Шрифт

▲

Богослужебные тексты для домашнего употребления

Великие праздники и предпразднства

Последование Всеношного бдения в праздник Усекновения главы Пророка, Предтечи и Крестителя Господня Иоанна. Для домашнего (келейного) совершения

Оглавление

ВСЕНО́ЩНОЕ БДЕ́НИЕ

ВЕЛИ́КАЯ ВЕЧЕ́РНЯ

Моли́твами святы́х оте́ц на́ших, Го́споди Иису́се Христе́, Бо́же наш, поми́луй нас. Ами́нь.

Сла́ва Тебе́, Бо́же наш, сла́ва Тебе́.

Царю́ Небе́сный, Уте́шителю, Ду́ше и́стины, И́же везде́ сый и вся исполня́яй, Сокро́вище благи́х и жи́зни Пода́телю, прииди́ и всели́ся в ны, и очи́сти ны от вся́кия скве́рны, и спаси́, Бла́же, ду́ши на́ша.

Святы́й Бо́же, Святы́й Кре́пкий, Святы́й Безсме́ртный, поми́луй нас. (Трижды.)

Сла́ва Отцу́ и Сы́ну и Свято́му Ду́ху, и ны́не и при́сно и во ве́ки веко́в. Ами́нь.

Пресвята́я Тро́ице, поми́луй нас; Го́споди, очи́сти грехи́ на́ша; Влады́ко, прости́ беззако́ния на́ша; Святы́й, посети́ и исцели́ не́мощи на́ша, и́мене Твоего́ ра́ди.

Го́споди, поми́луй, (трижды). Сла́ва, и ны́не:

О́тче наш, И́же еси́ на Небесе́х, да святи́тся и́мя Твое́, да прии́дет Ца́рствие Твое́, да бу́дет во́ля Твоя́, я́ко на Небеси́ и на земли́. Хлеб наш насу́щный да́ждь нам днесь; и оста́ви нам до́лги на́ша, я́коже и мы оставля́ем должнико́м на́шим; и не введи́ нас во искуше́ние, но изба́ви нас от лука́ваго.

Таже, Го́споди, поми́луй, (12), Сла́ва, и ны́не:

Прииди́те, поклони́мся Царе́ви на́шему Бо́гу.

Прииди́те, поклони́мся и припаде́м Христу́, Царе́ви на́шему Бо́гу.

Прииди́те, поклони́мся и припаде́м Самому́ Христу́, Царе́ви и Бо́гу на́шему.

Псалом 103:

Поется часть псалма:

Благослови́, душе́ моя́, Го́спода. / Благослове́н еси́, Го́споди. / Го́споди, Бо́же мой, возвели́чился еси́ зело́. / Благослове́н еси́, Го́споди. / Во испове́дание и в велеле́поту обле́клся еси́. / Благослове́н еси́, Го́споди. / Посреде́ гор про́йдут во́ды. / Ди́вна дела́ Твоя́, Го́споди. / Вся прему́дростию сотвори́л еси́. / Сла́ва Ти, Го́споди, сотвори́вшему вся.

Или читается псалом полностью:

Благослови́, душе́ моя́, Го́спода. Го́споди, Бо́же мой, возвели́чился еси́ зело́. Во испове́дание и в велеле́поту обле́клся еси́. Одея́йся све́том, я́ко ри́зою, простира́яй не́бо, я́ко ко́жу. Покрыва́яй вода́ми превы́спренняя Своя́, полага́яй о́блаки на восхожде́ние Свое́, ходя́й на крилу́ ве́треню. Творя́й А́нгелы Своя́ ду́хи и слуги́ Своя́ пла́мень о́гненный. Основа́яй зе́млю на тве́рди ея́, не преклони́тся в век ве́ка. Бе́здна, я́ко ри́за, одея́ние ея́, на гора́х ста́нут во́ды, от запреще́ния Твоего́ побе́гнут, от гла́са гро́ма Твоего́ убоя́тся. Восхо́дят го́ры и нисхо́дят поля́ в ме́сто, е́же основа́л еси́ им. Преде́л положи́л еси́, eго́же не пре́йдут, ниже́ обратя́тся покры́ти зе́млю. Посыла́яй исто́чники в де́брех, посреде́ гор про́йдут во́ды. Напая́ют вся зве́ри се́льныя, ждут она́гри в жа́жду свою́. На ты́х пти́цы небе́сныя привита́ют, от среды́ ка́мения дадя́т глас. Напая́яй го́ры от превы́спренних Свои́х, от плода́ дел Твои́х насы́тится земля́. Прозяба́яй траву́ ското́м, и злак на слу́жбу челове́ком, извести́ хлеб от земли́. И вино́ весели́т се́рдце челове́ка, ума́стити лице́ еле́ем, и хлеб се́рдце челове́ка укрепи́т. Насы́тятся древа́ польска́я, ке́дри Лива́нстии, и́хже еси́ насади́л. Та́мо пти́цы вогнездя́тся, ероди́ево жили́ще предводи́тельствует и́ми. Го́ры высо́кия еле́нем, ка́мень прибе́жище за́яцем. Сотвори́л есть луну́ во времена́, со́лнце позна́ за́пад свой. Положи́л еси́ тму, и бысть нощь, в не́йже про́йдут вси зве́рие дубра́внии. Ски́мни рыка́ющии, восхи́тити и взыска́ти от Бо́га пи́щу себе́. Возсия́ со́лнце и собра́шася и в ло́жах свои́х ля́гут. Изы́дет челове́к на де́ло свое́ и на де́лание свое́ до ве́чера. Я́ко возвели́чишася дела́ Твоя́, Го́споди, вся прему́дростию сотвори́л еси́, испо́лнися земля́ тва́ри Твоея́. Сие́ мо́ре вели́кое и простра́нное, та́мо га́ди, и́мже несть числа́, живо́тная ма́лая с вели́кими, та́мо корабли́ препла́вают, змий сей, eго́же созда́л еси руга́тися eму́. Вся к Тебе́ ча́ют, да́ти пи́щу им во бла́го вре́мя. Да́вшу Тебе́ им соберу́т, отве́рзшу Тебе́ ру́ку вся́ческая испо́лнятся бла́гости, отвра́щшу же Тебе́ лице́, возмяту́тся, отъи́меши дух их, и исче́знут, и в персть свою́ возвратя́тся. По́слеши Ду́ха Твоего́, и сози́ждутся, и обнови́ши лице́ земли́. Бу́ди сла́ва Госпо́дня во ве́ки, возвесели́тся Госпо́дь о де́лех Свои́х, призира́яй на зе́млю, и творя́й ю́ трясти́ся, прикаса́яйся гора́м, и дымя́тся. Воспою́ Го́сподеви в животе́ мое́м, пою́ Бо́гу моему́, до́ндеже есмь, да услади́тся Ему́ бесе́да моя́, аз же возвеселю́ся о Го́споде. Да исче́знут гре́шницы от земли́, и беззако́нницы, я́коже не бы́ти им. Благослови́, душе́ моя́, Го́спода.

Со́лнце позна́ за́пад свой. Положи́л еси́ тму, и бысть нощь. Я́ко возвели́чишася дела́ Твоя́, Го́споди, вся прему́дростию сотвори́л еси́.

Сла́ва, и ны́не: Аллилу́иа, аллилу́иа, аллилу́иа, сла́ва Тебе́ Бо́же. Трижды.

Блаже́н муж:

Блаже́н муж, и́же не и́де на сове́т нечести́вых.

Аллилу́иа, аллилу́иа, аллилу́иа.

Я́ко весть Госпо́дь путь пра́ведных, и путь нечести́вых поги́бнет.

Аллилу́иа, аллилу́иа, аллилу́иа.

Рабо́тайте Го́сподеви со стра́хом и ра́дуйтеся Ему́ с тре́петом.

Аллилу́иа, аллилу́иа, аллилу́иа.

Блаже́ни вси наде́ющиися Нань.

Аллилу́иа, аллилу́иа, аллилу́иа.

Воскресни́, Го́споди, спаси́ мя, Бо́же мой.

Аллилу́иа, аллилу́иа, аллилу́иа.

Госпо́дне есть спасе́ние, и на лю́дех Твои́х благослове́ние Твое́.

Аллилу́иа, аллилу́иа, аллилу́иа.

Сла́ва Отцу́ и Сы́ну и Свято́му Духу.

Аллилу́иа, аллилу́иа, аллилу́иа.

И ны́не и при́сно и во ве́ки веко́в. Ами́нь.

Аллилу́иа, аллилу́иа, аллилу́иа.

Аллилу́иа, аллилу́иа, аллилу́иа, сла́ва Тебе́ Бо́же. (Три́жды)

Го́споди, воззва́х, глас 6:

Го́споди, воззва́х к Тебе́, услы́ши мя./ Услы́ши мя, Го́споди./ Го́споди, воззва́х к Тебе́, услы́ши мя:/ вонми́ гла́су моле́ния моего́,/ внегда́ воззва́ти ми к Тебе́.// Услы́ши мя, Го́споди.

Да испра́вится моли́тва моя́,/ я́ко кади́ло пред Тобо́ю,/ воздея́ние руку́ мое́ю/ – же́ртва вече́рняя.// Услы́ши мя, Го́споди.

Стихи́ры пра́здника, глас 6:

Стих: Из глубины́ воззва́х к Тебе́, Го́споди,// Го́споди, услы́ши глас мой.

Рождеству́ сотворя́ему безсту́днаго И́рода,/ скве́рныя пляса́вицы исполня́шеся сложе́ние кля́твы:/ Предте́чева бо глава́, отсе́кшися,/ я́ко снедь, ноша́шеся на блю́де возлежа́щим./ О, пи́ра ме́рзка,/ непреподо́бна дея́ния/ и уби́йства испо́лнена!/ Но мы Крести́теля, я́ко в рожде́нных жена́ми бо́льша,// досто́йно чту́ще, ублажа́ем.

Стих: И́мене ра́ди Твоего́ потерпе́х Тя, Го́споди, потерпе́ душа́ моя́ в сло́во Твое́,// упова́ душа́ моя́ на Го́спода.

Пляса́ учени́ца вселука́ваго диа́вола/ и главу́ твою́, Предте́че, мзду взят./ О, пи́ра, испо́лнена крове́й!/ Лу́чше бе не кля́тися, И́роде беззако́ние, лжи вну́че./ А́ще ли же и кля́лся еси́,/ но не о добре́ кля́лся:/ лу́чше бе солга́вшу жизнь получи́ти,/ не́же и́стинствовавшу главу́ Предте́чеву усе́кнути./ Но мы Крести́теля, я́ко в рожде́нных жена́ми бо́льша,// досто́йно чту́ще, ублажа́ем.

Стих: Хвали́те Го́спода вси язы́цы,// похвали́те Его́ вси лю́дие.

Не подоба́ше ти, о И́роде,/ прелюбодея́нию обличи́теля,/ ра́ди раче́ния сатани́нска/ и разжже́ния неи́стовнаго блуда́/ сме́ртию осуди́ти./ Не подоба́ше ти того́ всечестну́ю главу́/ пребеззако́нней жене́ ра́ди кля́твы пляса́ния преда́ти бе́дне./ О, ка́ко дерзну́л еси́ таково́ уби́йство соверши́ти!/ Ка́ко же не опали́ся скве́рная пляса́вица,/ посреди́ пи́ра на блю́де нося́щи сию́?/ Но мы Крести́теля, я́ко в рожде́нных жена́ми бо́льша,// досто́йно чту́ще,

Стих: Я́ко утверди́ся ми́лость Его́ на нас,// и и́стина Госпо́дня пребыва́ет во век.

