́ля Твоя́, я́ко на Небеси́ и на земли́. Хлеб наш насу́щный да́ждь нам днесь; и оста́ви нам до́лги на́ша, я́коже и мы оставля́ем должнико́м на́шим; и не введи́ нас во искуше́ние, но изба́ви нас от лука́ваго.

Таже, Го́споди, поми́луй, (12), Сла́ва, и ны́не:

Прииди́те, поклони́мся Царе́ви на́шему Бо́гу.

Прииди́те, поклони́мся и припаде́м Христу́, Царе́ви на́шему Бо́гу.

Прииди́те, поклони́мся и припаде́м Самому́ Христу́, Царе́ви и Бо́гу на́шему.

Псалом 103:

Поется часть псалма:

Благослови́, душе́ моя́, Го́спода. / Благослове́н еси́, Го́споди. / Го́споди, Бо́же мой, возвели́чился еси́ зело́. / Благослове́н еси́, Го́споди. / Во испове́дание и в велеле́поту обле́клся еси́. / Благослове́н еси́, Го́споди. / Посреде́ гор про́йдут во́ды. / Ди́вна дела́ Твоя́, Го́споди. / Вся прему́дростию сотвори́л еси́. / Сла́ва Ти, Го́споди, сотвори́вшему вся.

Или читается псалом полностью:

Благослови́, душе́ моя́, Го́спода. Го́споди, Бо́же мой, возвели́чился еси́ зело́. Во испове́дание и в велеле́поту обле́клся еси́. Одея́йся све́том, я́ко ри́зою, простира́яй не́бо, я́ко ко́жу. Покрыва́яй вода́ми превы́спренняя Своя́, полага́яй о́блаки на восхожде́ние Свое́, ходя́й на крилу́ ве́треню. Творя́й А́нгелы Своя́ ду́хи и слуги́ Своя́ пла́мень о́гненный. Основа́яй зе́млю на тве́рди ея́, не преклони́тся в век ве́ка. Бе́здна, я́ко ри́за, одея́ние ея́, на гора́х ста́нут во́ды, от запреще́ния Твоего́ побе́гнут, от гла́са гро́ма Твоего́ убоя́тся. Восхо́дят го́ры и нисхо́дят поля́ в ме́сто, е́же основа́л еси́ им. Преде́л положи́л еси́, eго́же не пре́йдут, ниже́ обратя́тся покры́ти зе́млю. Посыла́яй исто́чники в де́брех, посреде́ гор про́йдут во́ды. Напая́ют вся зве́ри се́льныя, ждут она́гри в жа́жду свою́. На ты́х пти́цы небе́сныя привита́ют, от среды́ ка́мения дадя́т глас. Напая́яй го́ры от превы́спренних Свои́х, от плода́ дел Твои́х насы́тится земля́. Прозяба́яй траву́ ското́м, и злак на слу́жбу челове́ком, извести́ хлеб от земли́. И вино́ весели́т се́рдце челове́ка, ума́стити лице́ еле́ем, и хлеб се́рдце челове́ка укрепи́т. Насы́тятся древа́ польска́я, ке́дри Лива́нстии, и́хже еси́ насади́л. Та́мо пти́цы вогнездя́тся, ероди́ево жили́ще предводи́тельствует и́ми. Го́ры высо́кия еле́нем, ка́мень прибе́жище за́яцем. Сотвори́л есть луну́ во времена́, со́лнце позна́ за́пад свой. Положи́л еси́ тму, и бысть нощь, в не́йже про́йдут вси зве́рие дубра́внии. Ски́мни рыка́ющии, восхи́тити и взыска́ти от Бо́га пи́щу себе́. Возсия́ со́лнце и собра́шася и в ло́жах свои́х ля́гут. Изы́дет челове́к на де́ло свое́ и на де́лание свое́ до ве́чера. Я́ко возвели́чишася дела́ Твоя́, Го́споди, вся прему́дростию сотвори́л еси́, испо́лнися земля́ тва́ри Твоея́. Сие́ мо́ре вели́кое и простра́нное, та́мо га́ди, и́мже несть числа́, живо́тная ма́лая с вели́кими, та́мо корабли́ препла́вают, змий сей, eго́же созда́л еси руга́тися eму́. Вся к Тебе́ ча́ют, да́ти пи́щу им во бла́го вре́мя. Да́вшу Тебе́ им соберу́т, отве́рзшу Тебе́ ру́ку вся́ческая испо́лнятся бла́гости, отвра́щшу же Тебе́ лице́, возмяту́тся, отъи́меши дух их, и исче́знут, и в персть свою́ возвратя́тся. По́слеши Ду́ха Твоего́, и сози́ждутся, и обнови́ши лице́ земли́. Бу́ди сла́ва Госпо́дня во ве́ки, возвесели́тся Госпо́дь о де́лех Свои́х, призира́яй на зе́млю, и творя́й ю́ трясти́ся, прикаса́яйся гора́м, и дымя́тся. Воспою́ Го́сподеви в животе́ мое́м, пою́ Бо́гу моему́, до́ндеже есмь, да услади́тся Ему́ бесе́да моя́, аз же возвеселю́ся о Го́споде. Да исче́знут гре́шницы от земли́, и беззако́нницы, я́коже не бы́ти им. Благослови́, душе́ моя́, Го́спода.

Со́лнце позна́ за́пад свой. Положи́л еси́ тму, и бысть нощь. Я́ко возвели́чишася дела́ Твоя́, Го́споди, вся прему́дростию сотвори́л еси́.

Сла́ва, и ны́не: Аллилу́иа, аллилу́иа, аллилу́иа, сла́ва Тебе́ Бо́же. Трижды.

Блаже́н муж:

Блаже́н муж, и́же не и́де на сове́т нечести́вых.

Аллилу́иа, аллилу́иа, аллилу́иа.

Я́ко весть Госпо́дь путь пра́ведных, и путь нечести́вых поги́бнет.

Аллилу́иа, аллилу́иа, аллилу́иа.

Рабо́тайте Го́сподеви со стра́хом и ра́дуйтеся Ему́ с тре́петом.

Аллилу́иа, аллилу́иа, аллилу́иа.

Блаже́ни вси наде́ющиися Нань.

Аллилу́иа, аллилу́иа, аллилу́иа.

Воскресни́, Го́споди, спаси́ мя, Бо́же мой.

Аллилу́иа, аллилу́иа, аллилу́иа.

Госпо́дне есть спасе́ние, и на лю́дех Твои́х благослове́ние Твое́.

Аллилу́иа, аллилу́иа, аллилу́иа.

Сла́ва Отцу́ и Сы́ну и Свято́му Духу.

Аллилу́иа, аллилу́иа, аллилу́иа.

И ны́не и при́сно и во ве́ки веко́в. Ами́нь.

Аллилу́иа, аллилу́иа, аллилу́иа.

Аллилу́иа, аллилу́иа, аллилу́иа, сла́ва Тебе́ Бо́же. (Три́жды)

Го́споди, воззва́х, глас 6:

Го́споди, воззва́х к Тебе́, услы́ши мя./ Услы́ши мя, Го́споди./ Го́споди, воззва́х к Тебе́, услы́ши мя:/ вонми́ гла́су моле́ния моего́,/ внегда́ воззва́ти ми к Тебе́.// Услы́ши мя, Го́споди.

Да испра́вится моли́тва моя́,/ я́ко кади́ло пред Тобо́ю,/ воздея́ние руку́ мое́ю/ – же́ртва вече́рняя.// Услы́ши мя, Го́споди.

Стихи́ры пра́здника, глас 6:

Стих: А́ще беззако́ния на́зриши, Го́споди, Го́споди, кто постои́т? Я́ко у Тебе́ очище́ние есть.

От мла́дости, преподо́бне, всего́ себе́ возложи́в Христу́ и Того́ ра́ди любве́ до́льнаго ми́ра чу́вственныя красоты́ оста́вив, ско́рбная и жесто́кая терпе́ти произво́лил еси́. Те́мже ны́не во Све́те Незаходи́мом с ли́ки ве́рно подвиза́вшихся зря́ преми́рную красоту́, моли́ся подвигополо́жнику Христу́ о спасе́нии ду́ш на́ших.

Стих: И́мене ра́ди Твоего́ потерпе́х Тя, Го́споди, потерпе́ душа́ моя́ в сло́во Твое́, упова́ душа́ моя́ на Го́спода.

Стих: От стра́жи у́тренния до но́щи, от стра́жи у́тренния да упова́ет Изра́иль на Го́спода.

Таи́нницу де́л Бо́жиих — Прему́дрость возлюби́в, Христа́ еди́наго возжеле́л еси́: кре́ст на ра́мо взе́м, Тому́ усе́рдно после́довал еси́, кре́пким воздержа́нием и всено́щным в умиле́нной моли́тве стоя́нием пло́ть твою́ ду́ху покори́л еси́. И ны́не, ликовству́я вку́пе со вше́дшими те́сным путе́м в ра́дость Го́спода своего́, соде́лай моли́твами твои́ми, святи́телю, и на́м ше́ствовати путя́ми живо́тными.

Стих: Я́ко у Го́спода ми́лость, и мно́гое у Него́ избавле́ние, и Той изба́вит Изра́иля от всех беззако́ний eго́.

Ди́вных свиде́ний Бо́жиих стяжа́в любому́дрие, име́л еси́ зако́н посреде́ чре́ва твоего́, и се́рдце непоро́чно во оправда́ниях святы́х: сего́ ра́ди процве́л еси́, я́ко дре́во, насажде́нное при исхо́дищах во́д, и я́ко ма́слина плодови́та в дому́ Бо́жии. Моли́ся, святи́телю, и на́м в дому́ Бо́жии не безпло́дным бы́ти.

Стих: Хвали́те Го́спода вси язы́цы, похвали́те Его́ вси лю́дие.

Богоблаже́нне о́тче Ге́рмане, пра́вды ра́ди Ца́рствия Христо́ва вся́, я́же на земли́, [я́ко] уме́ты вмени́в, у́м тво́й безстра́стием просвети́л еси́, нището́ю Христо́вою обогати́вся, путе́м непоро́чным тече́ние соверши́л еси́. Те́мже и по преставле́нии твое́м в нетле́нии пребыва́я, моли́ и на́м от тле́ния грехо́внаго неврежде́нным бы́ти.

Глас 7: Стих: Я́ко утверди́ся ми́лость Его́ на нас, и и́стина Госпо́дня пребыва́ет во век.

Изволе́нием Ду́ха Свята́го, избра́нием Це́ркве и Держа́вным гла́сом, корми́ла Каза́нския па́ствы прия́л еси́, ю́же управля́я сло́вом и́стины, тща́лся еси́ предста́вити Христу́, я́ко ни́ву благовозде́ланну. Те́мже, святи́телю, име́я дерзнове́ние ко Го́споду, вы́ну предста́тельствуй, ве́ры и благоче́стия плода́ми изоби́ловати е́й и вся́ким разнове́рием непло́дствовати.

