Шрифт

▲

Богослужебные тексты для домашнего употребления

Великие праздники и предпразднства

Последование Всеношного бдения в праздник первоверховных апостолов Петра и Павла. Для домашнего (келейного) совершения

Оглавление

ВСЕНО́ЩНОЕ БДЕ́НИЕ

ВЕЛИ́КАЯ ВЕЧЕ́РНЯ

Моли́твами святы́х оте́ц на́ших, Го́споди Иису́се Христе́, Бо́же наш, поми́луй нас. Ами́нь.

Сла́ва Тебе́, Бо́же наш, сла́ва Тебе́.

Царю́ Небе́сный, Уте́шителю, Ду́ше и́стины, И́же везде́ сый и вся исполня́яй, Сокро́вище благи́х и жи́зни Пода́телю, прииди́ и всели́ся в ны, и очи́сти ны от вся́кия скве́рны, и спаси́, Бла́же, ду́ши на́ша.

Святы́й Бо́же, Святы́й Кре́пкий, Святы́й Безсме́ртный, поми́луй нас. (Трижды.)

Сла́ва Отцу́ и Сы́ну и Свято́му Ду́ху, и ны́не и при́сно и во ве́ки веко́в. Ами́нь.

Пресвята́я Тро́ице, поми́луй нас; Го́споди, очи́сти грехи́ на́ша; Влады́ко, прости́ беззако́ния на́ша; Святы́й, посети́ и исцели́ не́мощи на́ша, и́мене Твоего́ ра́ди.

Го́споди, поми́луй, (трижды). Сла́ва, и ны́не:

О́тче наш, И́же еси́ на Небесе́х, да святи́тся и́мя Твое́, да прии́дет Ца́рствие Твое́, да бу́дет во́ля Твоя́, я́ко на Небеси́ и на земли́. Хлеб наш насу́щный да́ждь нам днесь; и оста́ви нам до́лги на́ша, я́коже и мы оставля́ем должнико́м на́шим; и не введи́ нас во искуше́ние, но изба́ви нас от лука́ваго.

Таже, Го́споди, поми́луй, (12), Сла́ва, и ны́не:

Прииди́те, поклони́мся Царе́ви на́шему Бо́гу.

Прииди́те, поклони́мся и припаде́м Христу́, Царе́ви на́шему Бо́гу.

Прииди́те, поклони́мся и припаде́м Самому́ Христу́, Царе́ви и Бо́гу на́шему.

Псалом 103:

Поется часть псалма:

Благослови́, душе́ моя́, Го́спода. / Благослове́н еси́, Го́споди. / Го́споди, Бо́же мой, возвели́чился еси́ зело́. / Благослове́н еси́, Го́споди. / Во испове́дание и в велеле́поту обле́клся еси́. / Благослове́н еси́, Го́споди. / Посреде́ гор про́йдут во́ды. / Ди́вна дела́ Твоя́, Го́споди. / Вся прему́дростию сотвори́л еси́. / Сла́ва Ти, Го́споди, сотвори́вшему вся.

Или читается псалом полностью:

Благослови́, душе́ моя́, Го́спода. Го́споди, Бо́же мой, возвели́чился еси́ зело́. Во испове́дание и в велеле́поту обле́клся еси́. Одея́йся све́том, я́ко ри́зою, простира́яй не́бо, я́ко ко́жу. Покрыва́яй вода́ми превы́спренняя Своя́, полага́яй о́блаки на восхожде́ние Свое́, ходя́й на крилу́ ве́треню. Творя́й А́нгелы Своя́ ду́хи и слуги́ Своя́ пла́мень о́гненный. Основа́яй зе́млю на тве́рди ея́, не преклони́тся в век ве́ка. Бе́здна, я́ко ри́за, одея́ние ея́, на гора́х ста́нут во́ды, от запреще́ния Твоего́ побе́гнут, от гла́са гро́ма Твоего́ убоя́тся. Восхо́дят го́ры и нисхо́дят поля́ в ме́сто, е́же основа́л еси́ им. Преде́л положи́л еси́, eго́же не пре́йдут, ниже́ обратя́тся покры́ти зе́млю. Посыла́яй исто́чники в де́брех, посреде́ гор про́йдут во́ды. Напая́ют вся зве́ри се́льныя, ждут она́гри в жа́жду свою́. На ты́х пти́цы небе́сныя привита́ют, от среды́ ка́мения дадя́т глас. Напая́яй го́ры от превы́спренних Свои́х, от плода́ дел Твои́х насы́тится земля́. Прозяба́яй траву́ ското́м, и злак на слу́жбу челове́ком, извести́ хлеб от земли́. И вино́ весели́т се́рдце челове́ка, ума́стити лице́ еле́ем, и хлеб се́рдце челове́ка укрепи́т. Насы́тятся древа́ польска́я, ке́дри Лива́нстии, и́хже еси́ насади́л. Та́мо пти́цы вогнездя́тся, ероди́ево жили́ще предводи́тельствует и́ми. Го́ры высо́кия еле́нем, ка́мень прибе́жище за́яцем. Сотвори́л есть луну́ во времена́, со́лнце позна́ за́пад свой. Положи́л еси́ тму, и бысть нощь, в не́йже про́йдут вси зве́рие дубра́внии. Ски́мни рыка́ющии, восхи́тити и взыска́ти от Бо́га пи́щу себе́. Возсия́ со́лнце и собра́шася и в ло́жах свои́х ля́гут. Изы́дет челове́к на де́ло свое́ и на де́лание свое́ до ве́чера. Я́ко возвели́чишася дела́ Твоя́, Го́споди, вся прему́дростию сотвори́л еси́, испо́лнися земля́ тва́ри Твоея́. Сие́ мо́ре вели́кое и простра́нное, та́мо га́ди, и́мже несть числа́, живо́тная ма́лая с вели́кими, та́мо корабли́ препла́вают, змий сей, eго́же созда́л еси руга́тися eму́. Вся к Тебе́ ча́ют, да́ти пи́щу им во бла́го вре́мя. Да́вшу Тебе́ им соберу́т, отве́рзшу Тебе́ ру́ку вся́ческая испо́лнятся бла́гости, отвра́щшу же Тебе́ лице́, возмяту́тся, отъи́меши дух их, и исче́знут, и в персть свою́ возвратя́тся. По́слеши Ду́ха Твоего́, и сози́ждутся, и обнови́ши лице́ земли́. Бу́ди сла́ва Госпо́дня во ве́ки, возвесели́тся Госпо́дь о де́лех Свои́х, призира́яй на зе́млю, и творя́й ю́ трясти́ся, прикаса́яйся гора́м, и дымя́тся. Воспою́ Го́сподеви в животе́ мое́м, пою́ Бо́гу моему́, до́ндеже есмь, да услади́тся Ему́ бесе́да моя́, аз же возвеселю́ся о Го́споде. Да исче́знут гре́шницы от земли́, и беззако́нницы, я́коже не бы́ти им. Благослови́, душе́ моя́, Го́спода.

Со́лнце позна́ за́пад свой. Положи́л еси́ тму, и бысть нощь. Я́ко возвели́чишася дела́ Твоя́, Го́споди, вся прему́дростию сотвори́л еси́.

Сла́ва, и ны́не: Аллилу́иа, аллилу́иа, аллилу́иа, сла́ва Тебе́ Бо́же. Трижды.

Блаже́н муж:

Блаже́н муж, и́же не и́де на сове́т нечести́вых.

Аллилу́иа, аллилу́иа, аллилу́иа.

Я́ко весть Госпо́дь путь пра́ведных, и путь нечести́вых поги́бнет.

Аллилу́иа, аллилу́иа, аллилу́иа.

Рабо́тайте Го́сподеви со стра́хом и ра́дуйтеся Ему́ с тре́петом.

Аллилу́иа, аллилу́иа, аллилу́иа.

Блаже́ни вси наде́ющиися Нань.

Аллилу́иа, аллилу́иа, аллилу́иа.

Воскресни́, Го́споди, спаси́ мя, Бо́же мой.

Аллилу́иа, аллилу́иа, аллилу́иа.

Госпо́дне есть спасе́ние, и на лю́дех Твои́х благослове́ние Твое́.

Аллилу́иа, аллилу́иа, аллилу́иа.

Сла́ва Отцу́ и Сы́ну и Свято́му Духу.

Аллилу́иа, аллилу́иа, аллилу́иа.

И ны́не и при́сно и во ве́ки веко́в. Ами́нь.

Аллилу́иа, аллилу́иа, аллилу́иа.

Аллилу́иа, аллилу́иа, аллилу́иа, сла́ва Тебе́ Бо́же. (Три́жды)

Го́споди, воззва́х, глас 2:

Го́споди, воззва́х к Тебе́, услы́ши мя./ Услы́ши мя, Го́споди./ Го́споди, воззва́х к Тебе́, услы́ши мя:/ вонми́ гла́су моле́ния моего́,/ внегда́ воззва́ти ми к Тебе́.// Услы́ши мя, Го́споди.

Да испра́вится моли́тва моя́,/ я́ко кади́ло пред Тобо́ю,/ воздея́ние руку́ мое́ю/ – же́ртва вече́рняя.// Услы́ши мя, Го́споди.

Стихи́ры пра́здника, глас 2:

Стих: Из глубины́ воззва́х к Тебе́, Го́споди,// Го́споди, услы́ши глас мой.

Ки́ими похва́льными венцы́/ увязе́м Петра́ и Па́вла,/ разделе́нныя телесы́/ и совоку́пленныя ду́хом,/ Богопропове́дников первостоя́тели?/ О́ваго у́бо я́ко апо́столов преднача́льника,/ о́ваго же я́ко па́че ине́х труди́вшася./ Сих бо вои́стинну досто́йно безсме́ртныя сла́вы венцы́/ венча́ет Христо́с Бог наш,// име́яй ве́лию ми́лость.

Стих: И́мене ра́ди Твоего́ потерпе́х Тя, Го́споди, потерпе́ душа́ моя́ в сло́во Твое́,// упова́ душа́ моя́ на Го́спода.

Ки́ими пе́сненными добро́тами/ воспое́м Петра́ и Па́вла?/ Богоразу́мия криле́, прелете́вшия концы́/ и к Небеси́ возне́сшияся,/ ру́це Ева́нгелия благода́ти,/ но́зе и́стиннаго пропове́дания,/ ре́ки прему́дрости,/ кре́стныя ро́ги,/ и́миже де́монов бровь Христо́с низложи́,// име́яй ве́лию ми́лость.

Стих: От стра́жи у́тренния до но́щи, от стра́жи у́тренния,// да уповае́т Изра́иль на Го́спода.

Ки́ими духо́вными пе́сньми/ похва́лим Петра́ и Па́вла?/ Безбо́жия закла́вшия незатыка́емая уста́,/ стра́шныя Ду́ха мечи́,/ Ри́ма све́тлая удобре́ния,/ всея́ вселе́нныя пита́тели,/ Но́ваго Заве́та Богопи́санныя скрижа́ли мы́сленныя,/ я́же в Сио́не Христо́с возгласи́,// име́яй ве́лию ми́лость.

Глас 4: Сла́ва Отцу́ и Сы́ну и Свято́му Ду́ху.