Па́ки Ироди́я бе́сится,/ па́ки смуща́ется./ О, пляса́ния льсти́вна и пи́ра с ле́стию!/ Крести́тель усека́шеся, и И́род смуща́шеся./ Моли́твами, Го́споди, Твоего́ Предте́чи,// мир пода́ждь душа́м на́шим.

Глас 6: Сла́ва Отцу́ и Сы́ну и Свято́му Ду́ху.

И ны́не и при́сно и во ве́ки веко́в. Ами́нь.

Кто Тебе́ не ублажи́т, Пресвята́я Де́во;/ кто ли не воспое́т Твоего́ Пречи́стаго Рождества́;/ безле́тно бо от Отца́ Возсия́вый Сын Единоро́дный,/ То́йже от Тебе́, Чи́стыя, про́йде,/ неизрече́нно вопло́щься,/ естество́м Бог сый,/ и естество́м быв Челове́к нас ра́ди,/ не во двою́ лицу́ Разделя́емый,/ но во Двою́ Естеству́ несли́тно Познава́емый./ Того́ моли́, Чи́стая, Всеблаже́нная,// поми́ловатися душа́м на́шим.

Све́те Тихи́й:

Све́те Ти́хий святы́я сла́вы Безсме́ртнаго Отца́ Небе́снаго, Свята́го, Блаже́ннаго, Иису́се Христе́! Прише́дше на за́пад со́лнца, ви́девше свет вече́рний, пое́м Отца́, Сы́на и Свята́го Ду́ха, Бо́га. Досто́ин еси́ во вся времена́ пет бы́ти гла́сы преподо́бными, Сы́не Бо́жий, живо́т дая́й; те́мже мир Тя сла́вит.

Пареми́и:

Проро́чества Иса́иина чте́ние.

Та́ко глаго́лет Госпо́дь: утеша́йте, утеша́йте лю́ди Моя́, глаго́лет Бог. Свяще́нницы, глаго́лите в се́рдцы Иерусали́му, умоли́те его́, я́ко умно́жися смире́ние его́, разреши́ся бо грех его́, я́ко прия́т из руки́ Госпо́дни сугу́ба согреше́ния своя́. Глас вопию́щаго в пусты́ни: угото́вайте путь Госпо́день, пра́вы твори́те стези́ Бо́гу на́шему. На го́ру высо́ку взы́ди, благовеству́й Сио́ну, возвыша́й кре́постию глас твой, благовеству́й Иерусали́му, вознеси́те, не бо́йтеся. Аз Госпо́дь Бог, Аз услы́шу убо́гих, Изра́илев, и не оста́влю тех. Но отве́рзу от гор ре́ки и посреде́ по́ля исто́чники, сотворю́ пусты́ню в луг и жа́ждущую зе́млю во исто́чники водны́я. Да возвесели́тся не́бо свы́ше, и о́блацы да кропя́т пра́вду, да возсия́ет земля́, и да прозя́бнет ми́лость, и пра́вда да возсия́ет вку́пе. Глас весе́лия возвести́те, и услы́шано да бу́дет, возвести́те да́же до коне́ц земли́. Глаго́лите, я́ко изба́ви Госпо́дь раба́ Своего́ Иа́кова, и а́ще вжа́ждут в пусты́ни, источи́т им во́ду из ка́мене. Возвесели́ся, непло́ды неражда́ющая, расто́ргни и возопи́й, неболе́вшая, я́ко мно́га ча́да пусты́я па́че, не́жели иму́щия му́жа.

Проро́чества Малахи́ина чте́ние.

Та́ко глаго́лет Госпо́дь Вседержи́тель: се Аз посыла́ю А́нгела Моего́ пред лице́м Твои́м, и́же угото́вит путь Твой пред Тобо́ю. И прии́дет во храм Свой Госпо́дь, Его́же вы и́щете. И кто стерпи́т день вхо́да Его́? Зане́же Тому́ приити́, я́ко огнь в горни́ле и я́коже бы́лие перу́щих, и очи́стит, пояда́я и очища́я, я́ко сребро́ и зла́то. И прии́дет к вам судо́м, и бу́дет Свиде́тель скор на лука́выя, и на прелюбоде́йцы, и на клену́щияся и́менем Мои́м во лжу, и на лиша́ющия мзды нае́мника, и на наси́льствующия вдови́цы, и пха́ющия си́рыя, и на уклоня́ющия суд прише́льца, и на не боя́щияся Его́, глаго́лет Госпо́дь Вседержи́тель. Зане́ Аз Госпо́дь Бог ваш и не изменю́ Себе́. И вы, сы́нове Иа́ковли, уклони́стеся от зако́на и не сохрани́сте. Сего́ ра́ди обрати́теся ко Мне, и обращу́ся к вам, глаго́лет Госпо́дь Вседержи́тель, и ублажа́т вас вси язь́щы. И разуме́йте, я́ко Аз Госпо́дь, смотря́яй посреде́ пра́веднаго и посреде́ беззако́нника в день он, во́ньже сотворю́ снабде́ние лю́бящим Мя. Позна́йте у́бо и помяни́те зако́н Моисе́ов, раба́ Моего́, я́коже запове́да вам в Хори́ве, ко всему́ Изра́илю повеле́ние и оправда́ние. И се Аз послю́ вам Илию́ Фесви́тянина, пре́жде да́же не приити́ дню Госпо́дню вели́кому просвеще́нному, и́же напра́вит се́рдце отца́ к сы́ну и се́рдце челове́ка ко и́скреннему своему́, да не, прише́д, поражу́ зе́млю вско́ре, глаго́лет Госпо́дь Вседержи́тель, Бог Святы́й Изра́илев.

Прему́дрости Соломо́ни чте́ние.

Пра́ведник, а́ще пости́гнет сконча́тися, в поко́и бу́дет. Осу́дит же пра́ведник умира́яй живу́щия нечести́выя. У́зрят бо кончи́ну пра́веднаго и не разуме́ют, что совеща́ша о нем, я́ко пове́ржет Госпо́дь нечести́выя безгла́сны ниц и поколе́блет их от основа́ний, и до после́дняго исче́знут в боле́зни, и па́мять их поги́бнет. Прии́дут бо в помышле́ние согреше́ний свои́х ужа́сни, и обличи́т их сопроти́в беззако́ния их. Тогда́ ста́нет в дерзнове́нии мно́зе пра́ведник пред лице́м оскорби́вших его́ и отмета́ющих труды́ его́. Ви́девше же его́, смяту́тся стра́хом мно́гим и ужа́снутся о пресла́внем спасе́нии его́. Реку́т бо в себе́, ка́ющеся, и в тесноте́ ду́ха воздо́хнут и реку́т: сей бе, его́же име́хом не́когда в посме́х и в при́тчу поноше́ния, безу́мнии, житие́ его́ вмени́хом неи́стово и кончи́ну его́ безче́стну. Ка́ко вмени́ся в сыне́х Бо́жиих, и во святы́х жре́бий его́ есть? У́бо заблуди́хом от пути́ и́стиннаго, и пра́вды свет не облиста́ нам, и со́лнце не возсия́ нам. Беззако́нных испо́лнихомся стезь и поги́бели, и ходи́хом стези́ непрохо́дны, пути́ же Госпо́дня не разуме́хом.

Го́споди, поми́луй. (Три́жды,)

Сподо́би, Го́споди:

Сподо́би, Го́споди, в ве́чер сей без греха́ сохрани́тися нам. Благослове́н еси́, Го́споди, Бо́же оте́ц на́ших, и хва́льно и просла́влено и́мя Твое́ во ве́ки. Ами́нь.

Бу́ди, Го́споди, ми́лость Твоя́ на нас, я́коже упова́хом на Тя. Благослове́н еси́, Го́споди, научи́ мя оправда́нием Твои́м. Благослове́н еси́, Влады́ко, вразуми́ мя оправда́нием Твои́м. Благослове́н еси́, Святы́й, просвети́ мя оправда́нии Твои́ми.

Го́споди, ми́лость Твоя́ во век, дел руку́ Твое́ю не пре́зри. Тебе́ подоба́ет хвала́, Тебе́ подоба́ет пе́ние, Тебе́ сла́ва подоба́ет. Отцу́ и Сы́ну и Свято́му Ду́ху, ны́не и при́сно и во ве́ки веко́в. Ами́нь.

Лития́:

Стихи́ры:

Глас 1: Что тя нарече́м, проро́че,/ А́нгела ли? Апо́стола ли? Или́ му́ченика?/ А́нгела, зане́ я́ко безпло́тен пожи́л еси́;/ апо́стола, я́ко научи́л еси́ язы́ки;/ му́ченика же, я́ко твоя́ глава́ за Христа́ усече́ся.// Его́же моли́ поми́ловати ду́ши на́ша.

Отсе́ченней главе́ Предте́чеве па́мять соверша́ем:/ тогда́ у́бо на блю́де источа́ющи кровь,// ны́не же в конце́х пролива́ющи исцеле́ния.

Днесь непреподобноделообра́зная ма́ти уби́йства,/ е́же от беззако́ннаго сплете́ния своего́ всескве́рную дщерь/ над всех проро́к богоизя́щна бо́льшаго,/ убийственнообра́зным сове́том лука́вствова:/ вражде́бному бо И́роду творя́щу пир своего́ скве́рнаго рождества́,/ с кля́твою испроси́ти устро́и/ чудото́чную Богопропове́дника честну́ю главу́,/ е́же и соверши́ пребезу́мный,/ же́нскому пляса́нию дав ту возме́здие, кля́твенный дар./ Оба́че не преста́ таи́нник Христо́ва прише́ствия/ богоме́рзкое смеше́ние их и по кончи́не облича́ти,/ но, облича́я, вопия́ше:/ не подоба́ет ти, глаго́ля,/ прелюбоде́йствовати бра́та твоего́ Фили́ппа жену́./ О, рожде́ния пророкоуби́йственна/ и крове́й напо́лнена пи́ра!/ Мы же благочестному́дренне/ во усекнове́нии Предте́чеве,/ белообразу́юще, пра́зднуем,/ я́ко в благонаро́читый день ра́дующеся,/ и умо́лим сего́ благосе́рдствовати Тро́ицу/ от страсте́й безче́стия изба́вити нас// и спасти́ ду́ши на́ша.

Глас 4: Рожде́ние неподо́бно/ и пир безсту́днейший И́род соверши́л есть./ Любоде́йством бо же́нским услажда́емь/ и нечести́вым женонеи́стовством подстрека́емь,/ отсече́ главу́ Предте́чеву,/ но не отсече́ язы́ка проро́ческа,/ облича́ющаго безу́мие его́./ Пролия́ кровь непови́нну,/ покры́ти хотя́ грех беззако́нен,/ но ни о сем скры гла́са,/ вопию́щаго всем покая́ние./ Он у́бо свеселя́шеся уби́йством,/ мы же спра́зднуем любо́вию/ Крести́теля Иоа́нна блаже́нное заколе́ние./ Предвари́ бо во а́де,/ жизнь пропове́дати су́щим во тьме и се́ни сме́ртней седя́щим,/ свы́ше восто́к Христа́ Бо́га на́шего,// еди́наго Многоми́лостиваго.

Проро́ка, и му́ченика, и Крести́теля Спа́сова,/ прииди́те, лю́дие, восхва́лим:/ сей бо во пло́ти А́нгел сый,/ И́рода изобличи́л есть,/ пребеззако́ннаго любодея́ния соде́янием осуди́в его́./ И беззако́ннаго ра́ди пляса́ния/ честна́я глава́ отсека́ется,/ су́щим во а́де благовеству́яй из ме́ртвых воскресе́ние,/ и мо́лится приле́жно Го́сподеви// спасти́ся душа́м на́шим.