Глас 8: Сла́ва Отцу́ и Сы́ну и Свято́му Ду́ху.

Прииди́те, правосла́вных собо́ри, све́тлыя Свия́жския оби́тели основа́теля и новопросвеще́нныя Це́ркве Каза́нския па́стыря, чудотво́рца Ге́рмана пе́сненно восхва́лим: то́й бо, в благоле́пии святи́тельства принося́ же́ртву хвале́ния, и себе́ самаго́ приноша́ше в же́ртву благоуго́дну Бо́гови, о слове́сном ста́де свое́м, и сло́вом Христо́вым, мно́ги, во тме́ блужда́вшия неве́рия, ко све́ту ве́ры напра́ви. Те́м и по преставле́нии неоску́дно источа́ет да́ры любо́вию почита́ющим па́мять его́.

Глас 8: И ны́не и при́сно и во ве́ки веко́в. Ами́нь.

Ца́рь Небе́сный за человеколю́бие на земли́ яви́ся и с челове́ки поживе́, от Де́вы бо Чи́стыя пло́ть прие́мый и из Нея́ проше́дый с восприя́тием, еди́н е́сть Сы́н, сугу́б естество́м, но не Ипоста́сию. Те́мже, соверше́нна Того́ Бо́га и соверше́нна Челове́ка вои́стинну пропове́дающе, испове́дуем Христа́ Бо́га на́шего: Его́же моли́, Ма́ти Безневе́стная, поми́ловатися душа́м на́шим.

Све́те Тихи́й:

Све́те Ти́хий святы́я сла́вы Безсме́ртнаго Отца́ Небе́снаго, Свята́го, Блаже́ннаго, Иису́се Христе́! Прише́дше на за́пад со́лнца, ви́девше свет вече́рний, пое́м Отца́, Сы́на и Свята́го Ду́ха, Бо́га. Досто́ин еси́ во вся времена́ пет бы́ти гла́сы преподо́бными, Сы́не Бо́жий, живо́т дая́й; те́мже мир Тя сла́вит.

1. При́тчей чте́ние

Па́мять пра́веднаго с похвала́ми, и благослове́ние Госпо́дне на главе́ его́. Блаже́н челове́к, и́же обре́те прему́дрость, и сме́ртен, и́же уве́де ра́зум. Лу́чше бо сию́ купова́ти, не́жели зла́та и сребра́ сокро́вища. Честне́йшая же е́сть ка́мений многоце́нных, все́ же честно́е недосто́йно ея́ е́сть. Долгота́ бо дне́й и ле́та живота́ в десни́це ея́, в шу́йце же ея́ бога́тство и сла́ва. От у́ст ея́ исхо́дит пра́вда, зако́н же и ми́лость на язы́це но́сит. Послу́шайте у́бо мене́, о ча́да, честна́я бо реку́, и блаже́н челове́к, и́же пути́ моя́ сохрани́т: исхо́ди бо мои́ — исхо́ди живота́, и уготовля́ется хоте́ние от Го́спода. Сего́ ра́ди молю́ ва́с и предлага́ю мо́й гла́с сыново́м челове́ческим. Я́ко а́з, прему́дрость, устро́их сове́т, и ра́зум и смы́сл аз призва́х. Мо́й сове́т и утвержде́ние, мо́й ра́зум, моя́ же кре́пость. Аз мене́ лю́бящия люблю́, и́щущии же мене́ обря́щут благода́ть. Разуме́йте у́бо, незло́бивии, кова́рство, ненака́зании же, прилага́йте сердца́. Послу́шайте мене́ и па́ки, честна́я бо реку́, и отве́рзу от усте́н пра́вая, я́ко и́стине поучи́тся горта́нь мой, ме́рзки же пре́до мно́ю устне́ лжи́выя. С пра́вдою вси́ глаго́лы у́ст мои́х, ничто́же в ни́х стро́потно, ниже́ развраще́нно. Вся́ пра́ва су́ть разумева́ющим и про́ста обрета́ющим ра́зум. Науча́ю бо ва́с и́стине, да бу́дет о Го́споде наде́жда ва́ша, и испо́лнитеся Ду́ха.

2. Прему́дрости Соломо́новы чте́ние

Уста́ пра́веднаго ка́плют прему́дрость, язы́к же непра́веднаго поги́бнет. Устне́ муже́й пра́ведных ка́плют благода́ти, уста́ же нечести́вых развраща́ются. Ме́рила льсти́вая ме́рзость пред Го́сподем, ве́с же пра́ведный прия́тен Ему́. Иде́же а́ще вни́дет досажде́ние, та́мо и безче́стие, уста́ же смире́нных поуча́ются прему́дрости. Соверше́ние пра́вых наста́вит и́х, и поползнове́ние отрица́ющихся упасе́т и́х. Не по́льзуют име́ния в де́нь я́рости, пра́вда же изба́вит от сме́рти. Умер пра́ведный, оста́ви раска́яние, нару́чна же быва́ет и посмея́тельна нечести́вых па́губа. Пра́вда непоро́чнаго исправля́ет пути́, в нече́стие же па́дает непра́вда. Пра́вда муже́й пра́вых изба́вит и́х, безсове́стием же пленя́ются беззако́ннии. Сконча́вшуся му́жу пра́ведну, не поги́бнет наде́жда, похвала́ же нечести́вых поги́бнет. Пра́ведник от ло́ва убе́гнет, в него́же ме́сто предае́тся нечести́вый. Во усте́х нечести́вых се́ть гра́жданом, чу́вство же пра́ведных благопоспе́шное. Во благи́х пра́ведных испра́вится гра́д, и в поги́бели нечести́вых ра́дование. Во благослове́нии пра́вых возвы́сится гра́д, усты́ же нечести́вых раскопа́ется. Руга́ется гра́жданом лише́нный ра́зума, му́ж же му́дрый безмо́лвие во́дит.

3. Прему́дрости Соломо́новы чте́ние

Пра́ведник, а́ще пости́гнет сконча́тися, в поко́и бу́дет. Осу́дит же пра́ведник умира́яй живу́щия нечести́выя. У́зрят бо кончи́ну пра́веднаго и не разуме́ют, что́ совеща́ша о не́м, я́ко пове́ржет Госпо́дь нечести́выя безгла́сны ни́ц и поколе́блет и́х от основа́ний, и до после́дняго исче́знут в боле́зни, и па́мять и́х поги́бнет. Прии́дут бо в помышле́ние согреше́ний свои́х ужа́сни, и обличи́т и́х сопроти́в беззако́ния и́х. Тогда́ ста́нет в дерзнове́нии мно́зе пра́ведник пред лице́м оскорби́вших его́ и отмета́ющих труды́ его́. Ви́девше же его́, смяту́тся стра́хом мно́гим и ужа́снутся о пресла́вном спасе́нии его́. Реку́т бо в себе́, ка́ющеся, и в тесноте́ ду́ха воздо́хнут и реку́т: се́й бе́, его́же име́хом не́когда в посме́х и в при́тчу поноше́ния, безу́мнии, житие́ его́ вмени́хом неи́стово и кончи́ну его́ безче́стну. Ка́ко вмени́ся в сыне́х Бо́жиих, и во святы́х жре́бий его́ е́сть? У́бо заблуди́хом от пути́ и́стиннаго, и пра́вды све́т не облиста́ на́м, и со́лнце не возсия́ на́м. Беззако́нных испо́лнихомся сте́зь и поги́бели, и ходи́хом стези́ непрохо́дны, пути́ же Госпо́дня не разуме́хом.

Сподо́би, Го́споди:

Сподо́би, Го́споди, в ве́чер сей без греха́ сохрани́тися нам. Благослове́н еси́, Го́споди, Бо́же оте́ц на́ших, и хва́льно и просла́влено и́мя Твое́ во ве́ки. Ами́нь.

Бу́ди, Го́споди, ми́лость Твоя́ на нас, я́коже упова́хом на Тя. Благослове́н еси́, Го́споди, научи́ мя оправда́нием Твои́м. Благослове́н еси́, Влады́ко, вразуми́ мя оправда́нием Твои́м. Благослове́н еси́, Святы́й, просвети́ мя оправда́нии Твои́ми.

Го́споди, ми́лость Твоя́ во век, дел руку́ Твое́ю не пре́зри. Тебе́ подоба́ет хвала́, Тебе́ подоба́ет пе́ние, Тебе́ сла́ва подоба́ет. Отцу́ и Сы́ну и Свято́му Ду́ху, ны́не и при́сно и во ве́ки веко́в. Ами́нь.

На лити́и стихи́ры, гла́с 6:

Гласом предержа́щаго и собо́ром первосвяти́телей в новопросвеще́нную Каза́нскую страну́ основа́телем вели́кия оби́тели посыла́ешися; иде́же, ве́сь у́м тво́й впери́в в Зижди́теля вся́ческих, вельми́ подвиза́лся еси́ в созда́нии оби́тели и в собра́нии ли́ка мона́шествующих, неусы́пно моля́ся ко Го́споду, да, возгради́в ю́ досто́йно, яви́ши жили́щем по Го́споде жи́тельствующих, во е́же вку́пе с ни́ми подвиза́тися о спасе́нии свое́м и наставля́ти на пу́ть спасе́ния и ве́рных, и неве́рующих.

Лику́ет в па́мяти твое́й, святи́телю Ге́рмане, оби́тель твоя́, в не́йже, я́ко да́р освяще́н, предлежи́т те́ло твое́, с не́юже ку́пно ра́дуются и па́ствы Каза́нския ча́да твоя́, любо́вию хва́ляще тебе́ Просла́вившаго, я́ко такова́ на́м хода́тая и моли́твенника дарова́л е́сть в тебе́.

Сия́нием доброде́телей твои́х сотвори́ тя́ Христо́с, я́ко гра́д верху́ горы́, пове́дающий вели́кия дела́ Божия, и, я́ко свети́льник, поста́ви тя́ на све́щнице, да тобо́ю наставля́емии, ве́ру неразде́льну соблюде́м и во све́те де́йственной ве́ры у́зрим Све́т Незаходи́мый.

Сла́ва, гла́с 3: Отче богому́дре Ге́рмане, вели́к показа́лся еси́ де́лы и словесы́: пася́ слове́сное ста́до на зла́чных па́житях сло́ва Христо́ва, из неве́рия в ве́ру приводи́л еси́ и, благовествова́нием породи́в ча́да послуша́ния, сия́ обручи́л еси́ чистото́ю Христу́, подаю́щему ми́р душа́м на́шим.

