Шрифт

▲

Богослужебные тексты для домашнего употребления

Дни памяти святых

Последование Всеношного бдения в день памяти благоверного великого князя Александра Невского. Для домашнего (келейного) совершения

Оглавление

ВСЕНО́ЩНОЕ БДЕ́НИЕ

ВЕЛИ́КАЯ ВЕЧЕ́РНЯ

Моли́твами святы́х оте́ц на́ших, Го́споди Иису́се Христе́, Бо́же наш, поми́луй нас. Ами́нь.

Сла́ва Тебе́, Бо́же наш, сла́ва Тебе́.

Царю́ Небе́сный, Уте́шителю, Ду́ше и́стины, И́же везде́ сый и вся исполня́яй, Сокро́вище благи́х и жи́зни Пода́телю, прииди́ и всели́ся в ны, и очи́сти ны от вся́кия скве́рны, и спаси́, Бла́же, ду́ши на́ша.

Святы́й Бо́же, Святы́й Кре́пкий, Святы́й Безсме́ртный, поми́луй нас. (Трижды.)

Сла́ва Отцу́ и Сы́ну и Свято́му Ду́ху, и ны́не и при́сно и во ве́ки веко́в. Ами́нь.

Пресвята́я Тро́ице, поми́луй нас; Го́споди, очи́сти грехи́ на́ша; Влады́ко, прости́ беззако́ния на́ша; Святы́й, посети́ и исцели́ не́мощи на́ша, и́мене Твоего́ ра́ди.

Го́споди, поми́луй, (трижды). Сла́ва, и ны́не:

О́тче наш, И́же еси́ на Небесе́х, да святи́тся и́мя Твое́, да прии́дет Ца́рствие Твое́, да бу́дет во́ля Твоя́, я́ко на Небеси́ и на земли́. Хлеб наш насу́щный да́ждь нам днесь; и оста́ви нам до́лги на́ша, я́коже и мы оставля́ем должнико́м на́шим; и не введи́ нас во искуше́ние, но изба́ви нас от лука́ваго.

Таже, Го́споди, поми́луй, (12), Сла́ва, и ны́не:

Прииди́те, поклони́мся Царе́ви на́шему Бо́гу.

Прииди́те, поклони́мся и припаде́м Христу́, Царе́ви на́шему Бо́гу.

Прииди́те, поклони́мся и припаде́м Самому́ Христу́, Царе́ви и Бо́гу на́шему.

Псалом 103:

Поется часть псалма:

Благослови́, душе́ моя́, Го́спода. / Благослове́н еси́, Го́споди. / Го́споди, Бо́же мой, возвели́чился еси́ зело́. / Благослове́н еси́, Го́споди. / Во испове́дание и в велеле́поту обле́клся еси́. / Благослове́н еси́, Го́споди. / Посреде́ гор про́йдут во́ды. / Ди́вна дела́ Твоя́, Го́споди. / Вся прему́дростию сотвори́л еси́. / Сла́ва Ти, Го́споди, сотвори́вшему вся.

Или читается псалом полностью:

Благослови́, душе́ моя́, Го́спода. Го́споди, Бо́же мой, возвели́чился еси́ зело́. Во испове́дание и в велеле́поту обле́клся еси́. Одея́йся све́том, я́ко ри́зою, простира́яй не́бо, я́ко ко́жу. Покрыва́яй вода́ми превы́спренняя Своя́, полага́яй о́блаки на восхожде́ние Свое́, ходя́й на крилу́ ве́треню. Творя́й А́нгелы Своя́ ду́хи и слуги́ Своя́ пла́мень о́гненный. Основа́яй зе́млю на тве́рди ея́, не преклони́тся в век ве́ка. Бе́здна, я́ко ри́за, одея́ние ея́, на гора́х ста́нут во́ды, от запреще́ния Твоего́ побе́гнут, от гла́са гро́ма Твоего́ убоя́тся. Восхо́дят го́ры и нисхо́дят поля́ в ме́сто, е́же основа́л еси́ им. Преде́л положи́л еси́, eго́же не пре́йдут, ниже́ обратя́тся покры́ти зе́млю. Посыла́яй исто́чники в де́брех, посреде́ гор про́йдут во́ды. Напая́ют вся зве́ри се́льныя, ждут она́гри в жа́жду свою́. На ты́х пти́цы небе́сныя привита́ют, от среды́ ка́мения дадя́т глас. Напая́яй го́ры от превы́спренних Свои́х, от плода́ дел Твои́х насы́тится земля́. Прозяба́яй траву́ ското́м, и злак на слу́жбу челове́ком, извести́ хлеб от земли́. И вино́ весели́т се́рдце челове́ка, ума́стити лице́ еле́ем, и хлеб се́рдце челове́ка укрепи́т. Насы́тятся древа́ польска́я, ке́дри Лива́нстии, и́хже еси́ насади́л. Та́мо пти́цы вогнездя́тся, ероди́ево жили́ще предводи́тельствует и́ми. Го́ры высо́кия еле́нем, ка́мень прибе́жище за́яцем. Сотвори́л есть луну́ во времена́, со́лнце позна́ за́пад свой. Положи́л еси́ тму, и бысть нощь, в не́йже про́йдут вси зве́рие дубра́внии. Ски́мни рыка́ющии, восхи́тити и взыска́ти от Бо́га пи́щу себе́. Возсия́ со́лнце и собра́шася и в ло́жах свои́х ля́гут. Изы́дет челове́к на де́ло свое́ и на де́лание свое́ до ве́чера. Я́ко возвели́чишася дела́ Твоя́, Го́споди, вся прему́дростию сотвори́л еси́, испо́лнися земля́ тва́ри Твоея́. Сие́ мо́ре вели́кое и простра́нное, та́мо га́ди, и́мже несть числа́, живо́тная ма́лая с вели́кими, та́мо корабли́ препла́вают, змий сей, eго́же созда́л еси руга́тися eму́. Вся к Тебе́ ча́ют, да́ти пи́щу им во бла́го вре́мя. Да́вшу Тебе́ им соберу́т, отве́рзшу Тебе́ ру́ку вся́ческая испо́лнятся бла́гости, отвра́щшу же Тебе́ лице́, возмяту́тся, отъи́меши дух их, и исче́знут, и в персть свою́ возвратя́тся. По́слеши Ду́ха Твоего́, и сози́ждутся, и обнови́ши лице́ земли́. Бу́ди сла́ва Госпо́дня во ве́ки, возвесели́тся Госпо́дь о де́лех Свои́х, призира́яй на зе́млю, и творя́й ю́ трясти́ся, прикаса́яйся гора́м, и дымя́тся. Воспою́ Го́сподеви в животе́ мое́м, пою́ Бо́гу моему́, до́ндеже есмь, да услади́тся Ему́ бесе́да моя́, аз же возвеселю́ся о Го́споде. Да исче́знут гре́шницы от земли́, и беззако́нницы, я́коже не бы́ти им. Благослови́, душе́ моя́, Го́спода.

Со́лнце позна́ за́пад свой. Положи́л еси́ тму, и бысть нощь. Я́ко возвели́чишася дела́ Твоя́, Го́споди, вся прему́дростию сотвори́л еси́.

Сла́ва, и ны́не: Аллилу́иа, аллилу́иа, аллилу́иа, сла́ва Тебе́ Бо́же. Трижды.

Блаже́н муж:

Блаже́н муж, и́же не и́де на сове́т нечести́вых.

Аллилу́иа, аллилу́иа, аллилу́иа.

Я́ко весть Госпо́дь путь пра́ведных, и путь нечести́вых поги́бнет.

Аллилу́иа, аллилу́иа, аллилу́иа.

Рабо́тайте Го́сподеви со стра́хом и ра́дуйтеся Ему́ с тре́петом.

Аллилу́иа, аллилу́иа, аллилу́иа.

Блаже́ни вси наде́ющиися Нань.

Аллилу́иа, аллилу́иа, аллилу́иа.

Воскресни́, Го́споди, спаси́ мя, Бо́же мой.

Аллилу́иа, аллилу́иа, аллилу́иа.

Госпо́дне есть спасе́ние, и на лю́дех Твои́х благослове́ние Твое́.

Аллилу́иа, аллилу́иа, аллилу́иа.

Сла́ва Отцу́ и Сы́ну и Свято́му Духу.

Аллилу́иа, аллилу́иа, аллилу́иа.

И ны́не и при́сно и во ве́ки веко́в. Ами́нь.

Аллилу́иа, аллилу́иа, аллилу́иа.

Аллилу́иа, аллилу́иа, аллилу́иа, сла́ва Тебе́ Бо́же. (Три́жды)

Го́споди, воззва́х, глас 1:

Го́споди, воззва́х к Тебе́, услы́ши мя./ Услы́ши мя, Го́споди./ Го́споди, воззва́х к Тебе́, услы́ши мя:/ вонми́ гла́су моле́ния моего́,/ внегда́ воззва́ти ми к Тебе́.// Услы́ши мя, Го́споди.