Проро́ка, и му́ченика, и Крести́теля Спа́сова,/ прииди́те, лю́дие, восхва́лим:/ я́ко бе́гая, в пусты́ни водворя́шеся,/ мед ди́вий и акри́ды яды́й,/ царя́ беззако́ннующа обличи́л есть;/ на́ше же малоду́шие утеша́ше, глаго́ля:// пока́йтеся, прибли́жи бо ся Ца́рство Небе́сное.

Глас 5: Сла́ва Отцу́ и Сы́ну и Свято́му Ду́ху.

Беззако́ннаго дея́ния обличе́ния/ убежа́ти И́род умы́слив,/ главу́ твою́, Предте́че,/ беззако́нней жене́ предаде́ па́костно,/ не разуме́ бо окая́нный, облича́я себе́,/ на блю́де обнося́ ю./ Но я́ко чистоты́ де́тельный учи́тель/ и покая́ния наста́вник спаси́тельный,/ моли́ся, Крести́телю Христо́в,// от страсте́й безче́стия изба́вити нас.

Глас 5: И ны́не и при́сно и во ве́ки веко́в. Ами́нь.

Воспо́йте, лю́дие, Ма́тери Бо́га на́шего, воспо́йте:/ днесь бо всесве́тлую ду́шу Свою́/ в пречи́стыя дла́ни/ из Нея́ вопло́щшагося без се́мене предае́т,/ Его́же и мо́лит непреста́нно// дарова́ти вселе́нней мир и ве́лию ми́лость.

Го́споди, поми́луй. (40 раз)

Стихи́ры на стихо́вне:

Стихи́ры: Глас 2:

Покая́ния пропове́дниче, Иоа́нне Крести́телю,/ отсе́чене бы́вшей твое́й главе́,/ зе́млю освяти́л еси́,/ зане́ зако́н Бо́жий ве́рным уясни́л еси́/ и беззако́ние потреби́л еси́,/ я́ко предстоя́ престо́лу Небе́снаго Царя́ Христа́,// Того́ моли́ поми́ловати ду́ши на́ша.

Стих: Пра́ведник, я́ко фи́никс, процвете́т,/ я́ко кедр, и́же в Лива́не, умно́жится.

Зако́на ра́ди Госпо́дня/ во главу́ усекнове́н был еси́,/ о всесвяты́й Иоа́нне!/ Обличи́л еси́ царя́ злочести́ва, беззако́нновавша/ дерзнове́нием непоро́чным./ Те́мже дивя́тся тебе́ во́инства а́нгельская,/ сла́вят тя ли́цы апо́стол и му́ченик./ Чтим твою́ и мы ле́тнюю па́мять, всесла́вне,/ сла́вяще Святу́ю Тро́ицу,// тебе́ венча́вшую, Предте́че блаже́нне.

Стих: Возвесели́тся пра́ведник о Го́споде/ и упова́ет на Него́.

И́же от проро́ка проро́к/ и бо́лий проро́ков быв,/ из чре́ва ма́терня освяще́нный в служе́ние Госпо́дне,/ днесь от беззако́нна царя́ в главу́ усекнове́н бысть,/ и безче́стно пляса́вшую отрокови́цу,/ я́сно и пре́жде усекнове́ния и по усекнове́нии обличи́в,/ посрами́ греха́ полк./ И сего́ ра́ди возопие́м:/ Крести́телю Иоа́нне,/ я́ко име́я дерзнове́ние,// приле́жно моли́ся о душа́х на́ших.

Глас 8: Сла́ва Отцу́ и Сы́ну и Свято́му Ду́ху.

Предте́че Спа́сов,/ ты царя́ изобличи́л еси́ беззако́ния не де́лати./ Те́мже игра́ние беззако́нный жены́/ повину́ И́рода отсещи́ твою́ главу́,/ и сего́ ра́ди от восто́к со́лнца да́же до за́пад хва́льно и́мя твое́./ Дерзнове́ние име́я ко Го́споду,// приле́жно моли́ спасти́ся душа́м на́шим.

И ны́не и при́сно и во ве́ки веко́в. Ами́нь.

Безневе́стная Де́во,/ Я́же Бо́га неизрече́нно заче́нши пло́тию,/ Ма́ти Бо́га Вы́шняго,/ Твои́х рабо́в мольбы́ приими́, Всенепоро́чная,/ всем подаю́щи очище́ние прегреше́ний:/ ны́не на́ша моле́ния прие́млющи,// моли́ спасти́ся всем нам.

Моли́тва свята́го Симео́на Богоприи́мца:

Ны́не отпуща́еши раба́ Твоего́, Влады́ко,/ по глаго́лу Твоему́, с ми́ром;/ я́ко ви́деста о́чи мои́ спасе́ние Твое́,/ е́же еси́ угото́вал пред лице́м всех люде́й,/ свет во открове́ние язы́ков,// и сла́ву люде́й Твои́х Изра́иля.

Святы́й Бо́же, Святы́й Кре́пкий, Святы́й Безсме́ртный, поми́луй нас. (Три́жды)

Сла́ва Отцу́ и Сы́ну и Свято́му Ду́ху, и ны́не и при́сно и во ве́ки веко́в. Ами́нь.

Го́споди, поми́луй. (Три́жды)

Сла́ва Отцу́ и Сы́ну и Свято́му Ду́ху, и ны́не и при́сно и во ве́ки веко́в. Ами́нь.

Тропа́рь, глас 2:

Па́мять пра́веднаго с похвала́ми,/ тебе́ же довле́ет свиде́тельство Госпо́дне, Предте́че:/ показа́л бо ся еси́ вои́стинну и проро́ков честне́йший,/ я́ко и в струя́х крести́ти сподо́бился еси́ Пропове́даннаго./ Те́мже за и́стину пострада́в, ра́дуяся,/ благовести́л еси́ и су́щим во а́де Бо́га, я́вльшагося пло́тию,/ взе́млющаго грех ми́ра// и подаю́щаго нам ве́лию ми́лость. (Дважды)

Богоро́дице Де́во, ра́дуйся,/ Благода́тная Мари́е, Госпо́дь с Тобо́ю:/ благослове́на Ты в жена́х/ и благослове́н Плод чре́ва Твоего́,// яко Спа́са родила́ еси душ на́ших. (Единожды)

Бу́ди И́мя Госпо́дне благослове́но от ны́не и до ве́ка. (Три́жды)

Псало́м 33:

Благословлю́ Го́спода на вся́кое вре́мя,/ вы́ну хвала́ Его́ во усте́х мои́х./ О Го́споде похва́лится душа́ моя́,/ да услы́шат кро́тцыи, и возвеселя́тся./ Возвели́чите Го́спода со мно́ю,/ и вознесе́м И́мя Его́ вку́пе./ Взыска́х Го́спода, и услы́ша мя,/ и от все́х скорбе́й мои́х изба́ви мя./ Приступи́те к Нему́, и просвети́теся,/ и ли́ца ва́ша не постыдя́тся./ Сей ни́щий воззва́, и Госпо́дь услы́ша и́,/ и от все́х скорбе́й его́ спасе́ и́./ Ополчи́тся а́нгел Госпо́день о́крест боя́щихся Его́,/ и изба́вит их./ Вкуси́те и ви́дите, я́ко благ Госпо́дь:/ блаже́н муж, и́же упова́ет Нань./ Бо́йтеся Го́спода, вси́ святи́и Его́,/ я́ко несть лише́ния боя́щимся Его́./ Бога́тии обнища́ша и взалка́ша:/ взыска́ющии же Го́спода// не лиша́тся вся́каго бла́га.

У́ТРЕНЯ.

Шестопса́лмие:

Сла́ва в вы́шних Бо́гу, и на земли́ мир, в челове́цех благоволе́ние. (Три́жды)

Го́споди, устне́ мои́ отве́рзеши, и уста́ моя́ возвестя́т хвалу́ Твою́. (Два́жды)

Псалом 3:

Го́споди, что ся умно́жиша стужа́ющии ми́? Мно́зи востаю́т на мя, мно́зи глаго́лют души́ мое́й: несть спасе́ния eму́ в Бо́зе eго́. Ты же, Го́споди, Засту́пник мой еси́, сла́ва моя́ и вознося́й главу́ мою́. Гла́сом мои́м ко Го́споду воззва́х, и услы́ша мя от горы́ святы́я Своея́. Аз усну́х, и спах, воста́х, я́ко Госпо́дь засту́пит мя. Не убою́ся от тем люде́й, о́крест напа́дающих на мя. Воскресни́, Го́споди, спаси́ мя, Бо́же мой, я́ко Ты порази́л еси́ вся вражду́ющыя ми всу́е: зу́бы гре́шников сокруши́л еси́. Госпо́дне есть спасе́ние, и на лю́дех Твои́х благослове́ние Твое́.

Аз усну́х, и спах, воста́х, я́ко Госпо́дь засту́пит мя.

Псалом 37:

Го́споди, да не я́ростию Твое́ю обличи́ши мене́, ниже́ гне́вом Твои́м нака́жеши мене́. Я́ко стре́лы Твоя́ унзо́ша во мне, и утверди́л еси́ на мне ру́ку Твою́. Несть исцеле́ния в пло́ти мое́й от лица́ гне́ва Твоего́, несть ми́ра в косте́х мои́х от лица́ грех мои́х. Я́ко беззако́ния моя́ превзыдо́ша главу́ мою́, я́ко бре́мя тя́жкое отяготе́ша на мне. Возсмерде́ша и согни́ша ра́ны моя́ от лица́ безу́мия моего́. Пострада́х и сляко́хся до конца́, весь день се́туя хожда́х. Я́ко ля́двия моя́ напо́лнишася поруга́ний, и несть исцеле́ния в пло́ти мое́й. Озло́блен бых и смири́хся до зела́, рыка́х от воздыха́ния се́рдца моего́. Го́споди, пред Тобо́ю все жела́ние мое́ и воздыха́ние мое́ от Тебе́ не утаи́ся. Се́рдце мое́ смяте́ся, оста́ви мя си́ла моя́, и свет о́чию мое́ю, и той несть со мно́ю. Дру́зи мои́ и и́скреннии мои́ пря́мо мне прибли́жишася и ста́ша, и бли́жнии мои́ отдале́че мене́ ста́ша и нужда́хуся и́щущии ду́шу мою́, и и́щущии зла́я мне глаго́лаху су́етная и льсти́вным весь день поуча́хуся. Аз же я́ко глух не слы́шах и я́ко нем не отверза́яй уст свои́х. И бых я́ко челове́к не слы́шай и не имы́й во усте́х свои́х обличе́ния. Я́ко на Тя, Го́споди, упова́х, Ты услы́шиши, Го́споди Бо́же мой. Я́ко рех: да не когда́ пора́дуют ми ся врази́ мои́: и внегда́ подвижа́тися нога́м мои́м, на мя велере́чеваша. Я́ко аз на ра́ны гото́в, и боле́знь моя́ предо мно́ю есть вы́ну. Я́ко беззако́ние мое́ аз возвещу́ и попеку́ся о гресе́ мое́м. Врази́ же мои́ живу́т и укрепи́шася па́че мене́, и умно́жишася ненави́дящии мя без пра́вды. Воздаю́щии ми зла́я возблага́я оболга́ху мя, зане́ гоня́х благосты́ню. Не оста́ви мене́, Го́споди Бо́же мой, не отступи́ от Мене́. Вонми́ в по́мощь мою́, Го́споди спасе́ния моего́.