И ны́не, богоро́дичен: Отче богому́дре Ге́рмане, вели́к показа́лся еси́ де́лы и словесы́: пася́ слове́сное ста́до на зла́чных па́житях сло́ва Христо́ва, из неве́рия в ве́ру приводи́л еси́ и, благовествова́нием породи́в ча́да послуша́ния, сия́ обручи́л еси́ чистото́ю Христу́, подаю́щему ми́р душа́м на́шим.

Го́споди, поми́луй. (40 раз)

Стихи́ры на стихо́вне:

Стихиры, гла́с 5:

Ра́дуйся, свяще́нная главо́, святи́телю Ге́рмане, ты́ отверже́нием ми́ра ева́нгельски, те́сным путе́м Христу́ после́довав, победи́тель страсте́й яви́лся еси́ и, кра́сными доброде́телей исправле́ньми оби́тели твое́й и па́стве возсия́в, те́ми, я́ко ле́ствицею, на не́бо возше́л еси́, иде́же в ра́дости святы́х предстоя́ Христу́ Бо́гу, моли́ дарова́ти ми́р и единомы́слие ста́ду твоему́.

Сти́х: Услы́шите сия́, вси́ язы́цы, внуши́те, вси́, живу́щии по вселе́нней.

Ра́дуйся, богому́дре Ге́рмане, ты́, сия́нием Уте́шителя просвети́вся, ору́жием Креста́ ко́зни предста́теля тмы́ победи́в, де́йствием святы́я про́поведи на ме́сте зла́чне ста́до твое́ упа́сл еси́ и па́лицею ве́ры проти́вныя отгна́л еси́. О, богому́дрый виногра́да Христо́ва де́лателю! Сотвори́ предста́тельством твои́м, да не бу́дем и мы́ безпло́дным ро́ждием в боже́ственном вертогра́де лозы́ Христа́.

Сти́х: Уста́ пра́веднаго поуча́тся прему́дрости, и язы́к его́ возглаго́лет су́д.

Ра́дуйся, богоблаже́нне Ге́рмане, осене́нный благода́тию свы́ше, чистото́ю жи́зни и нетле́нием в сме́рти озари́лся еси́, источа́я исцеле́ния, ду́ши от страсте́й и телеса́ от многообра́зных неду́г врачу́еши. И ны́не ско́рбных наведе́ний разгони́ о́блацы от соверша́ющих любо́вию твое́ пра́зднество.

Слава, гла́с 5:

Ди́вный Бо́г во святы́х Свои́х, в пусты́нях, гора́х и верте́пах многообра́зными по́двиги просия́вших, па́че ди́вен явля́ется в те́х, и́же по́стнически живу́ще в ми́ре, я́ко свети́ла, просия́ша посреде́ ро́да стропти́ва, сподвиза́юще и ходя́щих по стро́потным путя́м к исправле́нию; си́це, святи́телю, благоукраси́вся по́стническими доброде́тельми, и на престо́ле святи́тельства богосве́тлыми добро́тами сия́л еси́. Те́мже, венча́нный от Подвигополо́жника, моли́ся вку́пе со святи́тели Гу́рием и Варсоно́фием держа́ве Росси́йстей богоуго́дней бы́ти и сыново́м росси́йским спасти́ся.

И ны́не, Богоро́дичен глас 8:

Воспо́йте, лю́дие, Ма́тери Бо́га на́шего, воспо́йте: дне́сь бо всесве́тлую ду́шу Свою́ в пречи́стыя дла́ни, Иже из Нея́ Вопло́щшагося без се́мене предае́т, Его́же и мо́лит непреста́нно, дарова́ти вселе́нней ми́р, и ве́лию ми́лость.

Моли́тва свята́го Симео́на Богоприи́мца:

Ны́не отпуща́еши раба́ Твоего́, Влады́ко,/ по глаго́лу Твоему́, с ми́ром;/ я́ко ви́деста о́чи мои́ спасе́ние Твое́,/ е́же еси́ угото́вал пред лице́м всех люде́й,/ свет во открове́ние язы́ков,// и сла́ву люде́й Твои́х Изра́иля.

Святы́й Бо́же, Святы́й Кре́пкий, Святы́й Безсме́ртный, поми́луй нас. (Три́жды)

Сла́ва Отцу́ и Сы́ну и Свято́му Ду́ху, и ны́не и при́сно и во ве́ки веко́в. Ами́нь.

Го́споди, поми́луй. (Три́жды)

Сла́ва Отцу́ и Сы́ну и Свято́му Ду́ху, и ны́не и при́сно и во ве́ки веко́в. Ами́нь.

Тропа́рь, глас 4:

От ю́ности и́го Христо́во усе́рдно восприи́м, бде́нными по́двиги поста́ и моли́твы просла́вился еси́. Отону́дуже призыва́ющу тя́ Бо́гу на служе́ние Це́ркви в новопросвеще́ннем ца́рстве Каза́нстем, вку́пе со святи́телем Гу́рием воззва́н бы́л еси́, иде́же я́ко первонача́льник созда́нной тобо́ю в гра́де Свия́жске оби́тели и досто́йный первосвяти́телю прее́мник яви́лся еси́. Почива́я у́бо нетле́нными моща́ми во оби́тели твое́й, а ду́хом предстоя́ престо́лу Влады́чню, моли́ся, святи́телю Ге́рмане, со святи́телем Гу́рием оби́тели твое́й во святы́ни, правосла́вней же па́стве во благоче́стии преспева́ти и тме́ инове́рия све́том ве́ры разгна́тися. (Дважды)

Песнь Пресвятей Богородице:

Богоро́дице Де́во, ра́дуйся, / Благода́тная Мари́е, Госпо́дь с Тобо́ю; / благослове́на Ты в жена́х / и благослове́н Плод чре́ва Твоего́, / я́ко Спа́са родила́ еси́ душ на́ших. (Единожды)

Бу́ди И́мя Госпо́дне благослове́но от ны́не и до ве́ка. (Три́жды)

Псало́м 33:

Благословлю́ Го́спода на вся́кое вре́мя,/ вы́ну хвала́ Его́ во усте́х мои́х./ О Го́споде похва́лится душа́ моя́,/ да услы́шат кро́тцыи, и возвеселя́тся./ Возвели́чите Го́спода со мно́ю,/ и вознесе́м И́мя Его́ вку́пе./ Взыска́х Го́спода, и услы́ша мя,/ и от все́х скорбе́й мои́х изба́ви мя./ Приступи́те к Нему́, и просвети́теся,/ и ли́ца ва́ша не постыдя́тся./ Сей ни́щий воззва́, и Госпо́дь услы́ша и́,/ и от все́х скорбе́й его́ спасе́ и́./ Ополчи́тся а́нгел Госпо́день о́крест боя́щихся Его́,/ и изба́вит их./ Вкуси́те и ви́дите, я́ко благ Госпо́дь:/ блаже́н муж, и́же упова́ет Нань./ Бо́йтеся Го́спода, вси́ святи́и Его́,/ я́ко несть лише́ния боя́щимся Его́./ Бога́тии обнища́ша и взалка́ша:/ взыска́ющии же Го́спода// не лиша́тся вся́каго бла́га.

У́ТРЕНЯ.

Шестопса́лмие:

Сла́ва в вы́шних Бо́гу, и на земли́ мир, в челове́цех благоволе́ние. (Три́жды)

Го́споди, устне́ мои́ отве́рзеши, и уста́ моя́ возвестя́т хвалу́ Твою́. (Два́жды)

Псалом 3:

Го́споди, что ся умно́жиша стужа́ющии ми́? Мно́зи востаю́т на мя, мно́зи глаго́лют души́ мое́й: несть спасе́ния eму́ в Бо́зе eго́. Ты же, Го́споди, Засту́пник мой еси́, сла́ва моя́ и вознося́й главу́ мою́. Гла́сом мои́м ко Го́споду воззва́х, и услы́ша мя от горы́ святы́я Своея́. Аз усну́х, и спах, воста́х, я́ко Госпо́дь засту́пит мя. Не убою́ся от тем люде́й, о́крест напа́дающих на мя. Воскресни́, Го́споди, спаси́ мя, Бо́же мой, я́ко Ты порази́л еси́ вся вражду́ющыя ми всу́е: зу́бы гре́шников сокруши́л еси́. Госпо́дне есть спасе́ние, и на лю́дех Твои́х благослове́ние Твое́.

Аз усну́х, и спах, воста́х, я́ко Госпо́дь засту́пит мя.

Псалом 37:

Го́споди, да не я́ростию Твое́ю обличи́ши мене́, ниже́ гне́вом Твои́м нака́жеши мене́. Я́ко стре́лы Твоя́ унзо́ша во мне, и утверди́л еси́ на мне ру́ку Твою́. Несть исцеле́ния в пло́ти мое́й от лица́ гне́ва Твоего́, несть ми́ра в косте́х мои́х от лица́ грех мои́х. Я́ко беззако́ния моя́ превзыдо́ша главу́ мою́, я́ко бре́мя тя́жкое отяготе́ша на мне. Возсмерде́ша и согни́ша ра́ны моя́ от лица́ безу́мия моего́. Пострада́х и сляко́хся до конца́, весь день се́туя хожда́х. Я́ко ля́двия моя́ напо́лнишася поруга́ний, и несть исцеле́ния в пло́ти мое́й. Озло́блен бых и смири́хся до зела́, рыка́х от воздыха́ния се́рдца моего́. Го́споди, пред Тобо́ю все жела́ние мое́ и воздыха́ние мое́ от Тебе́ не утаи́ся. Се́рдце мое́ смяте́ся, оста́ви мя си́ла моя́, и свет о́чию мое́ю, и той несть со мно́ю. Дру́зи мои́ и и́скреннии мои́ пря́мо мне прибли́жишася и ста́ша, и бли́жнии мои́ отдале́че мене́ ста́ша и нужда́хуся и́щущии ду́шу мою́, и и́щущии зла́я мне глаго́лаху су́етная и льсти́вным весь день поуча́хуся. Аз же я́ко глух не слы́шах и я́ко нем не отверза́яй уст свои́х. И бых я́ко челове́к не слы́шай и не имы́й во усте́х свои́х обличе́ния. Я́ко на Тя, Го́споди, упова́х, Ты услы́шиши, Го́споди Бо́же мой. Я́ко рех: да не когда́ пора́дуют ми ся врази́ мои́: и внегда́ подвижа́тися нога́м мои́м, на мя велере́чеваша. Я́ко аз на ра́ны гото́в, и боле́знь моя́ предо мно́ю есть вы́ну. Я́ко беззако́ние мое́ аз возвещу́ и попеку́ся о гресе́ мое́м. Врази́ же мои́ живу́т и укрепи́шася па́че мене́, и умно́жишася ненави́дящии мя без пра́вды. Воздаю́щии ми зла́я возблага́я оболга́ху мя, зане́ гоня́х благосты́ню. Не оста́ви мене́, Го́споди Бо́же мой, не отступи́ от Мене́. Вонми́ в по́мощь мою́, Го́споди спасе́ния моего́.