Да испра́вится моли́тва моя́,/ я́ко кади́ло пред Тобо́ю,/ воздея́ние руку́ мое́ю/ – же́ртва вече́рняя.// Услы́ши мя, Го́споди.

Стихи́ры пра́здника, глас 6:

Стих: А́ще беззако́ния на́зриши, Го́споди, Го́споди, кто постои́т? Я́ко у Тебе́ очище́ние есть.

По и́мени твоему́ та́ко и житие́ твое́, благове́рный кня́же Алекса́ндре: му́жеством бо на земли́ и до́брым правле́нием, ны́не же на небеси́ моли́твами помоществу́еши лю́дем твои́м. Те́мже тя́, и в тебе́ сла́вимаго во святы́х Свои́х Бо́га почита́ем.

Стих: И́мене ра́ди Твоего́ потерпе́х Тя, Го́споди, потерпе́ душа́ моя́ в сло́во Твое́, упова́ душа́ моя́ на Го́спода.

Стих: От стра́жи у́тренния до но́щи, от стра́жи у́тренния да упова́ет Изра́иль на Го́спода.

До́бр строи́тель и до́бль во́ин, ски́петром на престо́ле пра́во пра́вя, и во бра́ни ору́жием защища́я лю́ди твоя́, сугу́быя че́сти сподо́бился еси́ от Вы́шняго Прави́теля и Го́спода Савао́фа.

Стих: Я́ко у Го́спода ми́лость, и мно́гое у Него́ избавле́ние, и Той изба́вит Изра́иля от всех беззако́ний eго́.

Стих: Хвали́те Го́спода вси язы́цы, похвали́те Его́ вси лю́дие.

Бо́льшия любве́ никто́же и́мать от сея́, а́ще кто́ положи́т ду́шу свою́ за дру́ги своя́; сицево́ю лю́ди твоя́ возлюби́л еси́, на ору́жие вра́жие за ня́ му́жественно исходя́, Бо́гу осеня́ющу над главо́ю твое́ю в де́нь бра́ни.

Стих: Я́ко утверди́ся ми́лость Его́ на нас, и и́стина Госпо́дня пребыва́ет во век.

Моисе́я и Дави́да и про́чиих люде́й Бо́жиих вождо́в подража́я, му́жественно во бра́нех за лю́ди твоя́ подвиза́лся еси́, те́мже и на небеси́ с ни́ми, победи́тель, торжеству́еши, моля́ся о во́инствующих ко Го́споду.

Глас 6: Сла́ва Отцу́ и Сы́ну и Свято́му Ду́ху.

Весели́ся, Ижерская земле́ и вся́ Росси́йская страна́, Варя́жское мо́ре, восплещи́ рука́ми, Нево́ реко́, распространи́ своя́ струи́: се́ бо кня́зь тво́й и влады́ка, от и́га све́йскаго тя́ свободи́вый, торжеству́ет во гра́де Бо́жии, его́же веселя́т ре́чная устремле́ния.

Глас 6: И ны́не и при́сно и во ве́ки веко́в. Ами́нь.

Кто Тебе́ не ублажи́т, Пресвята́я Де́во; / кто ли не воспое́т Твоего́ Пречи́стаго Рождества́; / безле́тно бо от Отца́ возсия́вый Сын Единоро́дный, / То́йже от Тебе́, Чи́стыя, про́йде, / неизрече́нно вопло́щься, / естество́м Бог Сый, / и естество́м быв Челове́к нас ра́ди; / не во двою́ лицу́ разделя́емый, / но во двою́ естеству́ / несли́тно познава́емый. / Того́ моли́, Чи́стая Всеблаже́нная, / поми́ловатися душа́м на́шим.

Све́те Тихи́й:

Све́те Ти́хий святы́я сла́вы Безсме́ртнаго Отца́ Небе́снаго, Свята́го, Блаже́ннаго, Иису́се Христе́! Прише́дше на за́пад со́лнца, ви́девше свет вече́рний, пое́м Отца́, Сы́на и Свята́го Ду́ха, Бо́га. Досто́ин еси́ во вся времена́ пет бы́ти гла́сы преподо́бными, Сы́не Бо́жий, живо́т дая́й; те́мже мир Тя сла́вит.

1. Прему́дрости Соломо́новы чте́ние

Пра́ведных ду́ши в руце́ Бо́жией, и не прико́снется и́х му́ка. Непщева́ни бы́ша во очесе́х безу́мных умре́ти, и вмени́ся озлобле́ние исхо́д и́х, и е́же от на́с ше́ствие — сокруше́ние, они́ же су́ть в ми́ре. Ибо пред лице́м челове́ческим, а́ще и му́ку прии́мут, упова́ние и́х безсме́ртия испо́лнено. И вма́ле нака́зани бы́вше, вели́кими благоде́тельствовани бу́дут, я́ко Бо́г искуси́ я́ и обре́те и́х досто́йны Себе́. Я́ко зла́то в горни́ле, искуси́ и́х и, я́ко всепло́дие же́ртвенное, прия́т я́. И во вре́мя посеще́ния и́х, возсия́ют, и я́ко и́скры по сте́блию, потеку́т. Су́дят язы́ком и облада́ют людьми́, и воцари́тся Госпо́дь в ни́х во ве́ки. Наде́ющиися На́нь разуме́ют и́стину и ве́рнии в любви́ пребу́дут Ему́, я́ко благода́ть и ми́лость в преподо́бных Его́ и посеще́ние во избра́нных Его́.

2. Прему́дрости Соломо́новы чте́ние

Пра́ведницы во ве́ки живу́т, и в Го́споде мзда́ и́х, и попече́ние и́х у Вы́шняго. Сего́ ра́ди прии́мут ца́рствие благоле́пия и вене́ц добро́ты от руки́ Госпо́дни, зане́ десни́цею покры́ет я́ и мы́шцею защити́т и́х. Прии́мет всеору́жие — рве́ние свое́ и вооружи́т тва́рь в ме́сть враго́м. Облече́тся в броня́ пра́вды и возложи́т шле́м — су́д нелицеме́рен. Прии́мет щи́т непобеди́мый — преподо́бие, поостри́т же напра́сный гне́в — во ору́жие, спобо́рет же с ни́м ми́р на безу́мныя. По́йдут праволу́чныя стре́лы мо́лниины и, я́ко от благокру́гла лу́ка облако́в, на наме́рение полетя́т, и от каменоме́тныя я́рости испо́лнь паду́т гра́ды. Вознегоду́ет на ни́х вода́ морска́я, ре́ки же потопя́т я́ на́гло. Сопроти́в ста́нет и́м ду́х си́лы и, я́ко ви́хор, разве́ет и́х, и опустоши́т всю́ зе́млю беззако́ние, и злоде́йство преврати́т престо́лы си́льных. Слы́шите у́бо, ца́рие, и разуме́йте, навы́кните, судии́ конце́в земли́. Внуши́те держа́щии мно́жества и гордя́щиися о наро́дех язы́ков, я́ко дана́ е́сть от Го́спода держа́ва ва́м и си́ла от Вы́шняго.

3. Прему́дрости Соломо́новы чте́ние

Пра́ведник, а́ще пости́гнет сконча́тися, в поко́и бу́дет. Ста́рость бо честна́ не многоле́тна, ниже́ в числе́ ле́т исчита́ется. Седи́на же е́сть му́дрость челове́ком, и во́зраст ста́рости — житие́ нескве́рное. Благоуго́ден Бо́гови бы́в, возлю́блен бы́сть, и живы́й посреде́ гре́шник, преста́влен бы́сть. Восхище́н бы́сть, да не зло́ба измени́т ра́зума его́, или́ ле́сть прельсти́т ду́шу его́. Раче́ние бо зло́бы помрача́ет до́брая и паре́ние по́хоти, пременя́ет у́м незло́бив. Сконча́вся вма́ле, испо́лни ле́та до́лга, уго́дна бо бе́ Го́сподеви душа́ его́, сего́ ра́ди потща́ся от среды́ лука́вствия. Лю́дие же ви́девше и не разуме́вше, ниже́ поло́жше в помышле́нии таково́е, я́ко благода́ть и ми́лость в преподо́бных Его́ и посеще́ние во избра́нных Его́.

Сподо́би, Го́споди:

Сподо́би, Го́споди, в ве́чер сей без греха́ сохрани́тися нам. Благослове́н еси́, Го́споди, Бо́же оте́ц на́ших, и хва́льно и просла́влено и́мя Твое́ во ве́ки. Ами́нь.

Бу́ди, Го́споди, ми́лость Твоя́ на нас, я́коже упова́хом на Тя. Благослове́н еси́, Го́споди, научи́ мя оправда́нием Твои́м. Благослове́н еси́, Влады́ко, вразуми́ мя оправда́нием Твои́м. Благослове́н еси́, Святы́й, просвети́ мя оправда́нии Твои́ми.