Трикра́тным вопроше́нием,/ е́же: Пе́тре, лю́биши ли Мя?/ трикра́тное отверже́ние Христо́с испра́вил есть./ Те́мже и к Тайнове́дцу Си́мон:/ Го́споди, вся ве́си, вся зна́еши,/ Ты ве́си, я́ко люблю́ Тя./ Те́мже к нему́ Спас:/ паси́ о́вцы Моя́, паси́ избра́нныя Моя́,/ паси́ а́гнцы Моя́, я́же Моею́ кро́вию снабде́х во спасе́ние./ Того́ моли́, Богоблаже́нне апо́столе,// дарова́ти нам ве́лию ми́лость.

Глас 4: И ны́не и при́сно и во ве́ки веко́в. Ами́нь.

И́же Тебе́ ра́ди богооте́ц проро́к Дави́д/ пе́сненно о Тебе́ провозгласи́,/ вели́чия тебе́ Сотво́ршему:/ предста́ Цари́ца одесну́ю Тебе́./ Тя бо Ма́терь, Хода́таицу живота́ показа́,/ без отца́ из Тебе́ вочелове́читися Благоволи́вый Бог:/ да Свой па́ки обнови́т о́браз, истле́вший страстьми́,/ и заблу́ждшее горохи́щное обре́т овча́,/ на ра́мо восприи́м, к Отцу́ принесе́т,/ и Своему́ хоте́нию, с Небе́сными совокупи́т Си́лами,/ и спасе́т, Богоро́дице, мир,// Христо́с име́яй ве́лию и бога́тую ми́лость.

Све́те Тихи́й:

Све́те Ти́хий святы́я сла́вы Безсме́ртнаго Отца́ Небе́снаго, Свята́го, Блаже́ннаго, Иису́се Христе́! Прише́дше на за́пад со́лнца, ви́девше свет вече́рний, пое́м Отца́, Сы́на и Свята́го Ду́ха, Бо́га. Досто́ин еси́ во вся времена́ пет бы́ти гла́сы преподо́бными, Сы́не Бо́жий, живо́т дая́й; те́мже мир Тя сла́вит.

Пареми́и:

Собо́рнаго Посла́ния Петро́ва чте́ние.

Бра́тие, благослове́н Бог и Оте́ц Го́спода на́шего Иису́са Христа́, И́же по мно́зей Свое́й ми́лости порожде́й нас во упова́ние жи́во воскресе́нием Иису́с Христо́вым от ме́ртвых, в насле́дие нетле́нно, и нескве́рно, и неувяда́емо, соблюде́но на Небесе́х вас ра́ди, и́же си́лою Бо́жиею соблюде́ни ве́рою во спасе́ние, гото́вое яви́тися во вре́мя после́днее. О не́мже ра́дуйтеся, ма́ло ны́не, а́ще ле́по есть, приско́рбни бы́вше в разли́чных напа́стех, да искуше́ние ва́шея ве́ры многочестне́йше зла́та ги́бнуща, огне́м же искуше́на, обря́щется в похвалу́ и честь и сла́ву, во открове́нии Иису́с Христо́ве, Его́же не ви́девше, лю́бите, и на Него́же ны́не не зря́ще, ве́рующе же, ра́дуетеся ра́достию неизглаго́ланною и просла́вленною, прие́млюще кончи́ну ве́ре ва́шей, спасе́ние душа́м.

Собо́рнаго Посла́ния Петро́ва чте́ние.

Возлю́бленнии, препоя́савше чре́сла помышле́ния ва́шего, трезвя́щеся соверше́нне, упова́йте на приноси́мую вам благода́ть открове́нием Иису́с Христо́вым. Я́ко ча́да послуша́ния, не преобразу́ющеся пе́рвыми неве́дения ва́шего похоте́нии, но по зва́вшему вы Свято́му, и са́ми свя́ти во всем житии́ бу́дите. Зане́ пи́сано есть: свя́ти бу́дите, я́ко Аз Свят есмь. И а́ще Отца́ называ́ете, нелицеме́рно судя́ща кому́ждо по де́лу, со стра́хом жития́ ва́шего вре́мя жи́тельствуйте, ве́дяще, я́ко не истле́нным сребро́м или́ зла́том изба́вистеся от су́етнаго ва́шего жития́, отцы́ пре́даннаго, но честно́ю кро́вию, я́ко А́гнца непоро́чна и Пречи́ста, Христа́.

Собо́рнаго Посла́ния Петро́ва чте́ние.

Возлю́бленнии, молю́, я́ко прише́льцы и стра́нники, огреба́тися от плотски́х похоте́й, я́же вою́ют на ду́шу, житие́ ва́ше иму́ще добро́ во язы́цех, да о не́мже клеве́щут вас, а́ки злоде́ев, от до́брых дел ви́девше, просла́вят Бо́га в день просвеще́ния. Повини́теся у́бо вся́кому челове́чу созда́нию, Го́спода ра́ди: а́ще царю́, я́ко преоблада́ющу, а́ще ли же князе́м, я́ко от Него́ по́сланным, во отмще́ние у́бо злоде́ем, в похвалу́ же благотво́рцем. Я́ко та́ко есть во́ля Бо́жия, благотворя́щим обуздова́ти безу́мных челове́к неве́жество, я́ко свобо́дни, а не я́ко прикрове́ние иму́ще зло́бы свобо́ду, но я́ко раби́ Бо́жии. Всех почита́йте, бра́тство возлюби́те, Бо́га бо́йтеся, царя́ чти́те. Раби́, повину́йтеся во вся́ком стра́се влады́кам, не то́кмо благи́м и кро́тким, но и стропти́вым. Се бо есть уго́дно пред Бо́гом, а́ще со́вести ра́ди Бо́жия терпи́т кто ско́рби, стражда́ без пра́вды. Ка́я бо похвала́, а́ще согреша́юще, му́чими, терпите́? Но, а́ще добро́ творя́ще и стра́ждуще, терпите́, сие́ уго́дно пред Бо́гом. На сие́ бо и зва́ни бы́сте, зане́ и Христо́с пострада́ по нас, нам оста́вль о́браз, да после́дуем стопа́м Его́. И́же греха́ не сотвори́, ни обре́теся лесть во усте́х Его́. И́же укоря́емь, проти́ву не укоря́ше, стражда́, не преща́ше, предая́ше же судя́щему пра́ведно. И́же грехи́ на́ша Сам вознесе́ на те́ле Свое́м на дре́во, да, от грех избы́вше, пра́вдою поживе́м.

Го́споди, поми́луй. (Три́жды,)

Сподо́би, Го́споди:

Сподо́би, Го́споди, в ве́чер сей без греха́ сохрани́тися нам. Благослове́н еси́, Го́споди, Бо́же оте́ц на́ших, и хва́льно и просла́влено и́мя Твое́ во ве́ки. Ами́нь.

Бу́ди, Го́споди, ми́лость Твоя́ на нас, я́коже упова́хом на Тя. Благослове́н еси́, Го́споди, научи́ мя оправда́нием Твои́м. Благослове́н еси́, Влады́ко, вразуми́ мя оправда́нием Твои́м. Благослове́н еси́, Святы́й, просвети́ мя оправда́нии Твои́ми.

Го́споди, ми́лость Твоя́ во век, дел руку́ Твое́ю не пре́зри. Тебе́ подоба́ет хвала́, Тебе́ подоба́ет пе́ние, Тебе́ сла́ва подоба́ет. Отцу́ и Сы́ну и Свято́му Ду́ху, ны́не и при́сно и во ве́ки веко́в. Ами́нь.

Лития́:

Стихи́ры:

Глас 2: Гряди́те, собо́ри днесь ве́рных,/ благохва́льное и кра́сное собра́ние,/ благода́ти избра́нныя хитрецы́,/ Петра́ и Па́вла, подо́бными хвала́ми венча́ем,/ я́ко незави́стно всем сло́во все́явше,/ с си́ми и благода́ть Ду́ха обогати́ша,/ и, и́стиннаго виногра́да су́ще ло́зие,/ грозд зрел нам возде́лаша,/ веселя́щ сердца́ на́ша./ К ни́мже открове́нным лице́м и чи́стою со́вестию возопие́м, глаго́люще:/ ра́дуйтеся, разори́тели безслове́сных и служи́телие слове́сных./ Ра́дуйтеся, всех Творца́ и Строи́теля избра́ния кра́сная./ Ра́дуйтеся, хода́таи благи́х и отгони́телие ле́стных,/ и́хже да умо́лим:/ моли́теся при́сно к Зижди́телю и Учи́телю/ мир крепкостоя́телен ми́ру дарова́ти// и душа́м на́шим ве́лию ми́лость.

Ученики́ Христо́вы и основа́ния Це́ркве,/ и́стинныя столпы́ и сте́ны/ и тру́бы Боже́ственныя Христо́вых уче́ний и страда́ний,/ верхо́вныя Петра́ и Па́вла,/ я́ко всего́ ми́ра предста́тели, восхва́лим:/ си́и бо, обте́кше широту́ всея́ земли́,/ я́коже ра́лом, все́яша ве́ру/ и всем Богоразу́мие всади́ша,/ Тро́йческое явля́юще Сло́во./ О, Пе́тре, ка́меню и основа́ние,/ и Па́вле, сосу́де избра́нный!/ И́же и сопряже́ннии волы́ Христо́вы,/ вся привлеко́ша к Богоразу́мию язы́ки,/ гра́ды же и о́стровы,/ евре́и же па́ки ко Христу́ возведо́ша,// и мо́лят спасти́ся душа́м на́шим.

Пе́тре, верхо́вне сла́вных апо́стол, ка́меню ве́ры,/ и Па́вле чу́дне, Святы́х Церкве́й вити́я и свети́льниче,/ Боже́ственному престо́лу предстоя́ще,// о нас Христу́ моли́теся.

Па́вле, уста́ Госпо́дня, основа́ние уче́ний,/ иногда́ у́бо гони́тель Иису́са Спа́са,/ ны́не же и первопресто́льник апо́столов быв, блаже́нне./ Те́мже неизглаго́ланная ви́дел еси́, му́дре,/ да́же до тре́тияго небесе́ возше́д, и взыва́л еси́:// прииди́те со мно́ю, и благи́х не лиши́мся.

Глас 3: Вы́шняго Иерусали́ма гра́ждане,/ ка́мень ве́ры, вити́я Це́ркве Христо́вы,/ Тро́йческая дво́ица, ми́ра ловцы́,/ оста́вльше днесь я́же на земли́,/ отыдо́ша страда́нием к Бо́гу/ и мо́лятся Ему́ со дерзнове́нием// спасти́ся душа́м на́шим.

Глас 5: Сла́ва Отцу́ и Сы́ну и Свято́му Ду́ху.

Прему́дрость Бо́жия, Соприсносу́щное Сло́во О́тчее,/ я́коже в Ева́нгелиях предрече́, многопло́дныя ло́зы/ вы есте́, всехва́льнии апо́столи,/ и́же грозд зрел и красе́н в ве́твех ва́ших нося́щии,/ его́же, ве́рнии, яду́ще, услажда́ем вкус к весе́лию./ Пе́тре, ка́меню ве́ры,/ и Па́вле, похвало́ вселе́нныя,// утверди́те ста́до, е́же стяжа́сте уче́ньми ва́шими.