Не оста́ви мене́, Го́споди Бо́же мой, не отступи́ от Мене́. Вонми́ в по́мощь мою́, Го́споди спасе́ния моего́.

Псалом 62:

Бо́же, Бо́же мой, к Тебе́ у́тренюю, возжада́ Тебе́ душа́ моя́, коль мно́жицею Тебе́ плоть моя́, в земли́ пу́сте и непрохо́дне, и безво́дне. Та́ко во святе́м яви́хся Тебе́, ви́дети си́лу Твою́ и сла́ву Твою́. Я́ко лу́чши ми́лость Твоя́ па́че живо́т, устне́ мои́ похвали́те Тя. Та́ко благословлю́ Тя в животе́ мое́м, о и́мени Твое́м воздежу́ ру́це мои́. Я́ко от ту́ка и ма́сти да испо́лнится душа́ моя́, и устна́ма ра́дости восхва́лят Тя уста́ моя́. А́ще помина́х Тя на посте́ли мое́й, на у́тренних поуча́хся в Тя. Я́ко был еси́ Помо́щник мой, и в кро́ве крилу́ Твое́ю возра́дуюся. Прильпе́ душа́ моя́ по Тебе́, мене́ же прия́т десни́ца Твоя́. Ти́и же всу́е иска́ша ду́шу мою́, вни́дут в преиспо́дняя земли́, предадя́тся в ру́ки ору́жия, ча́сти ли́совом бу́дут. Царь же возвесели́тся о Бо́зе, похва́лится всяк клены́йся Им, я́ко загради́шася уста́ глаго́лющих непра́ведная.

На у́тренних поуча́хся в Тя. Я́ко был еси́ Помо́щник мой, и в кро́ве крилу́ Твое́ю возра́дуюся. Прильпе́ душа́ моя́ по Тебе́, мене́ же прия́т десни́ца Твоя́.

Сла́ва Отцу́ и Сы́ну и Свято́му Ду́ху, и ны́не и при́сно и во ве́ки веко́в. Ами́нь.

Аллилу́иа, аллилу́иа, аллилу́иа, сла́ва Тебе́ Бо́же. (Три́жды)

Го́споди поми́луй. (Три́жды)

Сла́ва Отцу́ и Сы́ну и Свято́му Ду́ху, и ны́не и при́сно и во ве́ки веко́в. Ами́нь.

Псалом 87:

Го́споди Бо́же спасе́ния моего́, во дни воззва́х, и в нощи́ пред Тобо́ю. Да вни́дет пред Тя моли́тва моя́: приклони́ у́хо Твое́ к моле́нию моему́, я́ко испо́лнися зол душа́ моя́, и живо́т мой аду прибли́жися. Привмене́н бых с низходя́щими в ров, бых я́ко челове́к без по́мощи, в ме́ртвых свобо́дь, я́ко я́звеннии спя́щии во гро́бе, и́хже не помяну́л еси́ ктому́, и ти́и от руки́ Твоея́ отринове́ни бы́ша. Положи́ша мя в ро́ве преиспо́днем, в те́мных и се́ни сме́ртней. На мне утверди́ся я́рость Твоя́, и вся во́лны Твоя́ наве́л еси́ на мя. Уда́лил еси́ зна́емых мои́х от Мене́, положи́ша мя ме́рзость себе́: пре́дан бых и не исхожда́х. О́чи мои́ изнемого́сте от нищеты́, воззва́х к Тебе́, Го́споди, весь день, возде́х к Тебе́ ру́це мои́. Еда́ ме́ртвыми твори́ши чудеса́? Или́ вра́чеве воскреся́т, и испове́дятся Тебе́? Еда́ пове́сть кто во гро́бе ми́лость Твою́, и и́стину Твою́ в поги́бели? Еда́ позна́на бу́дут во тьме чудеса́ Твоя́, и пра́вда Твоя́ в земли́ забве́нней? И аз к Тебе́, Го́споди, воззва́х и у́тро моли́тва моя́ предвари́т Тя. Вску́ю, Го́споди, отре́еши ду́шу мою́, отвраща́еши лице́ Твое́ от Мене́? Нищ есмь аз, и в труде́х от ю́ности моея́; возне́с же ся, смири́хся, и изнемого́х. На мне преидо́ша гне́ви Твои́, устраше́ния Твоя́ возмути́ша мя, обыдо́ша мя я́ко вода́, весь день одержа́ша мя вку́пе. Уда́лил еси́ от Мене́ дру́га и и́скренняго, и зна́емых мои́х от страсте́й.

Го́споди Бо́же спасе́ния моего́, во дни воззва́х, и в нощи́ пред Тобо́ю. Да вни́дет пред Тя моли́тва моя́: приклони́ у́хо Твое́ к моле́нию моему́.

Псалом 102:

Благослови́, душе́ моя́, Го́спода, и вся вну́тренняя моя́ и́мя свя́тое Его́. Благослови́, душе́ моя́, Го́спода, и не забыва́й всех воздая́ний Его́, очища́ющаго вся беззако́ния твоя́, исцеля́ющаго вся неду́ги твоя́, избавля́ющаго от истле́ния живо́т твой, венча́ющаго тя ми́лостию и щедро́тами, исполня́ющаго во благи́х жела́ние твое́: обнови́тся я́ко о́рля ю́ность твоя́. Творя́й ми́лостыни Госпо́дь, и судьбу́ всем оби́димым. Сказа́ пути́ Своя́ Моисе́ови, сыново́м Изра́илевым хоте́ния Своя́: Щедр и Ми́лостив Госпо́дь, Долготерпели́в и Многоми́лостив. Не до конца́ прогне́вается, ниже́ во век вражду́ет, не по беззако́нием на́шым сотвори́л есть нам, ниже́ по грехо́м на́шым возда́л есть нам. Я́ко по высоте́ небе́сней от земли́, утверди́л есть Госпо́дь ми́лость Свою́ на боя́щихся Его́. Ели́ко отстоя́т восто́цы от за́пад, уда́лил есть от нас беззако́ния на́ша. Я́коже ще́дрит оте́ц сы́ны, уще́дри Госпо́дь боя́щихся Его́. Я́ко Той позна́ созда́ние на́ше, помяну́, я́ко персть есмы́. Челове́к, я́ко трава́ дни́е eго́, я́ко цвет се́льный, та́ко оцвете́т, я́ко дух про́йде в нем, и не бу́дет, и не позна́ет ктому́ ме́ста своего́. Ми́лость же Госпо́дня от ве́ка и до ве́ка на боя́щихся Его́, и пра́вда Его́ на сыне́х сыно́в, храня́щих заве́т Его́, и по́мнящих за́поведи Его́ твори́ти я́. Госпо́дь на Небеси́ угото́ва Престо́л Свой, и Ца́рство Его́ все́ми облада́ет. Благослови́те Го́спода вси А́нгели Его́, си́льнии кре́постию, творя́щии сло́во Его́, услы́шати глас слове́с Его́. Благослови́те Го́спода вся Си́лы Его́, слуги́ Его́, творя́щии во́лю Его́. Благослови́те Го́спода вся дела́ Его́, на вся́ком ме́сте влады́чества Его́, благослови́, душе́ моя́, Го́спода.

На вся́ком ме́сте влады́чества Его́, благослови́, душе́ моя́, Го́спода.

Псалом 142:

Го́споди, услы́ши моли́тву мою́, внуши́ моле́ние мое́ во и́стине Твое́й, услы́ши мя в пра́вде Твое́й и не вни́ди в суд с рабо́м Твои́м, я́ко не оправди́тся пред Тобо́ю всяк живы́й. Я́ко погна́ враг ду́шу мою́, смири́л есть в зе́млю живо́т мой, посади́л мя есть в те́мных, я́ко ме́ртвыя ве́ка. И уны́ во мне дух мой, во мне смяте́ся се́рдце мое́. Помяну́х дни дре́вния, поучи́хся во всех де́лех Твои́х, в творе́ниих руку́ Твое́ю поуча́хся. Возде́х к Тебе́ ру́це мои́, душа́ моя́, я́ко земля́ безво́дная Тебе́. Ско́ро услы́ши мя, Го́споди, исчезе́ дух мой, не отврати́ лица́ Твоего́ от Мене́, и уподо́блюся низходя́щым в ров. Слы́шану сотвори́ мне зау́тра ми́лость Твою́, я́ко на Тя упова́х. Скажи́ мне, Го́споди, путь во́ньже пойду́, я́ко к Тебе́ взях ду́шу мою́. Изми́ мя от враг мои́х, Го́споди, к Тебе́ прибего́х. Научи́ мя твори́ти во́лю Твою́, я́ко Ты еси́ Бог мой. Дух Твой Благи́й наста́вит мя на зе́млю пра́ву. И́мене Твоего́ ра́ди, Го́споди, живи́ши мя, пра́вдою Твое́ю изведе́ши от печа́ли ду́шу мою́. И ми́лостию Твое́ю потреби́ши враги́ моя́ и погуби́ши вся стужа́ющыя души́ мое́й, я́ко аз раб Твой есмь.

Услы́ши мя, Го́споди, в пра́вде Твое́й и не вни́ди в суд с рабо́м Твои́м.

Дух Твой Благи́й наста́вит мя на зе́млю пра́ву.

Сла́ва Отцу́ и Сы́ну и Свято́му Ду́ху, и ны́не и при́сно и во ве́ки веко́в. Ами́нь.

Аллилу́иа, аллилу́иа, аллилу́иа, сла́ва Тебе́ Бо́же. (Три́жды)

Тропа́рь глас 4:

Сла́ва Отцу́ и Сы́ну и Свято́му Ду́ху.

Тропа́рь глас 4:

Яко вели́ким па́стырем единонра́вна и учи́телем вселе́нныя единомы́сленна, Це́ркве Бо́жия служи́теля усе́рдна и строи́теля та́ин Христо́вых благогове́йна, сте́кшеся, благове́рнии лю́дие, Свия́жския оби́тели богому́драго основа́теля и Каза́нския новопросвеще́нныя па́ствы святи́теля Ге́рмана пе́сньми и пе́нии восхва́лим, глаго́люще: не преста́й присеща́ти моли́твами твои́ми на оби́тель и на всю́ па́ству твою́, и оби́тель во святы́ни, па́ству же в ве́ре и благоче́стии блюди́ невреди́мо.

И ны́не и при́сно и во ве́ки веко́в. Ами́нь.