Го́споди, ми́лость Твоя́ во век, дел руку́ Твое́ю не пре́зри. Тебе́ подоба́ет хвала́, Тебе́ подоба́ет пе́ние, Тебе́ сла́ва подоба́ет. Отцу́ и Сы́ну и Свято́му Ду́ху, ны́не и при́сно и во ве́ки веко́в. Ами́нь.

На лити́и стихи́ры, гла́с 4:

Да весели́тся дне́сь но́вый Изра́иль о сотво́ршем его́, и сы́нове росси́йстии да возра́дуются о кня́зе свое́м, благове́рном Алекса́ндре Не́вском: се́ бо ца́рскою диади́мою венча́ его́ Ца́рь ца́рствующим.

Аще на́ми и влады́чествуеши, благове́рный кня́же Алекса́ндре, оба́че раба́ Бо́жия тя́ имену́ем, Его́же, влады́чествуя, на́м Го́спода своего́ испове́дал, Ему́же послужи́л, от Него́же и услы́шал еси́: благи́й ра́бе, до́брый и ве́рный, вни́ди в ра́дость Го́спода твоего́.

Прельсти́шася фарисе́е, глаго́люще: кто́ от кня́зь ве́рова в Онь? Се́ бо благове́рный кня́зь Алекса́ндр Не́вский ве́рова во Иису́са распя́таго, и благоче́стием угоди́ Ему́, и восприя́т спасе́ние ве́чное.

Вои́стинну ве́рный и му́дрый строи́тель бы́л еси́, Алекса́ндре, его́же поста́ви Госпо́дь над рабы́ Свои́ми, росси́йскими наро́ды; блаже́н еси́, и́бо во вре́мя кончи́ны твоея́ прише́д к тебе́, Госпо́дь обре́те тя́ до́бре творя́ща, и над все́м име́нием на небеси́ поста́ви тя́.

Сла́ва, гла́с 1: Возвесели́теся дне́сь, росси́йстии наро́ди, ликовству́йте, нача́ла и вла́сти: се́ бо пло́ть от пло́ти и вла́сть от вла́сти ва́шея, благове́рный кня́зь Алекса́ндр Не́вский, лику́ет со Ангелы на небеси́, и все́х свои́х сро́дников и власте́й, и под вла́стию су́щих, на духо́вное созыва́ет торжество́, о все́х мо́лится ко Го́споду

И ны́не, богоро́дичен: Се́ испо́лнися Иса́иино прорече́ние: Де́ва бо родила́ еси́ и по рождестве́, я́ко пре́жде рождества́, пребыла́ еси́, Бо́г бо бе́ Рожде́йся, те́мже и естества́ новопресече́. Но, о Богома́ти, моле́ния Твои́х рабо́в, в Твое́м хра́ме приноси́мая Тебе́, не пре́зри, но я́ко Благоутро́бнаго Твои́ма рука́ма нося́щи, на Твоя́ рабы́ умилосе́рдися, и моли́ спасти́ся душа́м на́шим.

Го́споди, поми́луй. (40 раз)

Стихи́ры на стихо́вне:

Стихиры, гла́с 6:

Испове́давшаго и́мя Иису́сово пред челове́ки, испове́дует тя́ Иисусъ́ пред Отце́м Свои́м на небеси́; и мы́ на земли́ воспева́ем тя́, благове́рне Алекса́ндре, я́ко моля́щагося о душа́х на́ших.

Сти́х: Честна́ пред Го́сподом / сме́рть преподо́бных Его́.

Се́рдцем ве́ровал еси́ в пра́вду, усты́ же пред мучи́телем испове́довал еси́ во спасе́ние; у́бо я́ко и́стинный испове́дник и насле́дник, моли́ся о спасе́нии ду́ш на́ших.

Сти́х: Блаже́н му́ж, боя́йся Го́спода, / в за́поведех Его́ восхо́щет зело́.

Му́чеников подража́тель, не убоя́лся еси́ пострада́ти, я́ко до́бр во́ин Иису́с Христо́в, изволе́нием бы́в му́ченик. Те́мже и с му́ченики венча́лся еси́ от Подвигополо́жника Иису́са.

Слава, гла́с 2:

Прииди́те, вси́ росси́йстии чи́ни, восхвали́те до́браго чинонача́льника: вла́сти — му́драго строи́теля, во́ини — прехра́браго во́ина, правосла́вия люби́тели — тве́рдаго испове́дника, изволе́нием му́ченика. Повину́йтеся наста́внику ва́шему, и покаря́йтеся, и ви́девше кончи́ну его́, подража́йте ве́ре его́.

И ны́не, Богоро́дичен:

О, чудесе́ но́ваго, все́х дре́вних чуде́с! Кто́ бо позна́ Ма́терь, без му́жа ро́ждшую и на руку́ нося́щую всю́ тва́рь Содержа́щаго? Бо́жие е́сть изволе́ние Ро́ждшееся. Его́же я́ко Младе́нца, Пречи́стая, Твои́ма рука́ма носи́вшая, и ма́тернее дерзнове́ние к Нему́ иму́щая, не преста́й моля́щи о чту́щих Тя́, уще́дрити и спасти́ ду́ши на́ша.

Моли́тва свята́го Симео́на Богоприи́мца:

Ны́не отпуща́еши раба́ Твоего́, Влады́ко,/ по глаго́лу Твоему́, с ми́ром;/ я́ко ви́деста о́чи мои́ спасе́ние Твое́,/ е́же еси́ угото́вал пред лице́м всех люде́й,/ свет во открове́ние язы́ков,// и сла́ву люде́й Твои́х Изра́иля.

Святы́й Бо́же, Святы́й Кре́пкий, Святы́й Безсме́ртный, поми́луй нас. (Три́жды)

Сла́ва Отцу́ и Сы́ну и Свято́му Ду́ху, и ны́не и при́сно и во ве́ки веко́в. Ами́нь.

Го́споди, поми́луй. (Три́жды)

Сла́ва Отцу́ и Сы́ну и Свято́му Ду́ху, и ны́не и при́сно и во ве́ки веко́в. Ами́нь.

Тропа́рь, глас 4:

Позна́й свою́ бра́тию, росси́йский Ио́сифе, не в Еги́пте, но на небеси́ ца́рствующий, благове́рный кня́же Алекса́ндре, и приими́ моле́ния и́х, умножа́я жи́та лю́дем плодоно́сием земли́ твоея́, гра́ды влады́чествия твоего́ огражда́я моле́нием и насле́дником твои́м на сопроти́вныя спобо́рствуя. (Дважды)

Песнь Пресвятей Богородице:

Богоро́дице Де́во, ра́дуйся, / Благода́тная Мари́е, Госпо́дь с Тобо́ю; / благослове́на Ты в жена́х / и благослове́н Плод чре́ва Твоего́, / я́ко Спа́са родила́ еси́ душ на́ших. (Единожды)

Бу́ди И́мя Госпо́дне благослове́но от ны́не и до ве́ка. (Три́жды)

Псало́м 33:

Благословлю́ Го́спода на вся́кое вре́мя,/ вы́ну хвала́ Его́ во усте́х мои́х./ О Го́споде похва́лится душа́ моя́,/ да услы́шат кро́тцыи, и возвеселя́тся./ Возвели́чите Го́спода со мно́ю,/ и вознесе́м И́мя Его́ вку́пе./ Взыска́х Го́спода, и услы́ша мя,/ и от все́х скорбе́й мои́х изба́ви мя./ Приступи́те к Нему́, и просвети́теся,/ и ли́ца ва́ша не постыдя́тся./ Сей ни́щий воззва́, и Госпо́дь услы́ша и́,/ и от все́х скорбе́й его́ спасе́ и́./ Ополчи́тся а́нгел Госпо́день о́крест боя́щихся Его́,/ и изба́вит их./ Вкуси́те и ви́дите, я́ко благ Госпо́дь:/ блаже́н муж, и́же упова́ет Нань./ Бо́йтеся Го́спода, вси́ святи́и Его́,/ я́ко несть лише́ния боя́щимся Его́./ Бога́тии обнища́ша и взалка́ша:/ взыска́ющии же Го́спода// не лиша́тся вся́каго бла́га.

У́ТРЕНЯ.

Шестопса́лмие:

Сла́ва в вы́шних Бо́гу, и на земли́ мир, в челове́цех благоволе́ние. (Три́жды)

Го́споди, устне́ мои́ отве́рзеши, и уста́ моя́ возвестя́т хвалу́ Твою́. (Два́жды)

Псалом 3:

Го́споди, что ся умно́жиша стужа́ющии ми́? Мно́зи востаю́т на мя, мно́зи глаго́лют души́ мое́й: несть спасе́ния eму́ в Бо́зе eго́. Ты же, Го́споди, Засту́пник мой еси́, сла́ва моя́ и вознося́й главу́ мою́. Гла́сом мои́м ко Го́споду воззва́х, и услы́ша мя от горы́ святы́я Своея́. Аз усну́х, и спах, воста́х, я́ко Госпо́дь засту́пит мя. Не убою́ся от тем люде́й, о́крест напа́дающих на мя. Воскресни́, Го́споди, спаси́ мя, Бо́же мой, я́ко Ты порази́л еси́ вся вражду́ющыя ми всу́е: зу́бы гре́шников сокруши́л еси́. Госпо́дне есть спасе́ние, и на лю́дех Твои́х благослове́ние Твое́.