Не оста́ви мене́, Го́споди Бо́же мой, не отступи́ от Мене́. Вонми́ в по́мощь мою́, Го́споди спасе́ния моего́.

Псалом 62:

Бо́же, Бо́же мой, к Тебе́ у́тренюю, возжада́ Тебе́ душа́ моя́, коль мно́жицею Тебе́ плоть моя́, в земли́ пу́сте и непрохо́дне, и безво́дне. Та́ко во святе́м яви́хся Тебе́, ви́дети си́лу Твою́ и сла́ву Твою́. Я́ко лу́чши ми́лость Твоя́ па́че живо́т, устне́ мои́ похвали́те Тя. Та́ко благословлю́ Тя в животе́ мое́м, о и́мени Твое́м воздежу́ ру́це мои́. Я́ко от ту́ка и ма́сти да испо́лнится душа́ моя́, и устна́ма ра́дости восхва́лят Тя уста́ моя́. А́ще помина́х Тя на посте́ли мое́й, на у́тренних поуча́хся в Тя. Я́ко был еси́ Помо́щник мой, и в кро́ве крилу́ Твое́ю возра́дуюся. Прильпе́ душа́ моя́ по Тебе́, мене́ же прия́т десни́ца Твоя́. Ти́и же всу́е иска́ша ду́шу мою́, вни́дут в преиспо́дняя земли́, предадя́тся в ру́ки ору́жия, ча́сти ли́совом бу́дут. Царь же возвесели́тся о Бо́зе, похва́лится всяк клены́йся Им, я́ко загради́шася уста́ глаго́лющих непра́ведная.

На у́тренних поуча́хся в Тя. Я́ко был еси́ Помо́щник мой, и в кро́ве крилу́ Твое́ю возра́дуюся. Прильпе́ душа́ моя́ по Тебе́, мене́ же прия́т десни́ца Твоя́.

Сла́ва Отцу́ и Сы́ну и Свято́му Ду́ху, и ны́не и при́сно и во ве́ки веко́в. Ами́нь.

Аллилу́иа, аллилу́иа, аллилу́иа, сла́ва Тебе́ Бо́же. (Три́жды)

Го́споди поми́луй. (Три́жды)

Сла́ва Отцу́ и Сы́ну и Свято́му Ду́ху, и ны́не и при́сно и во ве́ки веко́в. Ами́нь.

Псалом 87:

Го́споди Бо́же спасе́ния моего́, во дни воззва́х, и в нощи́ пред Тобо́ю. Да вни́дет пред Тя моли́тва моя́: приклони́ у́хо Твое́ к моле́нию моему́, я́ко испо́лнися зол душа́ моя́, и живо́т мой аду прибли́жися. Привмене́н бых с низходя́щими в ров, бых я́ко челове́к без по́мощи, в ме́ртвых свобо́дь, я́ко я́звеннии спя́щии во гро́бе, и́хже не помяну́л еси́ ктому́, и ти́и от руки́ Твоея́ отринове́ни бы́ша. Положи́ша мя в ро́ве преиспо́днем, в те́мных и се́ни сме́ртней. На мне утверди́ся я́рость Твоя́, и вся во́лны Твоя́ наве́л еси́ на мя. Уда́лил еси́ зна́емых мои́х от Мене́, положи́ша мя ме́рзость себе́: пре́дан бых и не исхожда́х. О́чи мои́ изнемого́сте от нищеты́, воззва́х к Тебе́, Го́споди, весь день, возде́х к Тебе́ ру́це мои́. Еда́ ме́ртвыми твори́ши чудеса́? Или́ вра́чеве воскреся́т, и испове́дятся Тебе́? Еда́ пове́сть кто во гро́бе ми́лость Твою́, и и́стину Твою́ в поги́бели? Еда́ позна́на бу́дут во тьме чудеса́ Твоя́, и пра́вда Твоя́ в земли́ забве́нней? И аз к Тебе́, Го́споди, воззва́х и у́тро моли́тва моя́ предвари́т Тя. Вску́ю, Го́споди, отре́еши ду́шу мою́, отвраща́еши лице́ Твое́ от Мене́? Нищ есмь аз, и в труде́х от ю́ности моея́; возне́с же ся, смири́хся, и изнемого́х. На мне преидо́ша гне́ви Твои́, устраше́ния Твоя́ возмути́ша мя, обыдо́ша мя я́ко вода́, весь день одержа́ша мя вку́пе. Уда́лил еси́ от Мене́ дру́га и и́скренняго, и зна́емых мои́х от страсте́й.

Го́споди Бо́же спасе́ния моего́, во дни воззва́х, и в нощи́ пред Тобо́ю. Да вни́дет пред Тя моли́тва моя́: приклони́ у́хо Твое́ к моле́нию моему́.

Псалом 102:

Благослови́, душе́ моя́, Го́спода, и вся вну́тренняя моя́ и́мя свя́тое Его́. Благослови́, душе́ моя́, Го́спода, и не забыва́й всех воздая́ний Его́, очища́ющаго вся беззако́ния твоя́, исцеля́ющаго вся неду́ги твоя́, избавля́ющаго от истле́ния живо́т твой, венча́ющаго тя ми́лостию и щедро́тами, исполня́ющаго во благи́х жела́ние твое́: обнови́тся я́ко о́рля ю́ность твоя́. Творя́й ми́лостыни Госпо́дь, и судьбу́ всем оби́димым. Сказа́ пути́ Своя́ Моисе́ови, сыново́м Изра́илевым хоте́ния Своя́: Щедр и Ми́лостив Госпо́дь, Долготерпели́в и Многоми́лостив. Не до конца́ прогне́вается, ниже́ во век вражду́ет, не по беззако́нием на́шым сотвори́л есть нам, ниже́ по грехо́м на́шым возда́л есть нам. Я́ко по высоте́ небе́сней от земли́, утверди́л есть Госпо́дь ми́лость Свою́ на боя́щихся Его́. Ели́ко отстоя́т восто́цы от за́пад, уда́лил есть от нас беззако́ния на́ша. Я́коже ще́дрит оте́ц сы́ны, уще́дри Госпо́дь боя́щихся Его́. Я́ко Той позна́ созда́ние на́ше, помяну́, я́ко персть есмы́. Челове́к, я́ко трава́ дни́е eго́, я́ко цвет се́льный, та́ко оцвете́т, я́ко дух про́йде в нем, и не бу́дет, и не позна́ет ктому́ ме́ста своего́. Ми́лость же Госпо́дня от ве́ка и до ве́ка на боя́щихся Его́, и пра́вда Его́ на сыне́х сыно́в, храня́щих заве́т Его́, и по́мнящих за́поведи Его́ твори́ти я́. Госпо́дь на Небеси́ угото́ва Престо́л Свой, и Ца́рство Его́ все́ми облада́ет. Благослови́те Го́спода вси А́нгели Его́, си́льнии кре́постию, творя́щии сло́во Его́, услы́шати глас слове́с Его́. Благослови́те Го́спода вся Си́лы Его́, слуги́ Его́, творя́щии во́лю Его́. Благослови́те Го́спода вся дела́ Его́, на вся́ком ме́сте влады́чества Его́, благослови́, душе́ моя́, Го́спода.

На вся́ком ме́сте влады́чества Его́, благослови́, душе́ моя́, Го́спода.

Псалом 142:

Го́споди, услы́ши моли́тву мою́, внуши́ моле́ние мое́ во и́стине Твое́й, услы́ши мя в пра́вде Твое́й и не вни́ди в суд с рабо́м Твои́м, я́ко не оправди́тся пред Тобо́ю всяк живы́й. Я́ко погна́ враг ду́шу мою́, смири́л есть в зе́млю живо́т мой, посади́л мя есть в те́мных, я́ко ме́ртвыя ве́ка. И уны́ во мне дух мой, во мне смяте́ся се́рдце мое́. Помяну́х дни дре́вния, поучи́хся во всех де́лех Твои́х, в творе́ниих руку́ Твое́ю поуча́хся. Возде́х к Тебе́ ру́це мои́, душа́ моя́, я́ко земля́ безво́дная Тебе́. Ско́ро услы́ши мя, Го́споди, исчезе́ дух мой, не отврати́ лица́ Твоего́ от Мене́, и уподо́блюся низходя́щым в ров. Слы́шану сотвори́ мне зау́тра ми́лость Твою́, я́ко на Тя упова́х. Скажи́ мне, Го́споди, путь во́ньже пойду́, я́ко к Тебе́ взях ду́шу мою́. Изми́ мя от враг мои́х, Го́споди, к Тебе́ прибего́х. Научи́ мя твори́ти во́лю Твою́, я́ко Ты еси́ Бог мой. Дух Твой Благи́й наста́вит мя на зе́млю пра́ву. И́мене Твоего́ ра́ди, Го́споди, живи́ши мя, пра́вдою Твое́ю изведе́ши от печа́ли ду́шу мою́. И ми́лостию Твое́ю потреби́ши враги́ моя́ и погуби́ши вся стужа́ющыя души́ мое́й, я́ко аз раб Твой есмь.

Услы́ши мя, Го́споди, в пра́вде Твое́й и не вни́ди в суд с рабо́м Твои́м.

Дух Твой Благи́й наста́вит мя на зе́млю пра́ву.

Сла́ва Отцу́ и Сы́ну и Свято́му Ду́ху, и ны́не и при́сно и во ве́ки веко́в. Ами́нь.

Аллилу́иа, аллилу́иа, аллилу́иа, сла́ва Тебе́ Бо́же. (Три́жды)

Тропа́рь праздника, глас 2:

Сла́ва Отцу́ и Сы́ну и Свято́му Ду́ху. И ны́не и при́сно и во ве́ки веко́в. Ами́нь.

Вся па́че смы́сла,/ вся пресла́вная Твоя́, Богоро́дице, та́инства,/ чистоте́ запеча́танной и де́вству храни́му,/ Ма́ти позна́лася еси́ нело́жна,/ Бо́га ро́ждши И́стиннаго;// Того́ моли́ спасти́ся душа́м на́шим.

Го́споди, поми́луй. (Три́жды)

СЕДА́ЛЕН ПРА́ЗДНИКА, ГЛАС 5:

Хода́тая согла́сно зако́на и благода́ти, ве́рнии, соше́дшеся, восхва́лим:/ я́ко покая́ние нам пропове́да,/ и, И́рода я́ве обличи́в дерзнове́нне, в главу́ свою́ усе́чен бысть,// и ны́не, со А́нгелы живу́щи, Христу́ мо́лится спасти́ся нам.

Све́тлую твою́ па́мять днесь творя́ще,/ Спа́са и Го́спода моли́ти приле́жно Тя мо́лим, Предте́че,// всем да́ти согреше́ний проще́ние.

И́же от ложе́сн проро́ка, я́вльшагося нам,/ и от непло́дове свети́льника вселе́нней, я́сно произше́дша,/ в пе́снех восхва́лим Христо́ва Крести́теля/ и победоно́сна страда́льца Предте́чу Иоа́нна.// Мо́лится бо Го́сподеви поми́ловатися душа́м на́шим.

Сла́ва Отцу́ и Сы́ну и Свято́му Ду́ху.

Ны́не яви́ся нам Спа́сов Крести́тель и весели́т разу́мне помышле́ния ве́рных,/ пусты́ни красота́ и проро́ков печа́ть,/ те́мже Христо́в показа́ся Предте́ча и свиде́тель нело́жен прише́ствия Того́./ Духо́вными у́бо пе́сньми согла́сно Иоа́нну возопие́м:// проро́че пропове́дниче и́стины, моли́ся спасти́ся нам.

