Богородичник - каноны Божией Матери на каждый день.

Глас 3. Четверг.

Богородичен, глас 3.

Проро́цы пропове́даша, / апо́столи научи́ша, / му́ченицы испове́даша / и мы ве́ровахом Богоро́дицу Тя вои́стину су́щую. / Тем и велича́ем Рождество́ Твое́ неизрече́нное.

Слава и ныне, глас тойже:

Ки́йждо, иде́же спаса́ется, / та́мо пра́ведно и притека́ет, / и ко́е ино́е таково́е прибе́жище, / я́ко Ты, Богоро́дице, / покрыва́ющее ду́ши на́ша.

Канон Пресвятей Богородице

Песнь 1

Ирмос: Во́ды дре́вле, ма́нием Боже́ственным, во еди́но со́нмище совокупи́вый и раздели́вый мо́ре изра́ильтеским лю́дем, Сей Бог наш, препросла́влен есть: Тому́ Еди́ному пои́м, я́ко просла́вися.

Припев: Пресвята́я Богоро́дице, спаси́ нас.

Присе́нную Тя го́ру, ю́же прови́де Ду́хом Авваку́м проро́к, молю́, Пречи́стая, осени́ти мя, страстьми́ озное́ннаго, и от се́ни сме́ртныя лю́тых бед изба́витися.

Окропле́нием Боже́ственныя кро́ве, излия́нныя от Боже́ственных ре́бр, Чи́стая, Сы́на Твоего́, моего́ се́рдца омы́й ра́ны, я́ко да велича́ю Тя и по до́лгу сла́влю, Присноблаже́нную и Пренепоро́чную.

Слава: Равноде́тельное Отцу́ родила́ еси́ Сло́во, обожи́вшее челове́ков существо́: Того́ моли́ недоуме́ннаго мя и изнемо́гшаго вра́жиими кова́рствы Боже́ственныя уте́хи сподо́бити, Чи́стая.

И ныне: Очище́ние ми пода́ждь прегреше́ний Боже́ственными Твои́ми моли́твами, Де́во, си́льную бо и́маши моли́тву, Влады́чице: и Тебе́ пою́щия изба́ви от прегреше́ний и страсте́й, и скорбе́й, и обстоя́ния.

Песнь 3

Ирмос: Иже от не су́щих вся приведы́й, Сло́вом созида́емая, соверша́емая Ду́хом, Вседержи́телю вы́шний, в лю́бви Твое́й утверди́ мене́.

В ми́лости Неизрече́ннаго и в щедро́тах су́ща Бога́таго, ми́лостива су́щи, Пречи́стая, помоли́ уще́дрити ны озло́бленныя.

Храм су́щи вся́ческих Творца́, помоли́ся всели́тися в мя Уте́шителю, бы́вша мя верте́п душетле́нных разбо́йников, Чи́стая Де́во.

Слава: Ма́нием вся нося́щаго Бо́жески, на руку́ я́ко носи́ла еси́, Богоро́дице, при́зри на мя и изба́ви мя, е́же к страсте́м зре́ния неподо́бнаго.

И ныне: Милосе́рдие ми́лости Твоея́, молю́, отве́рзи ми, Богоро́дице Пречи́стая, и те́плая ми яви́ся в напа́стех помо́щница и спасе́ние.

Песнь 4

Ирмос: Положи́л еси́ к нам тве́рдую любо́вь, Го́споди, Единоро́днаго бо Твоего́ Сы́на за ны на смерть дал еси́. Те́мже Ти зове́м, благодаря́ще: сла́ва си́ле Твое́й, Го́споди.

Ра́ны, Христе́, и заколе́ние, во́лею я́ко Бог претерпе́вый, ура́ненную мою́ ду́шу разбо́йми бесо́вских озлобле́ний моли́твами Тебе́ Ро́ждшия исцели́, Еди́не многоми́лостиве.

Де́ло Твое́ю руку́, Зижди́телю есмь и творе́ние: зло́ба же змии́на сластьми́ жития́ сокруши́ мя. Те́мже, Христе́, обнови́ мя, Тебе́ Ро́ждшия, Слове, мольба́ми.

Слава: Сло́во Отчее па́че сло́ва родила́ еси́, реша́щее вся́каго безслове́сия челове́ки: Его́же приле́жно моли́ безслове́сными мя сластьми́ порабоще́нна свободи́ти, Еди́на Присноде́во.

И ныне: Исцеле́ние нам от дла́ни то́чиши всегда́, Всеосвяще́нная се́не, вся све́та су́щи испо́лнена, всем источа́ющи ми́ро благово́нно, Всечи́стая Богоневе́сто.

Песнь 5

Ирмос: Яко ви́де Иса́ия обра́зно на престо́ле превознесе́на Бо́га, от а́нгел сла́вы дориноси́ма, о окая́нный, вопия́ше, аз: прови́дех бо воплоща́ема Бо́га, Све́та невече́рня, и ми́ром влады́чествующа.