Глас 4: Еже от ве́ка утае́нное, и Ангелом несве́домое та́инство: Тобо́ю, Богоро́дице, су́щим на земли́ яви́ся, Бо́г в несли́тном соедине́нии воплоща́емь, и кре́ст во́лею на́с ра́ди восприи́м, и́мже воскреси́в первозда́ннаго, спасе́ от сме́рти ду́ши на́ша.

Здесь читается кафизма, положенная по дню, или сразу седальны:

Го́споди, поми́луй. (Три́жды)

Седален, глас 4:

От ю́ности на́йде на тя́, присноблаже́нне, боже́ственное раче́ние: еще́ бо о́трок сы́й, па́че ме́ры и во́зраста в воздержа́нии и посте́ пребыва́л еси́. Отону́дуже роди́вшие тя́, дви́жими сердобо́лием, удержава́ху тя́, да не повреди́тся от по́стнаго изнуре́ния теле́сный соста́в тво́й. Ты́ же, непоколеби́мою стопо́ю идя́ стезе́ю воздержа́ния, взыва́л еси́ Христу́ Бо́гу: к Тебе́ приве́ржен е́смь от чре́ва ма́тере моея́, Ты́ еси́ мо́й Покрови́тель.

Сла́ва Отцу́ и Сы́ну и Свято́му Ду́ху. И ны́не и при́сно и во ве́ки веко́в. Ами́нь.

Глас 4: Младе́нствующи пло́тию и соверше́нна душе́ю, Святы́й Киво́т в до́м Бо́жий вхо́дит воспита́тися Боже́ственною благода́тию.

Седален, глас 4:

Егда́ тя́ и́ноки Ста́рицкия оби́тели моля́ху, да бу́деши началово́ждь оби́тели и блюсти́тель спасе́ния ду́ш и́х, ты́, богому́дре, глаго́лы смире́ния ре́кл еси́ и́м: а́ще и корми́ло корабе́льное неиску́сному не вверя́ется ко́рмчему, кольми́ па́че спасе́ние ду́ш неве́дущему духо́внаго пути́ наста́внику. Оба́че, я́ко искуше́нный в сло́ве и ра́зуме, единоду́шным моле́нием бра́тии воеприя́в корми́ло духо́вное и священноархимандри́т бы́в, яви́л еси́ в себе́ до́браго вождя́ и наста́вника ду́ш во спасе́ние.

Сла́ва Отцу́ и Сы́ну и Свято́му Ду́ху. И ны́не и при́сно и во ве́ки веко́в. Ами́нь.

Глас 2: Пло́ть очи́стив воздержа́нием, ду́х тво́й богомы́слием на высоту́ богоподо́бия возвы́сил еси́, и на́с, пленя́емых страстьми́, на е́же по подо́бию твои́ми моли́твами наста́ви и возведи́.

Полиеле́й:

Хвали́те И́мя Госпо́дне, хвали́те, раби́ Го́спода.

Аллилу́иа, аллилу́иа, аллилу́иа.

Благослове́н Госпо́дь от Сио́на, живы́й во Иерусали́ме.

Аллилу́иа, аллилу́иа, аллилу́иа.

Испове́дайтеся Го́сподеви, я́ко Благ, я́ко в век ми́лость Его́.

Аллилу́иа, аллилу́иа, аллилу́иа.

Испове́дайтеся Бо́гу Небе́сному, я́ко в век ми́лость Его́.

Аллилу́иа, аллилу́иа, аллилу́иа.

Велича́ние:

Велича́ем тя, / святи́телю о́тче Германе, / и чтим святу́ю па́мять твою́, / ты бо мо́лиши о нас // Христа́ Бо́га на́шего.

Сла́ва Отцу́ и Сы́ну и Свято́му Ду́ху и ны́не и при́сно и во ве́ки веко́в. Ами́нь.

Аллилу́иа, аллилу́иа, аллилу́иа,// сла́ва Тебе́, Бо́же. (Трижды)

Седа́льны:

Глас 8:

В моли́твенной ке́ллии твое́й, я́ко основа́тель оби́тели и во́ждь новонача́льно и́ночествующих, непреста́нныя приноси́л еси́, преподо́бне, со слеза́ми моли́твы Богома́тери: да благоволи́т новоустроя́емую оби́тель избра́ть в ме́сто святы́ни, и в не́й ли́к и́ночествующих, денноно́щно служа́ Бо́гу во спасе́ние свое́, и все́м приходя́щим, сло́вом и де́лом, спасе́ние Бо́га и Христа́ да возвеща́ет.

Глас 3: Сла́ва Отцу́ и Сы́ну и Свято́му Ду́ху и ны́не и при́сно и во ве́ки веко́в. Ами́нь.

Безневе́стная, Чи́стая Богоро́дице Де́во, еди́на ве́рных предста́тельство и покро́ве, бе́д, и скорбе́й, и лю́тых обстоя́ний все́х изба́ви, на Тя́ упова́ние, Отрокови́це, иму́щих, и ду́ши на́ша спаси́ боже́ственными Твои́ми моли́твами.

Степе́нна, глас 4:

От ю́ности моея́/ мно́зи бо́рют мя стра́сти,/ но Сам мя заступи́// и спаси́, Спа́се мой.

Ненави́дящии Сио́на,/ посрами́теся от Го́спода,/ я́ко трава́ бо огне́м// бу́дете изсо́хше.

Сла́ва Отцу́ и Сы́ну и Свято́му Ду́ху и ны́не и при́сно и во ве́ки веко́в. Ами́нь.

Святы́м Ду́хом/ вся́ка душа́ живи́тся,/ и чистото́ю возвыша́ется,// светле́ется Тро́йческим еди́нством, священнота́йне.

Го́споди, поми́луй. (Три́жды)

От Иоа́нна Свята́го Ева́нгелия чте́ние

Сла́ва, Тебе́, Го́споди, сла́ва Тебе́.

Рече́ Госпо́дь ко прише́дшым к Нему́ иуде́ем: Аз есмь дверь, Мно́ю а́ще кто вни́дет, спасе́тся, и вни́дет, и изы́дет, и па́жить обря́щет. Тать не прихо́дит, ра́зве да укра́дет, и убие́т, и погуби́т, Аз приидо́х, да живо́т и́мут и ли́шше и́мут. Аз есмь па́стырь до́брый, па́стырь до́брый ду́шу свою́ полага́ет за о́вцы. А нае́мник, и́же несть па́стырь, ему́же не суть о́вцы своя́, ви́дит во́лка гряду́ща и оставля́ет о́вцы, и бе́гает, и волк расхи́тит их, и распу́дит о́вцы. А нае́мник бежи́т, я́ко нае́мник есть и неради́т о овца́х. Аз есмь па́стырь до́брый, и зна́ю Моя́, и зна́ют Мя Моя́. Я́коже зна́ет Мя Оте́ц, и Аз зна́ю Отца́, и ду́шу Мою́ полага́ю за о́вцы. И и́ны о́вцы и́мам, я́же не суть от двора́ сего́, и ты́я Ми подоба́ет привести́, и глас Мой услы́шат, и бу́дет еди́но ста́до, и еди́н Па́стырь.

Псало́м 50:

Поми́луй мя, Бо́же, по вели́цей ми́лости Твое́й, и по мно́жеству щедро́т Твои́х очи́сти беззако́ние мое́. Наипа́че омы́й мя от беззако́ния моего́, и от греха́ моего́ очи́сти мя. Я́ко беззако́ние мое́ аз зна́ю и грех мой предо мно́ю есть вы́ну. Тебе́ Еди́ному согреши́х, и лука́вое пред Тобо́ю сотвори́х, я́ко да оправди́шися во словесе́х Твои́х и победи́ши, внегда́ суди́ти Ти. Се бо в беззако́ниих зача́т есмь, и во гресе́х роди́ мя ма́ти моя́. Се бо и́стину возлюби́л еси́, безве́стная и та́йная прему́дрости Твоея́ яви́л ми еси́. Окропи́ши мя иссо́пом, и очи́щуся, омы́еши мя, и па́че сне́га убелю́ся. Слу́ху моему́ да́си ра́дость и весе́лие, возра́дуются ко́сти смире́нныя. Отврати́ лице́ Твое́ от грех мои́х, и вся беззако́ния моя́ очи́сти. Се́рдце чи́сто сози́жди во мне, Бо́же, и дух прав обнови́ во утро́бе мое́й. Не отве́ржи мене́ от лица́ Твоего́, и Ду́ха Твоего́ Свята́го не отыми́ от мене́. Возда́ждь ми ра́дость спасе́ния Твоего́, и Ду́хом Влады́чним утверди́ мя. Научу́ беззако́нныя путе́м Твои́м, и нечести́вии к Тебе́ обратя́тся. Изба́ви мя от крове́й, Бо́же, Бо́же спасе́ния моего́, возра́дуется язы́к мой пра́вде Твое́й. Го́споди, устне́ мои́ отве́рзеши, и уста́ моя́ возвестя́т хвалу́ Твою́. Я́ко а́ще бы восхоте́л еси́ же́ртвы, дал бых у́бо, всесожже́ния не благоволи́ши. Же́ртва Бо́гу дух сокруше́н, се́рдце сокруше́нно и смире́нно Бог не уничижи́т. Ублажи́, Го́споди, благоволе́нием Твои́м Сио́на, и да сози́ждутся сте́ны Иерусали́мския, тогда́ благоволи́ши же́ртву пра́вды, возноше́ние и всесожега́емая: тогда́ возложа́т на олта́рь Твой тельцы́.

Глас 6:

Сла́ва Отцу́ и Сы́ну и Свято́му Ду́ху./ Моли́твами святителя Германа, / Ми́лостиве, очи́сти / мно́жества согреше́ний на́ших.

И ны́не и при́сно и во ве́ки веко́в. Ами́нь./ Моли́твами Богоро́дицы, / Ми́лостиве, очи́сти / мно́жества согреше́ний на́ших.

Поми́луй мя, Бо́же,/ по вели́цей ми́лости Твое́й,/ и по мно́жеству щедро́т Твои́х// очи́сти беззако́ние мое́.

Стихи́ра, глас 6

Челове́че Бо́жий, ве́рный ра́бе и слуго́ Госпо́день, сосу́де избра́нный, сто́лпе и утвержде́ние Це́ркве, Ца́рствия насле́дниче, не премолчи́, за ны́ вопия́ ко Го́споду.

Го́споди, поми́луй. (12 раз)

Кано́ны святи́телю, 8 гла́са.

Пе́снь 1.