И ны́не и при́сно и во ве́ки веко́в. Ами́нь.

Блажи́м Тя Богоро́дице Де́во,/ и сла́вим Тя ве́рнии по до́лгу,/ град непоколеби́мый, сте́ну необори́мую,// тве́рдую Предста́тельницу, и Прибе́жище душ на́ших.

Го́споди, поми́луй. (40 раз)

Стихи́ры на стихо́вне:

Стихи́ры: Глас 1:

Я́же по вся гра́ды у́зы и ско́рби твоя́,/ кто ска́жет, сла́вне апо́столе Па́вле?/ Труды́, боле́зни и бде́ния,/ я́же во а́лчбе и жа́жде злостра́стия,/ я́же в зиме́ и наготе́, ко́шницу и жезлобие́ния,/ каменомета́ния и обхожде́ния, глубины́ истопле́ния,/ позо́р был еси́ А́нгелов и челове́ков./ Вся у́бо претерпе́л еси́ о укрепля́ющем тя Христе́,/ да мир приобря́щеши, о Христе́ Иису́се, Го́споде твое́м./ Те́мже мо́лим тя, творя́щии па́мять твою́ ве́рно:// непреста́нно моли́ спасти́ся душа́м на́шим.

Стих: Во всю зе́млю изы́де веща́ние их/ и в концы́ вселе́нныя глаго́лы их.

Я́же по вся гра́ды вяза́ния и ско́рби твоя́/ кто испове́сть, сла́вне апо́столе?/ Или́ кто предста́вит по́двиги и труды́ твоя́,/ и́миже труди́лся еси́ во Ева́нгелии Христо́ве,/ да вся приобря́щеши и Христу́ приведе́ши Це́рковь?/ Но сию́ проси́ сохрани́ти до́брое твое́ испове́дание,/ да́же до коне́чнаго издыха́ния,// Па́вле апо́столе и учи́телю Церкве́й.

Стих: Небеса́ пове́дают сла́ву Бо́жию,/ творе́ние же руку́ Его́ возвеща́ет твердь.

Свети́льники вели́кия Це́ркве,/ Петра́ и Па́вла восхва́лим:/ па́че бо со́лнца возсия́ша на тве́рди ве́ры/ и язы́ки заря́ми пропове́дания от неве́дения возведо́ша./ Ов у́бо на кресте́ пригво́ждься,/ к Небеси́ ше́ствия творя́,/ иде́же Ца́рствия ключи́ от Христа́ прия́т,/ ов же мече́м усе́чен быв,/ ко Спа́су отше́д,/ по достоя́нию ублажа́ются/ и о́ба Изра́илю возвеща́ют,/ я́ко на Самаго́ Го́спода непра́ведно ру́це простре́./ Те́мже моли́твами их, Христе́ Бо́же наш,/ на ны шата́ющияся низложи́/ и правосла́вных ве́ру утверди́,// я́ко Человеколю́бец.

Глас 6: Сла́ва Отцу́ и Сы́ну и Свято́му Ду́ху.

Пра́здник ра́достен возсия́ конце́м днесь:/ всечестна́я па́мять прему́дрых апо́стол и верхо́вных/ Петра́ и Па́вла,/ те́мже и Рим сра́дуется, ликовству́я в пе́снех и пе́ниих./ Пра́зднуем и мы, бра́тие,/ всечестны́й сей день соверши́вше./ Ра́дуйся, Пе́тре апо́столе,/ и́скренний дру́же твоего́ Учи́теля,/ Христа́, Бо́га на́шего;/ ра́дуйся, Па́вле вселюбе́знейший,/ и пропове́дниче ве́ры, и учи́телю вселе́нныя;/ я́ко име́я дерзнове́ние,/ супру́же святоизбра́нный,/ Христа́, Бо́га на́шего моли́те// спасти́ся душа́м на́шим.

И ны́не и при́сно и во ве́ки веко́в. Ами́нь.

Творе́ц и Изба́витель мой, Пречи́стая,/ Христо́с Госпо́дь, из Твои́х ложе́сн проше́д,/ в мя Оболки́йся, пе́рвыя кля́твы Ада́ма свободи́./ Те́мже Ти, Всечи́стая,/ я́ко Бо́жии Ма́тери же и Де́ве,/ вои́стинну вопие́м немо́лчно:/ ра́дуйся А́нгельски, ра́дуйся, Влады́чице,/ Предста́тельство и Покро́ве// и Спасе́ние ду́ш на́ших.

Моли́тва свята́го Симео́на Богоприи́мца:

Ны́не отпуща́еши раба́ Твоего́, Влады́ко,/ по глаго́лу Твоему́, с ми́ром;/ я́ко ви́деста о́чи мои́ спасе́ние Твое́,/ е́же еси́ угото́вал пред лице́м всех люде́й,/ свет во открове́ние язы́ков,// и сла́ву люде́й Твои́х Изра́иля.

Святы́й Бо́же, Святы́й Кре́пкий, Святы́й Безсме́ртный, поми́луй нас. (Три́жды)

Сла́ва Отцу́ и Сы́ну и Свято́му Ду́ху, и ны́не и при́сно и во ве́ки веко́в. Ами́нь.

Го́споди, поми́луй. (Три́жды)

Сла́ва Отцу́ и Сы́ну и Свято́му Ду́ху, и ны́не и при́сно и во ве́ки веко́в. Ами́нь.

Тропа́рь, глас 4:

Апо́столов первопресто́льницы/ и вселе́нныя учи́телие,/ Влады́ку всех моли́те/ мир вселе́нней дарова́ти// и душа́м на́шим ве́лию ми́лость. (Дважды)

Богоро́дице Де́во, ра́дуйся,/ Благода́тная Мари́е, Госпо́дь с Тобо́ю:/ благослове́на Ты в жена́х/ и благослове́н Плод чре́ва Твоего́,// яко Спа́са родила́ еси душ на́ших. (Единожды)

Бу́ди И́мя Госпо́дне благослове́но от ны́не и до ве́ка. (Три́жды)

Псало́м 33:

Благословлю́ Го́спода на вся́кое вре́мя,/ вы́ну хвала́ Его́ во усте́х мои́х./ О Го́споде похва́лится душа́ моя́,/ да услы́шат кро́тцыи, и возвеселя́тся./ Возвели́чите Го́спода со мно́ю,/ и вознесе́м И́мя Его́ вку́пе./ Взыска́х Го́спода, и услы́ша мя,/ и от все́х скорбе́й мои́х изба́ви мя./ Приступи́те к Нему́, и просвети́теся,/ и ли́ца ва́ша не постыдя́тся./ Сей ни́щий воззва́, и Госпо́дь услы́ша и́,/ и от все́х скорбе́й его́ спасе́ и́./ Ополчи́тся а́нгел Госпо́день о́крест боя́щихся Его́,/ и изба́вит их./ Вкуси́те и ви́дите, я́ко благ Госпо́дь:/ блаже́н муж, и́же упова́ет Нань./ Бо́йтеся Го́спода, вси́ святи́и Его́,/ я́ко несть лише́ния боя́щимся Его́./ Бога́тии обнища́ша и взалка́ша:/ взыска́ющии же Го́спода// не лиша́тся вся́каго бла́га.

У́ТРЕНЯ.

Шестопса́лмие:

Сла́ва в вы́шних Бо́гу, и на земли́ мир, в челове́цех благоволе́ние. (Три́жды)

Го́споди, устне́ мои́ отве́рзеши, и уста́ моя́ возвестя́т хвалу́ Твою́. (Два́жды)

Псалом 3:

Го́споди, что ся умно́жиша стужа́ющии ми́? Мно́зи востаю́т на мя, мно́зи глаго́лют души́ мое́й: несть спасе́ния eму́ в Бо́зе eго́. Ты же, Го́споди, Засту́пник мой еси́, сла́ва моя́ и вознося́й главу́ мою́. Гла́сом мои́м ко Го́споду воззва́х, и услы́ша мя от горы́ святы́я Своея́. Аз усну́х, и спах, воста́х, я́ко Госпо́дь засту́пит мя. Не убою́ся от тем люде́й, о́крест напа́дающих на мя. Воскресни́, Го́споди, спаси́ мя, Бо́же мой, я́ко Ты порази́л еси́ вся вражду́ющыя ми всу́е: зу́бы гре́шников сокруши́л еси́. Госпо́дне есть спасе́ние, и на лю́дех Твои́х благослове́ние Твое́.

Аз усну́х, и спах, воста́х, я́ко Госпо́дь засту́пит мя.

Псалом 37:

Го́споди, да не я́ростию Твое́ю обличи́ши мене́, ниже́ гне́вом Твои́м нака́жеши мене́. Я́ко стре́лы Твоя́ унзо́ша во мне, и утверди́л еси́ на мне ру́ку Твою́. Несть исцеле́ния в пло́ти мое́й от лица́ гне́ва Твоего́, несть ми́ра в косте́х мои́х от лица́ грех мои́х. Я́ко беззако́ния моя́ превзыдо́ша главу́ мою́, я́ко бре́мя тя́жкое отяготе́ша на мне. Возсмерде́ша и согни́ша ра́ны моя́ от лица́ безу́мия моего́. Пострада́х и сляко́хся до конца́, весь день се́туя хожда́х. Я́ко ля́двия моя́ напо́лнишася поруга́ний, и несть исцеле́ния в пло́ти мое́й. Озло́блен бых и смири́хся до зела́, рыка́х от воздыха́ния се́рдца моего́. Го́споди, пред Тобо́ю все жела́ние мое́ и воздыха́ние мое́ от Тебе́ не утаи́ся. Се́рдце мое́ смяте́ся, оста́ви мя си́ла моя́, и свет о́чию мое́ю, и той несть со мно́ю. Дру́зи мои́ и и́скреннии мои́ пря́мо мне прибли́жишася и ста́ша, и бли́жнии мои́ отдале́че мене́ ста́ша и нужда́хуся и́щущии ду́шу мою́, и и́щущии зла́я мне глаго́лаху су́етная и льсти́вным весь день поуча́хуся. Аз же я́ко глух не слы́шах и я́ко нем не отверза́яй уст свои́х. И бых я́ко челове́к не слы́шай и не имы́й во усте́х свои́х обличе́ния. Я́ко на Тя, Го́споди, упова́х, Ты услы́шиши, Го́споди Бо́же мой. Я́ко рех: да не когда́ пора́дуют ми ся врази́ мои́: и внегда́ подвижа́тися нога́м мои́м, на мя велере́чеваша. Я́ко аз на ра́ны гото́в, и боле́знь моя́ предо мно́ю есть вы́ну. Я́ко беззако́ние мое́ аз возвещу́ и попеку́ся о гресе́ мое́м. Врази́ же мои́ живу́т и укрепи́шася па́че мене́, и умно́жишася ненави́дящии мя без пра́вды. Воздаю́щии ми зла́я возблага́я оболга́ху мя, зане́ гоня́х благосты́ню. Не оста́ви мене́, Го́споди Бо́же мой, не отступи́ от Мене́. Вонми́ в по́мощь мою́, Го́споди спасе́ния моего́.