И ны́не и при́сно и во ве́ки веко́в. Ами́нь.

Удиви́шася, Чи́стая, вси А́нгелов ли́цы та́инству Твоего́ рожде́ния стра́шному:/ ка́ко, И́же вся содержа́й ма́нием еди́ным, объя́тии Твои́ми, я́ко Челове́к, содержи́тся,/ и прие́млет нача́ло Преве́чный, и млеко́м пита́ется,/ вся́кое дыха́ние пита́яй неизрече́нною бла́гостию!// И Тя, я́ко вои́стинну Бо́жию Ма́терь, хва́ляще, сла́вят.

Полиеле́й:

Хвали́те И́мя Госпо́дне, хвали́те, раби́ Го́спода.

Аллилу́иа, аллилу́иа, аллилу́иа.

Благослове́н Госпо́дь от Сио́на, живы́й во Иерусали́ме.

Аллилу́иа, аллилу́иа, аллилу́иа.

Испове́дайтеся Го́сподеви, я́ко Благ, я́ко в век ми́лость Его́.

Аллилу́иа, аллилу́иа, аллилу́иа.

Испове́дайтеся Бо́гу Небе́сному, я́ко в век ми́лость Его́.

Аллилу́иа, аллилу́иа, аллилу́иа.

Велича́ние:

Велича́ем тя,/ Крести́телю Спа́сов Иоа́нне,/ и почита́ем вси// честны́я твоея́ главы́ усекнове́ние.

Псало́м избра́нный:

Блаже́н муж, боя́йся Го́спода, в за́поведех Его́ восхо́щет зело́./ Сла́ва и бога́тство в дому́ его́./ И пра́вда его́ пребыва́ет в век ве́ка./ В па́мять ве́чную бу́дет пра́ведник./ Пра́ведник я́ко фи́никс процвете́т, я́ко кедр, и́же на Лива́не, умно́жится./ Возвесели́тся пра́ведник о Го́споде, и упова́ет на Него́./ Се́ устна́м мои́м не возбраню́, Го́споди./ Ты разуме́л еси́ пра́вду мою́, и и́стину мою́./ И язы́к мой поучи́тся пра́вде Твое́й, весь день хвале́ Твое́й./ Свет возсия́ пра́веднику, и пра́вым се́рдцем весе́лие./ Род пра́вых благослови́тся./ Сла́вою и че́стью венча́л еси́ его́./ Я́ко Ты благослови́ши пра́ведника, Го́споди./ Я́ко ору́жием благоволе́ния венча́л еси́ нас./ В ни́хже посети́ нас Восто́к с высоты́./ Яви́тися во тьме и се́ни сме́ртней седя́щим.// Напра́вить но́ги на́ша на путь ми́ра.

Сла́ва Отцу́ и Сы́ну и Свято́му Ду́ху и ны́не и при́сно и во ве́ки веко́в. Ами́нь.

Аллилу́иа, аллилу́иа, аллилу́иа,// сла́ва Тебе́, Бо́же. (Трижды)

Велича́ем тя,/ Крести́телю Спа́сов Иоа́нне,/ и почита́ем вси// честны́я твоея́ главы́ усекнове́ние.

Седа́льны:

Глас 8:

Предте́ча, ве́рнии, Крести́тель и А́нгел всех Изба́вителя,/ И́рода обличи́в за беззако́ние Иродиа́дино, умира́ет, во главу́ усе́чен,/ я́ко да и су́щим во а́де со дерзнове́нием благовести́т,/ я́ко Бог схо́дит та́мо плени́ти смерть.

Сла́ва Отцу́ и Сы́ну и Свято́му Ду́ху и ны́не и при́сно и во ве́ки веко́в. Ами́нь.

Сло́во О́тчее на зе́млю сни́де, и А́нгел све́тел Богоро́дице глаго́лаше:/ ра́дуйся, Благослове́нная, Я́же черто́г еди́на сохра́ньшая,/ зача́тие прие́мши Преве́чнаго Бо́га и Го́спода,// да от пре́лести, я́ко Бог, спасе́т род челове́ческий.

Степе́нна, глас 4:

От ю́ности моея́/ мно́зи бо́рют мя стра́сти,/ но Сам мя заступи́// и спаси́, Спа́се мой.

Ненави́дящии Сио́на,/ посрами́теся от Го́спода,/ я́ко трава́ бо огне́м// бу́дете изсо́хше.

Сла́ва Отцу́ и Сы́ну и Свято́му Ду́ху и ны́не и при́сно и во ве́ки веко́в. Ами́нь.

Святы́м Ду́хом/ вся́ка душа́ живи́тся,/ и чистото́ю возвыша́ется,// светле́ется Тро́йческим еди́нством, священнота́йне.

Го́споди, поми́луй. (Три́жды)

От Матфе́я Свята́го Ева́нгелия чте́ние

Сла́ва, Тебе́, Го́споди, сла́ва Тебе́.

Во вре́мя о́но, услы́шав И́род четвертовла́стник слух Иису́сов, рече́ отроко́м свои́м: Сей есть Иоа́нн Крести́тель, той воскре́се от ме́ртвых, и сего́ ра́ди си́лы де́ются о нем. И́род бо есмь Иоа́нна, связа́ его́, и всади́ в темни́цу, Иродиа́ды ра́ди жены́ Фили́ппа бра́та своего́. Глаго́лаше бо ему Иоа́нн: не досто́ит ти име́ти ея́. И хотя́ше его́ уби́ти, убоя́ся наро́да, зане́ я́ко проро́ка его́ име́яху. Дни́ же бы́вшу рождества́ И́родова, пляса́ дщи́ Иродиа́дина посреде́, и угоди́ И́родови. Те́мже и с кля́твою изрече́ ей да́ти, его́же а́ще воспро́сит. Она́ же нава́ждена ма́терию свое́ю, даждь ми, рече́, зде на блю́де главу́ Иоа́нна Крести́теля. И печа́лен бысть царь: кля́твы же ра́ди, и за возлежа́щих с ним, повеле́ да́ти ей. И посла́в усе́кну Иоа́нна в темни́це. И принесо́ша главу́ его́ на блю́де, и да́ша деви́це, и отнесе́ ма́тери свое́й. И присту́пльше ученицы́ его́, взя́ша те́ло его́, и погребо́ша е, и прише́дше возвести́ша Иису́сови. И слы́шав Иису́с оты́де отту́ду в корабли́, в пу́сто ме́сто еди́н. И слы́шавше наро́ди, по Нем идо́ша пе́ши от градо́в.

Сла́ва, Тебе́, Го́споди, сла́ва Тебе́.

Псало́м 50:

Поми́луй мя, Бо́же, по вели́цей ми́лости Твое́й, и по мно́жеству щедро́т Твои́х очи́сти беззако́ние мое́. Наипа́че омы́й мя от беззако́ния моего́, и от греха́ моего́ очи́сти мя. Я́ко беззако́ние мое́ аз зна́ю и грех мой предо мно́ю есть вы́ну. Тебе́ Еди́ному согреши́х, и лука́вое пред Тобо́ю сотвори́х, я́ко да оправди́шися во словесе́х Твои́х и победи́ши, внегда́ суди́ти Ти. Се бо в беззако́ниих зача́т есмь, и во гресе́х роди́ мя ма́ти моя́. Се бо и́стину возлюби́л еси́, безве́стная и та́йная прему́дрости Твоея́ яви́л ми еси́. Окропи́ши мя иссо́пом, и очи́щуся, омы́еши мя, и па́че сне́га убелю́ся. Слу́ху моему́ да́си ра́дость и весе́лие, возра́дуются ко́сти смире́нныя. Отврати́ лице́ Твое́ от грех мои́х, и вся беззако́ния моя́ очи́сти. Се́рдце чи́сто сози́жди во мне, Бо́же, и дух прав обнови́ во утро́бе мое́й. Не отве́ржи мене́ от лица́ Твоего́, и Ду́ха Твоего́ Свята́го не отыми́ от мене́. Возда́ждь ми ра́дость спасе́ния Твоего́, и Ду́хом Влады́чним утверди́ мя. Научу́ беззако́нныя путе́м Твои́м, и нечести́вии к Тебе́ обратя́тся. Изба́ви мя от крове́й, Бо́же, Бо́же спасе́ния моего́, возра́дуется язы́к мой пра́вде Твое́й. Го́споди, устне́ мои́ отве́рзеши, и уста́ моя́ возвестя́т хвалу́ Твою́. Я́ко а́ще бы восхоте́л еси́ же́ртвы, дал бых у́бо, всесожже́ния не благоволи́ши. Же́ртва Бо́гу дух сокруше́н, се́рдце сокруше́нно и смире́нно Бог не уничижи́т. Ублажи́, Го́споди, благоволе́нием Твои́м Сио́на, и да сози́ждутся сте́ны Иерусали́мския, тогда́ благоволи́ши же́ртву пра́вды, возноше́ние и всесожега́емая: тогда́ возложа́т на олта́рь Твой тельцы́.

Глас 6:

Сла́ва Отцу́ и Сы́ну и Свято́му Ду́ху./ Моли́твами свята́го сла́внаго Проро́ка, Предте́чи и Крести́теля Госпо́дня Иоа́нна,/ Ми́лостиве, очи́сти// мно́жество согреше́ний на́ших.

И ны́не и при́сно и во ве́ки веко́в. Ами́нь./ Моли́твами Богоро́дицы,/ Ми́лостиве, очи́сти// мно́жества согреше́ний на́ших.

Поми́луй мя, Бо́же,/ по вели́цей ми́лости Твое́й,/ и по мно́жеству щедро́т Твои́х// очи́сти беззако́ние мое́.

Стихи́ра, глас 6

Пляса́ учени́ца вселука́ваго диа́вола/ и главу́ твою́, Предте́че, мзду взят./ О, пи́ра, испо́лнена крове́й!/ Лу́чше бе не кля́тися, И́роде беззако́нне, лжи вну́че./ А́ще ли же и кля́лся еси́,/ но не о добре́ кля́лся:/ лу́чше бе солга́вшу жизнь получи́ти,/ не́же и́стинствовавшу главу́ Предте́чеву усе́кнути./ Но мы Крести́теля, я́ко в рожде́нных жена́ми бо́льша,// досто́йно чту́ще, ублажа́ем.

Го́споди, поми́луй. (12 раз)

Кано́н пра́здника, глас 8:

Песнь 1:

Ирмо́с: Во́ду проше́д, я́ко су́шу,/ и еги́петскаго зла избежа́в,/ изра́ильтянин вопия́ше:// Изба́вителю и Бо́гу на́шему пои́м.

Припев: Святы́й сла́вный Проро́че, Предте́че и Крести́телю Госпо́день Иоа́нне, моли́ Бо́га о нас.

От утро́бы непло́дныя я́вльшася проро́ка/ в ложесна́х Деви́ческих, во чре́ве Носи́мому неизрече́нно,// свяще́ннаго воспое́м Предте́чу.

Припев: Святы́й сла́вный Проро́че, Предте́че и Крести́телю Госпо́день Иоа́нне, моли́ Бо́га о нас.

Преде́лы естества́ превозше́д, пра́вды соблю́л еси́ зако́ны,// беззако́нное смеше́ние облича́я, не убоя́вся царе́ва суровства́.

Припев: Святы́й сла́вный Проро́че, Предте́че и Крести́телю Госпо́день Иоа́нне, моли́ Бо́га о нас.

Зако́нным млеко́м воспита́вся, законоположе́ние совокупле́ния зако́ннаго,/ я́ко зако́на печа́ть запеча́тствуя,// сопроти́вился еси́ ме́рзкому прелюбодея́нию.