Ирмос: Мо́ре огусти́л еси́, погрузи́вый со ору́жием го́рдаго фарао́на, и лю́ди спа́сл еси́ немо́кренно, Го́споди, и вве́л еси́ я́ в го́ру святы́ни, вопию́щия: пои́м Тебе́, Бо́гу на́шему, пе́снь побе́дную, я́ко просла́вися.

Иису́су: Иису́се, прославля́ющий святы́х Твои́х, озари́ потемне́нную мы́сль и омраче́нное на́ше чу́вство, да возвести́м хвалы́ святи́телю Твоему́ и, восхваля́я его́, восхва́лим Тя́, ди́внаго во святы́х.

Припе́в: Святителю отче Германе, моли́ Бо́га о на́с.

Боже́ственная благода́ть избра́ тя́, святи́телю, да пока́жеши си́лу ея́ в очище́нии прирожде́нной все́м сына́м Ада́млимь не́мощи естества́ и в благода́тней чистоте́ да послу́жиши ро́ду твоему́ во сла́ву Христа́ и спасе́ние ду́ш.

Простра́нный пу́ть мирска́го жития́ оста́вив, с отъя́тием власо́в земно́е пристра́стие отсе́кл еси́, и, к го́рнему у́м и се́рдце твое́ устреми́в, де́лы глаго́лал еси́: Госпо́дь — кре́пость и упова́ние мое́.

Еди́ному Бо́гу всего́ себе́ возложи́в, Тому́ во дни́ и в нощи́ рабо́тал еси́, служа́ посто́м, всено́щным в моли́тве стоя́нием и вся́ким ско́рбным самолише́нием, зовя́ в кре́пости ду́ха: Госпо́дь — утеше́ние мое́.

Сла́ва: Всеору́жием Креста́ низложи́в мы́сленных, вою́ющих на ду́шу враго́в, в благооти́шие безстра́стия дости́гл еси́ и, побе́дныя от вседе́тельныя руки́ восприя́в по́чести, спобо́рствуй и на́м изба́витися от плене́ния грехо́внаго и в приста́нище спасе́ния дости́гнути.

И ны́не, богоро́дичен: Ви́дящи не́мощь мою́ теле́сную, смуще́ние душе́вное и озлобле́ние серде́чное, посеще́ния сподо́би Боже́ственнаго, Всенепоро́чная Де́во, и спаси́ мя́ моли́твами Твои́ми.

Пе́снь 3.

Ирмос: Утверди́ся се́рдце мое́ во Го́споде, вознесе́ся ро́г мо́й в Бо́зе мое́м, разшири́шася на враги́ моя́ уста́ моя́, возвесели́хся о спасе́нии Твое́м.

Нощны́ми моли́твами и глубо́ким утренева́нием по любви́ ко Го́споду умертви́л еси́ пло́ти мудрова́ние. И ны́не из до́льних в небе́сныя возше́д оби́тели, не преста́й моли́тися о на́с, среди́ мирски́я ле́сти бре́нныя жи́зни пу́ть преходя́щих.

Мы́слию благоразсу́дною и жела́нием очище́нным преподо́бных жи́тельству ревнова́л еси́, сего́ ра́ди с благоугоди́вшими, преподо́бне, Го́споду насле́довал еси́ нетле́ние и жи́знь несконча́емую.

В челове́ческом естестве́ невеще́ственных жи́тельству от всея́ души́ твоея́ тща́лся еси́ подража́ти, отоню́дуже с невеще́ственными ли́ки сподо́бился еси́ престо́лу Бо́жию предстоя́ти.

Дви́жимый ре́вностию ду́ха, вели́ки по́двиги на земли́ соверши́л еси́, свя́те: небла́зненно бо протека́я пу́ть спасе́ния, ты́, в тве́рдости душе́вней, а́ки адама́нт, вся́ земна́я нивочто́же вмени́в, еди́наго Христа́ приобрести́ тща́лся еси́.

Сла́ва: Низложи́л еси́ ополче́ния мы́сленных враго́в кре́пким твои́м воздержа́нием и непристу́пен яви́лся еси́ и́м чистото́ю ду́ха; моли́твами твои́ми отжени́ от на́с мра́чное злы́х духо́в нахожде́ние.

И ны́не, богоро́дичен: Очи́сти, Чи́стая, нечи́стую ду́шу мою́ от мно́жества прегреше́ний, во глубину́ поги́бели попо́лзшуюся, и в ча́с сме́ртный огради́ мя от оглаго́лания де́монов и осужде́ния изба́ви.

Конда́к, гла́с 4:

Бо́дрствуя в моли́твах, послуша́ния до́брый рачи́тель бы́в, в терпе́нии стяжа́л еси́ ду́шу твою́, де́лы смиренному́дрия и кро́тости изря́дствуя, престо́л святи́тельства благове́рием и благоче́стием украси́л еси́, о́тче священнонача́льниче Ге́рмане, моли́ Христа́ Бо́га о оби́тели и о все́м ста́де твое́м, я́ко па́ствы твоея́ утвержде́ние и су́щим по тебе́ святи́телем све́тлое украше́ние.

Седа́лен, гла́с 7:

Благознамени́т пу́ть восхожде́ния твоего́, блаже́нне: из глубо́каго бо смире́нной и́ноческой жи́зни послуша́ния моле́нием Ста́рицкой бра́тии воззва́н бы́л еси́ к нача́льствованию. Возврати́вся же на пре́жний поко́й по любви́ к душе́вному поко́ю, па́ки из о́наго предержа́щим гла́сом воззва́н бы́л еси́ в новопросвеще́нную Каза́нскую па́ству для устрое́ния вели́кой оби́тели, от оби́тельнаго же благоустрое́ния воззва́н еси́ на престо́л святи́тельскаго благоуправле́ния. Упра́ви, святи́телю, и на́м полага́ти восхожде́ние в се́рдце по степене́м исправле́ния жи́зни и де́л.

Сла́ва, гла́с 4:

Во́ждь бы́в, преподо́бне, взыску́ющим спасе́ния своего́ путе́м жи́зни и́ноческой в чистоте́, послуша́нии и нестяжа́тельности, те́м предше́ствовал еси́ де́йственным приме́ром твои́м в сле́д Началовождя́ спасе́ния, путе́м креста́ и самоотверже́ния.

И ны́не, богоро́дичен, гла́с то́йже:

Вели́ких дарова́ний, Де́во Богома́ти, Ты́ сподо́билася еси́, я́ко родила́ еси́ пло́тию Еди́наго от Тро́ицы, Христа́ Жизнода́вца, во спасе́ние ду́ш на́ших.

Пе́снь 4.

Ирмос: Проро́к Авваку́м у́мныма очи́ма прови́де, Го́споди, прише́ствие Твое́, те́м и вопия́ше: от ю́га прии́дет Бо́г. Сла́ва си́ле Твое́й, сла́ва снизхожде́нию Твоему́!

Не да́л еси́ сна́ очесе́м твои́м и ве́ждом дрема́ния, до́ндеже де́нь благода́ти озари́ твое́ се́рдце и боговмести́мым соде́ла селе́нием Тро́ицы, Ейже предстоя́, спаса́й гра́д и оби́тель твою́.

Зва́ния небе́снаго прича́стник бы́в, нача́ток соста́ва ве́ры соблю́л и си́лы гряду́щаго ве́ка возвести́л еси́ лю́дем. И ны́не восхваля́ющих ве́рою твоя́ по́двиги просвеща́й повеле́ньми Влады́ки вся́ческих и сотвори́ досто́йны бы́ти насле́дия небе́снаго.

Труда́ми неосла́бными, а́лчбою и жа́ждою и всено́щным в моли́тве стоя́нием удруча́л еси́ пло́ть твою́, святи́телю, и ны́не преми́рно упокоева́ешися.

Ми́рно протека́л еси́, о́тче, пу́ть жи́зни твое́й стезе́ю и́ноческою, явля́я в себе́ о́браз смире́ния и уничиже́ния. Те́мже Призира́ющий на смире́нныя вознесе́ тя́ и в жи́зни вре́менней, и по кончи́не твое́й.

Сла́ва, Иису́су: Чи́ни Ангельстии ужасо́шася ди́вному снизхожде́нию Твоему́, Сло́ве Бо́жий, зря́ще Тя́, Творца́ своего́, до ра́бия зра́ка снизше́дша. С ни́ми же и мы́, пе́рстнии, благода́рственно взыва́ем: сла́ва смотре́нию Твоему́, Человеколю́бче!

И ны́не, богоро́дичен: Простира́ю ру́це, и преклоня́ю коле́на се́рдца, и припа́даю к Тебе́, Пречи́стая: воздви́гни мя́ с одра́ ле́ности, я́ко да отря́сши грехо́вное разслабле́ние, воспою́ благода́ть Твою́.

Пе́снь 5

Ирмос: Го́споди Бо́же на́ш, ми́р да́ждь на́м, Го́споди Бо́же на́ш, стяжи́ ны, Го́споди, ра́зве Тебе́, ино́го не ве́мы, и́мя Твое́ имену́ем.

Оби́тель зи́ждяй в благооти́шное приста́нище взыску́ющих Бо́га, в отреше́нии от жите́йских попече́ний, ты́, блаже́нне, вку́пе и са́м себе́ денноно́щно созида́л духо́вным трезве́нием и боже́ственным раче́нием, во оби́тель Обетова́вшему приити́ со Отце́м Свои́м к лю́бящему и оби́тель в не́м сотвори́ти.

Созда́в хра́м в сла́ву и во успе́нии Свое́м на́с не Оставля́ющей, самаго́ себе́ чистото́ю тща́лся еси́ созида́ти в хра́м Ду́ху Свято́му, я́ко да и в веще́ственном и духо́вном хра́ме в ду́хе и и́стине соверша́ем благоприя́тное служе́ние Го́споду.

Огражда́я созида́емую тобо́ю оби́тель веще́ственным огражде́нием, огражда́л еси́ ю́ па́че бде́нными моли́твами, отража́я и собла́зны ви́димые и наве́ты духо́в неви́димых от духо́вных ча́д твои́х.

Науча́л еси́ преда́вшихся духо́вному води́тельству твоему́ и сло́вом Христо́вым, да ки́йждо взе́мши кре́ст сво́й, для благода́тнаго врачева́ния боле́зней и неду́гов естества́, в бо́дрости ду́ха ше́ствует в сле́д Подвигополо́жника, па́че же науча́л еси́ приме́ром христоподража́тельной жи́зни, явля́я всего́ до́браго и богоуго́днаго о́браз в само́м себе́.

Сла́ва, Иису́су: Овча́ е́смь Твоего́ ста́да, Спа́се, лежу́ пред врата́ми двора́ Твоего́, боле́зньми разсла́блен; я́ко Па́стырь До́брый, стру́пы моя́ обяжи́, гно́йныя ра́ны очи́сти и воздви́гни мя́ к пра́вому хожде́нию путе́м за́поведей предста́тельством святи́теля Твоего́.