Аз усну́х, и спах, воста́х, я́ко Госпо́дь засту́пит мя.

Псалом 37:

Го́споди, да не я́ростию Твое́ю обличи́ши мене́, ниже́ гне́вом Твои́м нака́жеши мене́. Я́ко стре́лы Твоя́ унзо́ша во мне, и утверди́л еси́ на мне ру́ку Твою́. Несть исцеле́ния в пло́ти мое́й от лица́ гне́ва Твоего́, несть ми́ра в косте́х мои́х от лица́ грех мои́х. Я́ко беззако́ния моя́ превзыдо́ша главу́ мою́, я́ко бре́мя тя́жкое отяготе́ша на мне. Возсмерде́ша и согни́ша ра́ны моя́ от лица́ безу́мия моего́. Пострада́х и сляко́хся до конца́, весь день се́туя хожда́х. Я́ко ля́двия моя́ напо́лнишася поруга́ний, и несть исцеле́ния в пло́ти мое́й. Озло́блен бых и смири́хся до зела́, рыка́х от воздыха́ния се́рдца моего́. Го́споди, пред Тобо́ю все жела́ние мое́ и воздыха́ние мое́ от Тебе́ не утаи́ся. Се́рдце мое́ смяте́ся, оста́ви мя си́ла моя́, и свет о́чию мое́ю, и той несть со мно́ю. Дру́зи мои́ и и́скреннии мои́ пря́мо мне прибли́жишася и ста́ша, и бли́жнии мои́ отдале́че мене́ ста́ша и нужда́хуся и́щущии ду́шу мою́, и и́щущии зла́я мне глаго́лаху су́етная и льсти́вным весь день поуча́хуся. Аз же я́ко глух не слы́шах и я́ко нем не отверза́яй уст свои́х. И бых я́ко челове́к не слы́шай и не имы́й во усте́х свои́х обличе́ния. Я́ко на Тя, Го́споди, упова́х, Ты услы́шиши, Го́споди Бо́же мой. Я́ко рех: да не когда́ пора́дуют ми ся врази́ мои́: и внегда́ подвижа́тися нога́м мои́м, на мя велере́чеваша. Я́ко аз на ра́ны гото́в, и боле́знь моя́ предо мно́ю есть вы́ну. Я́ко беззако́ние мое́ аз возвещу́ и попеку́ся о гресе́ мое́м. Врази́ же мои́ живу́т и укрепи́шася па́че мене́, и умно́жишася ненави́дящии мя без пра́вды. Воздаю́щии ми зла́я возблага́я оболга́ху мя, зане́ гоня́х благосты́ню. Не оста́ви мене́, Го́споди Бо́же мой, не отступи́ от Мене́. Вонми́ в по́мощь мою́, Го́споди спасе́ния моего́.

Не оста́ви мене́, Го́споди Бо́же мой, не отступи́ от Мене́. Вонми́ в по́мощь мою́, Го́споди спасе́ния моего́.

Псалом 62:

Бо́же, Бо́же мой, к Тебе́ у́тренюю, возжада́ Тебе́ душа́ моя́, коль мно́жицею Тебе́ плоть моя́, в земли́ пу́сте и непрохо́дне, и безво́дне. Та́ко во святе́м яви́хся Тебе́, ви́дети си́лу Твою́ и сла́ву Твою́. Я́ко лу́чши ми́лость Твоя́ па́че живо́т, устне́ мои́ похвали́те Тя. Та́ко благословлю́ Тя в животе́ мое́м, о и́мени Твое́м воздежу́ ру́це мои́. Я́ко от ту́ка и ма́сти да испо́лнится душа́ моя́, и устна́ма ра́дости восхва́лят Тя уста́ моя́. А́ще помина́х Тя на посте́ли мое́й, на у́тренних поуча́хся в Тя. Я́ко был еси́ Помо́щник мой, и в кро́ве крилу́ Твое́ю возра́дуюся. Прильпе́ душа́ моя́ по Тебе́, мене́ же прия́т десни́ца Твоя́. Ти́и же всу́е иска́ша ду́шу мою́, вни́дут в преиспо́дняя земли́, предадя́тся в ру́ки ору́жия, ча́сти ли́совом бу́дут. Царь же возвесели́тся о Бо́зе, похва́лится всяк клены́йся Им, я́ко загради́шася уста́ глаго́лющих непра́ведная.

На у́тренних поуча́хся в Тя. Я́ко был еси́ Помо́щник мой, и в кро́ве крилу́ Твое́ю возра́дуюся. Прильпе́ душа́ моя́ по Тебе́, мене́ же прия́т десни́ца Твоя́.

Сла́ва Отцу́ и Сы́ну и Свято́му Ду́ху, и ны́не и при́сно и во ве́ки веко́в. Ами́нь.

Аллилу́иа, аллилу́иа, аллилу́иа, сла́ва Тебе́ Бо́же. (Три́жды)

Го́споди поми́луй. (Три́жды)

Сла́ва Отцу́ и Сы́ну и Свято́му Ду́ху, и ны́не и при́сно и во ве́ки веко́в. Ами́нь.

Псалом 87:

Го́споди Бо́же спасе́ния моего́, во дни воззва́х, и в нощи́ пред Тобо́ю. Да вни́дет пред Тя моли́тва моя́: приклони́ у́хо Твое́ к моле́нию моему́, я́ко испо́лнися зол душа́ моя́, и живо́т мой аду прибли́жися. Привмене́н бых с низходя́щими в ров, бых я́ко челове́к без по́мощи, в ме́ртвых свобо́дь, я́ко я́звеннии спя́щии во гро́бе, и́хже не помяну́л еси́ ктому́, и ти́и от руки́ Твоея́ отринове́ни бы́ша. Положи́ша мя в ро́ве преиспо́днем, в те́мных и се́ни сме́ртней. На мне утверди́ся я́рость Твоя́, и вся во́лны Твоя́ наве́л еси́ на мя. Уда́лил еси́ зна́емых мои́х от Мене́, положи́ша мя ме́рзость себе́: пре́дан бых и не исхожда́х. О́чи мои́ изнемого́сте от нищеты́, воззва́х к Тебе́, Го́споди, весь день, возде́х к Тебе́ ру́це мои́. Еда́ ме́ртвыми твори́ши чудеса́? Или́ вра́чеве воскреся́т, и испове́дятся Тебе́? Еда́ пове́сть кто во гро́бе ми́лость Твою́, и и́стину Твою́ в поги́бели? Еда́ позна́на бу́дут во тьме чудеса́ Твоя́, и пра́вда Твоя́ в земли́ забве́нней? И аз к Тебе́, Го́споди, воззва́х и у́тро моли́тва моя́ предвари́т Тя. Вску́ю, Го́споди, отре́еши ду́шу мою́, отвраща́еши лице́ Твое́ от Мене́? Нищ есмь аз, и в труде́х от ю́ности моея́; возне́с же ся, смири́хся, и изнемого́х. На мне преидо́ша гне́ви Твои́, устраше́ния Твоя́ возмути́ша мя, обыдо́ша мя я́ко вода́, весь день одержа́ша мя вку́пе. Уда́лил еси́ от Мене́ дру́га и и́скренняго, и зна́емых мои́х от страсте́й.

Го́споди Бо́же спасе́ния моего́, во дни воззва́х, и в нощи́ пред Тобо́ю. Да вни́дет пред Тя моли́тва моя́: приклони́ у́хо Твое́ к моле́нию моему́.

Псалом 102:

Благослови́, душе́ моя́, Го́спода, и вся вну́тренняя моя́ и́мя свя́тое Его́. Благослови́, душе́ моя́, Го́спода, и не забыва́й всех воздая́ний Его́, очища́ющаго вся беззако́ния твоя́, исцеля́ющаго вся неду́ги твоя́, избавля́ющаго от истле́ния живо́т твой, венча́ющаго тя ми́лостию и щедро́тами, исполня́ющаго во благи́х жела́ние твое́: обнови́тся я́ко о́рля ю́ность твоя́. Творя́й ми́лостыни Госпо́дь, и судьбу́ всем оби́димым. Сказа́ пути́ Своя́ Моисе́ови, сыново́м Изра́илевым хоте́ния Своя́: Щедр и Ми́лостив Госпо́дь, Долготерпели́в и Многоми́лостив. Не до конца́ прогне́вается, ниже́ во век вражду́ет, не по беззако́нием на́шым сотвори́л есть нам, ниже́ по грехо́м на́шым возда́л есть нам. Я́ко по высоте́ небе́сней от земли́, утверди́л есть Госпо́дь ми́лость Свою́ на боя́щихся Его́. Ели́ко отстоя́т восто́цы от за́пад, уда́лил есть от нас беззако́ния на́ша. Я́коже ще́дрит оте́ц сы́ны, уще́дри Госпо́дь боя́щихся Его́. Я́ко Той позна́ созда́ние на́ше, помяну́, я́ко персть есмы́. Челове́к, я́ко трава́ дни́е eго́, я́ко цвет се́льный, та́ко оцвете́т, я́ко дух про́йде в нем, и не бу́дет, и не позна́ет ктому́ ме́ста своего́. Ми́лость же Госпо́дня от ве́ка и до ве́ка на боя́щихся Его́, и пра́вда Его́ на сыне́х сыно́в, храня́щих заве́т Его́, и по́мнящих за́поведи Его́ твори́ти я́. Госпо́дь на Небеси́ угото́ва Престо́л Свой, и Ца́рство Его́ все́ми облада́ет. Благослови́те Го́спода вси А́нгели Его́, си́льнии кре́постию, творя́щии сло́во Его́, услы́шати глас слове́с Его́. Благослови́те Го́спода вся Си́лы Его́, слуги́ Его́, творя́щии во́лю Его́. Благослови́те Го́спода вся дела́ Его́, на вся́ком ме́сте влады́чества Его́, благослови́, душе́ моя́, Го́спода.