Не оста́ви мене́, Го́споди Бо́же мой, не отступи́ от Мене́. Вонми́ в по́мощь мою́, Го́споди спасе́ния моего́.

Псалом 62:

Бо́же, Бо́же мой, к Тебе́ у́тренюю, возжада́ Тебе́ душа́ моя́, коль мно́жицею Тебе́ плоть моя́, в земли́ пу́сте и непрохо́дне, и безво́дне. Та́ко во святе́м яви́хся Тебе́, ви́дети си́лу Твою́ и сла́ву Твою́. Я́ко лу́чши ми́лость Твоя́ па́че живо́т, устне́ мои́ похвали́те Тя. Та́ко благословлю́ Тя в животе́ мое́м, о и́мени Твое́м воздежу́ ру́це мои́. Я́ко от ту́ка и ма́сти да испо́лнится душа́ моя́, и устна́ма ра́дости восхва́лят Тя уста́ моя́. А́ще помина́х Тя на посте́ли мое́й, на у́тренних поуча́хся в Тя. Я́ко был еси́ Помо́щник мой, и в кро́ве крилу́ Твое́ю возра́дуюся. Прильпе́ душа́ моя́ по Тебе́, мене́ же прия́т десни́ца Твоя́. Ти́и же всу́е иска́ша ду́шу мою́, вни́дут в преиспо́дняя земли́, предадя́тся в ру́ки ору́жия, ча́сти ли́совом бу́дут. Царь же возвесели́тся о Бо́зе, похва́лится всяк клены́йся Им, я́ко загради́шася уста́ глаго́лющих непра́ведная.

На у́тренних поуча́хся в Тя. Я́ко был еси́ Помо́щник мой, и в кро́ве крилу́ Твое́ю возра́дуюся. Прильпе́ душа́ моя́ по Тебе́, мене́ же прия́т десни́ца Твоя́.

Сла́ва Отцу́ и Сы́ну и Свято́му Ду́ху, и ны́не и при́сно и во ве́ки веко́в. Ами́нь.

Аллилу́иа, аллилу́иа, аллилу́иа, сла́ва Тебе́ Бо́же. (Три́жды)

Го́споди поми́луй. (Три́жды)

Сла́ва Отцу́ и Сы́ну и Свято́му Ду́ху, и ны́не и при́сно и во ве́ки веко́в. Ами́нь.

Псалом 87:

Го́споди Бо́же спасе́ния моего́, во дни воззва́х, и в нощи́ пред Тобо́ю. Да вни́дет пред Тя моли́тва моя́: приклони́ у́хо Твое́ к моле́нию моему́, я́ко испо́лнися зол душа́ моя́, и живо́т мой аду прибли́жися. Привмене́н бых с низходя́щими в ров, бых я́ко челове́к без по́мощи, в ме́ртвых свобо́дь, я́ко я́звеннии спя́щии во гро́бе, и́хже не помяну́л еси́ ктому́, и ти́и от руки́ Твоея́ отринове́ни бы́ша. Положи́ша мя в ро́ве преиспо́днем, в те́мных и се́ни сме́ртней. На мне утверди́ся я́рость Твоя́, и вся во́лны Твоя́ наве́л еси́ на мя. Уда́лил еси́ зна́емых мои́х от Мене́, положи́ша мя ме́рзость себе́: пре́дан бых и не исхожда́х. О́чи мои́ изнемого́сте от нищеты́, воззва́х к Тебе́, Го́споди, весь день, возде́х к Тебе́ ру́це мои́. Еда́ ме́ртвыми твори́ши чудеса́? Или́ вра́чеве воскреся́т, и испове́дятся Тебе́? Еда́ пове́сть кто во гро́бе ми́лость Твою́, и и́стину Твою́ в поги́бели? Еда́ позна́на бу́дут во тьме чудеса́ Твоя́, и пра́вда Твоя́ в земли́ забве́нней? И аз к Тебе́, Го́споди, воззва́х и у́тро моли́тва моя́ предвари́т Тя. Вску́ю, Го́споди, отре́еши ду́шу мою́, отвраща́еши лице́ Твое́ от Мене́? Нищ есмь аз, и в труде́х от ю́ности моея́; возне́с же ся, смири́хся, и изнемого́х. На мне преидо́ша гне́ви Твои́, устраше́ния Твоя́ возмути́ша мя, обыдо́ша мя я́ко вода́, весь день одержа́ша мя вку́пе. Уда́лил еси́ от Мене́ дру́га и и́скренняго, и зна́емых мои́х от страсте́й.

Го́споди Бо́же спасе́ния моего́, во дни воззва́х, и в нощи́ пред Тобо́ю. Да вни́дет пред Тя моли́тва моя́: приклони́ у́хо Твое́ к моле́нию моему́.

Псалом 102:

Благослови́, душе́ моя́, Го́спода, и вся вну́тренняя моя́ и́мя свя́тое Его́. Благослови́, душе́ моя́, Го́спода, и не забыва́й всех воздая́ний Его́, очища́ющаго вся беззако́ния твоя́, исцеля́ющаго вся неду́ги твоя́, избавля́ющаго от истле́ния живо́т твой, венча́ющаго тя ми́лостию и щедро́тами, исполня́ющаго во благи́х жела́ние твое́: обнови́тся я́ко о́рля ю́ность твоя́. Творя́й ми́лостыни Госпо́дь, и судьбу́ всем оби́димым. Сказа́ пути́ Своя́ Моисе́ови, сыново́м Изра́илевым хоте́ния Своя́: Щедр и Ми́лостив Госпо́дь, Долготерпели́в и Многоми́лостив. Не до конца́ прогне́вается, ниже́ во век вражду́ет, не по беззако́нием на́шым сотвори́л есть нам, ниже́ по грехо́м на́шым возда́л есть нам. Я́ко по высоте́ небе́сней от земли́, утверди́л есть Госпо́дь ми́лость Свою́ на боя́щихся Его́. Ели́ко отстоя́т восто́цы от за́пад, уда́лил есть от нас беззако́ния на́ша. Я́коже ще́дрит оте́ц сы́ны, уще́дри Госпо́дь боя́щихся Его́. Я́ко Той позна́ созда́ние на́ше, помяну́, я́ко персть есмы́. Челове́к, я́ко трава́ дни́е eго́, я́ко цвет се́льный, та́ко оцвете́т, я́ко дух про́йде в нем, и не бу́дет, и не позна́ет ктому́ ме́ста своего́. Ми́лость же Госпо́дня от ве́ка и до ве́ка на боя́щихся Его́, и пра́вда Его́ на сыне́х сыно́в, храня́щих заве́т Его́, и по́мнящих за́поведи Его́ твори́ти я́. Госпо́дь на Небеси́ угото́ва Престо́л Свой, и Ца́рство Его́ все́ми облада́ет. Благослови́те Го́спода вси А́нгели Его́, си́льнии кре́постию, творя́щии сло́во Его́, услы́шати глас слове́с Его́. Благослови́те Го́спода вся Си́лы Его́, слуги́ Его́, творя́щии во́лю Его́. Благослови́те Го́спода вся дела́ Его́, на вся́ком ме́сте влады́чества Его́, благослови́, душе́ моя́, Го́спода.

На вся́ком ме́сте влады́чества Его́, благослови́, душе́ моя́, Го́спода.

Псалом 142:

Го́споди, услы́ши моли́тву мою́, внуши́ моле́ние мое́ во и́стине Твое́й, услы́ши мя в пра́вде Твое́й и не вни́ди в суд с рабо́м Твои́м, я́ко не оправди́тся пред Тобо́ю всяк живы́й. Я́ко погна́ враг ду́шу мою́, смири́л есть в зе́млю живо́т мой, посади́л мя есть в те́мных, я́ко ме́ртвыя ве́ка. И уны́ во мне дух мой, во мне смяте́ся се́рдце мое́. Помяну́х дни дре́вния, поучи́хся во всех де́лех Твои́х, в творе́ниих руку́ Твое́ю поуча́хся. Возде́х к Тебе́ ру́це мои́, душа́ моя́, я́ко земля́ безво́дная Тебе́. Ско́ро услы́ши мя, Го́споди, исчезе́ дух мой, не отврати́ лица́ Твоего́ от Мене́, и уподо́блюся низходя́щым в ров. Слы́шану сотвори́ мне зау́тра ми́лость Твою́, я́ко на Тя упова́х. Скажи́ мне, Го́споди, путь во́ньже пойду́, я́ко к Тебе́ взях ду́шу мою́. Изми́ мя от враг мои́х, Го́споди, к Тебе́ прибего́х. Научи́ мя твори́ти во́лю Твою́, я́ко Ты еси́ Бог мой. Дух Твой Благи́й наста́вит мя на зе́млю пра́ву. И́мене Твоего́ ра́ди, Го́споди, живи́ши мя, пра́вдою Твое́ю изведе́ши от печа́ли ду́шу мою́. И ми́лостию Твое́ю потреби́ши враги́ моя́ и погуби́ши вся стужа́ющыя души́ мое́й, я́ко аз раб Твой есмь.

Услы́ши мя, Го́споди, в пра́вде Твое́й и не вни́ди в суд с рабо́м Твои́м.

Дух Твой Благи́й наста́вит мя на зе́млю пра́ву.

Сла́ва Отцу́ и Сы́ну и Свято́му Ду́ху, и ны́не и при́сно и во ве́ки веко́в. Ами́нь.

Аллилу́иа, аллилу́иа, аллилу́иа, сла́ва Тебе́ Бо́же. (Три́жды)

Тропа́рь праздника, глас 4:

Сла́ва Отцу́ и Сы́ну и Свято́му Ду́ху. И ны́не и при́сно и во ве́ки веко́в. Ами́нь.

Глас 4: Е́же от ве́ка утае́ное/ и А́нгелом несве́домое та́инство,/ Тобо́ю, Богоро́дице, су́щим на земли́ яви́ся Бог,/ в несли́тном соедине́нии воплоща́емь,/ и Крест во́лею нас ра́ди восприи́м,/ и́мже воскреси́в первозда́ннаго,// спасе́ от сме́рти ду́ши на́ша.

Го́споди, поми́луй. (Три́жды)

СЕДА́ЛЕН ПРА́ЗДНИКА, ГЛАС 8:

Глубину́ ловле́ния оста́вль,/ с Небесе́ прие́м от Отца́ Боже́ственное открове́ние Сло́ва воплоще́ния,/ и со дерзнове́нием ве́рно вопия́л еси́ Зижди́телю Твоему́:/ Бо́жия Тя вем Сы́на Единосу́щна./ Те́мже по достоя́нию вои́стинну показа́лся еси́ ка́мень ве́ры/ и ключа́рь благода́ти, Пе́тре апо́столе./ Моли́ Христа́ Бо́га грехо́в оставле́ние дарова́ти/ пра́зднующим любо́вию святу́ю па́мять твою́.