Пло́ти моея́ боле́зни, и душе́вную ми печа́ль претвори́ и уны́ния о́блаки отжени́, Де́во, Све́та о́блаче, и здра́вие и боле́зней премене́ние даждь ми пою́щему и любо́вию Тя славя́щему.

Тя хода́таицу и моли́твенницу ко из Тебе́ Ро́ждшемуся ны́не предлага́ю, вся́каго греха́ испо́лнен сый: Де́во, бу́ди ми жития́ исправле́ние и наста́вница к стези́ Боже́ственнаго Ра́зума.

Слава: Освяти́ ум мой, Де́во, и ду́шу просвети́, и Боже́ственныя сла́вы прича́стника сотвори́: се бо зол напо́лнихся, и вся́кими порабо́тихся сластьми́, и оскверне́ну приношу́ со́весть.

И ныне: Виногра́д Боже́ственный, Яже кра́сный Грозд возрасти́вшая, Иже душа́м даю́щий питие́ незави́стное: Де́во Свята́я Отрокови́це, Ты мя напо́й сла́дости Его́ и сласте́й пия́нство отыми́, и спаси́ мя.

Песнь 6

Ирмос: Иже в концы́ веко́в доше́дшия, Человеколю́бче, и треволне́ньми напа́стей поги́бнути бе́дствующия, вопию́щия не пре́зри: спаси́, Спа́се, я́коже спасл еси́ от зве́ря проро́ка.

Фарисе́я, вознесе́ннаго умо́м, превзыдо́х, возноша́емь при́сно, и про́пастем соедини́хся безме́рных прегреше́ний: смири́вшагося лю́те, Еди́на Чи́стая, изба́ви и уще́дри мя.

Иже пречу́дное Зача́тие име́вши и Рождество́, Твоя́ ми́лости на мне окая́ннем ны́не удиви́: и́бо в беззако́ниих зача́хся, и роди́хся, и сластьми́ поработи́хся.

Слава: Рыда́ю и пла́чу, и стеню́, егда́ суди́ще стра́шное воспомяну́, лука́вая бо дела́ стяжа́х: но Ты ми, неискусому́жная Де́во, Ма́ти Бо́жия, в час стра́шный предста́ни.

И ныне: Разуме́ти и глаго́лати не мо́жет всяк ум, Де́во Чи́стая, соде́янное на Тебе́ чу́до стра́нное и пресла́вное: ка́ко родила́ еси́, и пребыва́еши па́ки чиста́? Бог есть Рожде́йся по Существу́.

Таже: Го́споди поми́луй, трижды. Слава, и ны́не

Седален, глас 3:

Неискусобра́чная Чи́стая Ма́ти Твоя́, Христе́, зря́щи Тя ме́ртва, пове́шена на Древе́, ма́терски рыда́ющи, глаго́лаше: что Ти воздаде́ евре́йский беззако́нный собо́р и безблагода́тный, и́же мно́гих и вели́ких Твои́х даров наслади́выйся, Сы́не Мой? Пою Твое́ Боже́ственное сни́тие.

Песнь 7

Ирмос: Трие́ о́троцы в пещи́ Тро́ицу прообрази́вше, преще́ние о́гненное попра́ша, и пою́ще вопия́ху: благослове́н еси́ Бо́же оте́ц на́ших.

От дел спасе́ния несть ми, Влады́чице, грехи́ бо прилага́ю ко грехо́м и к зло́бе зло́бу: моли́твою у́бо Твое́ю Чи́стая, предвари́ и спаси́ мя.

Суд при две́рех, и суди́ще гото́во, гото́вися, смире́нная душе́, и возопи́й: егда́ су́диши ми, Сло́ве, не осуди́ мене́, моли́твами Ро́ждшия Тя.

Слава: Объе́м грехо́вныя плоды́, умертви́хся, и приноша́ю ду́шу непло́дну, и зову́ Ти, Пречи́стая: плодоно́сна мя покажи́, Яже Плодо́м Твои́м тлю потре́бльшая.

И ныне: О стра́ннаго та́инства! О ужа́снаго ра́зума! Ка́ко Бог на земли́ яви́ся я́ко челове́к? Яко весть, я́ко хо́щет, я́ко благоволи́т, и де́йствует, я́коже и хо́щет.

Песнь 8

Ирмос: Нестерпи́мому огню́ соедини́вшеся, Богоче́стия предстоя́ще ю́ноши, пла́менем же неврежде́ни, Боже́ственную песнь поя́ху: благослови́те, вся дела́ Госпо́дня, Го́спода и превозноси́те во вся ве́ки.

Вся я́ко до́бра, я́ко бли́жняя всех Царю́ бы́вши, Богоро́дице, напо́лни мя благи́х дел, в зло́бе пожи́вшаго и в ле́ности все житие́ сконча́вшаго, я́ко да Тя сла́влю во вся ве́ки.