Припев: Святы́й сла́вный Проро́че, Предте́че и Крести́телю Госпо́день Иоа́нне, моли́ Бо́га о нас.

Пусты́ни кра́сное овча́,/ Заха́риин плод и Елисаве́тино па́че наде́жди прозябе́ние,// предповелева́ет ве́рным торжествова́ти честну́ю его́ па́мять.

Припев: Святы́й сла́вный Проро́че, Предте́че и Крести́телю Госпо́день Иоа́нне, моли́ Бо́га о нас.

О, рожде́ния, испо́лнена кро́ве!/ О, пи́ра ме́рзка!/ Уби́йством бо пия́нство И́род раствори́,// трапе́за же его́ скверноуби́йства го́рькаго испо́лнися.

Сла́ва Отцу́, и Сы́ну, и Свято́му Ду́ху.

Обличи́вшаго И́рода беззако́ннующа, ве́рнии,/ и отсече́ние главы́ претерпе́вша, воспои́м Крести́теля,// я́ко за ре́вность Бо́жию умерщвле́на.

И ны́не и при́сно и во ве́ки веко́в, ами́нь.

Богоро́дичен: Неопи́саннаго Бо́га Сло́ва, всего́ все́льшася в Тя,/ родила́ еси́, Чи́стая Богороди́тельнице,/ сугу́ба Того́, я́ко еди́на су́ща Сы́на,// воплоще́нна из Тебе́ неизрече́нно.

Песнь 3:

Ирмо́с: Небе́снаго кру́га Верхотво́рче, Го́споди,/ и Це́ркве Зижди́телю,/ Ты мене́ утверди́ в любви́ Твое́й,/ жела́ний кра́ю, ве́рных утвержде́ние,// Еди́не Человеколю́бче.

Припев: Святы́й сла́вный Проро́че, Предте́че и Крести́телю Госпо́день Иоа́нне, моли́ Бо́га о нас.

Дре́вних я́ко хода́тай и но́вых, Предте́че, Ева́нгельских пропове́даний/ ты, предста́в, смеше́ние беззако́нное мучи́тельское обличи́л еси́,// сла́вную смерть, ра́дуяся, прия́л еси́.

Припев: Святы́й сла́вный Проро́че, Предте́че и Крести́телю Госпо́день Иоа́нне, моли́ Бо́га о нас.

От ма́тере беззако́нныя преднаучена́ отрокови́ца,/ объюроде́вшу пия́нством И́родови рече́:/ даждь на блю́де главу́ Иоа́ннову,// ма́тери да пода́м дар возжеле́нен.

Припев: Святы́й сла́вный Проро́че, Предте́че и Крести́телю Госпо́день Иоа́нне, моли́ Бо́га о нас.

Обличе́ния не терпя́ безсту́дный мучи́тель/ богоно́снаго твоего́ язы́ка, сла́вне Предте́че,// отрокови́це предае́т, же́нским пляса́нием, честну́ю твою́ страда́льную главу́, пресла́вне.

Припев: Святы́й сла́вный Проро́че, Предте́че и Крести́телю Госпо́день Иоа́нне, моли́ Бо́га о нас.

Бо́лий не воста́ в рожде́нных жена́ми Иоа́нна, взыва́ше Христо́с И́стина:/ во утро́бе бо позна́ созда́ние Созда́вшаго,// пропове́даше ма́терним гла́сом.

Припев: Святы́й сла́вный Проро́че, Предте́че и Крести́телю Госпо́день Иоа́нне, моли́ Бо́га о нас.

Пе́рстом, пе́рвее, показа́в А́гнца/ и язы́ком, второ́е, И́рода обличи́л еси́,// главо́ю же, тре́тие, источа́еши чудеса́ от зда́нна сосу́да нам.

Сла́ва Отцу́, и Сы́ну, и Свято́му Ду́ху.

Рожде́ние сла́вно, Крести́телю Христо́в, и житие́ твое́ непоро́чно,/ и предъизше́ствие че́стно, и показа́ние стра́нно,// смерть честна́ и погребе́ние сла́вно.

И ны́не и при́сно и во ве́ки веко́в, ами́нь.

Богоро́дичен: Бог Сый, Сам Себе́ истощи́л еси́, Единоро́дне,/ да спасе́ши, я́же созда́л еси́,/ и́хже ра́ди вочелове́чился еси́, вопло́щся от Де́вы,// и, все мое́ премени́в естество́, приве́л еси́ Твоему́ Роди́телю.

Седа́лен Предте́чи, глас 8:

От непло́дове просия́в судо́м Бо́жиим и у́зы разреши́в язы́ка о́тча,/ показа́л еси́ со́лнце, денни́цу озаря́ющее,/ и лю́дем в пусты́ни Зижди́теля пропове́дал еси́, А́гнца, взе́млющаго ми́ра грехи́./ Те́мже ре́вностию царя́ обличи́л еси́,/ в пресла́вную главу́ твою́ усе́чен быв, приснопа́мятне, Иоа́нне всехва́льне,/ моли́ся Христу́ Бо́гу согреше́ний оставле́ние дарова́ти/ пра́зднующим любо́вию святу́ю па́мять твою́.

Сла́ва Отцу́ и Сы́ну и Свято́му Ду́ху и ны́не и при́сно и во ве́ки веко́в. Ами́нь.

Я́ко Де́ву и еди́ну в жена́х, Тя, без се́мене ро́ждшую Бо́га пло́тию,/ вси ублажа́ем, ро́ди челове́честии:/ огнь бо всели́ся в Тя Божества́,/ и я́ко Младе́нца млеко́м пита́еши Зижди́теля и Го́спода./ Тем, а́нгельский и челове́ческий род, досто́йно сла́вим пресвято́е рождество́ Твое́/ и согла́сно вопие́м Ти:/ моли́ Христа́ Бо́га согреше́ний оставле́ние дарова́ти// покланя́ющимся ве́рою пресвято́му рождеству́ Твоему́.

Песнь 4:

Ирмо́с: Ты моя́ кре́пость, Го́споди,/ Ты моя́ и си́ла,/ Ты мой Бог, Ты мое́ ра́дование,/ не оста́вль не́дра О́тча/ и на́шу нищету́ посети́в./ Тем с проро́ком Авваку́мом зову́ Ти:// си́ле Твое́й сла́ва, Человеколю́бче.

Припев: Святы́й сла́вный Проро́че, Предте́че и Крести́телю Госпо́день Иоа́нне, моли́ Бо́га о нас.

Не моги́й терпе́ти обличе́ния де́рзости,/ и́же зако́на томле́нием пови́нный,/ ни де́рзость благоче́стия, и́же скве́рными сластьми́ растле́нный,// связа́в, блюдя́ше невеще́ственно Го́рним пре́жде конца́ лико́м совокупля́емаго.

Припев: Святы́й сла́вный Проро́че, Предте́че и Крести́телю Госпо́день Иоа́нне, моли́ Бо́га о нас.

Душевре́дным пия́нством и разжже́нием блу́дным поболе́в,/ отда́н окая́нный, отрокови́цы пляса́нием ножны́м свя́зан,/ уби́йца Проро́ка быва́ет.// Зача́т бо пия́нство блуда́ ма́терь и лю́тое беззако́ние породи́.

Припев: Святы́й сла́вный Проро́че, Предте́че и Крести́телю Госпо́день Иоа́нне, моли́ Бо́га о нас.

Вои́стинну в тебе́ не солга́ Боже́ственный глас:/ ты бо во проро́цех бо́льший еси́,/ я́ко проро́честву сподо́бился от са́мыя утро́бы в несоверше́нне телеси́,// и прорече́ннаго тобо́ю Бо́га Сло́ва и ви́дев, и крести́в в телеси́.

Припев: Святы́й сла́вный Проро́че, Предте́че и Крести́телю Госпо́день Иоа́нне, моли́ Бо́га о нас.

Уясни́л еси́ нам Христо́во Ца́рство,/ показа́л еси́ лю́дем пути́ покая́ния/ и И́рода обличи́л еси́ беззако́ннующа,// вели́кий пропове́дниче, Иоа́нне му́дре.

Припев: Святы́й сла́вный Проро́че, Предте́че и Крести́телю Госпо́день Иоа́нне, моли́ Бо́га о нас.

Не терпя́, Крести́телю, И́род обличе́ния,/ победи́ся гне́вом, и за́вистию, и го́рестию;/ и соблюда́ше вре́мя рожде́ния,// в не́же усече́ главу́ твою́, пропове́дниче Христо́в.

Припев: Святы́й сла́вный Проро́че, Предте́че и Крести́телю Госпо́день Иоа́нне, моли́ Бо́га о нас.

Весели́ся, Крести́телю, да игра́ет дух твой:/ облича́еши бо и та́мо безбо́жнаго И́рода/ и су́щим во а́де пропове́дуеши душа́м, глаго́ля:// спасе́ние на́ше прибли́жися.

Сла́ва Отцу́, и Сы́ну, и Свято́му Ду́ху.

Чуди́тся земля́ твоему́ житию́, Иоа́нне,/ пропове́дует не́бо непра́ведное твое́ заколе́ние,// и сказу́ет мно́жество доброде́телей твои́х Це́рковь, воспева́ющи.

И ны́не и при́сно и во ве́ки веко́в, ами́нь.

Богоро́дичен: Роди́вся от Ма́тере, Де́вы Непоро́чныя,/ сохрани́л еси́ чи́сту по рождестве́,// И́же в мое́ существо́ Весь обле́кся, греха́ кроме́.

Песнь 5:

Ирмо́с: Вску́ю мя отри́нул еси́/ от лица́ Твоего́, Све́те незаходи́мый,/ и покры́ла мя есть чужда́я тьма, окая́ннаго?/ Но обрати́ мя, и к све́ту за́поведей Твои́х// пути́ моя́ напра́ви, молю́ся.

Припев: Святы́й сла́вный Проро́че, Предте́че и Крести́телю Госпо́день Иоа́нне, моли́ Бо́га о нас.

Ма́терними наважде́ньми це́ну пляса́ния злоде́монскаго/ суро́выя льви́цы сурове́йшее исча́дие испроси́,/ ю́же и зве́рие са́ми в пусты́ни почита́ху,// главу́ Предте́чи и пропове́дника.

Припев: Святы́й сла́вный Проро́че, Предте́че и Крести́телю Госпо́день Иоа́нне, моли́ Бо́га о нас.

О, твои́х неизрече́нных и непости́жных суде́б, Человеколю́бче!/ Я́ко во утро́бе еще́ су́ща ма́терни, Ду́ха Свята́го прия́телище бы́вша// и возра́стша целому́дрием и чистото́ю скверна́вая испляса́ отрокови́ца.

Припев: Святы́й сла́вный Проро́че, Предте́че и Крести́телю Госпо́день Иоа́нне, моли́ Бо́га о нас.

Любе́зно и и́скренно изво́ли беззако́нное сопряже́ние лю́бящему/ к рожде́ственным его́ пития́м и проро́че присовокупи́ти уби́йство,// и ча́шу, испо́лнену святы́х и проро́ческих крове́й, сластолю́бием раствори́ти.

Припев: Святы́й сла́вный Проро́че, Предте́че и Крести́телю Госпо́день Иоа́нне, моли́ Бо́га о нас.

Пусты́нное овча́ и вселе́нней стяжа́ние Предте́ча// днесь гото́вит духо́вную трапе́зу нам.

Припев: Святы́й сла́вный Проро́че, Предте́че и Крести́телю Госпо́день Иоа́нне, моли́ Бо́га о нас.