С Небесе́ зва́ние от Христа́ прии́м, яви́лся еси́ пропове́дник Све́та,/ всех благода́ти озари́л еси́ уче́ньми:/ зако́на бо служе́ние пи́смене изструга́в, ве́рным облиста́л еси́ ра́зум Ду́ха./ Те́мже и в тре́тие не́бо досто́йне взя́тся превы́спренно,/ и в рай дости́гл еси́, Па́вле апо́столе./ Моли́ Христа́ Бо́га согреше́ний оставле́ние дарова́ти// пра́зднующим любо́вию святу́ю па́мять твою́.

Глас 1: Церко́внаго ка́меня, всехва́льнаго Петра́, и побо́рника Па́вла,/ мирску́ю мре́жу, досто́йно восхва́лим, ве́рнии, я́ко иму́ща ключи́ Небе́сныя:/ от них бо просвети́ся вселе́нная ве́рою Тро́йческою./ Сла́ва Просла́вльшему вас,/ сла́ва Укре́пльшему вы,// сла́ва Дарова́вшему вас ра́ди жизнь ве́чную.

Сла́ва Отцу́ и Сы́ну и Свято́му Ду́ху.

Глас 4: Светолу́чными сия́нии, я́коже зве́зды, земны́я концы́ просвеща́ете уче́нии святы́я про́поведи,// Небе́снии таи́нницы, Госпо́дни апо́столи.

И ны́не и при́сно и во ве́ки веко́в. Ами́нь.

Глас 4: Те́плое заступле́ние су́щим в беда́х, и Помо́щницу на́шу,/ и к Бо́гу премене́ние, Е́юже тли изба́вихомся,// Богоро́дицу, ве́рнии, ублажа́ем.

Полиеле́й:

Хвали́те И́мя Госпо́дне, хвали́те, раби́ Го́спода.

Аллилу́иа, аллилу́иа, аллилу́иа.

Благослове́н Госпо́дь от Сио́на, живы́й во Иерусали́ме.

Аллилу́иа, аллилу́иа, аллилу́иа.

Испове́дайтеся Го́сподеви, я́ко Благ, я́ко в век ми́лость Его́.

Аллилу́иа, аллилу́иа, аллилу́иа.

Испове́дайтеся Бо́гу Небе́сному, я́ко в век ми́лость Его́.

Аллилу́иа, аллилу́иа, аллилу́иа.

Велича́ние:

Велича́ем вас,/ апо́столи Христо́вы Пе́тре и Па́вле,/ весь мир уче́ньми свои́ми просвети́вшия/ и вся концы́// ко Христу́ приве́дшия.

Псало́м избра́нный:

Небеса́ пове́дают сла́ву Бо́жию, творе́ние же руку́ Его́ возвеща́ет твердь./ Испове́дят Небеса́ чудеса́ Твоя́, Го́споди./ Вме́сто оте́ц Твои́х бы́ша сы́нове Твои́./ Поста́виши я кня́зи по всей земли́./ Бог бого́в Госпо́дь глаго́ла и призва́ зе́млю./ От восто́к со́лнца до за́пад хва́льно И́мя Госпо́дне./ Освети́ша мо́лния Его́ вселе́нную,/ Возвести́ша Небеса́ пра́вду Его́,/ И ви́деша вси лю́дие сла́ву Его́./ Кня́зи Иу́довы влады́ки их./ Воцари́ся Бог над язы́ки./ Бог прославля́емь в сове́те святы́х./ Ве́лий и стра́шен есть над все́ми окре́стными Его́./ Рцы́те во язы́цех, я́ко Госпо́дь воцари́ся./ Возвести́те во язы́цех сла́ву Его́, во всех лю́дех чудеса́ Его́./ Во всю зе́млю изы́де веща́ние их,/ И в концы́ вселе́нныя глаго́лы их./ Покори́ лю́ди нам и язы́ки под но́ги на́ша./ Ве́лий Госпо́дь наш и ве́лия кре́пость Его́.// Той даст си́лу и держа́ву лю́дем Свои́м: благослове́н Бог.

Сла́ва Отцу́ и Сы́ну и Свято́му Ду́ху. И ны́не и при́сно и во ве́ки веко́в. Ами́нь.

Аллилу́иа, аллилу́иа, аллилу́иа,// сла́ва Тебе́, Бо́же. (Трижды)

Седа́льны:

Глас 8:

Верхо́вныя я́вльшияся от учени́к, вели́кия свети́льники и све́тлыя,/ Петра́ да восхва́лим и прему́драго Па́вла:/ огне́м бо Боже́ственнаго просия́вшия Ду́ха, мглу пре́лести попали́ша всю,/ те́мже и Вы́шняго Ца́рствия ору́жницы досто́йне показа́шася и благода́ти сопресто́льницы./ Сего́ ра́ди вопие́м:/ апо́столи Христа́ Бо́га, прегреше́ний оставле́ние испроси́те// пра́зднующим любо́вию святу́ю па́мять ва́шу.

Сла́ва Отцу́ и Сы́ну и Свято́му Ду́ху. И ны́не и при́сно и во ве́ки веко́в. Ами́нь.

Я́ко Всенепоро́чная Неве́ста Творцу́, я́ко Неискусому́жная Ма́ти Изба́вителя,/ прия́телище я́ко су́щи Уте́шителя, Препе́тая,/ беззако́нию мя су́ща скве́рное оби́телище и бесо́м игра́лище в ра́зуме бы́вша,/ потщи́ся от тех злоде́йства мя изба́вити/ и све́тлое жили́ще доброде́телей соверши́, Светоно́сная Нетле́нная,/ отжени́ о́блак страсте́й и Вы́шняго прича́стия сподо́би// и све́та невече́рняго моли́твами Твои́ми.

Степе́нна, глас 4:

От ю́ности моея́/ мно́зи бо́рют мя стра́сти,/ но Сам мя заступи́// и спаси́, Спа́се мой.

Ненави́дящии Сио́на,/ посрами́теся от Го́спода,/ я́ко трава́ бо огне́м// бу́дете изсо́хше.

Сла́ва Отцу́ и Сы́ну и Свято́му Ду́ху и ны́не и при́сно и во ве́ки веко́в. Ами́нь.

Святы́м Ду́хом/ вся́ка душа́ живи́тся,/ и чистото́ю возвыша́ется,// светле́ется Тро́йческим еди́нством, священнота́йне.

Го́споди, поми́луй. (Три́жды)

От Иоа́нна Свята́го Ева́нгелия чте́ние.

Сла́ва, Тебе́, Го́споди, сла́ва Тебе́.

Во вре́мя о́но, яви́ся Иису́с ученико́м Свои́м, воста́в от ме́ртвых. И глаго́ла Си́мону Петру́: Си́моне Ио́нин, лю́биши ли Мя па́че сих? Глаго́ла Ему́: ей, Го́споди, Ты ве́си, я́ко люблю́ Тя. Глаго́ла ему́: паси́ а́гнцы Моя́. Глаго́ла ему́ па́ки второ́е: Си́моне Ио́нин, лю́биши ли Мя? Глаго́ла ему́: ей, Го́споди, Ты ве́си, я́ко люблю́ Тя. Глаго́ла ему́: паси́ о́вцы Моя́. Глаго́ла ему́ тре́тие: Си́моне Ио́нин, лю́биши ли Мя? Оскорбе́ же Петр, я́ко рече́ ему́ тре́тие, лю́биши ли Мя; и глаго́ла Ему́: Го́споди, Ты вся ве́си, Ты ве́си, я́ко люблю́ Тя. Глаго́ла ему́ Иису́с: паси́ о́вцы Моя́. Ами́нь, ами́нь, глаго́лю тебе́, егда́ бе юн, поя́сашеся сам, и хожда́ше, а́може хотя́ше, егда́ же состаре́ешися и возде́жеши ру́це твои́, и ин тя поя́шет, и веде́т, а́може не хо́щеши. Сие́ же рече́, назна́менуя, ко́ею сме́ртию просла́вит Бо́га. И сия́ рек, глаго́ла ему́: иди́ по Мне. Обра́щься же Петр, ви́де ученика́, его́же любля́ше Иису́с, во след иду́ща, и́же и возлеже́ на ве́чери на пе́рси Его́, и рече́: Го́споди, кто есть предая́й Тя? Сего́ ви́дев Петр, глаго́ла Иису́сови: Го́споди, сей же что? Глаго́ла ему́ Иису́с: а́ще хощу́, да той пребыва́ет, до́ндеже прииду́, что к тебе́? Ты по Мне гряди́. Изы́де же сло́во се в бра́тию, я́ко учени́к той не у́мрет; и не рече́ ему́ Иису́с, я́ко не у́мрет, но а́ще хощу́ тому́ пребыва́ти, до́ндеже прииду́, что к тебе́? Сей есть учени́к свиде́тельствуяй о сих, и́же и написа́ сия́, и вем, я́ко и́стинно есть свиде́тельство его́. Суть же и и́на мно́га, я́же сотвори́ Иису́с, я́же а́ще по еди́ному пи́сана быва́ют, ни самому́ мню всему́ ми́ру вмести́ти пи́шемых книг. Ами́нь.

Сла́ва, Тебе́, Го́споди, сла́ва Тебе́.

Псало́м 50:

Поми́луй мя, Бо́же, по вели́цей ми́лости Твое́й, и по мно́жеству щедро́т Твои́х очи́сти беззако́ние мое́. Наипа́че омы́й мя от беззако́ния моего́, и от греха́ моего́ очи́сти мя. Я́ко беззако́ние мое́ аз зна́ю и грех мой предо мно́ю есть вы́ну. Тебе́ Еди́ному согреши́х, и лука́вое пред Тобо́ю сотвори́х, я́ко да оправди́шися во словесе́х Твои́х и победи́ши, внегда́ суди́ти Ти. Се бо в беззако́ниих зача́т есмь, и во гресе́х роди́ мя ма́ти моя́. Се бо и́стину возлюби́л еси́, безве́стная и та́йная прему́дрости Твоея́ яви́л ми еси́. Окропи́ши мя иссо́пом, и очи́щуся, омы́еши мя, и па́че сне́га убелю́ся. Слу́ху моему́ да́си ра́дость и весе́лие, возра́дуются ко́сти смире́нныя. Отврати́ лице́ Твое́ от грех мои́х, и вся беззако́ния моя́ очи́сти. Се́рдце чи́сто сози́жди во мне, Бо́же, и дух прав обнови́ во утро́бе мое́й. Не отве́ржи мене́ от лица́ Твоего́, и Ду́ха Твоего́ Свята́го не отыми́ от мене́. Возда́ждь ми ра́дость спасе́ния Твоего́, и Ду́хом Влады́чним утверди́ мя. Научу́ беззако́нныя путе́м Твои́м, и нечести́вии к Тебе́ обратя́тся. Изба́ви мя от крове́й, Бо́же, Бо́же спасе́ния моего́, возра́дуется язы́к мой пра́вде Твое́й. Го́споди, устне́ мои́ отве́рзеши, и уста́ моя́ возвестя́т хвалу́ Твою́. Я́ко а́ще бы восхоте́л еси́ же́ртвы, дал бых у́бо, всесожже́ния не благоволи́ши. Же́ртва Бо́гу дух сокруше́н, се́рдце сокруше́нно и смире́нно Бог не уничижи́т. Ублажи́, Го́споди, благоволе́нием Твои́м Сио́на, и да сози́ждутся сте́ны Иерусали́мския, тогда́ благоволи́ши же́ртву пра́вды, возноше́ние и всесожега́емая: тогда́ возложа́т на олта́рь Твой тельцы́.