И ны́не, богоро́дичен: На́м, лю́бящим тя́, святи́телю, и любо́вию почита́ющим, и в хра́ме Пречи́стыя, тобо́ю созда́нном, лику́ющим, испроси́ моли́твами Ея́ исправле́ние, и прегреше́ний проще́ние.

Пе́снь 6.

Ирмос: Яко во́ды морски́я, Человеколю́бче, волна́ми жите́йскими обурева́юся. Те́мже, я́ко Ио́на, та́ко вопию́ Ти: возведи́ от тли́ живо́т мо́й, Благоутро́бне Го́споди.

По святи́теле Гу́рии па́стыря тя́ и вождя́ Христо́с поста́ви Каза́нстей па́стве, его́же досто́йным прее́мником явля́я себе́ де́лы и словесы́, и жи́знь твою́ в такове́м же по́двизе ве́ры и преподо́бия сконча́л еси́. Вку́пе предстоя́ с ни́м престо́лу Святы́я Тро́ицы, моли́ непреста́нно о все́х на́с.

Якоже по чу́дном богови́дце Моисе́е ди́внаго дарова́ вождя́ лю́дем Свои́м Бо́г — Иису́са Нави́на, та́ко по первопресто́льнике Гу́рии новопросвеще́нному гра́ду Каза́ни яви́ тя́ Христо́с па́стыря ве́рна, и́же, церко́вная прие́м корми́ла и к трудо́м труды́ прилага́я, дея́нием и ра́зумом все́х ко Христу́ приводи́ти тща́лся еси́.

Ца́рским путе́м зако́на Христо́ва неукло́нно ше́ствовав, святи́телю, те́м же путе́м руководи́л еси́ ко спасе́нию не то́чию ча́д Правосла́вия, но и ага́рянский ро́д из мра́ка магомета́нства к све́ту Христо́ву приводи́л еси́, возводя́ из заблужде́ния в ве́ру спаси́тельную.

Яко свети́ло мы́сленное, просвеща́я луча́ми добро́т твои́х Каза́нскую па́ству и су́щия в не́й христоимени́тыя лю́ди в позна́нии Христа́, моли́, святи́телю, все́м во све́те Христо́вом узре́ти све́т спасе́ния.

Сла́ва, Иису́су: Ви́ждь души́ моея́, Спа́се, обурева́ние грехо́вное! Му́тныя пото́ки беззако́ний, наводни́в все́ существо́ мое́, внидо́ша да́же до потопле́ния ду́ха моего́, но я́ко повелева́яй ве́тром и мо́рю, к благооти́шному приста́нищу укроще́ния страсте́й мои́х моли́твами уго́дника Твоего́ упра́ви мя́.

И ны́не, богоро́дичен: Проро́цы Тя́ я́сно провозвести́ша, Отрокови́це, Ма́терь Бо́жию апо́столи в ми́ре пропове́даша, му́ченицы испове́даша, святи́телие просла́виша, и мы́ вси́ Богоро́дицу Тя́ вои́стинну велича́ем.

Конда́к, гла́с 4:

До́блестями преподо́бия и пра́вды вруче́нное тебе́ слове́сное ста́до озаря́я и на зла́чных сло́ва Христо́ва па́житях пита́я, на пра́вый пу́ть за́поведей Госпо́дних си́лою ду́ха твоего́ наставля́л еси́ е́. Те́мже и ны́не, осеня́емое цельбоно́сными чудотворе́нии твои́ми, в святу́ю па́мять твою́, зове́м тебе́: не преста́й, святи́телю, предста́тельствовати пред Пастыренача́льником о ста́де твое́м, я́ко па́ствы твоея́ утвержде́ние и су́щим по тебе́ святи́телем удобре́ние.

Икос:

Пе́ние, приноси́мое тебе́ благогове́йною мы́слию, благосе́рдно приими́ от на́с, святи́телю, си́це кра́сныя следы́ жи́зни твое́й, а́ще и недосто́йно, хвала́ми зна́менающих: ра́дуйся, пра́ведных роди́телей честно́е прозябе́ние, и Волокола́мския оби́тели в и́ноческих по́двигах воспита́ние, и в ме́ру му́жа возраще́ние; ра́дуйся, в Ста́рицкой оби́тели положи́вый восхожде́ние к священнонача́лию и в гра́де Свия́жске благоле́пныя оби́тели основа́телю; ра́дуйся, первосвяти́телю Каза́нския па́ствы, Гу́рию досто́йный прее́мниче; ра́дуйся, оби́тели твоея́ сла́во, гра́да Свия́жска огражде́ние, па́ствы твоея́ благоле́пие и су́щим по тебе́ святи́телем хвала́ и изря́дное удобре́ние.

Пе́снь 7.

Ирмос: Халде́йская пе́щь, огне́м распала́емая, ороша́шеся Ду́хом, Бо́жиим предстоя́нием, о́троцы поя́ху: благослове́н еси́, Бо́же оте́ц на́ших.

Возлия́ся вода́ искуше́ния до души́ твоея́, и бу́ря гне́ва и гоне́ния возшуме́ о́крест тебе́, святи́телю, егда́ благоду́шно ре́кл еси́ сло́во и́стины пред царе́м, оба́че пребы́л еси́ непоколеби́м, апо́стольским сло́вом утвержда́я себе́: я́ко Бо́гу подоба́ет повинова́тися па́че, не́жели челове́ком в и́стине.

Небоя́зненно уста́ твоя́ отве́рзл еси́ в защи́ту непови́нности и правоты́ святи́теля Фили́ппа; а́ще же и не возмо́гл еси́ загради́ти бездве́рная уста́ зло́бы, оба́че, яви́в кре́пость в безтре́петном оправда́нии му́жа пра́веднаго, оста́вил еси́ веко́м приме́р свято́й ре́вности, с каково́ю глаго́лал еси́ и́стину пред царе́м Гро́зным.

Прича́стник бы́в, блаже́нне, скорбе́й мяте́жной жи́зни, я́ко са́м искуси́выйся, и на́с, искуша́емых, изба́ви ско́рбнаго обстоя́ния моли́твами твои́ми.

Тве́рд в пра́вде и и́стине бы́л еси́, святи́телю, не убоя́вся гне́ва царе́ва, неустраши́мо веща́л еси́ сло́во во оправда́ние святи́теля Фили́ппа. С ни́м предстоя́ Подвигополо́жнику в чи́не свиде́телей и́стины, моли́ся, да не отпаде́м в ско́рби от и́стины.

Сла́ва, Тро́ице: Непостижи́мая Прему́дросте, неизсле́димая бла́госте, вседержа́вное могу́щество и вседе́тельное смотре́ние, Самосу́щная Светонача́льная Тро́ице, рабо́в Твои́х пе́ние приими́, вопию́щих: благослове́н еси́, Бо́же оте́ц на́ших.

И ны́не, богоро́дичен: Ско́рый Тво́й покро́в, и по́мощь, и ми́лость покажи́ на рабе́х Твои́х, и во́лны, Чи́стая, укроти́ су́етных помышле́ний, и па́дших на́с воздви́гни, Богоро́дице: ве́мы бо, ве́мы, Де́во, я́ко мо́жеши, ели́ка хо́щеши.

Пе́снь 8.

Ирмос: Ангели и небеса́, на Престо́ле сла́вы седя́щаго, и я́ко Бо́га непреста́нно сла́вимаго, благослови́те, по́йте, и превозноси́те Его́ во ве́ки.

Оправда́ния ри́зу соблю́д све́тлу, во све́тлости святы́я вше́л еси́ и венце́м нетле́ния венча́лся еси́; неле́пый зра́к прегреше́ний богоуго́дным хода́тайством твои́м совлецы́ с ве́тхаго на́шего челове́ка и чи́стыми покая́ния оде́ждами облеки́ но́ваго, я́ко облече́нный нетле́нною сла́вою но́ваго челове́ка и сия́ющий на небесе́х преподо́бнем и пра́вдою.

Свы́ше небе́сным предста́тельством до́лу цельбо́носным благоуха́нием моще́й твои́х озаря́я к о́ным притека́ющих, низпосли́, святи́телю, по коего́ждо потре́бе благо́е и поле́зное.

Украси́в жи́знь твою́ непоро́чностию и святи́тельский престо́л до́блестями па́стырства о Христе́, предстоя́ престо́лу Архиере́я, проше́дшаго небеса́, моли́ся о исполне́нии проше́ний предстоя́щих о́крест ра́ки твоея́.

Ве́дуще тя́, святи́телю, пода́теля исцеле́ний, к тебе́ возно́сим моли́твенный гла́с: уврачу́й многоле́тныя стра́сти ду́ш на́ших и от стре́л вра́жиих неврежде́нных сохрани́ под кро́в тво́й прибега́ющих, утвержда́я на ка́мени Боже́ственных за́поведей.

Сла́ва, Иису́су: Исто́чниче бла́гости и прему́дрости сокро́вище, Иису́се, яви́л еси́ от земны́х не́др нетле́нныя мо́щи Твоего́ уго́дника, моли́твами его́ исцели́ душе́вныя на́ши не́мощи по вели́цей Твое́й ми́лости.

И ны́не, богоро́дичен: Нетле́нная Де́во и Ма́ти, на́с, тле́ющих в по́хотех преле́стных, от ле́сти тли́теля ра́зумов и серде́ц сохрани́ и стезе́ю новотворя́щаго покая́ния к нетле́нию душе́вному упра́ви.

На 9-й песни поем песнь Пресвятыя Богородицы:

Вели́чит душа́ Моя́ Го́спода и возра́довася дух Мой о Бо́зе Спа́се Мое́м.

К коемуждо стиху припеваем: Честне́йшую Херуви́м / и сла́внейшую без сравне́ния Серафи́м, / без истле́ния Бо́га Сло́ва ро́ждшую, / су́щую Богоро́дицу, Тя велича́ем.

Я́ко призре́ на смире́ние рабы́ Своея́, се бо, от ны́не ублажа́т Мя вси ро́ди.

Честне́йшую Херуви́м / и сла́внейшую без сравне́ния Серафи́м, / без истле́ния Бо́га Сло́ва ро́ждшую, / су́щую Богоро́дицу, Тя велича́ем.

Я́ко сотвори́ Мне вели́чие Си́льный, и свя́то и́мя Его́, и ми́лость Его́ в ро́ды родо́в боя́щимся Его́.

Сотвори́ держа́ву мы́шцею Свое́ю, расточи́ го́рдыя мы́слию се́рдца их.

Низложи́ си́льныя со престо́л, и вознесе́ смире́нныя, а́лчущия испо́лни благ, и богатя́щияся отпусти́ тщи.