На вся́ком ме́сте влады́чества Его́, благослови́, душе́ моя́, Го́спода.

Псалом 142:

Го́споди, услы́ши моли́тву мою́, внуши́ моле́ние мое́ во и́стине Твое́й, услы́ши мя в пра́вде Твое́й и не вни́ди в суд с рабо́м Твои́м, я́ко не оправди́тся пред Тобо́ю всяк живы́й. Я́ко погна́ враг ду́шу мою́, смири́л есть в зе́млю живо́т мой, посади́л мя есть в те́мных, я́ко ме́ртвыя ве́ка. И уны́ во мне дух мой, во мне смяте́ся се́рдце мое́. Помяну́х дни дре́вния, поучи́хся во всех де́лех Твои́х, в творе́ниих руку́ Твое́ю поуча́хся. Возде́х к Тебе́ ру́це мои́, душа́ моя́, я́ко земля́ безво́дная Тебе́. Ско́ро услы́ши мя, Го́споди, исчезе́ дух мой, не отврати́ лица́ Твоего́ от Мене́, и уподо́блюся низходя́щым в ров. Слы́шану сотвори́ мне зау́тра ми́лость Твою́, я́ко на Тя упова́х. Скажи́ мне, Го́споди, путь во́ньже пойду́, я́ко к Тебе́ взях ду́шу мою́. Изми́ мя от враг мои́х, Го́споди, к Тебе́ прибего́х. Научи́ мя твори́ти во́лю Твою́, я́ко Ты еси́ Бог мой. Дух Твой Благи́й наста́вит мя на зе́млю пра́ву. И́мене Твоего́ ра́ди, Го́споди, живи́ши мя, пра́вдою Твое́ю изведе́ши от печа́ли ду́шу мою́. И ми́лостию Твое́ю потреби́ши враги́ моя́ и погуби́ши вся стужа́ющыя души́ мое́й, я́ко аз раб Твой есмь.

Услы́ши мя, Го́споди, в пра́вде Твое́й и не вни́ди в суд с рабо́м Твои́м.

Дух Твой Благи́й наста́вит мя на зе́млю пра́ву.

Сла́ва Отцу́ и Сы́ну и Свято́му Ду́ху, и ны́не и при́сно и во ве́ки веко́в. Ами́нь.

Аллилу́иа, аллилу́иа, аллилу́иа, сла́ва Тебе́ Бо́же. (Три́жды)

Тропа́рь глас 4:

Сла́ва Отцу́ и Сы́ну и Свято́му Ду́ху.

Тропа́рь глас 4:

Яко благочести́ваго ко́рене пречестна́я о́трасль бы́л еси́, блаже́нне Алекса́ндре, яви́ бо тя́ Христо́с, я́ко не́кое Боже́ственное сокро́вище Росси́йстей земли́, но́ваго чудотво́рца, пресла́вна и богоприя́тна. И дне́сь, соше́дшеся в па́мять твою́ ве́рою и любо́вию, во псалме́х и пе́ниих ра́дующеся, сла́вим Го́спода, да́вшаго тебе́ благода́ть исцеле́ний. Его́же моли́ спасти́ гра́д се́й, и держа́ве сро́дник твои́х богоуго́дней бы́ти, и сыново́м росси́йским спасти́ся.

И ны́не и при́сно и во ве́ки веко́в. Ами́нь.

Глас 4: Е́же от ве́ка утае́ное / и А́нгелом несве́домое та́инство, / Тобо́ю, Богоро́дице, су́щим на земли́ яви́ся Бог, / в несли́тном соедине́нии воплоща́ем / и, Крест во́лею нас ра́ди восприи́м, / и́мже воскреси́в первозда́ннаго, / спасе́ от сме́рти ду́ши на́ша.

Здесь читается кафизма, положенная по дню, или сразу седальны:

Го́споди, поми́луй. (Три́жды)

Седален, глас 4:

Сла́ва Отцу́ и Сы́ну и Свято́му Ду́ху. И ны́не и при́сно и во ве́ки веко́в. Ами́нь.

Глас 4: Пречи́стеи ру́це Твои́, Де́во Ма́ти, просте́рши, покры́й упова́ющия на Тя́, и Сы́ну Твоему́ зову́щия: все́м пода́ждь, Христе́, ми́лости Твоя́.

Седален, глас 3:

Благода́рно зове́м вси́ Христо́ву уго́днику, приле́жно моля́щеся: разруши́ бра́нь страсте́й на́ших, и отжени́ де́монская мечта́ния, блаже́нне, и моли́ Христа́ Бо́га дарова́ти на́м ве́лию ми́лость.

Сла́ва Отцу́ и Сы́ну и Свято́му Ду́ху. И ны́не и при́сно и во ве́ки веко́в. Ами́нь.

Глас 3: Недомы́сленно и непостижи́мо е́сть, Влады́чице Богора́дованная, е́же соде́ланное о Тебе́ стра́шное Бо́жие та́инство, и́бо Необыме́ннаго, заче́нши, родила́ еси́, пло́тию обложе́на от пречи́стых крове́й Твои́х; Его́же всегда́, Чи́стая, я́ко Сы́на Твоего́, моли́ спасти́ся душа́м на́шим.

Полиеле́й:

Хвали́те И́мя Госпо́дне, хвали́те, раби́ Го́спода.

Аллилу́иа, аллилу́иа, аллилу́иа.

Благослове́н Госпо́дь от Сио́на, живы́й во Иерусали́ме.

Аллилу́иа, аллилу́иа, аллилу́иа.

Испове́дайтеся Го́сподеви, я́ко Благ, я́ко в век ми́лость Его́.

Аллилу́иа, аллилу́иа, аллилу́иа.

Испове́дайтеся Бо́гу Небе́сному, я́ко в век ми́лость Его́.

Аллилу́иа, аллилу́иа, аллилу́иа.

Велича́ние:

Велича́ем тя́, благове́рный кня́же Алекса́ндре, и чте́м святу́ю па́мять твою́, ты́ бо мо́лиши о на́с Христа́ Бо́га на́шего.

Сла́ва Отцу́ и Сы́ну и Свято́му Ду́ху и ны́не и при́сно и во ве́ки веко́в. Ами́нь.

Аллилу́иа, аллилу́иа, аллилу́иа,// сла́ва Тебе́, Бо́же. (Трижды)

Седа́льны:

Глас 4:

Ду́х Святы́й тя́, блаже́нне, наста́ви оте́чество твое́ па́ствити на па́житех спаси́тельных, и Христо́с свети́льника тя́ показа́ я́ве. Сего́ ра́ди лику́й и весели́ся со дерзнове́нием, я́ко сугу́быя венцы́ от Венцеда́вца прии́м.

Глас 4: Сла́ва Отцу́ и Сы́ну и Свято́му Ду́ху и ны́не и при́сно и во ве́ки веко́в. Ами́нь.

Удиви́ся Ио́сиф, е́же па́че естества́ зря́, и внима́ше мы́слию и́же на руно́ до́ждь, в безсе́менном зача́тии Твое́м, Богоро́дице: купину́, огне́м неопали́мую, же́зл Ааро́нов прозя́бший, и свиде́тельствуя, обру́чник Тво́й и храни́тель свяще́нником взыва́ше: Де́ва ражда́ет и по рождестве́ па́ки Де́вою пребыва́ет.

Степе́нна, глас 4:

От ю́ности моея́/ мно́зи бо́рют мя стра́сти,/ но Сам мя заступи́// и спаси́, Спа́се мой.

Ненави́дящии Сио́на,/ посрами́теся от Го́спода,/ я́ко трава́ бо огне́м// бу́дете изсо́хше.

Сла́ва Отцу́ и Сы́ну и Свято́му Ду́ху и ны́не и при́сно и во ве́ки веко́в. Ами́нь.