Ки́товы утро́бы, я́коже изба́вил еси́ дре́вле проро́ка пресла́вно, Бо́жий Сло́ве: та́ко изба́ви, Спа́се, ны́не ду́шу мою́, попо́лзшуюся во глубину́ поги́бели, име́я моля́щую Тя неискусобра́чно ро́ждшую Тя Де́ву.

Слава: Кра́сною оде́ждею облече́на обре́тше мя зло́бы де́латели, и сея́ совлеко́ша мя: но Сама́ мя, Богороди́тельнице Де́во, Боже́ственными оде́ждами уясни́ покая́нием, моли́твами Твои́ми, Богоро́дице.

И ны́не: Его́же трепе́щет вся́ко созда́ние, Сего́, Чи́стая, на руку́ име́ла еси́, за милосе́рдие нас ра́ди Младе́нца бы́вша, Сего́ моли́ спасти́ вся ве́рою зову́щия: Тя превозно́сим, Пречи́стая, во вся ве́ки.

Песнь 9

Ирмос: В Зако́не се́ни и Писа́ний о́браз ви́дим, ве́рнии: всяк му́жеский пол, ложесна́ разверза́я, свят Бо́гу: тем перворожде́нное Сло́во, Отца́ Безнача́льна, Сы́на первородя́щася Ма́терию неискусому́жно, велича́ем.

Истле́вша умо́м и душе́ю и со́весть зло́бою оскверни́вша, и на́га всех благи́х я́вльшагося, Де́во нетле́нная, непоро́чная, не пре́зри мене́, но де́лы благоче́стия украси́.

Напо́лнихся зол, напо́лнихся помышле́ний, отчужда́ющих мя от Тебе́ Человеколю́бца, сего́ ра́ди стеню́ и вопию́: ка́ющася приими́ мя и не отри́ни мене́ Тебе́ Ро́ждшия мольба́ми, Благода́телю многоми́лостиве.

Слава: Да изба́влюся Твои́ми моли́твами, Всенепоро́чная Отрокови́це, от вся́каго гне́ва и страсте́й смертоно́сных лю́таго гее́нскаго огня́, от челове́к непра́ведных и от враг злых, прибеги́й в кров Твой и зовы́й Тя на по́мощь.

И ныне: Красну́ душе́ю, красну́ помышле́ньми, красну́ те́лом обре́т Тя Прекра́сный, от чресл Твои́х деви́ческих воплоти́ся, я́коже весть, безобра́зие на́ше украша́я, Де́во, Его́же моли́ спасти́ся нам.

Молитва ко Пресвятой Богородице

Ца­ри́це моя́ пребла­га́я, Наде́ждо моя́ Бо­го­ро́­ди­це, Прия́телище си́рых, и стра́нных Предста́тельнице, скорбя́щих Ра́досте, оби́димых Покрови́тельнице! Зри́ши мою́ беду́, зри́ши мою́ скорбь, помози́ ми я́ко не́мощну, окорми́ мя я́ко стра́нна. Оби́ду мою́ ве́си, разреши́ ту, я́ко во́лиши: я́ко не и́мам ины́я по́мощи ра́зве Тебе́, ни ины́я Предста́тельницы, ни бла­ги́я Уте́шительницы, то́кмо Тебе́, о Бо­гома́­ти; я́ко да сохрани́ши мя и покры́еши во ве́ки веко́в. Ами́нь.

Молитва Богородице в Четверг:

Кто Тебе по достоянию ублажити может, Пресвятая Дево, чии уста воспети способны Твое величие, всяк смысл превосходящее? Вся преславная о Тебе содеянная таинства, Богородице, выше смысла и слова суть; красоте девства Твоего и пресветлой чистоте Твоей удивишася Херувимы и ужасошася Серафимы; чудесе бо рождества Твоего нетленнаго ни человеческий, ни ангельский язык изрещи может. От Тебе бо безлетный и Единородный Сын Божий, Бог Слово, неизреченно воплощишся, родися и с человеки поживе, и Тя, яко Матерь Свою, зело возвеличи. Царицу Тя всея твари показа, нам же известное спасения пристанище. Тем вси под кров Твой притекающий, различными скорбями и болезньми одержимии, приемлют от Тебе богатно утешение и исцеление и Тобою от бед спасаются: Ты бо еси воистину Мати всех скорбящих и обремененных, печальных радость, больных целительница, юным хранительница, старости жезл, праведных похвала, грешным спасения надежда и к покаянию путеводительница: всем бо всегда предстательством Твоим помогавши и всех заступаешь, Всеблагая, прибегающих к Тебе с верою и любовию. Ты и мне помози, отчаянному деяний моих ради. Заступнице усердная рода христианскаго; заступи мя, да не до конца погибну во гресех, ибо не имам инаго прибежища и покрова, разве Тебе, Владычице Мати Живота; не остави убо мене и не презри мя, но ими же Сама веси судьбами спаси мя, яко благословенна еси во веки веков. Аминь.