Глас 6:

Сла́ва Отцу́ и Сы́ну и Свято́му Ду́ху./ Молитвами апо́столов,/ Ми́лостиве, очи́сти// мно́жество согреше́ний на́ших.

И ны́не и при́сно и во ве́ки веко́в. Ами́нь./ Моли́твами Богоро́дицы,/ Ми́лостиве, очи́сти// мно́жество согреше́ний на́ших.

Поми́луй мя, Бо́же,/ по вели́цей ми́лости Твое́й,/ и по мно́жеству щедро́т Твои́х// очи́сти беззако́ние мое́.

Стихи́ра, глас 6

Благоче́стия и́стинныя пропове́дники/ и Це́ркве пресве́тлыя зве́зды/ пе́сньми похва́льными почти́м,/ Петра́, ка́меня ве́ры,/ и Па́вла, и́стиннаго учи́теля и таи́нника Христо́ва./ Си́и бо и́стинное сло́во все́явше в сердца́ ве́рных,/ всем плодоно́сие да́рующа,/ и мо́лят Христа́ Бо́га// спасти́ся душа́м на́шим.

Го́споди, поми́луй. (12 раз)

Кано́н пра́здника, глас 4:

Песнь 1:

Ирмо́с: Несть Тебе́ подо́бен,/ препросла́вленный Го́споди,/ руко́ю бо кре́пкою изба́вил еси́ лю́ди,// я́же стяжа́л еси́, Человеколю́бче.

Припев: Святы́й апо́столе Пе́тре, моли́ Бо́га о нас.

Верхо́внейшаго апо́столов днесь, я́ко первозва́ннаго Христо́ва,// богодохнове́нными пе́сньми досто́йно воспои́м.

Припев: Святы́й апо́столе Пе́тре, моли́ Бо́га о нас.

Тя предве́чный проуве́дев, предуста́ви, всеблаже́нне Пе́тре,// я́ко предста́теля Своея́ Це́ркве и первопресто́льника.

Припев: Святы́й апо́столе Пе́тре, моли́ Бо́га о нас.

Ни плоть, ниже́ кровь тебе́, но Оте́ц вдохну́// Христа́ богосло́вити, Сы́на и́стиннаго Бо́га Вы́шняго, апо́столе.

Припев: Святы́й апо́столе Па́вле, моли́ Бо́га о нас.

Я́коже су́щая нарица́я не су́щая Христо́с Боже́ственным ра́зумом, Па́вле всеблаже́нне,/ Той из ма́терня чре́ва тя избра́/ понести́ пред язы́ки Боже́ственное Его́ И́мя, е́же па́че вся́каго и́мене:// сла́вно бо просла́вися.

Припев: Святы́й апо́столе Па́вле, моли́ Бо́га о нас.

Бу́дущее возвеща́я тебе́ сия́ние благоче́стия, Па́вле,/ и ле́сти очище́ние,/ Христо́с я́влься на горе́ молниезра́чен,/ о́чи у́бо помрача́ет плотски́я, душе́вныя же вразумля́ет Тро́йческим ра́зумом:// сла́вно бо просла́вися.

Сла́ва Отцу́ и Сы́ну и Свято́му Ду́ху.

Обре́зание у́бо соверша́я осмодне́вное и ревни́тель оте́ческих, Па́вле, преда́ний,/ от се́мене евре́йска, коле́на Вениами́нова,/ по зако́ну же фарисе́й я́влься,/ вмени́л еси́ вся уме́ты и Христа́ приобре́л еси́:// сла́вно бо просла́вися.

И ны́не и при́сно и во ве́ки веко́в, ами́нь.

Богородичен: Чи́стая Ма́ти Бо́га Вседержи́теля, от ца́рскаго коле́на, Влады́чице, изра́стши/ и еди́на Бо́га, все́ми ца́рствующаго, ро́ждшая пло́тию па́че естества́,/ от бед мя спаси́, Сы́ну Твоему́ пою́ща:// сла́вно бо просла́вися.

Песнь 3:

Ирмо́с: Не му́дростию, и си́лою, и бога́тством хва́лимся,/ но Тобо́ю, О́тчею Ипоста́сною му́дростию, Христе́:// несть бо свят, па́че Тебе́, Человеколю́бче.

Припев: Святы́й апо́столе Пе́тре, моли́ Бо́га о нас.

Тя, блаже́нна, сла́дкая уста́ Христа́ Бо́га и сокро́вище тве́рдо Ца́рствия показа́ша.// Те́мже воспева́ем тя, Пе́тре апо́столе.

Припев: Святы́й апо́столе Пе́тре, моли́ Бо́га о нас.

На ка́мени твоего́ Богосло́вия водрузи́ Влады́ка Иису́с Це́рковь непрекло́нну,// в не́йже тя, апо́столе Пе́тре, сла́вим.

Припев: Святы́й апо́столе Пе́тре, моли́ Бо́га о нас.

Я́ко пребо́льши А́нгел Петр в телеси́:/ во све́тлом бо прише́ствии сего́// Христо́с Бог судию́ же и соседа́теля бы́ти рече́.

Припев: Святы́й апо́столе Па́вле, моли́ Бо́га о нас.

Ты ка́мень основа́ния ве́рным душа́м положи́лся еси́ многоце́нен,// краеуго́лен Спа́са и Го́спода.

Припев: Святы́й апо́столе Па́вле, моли́ Бо́га о нас.

Па́вле всеблаже́нне,// на основа́нии твое́м, моли́ся, доброде́телей всехва́льных назда́тися све́тлости.

Сла́ва Отцу́ и Сы́ну и Свято́му Ду́ху.

Всегда́ ме́ртвость Иису́сову на твое́м те́ле соверше́нно, Па́вле, обнося́й,// сподо́бился еси́ и́стинныя жи́зни.

И ны́не и при́сно и во ве́ки веко́в, ами́нь.

Богородичен: Тя вси стяжа́хом прибе́жище и сте́ну на́шу, христиа́не,// Тя славосло́вим немо́лчно, Безневе́стная.

Ипакои́ апо́столов, глaс 8:

Ка́я темни́ца не име́ тебе́ ю́зника?/ Ка́я же Це́рковь не и́мать тя вити́ю?/ Дама́ск великому́дрствует о тебе́, Па́вле, ве́де бо тя запя́та све́том;/ Рим, твою́ кровь прие́мый, и той хва́лится,/ но и Тарс мно́жае ра́дуется и лю́бит, почита́я твои́ пелены́./ Пе́тре, ве́ры ка́меню, Па́вле, похвало́ вселе́нныя,// от Ри́ма соше́дшеся, утверди́те нас.

Песнь 4:

Ирмо́с: Сей Бог наш, от Де́вы вопло́щся/ и естество́ обожи́в,/ Его́же воспева́юще, вопие́м:// сла́ва си́ле Твое́й, Го́споди.

Припев: Святы́й апо́столе Пе́тре, моли́ Бо́га о нас.

Челове́ком ловца́ тя, я́коже обеща́ Христо́с, соде́ла Боже́ственна Своея́ Це́ркве,// пе́рвому вручи́в корми́ла.

Припев: Святы́й апо́столе Пе́тре, моли́ Бо́га о нас.

Тобо́ю умоля́емь Жизнода́вец Иису́с,// вяза́ти же и реши́ти да́вый тебе́ власть, Пе́тре, да бу́дет ми ми́лостив.

Припев: Святы́й апо́столе Пе́тре, моли́ Бо́га о нас.

Христо́во Ца́рствие отве́рсти приле́жно моли́ся, Пе́тре,// Боже́ственную твою́ па́мять ве́рою несумне́нною чту́щим.

Припев: Святы́й апо́столе Па́вле, моли́ Бо́га о нас.

Все́де, я́коже лев, ярови́дно погубля́я Христо́ву Це́рковь, Савл иногда́,/ ят же быв Боже́ственным гла́сом А́гнца Бо́жия, Его́же гоня́ше,// ста́до я́ко па́стырю вруча́ет.

Припев: Святы́й апо́столе Па́вле, моли́ Бо́га о нас.

Хотя́й просвети́ти вселе́нную омрача́ется,/ Ана́ния же к сему́ посла́ся, душе́вное же просвеще́ние дая́й и теле́сное// от Боже́ственнаго явле́ния, сосу́д избра́н показа́в того́.

Сла́ва Отцу́ и Сы́ну и Свято́му Ду́ху.

Па́влом досто́йно Дама́ск напоя́ется:/ от сего́ бо, я́коже от рая́ иногда́,/ вод Боже́ственных сей произы́де вели́кий исто́чник// и упои́ всю Богоразу́мием незави́стно зе́млю.

И ны́не и при́сно и во ве́ки веко́в, ами́нь.

Богородичен: Низложи́ си́льныя со престо́л Госпо́дь, Де́ва и Ма́ти я́коже рече́,/ а́лчущия же Боже́ственных благ испо́лни, ве́рою зову́щия:// сла́ва си́ле Твое́й, Го́споди.

Песнь 5:

Ирмо́с: Стяжа́вый ны, избра́нныя лю́ди/ Кро́вию Твое́ю, Го́споди,/ Твой мир даждь нам,// во единомы́слии сохраня́я ста́до Твое́.

Припев: Святы́й апо́столе Пе́тре, моли́ Бо́га о нас.

И́же от любве́ прии́м дерзнове́ние к Бо́гу,/ досто́йно чуди́м быва́ше лове́ц и неве́жда,// чудоде́йствуя пресла́вно благода́тию.

Припев: Святы́й апо́столе Пе́тре, моли́ Бо́га о нас.

Не зла́то Тебе́ ра́ди, ни сребро́, Христе́,/ Боже́ственный Твой апо́стол, но доброде́тель стяжа́в,// чуде́с обогати́ся си́лою.

Припев: Святы́й апо́столе Пе́тре, моли́ Бо́га о нас.

Исправля́хуся стопы́ и гле́зне хромы́х, де́йственным твои́м глаго́лом:// Боже́ственным бо Ду́хом соверша́хуся пресла́вныя ве́щи.

Припев: Святы́й апо́столе Па́вле, моли́ Бо́га о нас.

Ты и́стинную избра́л еси́, Па́вле, похвалу́,/ Крест Царя́ Христа́ при́сно нося́,// я́коже побе́ду, апо́столе.

Припев: Святы́й апо́столе Па́вле, моли́ Бо́га о нас.

Тебе́ е́же жи́ти, Христо́с, и е́же умре́ти, приобре́тение изря́дно:// любо́вию бо сраспя́лся еси́ Распе́ншемуся нас ра́ди, Па́вле пресла́вне.

Сла́ва Отцу́ и Сы́ну и Свято́му Ду́ху.

Ра́дуешися вои́стинну о Го́споде, Па́вле честны́й, изше́д из телесе́// и отше́д ко Христу́, Жизнода́вцу Бо́гу.