Святы́м Ду́хом/ вся́ка душа́ живи́тся,/ и чистото́ю возвыша́ется,// светле́ется Тро́йческим еди́нством, священнота́йне.

Го́споди, поми́луй. (Три́жды)

От Иоа́нна Свята́го Ева́нгелия чте́ние

Сла́ва, Тебе́, Го́споди, сла́ва Тебе́.

Рече́ Госпо́дь ко прише́дшым к Нему́ иуде́ем: Аз есмь дверь, Мно́ю а́ще кто вни́дет, спасе́тся, и вни́дет, и изы́дет, и па́жить обря́щет. Тать не прихо́дит, ра́зве да укра́дет, и убие́т, и погуби́т, Аз приидо́х, да живо́т и́мут и ли́шше и́мут. Аз есмь па́стырь до́брый, па́стырь до́брый ду́шу свою́ полага́ет за о́вцы. А нае́мник, и́же несть па́стырь, ему́же не суть о́вцы своя́, ви́дит во́лка гряду́ща и оставля́ет о́вцы, и бе́гает, и волк расхи́тит их, и распу́дит о́вцы. А нае́мник бежи́т, я́ко нае́мник есть и неради́т о овца́х. Аз есмь па́стырь до́брый, и зна́ю Моя́, и зна́ют Мя Моя́. Я́коже зна́ет Мя Оте́ц, и Аз зна́ю Отца́, и ду́шу Мою́ полага́ю за о́вцы. И и́ны о́вцы и́мам, я́же не суть от двора́ сего́, и ты́я Ми подоба́ет привести́, и глас Мой услы́шат, и бу́дет еди́но ста́до, и еди́н Па́стырь.

Псало́м 50:

Поми́луй мя, Бо́же, по вели́цей ми́лости Твое́й, и по мно́жеству щедро́т Твои́х очи́сти беззако́ние мое́. Наипа́че омы́й мя от беззако́ния моего́, и от греха́ моего́ очи́сти мя. Я́ко беззако́ние мое́ аз зна́ю и грех мой предо мно́ю есть вы́ну. Тебе́ Еди́ному согреши́х, и лука́вое пред Тобо́ю сотвори́х, я́ко да оправди́шися во словесе́х Твои́х и победи́ши, внегда́ суди́ти Ти. Се бо в беззако́ниих зача́т есмь, и во гресе́х роди́ мя ма́ти моя́. Се бо и́стину возлюби́л еси́, безве́стная и та́йная прему́дрости Твоея́ яви́л ми еси́. Окропи́ши мя иссо́пом, и очи́щуся, омы́еши мя, и па́че сне́га убелю́ся. Слу́ху моему́ да́си ра́дость и весе́лие, возра́дуются ко́сти смире́нныя. Отврати́ лице́ Твое́ от грех мои́х, и вся беззако́ния моя́ очи́сти. Се́рдце чи́сто сози́жди во мне, Бо́же, и дух прав обнови́ во утро́бе мое́й. Не отве́ржи мене́ от лица́ Твоего́, и Ду́ха Твоего́ Свята́го не отыми́ от мене́. Возда́ждь ми ра́дость спасе́ния Твоего́, и Ду́хом Влады́чним утверди́ мя. Научу́ беззако́нныя путе́м Твои́м, и нечести́вии к Тебе́ обратя́тся. Изба́ви мя от крове́й, Бо́же, Бо́же спасе́ния моего́, возра́дуется язы́к мой пра́вде Твое́й. Го́споди, устне́ мои́ отве́рзеши, и уста́ моя́ возвестя́т хвалу́ Твою́. Я́ко а́ще бы восхоте́л еси́ же́ртвы, дал бых у́бо, всесожже́ния не благоволи́ши. Же́ртва Бо́гу дух сокруше́н, се́рдце сокруше́нно и смире́нно Бог не уничижи́т. Ублажи́, Го́споди, благоволе́нием Твои́м Сио́на, и да сози́ждутся сте́ны Иерусали́мския, тогда́ благоволи́ши же́ртву пра́вды, возноше́ние и всесожега́емая: тогда́ возложа́т на олта́рь Твой тельцы́.

Глас 6:

Сла́ва Отцу́ и Сы́ну и Свято́му Ду́ху./ Моли́твами благоверного князя Александра, / Ми́лостиве, очи́сти / мно́жества согреше́ний на́ших.

И ны́не и при́сно и во ве́ки веко́в. Ами́нь./ Моли́твами Богоро́дицы, / Ми́лостиве, очи́сти / мно́жества согреше́ний на́ших.

Поми́луй мя, Бо́же,/ по вели́цей ми́лости Твое́й,/ и по мно́жеству щедро́т Твои́х// очи́сти беззако́ние мое́.

Стихи́ра, глас 6

Прииди́те, вси́ лю́дие, хвалу́ принесе́м блаже́нному, вопию́ще си́це: ра́дуйся, пресве́тлый сто́лпе, просвеща́я на́с чуде́с светлостьми́; ра́дуйся, ро́сный о́блаче, пла́мень погаша́яй страсте́й и ороша́яй ве́рных мы́сли, боже́ственный Алекса́ндре.

Го́споди, поми́луй. (12 раз)

Кано́н свято́му пе́рвый, гла́с 4.

Пе́снь 1.

Ирмос: Мо́ря чермну́ю пучи́ну невла́жными стопа́ми дре́вний пешеше́ствовав Изра́иль, крестообра́зными Моисе́овыма рука́ма Амали́кову си́лу в пусты́ни победи́л е́сть.

Припе́в: Благоверный княже Александре, моли́ Бо́га о на́с.

Свети́льниче многосве́тлый Росси́йския земли́, чудесы́, я́коже со́лнце второ́е, сия́я, все́х на́с помина́й, соверша́ющих па́мять твою́, Алекса́ндре блаже́нне.

Це́ркве Христо́вы бы́л еси́ украше́ние, блаже́нне, честны́м житие́м твои́м, и ны́не мо́лим тя́: свободи́ ны́ моли́твами твои́ми от вся́кия бра́ни бори́теля, пою́щия тя́, Алекса́ндре.

Богородичен: Ра́дуйся, благода́ти исто́чниче; ра́дуйся, ле́ствице и две́рь небе́сная; ра́дуйся, свети́льниче и ста́мно злата́я, и горо́ несеко́мая, Де́во, Жизнода́вца Христа́ ми́ру ро́ждшая.

Пе́снь 3.

Ирмос: Весели́тся о Тебе́ Це́рковь Твоя́, Христе́, зову́щи: Ты́ моя́ кре́пость, Го́споди, и прибе́жище, и утвержде́ние.

Во ве́сь ми́р про́йде сла́ва чуде́с твои́х, блаже́нне, и́миже просвети́л еси́ вселе́нную, от все́х напа́стей избавля́я при́сно.

Благочести́ваго и венцено́снаго Алекса́ндра, соше́дшеся, по достоя́нию восхва́лим, я́ко чуде́с пода́теля оби́льнаго и Го́споду моля́щася о все́х на́с.

Исто́чник чуде́с гро́б тво́й яви́ся неисчерпа́емый, от него́же ре́ки исцеле́ний излива́еши ве́рно па́мять твою́ творя́щим, блаже́нне.

Богородичен: Ты́ еди́на на земли́ преесте́ственных благи́х Хода́таица, Ма́ти Бо́жия, была́ еси́: те́м Ти́, ра́дуйся, зове́м.

Седа́лен, гла́с 8:

Яко звезда́ многосве́тлая яви́лся еси́, све́тлаго ра́ди жития́ твоего́, сосу́д Свята́го Ду́ха бы́в. Сего́ ра́ди по мно́гих ле́тех во гро́бе нетле́нны обрето́шася святы́я твоя́ мо́щи, от ни́хже источа́еши ре́ки чуде́с исцеле́ний ве́рно зову́щим ти́: ра́дуйся, благове́рный вели́кий кня́же Алекса́ндре.

Сла́ва, и ны́не, Богородичен:

Яко Всенепоро́чная Неве́ста Творца́, я́ко Неискусому́жная Ма́ти Изба́вителя, прия́телище я́ко су́щи Уте́шителя, Препе́тая, беззако́нию мя́ су́ща [скве́рное] оби́телище и бесо́м игра́лище в ра́зуме бы́вша, потщи́ся от те́х злоде́йства мя́ изба́вити и све́тлое жили́ще доброде́телей соверши́, Светоно́сная Нетле́нная, отжени́ о́блак страсте́й и вы́шняго прича́стия сподо́би и Све́та невече́рняго моли́твами Твои́ми.

Пе́снь 4.

Ирмос: Вознесе́на Тя́ ви́девши Це́рковь на Кресте́, Со́лнце пра́ведное, ста́ в чи́не свое́м, досто́йно взыва́ющи: сла́ва си́ле Твое́й, Го́споди.

Кто́ любо́вь твою́ и ми́лость ко все́м челове́ком, па́че же щедро́ту десни́цы твоея́ к ни́щим изглаго́лет? и по сме́рти у́бо, я́ко жи́в, просте́рл еси́ ру́ку твою́ и прия́л еси́ от иера́рха сви́ток грехо́в проще́ния.