Сласте́й раба́ и зако́нов престу́пника, обличи́л еси́, Иоа́нне, И́рода,// Иродиа́ды го́рькаго рачи́теля.

Сла́ва Отцу́, и Сы́ну, и Свято́му Ду́ху.

Иродиа́да пля́шет, Иоа́нн вя́жется и закала́ется./ О, пия́нства И́родова!// О, несмы́сльства души́ его́!

И ны́не и при́сно и во ве́ки веко́в, ами́нь.

Богоро́дичен: Ра́дуйся, Боже́ственная Горо́,/ от Нея́же Ка́мень отсече́ся без рук, Пречи́стая,// усыри́вшися Бо́гу и Сло́ву, Всенепоро́чная, пло́тию.

Песнь 6:

Ирмо́с: Очи́сти мя, Спа́се,/ мно́га бо беззако́ния моя́,/ и из глубины́ зол возведи́, молю́ся,/ к Тебе́ бо возопи́х, и услы́ши мя,// Бо́же спасе́ния моего́.

Припев: Святы́й сла́вный Проро́че, Предте́че и Крести́телю Госпо́день Иоа́нне, моли́ Бо́га о нас.

О за́поведех зако́на бе́дствуяй, блаже́нне,/ обличе́ньми наказу́еши беззако́нонавшаго:// не был бо еси́ трость, вра́жиих ве́тров коле́блема дунове́ньми.

Припев: Святы́й сла́вный Проро́че, Предте́че и Крести́телю Госпо́день Иоа́нне, моли́ Бо́га о нас.

Кро́вию закла́ния глава́ ка́плющи твоя́,/ принесе́ся блу́дным по́вигом вме́сто мзды,// И́рода облича́ющи и по кончи́не, я́ко естество́ смеси́вша.

Припев: Святы́й сла́вный Проро́че, Предте́че и Крести́телю Госпо́день Иоа́нне, моли́ Бо́га о нас.

В пусты́нях ходя́, власы́ велбу́жи покрыва́емь,/ во о́вех у́бо я́ко светосия́нно жил еси́ ца́рски,/ во о́вех же, я́ко ца́рску обнося́ красоту́,// над страстьми́ воцари́лся еси́.

Припев: Святы́й сла́вный Проро́че, Предте́че и Крести́телю Госпо́день Иоа́нне, моли́ Бо́га о нас.

Усече́ние честны́я и всехва́льныя твоея́ главы́, Предте́че Христо́в, почита́юще,// сла́вим твою́ приснохва́льную и всеми́рную па́мять, преблаже́нне.

Припев: Святы́й сла́вный Проро́че, Предте́че и Крести́телю Госпо́день Иоа́нне, моли́ Бо́га о нас.

О, скве́рнаго гоще́ния! О, го́рькаго рожде́ния!/ О, пия́нства скве́рнаго И́рода беззако́ннаго!/ Содержи́м бысть к беззако́нию и облича́емь,// Проро́ка уби́ти поучава́ется.

Сла́ва Отцу́, и Сы́ну, и Свято́му Ду́ху.

Пляса́вши но́вая еги́птяныня посреди́ пи́ра скве́рнено, главу́ испроси́,// сея́ обличи́вшую роди́тельницу и И́родову нало́жницу.

И ны́не и при́сно и во ве́ки веко́в, ами́нь.

Богоро́дичен: И́же ны́не Сын Де́вы, пе́рвее Сын Оте́ч показа́ся,/ не ин разумева́емь, от ви́димаго,// а́ще и пребы́сть еди́н во обою́ соверше́н.

Конда́к Предте́чи, глас 5:

Предте́чево сла́вное усекнове́ние/ смотре́ние бысть не́кое Боже́ственное,/ да и су́щим во а́де Спа́сово пропове́сть прише́ствие./ Да рыда́ет у́бо Ироди́я,/ беззако́нное уби́йство испроси́вши:/ не зако́н бо Бо́жий, ни живы́й век возлюби́,// но притво́рный, привре́менный.

И́кос:

Рожде́ние И́родово всем яви́ся непреподо́бно,/ егда́ посреди́ пита́ющихся глава́ постя́щагося предложи́ся, я́коже снедь:/ ра́дости совокупи́ся печа́ль, и сме́ху раствори́ся го́рькое рыда́ние,/ я́ко главу́ Крести́телеву на блю́де нося́, пред все́ми вни́де, я́коже рече́, отрокови́ца./ И кля́твы ра́ди рыда́ние нападе́ на вся возлежа́щия тогда́ с царе́м:/ не бо обвесели́ о́нех, ниже́ И́рода самого́./ Рече́ бо: оскорбе́ша печа́лию не и́стинною,// но притво́рною, привре́менною.

Песнь 7:

Ирмо́с: Бо́жия снизхожде́ния/ огнь устыде́ся в Вавило́не иногда́,/ сего́ ра́ди о́троцы в пещи́, ра́дованною ного́ю,/ я́ко во цве́тнице, лику́юще, поя́ху:// благослове́н еси́, Бо́же оте́ц на́ших.

Припев: Святы́й сла́вный Проро́че, Предте́че и Крести́телю Госпо́день Иоа́нне, моли́ Бо́га о нас.

Блу́дным жела́нием, лю́тым же пия́нством вооруже́н,/ прирази́вся, разсе́деся, к воздержа́ния столпу́ непрекло́нному// и целому́дрия ко гра́ду неразруши́мому, Христо́ву Крести́телю, И́род беззако́нный.

Припев: Святы́й сла́вный Проро́че, Предте́че и Крести́телю Госпо́день Иоа́нне, моли́ Бо́га о нас.

Не ужасе́ся, Предте́че, не устыде́ся, не ослабе́ науче́ная диа́волом,/ твою́ принося́щи честну́ю главу́ безсты́дно на блю́де,// наважде́нием ма́терним прельсти́вши ум.

Припев: Святы́й сла́вный Проро́че, Предте́че и Крести́телю Госпо́день Иоа́нне, моли́ Бо́га о нас.

Я́ко свети́льник, просия́л еси́, предпосла́вся же, я́ко А́нгел;/ я́ко Проро́к, пропове́дуеши А́гнца Бо́жия, я́вльшагося Христа́;/ я́ко му́ченик, мече́м во главу́ усе́клся еси́,// предвозвеща́я Того́ и су́щим во а́де ме́ртвым.

Припев: Святы́й сла́вный Проро́че, Предте́че и Крести́телю Госпо́день Иоа́нне, моли́ Бо́га о нас.

Зако́н Бо́жий пропове́дуя, Иоа́нн/ злочести́ваго не убоя́ся И́рода беззако́ннующаго уцелому́дрити:// огнь бо бе в нем греха́ его́.

Припев: Святы́й сла́вный Проро́че, Предте́че и Крести́телю Госпо́день Иоа́нне, моли́ Бо́га о нас.

О, главы́, я́сно законополага́ющия и от земли́ И́роду провозглаша́ющия:/ не досто́ит тебе́ беззако́ннующу багряни́цу носи́ти,// я́ко мучи́тельскую оде́жду.

Сла́ва Отцу́, и Сы́ну, и Свято́му Ду́ху.

Ору́жии скве́рными беззако́нный И́род вооружи́вся,/ с кля́твою исполня́ше беззако́ние,// гоще́ния пия́нство име́я та́мо, сво́инствующее тому́.

И ны́не и при́сно и во ве́ки веко́в, ами́нь.

Богоро́дичен: Безпло́тен сый – непрело́жно воплоти́ся;/ Безле́тен сый – во вре́мени позна́ся от Де́вы,// всех Зижди́тель, несме́сно пребы́в, я́коже бе, и быв, я́коже не бе.

Песнь 8:

Ирмо́с: Седмери́цею пещь/ халде́йский мучи́тель/ Богочести́вым неи́стовно разжже́,/ си́лою же лу́чшею спасе́ны, сия́ ви́дев,/ Творцу́ и Изба́вителю вопия́ше:/ о́троцы, благослови́те,/ свяще́нницы, воспо́йте,// лю́дие, превозноси́те во вся ве́ки.

Припев: Святы́й сла́вный Проро́че, Предте́че и Крести́телю Госпо́день Иоа́нне, моли́ Бо́га о нас.

Предтеки́й рождество́ Твое́ и Боже́ственное страда́ние,/ в преиспо́дних мече́м быва́ет проро́к и ве́стник та́мошняго прише́ствия Твоего́,/ я́ко глас Сло́ва Иоа́нн взыва́я:/ ме́ртвии, – Животода́вца, слепи́и, – Светода́вца,// плене́ннии, – Изба́вителя Христа́ превозноси́те во вся ве́ки.

Припев: Святы́й сла́вный Проро́че, Предте́че и Крести́телю Госпо́день Иоа́нне, моли́ Бо́га о нас.

Деви́ческаго рождества́ предте́к от непло́дове,/ ны́не во́льнаго вся Созда́вшаго бысть распя́тия предше́ственник,/ усекнове́нием главны́м су́щим во а́де зовы́й:/ о́троцы, благослови́те, свяще́нницы, воспо́йте,// лю́дие, превозноси́те во вся ве́ки.

Припев: Святы́й сла́вный Проро́че, Предте́че и Крести́телю Госпо́день Иоа́нне, моли́ Бо́га о нас.

Главе́ твое́й от телесе́ отъя́те бы́вши, Предте́че,/ твое́ю пло́тию душа́ владя́щая от сея́ раздели́ся,/ но Божество́ от пло́ти Емману́ила не разлучи́ся отсю́ду,/ и кость не сокруши́ся Бо́га и Влады́ки.// Те́мже превозно́сим Его́ во ве́ки вся.

Припев: Святы́й сла́вный Проро́че, Предте́че и Крести́телю Госпо́день Иоа́нне, моли́ Бо́га о нас.

Пропове́давый Христо́во прише́ствие су́щим во а́де,/ ве́рою возвеща́я, боле́зни реша́яй прихо́дит Госпо́дь сла́вы,// Его́же превозно́сим во вся ве́ки.

Припев: Святы́й сла́вный Проро́че, Предте́че и Крести́телю Госпо́день Иоа́нне, моли́ Бо́га о нас.

В темни́це тя затвори́ И́род, Иоа́нне, втора́го Илию́,/ и, желе́зными у́зы связа́в, уби́,// покая́ния и Ца́рствия ве́рнаго священнопропове́дника.

Благослови́м Отца́, и Сы́на, и Свята́го Ду́ха, Го́спода.

О, трапе́зы, кро́ве испо́лненныя!/ О, сне́дей, уби́йством растворе́нных!/ О, пи́ра, испо́лнена су́етства!// О, безчелове́чия и скверноуби́йства И́рода беззако́ннаго!

И ны́не и при́сно и во ве́ки веко́в, ами́нь.

Богоро́дичен: Горе́ весь и до́ле весь, Сло́ве, в не́дрех О́тчих и Ма́тере Твоея́,/ весь Бог и весь естество́м Челове́к,// еди́н Ипоста́сию и сугу́б естество́м еси́, Ми́лостиве.

Песнь Пресвято́й Богоро́дицы:

Вели́чит душа́ Моя́ Го́спода,/ и возра́довася дух Мой о Бо́зе Спа́се Мое́м.

Честне́йшую Херуви́м/ и Сла́внейшую без сравне́ния Серафи́м,/ без истле́ния Бо́га Сло́ва ро́ждшую,/ су́щую Богоро́дицу, Тя велича́ем.

Я́ко призре́ на смире́ние рабы́ Своея́,/ се бо от ны́не ублажа́т Мя вси ро́ди.