Восприя́т Изра́иля о́трока Своего́, помяну́ти ми́лости, я́коже глаго́ла ко отце́м на́шим, Авраа́му и се́мени его́ да́же до ве́ка.

Песнь 9

Ирмос: Чу́жде ма́терем де́вство, и стра́нно де́вам деторожде́ние, на Тебе́, Богоро́дице, обоя́ устро́ишася. Те́м Тя́, вся́ племена́ земна́я, непреста́нно велича́ем.

Пра́ведно и благоче́стно пожи́в на земли́, в го́рних ны́не живе́ши оби́телех и, созерца́я Сла́ву Бо́жию, моли́ся о на́с, прегреше́ниями лише́нных Сла́вы Бо́жией.

В земно́й жи́зни сохрани́в душе́вную и теле́сную чистоту́, облече́нный благода́тию в све́тлость ея́, предстои́ши ны́не со Ангелы Пресвяте́й Тро́ице: Ейже не преста́й вопи́ти о проще́нии и очище́нии свы́ше грехо́в на́ших и измове́нии о́ных и́стинным на́шим покая́нием.

Пра́востию де́л, я́ко оде́ждою многоце́нною, оде́явся, живо́ю ве́рою и любо́вию, я́ко пресве́тлым венце́м, венча́лся еси́, святи́телю. Те́мже, в благоле́пии чистоты́ предстоя́ Спа́су все́х, моли́ся, да не яви́мся на суде́ Его́ бездерзнове́нны, на́ги и покры́ты студо́м осужде́ния.

Па́ству и оби́тель твою́ огражда́й твои́ми моли́твами, я́ко тве́рдыми забра́лы, от вра́жеских наве́тов и обстоя́ний, взыва́я Христу́: я́же да́л ми́ еси́, сохрани́, да превозно́сят Тя́ во вся́ ве́ки.

Сла́ва, Тро́ице: Отче Небе́сный — Трисия́ннаго Божества́ исто́чное нача́ло, Сы́не Бо́жий — Ипоста́сное зижди́тельное Сло́во Отчее, Ду́ше Святы́й — из Существа́ Того́жде Безнача́льнаго Све́та Отца́ ве́чно исходя́щий и все́ освяща́ющий; Тро́ице Свята́я, поми́луй, спаси́ и соблюди́ на́с, на Тя́ всю́ наде́жду жи́зни и спасе́ния возлага́ющих.

И ны́не, богоро́дичен: Умири́, Христе́, тезоимени́тое Твое́ жи́тельство мольба́ми Пречи́стыя Ма́тере Твоея́, низлага́я сопроти́вных си́лу, храни́ непоколеби́мо Це́рковь и Правосла́вие, да, утвержда́яся уста́ми и се́рдцем во благоче́стии, прославля́ем Тя́ со Отце́м и Пресвяты́м Ду́хом Твои́м во ве́ки.

Свети́лен, гла́с 4:

Во святи́телех благоче́стно пожи́в, лю́ди к богоразу́мию наста́вил еси́ и, до́бре Бо́гу угоди́в, от Него́ нетле́нием и чудесы́ просла́влен еси́. Сего́ ра́ди, святи́телю, мо́лим тя́: не забу́ди гра́д се́й, его́же возлюби́л еси́, и оби́тель твою́, в не́йже те́ло твое́ предложи́л еси́, и моли́ Просла́вившаго тя́ непреста́нно о все́х на́с.

Сла́ва, И ны́не, богоро́дичен:

Влады́чице небесе́ и земли́, иму́щая дерзнове́ние моли́тися о все́м ми́ре и о все́х, притека́ющих под благооти́шный кро́в Тво́й, моли́ со святи́телем Ге́рманом неизглаго́ланно Вопло́щшагося от Тебе́ милосе́рдия ра́ди, да прии́мет в сла́ву и́мени Своего́ ску́дную пе́снь на́шу и низпо́слет на́м благода́ть досто́йно пе́ти и моли́тися Ему́, Ди́вному во святы́х.

Хвали́тны псалмы́, глас 5:

Вся́кое дыха́ние да хва́лит Го́спода./ Хвали́те Го́спода с небе́с,/ хвали́те Его́ в вы́шних.// Тебе́ подоба́ет песнь Бо́гу.

Хвали́те Его́ вси а́нгели Его́,/ хвали́те Его́ вся си́лы Его́.// Тебе́ подоба́ет песнь Бо́гу.

Сти́хиры, глас 5:

Стих: Сотвори́ти в них суд напи́сан/ сла́ва сия́ бу́дет всем преподо́бным Его́.

Образ, святи́телю, бы́л еси́ ве́рным, серде́чною пра́востию и жития́ смиренному́дрием, и́миже, я́ко крила́ми ле́гкими, к высоте́ небе́снаго блаже́нства возлете́в, престо́лу Сла́вы предстои́ши, предста́тельствуй о соверша́ющих ве́рою и любо́вию па́мять твою́.

Стих: Хвали́те Его́ на си́лах Его́,/ хвали́те Его́ по мно́жеству вели́чествия Его́.

Стих: Хвали́те Его́ в тимпа́не и ли́це,/ хвали́те Его́ во стру́нах и орга́не.

Жезло́м святи́тельства ста́до твое́ упа́сл еси́ на зла́чных па́житях за́поведей Христо́вых и благоче́стия пропове́данием освети́л еси́ Це́рковь па́ствы твоея́, я́же стяжа́вши от не́др земны́х бога́тство неиждива́емое, сокро́вище, благоуха́ния Боже́ственнаго испо́лненное — нетле́нныя мо́щи твоя́, взыва́ет на́ми: моли́, святи́телю, Человеколю́бца Бо́га непреста́нно о все́х на́с.

Глас 6 Стих: Хвали́те Его́ в кимва́лех доброгла́сных, хвали́те Его́ в кимва́лех восклица́ния. / Вся́кое дыха́ние да хва́лит Го́спода.

Приими́, святи́телю, на́ше пе́сненное хвале́ние и вонми́ смире́нной моли́тве на́шей, я́ко ве́рный хода́тай и те́плый моли́твенник за ны́ Христу́ Бо́гу, Его́же соде́лай ми́лостива, да проше́ния на́ша тобо́ю испо́лнит во бла́го и спасе́ние ду́ш на́ших.

Глас 2: Сла́ва Отцу́ и Сы́ну и Свято́му Ду́ху

Хра́м всече́стен Бо́жией Ма́тери воздви́гл еси́, да под кро́вом Ея́ сози́ждеши себе́ и ча́д оби́тели твоея́ во спасе́ние. Ейже моли́ся, святи́телю, да благода́тию Го́спода и мы́ сози́ждемся в хра́м Бо́жий и в жили́ще Ду́ха Свята́го.

Глас 3: И ны́не и при́сно и во ве́ки веко́в. Ами́нь.

Приими́ от на́с пе́снь исхо́дную, Ма́ти жива́го Бо́га, и светоно́сною Твое́ю и Боже́ственною осени́ благода́тию, христолюби́вым лю́дем — ми́р, укрепле́ние — пою́щим и душа́м спасе́ние подаю́щи.

Славосло́вие вели́кое:

Сла́ва в вы́шних Бо́гу, и на земли́ мир, в челове́цех благоволе́ние. Хва́лим Тя, благослови́м Тя, кла́няем Ти ся, славосло́вим Тя, благодари́м Тя, вели́кия ра́ди сла́вы Твоея́. Го́споди Царю́ Небе́сный, Бо́же О́тче Вседержи́телю, Го́споди, Сы́не Единоро́дный, Иису́се Христе́, и Святы́й Ду́ше. Го́споди Бо́же, А́гнче Бо́жий, Сы́не Оте́чь, взе́мляй грех ми́ра, поми́луй нас; взе́мляй грехи́ ми́ра, приими́ моли́тву на́шу; седя́й одесну́ю Отца́, поми́луй нас. Я́ко Ты еси́ еди́н Свят, Ты еси́ еди́н Госпо́дь, Иису́с Христо́с, в сла́ву Бо́га Отца́. Ами́нь.

На всяк день благословлю́ Тя, и восхвалю́ И́мя Твое́ во ве́ки, и в век ве́ка.

Сподо́би, Го́споди, в день сей без греха́ сохрани́тися нам. Благослове́н еси́, Го́споди, Бо́же оте́ц на́ших, и хва́льно и просла́влено И́мя Твое́ во ве́ки. Ами́нь.

Бу́ди, Го́споди, ми́лость Твоя́ на нас, я́коже упова́хом на Тя.

Благослове́н еси́, Го́споди, научи́ мя оправда́нием Твои́м. (Три́жды)

Го́споди, прибе́жище был еси́ нам в род и род. Аз рех: Го́споди, поми́луй мя, исцели́ ду́шу мою́, я́ко согреши́х Тебе́. Го́споди, к Тебе́ прибего́х, научи́ мя твори́ти во́лю Твою́, я́ко Ты еси́ Бог мой: я́ко у Тебе́ исто́чник живота́, во све́те Твое́м у́зрим свет. Проба́ви ми́лость Твою́ ве́дущим Тя.

Святы́й Бо́же, Святы́й Кре́пкий, Святы́й Безсме́ртный, поми́луй нас. (Три́жды)

Сла́ва Отцу́ и Сы́ну и Свято́му Ду́ху и ны́не и при́сно и во ве́ки веко́в. Ами́нь.

Святы́й Безсме́ртный, поми́луй нас.

Святы́й Бо́же, Святы́й Кре́пкий, Святы́й Безсме́ртный, поми́луй нас.

Тропа́рь, глас 4:

Утверди́, Бо́же, святу́ю правосла́вную ве́ру, правосла́вных христиа́н во век ве́ка.

Честне́йшую Херуви́м и Сла́внейшую без сравне́ния Серафи́м, без истле́ния Бо́га Сло́ва ро́ждшую, су́щую Богоро́дицу, Тя велича́ем.

Сла́ва, и ны́не. Го́споди, поми́луй. (Три́жды) Благослови́.

Господи Иисусе Христе, Сыне Божий, моли́твами Пречи́стыя Своея́ Ма́тере, святителя Германа Казанского, преподобных и богоносных отец наших и всех святы́х, поми́луй и спаси нас я́ко Благ и Челове́колюбец.

Многоле́тие:

Вели́каго Господи́на и Отца́ на́шего Кири́лла,/ Святе́йшаго Патри́арха Моско́вского и всея́ Руси́,/ и Господи́на на́шего (Высоко-) Преосвяще́ннейшаго (имярек),/ (архи-)епи́скопа (митрополита (титул)),/ богохрани́мую страну́ на́шу Росси́йскую,/ и вся правосла́вныя христи́аны,// Го́споди, сохрани́ их на мно́гая ле́та.