Дне́сь де́нь свята́го Алекса́ндра пра́зднственный мно́гия созыва́ет на весе́лие духо́вное, и трапе́зу, и пи́щу нетле́нныя жи́зни Боже́ственнаго наслажде́ния.

К Боже́ственному све́ту ны́не преста́вился еси́, све́та сы́н возлю́блен бы́в, в ра́дости и красоте́ с ли́ки Ангельскими ны́не ра́достно лику́еши, блаже́нне.

Богородичен: Све́та Твоего́ блиста́ньми озари́, Отрокови́це Всенепоро́чная, е́же в нощи́ страсте́й искуше́нии одержи́мое се́рдце мое́, пра́вды Со́лнце све́т возсия́вши.

Пе́снь 5

Ирмос: Ты́, Го́споди, мо́й Све́т, в ми́р прише́л еси́, Све́т Святы́й, обраща́яй из мра́чна неве́дения ве́рою воспева́ющия Тя́.

Досточу́дная и пресла́вная па́мять твоя́ возсия́ в Росси́йстей земли́, блаже́нне, и ра́достно ве́рных весели́т собо́ры.

Отверзо́шася тебе́ две́ри Еде́мския, и несказа́нен све́т и трисия́нен возсия́, блаже́нне, в неподви́жнем Ца́рствии небе́снем, и пра́ведных весе́лие прия́л еси́ ра́дуяся.

Ны́не Алекса́ндр блаже́нный, сиро́т и вдо́в ми́лостивый печа́льник, оте́чествие свое́ и вся́ вку́пе я́ве созыва́ет: прииди́те, собра́вшеся, я́ко о́бщему засту́пнику све́тло торжеству́ем.

Богородичен: Сы́й в зра́це Бо́жии, Пребоже́ственный всели́ся во чре́во Твое́, в зра́к мо́й облече́ся Госпо́дь, Пренепоро́чная.

Пе́снь 6.

Ирмос: Пожру́ Ти со гла́сом хвале́ния, Го́споди, Це́рковь вопие́т Ти́, от бесо́вския кро́ве очи́щшися, ра́ди ми́лости от ре́бр Твои́х исте́кшею кро́вию.

Твоя́ свята́я па́мять, Алекса́ндре, вся́ концы́ земли́ Росси́йския весели́т, созыва́ющи ве́рныя в честны́й хра́м тво́й, в не́мже ны́не ра́досно совоку́пльшеся, тя́ мо́лим: огражда́й на́с моли́твами твои́ми, пресла́вне.

Весе́лия дне́сь вся́ испо́лнися Росси́йская земля́, в наро́читый де́нь пра́здника пресла́внаго чудотво́рца, Алекса́ндра блаже́ннаго: соблюда́ет бо оте́чество свое́ вы́ну ненаве́тно.

Сиро́т и вдо́в засту́пника и в беда́х непобори́маго помо́щника, пе́сньми Алекса́ндра ублажи́м, сла́вяще: пра́зднующих бо па́мять его́ че́стно от бе́д избавля́ет и скорбе́й.

Богородичен: Святы́й [Иису́с] и во святы́х почива́яй, всели́ся во утро́бу Твою́, Де́во, и прославля́яй ве́рою и́стинною Сего́, Отрокови́це, сла́вящия.

Конда́к, гла́с 8.

Яко звезду́ тя́ пресве́тлую, почита́ем, от восто́ка возсия́вшую и на за́пад прише́дшую: всю́ бо страну́ сию́ чудесы́ и добро́тою обогаща́еши и просвеща́еши ве́рою чту́щия па́мять твою́, Алекса́ндре блаже́нне. Сего́ ра́ди дне́сь пра́зднуем твое́ успе́ние, лю́дие твои́ су́щии: моли́ спасти́ оте́чество твое́, и вся́ притека́ющия к ра́це моще́й твои́х и ве́рно вопию́щия ти́: ра́дуйся, гра́ду на́шему утвержде́ние.

Ин конда́к, гла́с 4:

Якоже сро́дницы твои́ Бори́с и Гле́б яви́шася тебе́ с небесе́ в по́мощь, подвиза́ющемуся на Ве́лгера Све́йскаго и во́ев его́, та́ко и ты́ ны́не, блаже́нне Алекса́ндре, прииди́ в по́мощь твои́м сро́дником, и побори́ борю́щия ны́.

Икос:

Ве́лий чудотво́рец яви́лся еси́ Росси́йския земли́, блаже́нный Алекса́ндре, неви́димо Христо́вы лю́ди посеща́я и исцеле́ния подава́я бога́тно все́м от души́ приходя́щим и согла́сно вопию́щим си́це: ра́дуйся, сто́лпе пресве́тлый, просвеща́я на́с чуде́с светлостьми́; ра́дуйся, велехва́льнаго кра́ля победи́вый посо́бием Бо́жиим; ра́дуйся, свободи́вый гра́д Пско́в от неве́рных; ра́дуйся, лати́нская уче́ния презре́вый и пре́лесть и́х в ничто́же вмени́вый; ра́дуйся, я́ко восприя́л еси́ в тле́нных ме́сто нетле́нная; ра́дуйся, Све́та Непристу́пнаго зри́телю; ра́дуйся, я́ко лику́еши со Ангелы; ра́дуйся, о́блаче ро́сный, ве́рных мы́сли ороша́яй; ра́дуйся, те́мных страсте́й прогони́телю; ра́дуйся, Росси́йстей земли́ засту́пниче; ра́дуйся, гра́ду на́шему заступле́ние.

Пе́снь 7.

Ирмос: В пещи́ авраа́мстии о́троцы перси́дстей, любо́вию благоче́стия па́че, не́жели пла́менем, опаля́еми, взыва́ху: благослове́н еси́ в хра́ме сла́вы Твоея́, Го́споди.

Дне́сь Це́рковь Христо́ва, пра́зднующи Алекса́ндрово торжество́, соше́дшимся вои́стинну источа́ет благода́ть, приле́жно моля́щимся и любо́вию пою́щим его́.

Во все́х страна́х Росси́йских произы́де веща́ние, я́ко яви́ся в ни́х чудотво́рец пресла́вен, источа́я исцеле́ний мно́жество, все́м прося́щим те́пле.

Дне́сь весе́лия исполня́ется хра́м Пресвяты́я и Живонача́льныя Тро́ицы, в не́мже лежа́т честны́я мо́щи блаже́ннаго, и вси́ притека́ющии облобыза́ют со стра́хом святу́ю ра́ку пресла́внаго, ча́юще ми́лости и благода́ти.

Богородичен: Вы́шняго освяще́нное Боже́ственное селе́ние, ра́дуйся, Тобо́ю бо даде́ся ра́дость, Богоро́дице, зову́щим: благослове́нна Ты́ в жена́х еси́, Всенепоро́чная Влады́чице.

Пе́снь 8.

Ирмос: Ру́це распросте́р, Дании́л, льво́в зия́ния в ро́ве затче́; о́гненную же си́лу угаси́ша, доброде́телию препоя́савшеся, благоче́стия рачи́тели, о́троцы, взыва́юще: благослови́те, вся́ дела́ Госпо́дня, Го́спода.

Ангельстии чи́ни прия́ху блаже́нный ду́х тво́й, преславне, и челове́честии ро́ди пою́т непреста́нно, творя́ще ве́рно па́мять твою́, Алекса́ндре великоимени́те.

Тебе́ в чудесе́х сла́вна Росси́йским страна́м показа́ Бо́г, Алекса́ндре, и украси́ тя небе́сными дарми́: Того́ моли́ поми́ловати все́х на́с.

Побе́ды истинноимени́т вои́стину, ве́рным лю́дем в беда́х, и кре́пок помо́щник яви́лся еси́, Алекса́ндре блаже́нне.

Богородичен: Свяще́нный Тя́ проро́к благообра́зно пропове́да, Две́рь, и Го́ру, и Се́нь, и Зе́млю святу́ю, и Облак све́та, из Него́же во тме́ су́щим возсия́ Со́лнце, Де́во, еди́н Светода́вец.

На 9-й песни поем песнь Пресвятыя Богородицы:

Вели́чит душа́ Моя́ Го́спода и возра́довася дух Мой о Бо́зе Спа́се Мое́м.

К коемуждо стиху припеваем: Честне́йшую Херуви́м / и сла́внейшую без сравне́ния Серафи́м, / без истле́ния Бо́га Сло́ва ро́ждшую, / су́щую Богоро́дицу, Тя велича́ем.

Я́ко призре́ на смире́ние рабы́ Своея́, се бо, от ны́не ублажа́т Мя вси ро́ди.

Честне́йшую Херуви́м / и сла́внейшую без сравне́ния Серафи́м, / без истле́ния Бо́га Сло́ва ро́ждшую, / су́щую Богоро́дицу, Тя велича́ем.