Я́ко сотвори́ Мне вели́чие Си́льный,/ и свя́то И́мя Его́, и ми́лость Его́ в ро́ды родо́в боя́щимся Его́.

Сотвори́ держа́ву мы́шцею Свое́ю,/ расточи́ го́рдыя мы́слию се́рдца их.

Низложи́ си́льныя со престо́л, и вознесе́ смире́нныя;/ а́лчущия испо́лни благ, и богатя́щияся отпусти́ тщи.

Восприя́т Изра́иля о́трока Своего́, помяну́ти ми́лости,/ я́коже глаго́ла ко отце́м на́шим, Авраа́му и се́мени его́, да́же до ве́ка.

Песнь 9:

Ирмо́с: Устраши́ся всяк слух/ неизрече́нна Бо́жия снизхожде́ния,/ я́ко Вы́шний во́лею сни́де да́же и до пло́ти,/ от деви́ческаго чре́ва быв Челове́к.// Те́мже Пречи́стую Богоро́дицу, ве́рнии, велича́ем.

Припев: Святы́й сла́вный Проро́че, Предте́че и Крести́телю Госпо́день Иоа́нне, моли́ Бо́га о нас.

Устраши́ся полк лука́вый и сего́ предста́тель диа́вол/ богосло́внаго твоего́, Проро́че, язы́ка, Христа́ пропове́давшаго,/ и отрокови́цею скве́рною И́рода повину́ главу́ усещи́ твою́,// но мы тя, Крести́теля, велича́ем.

Припев: Святы́й сла́вный Проро́че, Предте́че и Крести́телю Госпо́день Иоа́нне, моли́ Бо́га о нас.

Удо́ль у́бо естества́ смире́на возвы́сися, и холм смири́ся сме́ртныя горды́ни,/ глас бо вопию́щаго воззва́ в пусты́нях све́та, во а́довых жили́щах:// врата́ возми́теся, Царь бо всех вни́дет.

Припев: Святы́й сла́вный Проро́че, Предте́че и Крести́телю Госпо́день Иоа́нне, моли́ Бо́га о нас.

Трепе́щут стра́сти челове́ческия и стра́хом отбега́ют де́мони,/ осене́нием от Бо́га тебе́ да́нныя благода́ти./ Но от обои́х искуше́ний ста́до твое́ изба́ви, Госпо́день Предте́че,// ве́рою тя при́сно велича́ющее.

Припев: Святы́й сла́вный Проро́че, Предте́че и Крести́телю Госпо́день Иоа́нне, моли́ Бо́га о нас.

Па́ки Иезаве́ль лику́ет на Илию́,/ па́ки еги́птяныня Ио́сифа и́щет,/ Проро́ка же и Крести́теля Спа́сова// – ны́не я́вльшаяся Иродиа́да скверна́вая.

Припев: Святы́й сла́вный Проро́че, Предте́че и Крести́телю Госпо́день Иоа́нне, моли́ Бо́га о нас.

Во главу́ усе́чен быв, Иоа́нне, от И́рода,/ су́щим в а́де душа́м посла́лся еси́/ пропове́дати Гряду́щаго и тех спасти́ всех,// пре́жде сконча́вшихся ве́рных от Ада́ма.

Сла́ва Отцу́, и Сы́ну, и Свято́му Ду́ху.

Свети́льник Све́та и глас Сло́ва сый, пропове́дник А́гнца Бо́жия,/ пусты́нное овча́, Иоа́нне, честны́й му́чениче Госпо́день,// моли́ спасти́ся пою́щим тя.

И ны́не и при́сно и во ве́ки веко́в, ами́нь.

Богоро́дичен: Еди́на в жена́х по рождестве́ яви́лася еси́ Де́ва,/ еди́на в жена́х Ты Богороди́тельница показа́лася еси́,/ еди́на разреши́ла еси́ от боле́зни Е́ву// и перворо́дную изсуши́ла еси́ кля́тву.

Свети́лен пра́здника:

Во проро́цех бо́льша позна́на и апо́стол предъизбра́нна бы́вша,/ песньми похва́льными венча́ем Предте́чу благода́ти:// во главу́ бо усе́чен бысть зако́на ра́ди Госпо́дня.

Сла́ва Отцу́ и Сы́ну и Свято́му Ду́ху.

Скве́рный И́род/ чистоты́ сади́телю, тебе́, Крести́телю Спа́сов,/ главу́ усече́ льсти́вне,// обличе́ний же твоего́ язы́ка посещи́ ника́коже возмо́же.

И ны́не и при́сно и во ве́ки веко́в. Ами́нь.

Я́же кля́тву мирску́ю Боже́ственным рождество́м Твои́м, Чи́стая, потре́бльши,/ ста́до, Тебе́ моля́щееся ве́рно, от вся́ких бед изба́ви// моли́твами Твои́ми Отрокови́це.

Хвали́тны псалмы́, глас 8:

Вся́кое дыха́ние да хва́лит Го́спода./ Хвали́те Го́спода с небе́с,/ хвали́те Его́ в вы́шних.// Тебе́ подоба́ет песнь Бо́гу.

Хвали́те Его́ вси а́нгели Его́,/ хвали́те Его́ вся си́лы Его́.// Тебе́ подоба́ет песнь Бо́гу.

Сти́хиры пра́здника, глас 8:

Стих: Хвали́те Его́ на си́лах Его́,/ хвали́те Его́ по мно́жеству вели́чествия Его́.

О, пресла́внаго чудесе́!/ Свяще́нную главу́ и А́нгелом гове́йную/ нечи́стая блудни́ца ноша́ше, отрокови́ца,/ обличи́вшую дея́ние беззако́нно,/ прелюбоде́йце ма́тери принесе́./ О, неизрече́ннаго твоего́ терпе́ния, Человеколю́бче!/ И́мже, Христе́, спаси́ ду́ши на́ша,// я́ко еди́н Благоутро́бен.

Стих: Хвали́те Его́ в тимпа́не и ли́це,/ хвали́те Его́ во стру́нах и орга́не.

О, И́родова окамене́ния!/ Обезче́стивый Бо́га зако́нными преступле́ньми,/ кля́твы соблюде́нием ле́стне лицеме́рствует/ и к прелюбодея́нию уби́йство прилага́ет,/ се́товати творя́йся./ О, неизглаго́ланнаго Твоего́ милосе́рдия, Влады́ко!/ И́мже, Христе́, спаси́ ду́ши на́ша,// я́ко еди́н Благоутро́бен.

Стих: Хвали́те Его́ в кимва́лех доброгла́сных, хвали́те Его́ в кимва́лех восклица́ния./ Вся́кое дыха́ние да хва́лит Го́спода.

О, па́че ума́ удивле́ния!/ Проро́ков печа́ть, земны́й А́нгел/ блу́дному пляса́нию показу́ется цена́,/ богосло́вный язы́к,/ предпосыла́ется и су́щим во а́де/ Христо́в провозве́стник./ О, несказа́ннаго Твоего́ промышле́ния, Влады́ко!/ И́мже, Христе́, спаси́ ду́ши на́ша,// я́ко еди́н Благоутро́бен.

Глас 6: Сла́ва Отцу́ и Сы́ну и Свято́му Ду́ху.

Па́ки Ироди́я бе́сится,/ па́ки смуща́ется./ О, пляса́ния льсти́вна и пи́ра с ле́стию!/ Крести́тель усека́шеся,/ и И́род смуща́шеся./ Моли́твами, Го́споди, Твоего́ Предте́чи// мир пода́ждь душа́м на́шим.

Глас 6: И ны́не и при́сно и во ве́ки веко́в. Ами́нь.

Богоро́дице, Ты еси́ лоза́ и́стинная,/ возрасти́вшая нам Плод живота́,/ Тебе́ мо́лимся:/ моли́ся, Влады́чице, со святы́ми апо́столы// поми́ловати ду́ши на́ша.

Славосло́вие вели́кое:

Сла́ва в вы́шних Бо́гу, и на земли́ мир, в челове́цех благоволе́ние. Хва́лим Тя, благослови́м Тя, кла́няем Ти ся, славосло́вим Тя, благодари́м Тя, вели́кия ра́ди сла́вы Твоея́. Го́споди Царю́ Небе́сный, Бо́же О́тче Вседержи́телю, Го́споди, Сы́не Единоро́дный, Иису́се Христе́, и Святы́й Ду́ше. Го́споди Бо́же, А́гнче Бо́жий, Сы́не Оте́чь, взе́мляй грех ми́ра, поми́луй нас; взе́мляй грехи́ ми́ра, приими́ моли́тву на́шу; седя́й одесну́ю Отца́, поми́луй нас. Я́ко Ты еси́ еди́н Свят, Ты еси́ еди́н Госпо́дь, Иису́с Христо́с, в сла́ву Бо́га Отца́. Ами́нь.

На всяк день благословлю́ Тя, и восхвалю́ И́мя Твое́ во ве́ки, и в век ве́ка.

Сподо́би, Го́споди, в день сей без греха́ сохрани́тися нам. Благослове́н еси́, Го́споди, Бо́же оте́ц на́ших, и хва́льно и просла́влено И́мя Твое́ во ве́ки. Ами́нь.

Бу́ди, Го́споди, ми́лость Твоя́ на нас, я́коже упова́хом на Тя.

Благослове́н еси́, Го́споди, научи́ мя оправда́нием Твои́м. (Три́жды)

Го́споди, прибе́жище был еси́ нам в род и род. Аз рех: Го́споди, поми́луй мя, исцели́ ду́шу мою́, я́ко согреши́х Тебе́. Го́споди, к Тебе́ прибего́х, научи́ мя твори́ти во́лю Твою́, я́ко Ты еси́ Бог мой: я́ко у Тебе́ исто́чник живота́, во све́те Твое́м у́зрим свет. Проба́ви ми́лость Твою́ ве́дущим Тя.

Святы́й Бо́же, Святы́й Кре́пкий, Святы́й Безсме́ртный, поми́луй нас. (Три́жды)

Сла́ва Отцу́ и Сы́ну и Свято́му Ду́ху и ны́не и при́сно и во ве́ки веко́в. Ами́нь.

Святы́й Безсме́ртный, поми́луй нас.

Святы́й Бо́же, Святы́й Кре́пкий, Святы́й Безсме́ртный, поми́луй нас.

Тропа́рь праздника, глас 2:

Сла́ва Отцу́ и Сы́ну и Свято́му Ду́ху и ны́не и при́сно и во ве́ки веко́в. Ами́нь.

Утверди́, Бо́же, святу́ю правосла́вную ве́ру, правосла́вных христиа́н во век ве́ка.

Честне́йшую Херуви́м и Сла́внейшую без сравне́ния Серафи́м, без истле́ния Бо́га Сло́ва ро́ждшую, су́щую Богоро́дицу, Тя велича́ем.

Сла́ва, и ны́не. Го́споди, поми́луй. (Три́жды) Благослови́.

Господи Иисусе Христе, Сыне Божий, моли́твами Пречи́стыя Своея́ Ма́тере Пророка, Предтечи и Крестителя Иоанна, преподобных и богоносных отец наших и всех святы́х, поми́луй и спаси нас я́ко Благ и Челове́колюбец.

Многоле́тие:

Вели́каго Господи́на и Отца́ на́шего Кири́лла,/ Святе́йшаго Патри́арха Моско́вского и всея́ Руси́,/ и Господи́на на́шего (Высоко-) Преосвяще́ннейшаго (имярек),/ (архи-)епи́скопа (митрополита (титул)),/ богохрани́мую страну́ на́шу Росси́йскую,/ и вся правосла́вныя христи́аны,// Го́споди, сохрани́ их на мно́гая ле́та.