И ны́не и при́сно и во ве́ки веко́в, ами́нь.

Богородичен: Моли́ при́сно Сы́на Твоего́ и Бо́га на́шего,/ Неискусобра́чная Мари́е Чи́стая,// посла́ти нам, ве́рным, ми́лость.

Песнь 6:

Ирмо́с: В ки́те, Христе́, тридне́вновав, Ио́на/ прописа́ Тя, Безсме́ртнаго, я́ко ме́ртва во́лею// в се́рдце земне́м тридне́вновавша.

Припев: Святы́й апо́столе Пе́тре, моли́ Бо́га о нас.

Я́коже дре́вле, Христе́, десни́цею Твое́ю по воде́ пе́ша ходя́ща Петра́ спасл еси́,// и мене́, потопля́ема бу́рею лю́тых напа́стей, спаси́, я́ко Милосе́рд.

Припев: Святы́й апо́столе Пе́тре, моли́ Бо́га о нас.

Оста́вил еси́, о Пе́тре, не су́щая,/ и су́щая дости́гл еси́, я́коже не́кий купе́ц,// и я́ве улови́л еси́ би́сер, Христа́, многоце́нный.

Припев: Святы́й апо́столе Пе́тре, моли́ Бо́га о нас.

Искуша́ти безу́мно покуси́вшияся Ду́ха Пресвята́го, Пе́тре, умертви́л еси́:/ Его́же богосло́вил еси́ ты пе́рвее,// я́ве испове́дав Бо́га, всеблаже́нне.

Припев: Святы́й апо́столе Па́вле, моли́ Бо́га о нас.

Вся пренебре́г кра́сная ми́ра,/ уя́звлен Влады́чнею любо́вию и о́бщаго спасе́ния жела́нием,/ свиде́тельствовати тому́ изво́лив, о Па́вле блаже́нне,// и ны́не о вселе́нней моли́ся.

Припев: Святы́й апо́столе Па́вле, моли́ Бо́га о нас.

Я́ко изря́дный Влады́це подо́бник/ и в Того́ оде́ян, Па́вле, вои́стинну всем был еси́ всяк,/ да вся приобря́щеши и спасе́ши лю́ди,// и спасл еси́ я́ко вои́стинну, Христу́ улови́в концы́.

Сла́ва Отцу́ и Сы́ну и Свято́му Ду́ху.

Досто́йно тебе́ дарова́ Христо́с житие́, апо́столе Па́вле, на Небесе́х:/ пребыва́ющаго бо зде не возжела́л еси́ гра́да, блаже́нне,// ве́рен служи́тель быв и строи́тель та́ин Его́.

И ны́не и при́сно и во ве́ки веко́в, ами́нь.

Богородичен: Призре́ на Тя Госпо́дь, мое́ обновля́я существо́, я́ко Си́лен,/ вели́чия сотво́рь, Богороди́тельнице, я́коже рекла́ еси́, Всенепоро́чная,// и спасе́ мя Тобо́ю из тли Бог мой, я́ко Милосе́рд.

Конда́к апо́столов, глас 2:

Тве́рдыя и Боговеща́нныя пропове́датели,/ верх апо́столов Твои́х, Го́споди,/ прия́л еси́ в наслажде́ние благи́х Твои́х и поко́й:/ боле́зни бо о́нех и смерть прия́л еси́ па́че вся́каго всепло́дия,// Еди́не, све́дый серде́чная.

И́кос:

Уясни́ мой язы́к, Спа́се мой, разшири́в моя́ уста́/ и испо́лнив я, умили́ се́рдце мое́,/ да, я́же глаго́лю, после́дую и, я́же у́бо учу́, сотворю́ пе́рвее:/ всяк бо творя́ и уча́, рече́, сей вели́к есть./ А́ще бо глаго́лю, и не творю́, я́ко медь звеня́щая вменю́ся;/ те́мже рещи́ ми подо́бная и твори́ти поле́зная да́руй,// Еди́не, све́дый серде́чная.

Песнь 7:

Ирмо́с: В нача́ле Безнача́льное Сло́во,/ со Отце́м и Ду́хом, Сын Единоро́дный,/ благослове́н еси́, и превозноси́мый// Бо́же оте́ц на́ших.

Припев: Святы́й апо́столе Пе́тре, моли́ Бо́га о нас.

Ми́лостивному, Боже́ственным про́мыслом Христо́вым наказу́емь,/ подо́битися попуще́н был еси́, пре́жде стра́сти, Пе́тре,// отверже́ния подпа́сти волне́нию.

Припев: Святы́й апо́столе Пе́тре, моли́ Бо́га о нас.

Тебе́ Христо́с, первозва́нному и зело́ возлю́бленному,// я́ко председа́телю благосла́вну апо́столов, пе́рвому явля́ется, воскре́с от гро́ба.

Припев: Святы́й апо́столе Пе́тре, моли́ Бо́га о нас.

Твое́ трикра́тное, е́же пре́жде стра́сти, исцеля́я отверже́ние, Влады́ка// трикра́тным боговеща́нным, Пе́тре, вопроше́нием утвержда́ет любо́вь.

Припев: Святы́й апо́столе Пе́тре, моли́ Бо́га о нас.

Е́же ко Христу́, Пе́тре, любле́ния,/ предлага́л еси́ свиде́теля и Всеви́дящаго я́ко Бо́га Сло́ва,// те́мже и люби́мое вруча́ет тебе́ ста́до.

Припев: Святы́й апо́столе Па́вле, моли́ Бо́га о нас.

Бысть, Христе́, печа́ть и вене́ц апо́столов Твои́х,/ и́же напосле́док зва́нный време́н, тща́нием же всех превозше́д,/ с ни́мже лю́дие церко́внии пою́т Тебе́:// оте́ц на́ших Бо́же, благослове́н еси́.

Припев: Святы́й апо́столе Па́вле, моли́ Бо́га о нас.

А́ще и гони́в пе́рвее Це́рковь Твою́ Па́вел у́зник,/ но премину́ дре́внюю де́рзость Твое́ю ре́вностию последи́./ Собра́ бо, Христе́, язы́ки, зову́щия:// оте́ц на́ших Бо́же, благослове́н еси́.

Припев: Святы́й апо́столе Па́вле, моли́ Бо́га о нас.

Ты из Иерусали́ма пропове́дав всем Ева́нгелие,/ объя́т же о́крест всю зе́млю, Па́вле,/ да́же до коне́ц Иллири́ка, уча́, взыва́л еси́:// оте́ц на́ших Бо́же, благослове́н еси́.

Сла́ва Отцу́ и Сы́ну и Свято́му Ду́ху.

Во у́жасе взят быв, тре́тие дости́гл еси́ Не́бо, пребога́те,/ и, услы́шав неизглаго́ланная словеса́, вопие́ши:/ сла́ва превы́шнему Отцу́ и Сы́ну,// сия́ние же сопресто́льно испыта́ющаго я́ве Ду́ха Бо́жия глубины́.

И ны́не и при́сно и во ве́ки веко́в, ами́нь.

Богородичен: Я́коже на руно́ дождь, на Тя сни́де, Де́во, Христо́с Бог,/ и Плотоно́сец из Тебе́ про́йде, соединя́я пре́жде разстоя́щая,/ мир на земли́ и на Небеси́ да́руя:// оте́ц на́ших Бо́же, благослове́н еси́.

Песнь 8:

Ирмо́с: Вся́ческая нося́й непристу́пною Твое́ю си́лою, Христе́,/ преподо́бныя Твоя́ о́троки в пла́мени ороси́л еси́, зову́щия:// благослови́те, вся дела́ Госпо́дня, Го́спода.

Припев: Святы́й апо́столе Пе́тре, моли́ Бо́га о нас.

Возде́жут твои́ ру́це и ко кресту́ тя препоя́шут, –/ Влады́ка предре́к, Пе́тре, повелева́ет после́довати зову́щу:// благослови́те, вся дела́ Госпо́дня, Го́спода.

Припев: Святы́й апо́столе Пе́тре, моли́ Бо́га о нас.

Благода́ти сло́вом Ене́я, у́бо разсла́бленна лю́те,/ Тави́фу же уме́ршую, чудоде́йствуя, воскреси́л еси́, зову́щия:// благослови́те, вся дела́ Госпо́дня, Го́спода.

Припев: Святы́й апо́столе Пе́тре, моли́ Бо́га о нас.

И́же Петру́ язы́ки очище́ны пове́дав, Христе́,/ духо́вною заре́ю и мне помышле́ния очи́сти, зову́щу:// благослови́те, вся дела́ Госпо́дня, Го́спода.

Припев: Святы́й апо́столе Па́вле, моли́ Бо́га о нас.

Сраствори́ся любо́вию Твое́ю Па́вел, до́брым же измене́нием изступи́:/ не себе́ бо живя́ше сла́вный,// имя́ше же, Ще́дре, живу́ща Тя в себе́ во вся ве́ки.

Припев: Святы́й апо́столе Па́вле, моли́ Бо́га о нас.

Ты обручи́л еси́, я́коже неве́сту, предста́вити Жениху́ Христу́ Це́рковь:/ невестово́ждь бо сея́ показа́лся еси́, Па́вле Богоно́се.// Те́мже тя сла́вит во вся ве́ки.

Благослови́м Отца́, и Сы́на, и Свята́го Ду́ха, Го́спода.

Подвиза́лся еси́ до́брым по́двигом/ и, сконча́в тече́ние твое́ зако́нно, сокро́вище ве́ры соблю́л еси́./ Те́мже венце́в, Па́вле, сподо́бился еси́ пра́вды.

И ны́не и при́сно и во ве́ки веко́в, ами́нь

Богородичен: Ра́дуйся, престо́ле огнезра́чный Госпо́день;/ ра́дуйся, Неве́сто Неневе́стная, Де́во,/ ра́дуйся, о́блаче, Со́лнца возсия́вшая пра́вды,// Его́же превозно́сим во вся ве́ки.

Песнь Пресвятой Богородицы

Вели́чит душа́ Моя́ Го́спода,/ и возра́довася дух Мой о Бо́зе Спа́се Мое́м.

Честне́йшую Херуви́м/ и Сла́внейшую без сравне́ния Серафи́м,/ без истле́ния Бо́га Сло́ва ро́ждшую,/ су́щую Богоро́дицу, Тя велича́ем.

Я́ко призре́ на смире́ние рабы́ Своея́,/ се бо от ны́не ублажа́т Мя вси ро́ди.

Я́ко сотвори́ Мне вели́чие Си́льный,/ и свя́то И́мя Его́, и ми́лость Его́ в ро́ды родо́в боя́щимся Его́.

Сотвори́ держа́ву мы́шцею Свое́ю,/ расточи́ го́рдыя мы́слию се́рдца их.

Низложи́ си́льныя со престо́л, и вознесе́ смире́нныя;/ а́лчущия испо́лни благ, и богатя́щияся отпусти́ тщи.

Восприя́т Изра́иля о́трока Своего́, помяну́ти ми́лости,/ я́коже глаго́ла ко отце́м на́шим, Авраа́му и се́мени его́, да́же до ве́ка.