Я́ко сотвори́ Мне вели́чие Си́льный, и свя́то и́мя Его́, и ми́лость Его́ в ро́ды родо́в боя́щимся Его́.

Сотвори́ держа́ву мы́шцею Свое́ю, расточи́ го́рдыя мы́слию се́рдца их.

Низложи́ си́льныя со престо́л, и вознесе́ смире́нныя, а́лчущия испо́лни благ, и богатя́щияся отпусти́ тщи.

Восприя́т Изра́иля о́трока Своего́, помяну́ти ми́лости, я́коже глаго́ла ко отце́м на́шим, Авраа́му и се́мени его́ да́же до ве́ка.

Песнь 9

Ирмос: Ка́мень нерукосе́чный от несеко́мыя горы́, Тебе́, Де́во, краеуго́льный отсече́ся — Христо́с, совокупи́вый разстоя́щаяся естества́. Те́м, веселя́щеся, Тя́, Богоро́дице, велича́ем.

Красе́н те́лом и душе́ю, и благоче́стием сия́я, сла́вне, оби́тель яви́лся еси́ Свята́го Ду́ха, и по сме́рти у́бо к безсме́ртней жи́зни и несконча́емому блаже́нству преше́л еси́, ра́дуяся, Алекса́ндре богому́дре.

Яко светоза́рное, блаже́нне, со́лнце, возсия́в от за́пада, и всю́ заря́ми благоче́стия Росси́йскую зе́млю просвети́л еси́, и отгна́л еси́ о́блаки лжеве́рия, Алекса́ндре пресла́вне.

Твою́ святу́ю па́мять дне́сь све́тло пра́зднуем: испо́лни ра́дости и весе́лия восхваля́ющия тя́, Алекса́ндре великоимени́те.

Богородичен: Све́том мя́ Твоего́ милосе́рдия во тме́ неразу́мия лежа́щаго озари́, еди́на Светода́вца ро́ждшая, Изба́вителя и Бо́га, святы́х венча́вшаго.

Свети́лен.

Слы́шана бы́сть, во дни́ жития́ твоего́ на земли́, во все́х страна́х превели́кая сла́ва твоя́, и тогда́ жены́ Моави́тския страша́ху де́ти своя́ гро́зным твои́м и́менем. И ны́не, блаже́нне, враги́ на́ша неви́димо устраша́й, ополча́ющияся на христолюби́вое твое́ во́инство.

Сла́ва, и ны́не, Богородичен:

Сове́та вели́каго Ангела Отча, родила́ еси́ Христа́, препе́тая Отрокови́це, Царя́ сла́вы: Его́же Кре́ст, апо́столи пропове́давше, просвети́ша язы́ки и научи́ша Тя́, Богоро́дицу, сла́вити и покланя́тися Твоему́ Рождеству́.

Хвали́тны псалмы́, глас 8:

Вся́кое дыха́ние да хва́лит Го́спода./ Хвали́те Го́спода с небе́с,/ хвали́те Его́ в вы́шних.// Тебе́ подоба́ет песнь Бо́гу.

Хвали́те Его́ вси а́нгели Его́,/ хвали́те Его́ вся си́лы Его́.// Тебе́ подоба́ет песнь Бо́гу.

Сти́хиры, глас 8:

Стих: Сотвори́ти в них суд напи́сан/ сла́ва сия́ бу́дет всем преподо́бным Его́.

О, пресла́внаго чудесе́! Ми́ром облада́ющий оставля́ет ми́р, скипетроно́сец росси́йский отлага́ет ски́петр, совлача́ется порфи́ры и гро́бною покрыва́ется плащани́цею, венча́нная глава́ кня́жескую диади́му с себе́ низлага́ет, вре́менное ца́рство оставля́ет на земли́, о ве́чном изве́стен на небеси́, иде́же венча́ся ца́рскою диади́мою.

Стих: Хвали́те Его́ на си́лах Его́,/ хвали́те Его́ по мно́жеству вели́чествия Его́.

Стих: Хвали́те Его́ в тимпа́не и ли́це,/ хвали́те Его́ во стру́нах и орга́не.

Стих: Хвали́те Его́ в кимва́лех доброгла́сных, хвали́те Его́ в кимва́лех восклица́ния. / Вся́кое дыха́ние да хва́лит Го́спода.

Научи́л еси́ на́с прему́дрым де́лом твои́м: ничто́же мо́жем изнести́ от ми́ра сего́, в о́ньже ничто́же внесо́хом. Того́ ра́ди оста́вив вре́менная, возжела́в небе́сная, я́же и насле́див, и на́м о́нех не лиши́тися, мо́лимтися.

Глас 8: Сла́ва Отцу́ и Сы́ну и Свято́му Ду́ху

По́двигом до́брым подвиза́лся еси́, тече́ние сконча́л, ве́ру соблю́л, благове́рный кня́же Алекса́ндре, про́чее же соблюде́ся тебе́ вене́ц пра́вды, и́мже венча́ тя и́стинный Мздовоздая́тель. Того́ моли́, преблаже́нне, вруче́нному тебе́ ста́ду, сыно́м росси́йским, спасти́ся.

Глас 8: И ны́не и при́сно и во ве́ки веко́в. Ами́нь.

Влады́чице, приими́ моли́твы рабо́в Твои́х, и изба́ви на́с от вся́кия ну́жды и печа́ли.

Славосло́вие вели́кое:

Сла́ва в вы́шних Бо́гу, и на земли́ мир, в челове́цех благоволе́ние. Хва́лим Тя, благослови́м Тя, кла́няем Ти ся, славосло́вим Тя, благодари́м Тя, вели́кия ра́ди сла́вы Твоея́. Го́споди Царю́ Небе́сный, Бо́же О́тче Вседержи́телю, Го́споди, Сы́не Единоро́дный, Иису́се Христе́, и Святы́й Ду́ше. Го́споди Бо́же, А́гнче Бо́жий, Сы́не Оте́чь, взе́мляй грех ми́ра, поми́луй нас; взе́мляй грехи́ ми́ра, приими́ моли́тву на́шу; седя́й одесну́ю Отца́, поми́луй нас. Я́ко Ты еси́ еди́н Свят, Ты еси́ еди́н Госпо́дь, Иису́с Христо́с, в сла́ву Бо́га Отца́. Ами́нь.

На всяк день благословлю́ Тя, и восхвалю́ И́мя Твое́ во ве́ки, и в век ве́ка.

Сподо́би, Го́споди, в день сей без греха́ сохрани́тися нам. Благослове́н еси́, Го́споди, Бо́же оте́ц на́ших, и хва́льно и просла́влено И́мя Твое́ во ве́ки. Ами́нь.

Бу́ди, Го́споди, ми́лость Твоя́ на нас, я́коже упова́хом на Тя.

Благослове́н еси́, Го́споди, научи́ мя оправда́нием Твои́м. (Три́жды)

Го́споди, прибе́жище был еси́ нам в род и род. Аз рех: Го́споди, поми́луй мя, исцели́ ду́шу мою́, я́ко согреши́х Тебе́. Го́споди, к Тебе́ прибего́х, научи́ мя твори́ти во́лю Твою́, я́ко Ты еси́ Бог мой: я́ко у Тебе́ исто́чник живота́, во све́те Твое́м у́зрим свет. Проба́ви ми́лость Твою́ ве́дущим Тя.

Святы́й Бо́же, Святы́й Кре́пкий, Святы́й Безсме́ртный, поми́луй нас. (Три́жды)

Сла́ва Отцу́ и Сы́ну и Свято́му Ду́ху и ны́не и при́сно и во ве́ки веко́в. Ами́нь.

Святы́й Безсме́ртный, поми́луй нас.

Святы́й Бо́же, Святы́й Кре́пкий, Святы́й Безсме́ртный, поми́луй нас.

Тропа́рь, глас 4:

Утверди́, Бо́же, святу́ю правосла́вную ве́ру, правосла́вных христиа́н во век ве́ка.

Честне́йшую Херуви́м и Сла́внейшую без сравне́ния Серафи́м, без истле́ния Бо́га Сло́ва ро́ждшую, су́щую Богоро́дицу, Тя велича́ем.

Сла́ва, и ны́не. Го́споди, поми́луй. (Три́жды) Благослови́.

Господи Иисусе Христе, Сыне Божий, моли́твами Пречи́стыя Своея́ Ма́тере, благоверного великого князя Александра Невского, преподобных и богоносных отец наших и всех святы́х, поми́луй и спаси нас я́ко Благ и Челове́колюбец.

Многоле́тие:

Вели́каго Господи́на и Отца́ на́шего Кири́лла,/ Святе́йшаго Патри́арха Моско́вского и всея́ Руси́,/ и Господи́на на́шего (Высоко-) Преосвяще́ннейшаго (имярек),/ (архи-)епи́скопа (митрополита (титул)),/ богохрани́мую страну́ на́шу Росси́йскую,/ и вся правосла́вныя христи́аны,// Го́споди, сохрани́ их на мно́гая ле́та.