Песнь 9:

Ирмо́с: Тя, пресла́вную Неве́сту и Всесвяту́ю Богоро́дицу,/ Зижди́теля ро́ждшую неви́димых же и всех ви́димых,// пе́сньми велича́ем.

Припев: Святы́й апо́столе Пе́тре, моли́ Бо́га о нас.

Твоя́ преизя́щная благода́ть сла́вится досто́йно,/ се́ни бо твое́й стра́сти немощны́х, Пе́тре, отгоня́ющей,// те́мже тя велича́ем.

Припев: Святы́й апо́столе Пе́тре, моли́ Бо́га о нас.

Мечта́ньми Си́мона волхва́ богобо́рца взя́та к возду́шней высоте́,/ низложи́в неизглаго́ланною Боже́ственною си́лою,// Петр ублажа́ется.

Припев: Святы́й апо́столе Пе́тре, моли́ Бо́га о нас.

Согреше́ний разреше́ние моли́твами твои́ми пода́ждь,// просвеще́ние же се́рдца и весе́лие ду́ха пою́щим па́мять твою́, апо́столе.

Припев: Святы́й апо́столе Пе́тре, моли́ Бо́га о нас.

Твоя́ вся испо́лнена сла́вы, освяще́ния же и чуде́с:// словеса́, мо́щи, персть и ве́рою, Пе́тре, покланя́емыя и любо́вию Боже́ственныя вери́ги.

Припев: Святы́й апо́столе Па́вле, моли́ Бо́га о нас.

Твои́м покланя́емся вери́гам, я́же за Христа́, я́ко злоде́й, носи́л еси́,/ я́звы же, Па́вле, облобыза́ем,// я́же на сла́внем твое́м и победоно́снем но́сиши телеси́.

Припев: Святы́й апо́столе Па́вле, моли́ Бо́га о нас.

Ны́не разреши́лся еси́, апо́столе, ко И́же тобо́ю непреста́нно Жела́емому,/ с Ни́мже я́ко служи́тель водворя́яся,// непреста́нными мольба́ми твоя́ рабы́ к себе́ привлецы́.

Сла́ва Отцу́ и Сы́ну и Свято́му Ду́ху.

Ны́не ника́коже в гада́ниих, ниже́ в зерца́ле Христо́с тебе́ зрим есть,/ лице́м же па́че зри́тся к лицу́,// соверше́нне тебе́ ра́зум открыва́я Божества́.

И ны́не и при́сно и во ве́ки веко́в, ами́нь.

Богородичен: Ты, Пресвята́я Богома́ти, похвала́ Христо́вых апо́столов была́ еси́,/ му́чеников же сла́ва и проро́ков основа́ние.// Те́мже, ве́рнии, Тя вси достодо́лжно велича́ем.

Свети́лен пра́здника:

Апо́столов вси верх воспое́м, Петра́ и Па́вла Боже́ственныя,/ вселе́нныя свети́льники, пропове́дники ве́ры, богосло́вныя трубы́, уче́ний сказа́тели,// церко́вныя столпы́ и разори́тели ле́сти.

Сла́ва Отцу́, и Сы́ну, и Свято́му Ду́ху. И ны́не и при́сно и во ве́ки веко́в, ами́нь.

Вели́ко и пресла́вно рождества́ Твоего́ та́инство, Богора́дованная Отрокови́це и Богома́ти Де́во,/ проро́цы пропове́даша, апо́столи научи́ша, му́ченицы испове́даша,// А́нгели же воспева́ют и челове́цы покланя́ются.

Хвали́тны псалмы́, глас 4:

Вся́кое дыха́ние да хва́лит Го́спода./ Хвали́те Го́спода с небе́с,/ хвали́те Его́ в вы́шних.// Тебе́ подоба́ет песнь Бо́гу.

Хвали́те Его́ вси а́нгели Его́,/ хвали́те Его́ вся си́лы Его́.// Тебе́ подоба́ет песнь Бо́гу.

Сти́хиры пра́здника, глас 4:

Стих: Хвали́те Его́ на си́лах Его́,/ хвали́те Его́ по мно́жеству вели́чествия Его́.

С небесе́ благода́ть прие́м,/ егда́ вопроше́ние ученико́м Спас дванадесяточи́сленным рече́ апо́столом:/ кого́ Мя глаго́лют челове́цы бы́ти?/ Тогда́ у́бо лу́чший апо́столов Петр,/ богосло́вствуя, отвеща́, я́сно возопи́в:/ Ты еси́ Христо́с, Жива́го Бо́га Сын./ Те́мже досто́йно ублажа́ется,/ я́ко свы́ше прие́м открове́ние,// вяза́ти же и реши́ти пра́ведно прие́м.

Стих: Хвали́те Его́ в тимпа́не и ли́це,/ хвали́те Его́ во стру́нах и орга́не.

И́же от Отца́ я́влься Бо́жие Сло́во,/ – кого́ Мя непщу́ете? – вопроша́ющу Христу́./ Ты Жива́го Отца́ Сын,/ – я́ко всем уста́ богогласу́я,/ а́бие возопи́л еси́,/ те́мже и блаже́н еси́, Си́моне вар Ио́на,/ возме́здие прия́л еси́./ И́бо сла́вит Бог Сего́ ве́рно сла́вящия,/ и к восприя́тию бога́тно призыва́ет,/ и ка́меня тебе́ непосты́дна,// Це́ркви водруже́ние и основа́ние положи́.

Стих: Хвали́те Его́ в кимва́лех доброгла́сных, хвали́те Его́ в кимва́лех восклица́ния./ Вся́кое дыха́ние да хва́лит Го́спода.

Свы́ше зван быв,/ а не от челове́к,/ егда́ земна́я тьма помрачи́ о́чи теле́сныя,/ нече́стия облича́я се́тование,/ тогда́ Небе́сный свет облиста́ мы́сленнии о́чи,/ благоче́стия открыва́я красоту́./ Те́мже позна́л еси́ изводя́щаго свет из тьмы,/ Христа́ Бо́га на́шего,/ Его́же моли́// спасти́ и просвети́ти ду́ши на́ша.

Глас 6: Сла́ва Отцу́ и Сы́ну и Свято́му Ду́ху.

Всечестны́й апо́столов приспе́ пра́здник Це́ркви Христо́ве,/ хода́тайствующий спасе́ние всем нам./ Та́йно у́бо восплеска́вше, к сим рцем:/ ра́дуйтеся, свети́льницы су́щим во тьме,/ мы́сленнаго Со́лнца зари́ облиста́ющии./ Ра́дуйтеся, Пе́тре и Па́вле,/ уче́ний Боже́ственных основа́ния незы́блема,/ дру́зи Христо́вы, сосу́ди честни́и./ Прииди́те посреди́ нас неви́димо,/ сподобля́юще даро́в невеще́ственных// ваш пра́здник восхваля́ющих пе́сньми.

Глас 6: И ны́не и при́сно и во ве́ки веко́в. Ами́нь.

Богоро́дице, Ты еси́ лоза́ и́стинная,/ возрасти́вшая нам Плод живота́,/ Тебе́ мо́лимся:/ моли́ся, Влады́чице, со святы́ми апо́столы// поми́ловати ду́ши на́ша.

Славосло́вие вели́кое:

Сла́ва в вы́шних Бо́гу, и на земли́ мир, в челове́цех благоволе́ние. Хва́лим Тя, благослови́м Тя, кла́няем Ти ся, славосло́вим Тя, благодари́м Тя, вели́кия ра́ди сла́вы Твоея́. Го́споди Царю́ Небе́сный, Бо́же О́тче Вседержи́телю, Го́споди, Сы́не Единоро́дный, Иису́се Христе́, и Святы́й Ду́ше. Го́споди Бо́же, А́гнче Бо́жий, Сы́не Оте́чь, взе́мляй грех ми́ра, поми́луй нас; взе́мляй грехи́ ми́ра, приими́ моли́тву на́шу; седя́й одесну́ю Отца́, поми́луй нас. Я́ко Ты еси́ еди́н Свят, Ты еси́ еди́н Госпо́дь, Иису́с Христо́с, в сла́ву Бо́га Отца́. Ами́нь.

На всяк день благословлю́ Тя, и восхвалю́ И́мя Твое́ во ве́ки, и в век ве́ка.

Сподо́би, Го́споди, в день сей без греха́ сохрани́тися нам. Благослове́н еси́, Го́споди, Бо́же оте́ц на́ших, и хва́льно и просла́влено И́мя Твое́ во ве́ки. Ами́нь.

Бу́ди, Го́споди, ми́лость Твоя́ на нас, я́коже упова́хом на Тя.

Благослове́н еси́, Го́споди, научи́ мя оправда́нием Твои́м. (Три́жды)

Го́споди, прибе́жище был еси́ нам в род и род. Аз рех: Го́споди, поми́луй мя, исцели́ ду́шу мою́, я́ко согреши́х Тебе́. Го́споди, к Тебе́ прибего́х, научи́ мя твори́ти во́лю Твою́, я́ко Ты еси́ Бог мой: я́ко у Тебе́ исто́чник живота́, во све́те Твое́м у́зрим свет. Проба́ви ми́лость Твою́ ве́дущим Тя.

Святы́й Бо́же, Святы́й Кре́пкий, Святы́й Безсме́ртный, поми́луй нас. (Три́жды)

Сла́ва Отцу́ и Сы́ну и Свято́му Ду́ху и ны́не и при́сно и во ве́ки веко́в. Ами́нь.

Святы́й Безсме́ртный, поми́луй нас.

Святы́й Бо́же, Святы́й Кре́пкий, Святы́й Безсме́ртный, поми́луй нас.

Тропа́рь праздника, глас 4:

Апо́столов первопресто́льницы/ и вселе́нныя учи́телие,/ Влады́ку всех моли́те/ мир вселе́нней дарова́ти// и душа́м на́шим ве́лию ми́лость.

Сла́ва Отцу́ и Сы́ну и Свято́му Ду́ху и ны́не и при́сно и во ве́ки веко́в. Ами́нь.

Утверди́, Бо́же, святу́ю правосла́вную ве́ру, правосла́вных христиа́н во век ве́ка.

Честне́йшую Херуви́м и Сла́внейшую без сравне́ния Серафи́м, без истле́ния Бо́га Сло́ва ро́ждшую, су́щую Богоро́дицу, Тя велича́ем.

Сла́ва, и ны́не. Го́споди, поми́луй. (Три́жды) Благослови́.

Господи Иисусе Христе, Сыне Божий, моли́твами Пречи́стыя Своея́ Ма́тере, святых славных и всехвальных апостол Петра и Павла, преподобных и богоносных отец наших и всех святы́х, поми́луй и спаси нас я́ко Благ и Челове́колюбец.

Многоле́тие:

Вели́каго Господи́на и Отца́ на́шего Кири́лла,/ Святе́йшаго Патри́арха Моско́вского и всея́ Руси́,/ и Господи́на на́шего (Высоко-) Преосвяще́ннейшаго (имярек),/ (архи-)епи́скопа (митрополита (титул)),/ богохрани́мую страну́ на́шу Росси́йскую,/ и вся правосла́вныя христи́аны,// Го́споди, сохрани́ их на мно́гая ле́та.